MFWFW 2015

من بين الثلاثة أسابيع اللي خلصوا، أعتقد إن الملابس بميلانو كانت الأقل إثارة، فيه مجموعات حلوة، بس من المجموعات اللي اللي ما تكلمت عنها، الملابس اللي أعجبتني فيها قليل، يمكن الإستثناء كان برادا و بوتشي، عجبني فيها أكثر من لبس، بس مو أكثر من أربعة فما شفت إنها تستاهل موضوع لحاله.

ما أعرف ليه من ميلانو أختار أكثر لبس بالعادة مستحيل ألبسه، أو حتى أفكر، زي الفستان اللي كأنه شرايط (فوق الثاني من اليمين) من إيميلو بوتشي، مع إنه أبدا مو ستايلي، لكن أحس إذا لبس الشخص المناسب بيكون حلو، يمكن زوي سالدنا، أو سلينا قوميز أو كايلي مينوق، يمكن الأشخاص اللي ما ودي يلبسونه: بيونسية، جي لو، و كيم كرداشيان، بس خلونا نشوف.
من أكثر الملابس اللي أعجبتني هو اللبس اللي من فاوستو بولقيزي (تحت الأول من اليمين)، عجبتني مرة الألوان الصارخة، و عجبني البروش أو ما أعرف وش تكون القطعة اللي بالوسط، أحس اللبس هذا بيكون حلو على زندايا. أعجبتني البدلة اللي فوق من أكويلانو رايموندي، ما أتذكر إن روني مارا تلبس بدلات، بس أحس هذي بتكون حلوة عليها، أعجبني القطعة الترتر اللي طالعة من تحت. الفستان اللي بعده من جورجيو أرماني، أحسه ذوق ممثلة كبيرة (نايومي واتس أو جوليان مور أو حتي جودي فوستر)، لكن أحس بيكون حلو على إيما واتسون.
البدلة برادا تحت (صفراء ليموني) أحسه مصنوعة لإيل فانينق، بس ما عندي مانع أشوفها على أيد أحد على الريدكاربيت، اللوك اللي بعده من روبيرتو كفالي، أعجبني إن الجاكيت من دون أكمام و مبطن بقماش مشجر، أعرف إن لبس زي كذا ما يكون كثير على الريدكاربيت، بس أحسه بيكون حلو على بوبي دوليفان.
* باقي الملابس الجاكيت اللي فوق الأول من اليمين من No. 21 و اللبس الأخير تحت من جست كافالي. 

Lady in Yellow

ما أعرف إذا قد صرحت بعدم حبي للون الأصفر (على الملابس)، و إذا كنت صرحت لكم، ما أتذكر كم مرة قلتها لكم هنا، ما يهم إذا كنت قلتها قبل أو لا، لأني بأرجع أقولكم، إني ما أحب اللون الأصفر، بس كل مرة (أو أغلب المرات) أشوفه على الريدكاربيت، يكون لبس مرة يعجبني، زي شكل ليا سيدو بهذا الفستان اللي تحت من برادا، بحفل البافتا قبل كم يوم. 

أعتقد إن كل الثلاثة فساتين اللي حطيتها تحت، قد تكلمت عنها قبل، ميشيل وليمز بفيرا وانق بأوسكار 2006، إيما ستون بأتلييه فيرساتشي أظن السنة اللي فاتت بفرنسا، و دايان كروقر بجوائز ساق أعتقد 2009 بفستان من جايسون وو. لكن ما يمنع إني أجيب أشكالهم مرة ثانية علشان ندرس الموضوع من جديد. 

على إنها كلها لها أكثر من سنة (طبعا إلا ليا)، إلا إنها كلها بالنسبة لي لو أحد منهم لبسها أمس بأحبها زي ما حبيتها قبل سنة أو قبل عشر سنين. لما جمعت الصور على بعض أعتقد إن السر دايم يكون بالروج الغامق (أحمر أو فوشي أو عنابي) و العيون بس ماسكارا أو روموش صناعية، الشعر يكون ريترو، و أعتقد بعد إضافة مهمة، الواحد لازم ما يخاف من إختيار مجوهرات تكون ذهب أبيض يكسر اللون الأصفر اللي مسيطر على كل اللوك. 

إلى الآن ما جربت الأصفر، ما عندي مناسبة قريبة ببالي ممكن تخليني أجرب الأصفر و أشوف يمكني كنت ظالمته، و مو بس يطلع حلو على الريدكاربيت، بس أكيد أول مناسبة تحصل لي، باحط هذي الطلات ببالي. 

أنتم وش رأيكم بالأصفر بشكل عام؟ و بشكل ليا بالبافتا بشكل خاص؟ 

Bling, Bling

من فترة و أنا انتبه للمجوهرات، ما أدري أنا توي بادية أنتبه، أو صدق هذي الأشياء اللي باكتب عنها مميزة مرة؟ لا أكيد فيه أشياء مميزة مثل حلق شوبار اللي على كايت بلانشيت. أولا قبل ما أبدأ أنا زي أي مرأة بالعالم (أظن) أحب المجوهرات، بس ما أحب دايم الأشياء الكبيرة، أو اللي بس الهدف منها إن الواحد يوضح أنه يقدر يشتري مجوهرات غالية. علشان كذا أعتقد إني دايم أميل للأشياء الأنيقة، أو شكلها قديم، أو مميزة (من ناحية التصميم مو إن الحجر اللي فيها طلعوه بعد ما حفروا ثلاثة جبال، و مات 20 و هم يطلعونه، و .. و .. و. ما علينا خلونا نتكلم عن الأشياء اللي عاجبتني مؤخرا. 

يمكن هذا الموضوع بيكون أقل موضوع فائدة، لأني صراحة ما تعبت أدور الأشياء من وين، أو إذا فيه شيء يشبه لها، بس بغيت أوريكم وش عاجبني و أتكلم عنه. 

أولا خلوني أقولكم إن الألبوم هذا كل ماله يكبر أكثر، فقررت أكتب عنه قبل لا يتحول الموضوع لتمبلر كامل خاص بالمجوهرات (أعتقد إنه طلعت معاي الحين فكرة تمبلر جديد P:) أظن الموضوع بدأ مع جيزيل، بغلافها لمجلة بورتيه، كنت أقلب صورة الغلاف لأنه شكلها عليه مرة عاجبني، فيه أحساس ما أعرف أشرحه، بس أحب وجيه النساء 30+ و هم مرتاحات (لبس، وجه، شعر). قلت لكم يمكن ما فيه أحد يفهم هذ الإحساس اللي أحبه، لكن أحبه. فو أنا جالسة أشوف الصورة، انتبهت للخاتم، ما أعرف هو خاتم واحد، أو خاتمين واحد عليه الفص الأخضر (يمكن زمرد) و الثاني عادي دبلة الزواج (يمكن لو سويت بحث لقيته، بس أظن إني أعجز من إني أسوي بحث الحين). 

بعد أعجبني مرة (مع أنه المفترض يكون عادي) الحلق اللي على ميوشا برادا، ما أعرف وش اللي أعجبني فيه، يمكن لأنه بالعادة الحلق اللي بهذا الشكل يكون كبير، مو حلق حق "كل يوم"، بس مرة عجبني، لو فكرت أشتري حلق ألماس لكل يوم، أكيد بأفكر بشيء يشبه هذا. 

جاسيكا بايل (أيوه المرأة اللي بشفايف وردية فاقعة هي جاسيكا) لابسة عقد من تيفاني، أعجبني أنه كأنه شريطة معقودة. بعد مرأة ثانية ما طلع وجهها هنا أدل إيكساكوبلوس لابسة خاتم بأربع أصابع، صراحة ما قد أعجبني الخاتم أبو أربع أصابع، أحسه كأنه سوارة ما دخلت، بس هذا لأنه كأنه خيط أعجبني مرة، مع إني مو مرة مع الفيونكات، بس أحس هذا ظريف (متحمسة أعرف من وين). 

إذا ما كنتوا تدرون، من فترة و أنا عاجبتني الحلق اللي يلبس على الصيوان، هذي الصورة (ما أعرف لمين)، بس لقيتها بإنستچرام "مان ريبالير" عجبني مرة. 

آخر وحدة كايت بلانشيت بهذي الحلقات (الربيان) من شوبار، للي يعرفني، يعرف إن هذي نوعية المجوهرات اللي تعجبني، أعتقد أنهم لما يكونون فخمات بسهولة تنلبس مع ملابس سهرات، و مع ملابس كاجوال، و تكون حلوة بكل الحالتين، صراحة ما أقدر أوقف أشوف صورة كايت، أظنها بالنسبة لي غطت على كل الصور الثانية. 

بالمناسبة، و أنا أدور على بعض المواضيع علشان أحط لها رابط هنا، اكتشفت إن هوسي بالمجوهرات مو جديد، بس شكل عندي ذاكرة قصيرة P:. 

The Amazing Emma (Again)

قلت لكم إني راح أحاول أكتب عن إيما ستون بالجولة الترويجية لفيلم The Amazing Spiderman 2. صراحة ما أعرف الجولة خلصت أو لا، بس أعتقد إنها خلصت، لأنه آخر طلعه شفتها إيما كانت بالميت قالا، و طبعا الميت قالا مالها علاقة بالترويج للفيلم، حاولت أدور بالنت إذا لسا باقي شيء بالجولة، بس ما حصلت شيء، علشان كذا بأقرر أنه الجولة انتهت P:. 

إذا تتذكرون تكلمت عن إيما بجولتها للجزء الأول من The Amazing Spiderman، و بعد حطيت لبسها اللي لبسته لبريمير الفيلم الثاني بلندن لأحسن لبس لشهر أبريل (هنا الموضوع، لو ما كنتوا صوتوا إلى الآن). صراحة مستوى إيما ما كان أقل من الجولة اللي فاتت، يمكن الشيء الوحيد اللي تغير (أكيد غير الملابس) هو لون شعرها، من أشقر لأحمر. بالمناسبة وش تفضلون؟ إيما بالأحمر أو بالأشقر؟ للي ما يعرف إيما أساسا شقراء مو جينجير/ صهباء. بالنسبة لي مرات أحس إني أحبها أكثر أحمر، و مرات أحس الأشقر ما ينمل منه، بس الأحمر يمل. ما علينا خلونا نتكلم عن الملابس.

أولا خلونا نتكلم عن الأحمر، مو قلت لكم بموضوع الفساتين الحمراء هنا، أنه فيه موضوع ثاني بيكون فيه أحمر، هذا هو الموضوع. لما شفت إيما بهذا الفستان الڤالنتينو احترت أختاره هو أو الأصفر الاتلييه ڤيرساتشي لأحسن لبس لشهر أبريل، لكن أخيرا قررت إني أختار الأتلييه، لأني أعتقد أنه مو كثير نشوف لبس بهذي الفخامة. بس من جد هذا اللبس من أحسن الفساتين الحمراء اللي شفتها مؤخرا. 

لوك ثاني عجبني بعد، الفستان الأسود من چوتشي عند جيمي فالون، أعجبني مرة إن الفستان من قدام شكله عادي، بس من جمب يطلع مختلف مع الفتحة (الجزء الأسود جزء من الفستان مو برا)، على الأقل كذا كان بالرانواي. (لاحظتوا إني أحب إيما بالقصير أكثر؟) ما أعرف أحسها تكون مرتاحة أكثر. باقي الملابس من فوق يمين (ڤالنتينو (غير الأحمر)، إيرديم، ڤالنتينو (ثاني)). تحت من اليمين بعد چوتشي: (برادا، شانيل). 

أنتم وش رأيكم بشكل إيما بجولتها لفيلمها الأخير؟ أنا شخصيا دايم أنبسط على حضورها، أحسه حلو من دون تكلف. 

Best Dressed: April 2014

الشهر هذا زي ما قلت بنهاية التدوينة اللي فاتت يمكن الخيارات مو مثيرة أو فخمة زي الشهرين اللي فاتوا، لكن فيه شوي حيوية، و ألوان حلوة، مع أنه كثار لبسوا أسود هذا الشهر، على عكس شهر مارس، لما قلت لكم كثار لابسين أبيض، ما علينا، خلونا نبدأ بالملابس.

كان فيه أسود، و كان بعد فيه درجات الأحمر زي ما أنتم شايفين. للي قروا الموضوعين اللي كتبتهم ريم عن كوتشيلا (هنا و هنا) يمكن قروا ردي، و عرفوا رأيي بالملابس بالمهرجان، بس أنا ما عندي مشكلة مع البوهو، لكن بالنسبة لي يلبسه اللي دايم يلبسه زي نيكول ريتشي، سيينا ميلر و كايت موس، أعرف أنه لبس كايت موس هذا ما يعتبر بوهو بمقاييس كوشيلا، بس بنظري، كذا أعتقد المفروض تكون أناقة البوهو، مو كأنه تهريج. أنجليزية ثانية سوكي واترهاوس بماركة من إنجليزية ثالثة (ڤيكتوريا بيكام) عجبني مرة شكلها، عجبني شعرها، و مكياجها، و أكيد جزمها، الشيء الوحيد اللي مو مرة عاجبني الشنطة السوداء. 

أيما ستون بفستان أصفر من أتلييه ڤيرساتشي، إما الوقت هذا جالسة تروج لفيلم Amazing Spiderman 2 كل الجولة إلى حد الآن شكلها فيه مرة حلو (أعتقد باكتب عنها بشكل منفصل لما تخلص) بس هذا الفستان بالنسبة لي يستاهل يدخل أحسن لبس للشهر. 

آخر شيء باتكلم عنه دو جوان ببرادا (وسط، تحت)، صراحة قليل جدا إني انفتن بجمال وحدة. لا تفهموني غلط العالم مليان نساء جميلات، بس من بعد انفتاني بشكل لوبيتا بنهاية السنة اللي فاتت، السنة هذي، هذي المرأة خلتني ساعات أدور بصورها.

من أحسن لبس لشهر أبريل 2014؟

كايت موس بسان لوران

ديانا أقرون بكوشني إي أوكس

جايمي كينج بفالنتينو

سوكي واترهاوس بفيكتوريا بيكام

إيما ستون بأتلييه فيرساتشي

دو جوان ببرادا

سولانج نولز بأكني ستوديو

ألونا فرانسيس ببلانسياقا

Poll Maker

Best Dressed: February 2014

لشهر فبراير صراحة ما أتذكر إني شفت قد هالكمية من الملابس الحلوة، حتى مع كمية الملابس و المناسبات ما بغيت أختار أكثر من 8، بنفس الوقت حاولت زي دايم أنوع بأشكال و ستايل الملابس اللي أخترتها لكم من الشهر اللي فات. مع أنه أكثر الموجودين (مصممين و نساء) قد تكلمت عنهم هنا، بس مع ذلك مبسوطة أنه أكثر من اسم جداد على قائمة أحسن لبس.

صراحة المفضل عندي هو الفستان الأول من اليمين فوق، ليلي ألدريج بروزي أسولين، أحس من زمان ما شفت فستان مختلف، و هذا بالنسبة لي الفستان المختلف اللي كنت أنتظر أشوفه على الريد كاربيت. اللون الأبيض كان كثير على الريد كاربيت الشهر اللي فات (فبراير) و ديان كروقر طلعت بفستان ثاني أبيض حلو من إيلي صعب، الفستان حلو، بس أعتقد إن ديان سوت ثلاثة أرباع الشغل بشعرها و مكياجها (بذات الروج الأحمر). نفس الشيء لوبيتا لبست أبيض من جامباتيستا فالي، أعجبني مرة شكل إيمي روسم (تحت الأول من اليمين) ببنطلون أبيض بعد و توب مشكوك، أعتقد أنه شكلها أنيق من دون تكلف، و أشوف أنه أسهل لوك ممكن "يقلد" من الثمانية، من دون ما يطلع الواحد كأنه قاعد يحاول أنه يصير "كشخة".

ريانا هي الشخص الوحيد اللي يقدر يسوي و يلبس أي لبس ويطلع لابق عليه، ممكن تلبس اليوم جيرزي بايس بول، و بنطلون باقي و بكرا فستان باك ليس و شيفون و لا يطلع كأنها ما تدري وش تسوي، و لا عندها ستايل . عجبني مرة لبس تيلدا بعد بروب بس بطريقة مختلفة عن ريانا، تيلدا و بوبي (الثانية من اليمين الصف الثاني)، بالنسبة لي كذا الواحد يلبس "آندروجين" اللبس اللي مو نسائي و لا رجالي، لبس يصلح للإثنين، يمكن لبس تيلدا يحتاج كاريزما، مع البالطو أو الروب، بس بوبي لبسها سهل، و عرفت كيف تضيف لون مع الجزم الخضراء.

للي يبغى يصوت الأسماء تحت من اليمين لليسار الصف الأول، بعدين من اليمين لليسار بعد الصف الثاني. 

من أحسن لبس لشهر فبراير 2014؟

ليلي ألدريج بروزي أسولين

تيلدا سوينتين بهايدر أكيرمان

ليا سيدو ببراد

لوبيتا نايونقو بجامباتيستا فالي

إيمي روسم بكارلوينا إريرا

بوبي دولفين ببوربري

ديان كروقر بإيلي صعب

ريانا بفينتاج

Poll Maker

Best Dressed: January 2014 Winner

مع كل زحمة أسبوع الموضة بباريس، لازم  ما أنسى موضوع تصويت أحسن لبس لشهر يناير 2014، صحيح إنه من أقل الأشياء اللي أبذل فيها مجهود، حتى الفايز أنتم تختارونه أغلب الوقت، بس أحب أكتب عنها، لأنها تعلمني عن ذوقكم، و الأشياء اللي تحبونها.  أحس معها أقدر أقول تقريبا وش يحب يلبس غيري، بما أنه دايم الموضوع يحدده ذوقي بالمواضيع الثانية. خلونا من الكلام هذا و نتكلم عن أحسن لبس للشهر اللي فات. 

ليا سيدو (للي ما يعرفها إلى الآن، هي ممثلة فرنسية)، هي الوجه لواحد من عطور برادا مو متأكدة أي واحد، بس أظن أنه كاندي، و أتذكر مرة كانت وجه لحملتهم الدعائية، و الفترة الأخيرة صارت وجه للحملة الدعائية لميو ميو، فمو غريبة إنها تلبس ميو ميو و برادا. كل القطعتين من مجموعة ربيع 2014، البالطو الوردي برادا، و الفستان ميو ميو، صح أنه الماركتين مختلفات (أعرف إن المصممة وحدة) بس صراحة أحس أنه لحد الآن، أحسن وحدة لبست لميو ميو و برادا من المجموعة الأخيرة، الألوان كأنه مصنوعة لبعض، الجزمة مرة حلوة، و أهم شيء الشعر و المكياج على أنهم "طبيعيات" بس كانوا أحسن إكسسوار للبس. 

بكرا إن شاء الله راح أحط أحسن لبس لشهر فبراير، و أعتقد إن الخيارات مرة حلوة، أنتظروا. 

Best Dressed: January 2014

وصلنا لنهاية شهر يناير، و أول تصويت لأحسن لبس لهذي السنة، صراحة أنا انبسطت بالموضوع السنة اللي فاتت، ما أعرف عنكم أنتم، صحيح التصويت كان فيه مشاكل، بس لقيت موقع جديد، إن شاء الله يكون أحسن. المهم، خلونا نتكلم بالملابس خصوصا أنه شهر كان مليان بالحفلات و الجوائز. 

أعتقد أنه هذا الشهر على أنه شهر حفلات و جوائز، بس فيه خيارات مختلفة للبس من ناحية الذوق (أظن). تعرفون أني أحب ليا سيدو، لكن صدوقني مو بس لأني أحبها اخترتها، من زمان ما شفت لبس بهذا الذوق، و عندي استعداد انسخه كامل من دون ما أغير فيه شيء، من فترة و أنا أفكر ببالطو وردي أعتقد إنها لبسته بذوق مرة، و خلتني أتحمس للفكرة (يمكن الشتاء الجاي P:). أعجبني مرة شكل آنا فاريس بهذي الجمب سويت من نعيم خان، من زمان ما حسيت إنه فيه جمب سويت طلعت حلوة على الريدكاربيت، بس اختيارها مع لون شعرها و مكياجها عجبني مرة. قلت رأيي لأوليفيا وايلد و لوبيتا بلبسهم بالقولدين قلوب، بس إيديل ما شفت صورها إلا بعد يوم أو كذا، عجبني مرة، خصوصا شكله من فوق (جهة الصدر) و عجبني ظهره (أعرف مو واضح بالصورة)، و بعد عجبني شكل الفستان من تحت. باختصار عجبني كله. 

أدريانا ليما بهذا الفستان الأسود، صح الفترة الأخيرة عجبتني فتحات الصدر العميقة، بس مو هذا الشيء اللي عجبني بشكلها، العقد اللي لابسته أكثر شيء عجبني (شفت شيء يشبه له على كيم كارداشيان) المهم أعتقد أنه هوسي الجديد. آخر شيء أليزابيث بهذي البدلة من آخر مجموعة لأرماني برافي (اللي قبل أسبوع بس) شكلها كله أنيق، بس أكثر شيء عجبني اختيار الجزم، شيء ما أدري زي الشباشب أو ما أعرف وش هو، بس أعجبني. 

من أحسن لبس لشهر يناير 2014؟

ليا سيدو بميوميو و برادا

ساندرا بالوك بأليكس بيري

آنا فاريس بنعيم خان

أوليفيا وايلد بقوتشي بريمير

لوبيتا نيانقو برالف لورين

إيديل إيكساكابوليس بميوميو

أدريانا ليما بجيني كاين

إليزابيث ديبكي بأرمارني برافي

Poll Maker

Best Dressed: September '13 Winner

تقريبا خلص شهر أكتوبر، و هذا يعني أنه ما بقى إلا شهرين على نهاية السنة، و التصويت لأحسن فستان للسنة. التوصيت هذي المرة جا مرة متقارب، أصواتكم كانت موزعة بالتساوي (ما عادا صوت واحد فرق الفايز) على ستة من الملابس المرشحة، لكن بالنهاية أنتم اخترتوا لوبيتا نوينقو ببرادا. 

أنا شخصيا حابة لوبيتا مرة،  غير إنها حلوة مرة، لبسها مرة حلو (أتوقع فيه لبس لها راح يدخل التصويتات لأحسن لبس لشهر أكتوبر (لسا ما حددت). المهم ما علينا خلينا نرجع للبس. أعجبني مرة الفستان، مع إنه عندي قناعة إن هي لها دور كبير بشكلة، الفستان أعطاني أحساس أنه فينتاج، و تعرفون أحب كثير من الأشياء الفينتاج، حبيت بعد إنها اختارت معها شنطة ذهبية، الخيار كله كلاسيكي، بس لسبب ما أحسه طلع مرة فريش و جديد عليها. 

قبل لا أقفل الموضوع لأنه قربت نهاية السنة إن شاء الله، عندكم فكرة معينة كيف ممكن نسوي تصويت لشهر ديسمبر و تصويت لنهاية السنة؟ أنا عندي تصور مو متأكدة منه، بس أبغى أسمع رأيكم. 

و كالعادة انتظروا بكرا إن شاء الله للتصويت لأحسن ملابس أكتوبر.

Best Dressed: September 2013

زي ما قلت لكم قبل، ما أعرف ليه الملابس الحلوة كانت كثيرة هذا الشهر، لدرجة إني لما جيت أختار القائمة النهائية، كل شوي أحذف أحد و أدخل أحد، كله علشان آصل القائمة النهائية الأحسن. بصراحة ما أعرف أنا قدرت أختار الأحسن، أو فيه ناس طلعوا من القائمة و هم يستاهلون، بس خلونا نركز على الموجودين، و إن شاء الله يعجبونكم. 

أقدر أقول إن الثيم حق هذا الشهر هو المنكروم (الأبيض و الأسود) ما عادا دايان كروقر بفالنتينو و آشلي ميداكوي بمونيك لوليه (بالمناسبة كل الثنتين كانوا قبل موجودات بأحسن لبس). أول وحدة عرفت إني راح أدخلها هي لوبيتا نيونقو (الصف الأول، أول وحدة من اليسار) بفستان برادا (أتمنى إني قلت اسمها صح)، بصراحة ما أعرف هو الفستان حلو، و إلا هي اللي محليته. بس بشكل عام أعتقد لو استمرت على الساحة قدامنا وحدة أعتقد إنها بتكون من الموجودات دايم على هذي المدونة. سيينا ميلر بعد من الأشخاص اللي أعتقد إني صايرة ما أقدر أقول لأي شيء تلبسه أنه مو حلو، ما أعرف بس من ولدت و هي صايرة حلوة بعيني، قولوا لي أنكم أنتم بعد تشوفونها حلوة، مو بس أنا أتوهم. إليزابيث موس (أول يمين) للي ما يعرف ماد مين مثلا أعجبني شكلها مرة بالإيمي، و إن خياراتها كلها كلاسيكية، من شكل الفستان، لألوانه للون الروج. 

Create your free online surveys with SurveyMonkey , the world's leading questionnaire tool.

Art Class

ما أعرف إذا فيه قانون يمنع الكلام بالعروض من دون التكلم عن برادا أو ميو ميو أو عن الثنتين مع بعض؟!!! صراحة ما كنت أدري أنه اليوم المفروض عرض برادا و لا كنت مهتمة أعرف، على إني كل موسم شيء يبهرني من ميوشا برادا، مع ذلك ما أتحمس أشوف وش عندها (أعرف المفروض أنه يكون شيء غريب) . ما علينا نبدأ نتكلم بالعرض. 

أول شيء قبل لا تتكلمون أعرف إنها مجموعة صيف (المفروض) لكن بعد ما اخترت أحسن الملابس (بالنسبة لي) اكتشفت إني اخترت من 5 ثلاثة بالطوات !! خلونا نتجاهل هذي الحقيقة  و نركز على التصاميم. بالمجموعة كان فيه تأثير رياضي 

(زي كثير من العروض) شوفوا الشرابات و الفساتين. بنفس الوقت لازم فيه شيء ما نتوقعه من برادا.

بعض الملابس كانت عليها رسمات وجيه نساء و بعضها كان عليه رسمات قوس قزح، شيء كأنه رسمات أطفال (أكيد حبيته مرة) بالذات البالطو الفرو، ما أتذكر إني قد شفت شيء فرو فيه كمية (ما أعرف وش الكلمة المناسبة) يمكن الطفولية؟!! المرة الوحيدة اللي شفت شيء فرو ظريف مو فخم قبل هذا، بمجموعة فيكا قازينسكايا لخريف 2013. 

Prada's Gowns: Yay or Nay?

أعرف أنه كان (مهرجان كان) موجود و أنا متجاهلته، مو لأني ما أتابع، لكن كل مرة ودي أكتب عن شيء أقرر إني أخليه بعدين لأني ودي يدخل بقائمة أحسن الملابس لشهر مايو P:. المهم اليوم صار فيه فرصة إني أتكلم عن شيء صار بكان. قريت عند ريدكاربيت فاشن أواردز (أعتقد ما فيه أحد ما يعرف مدونتها) بتعليقها على فستان ميلا جوفوفيتش اللي لبسته اليوم في كان (على اليمين) لعرض فيلم كليوبترا. 

كاثرين تقول (أعتقد هذا اسم صاحبة المدونة) أنه بهذا الفستان أثبتت ميوتشا برادا أنه ما تعرف تصمم فساتين سهرة. صراحة أنا عجبني الفستان اللي على ميلا (لكان هذي السنة، لأنه موجود بالصورة فوق صورة لميلا بفستان بعد لبرادا بكان السنة اللي فاتت) أعرف أنه ما يلبسه أي أحد، لكن حسيت فيه شيء أنيق و مميز. 

طبعا بما إن كاثرين تقول إن برادا ما تعرف تصمم فساتين سهرة، جمعت لكم هنا بعض فساتين السهرة اللي صممتها برادا، و على الأقل "بوقتها"، كثير عجبتهم. (من اليمين :بالكحلي و الأسود لكان 2013 ميلا جوفوفيتش، فوق: بالأسود كيري موليقان لأوسكار 2010، فوق يسار: ميلا جوفوفيتش كان 2012، تحت يسار: آن هاثواي أوسكار 2013، تحت: قوينث بالترو فانيسيا 2011). 

المهم، السؤال لكم أنتم الحين، تعتقدون فعلا برادا ما تعرف تسوي فساتين سهرة؟ و إيش رأيكم بفستان ميلا لكان السنة هذي؟

Gingham is the New Plaid

الكاروهات لحد الآن أقدر أقول أنه من موضات خريف 2013 بعد ما شفناه بعروض ربيع 2013. لسبب ما، كنت أحاول أتجاهل أنه موجود تقريبا بأغلب العروض، مو لأنه مو عاجبني، بس ما أعرف ليه جاني شعور أنهم كلهم يقلدون دريس فان نوتين (تعرفون إني أحبه). ما أعرف ليه شيء جواتي يقول لكل عرض أشوف فيه كروهات: لا تقلد ... طبعا أنا حاطة نفسي هنا إني دريس فان نوتين :S. 

لأني كنت أحاول أسوي نفسي ما شفت الكاروهات بالعروض، و أتجاهل إني أتكلم عنها، لما شفت اليوم صور عرض برادا، وشفت هذي الملابس اللي مستخدمه فيه كاروهات "قينقام"، أنبسطت مرة، غير أنه فرصتي إني أتكلم عن الكاروهات، انبسطت كيف برادا اشتغلت على هذي الموضة بشكل مختلف (على الأقل ما أحس إنها قلدت فان نوتين P:). و السبب الثاني إني تكلمت عن هذا القماش الجمعة اللي فات بموضوع Oz. لما كنت أدور وقتها على أشياء حلوة بهذا القماش ما لقيت، بس الحين أنا مبسوطة إن برادا استخدمته (هذا يعني إننا بنشوف منه كثير، حتى بالهاي ستريت). 

ما أعرف ليه أحب هذا القماش أحس فيه شيء ريترو حلو، يمكن لأنه القماش اللي كانت كل بنت تشتريه لحصة التفصيل و نخيط فيه كل شيء: مريلة، تنورة، فستان أي شيء D:. 

مبسوطين زيي على قماش قينقام؟ أو تحسون أنه بايخ و تحبون أشكال الكاروهات الثانية؟

Best Dressed: May '12 Winners

أعرف إني صايرة كأني أمن على نفسي إني أكتب هنا، لكن أحلف لكم إني صايرة أدخل النت مره قليل، لأني إلى الآن ما عندي كمبيوتر صاحي، لكن إن شاء الله الفرج قرب :). 

بسرعة ندخل على الموضوع لأحسن لبس لشهر مايو اللي فات، و أخترتوا أنتم أودري توتو ببرادا. 

من زمان و أنا أحب أودري، ما أعرف ليه لما أشوفها (خصوصا و هي تمثل) ينشرح صدري ... مع إنها ما تطلع للعالم كثير، لكني انبسطت كثير لما شقتها بكان. حبيتها بهذا الفستان اللي بالأول توقعت أنه شانيل فينتاج (ما أعرف كيف قررت)، لكن طلع برادا، و شكله بس مصمم لها. صراحة ما توقعتكم تختارونه ما أعرف ليه؟ لكن انبسطت لما شفته هو اللي متقدم بأصواتكم .لأن اللوك هذا فيه كل شيء كلاسيكي و أحس لو شفته قبل عشرة سنوات أو بعد عشر سنوات بأظل حابة اللوك. 

بخصوص أحلى ملابس شهر يونيو زي دايم إن شاء الله راح تشوفونها بكرا.

Best Dressed: May '12

رجعنا لكم مرة ثانية بأحسن ملابس الشهر، هذي المرة لشهر مايو. مايو من الأشهر اللي كانت مرة دسمة بعد ميت قالا اللي كان فيه اختيارات كثيرة حلوة، جا مهرجان كان، فتقريبا كل الملابس من هذي المناسبتين.

جيزيل بندشين بجيفنشي
بميت قالا جيزيل كانت من الناس اللي شكلها كان حلو، عجبني كيف شكلها كله كان سليك و شيك.

أودري توتو ببرادا
ما حصل لي أتكلم عن أودري توتو بهذي المدونة يمكن إلا مرة، مو ذنبي لكن أودري ما تطلع للعالم كثير، لكني أحبها مرة. عجبني شكلها مرة، حسبت الفستان فينتاج، أصلا شكلها كله فينتاج، حبيته مرة.

دري هيمنقوي بتوب شوب يونيك
لو كنتوا ذاكرين هذا الفستان كان مرة عاجبني و أخترته مع الملابس اللماعة. المكياج و الشعر كلها حلوة.

دايان كروقر بجامبتيستا فالي
كنت مبسوطة من إن كروقر بلجنة التحكيم بكان، و لا خاب ظني من أول يوم طلعت لبست هذا الفستان الفستقي. من فترة طويلة ما شفت فستان راقي كذا.

دايان كروقر بفيفيان ويستوود

أعترف إن عندي هوس بتسريحات دايان كروقر، ما أعرف وش أحلى بهذا اللوك شعرها أو فستانها؟ عجبني شكل الفستان مرة مخلي شكل جسمها مرة حلو.

سولانج نويلز بريتشيل روي

تكلمت Reemito عن لوك سولانج. عجبني شكل الفستان و لونه، و أكثر شيء على عكس Reemito حبيت مرة الشعر الأوفرو مع كامل اللوك.

ليلى بختي بكارفين

ليلى كانت جاية لكان (تقريبا زي كل سنة)، هذي المرة للفوتو كول كانت لابسة تنورة من كارفين عليها طبعات كأنها لوحة من القرون الوسطى. عجبني إنها أختارت قميص أبيض مع هذي التنورة.

أليسكاندرا ماريا لارا بإيلي صعب

أليكساندرا طلعت بشيء  بكان أعتقد أنه صار خيار كلاسيكي للريد كاربيت، و أظن نادره أنك تشوف فستان لإيلي صعب بشكل سيء على الريد كاربيت. 

The Bodysuit

ما أعرف إن كنتوا متابعين أو منتبهين، لكن جينفير لورنس الحين بكل مكان، كله علشان فيلمها الجديد The Hunger Games، (بالمناسبة إن حصل لكم تشوفونه، لا تفوتونه الفيلم حلو). طبعا كالعادة مع أي فيلم "مهم" يطلع، نشوف بطلته على أغلفة المجلات، و جنيفير مو إستثناء. ما أعرف صراحة إلى حد الآن كم طلعت على غلاف (أعتقد أربعة)، لكن ثنين من هذي المجلات كانت جنيفير لابسة فيهم بودي سوت. 

كل المجلتين عدد أبريل الغلاف اللي علي اليسار لقلامر بريطانيا، و لابسة جنيفير فيه بودي سوت من برادا من مجموعة الربيع 2012، و الثاني لإنترفيو لابسة فيه (على ما أظن) بعد بودي سوت من دولتشي آن قابانا بعد ربيع 2012. قبل ما أتكلم عن البودي سوت، بجد مبسوطة من الغلافين، من فترة طويلة مرة ما شفت بهوليود وحده جسمها كذا، لو كان جسمي كذا ما فكرت أغير فيه و لا شيء، ولا أنقص و لا غرام ... بجد جسمها أنثوي بشكل رهيب. (علشان كذا مبسوطة إنه في أحد يقدر جسمها، مو لازم تصير مره نحيفة علشان تطلع على غلاف مجلة). 

نرجع للبودي سوت، زي مو واضح إن البودي سوت كانت بأكثر من عرض، أكثرها حتى ما يمكن تكون مايوه، و أعرف أنه مستحيل حتي بأكثر الأماكن تفتح بالعالم، ننتظر الناس يمشون فيها بالشارع، لكنها بتكون حلوة مع أشياء كثيرة. 

دورت بأكثر من مكان على بودي سوت حلوات، ممكن تلبس مع الملابس (مو بس لبس بحر أو سباحة)، و لقيت فيه مجموعة كبيرة مطلعتها وايلدفوكس (يمكن كثير منكم يعرفها قبل)، عليها طبعات حلوة. و ميزة هذي البودي سوت، أنه ممكن تلبس مع ملابس، و تقدرين تسبحين فيها. أعرف أسعارها مو رخيصة، لكن أحاول أعطيها تبرير إنها ممكن تستخدم لأكثر من شيء خصوصا إن طبعاتها حلوة، يعني للبس ممكن تلبسينها مع شورت، مع جينز (سكني، بوي فريند)، مع تنورة مكسرة مثلا (ميد، ماكسي)، فوقها شيء، لحالها فيه لها خيارات كثيرة (من زمان عاجبتني اللي عليها طبعات فضاء). يمكن هنا الصور مو مرة حلوة، لكن شيكوت عليها هنا الهيكل العظمي و هنا الفضاء، و فيه أشكال ثانية مختلفة.

شرايكم بالبودي سوت؟ و وشرايكم بجنيفير لورنس (أنا حابتها)؟ 

The New Suffragist

من زمان شفت بالتلفيزيون بداية فيلم لهيلاري سوان أعجبني، بس صار شيء معين و اضطريت إني أطلع من البيت ... بس قبل يومين رحت أدور على الفيلم من جديد و نزلته. الفيلم عن الـ"سفريج" اللي هي حركة حقوقية كانت بأمريكا و بريطانيا بدايات القرن الواحد وعشرين علشان يعطون النساء حق التصويت الفيلم حلو اسمه "أيرون جاود إنجيلز" (لو بغيتوا تشوفونه). الفيلم مو بس قصته حلوه، لكن بعد فيه ملابس كثيرة، حسيت أنه فيه أشياء كثيرة تشبه لها بعروض الشتاء الأخيرة، خصوصا كثرة القبعات.

(يسار). بعرض إيزابيل ماران، ما أنكرت إيزابيل إن المجموعة استوحتها من النساء الإمريكيات، خصوصا الروديو (راعيات البقر)، و لأنه الثيم كان أمريكي، كان فيه كثير قطع دانتيل بهذي المجموعة (يمين). عرض رالف لورين كان فيه كثير "ملابس الرجال للنساء"، وحدة من هذولي سفريج كانت تلبس أكثر من مرة كرافات (الأولى على اليمن فوق)، أعجبني شكلها خصوصا أنه المفروض أحداث الفيلم تكون قديمة، يعني لا كانت موضة، و لا أكيد عرض رالف لورين طلع P:.

(يسار). ما أعرف إن كان مارك جايكوبز قبل ما يصمم هذا العرض للوي فيتون شاف الفيلم، لكن فكرة البالطو و "القبعات المجنونة" زي ما هو قال عنها، كلها توحي أنه إما شاف الفيلم قريب، أو على الأقل كان مهتم بالفترة هذي اللي تسمى "الإدوردية". (يمين). بالفيلم المرة اللي على اليمين تمثل شخصية حقيقة لوحدة من سفرجيست إسمها "لوسي بيرنز" تقريبا أكثر مشاهدها بالفيلم كانت لابسة هذا البالطو اللي ذكرني بالطبعات بعرض برادا الأخير.

قد قلت لكم قبل أنه فكرة الملابس الداخلية كملابس طلعات من زمان عاجبتني، الشيء هذا كان بأكثر من عرض من عروض الصيف، و بعد نينا ريتشي، و بعض العروض الثانية عرضت بعض القطع اللي تقريبا نفس الفكرة، أعجبني هذا اللوك من العرض، خصوصا أنه يشبه كثير الملابس الداخلية، بس طبعا تلبس برا :).

Women in Sports

جلست الصباح أدور على صور لسوزان لنقلين (لو كنتوا قد سمعتوا بهذا الأسم، هو اسم واحد من ملاعب التنس اللي يسوى عليها مباريات غولان قاغوس) و هي لاعبة تنس فرنسية قديمة. أعجبني كثير شكلها و هي تلعب تنس. لما شفت صورها بغيت أكتب عنها بأي شكل، علشان كذا قررت أسوي هذا السيت

Sports Pioneers by dejavuar featuring prada handbags

Topshop sleeveless dress, $80
3 1 Phillip Lim leather vest, $1,200
Suede shoes, $64
Prada handbag, $2,950
Melissa Odabash wide brim sun hat, $160

أول ما فكرت بالسيت كان ببالي إني أدمج الفكرة مع وحدة من أهم موضات الربيع و الصيف الجاي، هي الملابس الرياضية، و إنتهيت بسيت فيه مو بس ملابس رياضية، لكن ثلاثه من أهم ملابس الصيف الجاي: ملابس العشرينات، ملابس رياضية و ألوان باستيل أو شقري من سكر/ sugar :) من فترة و أنا ودي أتكلم عن موضة الألوان هذي خصوصا إني شفتها بأكثر من محل هاي ستريت (زارا بالذات)، لكن ما لقيت شيء مثير يخليني أتكلم عنها.

 أي موضة من ملابس الصيف الجاي مبسوطة عليها ودك تلبسينها؟ ممكن تلبسينهم سوا زي فكرة السيت؟

The Great Kirsten Dunst

تعرفون إني أحب كيرستين دونست، و أحب ستايلها. السنة هذي كيرستين كان عندها أكثر من فيلم، فكانت موجودة بمناسبات كثيرة، و لأني أعرف إني ما أكتب بس لنفسي، رحمتكم، و لا كتبت عن كل لوك طلعت فيه، لكن ما أظن أقدر أتحمل تخلص السنة، و أنا ما تكلمت عن كثير من ملابسها اللي أعجبتني. 

المجموعة الأولى من الملابس هي لكيرستين بالشارع، أحب عندها اختيار الألوان (دائما محايدة و قليلة، و بسيطة)، و نفس الكلام ينطبق على القطع اللي تلبسها. 

من اليسار كيرستين لابسة شورت وردي من إيزابيل مارون و سويتر رمادي (قلت لكم أكثر من مرة إني خاطري بسويتر رمادي)، باللوك اللي على اليمين عاجبني أنه ألوان الأشياء تقريبا كلها بتصير بيضاء، تنورة جينز فاتح، قميص وردي فاتح و شنطة نود. الفستان الثاني اللي من اليمين أعجبني نقشاته (كبروا الصورة علشان تشوفون أوضح)، أعجبتني الجزم الكلوي اللي لابستها. 

زي ما قلت لكم كيرستين على الريد كاربيت و بالشارع كانت حلوة مره. و لما قلت لكم عن "الثانية"، اللي كانت لابسة من دولتشي آن قابانا مجموعة ربيع 2012، اللي عليها خضار لما تتكلمت عن فليستي جونز هي كيرستين دونست. فستان الطماط هذا سرق لي قلبي :). اللبس اللي بعده التنورة من شانيل، و التوب من برادا كلهم ريزورت 2012، صحيح الشكل مره كلاسيكي لكن مع المايك آب حقها طالع حلو. آخر فستان من ديريك ليم، غير إني أحب الفساتين البسيطة، عجبني كيف أضافت كيريستين لها هذي الشنطة اللي عليها مجوهرات ثقيلة. 

Prada vs Miu Miu

ما أعرف إذا تعرفون إن برادا و ميو ميو صاحبتهم وحدة، اللي هي ميوتشا برادا. لهذا السبب و ما أعرف ليه أحس أنه لا شعوريا أقارن بين الماركتين، يمكن أكثر شيء دائما أفكر فيه أي وحدة بتغلب الثانية على الريد كاربيت (لأنه بالنسبة لي هو المقياس على شعبية أي مجموعة، أو مصمم). 

قبل أمس كان آخر يوم من أيام أسبوع باريس للموضة، و كان فيه عرض ميو ميو (عرض ميو ميو بباريس و برادا بميلانو). للحق أول ما شفت صور المجموعة حسيت إنها تشبه كثير برادا، بس يمكن السبب الشعر اللاصق، لكن بعد ما ناظرتها زين كانت مختلفة (مو بشكل كبير)، لكن مختلفة (أحس الألوان متشابه، لحد ما). 

علشان كذا (موضوع إني أحس أنه فيه "حرب" بين الماركتين) سويت هذي المقارانات، لشعبية المجموعات اللي فاتت، كلها مبنية على مزاجي، يعني لا دراسة، و لا نتائج مبيعات، و لا تواصلت مع الماركتين، و لا قريت بأي مكان :)

المجموعة هذي لميو ميو هي اللي اللي طيحتني بحب الماركة، ما أعرف وين كنت قبل، لكن ما أتذكر إني شفت ملابس شكلها حلو (بتصاميم جديدة)، طبعات حلوة، و أحس فيها شباب. مجموعة برادا ما شفتها كثير، خصوصا القطع اللي مطبوع عليها الشاطيء، ما شفته إلا على كيري مولقان، أما أكثر ما لبس منها هي الفساتين الكرستال. 

موسم خريف 2010 تهاوشت أنا و أختي عليه، هي تقول أنه ميو ميو لبس أكثر، و أنا أقول برادا أكثر، مع إنها مدونتي لكن تصرفت كأخت كبيرة و خليته تعادل، مع ذلك ما رضت ؟!!!

أعتقد موسم ربيع 2011 ما فيه كلام كان موسم برادا بالموز و التقليمات الملونة، ميو ميو كان موجود بألوانه الفاقعة، لكن أظن لو أحد بيتذكر الموسم أنه الصيف اللي فات كان صيف الألوان الفاقعة، بيتذكر مجموعة جيل ساندر و كريستوفر كاين مو ميو ميو. 

الشتاء هذا، هو عكس الصيف اللي فات هذا موسم ميو ميو، كل العالم تبغى تلبس منه، مع الفساتين اللي من الأربعينات و الجزم اللماعة أصلا أصنفه من أشهر المجموعات للشتاء هذا، و لا أظن ترتر برادا و تقليمات الستينات ممكن تغطي عليه بباقي الموسم. 

ما أعرف إذا ميوتشا تتعمد تخلي مجموعة أحسن أو أشهر من مجموعة، لكن هذا اللي يحصل أغلب الوقت. مع إني أنا من فريق ميو ميو بالعادة، لكن للموسم هذا أعتقد أنه برادا راح يغلب. 

أنتم وش تتوقعون، وش رأيكم ببرادا و ميو ميو، مين تحبون أكثر؟