Cannes Approved

اليوم يبدأ مهرجان كان 2015، و بالأسبوعين اللي فاتت 3 من أهم دور الأزياء الفرنسية عرضت مجموعاتها ريزورت 2016، آخرها ديور بمدينة كان نفسها. كل سنة تقريبا أحط بعض عروض ريزورت على إنه ممكن تلبس بالمهرجان (خصوصا شانيل)، بس الواقع يقول إن الناس بكان تفضل تلبس أوت كتور على إنها تلبس آخر مجموعة طلع فيها المصممين. 

من بين الثلاثة مجموعات: شانيل، لوي فيتون و ديور، ديور كانت الأفضل بالنسبة لي، و أعتقد بنشوف منها كثير على الريدكاربيت، لكن بشكل عام، أعتقد كل الثلاثة عروض كان فيها شيء يصلح للمهرجان للفوتو كول أو حتى للبريمير. حطيت الملابس على حسب الترتيب اللي أشوفه أحسن، علشان كذا أخترت ديور يكون بالأول. 

أظن لو ماريون كوتيارد بتحضر المهرجان على الأقل بتلبس لو لوك واحد من المجموعة هذي، أتمنى أشوفها باللبس الكاروهات، لأني أعتقد التنورة مع التانك الفضي/رصاصي بيكون لبس تلبسه جنيفير لورنس. 

الصف اللي بعده من عرض شانيل اللي كان بسيول، كوريا. نفس الشيء ما أعرف من راح يحضر المهرجان، بس أحس ملابس شانيل تصلح لكلامنس بوسي أو كيري موليقان (مع إني ما أتذكر كيري بشيء من شانيل). 

الصف الأخير من عرض لوي فيتون اللي كان ببالم سبرينجز كاليفورنيا، يمكنه أقل العروض مستوى بالنسبة لي أحسن ما في العرض كانت الهوت بانتز، لكن باقي الملابس حسيتها كبيرة على العارضات، ما أعرف إذا المقاسات كانت خطأ، أو كذا راح تنباع للناس، بس صراحة ما أتمنى أشوف أحد من الممثلات اللي بالعادة يلبسون لوي فيتون، يلبسون هذي المجموعة و هي هذا حجمها. بس لو كنت ودي أشوف أحد بهذي الملابس أعتقد الفستان اللي على اليسار بيطلع حلو على إيدل إكساكوبليس أو يمكن اللبس اللي على اليمين على فان بينق بينق، مع إن فان بالعادة ما تلبس إلا أوت كتور بكان. 

أنتم وش رأيكم وش أكثر شيء أعجبكم؟ 

PFWFW 2015

خلص شهر الموضة أمس بعرضين، الأول للوي فيتون و الثاني لميوميو، مع إنهم يعجبوني بكثير من الأوقات، ما حسيت إني مبسوطة على اللي شفته فيهم، أحس كلها أشياء قد شفتها قبل، من دون ما يكون فيها أي شيء جديد أو مختلف. لكن بشكل عام أعتقد إن أسبوع باريس كان مرة كويس، و فيه ملابس مرة مختلفة. 

أولا خلوني أبدأ بالفستان الثاني من اليمين تحت من فيكتور أن رولف، ما أعرف ليه هذا الفستان كل ما ناظرت له أكثر، كل ما أعجبني أكثر، مع إنه فيكتور أن رولف ما يلبس كثير على الريدكاربيت، بس أتمنى أشوفه على الريدكاربيت، يمكن علي زوي كرافيتز أو نيكول بليتز. الفستان اللي بعده من شانيل، أعرف إنه شكله ممكن مرة ممل، و أعرف إنه ذوق آنا وينتور، بس أتمنى أشوفه على تيلدا سوينتون، إذا فيه فستان متأكدة إنه راح يلبس على الريدكاربيت، هو الفستان جيفانشي، العنابي، أتمنى تلبسه زوي سالدنا، مع إنه بيكون يشبه فستان جيفانشي كتور أبيض لبسته قبل كم سنة. الشيء اللي ما توقعت إنه يعجبني مرة، هو الجمب سوت الرمادية (فوق الأول من اليسار) من ستيلا مكارتني، مرة أعجبتني، أعجبني الكم الأوف شولدير، و أتمنى اللي يلبسه ما يرفعه، ودي أشوفه على ثاندي نيوتون أو وزموند بايك. إذا فيه فستان بعد جيفانشي أعتقد بنشوفه على الريدكاربيت، هو الفستان فيونيه (الأول من اليمين فوق)، مرة أنيق، و بنفس الوقت فخم، مع إني مرة محبطة من ملابس فليستي جونز بموسم الجوائز اللي فات، بس لو تبغى تخليني أنبسط، تلبس هذا الفستان. 

*باقي الملابس: السويتر اللي عليها جمجمة من أشيش أرورا، أتمنى أشوفه على ريانا، اللي بعده من نينا ريتشي، أحسه بيكون حلو على جوليان مور. الفستان الأبيض اللي تحت من جامباتيستا فالي، أتمنى أشوفه على لوبيتا. 

وش رأيكم بباريس، و بموسم خريف 2015 بشكل عام؟ 

أوت كتور؟

هذا الموضوع للي ما يعرف إيش معنى أوت كتور، للي يعرف ما يحتاج يكمل قراءة، إلا إذا كان يبغى يحزر من وين الفساتين، أو بيزيد معلومة، أو حتى لو يبغى يصحح شيء. المهم قررت أكتب هذا الموضوع، لأني لاحظت إنه حتى صديقات لي مهتمات بالموضة ما يعرفون الفرق بين مجموعات Ready to Wear و الأوت كتور. الموضوع مو مسألة حياة موت، أو إنه "عيب" ما تعرف. لكن المشكلة تجي لما تبغين القطعة أو تنتظرينها، و لا تلقينها. 

إيش يعني أوت كتور؟ بالفرنسي: haute couture الكلمة تعني الخياطة الراقية. فكرة الأوت كتور إنه ملابس تقريبا تخاط كلها يدويا، من تطريز، لشك، و حتى تجميع القطع على بعض، فستان واحد ممكن يآخذ أكثر من 600 ساعة شغل. ميزة هذي الملابس إن التفاصيل بالغالب تكون فيها مرة دقيقة و متعوب عليها، و التصاميم بالعادة تكون "timeless" يعني شيء مو على الموضة، لكن لبس حتى لو مر عليه سنوات، بيظل لبس أنيق و (ما راحت موضته). علشان كذا اخترت لكم فوق صور لفساتين من مجموعات مختلفة من 15 سنة اللي فاتت، من بداية الألفية بعدين منتصف العقد الأول، نهاية العقد الأول، و ملابس من المجموعات الأخيرة لهذي السنة (لكل فترة اخترت فستانين). (اللي يبغى يحزر المجموعات أو وقتها، يكتب تحت، و راح أجاوبه إذا صح أو خطأ، و ترا ما فيه هدية الموضوع للوناسة بس P;). 

ملابس الأوت كتور بالعادة ما تعرض للبيع بالبوتيكات، و لا الديبارتمينت ستور، فكرتها إنها تصمم على الطلب، علشان كذا أقولكم لا تنتظرونها تنزل بالمحلات، لأنها ما راح تنزل. بالعادة الملابس مو بس تنخاط على مقاسك، بس بعد ممكن تسوين عليها تعديلات، طبعا إذا كنت بتدفعين 100 ألف دولار على فستان، أكيد المفروض تقدرين تدخلين عليه تعديلات (أسعار الأوت كتور تقريبا من 100 ألف دولار، ممكن أقل شوي، و ممكن بعد أعلى). 

طبعا لأنها ملابس المفروض تعيش معاك فترة طويلة (لأن تصاميمها كلاسيكية)، مجموعات الأوت كتور مالها تأثير كبير على الموضة، و لا هي تتأثر بشكل كبير بالموضة، يعني لو شفت تصاميم معينة بالأوت كتور، لا تتوقعين بكرا مانقو و ريفير آيلاند بيسوون زييها. 

أتمنى إن الموضوع مفيد، و إني ما قلت شيء كلكم تعرفونه، و إذا كلكم تعرفون هذا الكلام قبل، أتمنى صور الملابس أعجبتكم :). 

Spring '15 Haute Couture Recap

أحس كل سنة أتحمس أكثر لأسبوع الأوت كتور، ما أعرف ليه، يمكن لأنه قصير، و يمكن لأنه الملابس فيه دايم فخمة، و أهم شيء أكثر المجموعات التصاميم اللي فيها أحس لو بعد عشر سنوات تشوف الملابس، ما أحس إنها قديمة، و لا تلبس. و أكثر شيء أتحمس له، إني أشوف الملابس على الريدكاربيت. 

السنة هذي أكثر أسمين معروفات بالكتور ما عجبوني مرة (شانيل و ديور). جامباتيستا فالي، و أرماني برافي، كانوا تكرار لأشياء قد شفتها قبل، ما يعني إنها مو حلوة، بس ما فيه شيء حسيت إني ودي أشوفه على الريدكاربيت، فيرساتشي ما أعجبني كثير. و فالنتينو ما حسيت فيه فرق كبير بالتصاميم بين الملابس الجاهزة و مجموعة الأوت كتور. من أكثر المجموعات اللي أعجبتني يوليانا سيرقينكو (مع إنه المجموعات اللي أعجبتني قبل، ما كانت دايم حلوة على الريدكاربيت. مجموعة ثانية كل أوت كتور تعجبني أكثر هي سكايابرللي. مرة حابة الخلطة اللي ماشين عليها، ملابس تصاميم فينتاج، بلمسات شوي كويرك. الفستان الأخضر مثلا مرة أعجبني، خصوصا من ورا (شوفوه هنا). لو أقدر كان أخذته الحين. ودي أشوفه على فايولا دايفيس أو ماقي قولينهول. 

الفستان اللي من ديور أتمنى تلبسه ماريون كوتيارد، خصوصا إنها وجه لديور أصلا، إيلي صعب حسيت بهذي المجموعة فيها شيء مختلف بس قديم (قديم بشكل حلو)، ما أعرف ليه الفستان أحس بتلبسه يوليانا سيرقينكو، أو ودي سونام كابور أو جنيفير لورينس تلبسه، مع إني ما أتذكر إنها قد لبست لإيلي صعب. 

عاجبني اللون الوردي (من يوليانا سيرقينكو و شانيل)، ودي أشوف الفستان الشانيل على إيل فانينق، أما أليكساندير فوتيه أحس بيكون حلو على دايان كروقر. ودي بعد أشوف فستان فالنتينو على لوبيتا نايونقو، مع إني ما أتذكر إنها لبست لفالنتينو إلى الآن (ما يمنع بعد أشوف فستان ديور على لوبيتا). 

وش أحسن عروض الأوت كتور بالنسبة لكم؟ 

Trending in Golden Globes: Sparkly Silver

أعرف إني من زمان ما كتبت، أحاول دايم أحافظ على الكتابة هنا، بس بعض المرات، كذا ما يطلع معاي شيء، و مرات، ما يصير فيه أحداث. لكن مع موسم الجوائز أعتقد إنه بيكون عندي فرصة أكبر إني أكتب هنا. من أكثر الملابس اللي أعجبتني أمس بالقولدين قلوب، كانت الملابس الفضية. 

بشكل عام أنا أحب الذهبي أكثر من الفضي، إذا بتدرجات ألوان المعادن (الأصفر، الوردي، و الفضي) الفضي هو أقل لون مفضل عندي، لكن أعتقد أمس كان من أحسن الألوان على الريدكاربيت، خصوصا فستان داكوتا جونسون و دايان كروقر. داكوتا كانت لابسة شانيل أوت كتور تكلمت عنه قبل شهور هنا. فستان دايان من إيميليا ويكستييد، من أول ما شفته عجبني مرة، و الشيء اللي أعجبني أكثر، إن ديان حولته من فستان مرة حوسه على الرانواي، للبس بهذا الأناقة (تلقون صورة هنا). جوليان مور كانت لابسة لجيفانشي، و كايت باكنسيل لابسة لإيلي صعب. 

أنتم من كان عندكم الأحسن أمس؟ ووش رأيكم بالفساتين الفضية؟ 

All About Great Inspirations

أعرف من فترة ما كتبت هنا، و من زمان ما تكلمت عن فيلم و الملابس اللي فيه. ما أعرف ليه؟ هم بطلوا يسوون أفلام بملابس حلوة؟ ما يهم، اللي بأقوله أمس شفت فيلم قديم (خارج الموضوع، أول كنت أشوف أفلام قديمة أكثر من الحين، ما أعرف ليه، بس صرت أحس لازم لها مزاج خاص). المهم الفيلم اسمه للي ما عرفه من الصور All About Eve، بالمناسبة الفيلم حلو للي يبغى يشوفه. 

طبعا بعيد عن الفيلم و كان هو كويس أو لا، الملابس بالفيلم مرة حلوة، و حسيت بأحيان كثيرة إن كثير من المصممين يآخذون أفكار من الملابس اللي فيه. أعترف إن بحثي عن ملابس تشبه الملابس الموجودة، و اللي حسيت إنه فيه تصميم حديثة تشبه له كان كسول شوي، جزء منه إني من زمان ما كتبت هنا، و لو كنت بأدور أشياء بالضبط تشبه الموجود بالفيلم، أعتقد ما راح أخلص الموضوع إلا بعد أيام، و أنا متحمسة أكتب عنه اليوم. السبب الثاني و هو الأهم إني عجازة بأغلب الوقت. 

كثير من الملابس اللي لبستها وحدة من البطلات (إيڤ) حسيت كأني شفت أشياء كثير يشبه لها عند ڤالنتينو و أونر. فيه لبس لبسته بطلة ثانية (مارچو الأولى من اليسار الصف الثالث)، ما أعرف ليه أحس إني شفته بمجموعة قديمة لإيڤ سان لوران (لما كان هو المصمم)، بس لأني مرة كسلانة، قررت إني ما أدور على اللبس. 

فيه أكثر من لبس (لكل البطلات) أعجبوني، بس ما حطيتهم هنا، لأنهم أحلى بالحركة، و لأني ما بغيت أخرب عليكم كل الملابس، لو تبغون تشوفون الفيلم. 

HC Fall '14 (Report)

الكتابة الفترة هذي شوي صعبة. كمبيوتري انكب عليه موية، و بعض حروف الكيبورد ما عاد تشتغل، فلازم ألقى جهازي ثاني أكتب منه، أو زي هذي الحالة أكتب من الآيفون. ما علينا، المهم الأسبوع اللي فات كان أسبوع الموضة لأوت كتور خريف 2014. و هنا "تقرير" عن الأسبوع.

هذي المرة على غير العادة، عرضي المفضل كان أتلييه ڤيرساتشي، أعتقد أنت مرة حلو، و مع إنه إلى الآن فيه تصاميم ڤيرساتشي "سيكسي". إلا إني أحس أنه فيه تنوع، و يصلح لناس كثار.

على غير العادة بعد، أعتقد إنه أكثر مجموعة بنشوفها على الريدكاربيت بتكون جامباتيستا ڤالي، مو إيلي صعب. أحس فساتين ڤالي تصرخ ريد كاربيت. مع ذلك اخترت هنا لوك أشك أنه راح يكون ريدكاربيت و هو اللبس اللي التوب حقه كأنه بيجاما (أعرف الناس لبسوا البيجامات و قطعوها، بس إلى الآن أحبها). لو أحد بيلبسها أعتقد بتكون يوليانا سيرچينكو. 

بالكلام عن يوليانا، أظن مجموعتها أسوأ مجموعة طلعتها من بدأت تصمم. أحسه خليط من كل المصممين و لا عجبني شيء. بالمناسبة مجموعتها الماضية انلبست كثير ريد كاربيت، مع إنها كانت عاجبتني، إلا إنها على ناس كثير ما طلعت حلوة.

أعجبني ديور، شانيل بالنسبة لي فساتين مرة حلوة، و ملابس مرة مو حلوة. أعجبني مرة الفستان الأحمر من أرماني براڤي، أظن إن كايت بلانشيت لازم تلبسه. ڤالنتينو كان كويس، مو مميز، لكن أعتقد مصممينه جالسين يحاولون يآخذونه لشكل جديد بعيد عن الشكل اللي كان عليه بالثلاث سنوات الأخيرة.

 آخر شيء هذا الفستان الأسود بكورسيه كريستال من جان بول چوتييه. هذا الفستان أحسه مخلوق لدينا فون تيس، لو ما لبسته لو بعد عشر سنوات، بأجمع فلوس و اشتريه لها. P:

 المهم صحيح إن ما عندي كيبورد صاحي، بس بآحاول أكتب عن فساتين الموسم اللي خلص، و اللي تمنيت/ خمنت إنها راح تلبس. 

بس الحين أنتم وش العروض المفضلة عندكم من أسبوع الأوت كتور؟

Cannes 2014: 40+

مو شيء جديد إني أحب النساء الحلوات، أظن المدونة هذي طول الوقت أتكلم عن النساء اللي أعتقد أنهم حلوات، و لما يكونون حلوات و ذكيات ما يحتاج أقولكم إني ممكن أتحول كأني من مشجعين 1D بس لهذي المرأة، الشيء يمكن اللي ما قد قلته هنا قبل، أو يمكن قلته بس ما كان بشكل واضح و صريح: إني أحب النساء الكبيرات الجميلات، طبعا و ذكيات، و شخصيا ألقاهم جذابات أكثر من الصغيرات. ما علينا من كلامي البايخ هذا، أمس خلص مهرجان كان، و هذا الشيء الوحيد (يمكن اللي طلعت منه). 

صراحة مستوى المهرجان هذي السنة (من ناحية الملابس) مو مرة مميز، بالنسبة لي هذا خبر حلو P: على الأقل ما أتعب كثير بإيش أدخل لأحسن لبس للشهر و إيش لا (أعرف صايرة أعترف لكم عن كثير من المشاكل العويصة اللي تواجهني و أنا أكتبP:). لكن بالنسبة لي الشيء المميز بالمهرجان هذي السنة، إن أكثر اللي كانت أشكالهم حلوة، كانوا فوق 40 (الفئة العمرية المفضلة عندي P:). مع أنه كل سنة يصغر عمر المشاهير (قصدي أعمار اللي يشتهرون و هم صغار) (مو أنا اللي أكبر) أحس إنه العالم صاير يقدر النساء الكبيرات، و أعتقد أنهم يستاهلون هذا التقدير. 

المهم خلونا نتكلم عن الملابس، كايت بلانشيت بالمهرجان (و قبله بيوم) كانت كل يوم تطلع بلبس أحلى من الثاني، هذا الفستان اللي حطيته من فالنتينو (هو اللي لبست معاه حلق الربيان)، أعتقد إن شكلها هنا كان قاتل. ليلى حاتمي (الأولى من اليمين) ممثلة إيرانية و كانت عضو لجنة التحكيم هذي السنة، طلعت بهذ اللبس لأول يوم، اللي مرة أنيق، ما لقيت لها صورة لحالها إلا هذي المقطوعة، شوفوا هنا الصورة كاملة. 

جوليان مور بشانيل (شانيل أظن أكثر ماركة لبست بالمهرجان هذي السنة)، صراحة الفستان لحاله عادي و أقل من عادي، لكن على جوليان بالنسبة لي طالع مرة حلو. بعد كارول بوكيه، بعد بشانيل و عضو لجنة تحكيم (ممثلة فرنسية)، عجبني مرة شكلها بهذي البدلة، من الأشياء القليلة الأنيقة من شانيل بالفترة الأخيرة. 

جولييت بينوش بفستان ما أعرف من وين، بس عجبني مرة، لو أمي مثلا كانت تدور على لبس لزواج، أكيد باقنعها بهذا. آخر شيء آنيس دو لو فريسانج، لابسة فستان أحمر ما أعرف بعد من وين، عندي أحساس أنه إما كريستيان لاكوا، أو جان بول قوتييه، أعجبني مرة العقد اللي لابسته معاه و بعد عجبني شكل الفستان من ورا مرة حلو، شوفوا هنا.  

The Amazing Emma (Again)

قلت لكم إني راح أحاول أكتب عن إيما ستون بالجولة الترويجية لفيلم The Amazing Spiderman 2. صراحة ما أعرف الجولة خلصت أو لا، بس أعتقد إنها خلصت، لأنه آخر طلعه شفتها إيما كانت بالميت قالا، و طبعا الميت قالا مالها علاقة بالترويج للفيلم، حاولت أدور بالنت إذا لسا باقي شيء بالجولة، بس ما حصلت شيء، علشان كذا بأقرر أنه الجولة انتهت P:. 

إذا تتذكرون تكلمت عن إيما بجولتها للجزء الأول من The Amazing Spiderman، و بعد حطيت لبسها اللي لبسته لبريمير الفيلم الثاني بلندن لأحسن لبس لشهر أبريل (هنا الموضوع، لو ما كنتوا صوتوا إلى الآن). صراحة مستوى إيما ما كان أقل من الجولة اللي فاتت، يمكن الشيء الوحيد اللي تغير (أكيد غير الملابس) هو لون شعرها، من أشقر لأحمر. بالمناسبة وش تفضلون؟ إيما بالأحمر أو بالأشقر؟ للي ما يعرف إيما أساسا شقراء مو جينجير/ صهباء. بالنسبة لي مرات أحس إني أحبها أكثر أحمر، و مرات أحس الأشقر ما ينمل منه، بس الأحمر يمل. ما علينا خلونا نتكلم عن الملابس.

أولا خلونا نتكلم عن الأحمر، مو قلت لكم بموضوع الفساتين الحمراء هنا، أنه فيه موضوع ثاني بيكون فيه أحمر، هذا هو الموضوع. لما شفت إيما بهذا الفستان الڤالنتينو احترت أختاره هو أو الأصفر الاتلييه ڤيرساتشي لأحسن لبس لشهر أبريل، لكن أخيرا قررت إني أختار الأتلييه، لأني أعتقد أنه مو كثير نشوف لبس بهذي الفخامة. بس من جد هذا اللبس من أحسن الفساتين الحمراء اللي شفتها مؤخرا. 

لوك ثاني عجبني بعد، الفستان الأسود من چوتشي عند جيمي فالون، أعجبني مرة إن الفستان من قدام شكله عادي، بس من جمب يطلع مختلف مع الفتحة (الجزء الأسود جزء من الفستان مو برا)، على الأقل كذا كان بالرانواي. (لاحظتوا إني أحب إيما بالقصير أكثر؟) ما أعرف أحسها تكون مرتاحة أكثر. باقي الملابس من فوق يمين (ڤالنتينو (غير الأحمر)، إيرديم، ڤالنتينو (ثاني)). تحت من اليمين بعد چوتشي: (برادا، شانيل). 

أنتم وش رأيكم بشكل إيما بجولتها لفيلمها الأخير؟ أنا شخصيا دايم أنبسط على حضورها، أحسه حلو من دون تكلف. 

One Thousand and One Nights

اليوم المفروض يبدأ مهرجان كان، و أمس كان فيه عرض مجموعة شانيل ريزورت 2015. من سنتين أو أكثر كنت أكتب عن وش من المجموعة أعتقد أنه راح ينلبس بكان، و صراحة أعترف إنها دايم تكون أفشل تخمينات لي. هذي المرة ما راح أتكلم عن وش أتوقع من المجموعة ينلبس بالمهرجان (مع أني بانبسط لو انلبس شيء منها)، لكن باتكلم عن العرض لأنه لو كنتوا ما تعرفون، العرض كان بدبي.

هذا العرض يمكن أكثر عرض كنت متحمسة له بعد عرض دالاس (أيوه كنت متحمسة لدالاس أكثر، لأني كنت ودي أعرف كيف ممكن يسوس كارل مجموعة فيها تأثير أمريكي على شانيل). عرض دبي كنت متحمسة أعرف لو بيختار عارضات عربيات (ما أختار و لا وحدة)، و كيف الملابس بتكون. 

أعترف إن دبي مو مدينة مفضلة عندي، علشان كذا كنت خايفة الملابس تكون بايخة. بعدين فكرت قلت لو تصير تشبه المجموعة اللي عرضت بأسطنبول (أعتقد بري فول 2011)، أظن بتكون حلوة هنا. 

المجموعة ما صارت تشبه مجموعة أسطنبول، بس أعتقد إن جزء كبير منها كان حلو، أسوء شيء كان عندي شنطة البنزين، بعض الناس يعتقدون أنه قلة أدب لأن المنطقة فيها بترول، يسوي شنطة على شكل جيك بنزين (بالمناسبة دبي ما فيها بترول)، بس أنا شفت إنها قبيحة. فيه شنطة ثانية على شكل لؤلؤة، أعتقد إنها حلوة، و مناسبة للخليج، و شانيل بنفس الوقت. 

بعض الملابس كان فيها طبعات شماغ أحمر (ما أعجبتني)، بس الجاكيت هذا (الأول يمين) اللي على شكل كوفية أعجبني كثير، مو كأنه تصميم رخيص، و بنفس الوقت فيه روح شانيل بقوة. 

أعجبتني طبعات الهندسية/ إسلامية، أعجبني الفستان الأسود (من دون الشروال)، للي ما أنتبه الترتر على شكل أفق دبي، أختي ما أعجبها، بس أنا ما أشوف أنه واضح أو رخيص، يعني ممكن الواحد يحسب أنه شك عادي. 

يمكن أكثر لوك مفضل عندي، هو اللوك اللي على جون، كامل، مع البنطلون اللي تحته، من جد ودي أشوفه (مه البنطلون ريد كاربيت) أعرف إن تيلدا سوينتين ما تلبس ترتر كثير، لكن أحسه بيكون مرة حلو عليها. 

إذا شفتوا العرض، وش أكثر شيء عجبكم؟ و تشوفون فكرة إن المجموعة تشبه المنطقة؟ أو مالها علاقة؟ 

Would Cinderella Wear Sneakers?

لو ما قد قلتها قبل هنا، أرجع أقولكم إنه إذا بتعطون درجة لاهتمامي بملابس أعضاء الأسر المالكة (بكل العالم)، من واحد لعشرة (طبعا عشرة أعلى شيء)، أظن بيكون 2.5. ما يعني إني ما أشوف وش يلبسون، بس ما يهمني لبسوا زين أو شين. ما علينا، خلونا نتكلم عن الشيء اللي باتكلم عنه و هو كارلوين دو موناكو، و الملابس الرياضية تحولت أزياء راقية. 

من فترة الملابس الرياضية أو الأزياء اللي متأثرة بالملابس الرياضية و هي موضة، شخصيا ما عندي مشكلة، أنا أحب الملابس الرياضية فزي ما قلت لكم ما عندي اعتراض. 

بعروض الأوت كتور الأخيرة، كارل لاچرفيلد اختار لشانيل ثيم رياضي، حتى العارضات كانوا لابسات سنيكيرز. للي ما يعرف إلى الآن وش الفرق بين الأوت كتور و باقي المجموعات، الأوت كتور ملابس و إكسسوارات تنخاط و تتزين يدويا، مو مصانع، و حسب الطلب، ما تعرض بالمحلات، قريت إن أسعارها بتبدأ من تقريبا 4000 دولار. شخصيا أحس هذا الموضوع هبال شوي، و لا توقعت أشوفها أبدا ريدكاربيت، بس يبدو إن كارولين دو موناكو ما عندها مشكلة تطلع بمناسبة رسمية لابسة سنيكيرز، أنا ما أظن حتى لو كان سعرها 40 دولار ممكن ألبس سنيكرز مع فستان سهرة، ممكن ألبسها مع فستان، أو بحفلة، بس مو فستان سهرة. على إني ما راح ألبسها، بس صراحة استظرفت كارولين، أحس إنها كأنها تقول للعالم "طز". 

أنتم وش رأيكم ممكن تلبسون سنيكرز لسهرة؟ أو وش الحد اللي ممكن تدفعونه على سنيكرز؟ 

Spring 2014 Couture: The Report

جينا لأسبوع موضة جديد، صراحة أحب أسبوع الأوت كتور، فخم، الموضة فيه قليلة (أعرف أنه أسبوع موضة) بس الأوت كتور بالعادة الملابس فيه تكون "تايمليس"، و الشيء الأحسن أنه أسبوع واحد بس، ما تكثر عن 20 عرض (على الأقل اللي أعرفها) فما أحس إني بماراثون نفسي ينقطع و أنا أتابع العروض. ما علينا، خلونا نتكلم عن العروض بشكل عام، و أحسن الملابس بالنسبة لي. 

بالنسبة لي العرض الأحلى، كانت مجموعة يوليانا سيرقينكو، أعتقد هذي مجموعتها الرابعة، و أظن إنها من أحسن مجموعاتها لحد الآن. تقريبا حبيت كل قطعة بالعرض، و أتمنى إني أشوفها أكثر على الريدكاربيت، ما أظن بنشوفها بالأوسكار، بس عندي أحساس أنه بتكون موجودة بمهرجان كان، حبيت مرة الفستان الأحمر، أحس لو شفته على الطبيعة يمكن بانهار. بما أننا نتكلم عن يوليانا شفت هذا الروب المنقط اللي كأنه بيجاما بعرض سكيامبرلي (الثاني من اليسار، فوق) طبعا حبيته مرة، لأنه منقط و لأنه بيجاما، بس لأنه مو حاصل لي، راضية أنه أحد يلبسه، وودي أشوفه على يوليانا، أحسه يصلح لها مرة. 

ما أعرف عرض ديور ما حسيته ديور، شوي كان جامباتيستا فالي، و شوي كارفين (زي الفستان الأول من اليسار، فوق)، أعرف إننا بنشوف منه كثير على الريدكاربيت (لأنهم يلبسون ماريون و نتالي بورتمان، و جنيفير لورانس، و لأن لي لي سوبايسكي صديقة راف سيمون)، بس لو كان فيه فستان ودي أشوفه من المجموعة بيكون هذا الفستان و على ماريون. 

أعتقد شانيل كان فيه قطع حلوة كثير (أحلى من مجموعة الخريف أكيد)، مو مميز، بس عجبني فكرة سنيكرز على أوت كتور، و حسيت الملابس مرة خفيفة، بنفس الوقت فيها شغل مرة كثير. 

مايسن مارتين مارقيلا، ما شفته مثير، بس أتمنى أشوف هذا اللوك على ريانا، أحسه مخلوق له (الثاني من اليسار، تحت). حبيت الفستان الرمادي من فالنتينو، ودي أشوفه على تيلدا سوينتن، عجبني بعد التوكسيدو الفراشة من جان بول قوتييه، موزة تلبس كثير من قوتييه أوت كتور، بيكون ظريف لو تلبس هذا. أرماني برافي قدم مجموعة بشوية إيحاء هندي (إلى الآن الملابس الهندية تأثر على الموضة) أعتقد هذا الفستان بنشوفه على كايت بلانشيت بباقي موسم الجوائز، خصوصا إنها مرشحة للأوسكار. 

ما حطيت صورة لأي شيء من العرض، بس إيلي صعب، لحد الآن يسوي فساتين مرة حلوة، و دايم تطلع حلوة بالريدكاربيت، لكن ما أشوف فيه شيء مختلف عن باقي مجموعاته، يمكن الشيء الوحيد، أنه استخدم اللون اللي قالت عنه بانتون أنه لون السنة، أو لون قريب منه هو اللون البنفسجي، أو اللي سمته بانتون: الأوركيد المشع. 

The Dress

أمس أو قبله كان فيه مناسبة ما أعرف وشي هي، بس طلعت فيها كيرا نايتلي. أولا خلوني أقولكم إني ما كنت أحب كيرا أبدا، ما كان فيه سبب معين، بس تمثيلها يغثني. و كنت أتنرفز من اللي يقول عنها جميلة. إلى الآن مقتنعة برأيي، بس صرت أستلطفها لأن أحب إنها ما تعرض حياتها للعالم علشان تلقى اهتمام. ما علينا من رأيي فيها، خلونا نبدأ بالموضوع. 

نرجع لكايرا، كاير بالمناسبة كانت لابسة فستان تل (الصورة الثالثة على اليسار) أول ما شفته حسيته يشبه فستان من شانيل لابسته مرتين قبل، بس لما شفت الأكمام شكيت، و استبعدت إنها تلبس نفس الفستان مرة ثالثة، بس صار نفسه :)

المرة الأولى 2008: 

شعرها كان أطول المرات الثلاثة، و فارقته بالنص، و لابسة كيلون أسود و جزمة سوداء من دون إكسسوار.

المرة الثانية 2013:

كان بزواجها هذا الصيف، لابسة طوق ورد صغير، نظارة شمسيه، عقد ناعم، و جاكيت شانيل، مع جزم لوفير. 

المرة الثالثة 2013:

فرقة على جمب، لابسة توب تول مع شك تحت الفستان، و صنادل ذهبية. 

من الثلاثة يمكن بعد كل هذي السنين عرفتوا أي واحد حبيته أكثر، لبس الزواج مع النظارات و لوفير و الجاكيت و طوق الورد كلعا أشياء تخليني ما أمل من هذا اللوك. يمكن الأول ما حبيت فيها موضوع الكيلون، ما أعرف ليه، شيء يخليني أحس لما يكون الفستان سترابليس، ما يصلح معاه كيلون بذات غامق، لازم يكون فيه توازن بين فوق و تحت. 

أنتم عندكم كذا فستان تحبونه و لبستوه أكثر من مرة بأشكال مختلفة، ما راح أقول زي كايرا، لأني ما أظن فيه أحد قد لبس فستان زواجه قبل لمناسبة ثانية، بعدين لبس فستان الزواج بعد الزواج من جديد لمناسبة جديدة. خلونا نشوف إذا ممكن تلبسه مرة رابعة :). 

Best Dressed: July '13 Winner

بصراحة لما حطيت اللوك الفايز بداية الشهر لاستفتاء أحسن لبس ما توقعت أنه يعجب أحد، و أساسا كنت مترددة، بس بالنهاية قررت أدخله لأني بغيت أنوع بأشكال اللبس اللي أختارها. المهم نجي لاختياركم لشهر يوليو و اللي أعتقد أنه غير أنه لبس لكل وقت (بنظري) أعتقد أنه بعد يصلح لكل جو. 

اللبس اللي صوتوا له للشهر اللي فات كان نتاليا فيديانوفا بهذا التيور الشانيل. عجبني مرة التوب، خصوصا أنه مو جاكيت تقليدي من شانيل، لكن كل شيء بهذا اللوك يصرخ تقليديه من طول التنورة، لاختيار الألوان، حتى و اختيار الكعب. الحين و أنا جالسة أكتب عنه جا ببالي لو أحد لبسه غير نتاليا ممكن يكون أنيق كذا أو بيكون كأنه أميرة إلى الآن عالقة بلبس الأربعينيات لأنه لازم تصير "كلاس". 

ما علينا، أهم شيء أنه طالع حلو على نتاليا، و مع شعرها و مكياجها اللي شبه طبيعي طالع اللبس بالنسبة لي فرش و حلو. 

Best Dressed: July '13

ما أعرف ليه أحس شهر يوليو مر ببطء، على الأقل بالنسبة لي، يعني فيه ملابس انتبهت لها بداية الشهر، يوم رجعت أناظرها من جديد حسيت إنها أقدم من شهر يوليو. بداية الشهر كان فيه عروض الأوت كتور، غير كذا ما أتذكر فيه أحداث مهمة، غير بريمرات متفرقة. بشكل عام أقدر أقول الملابس الحلوة كانت قليلة، بس بالنسبة لي كانت تستاهل. 

بالنسبة لي أعتقد إن هذي القائمة أكثر القوائم اللي سويتها تنوع. الشيء اللي مستغربته (على نفسي) على إني أحب تيلدا، أظن إن هذي أول مرة تكون بقائمة أحسن لبس للشهر. 

أعتقد أول لبس تأكدت إني ما راح أشيله من القائمة المقترحة لأحسن لبس، هو كايت بلانشيت بالفستان الوردي من بلانسياقا. مع إنه لذوقي الخاص بأفضل ألبسه من دون القطعة اللي فوق زي هنا، لكنا قدرت تطلع فيه بشكل حلو. لي لي  سوبايسكي ترجع بديور مرة ثانية لقائمة أحسن لبس، هذي المرة بجمب سوت. أعجبني فستان كريستوفر كاين على كايت بوسورث (فوق يسار) صراحة لما شفت مجموعة كاين للخريف، كانت شاكة أنه فيه أحد ممكن يلبس بذات الفساتين بشكل حلو، لكن كايت بالنسبة لي قدرت، خصوصا مع مكياجها و تسريحتها. 

حبيت مرة شكل هيلين ميرين (يسار تحت) حسيته مناسب لعمرها، بنفس الوقت مو لبس جدات. آخر شيء بأعلق عليه هو نتاليا بشانيل، أظن أنه هذا اللبس أكثر لبس تقليدي، لكن بالنسبة لي، شكل الجاكيت و شكل التنورة (من تحت) شوي أعطت للبس شكل مختلف، خصوصا مع وجه نتاليا اللي مرة "فريش". 

Create your free online surveys with SurveyMonkey , the world's leading questionnaire tool.

New Obsession?

بدت عروض آوت كتور خريف 2013 كانت فكرتي إني أكتب عن العروض بشكل عام (طبعا اللي أعجبني) بعد نهايتها كلها، لكن للأسف فتحت تمبلر وشفت الصورة اللي تحت على اليمين و لا تحملت، فقرتت إني بس أكتب عن هذا الشيء، و باكتب إن شاء الله موضوع فيه عن الأشياء اللي أعجبتني بالعروض. 

أولا خليني أقول إن عرض شانيل ما أعجبني أبدا، أبدا ... أعتقد من دون مبالغة و لا قطعة لفتت انتبهاي. و لا فكرت زي ما قالت أختي إني دايم أروح أدور على فيديو للعرض علشان أطلع فيه شيء زين. المهم للأسف ودي أخيب ظنها بي و أقول إني طلعت شيء زين من دون ما أدور، هو كذا جاني على الداش بورد بتمبلر و هي زي ما قلت لكم هذي اليد اللي كلها خواتم. 

بعرض صيف 2012 كان على بعض العارضات هذا الحلق اللي أنا و أختي انهبلنا عليه، و صرت فترة بس أدور على هذي النوع من الحلقات اسمها ear cuff (تتذكرون اللي قلت لكم عليها من عرض دريس فان نوتين). المهم ما زال النوع من الحلق هذا يعجبني، لكن أعتقد إني باحول للمنظر هذا (يد كلها خواتم). بعرض نيكولا قاسكيه الأخير لبلانسياقا كان فيه يد كلها خواتم. بس ما أقنعتني، و لفترة جالسة أشاور نفسي إذا تستاهل الخواتم اللي فوق المفصل الثاني للإصبع إني أجربها، أو بتكون مو مريحة، كارل بعرض شانيل الأخير طلع مو بس ب "خواتم" فوق المفصل، لكن طلع بخاتم على الظفر. صراحة أعجبتني مرة شكل اليد و تحمست إني ألبس شيء زي كذا. 

أنتم وش رأيكم؟ أو تحبون تلبسون المجوهرات بشكل تقليدي؟

Razzie Award

أسمحوا لي أتكلم اليوم عن شيء بعيد عن الفاشن، مو بعيد بعيد، لكن حتى لو كان له علاقة بالفاشن، أنا باتكلم عن الجانب اللي ماله علاقة بالفاشن. 

كارل لاقرفيلد، إذا كان لسا فيه أحد ما يعرف من هو، هو مصمم شانيل، فيه مثل يقول سبع صنايع و البخت ضايع، أنا ما أبغى أقول أنه سيء بكل شيء يسويه، لكن أعتقد أنه عايش بقوقعة ما فيه أحد يجرأ و يقول له ترا هذا بايخ أو ذاك تافه. اللي خلاني أقول سبع صنايع، لأنه مصمم شانيل و يصمم 6 مجموعات لشانيل بالسنة، بالعادة كل مجموعة ما تقل عن 60 لوك. بعد يصمم لفندي، أربعة مجموعات بالسنة، و له هو خط خاص يبيعه على نيت أي بورتيه، و يصور، و بعض المرات يصير مهندس ديكور، لكن الشيء الوحيد اللي عندي مشكلة معاه فعلا، هي أنه يعتقد نفسه مخرج جيد. 

أختي تعتقد أنه مصمم سيء، و أنه جالس يكرر نفسه بمجموعات شانيل الأخيرة، أنا أعتقد إن كل مصمم عنده مجموعات جيدة و أشياء مو زينة و منهم كارل، و أظن أفضل مكان يلقى نفسه فيه هو شانيل، أي شيء ثاني ما يعجبني له. أما مهاراته الثانية، فأعتقد أنه مصور جيد (مو رهيب) لكن صوره كويسة. الشيء اللي أعتقد فيه أحد لازم يوقفه عند حده هي موضوع الإخراج، قبل يومين نزل فيلم جديد (قصير) عنوانه كوكو تمثله كيرا نايتلي. الفيلم سيء قصة و تمثيل. قبل سنتين سوا فيلم بعد و كان سيء قصة و تمثيل، أعتقدت إنه بس كان يستهبل، بس واضح أنه ما يستهبل و هذي هي قدراته. 

ملخص الكلام بعض الناس لازم تعرف آنه عادي الواحد ما يعرف كل شيء. النهاية.

بالمناسبة أمس كان عرض مجموعة الريزورت له، المجموعة فيها أشياء حلوة، وفيها أشياء أبدا مو حلوة، و فيها بعد أشياء جديدة على شانيل. هنا تلقون المجموعة. 

* جوائز رازي اللي موجودة بالعنوان، هي جائزة سنويا تقدم لأسوء الأفلام.

Wrong Theme

تعرفون أنه لما يصير حدث زي ميت قالا، لازم أفصفصه فصفصة (متى تحصل فرصة زي كذا) شيء أقدر أتكلم عنه كثير. و ما أقول ما لقيت موضوع أتكلم فيه. 

زي ما قلت لكم عنوان المعرض اللي افتتح أمس كان: بنك من الفوضى للخياطة الراقية. ما كنت عارفة إذا مطلوب من الحاضرين يلبسون بنك، بس خواتي قالوا لوي أنه من مقابلات شافوها، يبدو أنه مطلوب من الحاضرين لبس ثيم بنك. شخصيا ما عندي مشكلة مع اللي ما لبسوا بنك، بالعكس بالنسبة لي أفضل من اللي بالغوا بتطبيق الثيم، لأنه بالنهاية مو حفلة تنكرية. 

صحيح فيه ناس ما لبسوا بنك زي ما قلت لكم، و قلت لكم ما عندي مشكلة مع هذولا، مشكلتي مع اللي لبس بثيم، بس ثيم مختلف. ليلي ألدريج، ماري كايت أولسين، قوينث بالترو و آبي لي كلهم كانوا موجودات، و كلهم أعطوني شعور تسعينات بداية الألفية مو بنك. 

قوينث بفالنتينو حسيته شيء يشبه لبس لبسته للأوسكار 2002، ليلي آلدريج و آبي لي كيرشو، أعتقد أنه لو سويتوا بحث على فساتين التسعينات هذا الشكل من الفساتين أول شيء بيطلع لكم. أما ماري كايت أولسين بفستان فينتاج شانيل و روب بفرو (واضح أنه فينتاج بعد)، مع تسريحة شعرها حسيته لوك يصلح لداوسن كريك. 

أنتم وش رأيكم بالأربعة هذولي؟ و مين بنظركم كان أسوء من لبس؟

Best Dressed: SAG 2013

أعرف إن خياري اليوم ما راح يعجب كثيرين، لكنه أعجبني مره، و حسيت أنه أحسن شيء شفته أمس على الريد كاربيت لحفل توزيع جوائز ساق 2013. 

جوليان مور بشانيل أوت كتور ... من زمان و أنا أحب جوليان، و أحب أكثر الأشياء اللي تلبسها، بس أحب أذكركم إن عمرها 52. على إني زي ما قلت لكم أحب أكثر الأشياء اللي تلبسها، لكن ما حصل و اخترت لبسها كأحسن لبس لوحدة من الحفلات، مو لأنه ما يعجبني، لكن على الأغلب لأن فيه أحد بالنسبة لي لبس أحسن منها. لكن هذي المرة أعتقد إنها أحسن وحدة شكل الفستان، الورود اللي عليه (فكرة أنه مو لون واحد)، لون شعرها و تسريحته مع الفستان (يكفي إنها ما سوت شعرها ريترو وايفز (لأني طفشت منها على الريد كاربيت). فيه ناس ما عجبتهم الفتحة و ناس يحسون أنه مو مضبوط عليها من فوق، لكن أنا ما أشوف هذا الشيء، 

شرايكم بجوليان؟ من المفضل عندكم أمس؟

Red Carpet Race

للحق قبل سنوات كنت أهتم بالأوسكار علشان الأفلام، و مين أحسن ممثل و أحسن مخرج و الكلام الفاضي. إلى الآن أحب الأفلام، بس ما عاد يهمني كثير من يفوز بالأوسكار و مين لا، لأني أحس أنها كلها حملة دعائية كبيرة يفوز فيها اللي يسوق لنفسه، مو اللي مسوي أحسن فيلم.

ما علينا، لسا أتحمس لحفل الأوسكار علشان أشوف الملابس، و مع أنه باقي شهر كامل على الحفل، قبله فيه ساق و بافتا إلى إني بغيت أسوي تصويت على مين تتوقعون المصمم اللي راح ينلبس لمجموعته أكثر بهذا الأوسكار، خصوصا أنه عروض الأوت كتو لربيع 2013 بس أمس خلص.

بالنسبة لي المجموعات بشكل عام ما كانت أحسن مجموعات أوت كتو قد شفته، لكن فيه فساتين بتقريبا كل مجموعة حلوة مرة، و أتمنى أشوفها على الريدكاربيت. أحسن عرض بالنسبة لي كان عرض يوليانا سيرقينكو أعجبني مرة، خصوصا التفاصيل (النظارة و بعض الشنط).

من أكثر الفساتين اللي أتمنى بجد أشوفها بالأوسكار هو الفستان الموف اللي من جامباتيستا فالي، أعجبتني مرة فكرة البنطلون/الفستان.

حبيت فستان إيلي صعب النص كم. أحس قليل مرة نشوف هذا الكم على الريد كاربيت، علشان كذا ودي أشوف أحد لابسه.

بشكل عام أعتقد أنه بحفل هذي السنة بنشوف أكثر من فستان أحمر، لأنه الفساتين الحمراء كانت بأكثر من عرض، و عند أكثر من مصمم.

للأسف إني جالسة أحاول أحط تصويت بس رافض يركب معاي، فممكن تكتبون رأيكم بالتعليقات لحد ما ألقى حل.