On a High Note

اليوم كان فيه عرض لفالنتينو و شانيل أليكساندير ماكوين، مع إنه شانيل أكثر مجموعة ملونة بين الثلاثة مجموعات، أعتقد إني أفضل عرض فالنتينو و ماكوين من هذا اليوم على عرض شانيل حتى لو كان السيتينق حقه كأنه كافيه. بما إنه ما بقى إلا يوم على نهاية أسبوع باريس، راح أخليهم ببوست واحد، بدل ما أكتب تدوينتين متفرقات. 

من مسك بيرباولو بايشولي و ماريا قرازيا كيوري فالنتينو و هذي أقل مجموعة ألوان، و أكثر مجموعة كأنها أوت كتور من وجهة نظري. الفستان الأسود أكثر شيء عجبني، أتمنى لو لبس على الريدكاربيت يكون التبطين مناسب لشكل الفستان، يعني مثلا ما يصير أسود، أعجبني مرة الكريستالات اللي عليه، و شكل الأكمام، أحس فستان زي كذا بيكون حلو على فان بينق بينق أو يوليانا سيرقينكو، الفستان اللي بجمبه (الثاني من اليمين) متحمسه أشوفه على الريدكاربيت، أحسه بيكون حلو، ممكن على أحد زي جينا مالون (مع إني ما أتذكر إنها تلبس فساتين مو ماسكة عند الخصر. الفستان الأحمر، أتمنى لو لبس على الريدكاربيت ما تحط تحته بطانة، يلبسه أحد مع ستيان تراينقل ناعم أسود أو عنابي. الفستان الأسود و الأبيض أحس بيكون حلو إيمي آدمز، أتمنى أشوفه عليها، أحس من فترة ما شفت عليها شيء مثير. 

نسبة المجموعات اللي أعجبتني من أليكساندير ماكوين من صارت ساره بورتون مصممته مرة قليلة، هذي المجموعة من هذي المجموعات القليلة، أحس فيها شغل ساره بورتون واضح، بس بعد أكثر مجموعة تشبه تصاميم أليكساندر ماكوين، و أهم شيء أعتقد إنها بتكون أكثر مجموعة لساره بورتون نشوفها على الريدكاربيت من فترة. مرة عجبني اللبس اللي كأنه روب آسيوي، أحس مكانه لجنة تحكيم بمهرجان، أحد زي كاترين دينوف أو هيام عباس. الفستان اللي بعده أحس بيكون حلو لوبيتا أو إيمي روسم. الأخير أحس بيكون حلو على كايت بلانشيت، أو نايومي كامبل. 

أنتم وش رأيكم بكل العرضين؟ فيه شيء أعجبكم؟ كلهم أو و لا واحد؟ 

أوت كتور؟

هذا الموضوع للي ما يعرف إيش معنى أوت كتور، للي يعرف ما يحتاج يكمل قراءة، إلا إذا كان يبغى يحزر من وين الفساتين، أو بيزيد معلومة، أو حتى لو يبغى يصحح شيء. المهم قررت أكتب هذا الموضوع، لأني لاحظت إنه حتى صديقات لي مهتمات بالموضة ما يعرفون الفرق بين مجموعات Ready to Wear و الأوت كتور. الموضوع مو مسألة حياة موت، أو إنه "عيب" ما تعرف. لكن المشكلة تجي لما تبغين القطعة أو تنتظرينها، و لا تلقينها. 

إيش يعني أوت كتور؟ بالفرنسي: haute couture الكلمة تعني الخياطة الراقية. فكرة الأوت كتور إنه ملابس تقريبا تخاط كلها يدويا، من تطريز، لشك، و حتى تجميع القطع على بعض، فستان واحد ممكن يآخذ أكثر من 600 ساعة شغل. ميزة هذي الملابس إن التفاصيل بالغالب تكون فيها مرة دقيقة و متعوب عليها، و التصاميم بالعادة تكون "timeless" يعني شيء مو على الموضة، لكن لبس حتى لو مر عليه سنوات، بيظل لبس أنيق و (ما راحت موضته). علشان كذا اخترت لكم فوق صور لفساتين من مجموعات مختلفة من 15 سنة اللي فاتت، من بداية الألفية بعدين منتصف العقد الأول، نهاية العقد الأول، و ملابس من المجموعات الأخيرة لهذي السنة (لكل فترة اخترت فستانين). (اللي يبغى يحزر المجموعات أو وقتها، يكتب تحت، و راح أجاوبه إذا صح أو خطأ، و ترا ما فيه هدية الموضوع للوناسة بس P;). 

ملابس الأوت كتور بالعادة ما تعرض للبيع بالبوتيكات، و لا الديبارتمينت ستور، فكرتها إنها تصمم على الطلب، علشان كذا أقولكم لا تنتظرونها تنزل بالمحلات، لأنها ما راح تنزل. بالعادة الملابس مو بس تنخاط على مقاسك، بس بعد ممكن تسوين عليها تعديلات، طبعا إذا كنت بتدفعين 100 ألف دولار على فستان، أكيد المفروض تقدرين تدخلين عليه تعديلات (أسعار الأوت كتور تقريبا من 100 ألف دولار، ممكن أقل شوي، و ممكن بعد أعلى). 

طبعا لأنها ملابس المفروض تعيش معاك فترة طويلة (لأن تصاميمها كلاسيكية)، مجموعات الأوت كتور مالها تأثير كبير على الموضة، و لا هي تتأثر بشكل كبير بالموضة، يعني لو شفت تصاميم معينة بالأوت كتور، لا تتوقعين بكرا مانقو و ريفير آيلاند بيسوون زييها. 

أتمنى إن الموضوع مفيد، و إني ما قلت شيء كلكم تعرفونه، و إذا كلكم تعرفون هذا الكلام قبل، أتمنى صور الملابس أعجبتكم :). 

Spring '15 Haute Couture Recap

أحس كل سنة أتحمس أكثر لأسبوع الأوت كتور، ما أعرف ليه، يمكن لأنه قصير، و يمكن لأنه الملابس فيه دايم فخمة، و أهم شيء أكثر المجموعات التصاميم اللي فيها أحس لو بعد عشر سنوات تشوف الملابس، ما أحس إنها قديمة، و لا تلبس. و أكثر شيء أتحمس له، إني أشوف الملابس على الريدكاربيت. 

السنة هذي أكثر أسمين معروفات بالكتور ما عجبوني مرة (شانيل و ديور). جامباتيستا فالي، و أرماني برافي، كانوا تكرار لأشياء قد شفتها قبل، ما يعني إنها مو حلوة، بس ما فيه شيء حسيت إني ودي أشوفه على الريدكاربيت، فيرساتشي ما أعجبني كثير. و فالنتينو ما حسيت فيه فرق كبير بالتصاميم بين الملابس الجاهزة و مجموعة الأوت كتور. من أكثر المجموعات اللي أعجبتني يوليانا سيرقينكو (مع إنه المجموعات اللي أعجبتني قبل، ما كانت دايم حلوة على الريدكاربيت. مجموعة ثانية كل أوت كتور تعجبني أكثر هي سكايابرللي. مرة حابة الخلطة اللي ماشين عليها، ملابس تصاميم فينتاج، بلمسات شوي كويرك. الفستان الأخضر مثلا مرة أعجبني، خصوصا من ورا (شوفوه هنا). لو أقدر كان أخذته الحين. ودي أشوفه على فايولا دايفيس أو ماقي قولينهول. 

الفستان اللي من ديور أتمنى تلبسه ماريون كوتيارد، خصوصا إنها وجه لديور أصلا، إيلي صعب حسيت بهذي المجموعة فيها شيء مختلف بس قديم (قديم بشكل حلو)، ما أعرف ليه الفستان أحس بتلبسه يوليانا سيرقينكو، أو ودي سونام كابور أو جنيفير لورينس تلبسه، مع إني ما أتذكر إنها قد لبست لإيلي صعب. 

عاجبني اللون الوردي (من يوليانا سيرقينكو و شانيل)، ودي أشوف الفستان الشانيل على إيل فانينق، أما أليكساندير فوتيه أحس بيكون حلو على دايان كروقر. ودي بعد أشوف فستان فالنتينو على لوبيتا نايونقو، مع إني ما أتذكر إنها لبست لفالنتينو إلى الآن (ما يمنع بعد أشوف فستان ديور على لوبيتا). 

وش أحسن عروض الأوت كتور بالنسبة لكم؟ 

All About Great Inspirations

أعرف من فترة ما كتبت هنا، و من زمان ما تكلمت عن فيلم و الملابس اللي فيه. ما أعرف ليه؟ هم بطلوا يسوون أفلام بملابس حلوة؟ ما يهم، اللي بأقوله أمس شفت فيلم قديم (خارج الموضوع، أول كنت أشوف أفلام قديمة أكثر من الحين، ما أعرف ليه، بس صرت أحس لازم لها مزاج خاص). المهم الفيلم اسمه للي ما عرفه من الصور All About Eve، بالمناسبة الفيلم حلو للي يبغى يشوفه. 

طبعا بعيد عن الفيلم و كان هو كويس أو لا، الملابس بالفيلم مرة حلوة، و حسيت بأحيان كثيرة إن كثير من المصممين يآخذون أفكار من الملابس اللي فيه. أعترف إن بحثي عن ملابس تشبه الملابس الموجودة، و اللي حسيت إنه فيه تصميم حديثة تشبه له كان كسول شوي، جزء منه إني من زمان ما كتبت هنا، و لو كنت بأدور أشياء بالضبط تشبه الموجود بالفيلم، أعتقد ما راح أخلص الموضوع إلا بعد أيام، و أنا متحمسة أكتب عنه اليوم. السبب الثاني و هو الأهم إني عجازة بأغلب الوقت. 

كثير من الملابس اللي لبستها وحدة من البطلات (إيڤ) حسيت كأني شفت أشياء كثير يشبه لها عند ڤالنتينو و أونر. فيه لبس لبسته بطلة ثانية (مارچو الأولى من اليسار الصف الثالث)، ما أعرف ليه أحس إني شفته بمجموعة قديمة لإيڤ سان لوران (لما كان هو المصمم)، بس لأني مرة كسلانة، قررت إني ما أدور على اللبس. 

فيه أكثر من لبس (لكل البطلات) أعجبوني، بس ما حطيتهم هنا، لأنهم أحلى بالحركة، و لأني ما بغيت أخرب عليكم كل الملابس، لو تبغون تشوفون الفيلم. 

Pure Beauty

مجموعة فالنتينو ريزورت كانت مرة سبعينات، أعتقد هذي المجموعة إلى الآن فيها تأثير سبعينات زي كثير من العروض هذا الموسم، لكن أشوف إن الملابس كانت كالعادة مرة أنيقة، مرة أنوثية أكثر من أي شيء ثاني، و الألوان مختلفة من باستيل لألوان مرة غامقة. 

أول شيء خلونا نتكلم عن الألوان باللبس الأول مرة عجبتني الكنزة، بشكل عام التنسيق و التنورة الملونة مع الكنزة الملونة، أعرف هذي الملابس قليل تصير على الريدكاربيت، بس ودي أشوف هذا اللبس كامل على كيرا نايتلي. اللبس اللي بعده مرة عجبني بعد تنسيقه، و كيف قماش أنيق كذا، من فوق كأنه سويت بانتز، بعد نفس الشيء أحس لبس زي كذا ما ينلبس على الريد كاربيت، بس ودي أشوفه على تيلدا سوينتون. الفستان اللي بعده مرة أنيق، و إذا كان فيه شيء من المجموعة راح يلبس على الريدكاربيت فهو هذا، الشغل عليه مرة حلو (ريش مركب)، ودي أشوفه على فليستي جونز أو لوبيتا نايونقو أو كايت بلانشيت، أما الأخير و اللي فيه ثيم كان موجود كثير بعروض صيف 2015 و هو البحر، أحسه فستان زواج، إذا فيه أحد بيلبسه ريدكاربيت، مع إني ما أتذكر قد شفتها بفالنتينو بس ودي أشوفه على جيسيكا شستاين. 

أنتم وش الأشياء اللي أعجبتكم من فالنتينو؟ 

HC Fall '14 (Report)

الكتابة الفترة هذي شوي صعبة. كمبيوتري انكب عليه موية، و بعض حروف الكيبورد ما عاد تشتغل، فلازم ألقى جهازي ثاني أكتب منه، أو زي هذي الحالة أكتب من الآيفون. ما علينا، المهم الأسبوع اللي فات كان أسبوع الموضة لأوت كتور خريف 2014. و هنا "تقرير" عن الأسبوع.

هذي المرة على غير العادة، عرضي المفضل كان أتلييه ڤيرساتشي، أعتقد أنت مرة حلو، و مع إنه إلى الآن فيه تصاميم ڤيرساتشي "سيكسي". إلا إني أحس أنه فيه تنوع، و يصلح لناس كثار.

على غير العادة بعد، أعتقد إنه أكثر مجموعة بنشوفها على الريدكاربيت بتكون جامباتيستا ڤالي، مو إيلي صعب. أحس فساتين ڤالي تصرخ ريد كاربيت. مع ذلك اخترت هنا لوك أشك أنه راح يكون ريدكاربيت و هو اللبس اللي التوب حقه كأنه بيجاما (أعرف الناس لبسوا البيجامات و قطعوها، بس إلى الآن أحبها). لو أحد بيلبسها أعتقد بتكون يوليانا سيرچينكو. 

بالكلام عن يوليانا، أظن مجموعتها أسوأ مجموعة طلعتها من بدأت تصمم. أحسه خليط من كل المصممين و لا عجبني شيء. بالمناسبة مجموعتها الماضية انلبست كثير ريد كاربيت، مع إنها كانت عاجبتني، إلا إنها على ناس كثير ما طلعت حلوة.

أعجبني ديور، شانيل بالنسبة لي فساتين مرة حلوة، و ملابس مرة مو حلوة. أعجبني مرة الفستان الأحمر من أرماني براڤي، أظن إن كايت بلانشيت لازم تلبسه. ڤالنتينو كان كويس، مو مميز، لكن أعتقد مصممينه جالسين يحاولون يآخذونه لشكل جديد بعيد عن الشكل اللي كان عليه بالثلاث سنوات الأخيرة.

 آخر شيء هذا الفستان الأسود بكورسيه كريستال من جان بول چوتييه. هذا الفستان أحسه مخلوق لدينا فون تيس، لو ما لبسته لو بعد عشر سنوات، بأجمع فلوس و اشتريه لها. P:

 المهم صحيح إن ما عندي كيبورد صاحي، بس بآحاول أكتب عن فساتين الموسم اللي خلص، و اللي تمنيت/ خمنت إنها راح تلبس. 

بس الحين أنتم وش العروض المفضلة عندكم من أسبوع الأوت كتور؟

Cannes 2014: 40+

مو شيء جديد إني أحب النساء الحلوات، أظن المدونة هذي طول الوقت أتكلم عن النساء اللي أعتقد أنهم حلوات، و لما يكونون حلوات و ذكيات ما يحتاج أقولكم إني ممكن أتحول كأني من مشجعين 1D بس لهذي المرأة، الشيء يمكن اللي ما قد قلته هنا قبل، أو يمكن قلته بس ما كان بشكل واضح و صريح: إني أحب النساء الكبيرات الجميلات، طبعا و ذكيات، و شخصيا ألقاهم جذابات أكثر من الصغيرات. ما علينا من كلامي البايخ هذا، أمس خلص مهرجان كان، و هذا الشيء الوحيد (يمكن اللي طلعت منه). 

صراحة مستوى المهرجان هذي السنة (من ناحية الملابس) مو مرة مميز، بالنسبة لي هذا خبر حلو P: على الأقل ما أتعب كثير بإيش أدخل لأحسن لبس للشهر و إيش لا (أعرف صايرة أعترف لكم عن كثير من المشاكل العويصة اللي تواجهني و أنا أكتبP:). لكن بالنسبة لي الشيء المميز بالمهرجان هذي السنة، إن أكثر اللي كانت أشكالهم حلوة، كانوا فوق 40 (الفئة العمرية المفضلة عندي P:). مع أنه كل سنة يصغر عمر المشاهير (قصدي أعمار اللي يشتهرون و هم صغار) (مو أنا اللي أكبر) أحس إنه العالم صاير يقدر النساء الكبيرات، و أعتقد أنهم يستاهلون هذا التقدير. 

المهم خلونا نتكلم عن الملابس، كايت بلانشيت بالمهرجان (و قبله بيوم) كانت كل يوم تطلع بلبس أحلى من الثاني، هذا الفستان اللي حطيته من فالنتينو (هو اللي لبست معاه حلق الربيان)، أعتقد إن شكلها هنا كان قاتل. ليلى حاتمي (الأولى من اليمين) ممثلة إيرانية و كانت عضو لجنة التحكيم هذي السنة، طلعت بهذ اللبس لأول يوم، اللي مرة أنيق، ما لقيت لها صورة لحالها إلا هذي المقطوعة، شوفوا هنا الصورة كاملة. 

جوليان مور بشانيل (شانيل أظن أكثر ماركة لبست بالمهرجان هذي السنة)، صراحة الفستان لحاله عادي و أقل من عادي، لكن على جوليان بالنسبة لي طالع مرة حلو. بعد كارول بوكيه، بعد بشانيل و عضو لجنة تحكيم (ممثلة فرنسية)، عجبني مرة شكلها بهذي البدلة، من الأشياء القليلة الأنيقة من شانيل بالفترة الأخيرة. 

جولييت بينوش بفستان ما أعرف من وين، بس عجبني مرة، لو أمي مثلا كانت تدور على لبس لزواج، أكيد باقنعها بهذا. آخر شيء آنيس دو لو فريسانج، لابسة فستان أحمر ما أعرف بعد من وين، عندي أحساس أنه إما كريستيان لاكوا، أو جان بول قوتييه، أعجبني مرة العقد اللي لابسته معاه و بعد عجبني شكل الفستان من ورا مرة حلو، شوفوا هنا.  

The Amazing Emma (Again)

قلت لكم إني راح أحاول أكتب عن إيما ستون بالجولة الترويجية لفيلم The Amazing Spiderman 2. صراحة ما أعرف الجولة خلصت أو لا، بس أعتقد إنها خلصت، لأنه آخر طلعه شفتها إيما كانت بالميت قالا، و طبعا الميت قالا مالها علاقة بالترويج للفيلم، حاولت أدور بالنت إذا لسا باقي شيء بالجولة، بس ما حصلت شيء، علشان كذا بأقرر أنه الجولة انتهت P:. 

إذا تتذكرون تكلمت عن إيما بجولتها للجزء الأول من The Amazing Spiderman، و بعد حطيت لبسها اللي لبسته لبريمير الفيلم الثاني بلندن لأحسن لبس لشهر أبريل (هنا الموضوع، لو ما كنتوا صوتوا إلى الآن). صراحة مستوى إيما ما كان أقل من الجولة اللي فاتت، يمكن الشيء الوحيد اللي تغير (أكيد غير الملابس) هو لون شعرها، من أشقر لأحمر. بالمناسبة وش تفضلون؟ إيما بالأحمر أو بالأشقر؟ للي ما يعرف إيما أساسا شقراء مو جينجير/ صهباء. بالنسبة لي مرات أحس إني أحبها أكثر أحمر، و مرات أحس الأشقر ما ينمل منه، بس الأحمر يمل. ما علينا خلونا نتكلم عن الملابس.

أولا خلونا نتكلم عن الأحمر، مو قلت لكم بموضوع الفساتين الحمراء هنا، أنه فيه موضوع ثاني بيكون فيه أحمر، هذا هو الموضوع. لما شفت إيما بهذا الفستان الڤالنتينو احترت أختاره هو أو الأصفر الاتلييه ڤيرساتشي لأحسن لبس لشهر أبريل، لكن أخيرا قررت إني أختار الأتلييه، لأني أعتقد أنه مو كثير نشوف لبس بهذي الفخامة. بس من جد هذا اللبس من أحسن الفساتين الحمراء اللي شفتها مؤخرا. 

لوك ثاني عجبني بعد، الفستان الأسود من چوتشي عند جيمي فالون، أعجبني مرة إن الفستان من قدام شكله عادي، بس من جمب يطلع مختلف مع الفتحة (الجزء الأسود جزء من الفستان مو برا)، على الأقل كذا كان بالرانواي. (لاحظتوا إني أحب إيما بالقصير أكثر؟) ما أعرف أحسها تكون مرتاحة أكثر. باقي الملابس من فوق يمين (ڤالنتينو (غير الأحمر)، إيرديم، ڤالنتينو (ثاني)). تحت من اليمين بعد چوتشي: (برادا، شانيل). 

أنتم وش رأيكم بشكل إيما بجولتها لفيلمها الأخير؟ أنا شخصيا دايم أنبسط على حضورها، أحسه حلو من دون تكلف. 

Best Dressed: April 2014

الشهر هذا زي ما قلت بنهاية التدوينة اللي فاتت يمكن الخيارات مو مثيرة أو فخمة زي الشهرين اللي فاتوا، لكن فيه شوي حيوية، و ألوان حلوة، مع أنه كثار لبسوا أسود هذا الشهر، على عكس شهر مارس، لما قلت لكم كثار لابسين أبيض، ما علينا، خلونا نبدأ بالملابس.

كان فيه أسود، و كان بعد فيه درجات الأحمر زي ما أنتم شايفين. للي قروا الموضوعين اللي كتبتهم ريم عن كوتشيلا (هنا و هنا) يمكن قروا ردي، و عرفوا رأيي بالملابس بالمهرجان، بس أنا ما عندي مشكلة مع البوهو، لكن بالنسبة لي يلبسه اللي دايم يلبسه زي نيكول ريتشي، سيينا ميلر و كايت موس، أعرف أنه لبس كايت موس هذا ما يعتبر بوهو بمقاييس كوشيلا، بس بنظري، كذا أعتقد المفروض تكون أناقة البوهو، مو كأنه تهريج. أنجليزية ثانية سوكي واترهاوس بماركة من إنجليزية ثالثة (ڤيكتوريا بيكام) عجبني مرة شكلها، عجبني شعرها، و مكياجها، و أكيد جزمها، الشيء الوحيد اللي مو مرة عاجبني الشنطة السوداء. 

أيما ستون بفستان أصفر من أتلييه ڤيرساتشي، إما الوقت هذا جالسة تروج لفيلم Amazing Spiderman 2 كل الجولة إلى حد الآن شكلها فيه مرة حلو (أعتقد باكتب عنها بشكل منفصل لما تخلص) بس هذا الفستان بالنسبة لي يستاهل يدخل أحسن لبس للشهر. 

آخر شيء باتكلم عنه دو جوان ببرادا (وسط، تحت)، صراحة قليل جدا إني انفتن بجمال وحدة. لا تفهموني غلط العالم مليان نساء جميلات، بس من بعد انفتاني بشكل لوبيتا بنهاية السنة اللي فاتت، السنة هذي، هذي المرأة خلتني ساعات أدور بصورها.

من أحسن لبس لشهر أبريل 2014؟

كايت موس بسان لوران

ديانا أقرون بكوشني إي أوكس

جايمي كينج بفالنتينو

سوكي واترهاوس بفيكتوريا بيكام

إيما ستون بأتلييه فيرساتشي

دو جوان ببرادا

سولانج نولز بأكني ستوديو

ألونا فرانسيس ببلانسياقا

Poll Maker

Spring 2014 Couture: The Report

جينا لأسبوع موضة جديد، صراحة أحب أسبوع الأوت كتور، فخم، الموضة فيه قليلة (أعرف أنه أسبوع موضة) بس الأوت كتور بالعادة الملابس فيه تكون "تايمليس"، و الشيء الأحسن أنه أسبوع واحد بس، ما تكثر عن 20 عرض (على الأقل اللي أعرفها) فما أحس إني بماراثون نفسي ينقطع و أنا أتابع العروض. ما علينا، خلونا نتكلم عن العروض بشكل عام، و أحسن الملابس بالنسبة لي. 

بالنسبة لي العرض الأحلى، كانت مجموعة يوليانا سيرقينكو، أعتقد هذي مجموعتها الرابعة، و أظن إنها من أحسن مجموعاتها لحد الآن. تقريبا حبيت كل قطعة بالعرض، و أتمنى إني أشوفها أكثر على الريدكاربيت، ما أظن بنشوفها بالأوسكار، بس عندي أحساس أنه بتكون موجودة بمهرجان كان، حبيت مرة الفستان الأحمر، أحس لو شفته على الطبيعة يمكن بانهار. بما أننا نتكلم عن يوليانا شفت هذا الروب المنقط اللي كأنه بيجاما بعرض سكيامبرلي (الثاني من اليسار، فوق) طبعا حبيته مرة، لأنه منقط و لأنه بيجاما، بس لأنه مو حاصل لي، راضية أنه أحد يلبسه، وودي أشوفه على يوليانا، أحسه يصلح لها مرة. 

ما أعرف عرض ديور ما حسيته ديور، شوي كان جامباتيستا فالي، و شوي كارفين (زي الفستان الأول من اليسار، فوق)، أعرف إننا بنشوف منه كثير على الريدكاربيت (لأنهم يلبسون ماريون و نتالي بورتمان، و جنيفير لورانس، و لأن لي لي سوبايسكي صديقة راف سيمون)، بس لو كان فيه فستان ودي أشوفه من المجموعة بيكون هذا الفستان و على ماريون. 

أعتقد شانيل كان فيه قطع حلوة كثير (أحلى من مجموعة الخريف أكيد)، مو مميز، بس عجبني فكرة سنيكرز على أوت كتور، و حسيت الملابس مرة خفيفة، بنفس الوقت فيها شغل مرة كثير. 

مايسن مارتين مارقيلا، ما شفته مثير، بس أتمنى أشوف هذا اللوك على ريانا، أحسه مخلوق له (الثاني من اليسار، تحت). حبيت الفستان الرمادي من فالنتينو، ودي أشوفه على تيلدا سوينتن، عجبني بعد التوكسيدو الفراشة من جان بول قوتييه، موزة تلبس كثير من قوتييه أوت كتور، بيكون ظريف لو تلبس هذا. أرماني برافي قدم مجموعة بشوية إيحاء هندي (إلى الآن الملابس الهندية تأثر على الموضة) أعتقد هذا الفستان بنشوفه على كايت بلانشيت بباقي موسم الجوائز، خصوصا إنها مرشحة للأوسكار. 

ما حطيت صورة لأي شيء من العرض، بس إيلي صعب، لحد الآن يسوي فساتين مرة حلوة، و دايم تطلع حلوة بالريدكاربيت، لكن ما أشوف فيه شيء مختلف عن باقي مجموعاته، يمكن الشيء الوحيد، أنه استخدم اللون اللي قالت عنه بانتون أنه لون السنة، أو لون قريب منه هو اللون البنفسجي، أو اللي سمته بانتون: الأوركيد المشع. 

Report: Golden Globe 2014

أمس كان قولدين قلوب، يمكن كلكم تعرفون قبلي، بس ما يهم، باتكلم عن الأشياء اللي شفتها، و علشان أكون صريحة معكم شيئين حمسوني أكتب: أوليفيا وايلد و زوي داشنيل. ما أعرف هي الفساتين اللي قللت حماسي بحفلات توزيع الجوائز (إني أحس الفترة الأخيرة ما عاد فيه فساتين تخلي الواحد يشهق) أو لأن اهتمامي بالأفلام قل، مو بالأفلام، بالجوائز هذي، صرت ما عاد أحس لها قيمة، و إنها كلها مجاملات و مصالح. ما علينا، خلونا نتكلم عن  الملابس و الموضة. 

خلوني أبدأ بأوليفيا وايلد، أولا أحط توضيح إني ما أشوف الحمل "كيوت"، عادي ناس يظلون زي ما هم + البطن، و ناس ما يصيرون حلوين، بس هي مرحلة و تعدي، الفكرة إني ما أشوف إن البطن حلو، علشان تعرفون إن رأيي بأوليفيا يستحق منكم أنتم بعد الإهتمام P: المهم اللي بأقوله، إن شكل أوليفيا بهذا القوتشي بريمير أحسن شكل حامل قد شفته بحياتي (أظن)، ما عمري شفت حامل شكلها مثير كذا، المهم ما علينا، بس تحذير، أظني راح أدخلها بأحسن لبس لشهر يناير. 

أوه لوبيتا، أظن لو لفت قماش و طلعت من البيت بأقول هذا فستان حلو، لوبيتا لابسة فستان رالف لورين أعجب ريم من عروض نيويورك، لو قريتوا الردود على الموضوع، عرفتوا أنه ما كان عاجبني لأسباب، بس وش أسوي لوبيتا تحلي كل شيء. 

زوي داشنيل لابسة بعد فستان كان عاجب ريم من أوسكار دي لا رينتا (بعد بالردود واضح). عجبني شكلها بالفستان، بس عندي مشكلة كبيرة مع الوردة اللي حاطتها، أولا: إني أعتقد إنها حركة قديمة، بعدين ما أحسه مكانها، بعدين نفس الوردة شكلها رخيص بعد. 

عجبني شكل أيمي آدمز بفالنتينو، بعد هي لابسة فستان أحمر (أظن الأحمر و درجاته كان أكثر لون لبس أمس). (حطتيه هنا بالملابس اللي ودي أشوفها على الريدكاربيت) مشكلتي الوحيدة معه مو مشكلة، بس كان ودي لو خلت شعرها فيرونيكا لايك وايفز، يمكن ما كانت تبغى شكلها يصير زي شخصيتها بأمريكان هوسيل. 

آخر شيء ما حطيت صورتهم فوق، بس هذا رابط للصورة، زوي سالدانا لابسة فستان بعد تمنيت يلبس من برابل قرونق، عجبني شكله هنا بالأفتر بارتي، بس بالريد كاربيت ما كان عاجبني مرة. و ميشيل دوكري لابسة فستان من أوسكار دي لا رينتا، كانت أقول أنه يصلح فستان زواج، بعد عجبني شكلها فيه.

أنتم وش رأيكم؟ وش عجبكم؟ من عجبكم و أيش ما عجبكم؟ 

Best Dressed: November 2013

زي ما قلت لكم اليوم راح يكون عن أحسن لبس لشهر نوفمبر. إلى الآن أفكر بطريقة لترشيحات أحسن لبس، أعتقد إني بأخليها بالأسبوع الثالث من يناير، و طبعا بيكون فيها الفساتين الإثناعشر اللي فازت بترشيحات الشهور اللي أخترتوها. 

ما علينا من أحسن فساتين السنة، خلونا نشوف فساتين نوفمبر. 

أولا خلوني أقولكم إني مبسوطة، فستانيين من اللي قلت إنها راح تكون بالريدكاربيت انلبست، فيه فساتين ثانية انلبست بس النتيجة ما عجبتني، المهم هنا اليوم معانا روني مارا ببلانسياقا و شو كي بفالنتينو كتور. كل الثنتين أعجبوني مرة. بعد أعجبتني كايت بيكنسيل بالقوتشي، من زمان ما أعجبتني هذي الطريقة باللبس "هوليوود قلامور" بس مع لون الفستان أحس شكلها طالع مرة حلو. من زمان عن ليتون ميستر، بس عجبني شكلها هنا، أحسه مرة مرتاح، لكن لو سألتوني وشو اللوك المفضل عندي (اللي ممكن ألبسه على طول) من دون كلام أليكسا شونق (مو مفاجأة إني صايرة أحبها أو أحب ستايلها مرة). 

أنتم وش اللبس الأحسن عندكم؟ الأسماء محطوطة عكس عقارب الساعة. 

Create your free online surveys with SurveyMonkey , the world's leading questionnaire tool.

Red by Valentino

بالصدفة عرفت عن عرض خاص لفالنتينو بالصين، كان مع افتتاح بوتيك لهم بشنقهاي. العرض شفت فيه أشياء ما قد شفتها بأي مجموعة لفالنتينو و المجموعة كلها أحمر. و ما يحتاج أتكلم أكثر لما يكون الموضوع أحمر، و فالنتينو. أظن أنكم كلكم تعرفون أنه أحسن من يسوي فساتين حمراء هو فالنتينو. 

المهم المجموعة ما أعرف إذا بتنباع بالصين لحالها، أو بكل العالم، أو حتى لو كانت أصلا بتعرض للبيع من الأساس. لكن الشيء اللي صدق أتمنى يصير، أنه أشوف قطع من هذي المجموعة على الريدكاربيت. بالذات الجمب سوت أو ما أعرف هي بنطلون و توب منفصلات (الثاني من اليسار) بس بجد ودي أشوفها على أحد. فكرة أنه كيب أو رداء شيفون طالع من التوب أعجبتني مرة. 

الفستان الأول من اليمين ذكرني بفستان من برادا لبسته ميشيل دوكري بحفل الإيمي، مع إني أحس أنهم متشابهين، ودي أشوفه على الريدكاربيت، صحيح أنه يشبه بعد واحد من مجموعة أوت كتور الأخيرة، كان عاجبني بعد، لكن أحس هذا خفيف و بيكون حلو بريدكاربيت لحدث مو كبير مرة. 

Modern Twist

ما أعرف هو اليوم آخر يوم بأسبوع باريس أو لا .. تدرون إني ما حطيت ببالي كثير هذي المرة وش قاعد يصير (أحس فيه أحد بيقول لي هذا هو مو كثير). المهم مو متأكدة أنه كل الأسامي الكبيرة عرضت. اليوم كان فيه (غير فالنتينو اللي باتكلم عنه) كان فيه شانيل و أليكساندير ماكوين. صراحة ما أعجبني شانيل، فيه أشياء أعجبتني بس العرض كله ما أعجبني، و لا أعجبني ماكوين بعد.  

بعرض فالنتينو كانت المجموعة مستوحاه (أعتقد من اليونان)، فالنتينو مو هو الوحيد اللي استوحى من اليونان، دولتشي آن قابانا قالوا أنهم مجموعتهم الأخيرة مستوحينها من تأثير اليونان على صقلية. تعرفون أنه ما عجبتني مجموعة دولتشي آن قابانا. لكن زي ما هو واضح أنه فالنتينو عاجبتني. ما أعتقد المشكلة بالوحي قد ما هو التنفيذ. 

من أكثر الأشياء اللي أعجبتني بالعرض أنه مع إنه الملابس محافظة على الطابع الفلكلوري اللي عاطينه قرازيا كيوري و بايكيتشيولي (مصممين فالنتينو) للماركة من استلموها، إلا أنه فيه شيء "حديث" بالملابس هذي المرة، مثل القمصان السماوية هذي اللي كأنها كونتراست شيرت. أعجبني الفستان الأسود، أعرف ممكن أحد يقول وش فيه زود؟ لكن أعجبني مرة بساطته مع هذي المجوهرات الذهبية (العقد و الطوق و الصنادل). 

من أكثر من أعجبكم من باريس؟

Best Dressed: September 2013

زي ما قلت لكم قبل، ما أعرف ليه الملابس الحلوة كانت كثيرة هذا الشهر، لدرجة إني لما جيت أختار القائمة النهائية، كل شوي أحذف أحد و أدخل أحد، كله علشان آصل القائمة النهائية الأحسن. بصراحة ما أعرف أنا قدرت أختار الأحسن، أو فيه ناس طلعوا من القائمة و هم يستاهلون، بس خلونا نركز على الموجودين، و إن شاء الله يعجبونكم. 

أقدر أقول إن الثيم حق هذا الشهر هو المنكروم (الأبيض و الأسود) ما عادا دايان كروقر بفالنتينو و آشلي ميداكوي بمونيك لوليه (بالمناسبة كل الثنتين كانوا قبل موجودات بأحسن لبس). أول وحدة عرفت إني راح أدخلها هي لوبيتا نيونقو (الصف الأول، أول وحدة من اليسار) بفستان برادا (أتمنى إني قلت اسمها صح)، بصراحة ما أعرف هو الفستان حلو، و إلا هي اللي محليته. بس بشكل عام أعتقد لو استمرت على الساحة قدامنا وحدة أعتقد إنها بتكون من الموجودات دايم على هذي المدونة. سيينا ميلر بعد من الأشخاص اللي أعتقد إني صايرة ما أقدر أقول لأي شيء تلبسه أنه مو حلو، ما أعرف بس من ولدت و هي صايرة حلوة بعيني، قولوا لي أنكم أنتم بعد تشوفونها حلوة، مو بس أنا أتوهم. إليزابيث موس (أول يمين) للي ما يعرف ماد مين مثلا أعجبني شكلها مرة بالإيمي، و إن خياراتها كلها كلاسيكية، من شكل الفستان، لألوانه للون الروج. 

Create your free online surveys with SurveyMonkey , the world's leading questionnaire tool.

Best Dressed: July '13

ما أعرف ليه أحس شهر يوليو مر ببطء، على الأقل بالنسبة لي، يعني فيه ملابس انتبهت لها بداية الشهر، يوم رجعت أناظرها من جديد حسيت إنها أقدم من شهر يوليو. بداية الشهر كان فيه عروض الأوت كتور، غير كذا ما أتذكر فيه أحداث مهمة، غير بريمرات متفرقة. بشكل عام أقدر أقول الملابس الحلوة كانت قليلة، بس بالنسبة لي كانت تستاهل. 

بالنسبة لي أعتقد إن هذي القائمة أكثر القوائم اللي سويتها تنوع. الشيء اللي مستغربته (على نفسي) على إني أحب تيلدا، أظن إن هذي أول مرة تكون بقائمة أحسن لبس للشهر. 

أعتقد أول لبس تأكدت إني ما راح أشيله من القائمة المقترحة لأحسن لبس، هو كايت بلانشيت بالفستان الوردي من بلانسياقا. مع إنه لذوقي الخاص بأفضل ألبسه من دون القطعة اللي فوق زي هنا، لكنا قدرت تطلع فيه بشكل حلو. لي لي  سوبايسكي ترجع بديور مرة ثانية لقائمة أحسن لبس، هذي المرة بجمب سوت. أعجبني فستان كريستوفر كاين على كايت بوسورث (فوق يسار) صراحة لما شفت مجموعة كاين للخريف، كانت شاكة أنه فيه أحد ممكن يلبس بذات الفساتين بشكل حلو، لكن كايت بالنسبة لي قدرت، خصوصا مع مكياجها و تسريحتها. 

حبيت مرة شكل هيلين ميرين (يسار تحت) حسيته مناسب لعمرها، بنفس الوقت مو لبس جدات. آخر شيء بأعلق عليه هو نتاليا بشانيل، أظن أنه هذا اللبس أكثر لبس تقليدي، لكن بالنسبة لي، شكل الجاكيت و شكل التنورة (من تحت) شوي أعطت للبس شكل مختلف، خصوصا مع وجه نتاليا اللي مرة "فريش". 

Create your free online surveys with SurveyMonkey , the world's leading questionnaire tool.

Flashback: Wet Lips

من فترة و أنا جاي ببالي روج رطب، ما أعرف كيف آصف لكم الفكرة، بس شيء يخلي الشفايف كأنه عصير. أعرف أنه إلى الآن كلامي "فاضي" و ماله معنى بس يمكن تفهمون بعد ما أحاول أشرح أحسن. و أنا جالسة أفكر إيش الروج اللي ممكن يعطيني هذا الشكل، تذكرت هذا العرض من فالنتينو، و قررت أشارككم بالذكرى هذي (لو ما عندكم مشكلة). 

أعتقد بألفين وستة (مو متأكدة ستة أو سبعة) كان زواج بنت خالتي، أظن هذا أول زواج بحياتي خططت له كل شيء، من اللبس للمكياج. فستاني خطته زي هذا الفستان من إيلي صعب أوت كتور. كان عندي قماش ساري، و قررت إني ما أخيطه أي شيء هندي، لأني أعتقد بيصير شكلي كأني حفل تنكري، فقررت إني أخيطه زي هذا الفستان، و لأن الفستان كان فيه شوي "فوشي" أعرف إني قلت لكم إني ما أحب هذا اللون، بس كان حلو، و بس على الأطراف :). أخترت إني أسوي مكياج يشبه اللي بالعرض هذا من فالنتينو، أعتقد نه كانت أول مرة لي أشتري مكياج حقيقي (غير أرواج نود من بودي شوب). 

أتذكر إني شريت قلوس من قيلران يشبه اللون اللي على العارضة (القلوس الأول و الأخير) و شريت كحل ذهبي من مايك آب فوريفير. الحين و أنا أرجع مرة ثانية و أشوف اختياراتي، أعتقد إنه إلى الآن حلوة (يمكن الفستان الحين مو ذوقي، بس أعتقد أنه ما زال حلو). المكياج بالنسبة لي حلو مرة، و إلي الآن أظنه حلو (كبروا الصورة و شوفوا الهاي لايتير كيف مستخدم، و الكحل الذهبي أو الشدو الذهبي مو بس محطوط على الجفن و بالزاوية الداخلية للعين، بعد محطوط شوي منه على شفايف، أعطاها هذا الإحساس الرطب اللي أقولكم عنه. 

أنتم وش فيه من ذكريات الملابس و المكياج عندكم؟ 

Brides in Couture

ما فيه زواج معين ببالي (زواج مشاهير) علشان أتمنى أنه أحد يلبس من هذي الفساتين شيء (أعرف أنه أوليفيا وايلد بتتزوج، و أندريا كاسيراقي ممكن يتزوج، و يمكن كيم كرداشيان بعد) بس كلهم ما يهموني (طبعا من ناحية الملابس و وش ممكن راح يلبسون لزواجاتهم) يمكن الشخص الوحيد اللي بيهمني أعرف وش راح يلبس هي شارلوت كاسيراقي لو قررت تتزوج (مع أنه الغالب راح تلبس شانيل) ما علينا، بس بعد ما شفت عرض أرماني برافي، حسيت ودي أحط صور للفساتين اللي كانت بعروض الأوت كتور و ودي لو أشوف أحد لابسها كفستان زواج. 

(جامباتيستا فالي، فالنتينو، إيلي صعب، يوليانا سيرقينكو، مارقيلا، أرماني برافي) 

 زي ما قلت لكم إن عرض أرماني برافي هو اللي حمسني إني أكتب و أختار فساتين أعتقد إنه تصلح فساتين عرايس من عروض الأوت كتور لخريف 2013 (الفستان اللي أقصى اليسار من عرض أرماني). بالبداية زي ما قلت لكم عجبني مرة عرض جامباتيستا فالي كان فيه فساتين كثير بيضاء، بس حبيت أختار هذا (الأول من اليمين) من العرض لأنه ذكرني بفستان زواج جيسيكا بيل اللي ما أعجبني و كان من تصميم جامباتيستا فالي (بس لو انتظرت سنة علشان تلبس هذا ما دام بخاطرها فستان وردي P:). 

أعجبني فستان إيلي صعب (الثالث من اليمين) اللي كأنه رداء (كايب). شفنا الفترة اللي فاتت كثير بمناسبات رسمية أحد يلبس كايب من ساره جيسيكا باركر، شارلوت كاسيراقي، موزة المسند، و آخر شيء ملكة هولندا. حبيت بعد فستان مايسون مارتين مارقيلا (الثاني من اليسار) حسيت فيه شيء فينتاج، أحب الفساتين الفينتاج بذات لما يكون شكلها كأنه "مهترية" زي هذا الفستان. 

وشو فستانكم المفضل (كفستان زواج)  من هذي الخيارات أو من أي فستان عرض بمجموعات أوت كتور خريف 2013؟

Trend Alert: Rain Boots

من فترة كنت أدور لي على بوت (ما يحتاج أقولكم إني صرت أحتاج بعض المرات ألبس بوت)، ما علينا. و أنا أدور و تعبت من التدوير فكرت: طيب أبوات مطر ما تطلع "كووول"، ما يحتاج أقولكم إني كنت أتوقع إنها رخيصة، لأن بالعموم شكلها مو حلو (على الأقل هذا رأيي فيها)، بس قلت يمكن يطلع شكلها حلو، طيعا إلى الآن ما أعرف أسعارها. 

قبل فترة شفت إيديتوريال لكيري موليقان على هاربر بازار البريطانية و شفتها و هي لابسة هنتر (أبوات مطر) مع هذا البالطو الصيفي من برادا، شكلها ظريف، مو حلو، بس شكله ريفي إنجليزي مرة، بس زي كثير من الأشياء اللي تكون بالمجلات و الإيدتوريالز ممكن تكون ظريفة على الورق، لكن بالواقع لا. حفظت الصورة وقررت أراجع نفسي بعد أكثر (و بنفسي حتى لو شريت أبوات، ما راح أشتريها طويلة كذا. 

اليوم و أنا أقلب بمجموعات الريزورت ل 2014 شفت مجموعة فالنتينو، و أول شيء انتبهت له أنه كثير من "اللوكز" اللي حاطينهم باللوك بوك، كانوا العارضات لابسات أبوات مطر أول سؤال جا ببالي: "ممكن نشوف أبوات المطر صارت موضة؟" ما أستبعد، أعتقد على الأقل واحد أو اثنين بيحاولون يلبسونها يمكن بأسبوع الموضة بنيويورك بسبتمبر، أعتقد إن هانا قابي ممكن تلبسه (مع أنها بالعادة لها ستايلها الخاص اللي مو كل الناس تسويه). بس خلونا نشوف. 

أعرف إن أكثرنا ما يقدر يلبس هذي الأبوات لأنه حر و جونا بالعادة "خالي" من الأمطار، بس لو كنتوا بمكان ثاني، ممكن تلبسون هذي الأبوات على إنها "كشخة"؟ 

The Battle of the Red Carpet

أعتقد خلصت عروض أوت كتور خريف 2013. زي ما وعدتكم راح أتكلم عن العروض بشكل عام، و بنفس الوقت بأحط أحسن الملابس اللي بنفس الوقت أعتقد إنها أو أحب أعتقد إنها بتكون على الريدكاربيت (تعرفون أحب أتخيل نفسي إني صدق ستايلست P:). من العروض اللي فاتت خمسة (على الأقل متأكدة إني شفتها من التسعة اللي اخترتها لبست على الريد كاربيت) فأنتم سايروني و خلوني أخمن أو أتمنى وش راح يلبس الفترة الجاية من المجموعات اللي عرضت هذا الأسبوع. 

قلت لكم قبل شانيل بالنسبة لي كان سيء، ما قدرت أختار منه أي شيء، رجعت مرة ثانية وجلست أحاول أشوف شيء ممكن يطلع حلو، بس عجزت (فيه لوك أو ثنين قدرت أتخيل أنه ممكن يطلعون حلوات مع تعديل). المهم نجي للملابس أعتقد إن أرماني برافي أكثر مجموعة حسيت إنها شيء مختلف (على الأقل عن السنوات اللي فاتت)، ديور و فالنتينو مصممينهم جالسين شوي شوي يغيرون من شكلهم. أكثر شيء أعجبني و بجد أتمنى أشوفه هو الفستان القصير اللي فيه شيء أزرق سماوي من جامباتيستا فالي (مرة حبيته). ودي أشوف بعد أحد يلبس الفستان اللي عليه طبعات حيوانات من جان بول قوتييه، بس ودي اللي يلبسه ما يلبسه برخص (عندي طبعات الحيوانات "نمر، فهد" بسهولة تتحول للبس رخيص، بس لو لبست بأناقة تطلع حلوة). آخر شيء إيلي صعب بالنسبة لي ما كان عنده جديد، بس أعتقد أنه راح يكون أكثر واحد يلبس له على الريدكاربيت. 

إذا كنتوا تابعتوا العروض، وش أحسن عرض عندكم؟ و لو ما تابعتوا، وش أحسن شيء من الفساتين اللي حطيت صورتها هنا؟