الخميس، 4 أكتوبر، 2012

Wedding Fever

بداية الأسبوع طلعت صور مسربة لزواج آن هاثواي (اللي ما كنت أعرف إنها بتتزوج قريب) (كانت لابسة فالنتينو). قبلها طلع خبر إن بلايك لايفلي تزوجت و لبست لزواجها من ماركيزا (بالمناسبة صور زواجها بتطلع على مجلة Wedding حقت مارثا ستيوارت أظن بالشهر هذا). و بعد بداية الأسبوع كان أكثر موضوع قراءة هو موضوع Weekend Wedding، اللي كتبته علشان زواج نيكول ريتشي السنة اللي فاتت. 
بس قبل لا أبدأ الموضوع كان هذا الموضوع ببالي من أسبوع الموضة بنيويورك بس قلت باستنى لحد ما يخلص باريس، علشان أشوف أكبر عدد من العروض. 
بصراحة متحمسة أشوف صور زواج بلايك، و بعد ودي أشوف صور أحسن لزواج آن هاثوي، ما أعرف ليه أتحمس لصور الزوجات مرة. الشيء اللي يحبطني دائما، على كثير ما رحت لزواجات ما أعرف ليه العالم تختار نفس الفساتين من جديد، بجد كثير زواجات ما أتذكر بالضبط فستان العروس (مع إني أختار مكان "ستراتيجي" وقت الزفة)، بس بطريقة ما، يصيرون كلهم نفس الشكل: فستان أبيض سترابليس نافش ؟!!!. و لأني ودي بجد أشوف "عرايس" بأشكال مختلفة، أخترت من العروض الفساتين، اللي ودي لو رحت لزواج أشوفها على العروس. 

(من اليمين لليسار: أوسكار دي لا رينتا، فيفيان ويستوود، ماركيزا)

عرض مار كيزا من أول العروض بنيويورك من أول ما شفت هذا الفستان (الأول من اليسار) طحت بغرامة، و عجزت أفكر فيه إلا أنه فستان زواج. أعتقد لو أحد خلاني الحين أختار فستان زواجه ما راح أفكر بفستان غير هذا، و لو كان بيدي خليتها تلبسه بالغصب. عيا يجي ببالي أحد ما يمكن يطلع عليه الفستان هذا حلو. فستان أوسكار دي لا رينتا أتمنى أشوفه مع طرحة بيضاء طويلة ما فيها أي شيء. أما فيفيان ويستوود أعرف أنه تقريبا مستحيل أروح لزواج فيه أحد لابس زي كذا، من زمان و أنا تفتني صور الزواجات الريفية، اللي الوحدة فيه كأنها قررت الحين بس تتزوج، طبعا حلاوة هذا الفستان مع جو ريفي كامل، مو داخل قاعة بألوان بنفسجية (متعقدة). 

(من اليمين لليسار: آندرو قن، فالنتينو، ريك أوينز)

ما أعرف وش السبب بس إلى الآن ما حضرت زواج قررت فيه العروس إنها ما تلبس فيه نفاش! أعجبني فستان فالنتينو، فيه كل شيء كلاسيكي (اللون، التطريز، حتى التصميم ما فيه أي تعقيد) لكنه راقي. أعرف إني بحياتي مو بس ما راح أحضر، ما راح أشوف أحد بهذا الريك أوينز، لكن هذا ما يمنع إني أحلم إني أشوف عروس لابسة هذا الفستان معها بوكية من الورد البيضاء الصغيرة اللي تحط بالبوكيهات اسمها (baby's breath). ما أعرف إذا ودي أحضر زواج ملكي أو أصلا ما يهمني، بس ودي بجد أشوف وحدة ما لبست سترابليس، علشان كذا لو رحت لزواج العروس لابسة فيه زي فستان أندرو قن أكيد بأكون مبسوطة، و باتذكر شكل فستانها بعد ما يخلص الزواج (و الله ما أفهم إنك تدفعين فلوس كثيرة على فستان ما فيه أحد بيتذكر شكله). 

وشو الفستان اللي أعجبكم؟ و قد رحتوا لزواج إلى الآن تتذكرون فستان العروس؟