ما أعرف متى آخر مرة تكلمت عن مكياج، لكن باعتبر نفسي إني من زمان ما تكلمت حتى لو أنه مو من زمان. المهم قلت كلم قصتي الحزينة مع المكياج، و الحين تدريجيا جالسة أحاول أجمع لي مكياج من جديد.
بالصراحة ما عمري صرت "راعية" كحل، ممكن أطلع بمكياج كامل من دون كحل، لا داخلي و لا خارجي، لأني من أول ما تعلمت على المكياج اكتشفت إن شكلي يطلع كأني مسلسل بدوي. أحط مسكرة، و مرات أحط كحل على جفني العلوي من برا، لكن الكحل الداخلي (الأسود) من زمان هاجرته.
و لأني ما أبغى أحط مسكرة كل مرة أقابل فيها أحد لو على قهوة أو شوي، أو غداء بسيط، لكن بنفس الوقت ما أبغى يطلع شكلي "مريض" زي ما تقول أمي (أمي تعتقد أنه ما فيه مكياج من دون كحل :)). قررت أشوف لي كحل أتصرف معاه بأي طريقة بس غير المسلسلات البدوية :).
المهم طلعت من فترة بمهمة بحث عن الكحل المناسب، شيء لونه حلو (ما أبغى أسود زي الفحم) لأن شعري و حواجبي مو سوداء مرة يعني شهباء :) و لا أبغى شيء يطلعني مرة ثانية كأني بمسلسل بدوي. طبعا ما كنت أبغى بني، لأن بعد شعري مو بني، ما أعرف وش كنت أبغى، بس كنت أدور على كحل أكيد :). الشيء الثاني أنه ما يروح بسرعة، يعني ما أبغى بعد شيء لو فركت عيني أو لمستها بأي شكل أو صحت مثلا و هذا وارد :) يروح على طول.
المهم ما علينا علشان أقصر السالفة عليكم بعد ما دورت بأكثر من مكان، كنت بسيفورا، و جالسة "أتمشى" فيه زي دايم، و أجرب الأشياء، وصلت عند ستاند بوكسوم و جلست أجرب الكحل عندهم، أول شيء شدني إن عندهم لون مو أسود شيء كأنه رصاصي غامق اسمه Black Jasper طبعا مع ألوان ثانية منها الأسود. الأهم بهذا الكحل أنه ما يحتاج براية (يعني ما يحتاج أشتري براية، لأنه ما عندي براية :) و بعد لما جربته على يدي (سويت له سواتش) ما انمسح.
سعره 14 دولار يعني تقريبا 52 ريال و تقريبا فيه كحل بطول 3 سم. هم مسمينه كحل داخلي insider eyeliner يعني المفترض أنه ما يروح مع الدموع، للحق أنا ما أحطه جوا عيني، أنا أحط منه شوي على الرموش السفلية علشان ما أطلع كأني "مريضة" يعني يعطي وهم إني نشيطة و عندي رموش كثيرة تحت :).
آخر شيء مو متأكدة أنه موجود بالسعودية، بس أتذكر أني قد شفت الماركة عند سيفورا (لو كانت موجودة علموني). إذا ما حصلتوه، تلقونه هنا عند أمازون أرخص بأربعة دولارت :).
ليست هناك تعليقات:
إرسال تعليق