السبت، 3 نوفمبر، 2012

Burt's Bee: I think I'm in love

أعرف إني من زمان ما كتبت، وش أسوي؟ أحس عقلي ناشف، و لا أنا قادرة أكتب عن أي شيء أو أكمل أي فكرة. اللي يطمن أنه لسا عندي أفكار، المشكلة ما أعرف وش أكتب. ما علينا باتكلم عن شيء إلى وقت قريب أعرف أنه مو موجود بالسعودية، بس باكتب عنه لأني لازم أكتب شيء.
من قبل ما أسافر و أنا أقرأ عن ماركة بورتز بي، ما أعرف ليه كنت متحمسة إني أجربها، شيء يحسسني إنها طبيعية. للي ما يعرف الماركة و لا قد سمع فيها، هي ماركة تطلع مواد عناية زي الصاوبين و الشامبوات و الكريمات (هنا تلقون كلام أكثر عنها). 
المهم الفترة اللي فاتت شريت صابون يدين التغليف حقه حلو، بس ما عجبتني ريحته، هو أنا عندي مشكلتين صايرة ما تعجبني ريحة أي شيء، و من أصلي و أنا أغسل يدني أكثر من أرمش، لا تحسبون عندي هوس نظافة، لا بس قل دبرة، يعني مثلا ممكن أكل شيء شبس، بعدين أقوم أغسل و أرجع أكل بسكوت مالح !! (ما أعرف ليه ما أجمعهم بغسلة وحدة). المهم ما علينا تصبرت على ذاك الصابون و قررت المرة الجاية راح أشتري من بورتز بي. 


لما وقفت عند الستاند حق بورتز بي ما كان فيه إلا نوعين صابون الأول زنجبيل و حمضيات، و الثاني هذا اللي أنا حاطة صورته فوق بالشاهي الأخضر و ورق الليمون. ما أعرف صراحة هذا كل اللي تنتجه الشركة، أو فيها غيرها أنا ما شفتها، لكن لما شميت الإثنين، قررت آخذ الثاني، اللي هو الشاهي الأخضر ورق الليمون. 
بعد ما استعملته اليوم، أحس إن مرضي بيزيد، و بصير أغسل يدي كل شوي، ريحته علي اليد بذات مخيفة، من دون مزح، حتى و أنا جالسة أكتب هذا الكلام، كل شوي أرفع يدي عن الكيبورد و أشمه. أعتقد إني خلاص بادمن منتجات هذي الشركة. الشيء الوحيد اللي ما عجبني بالموضوع ما عجبني حجم العلبة أحسها شوي صغيرة خصوصا مقارنة بسعره (تقريبا 26 ريال). 

لو حصلتوا مكان يبيع منتجات هذي الشركة، لا تفوتون فرصة تجربونها لأني أعتقد إنها تستاهل تجريب، حتى لو ما عجبتكم (مع إني أشك).