Renaissance

بعض المرات يصير صعب الواحد يلحق على عروض باريس، لأنه بكل يوم فيه على الأقل 3 عروض مهمة. و على ما بال أنتظر صور بدقة عالية تنزل صور عروض جديدة، و يصير صعب أقرر وش أكتب ووش أترك. لكن أليكساندر وانق مع بلانسياقا، يبدو إنه راح يخلني أكتب عن عرض بلانسياقا كل موسم (أعتقد من بدأ مع الدار و أنا أكتب عن كل عرض)، و هذا المرة مو استثناء. 

أغلب العرض كانت ألوانه مونوكروم (أسود و أبيض، و بعض درجات الرمادي). بس أكثر شيء عجبني بالعرض، إني حسيت التصاميم كلاسيكية (أعتقد لو فتشت لأرشيف بلانسياقا، راح ألقى تصاميم زيها بالضبط)، المختلف بنظري، إن الأقمشة نقشاتها و تقنيتها جديدة. أولا أغلب الفساتين طولها ميدي، زي ما أنتم شايفين. أعجبني مرة اللبس الثاني من اليمين اللي على أجاك. الفرو البني مع نقشات الأبيض و أسود أعطى للفستان روح، أعرف إني الفساتين الأخيرة (الثالث و الرابع، و فيه واحد زيادة ما حطيته) هي اللي بتكون على الريدكاربيت، لكن أبغى أشوف الفستان الأبيض على الريدكاربيت، على كارمين إجيقو، أو أي أحد يمكن مع كلتش ذهبية. الفستان الأول أحسه بيكون حلو على كايت بلانشيت، مع إني أحس إنها قد لبست شيء يشبه له. أعتقد واحد من الفستانين الأخيرات بتلبسه: جوليان مور، إيما واتسون، أو نيكول بليتز. 

وش رأيكم بالمجموعة، أو طفشتوا من قلة الألوان بملابس الشتاء الجاي؟ 

Who Wear What SS 2014

مثل ما وعدت لوليتا قبل، و لمحت أكثر من مرة إني ممكن أكتب عن الملابس اللي خمنت إنها راح تلبس على الريد كاربيت من العروض، و انلبست، هذي الملابس اللي باتكلم عنها اليوم هي من عروض صيف 2014 يعني اللي خلص بس من شهر، طبعا ما يعني أنه خلص إنه ما فيه أحد بيلبس منهم أبدا، لأنه ممكن المصمم يعطي ملابس من الأرشيف، و ممكن يكون فيه أحد شاري اللبس و محتفظ فيه، بس لأنه بالعادة الملابس الجاهزة قليل مرة ما تلبس بعد ما يخلص موسمها (بالذات على الريدكاربيت، راح أتكلم عنها هنا. 

أول شيء راح أتكلم عن أحسن 3 ملابس انلبست (الترتيب ماله دخل بمين أحسن). من اليمين كريستين رايتر من برايكينج باد و لها مسلسل ما طول اسمه: Don't Trust the B in Apartment 23، كريستين لابسة من تمبرلي لندن (هنا تكلمت عنه)، كريستين لبست الفستان من دون القطعة اللي فوق، و أعتقد إنه خيار مرة موفق، الطبعات أعجبتني، التسريحة أعجبتني و المكياج (بالذات لون الروج) أعتقد أنه مرة مناسب. زوي سالدانا لبست من برابل قرونق لقولدين قلوب اللي فات، بالبداية ما حبيته مرة بس كل مرة أناظر صورتها يعجبني شكلها أكثر (هنا تكلمت عن اللبس)، أعتقد أنه لبس أنيق، و من الطلات اللي فترة طويلة بتظل حلوة، و لا تطلع قديمة أبدا. آخر لبس من اللي أعجبوني هي روني مارا ببلانسياقا (هنا تكلمت عنه)، لو رجعتوا و قريتوا، بتشوفون إني كنت متوقعة أنه بيكون على الريد كاربيت (لأنه فستان يستاهل)، و تمنيت أشوفه على ثلاثة، كانت منهم روني مارا، و أعتقد إن روني ما خيبتني أبدا. 

هنا صورة بشكل عام للملابس اللي توقعت إنها تلبس و لبست (اللي أعرف إنها لبست)، بشكل عام فيه ملابس طلعت مرة حلوة على الريد كاربيت (تكلمت عنها فوق) و فيه ملابس كنت أتوقع منها أكثر، زي بروينزا سكولير اللي لبسته إليزابيث أولسين، و الفستان الأبيض من جايسون وو اللي لبسته دايان كروقر (توقعت دايان تلبسه هنا). و فيه ملابس ما أعجبتني أبدا، زي الجمب سوت اللي من سان لوران لبسته هايلي ستاينفيلد، كان ودي أحد زي ريانا يلبسه، أحد بكاريزما و حضور أقوى، و اللبس الثاني اللي مو مرة عجبني هو فستان روشا الفضي على ساره جيسيكا باركر (تكلمت عنه هنا)، ما كان ودي بالجاكيت، يمكن لو أحد زي كيرا نايتلي لبسه يمكن بيكون أحلى. 

من المفضل عندكم؟ و مين خيبكم؟ 

Prêt-à-Porter Made Couture

أمس كان فيه عروض بباريس كثيرة حلوة: دريس فان نوتين (كالعادة)، روشا، قريث بو. لكن المجموعة اللي تقريبا أعجبتني كلها، كانت بلانسياقا. إلى الآن ما أعرف موقفي من بلانسياقا مع أليكساندير وانق. لكن هذي المجموعة أعتقد إنها مصممة علشان كل قطعة فيها تلبس على الريد كاربيت. غير جمال الملابس، أعتقد شكل الملابس (تصميم و قصات) كأنه مجموعة كتور مو ملابس جاهزة. 

ما عندي كلام كثير أتكلمه على الملابس، الصورة تكفي، لكن أبغى أأكد على اللوك الأول من اليمين و الأخير (يسار). اللبسين هذولي مرة حلوات.  اللبس الثاني من اليمين أحس إني شفت التوب بمكان ثاني بس ما أعرف وين، ودي أشوف اللبس هذا بهذا الشكل علِى إيما واتسون، أو نيكول ريتشي أو كايت مارا، ولا مع تنورة بيضاء طويلة على قريتا جيرويق. أتمنى أشوف أول لبس من اليمين على زوي كرفتز أو نيكول بليتز، أما اللي لونه ليلكي أحس بيكون حلو على روني مارا أو فليستي جونز. اللبس الأخير، ما أتذكر إني قد شفت أدريانا ليما ببلانسياقا، بس ودي أشوفها بهذا. 

أنتم وش رأيكم ببلانسياقا (المجموعة هذي)؟ و بشكل عام مع أليكساندير وانق؟ 

Best Dressed: April 2014

الشهر هذا زي ما قلت بنهاية التدوينة اللي فاتت يمكن الخيارات مو مثيرة أو فخمة زي الشهرين اللي فاتوا، لكن فيه شوي حيوية، و ألوان حلوة، مع أنه كثار لبسوا أسود هذا الشهر، على عكس شهر مارس، لما قلت لكم كثار لابسين أبيض، ما علينا، خلونا نبدأ بالملابس.

كان فيه أسود، و كان بعد فيه درجات الأحمر زي ما أنتم شايفين. للي قروا الموضوعين اللي كتبتهم ريم عن كوتشيلا (هنا و هنا) يمكن قروا ردي، و عرفوا رأيي بالملابس بالمهرجان، بس أنا ما عندي مشكلة مع البوهو، لكن بالنسبة لي يلبسه اللي دايم يلبسه زي نيكول ريتشي، سيينا ميلر و كايت موس، أعرف أنه لبس كايت موس هذا ما يعتبر بوهو بمقاييس كوشيلا، بس بنظري، كذا أعتقد المفروض تكون أناقة البوهو، مو كأنه تهريج. أنجليزية ثانية سوكي واترهاوس بماركة من إنجليزية ثالثة (ڤيكتوريا بيكام) عجبني مرة شكلها، عجبني شعرها، و مكياجها، و أكيد جزمها، الشيء الوحيد اللي مو مرة عاجبني الشنطة السوداء. 

أيما ستون بفستان أصفر من أتلييه ڤيرساتشي، إما الوقت هذا جالسة تروج لفيلم Amazing Spiderman 2 كل الجولة إلى حد الآن شكلها فيه مرة حلو (أعتقد باكتب عنها بشكل منفصل لما تخلص) بس هذا الفستان بالنسبة لي يستاهل يدخل أحسن لبس للشهر. 

آخر شيء باتكلم عنه دو جوان ببرادا (وسط، تحت)، صراحة قليل جدا إني انفتن بجمال وحدة. لا تفهموني غلط العالم مليان نساء جميلات، بس من بعد انفتاني بشكل لوبيتا بنهاية السنة اللي فاتت، السنة هذي، هذي المرأة خلتني ساعات أدور بصورها.

من أحسن لبس لشهر أبريل 2014؟

كايت موس بسان لوران

ديانا أقرون بكوشني إي أوكس

جايمي كينج بفالنتينو

سوكي واترهاوس بفيكتوريا بيكام

إيما ستون بأتلييه فيرساتشي

دو جوان ببرادا

سولانج نولز بأكني ستوديو

ألونا فرانسيس ببلانسياقا

Poll Maker

And Here Comes the Bride

من فترة لاحظت كثرة الفساتين البيضاء على الريدكاربيت (تكلمت عنه بأحسن فستان للشهر)، ما عندي مشكلة مع الفساتين البيضاء، شفتوني أخترت أكثر من مرة فساتين بيضاء لأحسن لبس لهذا الشهر، لكن أحس فيه خط بين الفساتين البيضاء، و الفساتين اللي كأنه فساتين زواج (يعني أول ما تشوفونه على أحد، تحسون إنها بزفة). 

هنا بعض الملابس اللي حسيتها كأنها تقول أنا تركت زواجي و جيتكم. من اليمين: الممثلة الإسبانية ليتيسيا دوليرا بفستان من المصمم (بعد الإسباني) دلبوزو. بالنسبة لي هذا أخف واحد حسيت أنه فستان عروس، يمكن تسريحتها و مكياجها، و حتى اختيار الجزمة هم اللي خلوا شكلها كأنها عروس بس أحسه يعني ممكن و مو ممكن (يعني المشكلة مو تماما مشكلة الفستان، بقد ما هي مشكلة التنسيق). بعدها زوي كرافيتز بفستان من بلانسياقا، على أنه الستانيلنچ مو مرة تنسيق عروس زي ليتيسيا، بس الفستان عجزت أشوفه غير فستان عروس، ما أعرف ليه حسيت كأنه فستان زواج لبسته جوليا روبيرتس برانواي برايد، بس مقصوص من تحت. آخر وحدة روز ليزلي من چيم أوف ثرونز بأنتطونيو بيراردي، على إنه المكياج مو مرة مكياج عروس، و يمكن لو لبست فستانها عروس كان اقترحت عليها شعر مرتاح أكثر، و مو مرتب زي كذا، بس كل شيء ما عادا الروج الأحمر يقول إنها عروس. 

الشيء الحلو (طبعا أمزح) إن عندنا أشكال مختلفة للعروس على الريدكاربيت، من شكل الفيري تايل، للثمانينات/ زواج عصري مع الفستان القصير، لفستان رومانسي كأنه دانتيل لزواج بسيط P:. 

Best Dressed: November 2013

زي ما قلت لكم اليوم راح يكون عن أحسن لبس لشهر نوفمبر. إلى الآن أفكر بطريقة لترشيحات أحسن لبس، أعتقد إني بأخليها بالأسبوع الثالث من يناير، و طبعا بيكون فيها الفساتين الإثناعشر اللي فازت بترشيحات الشهور اللي أخترتوها. 

ما علينا من أحسن فساتين السنة، خلونا نشوف فساتين نوفمبر. 

أولا خلوني أقولكم إني مبسوطة، فستانيين من اللي قلت إنها راح تكون بالريدكاربيت انلبست، فيه فساتين ثانية انلبست بس النتيجة ما عجبتني، المهم هنا اليوم معانا روني مارا ببلانسياقا و شو كي بفالنتينو كتور. كل الثنتين أعجبوني مرة. بعد أعجبتني كايت بيكنسيل بالقوتشي، من زمان ما أعجبتني هذي الطريقة باللبس "هوليوود قلامور" بس مع لون الفستان أحس شكلها طالع مرة حلو. من زمان عن ليتون ميستر، بس عجبني شكلها هنا، أحسه مرة مرتاح، لكن لو سألتوني وشو اللوك المفضل عندي (اللي ممكن ألبسه على طول) من دون كلام أليكسا شونق (مو مفاجأة إني صايرة أحبها أو أحب ستايلها مرة). 

أنتم وش اللبس الأحسن عندكم؟ الأسماء محطوطة عكس عقارب الساعة. 

Create your free online surveys with SurveyMonkey , the world's leading questionnaire tool.

Red Carpet Worthy: Paris Edition

مع نهاية أسبوع باريس، هنا بالنسبة لي أحسن اللبس اللي شفته بالعروض، و أتمنى أشوفه على الريد كاربيت بس ما تكلمت عنه. أولا خلوني أقولكم لسنوات كانوا يتكلمون على أنه باريس هي اللي فيها أحسن العروض. ما كنت أشوف باريس سيئة، بس كذا دماغي يقول لي الموضوع بس سمعة، يعني باريس عاصمة الموضة و الكلام الفاضي هذا. ما علينا أعتقد إني هذي المرة اقتنعت من كثرة الخيارات اللي كانت قدامي على نهاية هذا الأسبوع.

من اليمين: (نينا ريتشي، مانيش أرورا، ديور، كلوي)

حبيت مرة هذا اللبس من نينا ريتشي أعرف فلورال وش الجديد؟ بس إني حسيت أنه مره خفيف، و أحس ريحته مرة حلوة أعتقد لو ما لبسه أحد على الريدكاربيت (أتمنى أشوفه على كيرا نايتلي) يمكن يطلع بإعلان عطر لنينا ريتشي. مانيش أرورا كان عنده فساتين كثير حلوة (ما أعرف ليه قليل مره على الريدكاربيت) لكن ودي أشوف أكثر له مع هذي المجموعة. الفستام الأزرق اللي من كلوي قتلتني حركة الأكمام، متحمسة أشوفه "أوف رانواي" على أي أحد، بس لو كان لي خيار، كان خليت كيرستين دونست تلبسه.

العروض من اليمين: (بلانسياقا، سان لوران، إيلي صعب، فيونيه)

خلوني أبدأ من الفستان اللي من إيلي عجبني شكله من فوق مره، أعتقد أنه بيطلع حلو مرة على الريدكاربيت، ما ودي أصير وقحة بس أمنيتي إني ما أشوفه على داكوتا فانينق، أحسها تخلي الملابس من دون طعم، بالذات فساتين إيلي. الجمب سوت هذي أعتقد إنها تصرخ ريدكاربيت، بعد باصير وقحة و أتمنى ما أشوفها على ليدي قاقا، حتى ما ودي أشوفها على ريانا، بانبسط لو لبستها وحدة ما توقعت إنها تلبس شيء زي كذا نيكول ريتشي مثلا أو حتى أودري توتو. أما فستان بلانسياقا أعتقد أنه هو الفستان الوحيد، من كل الأختيارات اللي اخترتها اللي متأكدة إلى 90  بالمية أنه راح يلبس (أتمنى أشوفه على كيري موليقان أو روني مارا أو كايت بلانشيت).

أنتم وشي أفضل الملابس اللي شفتوها بباريس؟

أعرف إني بازعجكم شوي، بس فستانين من الاختيارات اللي اخترتها لبست نتالي جوس بماري كاترنتزو (أعتقد أنه فيه أحد ثاني بيلبسه بشكله الكامل على الرانواي) و إلينا بيرمانوفا بأليساندرا ريتش (إلى الآن أتمنى دايان تلبسه).

The New Bag

من زمااااان، بجد من زمان ما فكرت بشنطة، أو قررت إني أشتريها (أعني شنطة غالية). ما أعرف متى آخر شنطة (مو كلتش) كان ودي فيها، يمكنها كانت شنطة من سيلين كروس بودي، كانت عاجبتني مرة، و كنت مقررة لو جا الوقت المناسب شريتها (الوقت المناسب يعني يكون عندي فلوس)، كان فيه أحد عاطني شعور إنها شنطة "كلاسيكية" يعني راح ألقاها بأي وقت، لما صارت عندي فلوس اختفت الشنطة من وجه الكورة الأرضية. 

أتذكر بعد فترة أعجبتني شنطة من فندي، كروس بودي بعد (ما أعرف وش قصتي مع الكروس بودي)، بس خواتي ما شجعوني عليها، خصوصا مع سعرها اللي مو رخيص أبدا. 

اليوم شفت عرض بلانسياقا لريزورت 2014، هذا العرض الثاني لبلانسياقا اللي يصممه أليكساندير وانق، بالمناسبة وانق أخذ الماركة لاتجاه أكثر تقليدية (بمواصفات بلانسياقا). المهم بعيد عن الملابس أول شيء انتبهت له الشنط. أو شيء جا ببالي (هو هذي النسخة الجديدة من الشنطة/الكيسة) بعد شنطة جيل ساندير (راف سيمونز) و بعد جيل ساندير رجال (راف سيمونز) اللي على شكل كيسة ورقية أو مثل ما يسمونها "كيسة غداء". 

بعدين و أنا أقلب تذكرت أنه بلانسياقا عندها شنطتين مشهورات "ستي" و متروسايكل" (و اللي ما قد أعجتني)، كلهم صممهم للماركة نيكولا قاسكيه. و بعد نفس الشيء أليكساندير وانق عنده شنطة مشهورة (اللي فيها دبابيس من تحت)، فاللي جا ببالي "ممكن بلانسياقا يتخلون عن ستي و ميتروسايكل، و تصير هذي شنطتهم الكلاسيكية الجديدة؟

ما علينا من التخيلات هذي، حبيت الشنطة مرة، أحسها من الشنط اللي ممكن تشيلها عمر، و كل مرة تشيلها، كل مرة تطلع أحلى. لو كان عندي فلوس، ما أعتقد إني ممكن أفوت شنطة زي كذا. 

* الصورة الأخيرة من اليمين مالها شغل بالشنطة، بس عجبتني الصنادل، بعد من نفس العرض. 

وش رأيكم بالشنطة؟ أو أنا أبالغ بإعجابي؟

Black "or" White

من موسمين (صيف 2013 و بعدها خريف 2013) كثير من الملابس لونها أسود و أبيض. صح بملابس الصيف أغلبها كان الأسود و الأبيض كلهم موجودين بنفس القطعة، لكن بمجموعات الشتاء (كل واحد راح بطريق لحاله :)). المهم كالعادة (عندي) أحب أسوي سباق ريد كاربيت مين اللي يفوز، لأني أعتقد إن اختيارات السلبرتي للريد كاربيت كثير تحدد أي موضة بتنتشر أكثر. 

أظن اللونين هذي من أسهل الألوان لبس (صح سهلة) بس ممكن تكون نقمة و تخرب كل اللبس لأنه بسهولة تتحول لقطع مملة. علشان كذا أعتقد أنه حتى مع سهولته، تحتاج "ذكاء" بالاختيار علشان ما تتحول كأي فستان أسود أو أبيض. 

نرجع مرة ثانية للريد كاربيت. شخصيا أعتقد أنه بيفوز الأسود على الريد كاربيت، علشان نكون صريحين مو كل السلبرتي يعرفون يلبسون، فبينبسطون إن قدامهم كل هذي الخيارات من الفساتين السوداء علشان ما يتعقدون بالإختيار. أنا شخصيا أتمنى أشوف فساتين بيضاء أكثر لأن أعتقد أنه أصعب باللبس، تحتاج الإكسسوار المناسب و إلا بتطلع بايخة، مو زي الأسود يقدر يتحمل قدر كبير من الأخطاء، يعني ممكن تختارين معاه أكسسوارت خطأ، بس إذا هو أنيق، يقدر يغطي على خطأ الأختيار (له حضور). 

أعرف إني قاعدة أخربط كلام ماله داعي، لكن خلاصة الأمر، وش تعتقدون بينلبس أكثر، وش تحبون تشوفون أكثر على الريدكاربيت، الأبيض أو الأسود؟

K^3

أعرف إن العنوان بايخ، بس لما جيت أحفظ الصورة، و بالعادة أحفظ الصور على أول حرف من أسم الشيء اللي موجود بالصورة، فاكتشفت أنهم كلهم أساميهم تبدأ بحرف K. ما علينا الموضوع ماله شغل بأساميهم، بس أنه الشيء اللي يشترك فيه هذولي الثلاثة، إني ما أحبهم :). 

 زي ما قلت لكم صحيح إني ما أحب الثلاثة بدرجات مختلفة، و بعد لأسباب مختلفة (ما يهم إني أشرحها هنا) لكن للحق (و علشان تعرفون إني موضوعية، و لا تعميني المشاعر P:) أعتفد أنهم أكثر ثلاثة أشكالهم أو على الأقل (لوك واحد) لهم أعجبني بالفترة الأخيرة. 

كيرستين ستيوارت صايرة بكل مكان لأنها تروج لفيلمين لها On The Road و أعتقد آخر حلقة من Tewlight (وش أسوي ما أحب الفيلم). المهم إن كريستين طلعت بأكثر من لوك عجبني هذا البلانسياقا واحد منهم، أعجبني كل شيء باللوك من الأكسسوار للمكياج (المكياج مرة حلو) و أصلا قلت لكم قبل إن المجموعة الأخيرة لبلانسياقا كانت عاجبتني مرة، و يمكن أكثر شيئ حبيته إنه و أخيرا ابتسمت :). 

اللوك الثاني من كيرا نايتلي اللي رجعت تروج لفيلم آنا كارنينا، هذي المرة بأمريكا (الفترة اللي فاتت كانت ببريطانيا). و طلعت بهذا الفستان (اللي أعتقد أنه بس مصمم لها) من إيرديم بعد مجموعة ربيع 2013 الأخيرة (فيه فستان يشبه له بالمجموعة). عجبني لونه مع إني ما قد تحمست لهذا اللون على فساتين سهرة، أعجبتني النقشات، و أعجبني بعد شعرها، و أهم شيء لون الروج اللي أعتقد أنه عاطي حياة للبس.

آخر وحدة هي كايت موس. صراحة ما أعرف متى آخر مرة كان شكل كايت موس محترم (حتى بزواجها كان شكلها تعبان) بس بحفل توقيع كتاب لها جت بهذا الفستان من بعد مجموعة مارك جايكوبز الأخيرة. كل شيء فيها أحسه "طازج" أعجبني إن مكياجها ما كأنه مكياج (طبعات اللابورد كثير مرات تصير رخيصة) و مع مكياج ثقيل أحس إني على طول يجي ببالي بأحسن الأحوال الكرداشيانز (أعتذر للي يحبهم) بس أشكالهم بالنسبة لي دايم رخيصة :). 

المهم ما فيه شيء ثاني أقوله لكم، إلا إني أوصل لكم رسالة إني أقدر أقول كلام زين عن أحد ما أحبه P:. أنتم شرايكم بالثلاثة؟ بهذي الملابس و بشكل عام. 

* عدلت العنوان اللي كان عبارة عن 3 حرف K جمب بعض، لأني تذكرت أنه الاختصار هذا هو اختصار لمنظمة إرهابية أمريكية مسيحية عنصرية (لو متحمسين تعرفون عنها تلقون هنا كلام أكثر عن المنظمة). 

Nicolas Ghesquiere

من أكثر الأشياء اللي كانت عاجبتني بعروض صيف 2013 هو عرض بالنسياقا و بالذات إكسسوارت الشعر (أو الأطواق المقلوبة). و بمناسبة إني سمعت الخبر هذا، قررت لازم أكتب عنه لو كان كلامي ماله معنى (لأني من شفت العرض و أنا أحاول أكتب و لا راضي يجي معاي شيء). 

قريت هذا الخبر عن أنه نيكولا قاسكيه (مصمم بلانسياقا) راح يترك أو ترك الماركة، ما أعرف لحد الآن مين راح يجي بداله، لكن لقيتها فرصة إني أتكلم عن مجموعته الأخيرة (ما أعرف ليه أكثر المصممين يطلعون بأحسن المجموعات لما يجون يتركون الماركة؟). المهم ذاك الوقت (قبل شهر تقريبا، ما كان فيه أي كلام عن نيكولا و أنه بيترك بلانسياقا، بس المجموعة بالنسبة لي كانت من أحسن المجموعات اللي شفتها مثل ما قلت لكم. 

أعجبني كيف أخذ موضة مثل "الرفلز" (بنشوفها كثير بملابس الصيف الجاي) و سواها بس مو بطريقة "دلوعة" أو "بناتية" (تعرفون إن عندي مشكلة مع الأشياء البناتية مرة :). 

أكثر الأشياء اللي أعجبتني زي ما قلت لكم هو الطوق اللي كانوا العارضات لابسينه على ورا (ودي ألبس شيء بالطريقة هذي). ما كان العرض بس فيه هذا الطوق الغريب اللي فيه أغصان، لكن كان فيه أطواق ذهبية سادة، و كلها ملبوسة على ورا. 

اللي أعرفه إن نيكولا موجود ببلانسياقا من 97 يعني تقريبا له 15 سنة مع الماركة طلع معاها أشهر علاماتها و هي الشنطة موتوسايكل و سيتي (اللي أعتقد ما فيه بنت على الأقل بالرياض، ما تعرف أحد عنده نسخة من هذي الشنطة (موتوسايكل، أو سيتي) :). 

ننتظر مين بيجي مكانه، ما أعرف أحد فاضي من المصممين إلا جون قوليانو اللي ترك ديور علشان موضوع هتلر و المحرقة. و بعد نشوف وين نيكولا بيروح بعد بلانسياقا. 

Inspiration

قلت لكم عن بوتيكز من قوقل ... لسا بوتيكي ما كبر (تراي حطيت رابط على جنب) بس بأحاول أحط فيه كل شي أقترحه ...فكرة بوتيكز هو أنه بدل ما تدورون بموقع كامل تدورن أشياء على حسب تصانيف معينة مثلا مصممين، سلبرتيز، ستايل معين أو حتى بحسب أشخاص ... قوقل للأفتتاح جابت سلبرتيز للحفل من الي جو كيري موليقان، بنات أولسين، إيما روبيرتز و نسيت الباقين لأنه المهم اليوم آشلي أولسين.

بنات أولسين بشكل عام عندهم سويترات حلوه مره (ودي أسرقها) بس ما فيه شي زي هذا السويتر الخربزي أو المشمشي (الخربزي اسم قديم لهذا اللون أتذكر لما كنت صغيره عرفته من أمي الي كانت خايطه لها تيور "خربزي" بنقاط سوداء). السويتر الي لابسته آشلي من بلانساقا مجموعة الخريف ما أعرف وش أقول فيها بس لونها و شكلها يجنن، و الخيوط الصفراء أبدا ما تساعد، يعني تخليني أتمناها أكثر.

علشان هذا السويتر رحت أدور على أشياء مو مترابطه كلها بهذا اللون، لأنه شكلي بانتهي جايبه شي بهذا اللون ... ما أعرف عندكم بس أنا يجيني هوس ألوان غريب يعني أتذكر أنهبلت بالأصفر الماسترد، بعدين الزيتي و الحين جا وقت الخربزي ... الله يعقل علي بس.

الأشياء بالمجمل مو غالية بس مو رخيصة ... طبعا ما يحتاج واضح لكم الأشياء مع أسعارها ... لو ما كان لي خيار إلا شي واحد أظن إني باختار الجاكيت الي من ميس سيلفرج، مع أنه جاكيت يعني ما راح أقدر ألبسه وقت طويل، لكنه أميز قطعة بالنسبة لي، و الشي الثاني  الي عاجبني فيه، ما أعرف بس دايم أحس الخربزي لون صيفي، حلو إني أشوفه على شي شتوي ...

البرا أخترتها لأنه بخاطري من زمان لانجري حلو، ما لقيت أنتم تعرفون مكان؟ هذي عجبتني لقيتها و أنا أدور على لانجري لونه خربزي، ما لقيت، و لقيت هذي الصفراء، قلت نحطها مادامها حلوه، و مادام السويتر حق آشلي فيه خيوط صفراء خفيفة.

زي دايم أي شي يعجبكم، ردوا و قولوا لي أعطيكم رابطه.

Shoes Era

قبل سنتين و أكثر كانت الشناط هي السالفة ... قيمة الواحد تتحدد من شنطته، و الكل يحاول يجسيب شنطه ما فيه أحد ممكن يجيبها، و الكل لازم عنده يا لوي فيتو يا بوربري أو قوتشي ... الشي هذا التغير و المصممين هالمره لفوا على الجزم و طلعوا بجزم غريبه و مجنونه ... من الموسم هذا فيه جزم كثير حبيتها، بس قلصت القائمة ل 12 جزمة ... و كل ثلاثه حطيتهم مع بعض بتصنيف من راسي ...

التصنيف الأول خليته جزم الشارع، ما أعرف على أي أساس .. بس حسيت لو وحده عندي، و لبستها لطلعه بأمشي فيها كثير ما راح أتنكد ...أنه يمكن تخرب. من اليسار لليمين:

أيرديم، روبيرتو كفالي، و إيرميس

pollcode.com free polls

What is your favorite?

Erdem Roberto Cavalli Hermes

هذي جزم نص، نص، يعني تلبس بمناسبات عادية، بس يمكن ما أمش، عشان ما تتوسخ أو تتمخش :p و غير كذا كلها ألوان تقليدية أسود، رمادي، أبيض ... من اليسار لليمين:

فندي، لانفين، شانيل

pollcode.com free polls

What is your favorite?

Fendi Lanvin Chanel

هذي المجموعة الملونة زي ما أحب أسميها ... كذا لما جمعتهم على بعض اكتشفت أنهم كلهم ألوان، كل الجزم هنا ما تلبس للشارع، تلبس عشان تقولين للناس لا تشوفون إلا رجولي : ) من اليسار لليمني:

برادا، بلانسياقا، جان بول قوتييه

pollcode.com free polls

What is your favorite?

Prada Balenciaga Jean Paul Gaultier

هذولي جزم الحفلات، الي ما تلبس أبدا بغير الحفلات الكبيرة ... لامعه .. فخمة و تحتاج فساتين حلوه، من اليسار لليمين:

فيرساتشي، كريستيان ديور، ميو ميو

pollcode.com free polls

What is your favorite?

Versace Christian Dior Miu Miu