من زمان ما كتبت، حتى ما حطيت أحسن لبس للشهر اللي فات لسببين، السبب الأول إني كنت مسافرة، و صراحة كنت عجزة، لكن السبب الأساسي كان إن الكيبورد حقي فيه حروف خربانة، و صراحة الكتابة كانت صعبة، لأني أحتاج أنسخ حروف لأنها ما تشتغل على الكيبورد.
ما علينا، هذا الموضوع كان من زمان ببالي (من عرضت ميوتشا، مجموعة ميوميو ريزورت يمكن قبل شهر). و الحين جت الفرصة إني أكتب الموضوع بعد ما انحلت مشكلة الكيبورد.
خلونا نرجع للمجموعة، اللي شخصيا أحسها مرة سبعينات (يمكن تأثير مجموعة لوي فيتون خريف 2014 لنيكولا قاسكي). بالعادة السبعينات مو الموضة المفضلة عندي، مو لسبب، بس لأن فيها البناطيل الفلير، و لا أحس إ نها تلبق علي، لكن ميوتشا استخدمت شيء ثاني من السبعينات و هو هذي الفيست أو ما أعرف وش اسمها الكروشية، مع إنها مرة قديمة، لكن أعتقد إنها بتكون بكل مكان على نهاية الشتاء بداية الصيف الجاي. شخصيا عاجبتني مرة، و أبغى ألبس وحده منها الحين، طبعا أعتقد جزء من إنها طلعت حلوة، هي لأنها اختارت معها أقمشة شيفون كثير، فاعطتها أحساس خفيف مو مرة ريترو.
أنتم وش رأيكم فيها؟
