20s Redo

ما أعرف كم مرة تكلمت عن الفلابير و العشرينات بهذي المدونة، بس أكيد كثير، لو بحثتوا "عشرينات". أبشركم أظن إن هوسي فيه قل، لكن بعد ما شفت صورة لأوليفيا كوك ببريمير قبل أمس (الصورة تحت، الأولى من اليمين)، تذكرت لوك عجبني قبل فترة لكارولينا كاركوفا، فقررت أكتب زي طريقة المود بورد، اللي كتبها قبل بهذا الموضوع. 

ما أعرف إذا كنتوا متابعين لردود و النقاشات اللي تصير تحت المواضيع، بس بنقاش مع Elegant Always سألتني عن ذوقي، بالغالب، الأشياء اللي أسويها هنا، هي ذوقي، و طريقتي بكيف أنسق لبس معين، أو موضة معينة، لو قررت ألبسها كيف ألبسها. 

نرجع للبس للمود بورد مرة ثانية، صراحة ما أعجبني مرة لبس أوليفيا، لكنه مختلف عن لبسها بالعادة، و ذكرني بلبس كارلوينا قبل كم شهر (بالمناسبة كارولينا 98 بالمية من ملابسها مرة حلوة، فلو أنتم من الناس اللي يحبون يتابعون أشخاص يلبسون بطريقة حلوة، تابعوا كارولينا). المهم، من أكثر الأشياء اللي ما عجبتني بلبس أوليفيا إني حسيت أنه مرة شتوي، و أنا صراحة مرة قرفانة من الحر P;، فأول شيء فكرت فيه، إنه الروج العنابي بالنسخة اللي سويتها لازم يصير أحمر/ برتقالي. علشان كذا فكرت بهذا الروج من سيفورا (ترا جودة الروج مرة كويسة لو جالسين تدورون على روج كريمي مات) المهم الدرجة اسمها 10 Mandarin Muse. مع إني أحب الترتر، و الأشياء اللماعة، إلا إن أكثر النسخ اللي شفتها لقصة تشبه فساتين فلابير كانت مرة مملة، و ما فيها شيء جديد، فحسيت هذي النسخة "الجديدة" مع قماش الميش اللي فوق. نسيت أقولكم وش الشيء اللي حبيته بلبس كارولينا، هو إن اللبس ما فيه حوسة كثيرة، بعدين لابسة جزم مرة مثيرة، اللي فكرت فيه، إني أحول هذا اللبس لنسخة صيفية، و لأنه صنادل الجلي راجعة من كم صيف، و أنا مستظرفتها، و لأن كعب ماري جاين كان منتشر مرة بالعشرينات، خصوصا مع رقصة الشارلستون، حسيت هذي الجزمة من صوفيا لوبستير مرة مناسبات، و يعطون اللبس روح. زيادة على كذا، أعتقد جزم صوفيا من أرخص الماركات الهاي إيند. الشيء اللي عجبني بلبس أوليفيا، هي إنها لبست حلق ستايتمنت، ففكرت بحلق ملونات و كبار، و يضيفون للجزمة و الروج. 

وش رأيكم؟ تفضلون الفلابير تقليدي بروج غامق و ترتر؟ أو أصلا ما تحبون موضة العشرينات؟ 

Lilac & New Thing Added to My Wishlist

أعرف إني من زمان ما كتبت متواصل، و أعرف أني بطلت أطلع أعذار، لأن فعلا ما عندي عذر، إلا أنه ما جا ببالي أي شيء أكتبه، اليوم قبل لا أنام جا ببالي أكثر من صورة / لبس عجبوني بالفترة الماضية و حسيت أنه طلع معاي فكرة موضوع أتكلم عنه.

أول صورة بهذا الوكلاج قد شفتها، و عجبتني و علقت براسي هي صورة فيرونيكا هيلبورنير (ستايلست ألمانية)، بهذا الفستان الليلكي من كريستوفر كاين (تحت وسط)، الصورة قديمة، يمكن قبل سنة أو أكثر، بس علقت ببالي، لأنه مرة عجبني اللونين اللي اختارتهم مع بعض، و أحس إن جلست طول هذي الفترة أنتظر فرصة إني أخلط هذا اللون ( لون البالطو) اللي ما أعرف وش أسميه، (أعتقد كونياك) مع ليلكي. الصورة الثانية اللي علقت ببالي هي الصورة الأولى فوق من اليمين من عروض الخريف اللي كانت قبل شهر و نص، اللبس من لوك بوك سي باي كلوي، اللبس مو مميز، لكن أعتقد التنسيق مرة أنيق، و أول ما شفت التنورة/ البنطلون الوسيع من زارا (يسار فوق)، على طول جا هذا اللبس ببالي، و فكرت إني أنسق حولها لبس، بوحي من هذي صور، و أشياء شفتها و أعجبتني زي السنيكير الأديداس من تعاون فاريل وليمز اللي أسمه سوبر كلور. المجموعة تقريبا كلها سولد أوت على الموقع، بس إذا كانت موجودة بالمحلات، أعتقد هذا اللون و اللي أسمه mauve tint لون يمكن قليل يشوفه مميز، لكني أحسه مرة حلو و أنيق، بالذات مع لبس كله ألوان محايدة. التوب بغيت قميص رسمي و لا هو رسمي بنفس الوقت، و حسيت هذا القميص من مونكي بيكون حلو مع اللبس. آخر شيء و أغلى شيء، كنت أدور إكسسوار يكمل اللبس، و جا ببالي "شوكر" و طحت على هذا الشوكر من جينفير فيشير، و للأسف أنه الحين دخل قائمة الأمنيات حقتي، سعره مو مرة غالي (قصدي مو شيء فوق العشرة الآف أو شيء زي كذا، بس 495 دولار تحتاج له واحد كريم، يعرف يعطي هدايا حلوة (لا تستحون تطلبون رقم حسابي للتحويل P;). 

وش رأيكم بالمجموعة، و تفضلون أكتب كذا كل فترة شيء زي المود بورد، مع إقتراحات لملابس و إكسسوار ممكن تشترى؟ 

A Red Touch

بالعادة اللونين الأحمر و الأسود ما يجون ببالي مع بعض، يمكن لأنهم مرة متوقعات، و يمكن لأنهم كلهم لونين قويات (قصدي لما يكونون موجودات يطغون بشكل ما على باقي الألوان. إلى ما انتبهت لأكثر من لوك أعجبوني على الريدكاربيت بالفترة الأخيرة.

من اليمين عكس عقارب الساعة: (نايومي هاريس ببدلة من أليكساندير ماكوين، جنيفير أنستون بفستان من أنتطونيو بيراردي، و كيري راسل بجامب سوت من جي منديل).

لما شفت الملابس هذي، قررت إني أسوي لوك (أعرف من زمان ما سويت واحد، فقلت فرصة) المختلف، إني ما بغيت أدور لبس أسود بشوية أحمر، زي الملابس اللي حطيتها فوق. كان ببالي إني أختار لوك بنفس هذي الألوان من دون ما يكون اللونين موجودات بنفس القطعة (إذا كان كلامي واضح). 

My Name is Red by dejavuar featuring a pleated skirt

الأشياء هنا كلها فوق المية الدولار، (أعتذر للي يدور اقتراحات أرخص، بس دايم أحاول أنوع) هذي المرة اشتهيت أختار أشياء كلها هاي إيند. و زي أي لبس بالعالم، لو كان غالي عليكم، بالغالب فيه أشياء تشبه للاقتراحات هنا، بأسعار أرخص. المهم خلونا نتكلم عن اللبس.

ما أعرف ليه، أحس إن هذا اللبس قد شفته على أحد (لو كنت ناسخة أحد و أنا ما أدري، ممكن تحطون لي رابط للصورة بالتعليقات). المهم الفكرة زي ما وضحت، الأحمر بين السواد. لما كنت أفكر باللبس قررت ببالي إن الأحمر بيكون إكسسوار مو جزء من اللبس نفسه، و كان ودي بشيء بس أحمر، و لقيت هذي الكلوتش من هلموت لانچ بس مستطيل أحمر، و أعتقد إنها مرة مناسبة للفكرة. بعد ما لقيت الشنطة، أعتقد كل شيء صار ببالي واضح، أبغى سويتر و أبغى تنورة،  و أبغى بوت كلهم سود. فاخترت هذي السويتر من فانيسا برونو، أعرف إن شكلها بايخ هنا، بس شيكوا على الرابط، و ناظروا اللون الثاني منها، بالذات، الفتحة من ورا. (وش أسوي، يوكس عنده أشياء حلوة كثيرة، بس عرضهم بايخ)، شيء ثاني بعد من يوكس، هذي التنورة الجلد مكسرة، حسيت ما دام اللبس أسود بأسود، نحتاج يكون فيه ملمس مختلف بين القطعتين، أو بيكون ممل و سايح على بعض، التكسير، و لمعة الجلد، أحس أعطت هذا الإحساس. آخر شيء اخترت بوت جيفانشي، تلقونه هنا ، أولا بغيت بوت من الأساس، بس حبيت أنه مفتوح من قدام، بما إن اللبس مغطى بالكامل (على الأقل من قدام)، و بنفس الوقت بغيته كعب علشان أبعده من هومليس ستايل، لستايل أكثر شيك.

وش رأيكم بلمسة الأحمر على لبس أسود كامل؟ تحسونه ما فرقت كثير، و إلا أعطت حياة أكثر للبس؟ 

The French Way

قبل كم يوم شفت صورة كونستانس جابولنسكي بحفل ما أعرف وشو (اللي ما يعرف مين كونستانس، هي عارضة فرنسية). المهم شكلها ما أعرف كيف آصفه غير أنه "فرنسي" ، بس عجبني مرة. ما أعرف كيف يلبسون الفرنسيات ما أعرف يعلمونهم كيف يلبسون بالمدرسة، أو الموضوع جينات أو إيش بالضبط. 

المهم من فترة، طبعا من فترة قصدي من سنوات، و أنا أتابع فريق فوچ باريس، و على عكس كل المحررين، الفرنسيات دايم يطلعون بالجينز، و كعب، و انتهى الموضوع، و بالنهاية تطلع أشكالهم مرة أنيقة. ما شفتهم و لا مرة راكبين أي موجة، يغني لا طبعات و لا ألوان فاقعة، أو بيني أو أوفرأوال، نفس الأشكال من دون تكلف، بشعر طبيعي، حتى شنطة قليل ما يشيلون. المهم من أشكال محررات فوچ، و كونستانس، قررت أسوي هذا السيت، عن كيف أنا ممكن ألبس بالطريقة الفرنسية، (على الأقل أقنع نفسي). 

How the French Do it by dejavuar featuring a coin purse

Zara embroidered top / Monki blue jeans, $48 / Christian Louboutin pumps / Dolce Gabbana coin purse, $670

الشيء اللي كنت حريصة عليه إن اللبس ما يكون "متكلف" بس تعرفون أحب الترتر، و أحب طبعات الحيوانات اللي تكون ذوق، أنا بصراحة ما ألبس كعب كثير، خصوصا كعب من دون شكل مميز، بس لخاطر إن شكلي يطلع فرنسي أنيق، ما عندي مانع أجرب P: ما بغيت أي إكسسوار، أو أي إضافة، لو بأضيف شيء يمكن بالطو أسود أوفر سايزيد (شيء بكتوف كوكون). 

Styling Faceoff: Embellished Top

تتذكرون ستايلنچ فايس أوف، خلوني اسميها الحلقة الأولى؟ إذا ما تتذكرون أو ما شفتوها، شيكوا عليها هنا أول، بعدين أرجعوا و كملوا الموضوع هنا. المهم الموضوع للي ماله خلق يشيك على (الحلقة الأولى)، هو أنه نختار قطعة، المرة اللي فاتت أختي اختارت قطعة، و أنا و أختي "الثانية" نسقنا لها لبس، هذي المرة، نفس أختي اللي تشارك بموضوع التنسيق اقترحت علي ننسق هذا التوب من مايسن مارتين مارچيلا، و عجبتني الفكرة. 

أولا توضيح ليه شكل الملابس كذا ملصقة على بعض مو زي الأول، لأنه شكل كل التنسيقين اتفقنا أنه بايخ بالطريقة هذي، و اقترحت علي اختي إن أحطه بهذي الطريقة، و أعتقد أنه أحسن. 

لما كنت أنسق اللبس كان كل اللي ببالي ما يصير كأني نسخت مايلي، لأن مايلي لبسته مرة، فكرتي الأساسية لو ما كنت باتجنب مايلي، كان نسقته مع بوي فريند جينز مشقق، بس ما بغيت أي شيء جينز. (بالمناسبة ترا أختي ما كانت تدري إن مايلي قد لبسته لما اختارته). المهم فكرتي الثانية كانت ما أخليه لبس سهرة، أعرف مع تنورة طويلة سوداء بيكون لبس سهرة حلو، بس بغيت شيء مختلف، علشان كذا اخترت له هذا البنطلون اللي من فترة عاجبني (قصدي البناطيل القصيرة شوي و وسيعة، بغيت يكون فيه جاكيت باللوك، علشان يكون اللبس أكثر رسميه، بنفس الوقت حسيت جاكيت أسود مثلا بيخرب التوب، و يخليه من دون طعم، و وردي بيكون بايخ مرة. الجزمة اللي اخترتها مو هذي بس عجزت أحطها هنا ما لقيت أحد لابسها، هي من زارا تلقون اللوك كامل هنا. 

بالنسبة لأختي، ما أعطتني كلام كثير عن اختيارها، بس قالت إنها لما نسقته كانت حاطة ببالها ريانا، و شيء تقول أنه "چلامورس بوهيميان". التنورة اللي مختارتها إذا تتذكرون أليكسا شونق لبستها مرة بلوك اخترته لأحسن لبس لهذا الشهر، بس صراحة أكثر شيء أعجبني عندها، غير التوب طبعا، الشنطة الڤيرساتشي، بالله مو هي لحالها لوك؟ هنا اللوك و تلقون تفاصيل اللبس كاملة. 

بالأخير أختي اللي اختارت لنا القطعة بالمرة الأولى، عجبها اللبس اللي سوته أختي (مرة ثانية)، لما عرضنا عليها شغلناه، أنتم وش عجبكم أكثر؟ 

New Classic

قبل فترة شفت فيلم بلو جازمين (معلومة جانبية: عجبني) المهم بعد ما شفته قررت إني أروح أشوف فيلم I Am Love، الفيلم للي ما يعرفه هو فيلم إيطالي لتيلدا سوينتين. الفيلم من زمان نازل (مو بلو جازمين)، و أتذكر إني لما شفت الستيل حقات الفيلم تحمست له (تحمست حتى للملابس)، المهم بعد فترة شفت التريلير و خف حماسي و بعدها كل مرة أأجل المشاهدة . ما أعرف ليه كان ببالي أنه الستايل تيلدا سونتين و كايت بلانشيت بالفيلم متشابهين. بس طلعوا ما يتشابهون. الشبه الوحيد كلهم ثريات. 

Chic by dejavuar featuring a print pencil skirt

Carven print pencil skirt / Semi Couture sweater / Burberry ankle strap heel sandals / Yves Saint Laurent shoulder bag, $1,700 / Tom Binns pearl chain necklace, $785 / Tom Ford fragrance

بس الفيلمين أعطوني فكرة هذا السيت و هو لبس "الكلاس" أولا لازم أحط توضيح أنه لبسي مستحيل يكون كذا (مو أسعاره) صحيح ما أقدر على الأسعار، لكن قصدي حتى الشكل. و لأني ما أقدر أسوي شيء "ممل" قررت أحافظ على الفكرة نفسه، يعني مثلا أحس عقد لولو و تنورة بنسيل و كنزة كشمير، شيء أساسي بهذا اللوك. أول شيء جا ببالي هذي التنورة من كارفين اللي على شكل جلد غزال، من زمان عاجبتني و لقيتها فرصة إني أحطها بهذا السيت. الشيء الثاني قررت أختار هذا العقد اللولو اللي محيوس، أحس تعطي لمسة غير على هذا اللوك اللي مرة سلييك. قررت إني أختار ألوان خريفية و كلاسيكية و أهم شيء لقيتها فرصة إني أختار هذا العطر من توم فورد اللي اسمه "جازمين مسك" (ترا ما قصدت إني أربطها ببلو جازمين :P) بس لو ما حصل لكم أي شيء من هذا السيت روحوا و شموا العطر هذا عند باريس قاليري ريحته مره حلوة و يصلح هدية. 

The Ageless Edit

الشهر هذا شهر السيتز، ما خططت هي كذا صارت، أمس أختي قالت لي إنه تعبت من الملابس اللي على الموضة، تبغى شيء تايمليس أو أشياء أساسية تقريبا،  شخصيا أحب هذي القطع و هذي النوعية من الملابس، صحيح أحب بعض الموضات، بس أحب إن عندي شيء أعرف لو لبسته بعد خمسة/عشرة سنين شكله بيطلع حلو. 

Shades of Black by dejavuar featuring a leather purse

Kenzo sweater / Asymmetrical draped skirt, $190 / Witchery leather shoes, $97 / 3.1 Phillip Lim leather purse / Flight 001 red wallet

أولا، لازم أقول لكم إن كل الأشياء اللي بالسيت (تقريبا) من اختيارها، مو هي اللي تنقت نفس القطعة، لما كلمتني بالموضوع قالت إنها تبغى تنورة بوكا دوتز أبيض بأسود دوائر كبيرة، و جزمة فضية أو هولقرام، و سويتر أسود. لما قالت لي الفكرة بالبداية كنت أحسب إنها مكثرة صور فريا بيها، فما فكرت أسوي سيت لأني قد سويت سيت شبيه بستايلها قبل هنا، لكن لما قالت تنورة بدوائر، حسيت إن الموضوع بيكون شيء مختلف، قررت بعد أختار لها هذي الشنطة من فليب ليم لأني حسيتها من حلوة، من دون ما تسبب إزعاج (كالعادة كلام ماله معنى، بس قصدي أنيقة مرة من دون تفاصيل كثيرة) بعد بغيتها سوداء علشان تكون أهم شيء شيء ممكن يعيش لسنوات و يلبس مع أي لبس، و لا بغيتها باك باك لأن عندها كثير شنط باك باك. 

آخر شيء حبيت إني أحط شيء مختلف، و ما دامه بيكون بالشنطة على الأغلب، فقررت أختار هذا البوك (أو المحفظة) اللي على شكل تاق. حسيته ظريف، و هي تحب الأبواك الغريبة. 

أنتم وش تميلون أكثر للقطع اللي تعرفون إنها قاعدة، أو للأشياء اللي على الموضة؟ 

The New Gatsby

قبل فترة (مو قصيرة) شفت هذا الصورة (اللي تحت) لإيدتوريال من مجموعة جديدة لوايلد فوكس (بالمناسبة وايلد فوكس أول شيء يجي ببالي لا فكرت بشيء أوفر برايسيد) قولوا لي أنا الوحيدة اللي أشوف كذا؟ ما علينها أعتقد الإيدتوريال طلع قبل عرض ذا قرايت قاتسبي بشوي (ىعني مع الهيصة اللي صارت على الفيلم). تعرفون إني من زمان أحب العشرينات (ما أعرف أصلا مين ما يحبها) بس أكيد إني أختي تحبها أكثر P:. المهم على إني أحب العشرينات ما قد حصلت لي فرصة إني لبس فلابير أبدا (تخيلوا) علشان كذا لما شفت هذي الصورة مرة عجبتني. 

الشيء اللي عجبني هو اللمسة العصرية على موضة الفلابير والعشرينات، نسيت الصورة، لكن بما أنه قرب الهالوين (زي كل سنة أقولكم ما قد أحتفلت فيه) لكن أحب الحفلات التنكرية، أو فكرة اللبس التنكري، فقررت أنه لو خاطرك تحتفلين بينك و بين نفسك، أو مثلا بتسون حفلة صغيرة ما فيها هيصة واجدة، أو حتى لو تعرفين أنه مع كل موضوع ذا قريت قاتسبي كل العالم بتصير لابسة لبس عشرينات، أظن هذي فكرة أو اقتراح أنك تكونين مختلفة، و أعتقد إنها ظريفة.

Gatsby 2.0 by dejavuar featuring Yves Saint Laurent

إذا ممكن أتخلي عن كل شيء بلوك عشرينات "مطور" أظن إني ما أقدر أتخلى عن تنورة ترتر، أتذكر إني من زمان و أنا متعلقة فيها، من شفت عرض لرالف لورين قبل أكثر من  موسم. فكرت بعد بدل الشنطة الصغيرة أو شنطة المكياج/الزجاير اللي كانوا بالعادة يشيلونها، بتكون النسخة العصرية شنطة صغيرة للجوال، و لقيت هذا الغطاء للأيفون. بشكل عام مرة مستظرفة اللبس، أعرف بتقولون خير؟ أنت اللي مختارته و مبسوطة عليه، بس عجبني مرة، و أحس من دون الهيدباند هذي اللي فيها ريشة ممكن يكون لبس حفلة عادي، و لا أحد يعرف أنه نسخة مطورة عن العشرينات إلا أنت. 

وش رأيكم أنتم؟ و إذا كنتوا تسوون حفلات تنكرية وشو أحسن لبس لبستوه؟ أو اللبس اللي تتمنون تلبسونه؟ 

Styling Faceoff: Boys Tailoring

ما أعرف إذا هذا الشيء ممكن يصير مرة ثانية أو لا، لكني قررت بالعنوان أحطه كأنه بيكون فيه سلسلة. خلونا نبدأ بالموضوع، أمس أختي لأنه فاضية (حتى أفضى مني) قالت لي خلي "أختي الثانية" تختار لنا قطعة وحدة من نيت أي بورتيه و كل وحدة تسوي لوك كامل على أساسة، و أختي اللي اختارت هي اللي تحكم. 

المهم ما أعرف على أي أساس، بس أحس إن أختي (اللي المفروض تختار) ما كان لها خلق، و اختارت هذا البنطلون اللي كأنه رجالي من فانيسا برونو. الشيء الوحيد الإيجابي باختيارها، إن الملابس الرجالية، كانت وحدة من موضات خريف 2013. الخيار مو سيء، لكن جدا صعب على الأقل بالنسبة لي إني أنسقة بشكل غير عن المتوقع (لبس رجالي).

* تحذير: كل الأشياء الموجودة غالية، لأنها كلها من نيت آي بورتيه، و هذا كان اتفاقنا. 

Parisian Chic by dejavuar featuring michael kors tops

لما سألت أختي وش الفكرة اللي كانت ببالة، قالت لي إنه بغت شيء كلاسيكي وراقي، وشيئن كانوا بباله، توب بظهر مفتوح و شنطة بسلسلة طويلة و ملونة مو أسود أو أبيض. لما أرسلت لي صورة السيت اللي سوته، أول شيء جا ببالي فيلم Funney Face شيء نهاية الخمسينات الستينات بباريس (مو إني عشت أو أعرف باريس، بس يعني من الأفلام).

Urban chic by dejavuar featuring a bra top

الفكرة اللي كانت ببالي إني أبغى شيء أبعد ما يكون عن الرسمية أو التقليدية، لأني بغيت أنسق البنطلون "الرسمي" بشكل مو رسمي و بنفس الوقت ما بغيت أكثر ألوان. اخترت هذي البرا من سان لوران (أيوه سعرها 900 دولار) و كنت راح أحط فوقها جاكيت، بس لما شفت الشنطة الباك باك هذي من كريستوفر كاين، قررت أنه هذي أكبر إكسسوار ممكن أضيفه للبس. بالنهاية طلعت بلبس، لما خلصت منه حسيته لبس ممكن أشوفه على هانا قابي بشوارع نيويورك. 

بالنهاية أختي اللي اختارت القطعة لنا، اختارت الست اللي سوته أختي الفايز. بصراحة انبسطت على الفكرة، لو تبغون تقترحون قطع ثانية (للمستقبل) ممكن تكون أي شيء حتى لو كانت خاتم مثلا. نسوي شيء زي كذا، و إذا أنتم تبغون تنسقون هذا البنطلون، لا تنسون تحطون رابط لشغلكم كرد. 

Summer Still

من أول الأشياء اللي شفتها بهذا الشهر كانت الصورة اللي تحت لدايان كروقر. من عرفت دايان (أول مرة عرفتها من بريمير فيلم تروي بكان، فأنتم أحسبوا متى كان الكلام هذا). المهم من عرفتها، ما أتذكر إنها مرت بفترة كان وضعها "سيء" لا على مستوى الأناقة، و أكيد و لا على مستوى الشكل P:. مرات ما يعجبني لبسها، مو لأنه مو حلو، أو لأنها ما اهتمت، لكن لأنه بعض المرات ما يكون ذوقي. 

أول ما شفت اللبس قررت إني أرشحه لأحسن لبس لشهر أغسطس، صحيح أنه بس تي شيرت مقلم و جينز و شنطة حمراء، لكن بعض المرات لبس لبس بسيط زي كذا يحتاج فن، مو كل الناس يقدرون يلبسون بالبساطة هذي و يطلعون حلوين. 

Summer Still by dejavuar featuring neon yellow handbags

Uniqlo tailored shirt / Yves Saint Laurent blue jacket / American Apparel suede lace up oxford / Proenza Schouler neon yellow handbag, $1,340

بصراحة أول ما بديت السيت كنت تقريبا بانسخ لبسها زي ما هو، لكن استحيت على وجهي، بعدين قررت إني أختار مع التوب المقلم شورت أو بنطلون أحمر، بعدين حسيت إني قد سويت سيت كذا و بطلت (ما قد سويت بس اكتشفت إني قد سويت ثلاث سيتز فيها مقلم) واضح إن ما عندي مشكلة تجاه المقلم P: غير هذا اللوك دايان لبست بهذا الشهر لبسين ثانيات فيها تقليم أسود و أبيض. و أهم شيء إني مختارة المقلم من أقمشة شهر أغسطس فأعتقد إنها فرصة إننا نتكلم عن المقلم أكثر.  

صراحة ما راح أتكلم عن المقلم أكثر، تعرفون إني أحبه، لكن خلونا نتكلم عن اللبس اللي اخترته. غير التوب المقلم، اخترت هذي التنورة و اللي أصلا هي شلحة من فيكتوريا سيكريت، آسفة إنها مو موجودة الآن، بس فهمتوا الفكرة، أعجبتني من شفتها قبل شهور بموقع، و لقيت إن الفكرة مناسبة خصوصا مع مجموعة لوي فيتون اللي كأنها ملابس داخلية، و بعد تعرفون إني أحب هذا الشيء. بغيت جزمة إكسفورد علشان تعطي اللوك شكل جاد أكثر، خصوصا مع الشلحة. بعد اخترت الجاكيت، لأني حسيت اللبس لحاله بيكون كأنه لبس بيت، فقلت جاكيت جينز بيخليه يحافظ على شكله الصيفي اللي مو متكلف، بنفس الوقت ما يخليه لبس بيت. 

Black for Summer

اليوم شفت إيما روبيرتز و هي بمناسبة أعتقد لجزم فانز، ما كان  شكل إيما أحلى شكل قد شفته بحياتي، لكن فيه شيء أعجبني فيه، يمكن السبب السنيكرز (أنا حابة السنيكرز مرة من فترة). أو يمكن لأنه شكله كان ما كأنها تحاول تبهر أحد، أو تطلع "كشخة". المهم ما أعرف ليه حسيت إني ودي أسوي سيت عن شكلها. 

قبل فترة ما أعرف وين (أكيد بوحدة من مواقع الفاشن) شفت عنوان "كيف تلبس أسود للصيف". ما قد فكرت بموضع لبس الأسود للصيف. أعتقد إني زي أكثر العالم ما يفكر بالأسود إلا كلون للشتاء، لكن هذا ما يعني أنه الأسود يختفي من الوجود بالصيف (بعدين فيه ناس يحبون يلبسونه طول الوقت).

Black Summer by dejavuar featuring circle sunglasses

TIBI short halter dress / Simone Rocha moto jacket / Converse orange shoes / H&M chain necklace, $9.38 / Circle sunglasses / Charlotte Russe neon nail polish

هنا فكرتي عن كيف ممكن تلبسين الأسود بالصيف. أولا خليني أقول إن السيت هذا أسرع سيت سويته، أحس إني ما فكرت فيه أبدا P: يمكن اللي خلاني أبدأ بالسيت هو لما كنت أقلب مجلة نيت أي بورتيه، شفت هذا الجاكيت من سايمون روشا و قررت إني أكتب الحين عن صورة إيما روبيرتس اللي شفتها الصباح، طبعا و أحط الجاكيت :).

فكرتي عن لبس الأسود لازم يكون شيء واضح أنه خفيف (فستان، أو تنورة خفيفة)، ألبسي معاه إكسسوار ذهبي، بس لا تكثرين إكسسوار علشان ما يعطي شعور بثقل. أختاري معاه ألوان فاتحة زي الجاكيت أو حتى نيون و فاقعة زي الكونفيرس اللي أخترتها. و بالنسبة لي أهم شيء و أعرف أنه أختي ما تحبه، حطي مناكير لونه فاقع. 

The Great Gatsby Weekend

الجمعة اللي فات بدأ عرض The Great Gatsby النسخة اللي ما أعرف كم رقمها. لكن هذي المرة الفيلم موسيقي و اللي أخرجه هذي المرة باز لورمان مخرج روميو و جوليت و مولان روج (لو كنتوا مهتمين). أعترف إني مو متحمسة أشوف الفيلم إلا لشيء واحد (مع إني أحب تمثيل دي كابريو و كيري موليقان) لكن أنا تحمست أشوفه علشان أشوف الملابس اللي من تصميم برادا و المجوهرات من تصميم تيفاني. 

تعرفون إني من زمان أحب الفلابير، (لبس العشرينيات بشكل عام)، لكن هذي المرة قررت أسوي نسخة مبسطة منه خصوصا بعد ما شفت هذي القطعة (الشيء اللي يحط على الرأس) عند أيسوس ب 25 دولار. بالنسبة لي إذا عندك هذي القطعة، تكفي عن أي شيء ثاني علشان يصير اللبس عشرينيات أو فلابير. 

هنا قائمة بالأشياء اللي ممكن تسويها إذا ما حصل لك تروح لحفلة زي حفلات قاتسبي. أولا إقرا الرواية أو أشتري عقدها P: شوف الفيلم اللي أنتج عام 1974 من بطولة روبيرت ريدفورد و ميا فارو (أحب هذا الفيلم). و الملابس كانت فيه من تصميم رالف لورين. أما أسهل خيار تصفح هذا الإيديتوريال من عدد فوق لسبتمبر 2007 (أحب هذا الإيدتوريال مرة من أول مرة شفته). 

الفستان من سي سي توب شوب، موجود هنا. الرواية موجودة هنا عند أمازون أو ممكن تحملونها من أبل ستور أو من أمازون كيندل أو حتى بي دي إف مجاني راح تحصلونها على الإنترنت (الرواية حلوة بعد). 

90's Kid

من زمان ما كتبت عن فيلم، أو كذا أحس. بشكل عام أحب الأفلام، و بالخصوص أفلام الكرتون اليابانية أو أفلام ميازاكي ... اليوم شفت فيلم مع أختي (كان من زمان ودي أشوف فيلم كرتون ياباني). المهم، الفيلم اللي شفته اليوم اسمه Whisper of Heart. الفيلم قديم (من التسعينات). الفيلم غير أنه لطيف، ممكن تشوفون فيه لبس التسعينات و حتى الشعر (بذات على الأم).

Whisper of the Heart by dejavuar featuring a distressed leather backpack

Topshop / MSGM / Happy Socks socks / J.Crew sneaker / Private Stock distressed leather backpack

لأني أعتبر نفسي طفل من التسعينات أقدر أقول أنه لبسي لما كنت صغيرة كان يشبه كذا (من الصور)، صحيح إني ما كنت راضية عن لبسي (كنت أحس أمي تهينني و تلبسني ملابس أطفال و أنا كبيرة). لكن ما دامت ملابس التسعينات خصوصا القورنج راجعة موضته، و الفيلم زي ما قلت لكم بالتسعينات عن بنت بالمدرسة، قررت أني أختار ست فيه من لبس التسعينات و أحسه لبس طلاب. 

ما فيه شيء كثير ينشرح بالسيت، كله واضح بس حبيت أختار مع الملابس سنيكرز لأني من فترة أفكر فيها، و لأن بالفيلم تلبس جاكيت بمبر و لأني أحب جاكيتات البمبر قررت أحطه بالسيت، طبعا ما دامه لبس مدارس (أو مستوحى منه)، أكيد فيه لازم شنطة باك باك. 

Oz

أمس كان بريمير فيلم Oz The Great and Powerful، بطولة الفيلم طبعا مع جايمس فرانكو كانت لميلا كونيس، ميشيل وليمز و ريتشل فايس. الحلو بالموضوع إن كل الثلاثة دايما لبسهم حلو.

ما راح أتكلم كثير عن لبسهم بالبريمر، لأني أعتقد على الأقل وحدة منهم بتدخل قائمة أحسن الملابس لشهر فبراير. بس بشكل عام ميلا كانت لابسة دولتشي آن قابانا، ميشيل وليمز ببرادا و ريتشيل فايس بفيكتوريا بيكام (أعجبني مكياجها مرة).

 ما يحتاج إني أقولكم إتي متحمسة مرة للفيلم وودي أشوفه، لكن اللي خلاني أتحمس و أقرر أكتب عنه، غير إن شكل الثلاثة عجبني بالبريمر (بشكل متفاوت)، لكن اليوم لما كنت أدور بالمكتبة شفت هذا الكتاب Everything Oz (موجود بالصورة) و أعجبني مرة. الكتاب عبارة عن أشياء ممكن تسوينها (أشغال و أكل) كلها لها علاقة ب Oz بشكل أو بآخر. لما رجعت للبيت قررت إني أسوي سيت عن الموضوع (أنا سويت السيت بإيحاء من الفيلم القديم The Wizard of Oz اللي ما أحبه)، هو صح أنا ما أحبه، و أتذكر أول مرة تفرجت عليه كنت معصبة مرة، لأني تزلته تورينت و كان تحميل فيلم يآخذ قرن و بعدين شفت الفيلم و لقيته سخيف و زعلت. ما علينا من قصة زعلي، بس إني بعيد عن سخافة القصة أظني مع الوقت بديت أستظرف الشخصيات و أشكالهم، خصوصا جزم دروثي الحمراء (بالكتاب فيه كيف تسوين جزمة حمراء لماعة). أعتقد بسببه صرت أستظرف الجزمات الحمراء. أخترت الجزمة الحمراء هذي النص كعب (ما أعرف من وين جبت الاسم) من سيلفاتوري فرقامو، و الفستان المربعات من أيسوس (لأن دورثي كانت لابسة فستنان مربعات "قينام" بالفيلم). أخترت الخاتم هذا لأنه عاجبني، و لأن فيه شخصية الأسد (البسة أخت الأسد). و هذي الشنطة (بعد لأن هذا ستايل اللونش باق عاجبني من زمان) علشان شخصية التنكة. آخر شيء حبيت احط علبة الظل هذي من أوربان داكي مطلعين مجموعتين وحدة للساحرة الشريرة (اللي أنا حاطتها) و وحدة للساحرة الطيبة.

 ترى كل الخيارات مبنية على القصة القديمة، ما أعرف إذا الفيلم الجديد له علاقة بالقديم.

Night for Day

من فترة و أنا مهوسة بفكرة شيء فخم يخلط مع شيء مو فخم (لو كانتوا فهمتوا علي) أتذكر أول مرة عجبتني الفكرة، شفت دايان كروقر تتمشى بجاكيت شانيل. الكلام هذا كان يمكن قبل سنة أو أكثر. طبعا أكثر شيء كان عاجبني إنها محولة جاكيت زي شانيل للبس كاجوال مرة. طبعا ما يحتاج أقول لكم أنه صار عندي أحلام إني ممكن ألبس جاكيت شانيل بهذي الطريقة (طبعا الجاكيت لسا ما زال بالأحلام) :).

بداية الأسبوع كان فيه عرض شانيل بري فول بأدنبرا و من الحاضرين جاية ممثلة سويدية (جديدة) أعتقد إن إسمها إليسيا فيكاندر (مو متأكدة إن اسمها ينطق كذا) :).

إليسيا كانت حاضرة، و تقريبا مسوية نفس الموضوع اللي أعجبني شكل دايان فيه، صحيح شكل إليسيا أقل كاجوال، بس بالنسبة لي يكفي أنك تلبس جينز مع جاكيت شانيل و بهذي الحالة مو بس جاكيت شانيل عادي (أوت كتو). يكفي أنه يخليني ودي أقوم و أسرق جاكيت شانيل الحين، و ألبسه مع أخيس جينز عندي، بس قهر بشانيل (أعرف ما دروا عني) :). المهم قررت إني أسوي سيت للفكرة اللي ببالي (حتى لو ما كان الجاكيت شانيل)، عن جاكيت فخم للبس كاجوال.

Night for Day by dejavuar featuring skinny leg jeans

Rock shirt / Miss Selfridge / Cheap Monday skinny leg jeans, $75 / Del Toro leather slipper / Alejandro Ingelmo zip bag

طبعا أول شيء بديت فيه هو البانطلون لأني قلت لكم أحس كل فكرة أني أحول شيء فخم لشيء مو فخم تبدأ من الجينز. أخترت هذا الجينز يمكنه لأنه على الأقل حسب علمي (أقدم لون جينز أعرفه) و حبيت أدخله بالسيت و شكله حلو. الجاكيت قررت إني ما أفكر بشانيل علشان أبدأ استوعب إن الفكرة ممكن تكون حلوة من دون شانيل :). بعدين قررت أختار شنطة باكباك علشان ما يكون فيه أمل إن اللبس هذا يكون لبس سهرة بأي شكل. التي شيرت أعجبني من محل من إتسي، و حسيت أنه بيعطي الجاكيت الباروك حس عصري. أما الجزم ما أعرف ليه اخترتها بس إني أحب السلبيرز، ما أعرف كم مرة قلت الكلام هذا هنا، بس أحب هذي الجزم. آخر شيء هو الكتاب اللي على جنب أسمه Little Black Jcket من شانيل مسويه كارل لاقرفيلد مصور فيه مشاهير من كل العالم لابسين جاكيت أسود شانيل بستايل مختلف. الكتاب مو عندي، بس شفت صور منه (و عادي جدا تعطوني إياه هدية، بدل الجاكيت نفسه، ما أحب أضغط عليكم). D: هنا تلقون الكتاب. 

From Russia with Love

من أول الأفلام الفرنسية اللي شفتها فيلم كان اسمه "الدمى الروسية"، ما أعرف من متى و أنا أعرف الدمى الروسية (العرائس الخشبية اللي تدخل ببعض). لكني أعرف إني من عرفتها و أنا أحبها. و ما أعرف حبيت الفيلم علشان أسمه و لا هو كان ظريف :). 

بالتدوينة اللي قبل هذي، تكلمت لكم عن ستريت ستايل خصوصا وقت أسابيع الموضة، قبل أسابيع الموضة ما كنت متحمسة إني أشوف نفس الناس اللي يجون و يستعرضون بأشكالهم، لكن شفت كلتش من شارلوت أولمبيا، و انتظرت أشوف يكمن أناظرها مع وحدة من "Russaian Pack" خصوصا يوليانا سيرقنكو، لكن شكل يوليانا عرفت إني جالسة أنتظر و قررت تعاند، و لا تطلع بكل مكان زي كل مرة. 

Russian Doll by dejavuar featuring a maxi skirt

ما عندي فكرة إذا تعرفونها قبل، أو قد مرت عليكم، لكن إذا كان عندك تمبلر، أعتقد أنكم شفتوها على الأقل مرة. أعترف إني أول مرة شفتها انبهرت فيها، لكن مع الوقت حسيت إنها من مجموعة الناس اللي جاية علشان تقول للناس أنا غنية شوفوني. حتى و أنا أتضايق منها (و من كثير من اللي بالفاشن)، ما زلت أعتقد إن ستايلها حلو، حتى لو كان شوي مصطنع. ما علينا لكن لو كنتوا تحبون لوك كلاسيكي أروستقراطي، دوروا على يوليانا Ulyana Sergeenko. يولينا الحين عندها خط أزياء (ما أعرف أنه ينباع برا روسيا). بعد عرضت بأسبوع الأوت كتو الماضي بباريس أول مجموعة أوت كتو لها، لو مهتمين تلقونها هنا.

نرجع للسيت، اللي قلت لكم أهم شيء فيه بالنسبة لي هي شنطة شارلوت أولمبيا ما أعرف وش قصتي مع شناطهم (الكلتش) بس كل وحدة تصرخ بوجهي تقولي أشتريني أنا. من فترة طويلة و أنا عاجبتني هذي التنورة من صوفي كوكوسلاكي أعرف بعض البنات مسخوها بالتنانير الشفافة هذي، لكن بالنسبة لي فيه أشياء مالي شغل بالناس وش قاعدين يسوون بالأشياء، زي الكوب كايك، مالي شغل إذا الناس يعتبرونها موضة و تلقينها بكل مكان، أو بطلوا يعتبرونها، إذا قررت إني باشتري كوب كايك، باشتري بأي نكهة أبغى (بالمناسبة نكهتي المفضلة فستق من كوب من الكايك :). الجزم من نيكولاس كيركوود أحب جزمة أحس أنه أذكى مصمم جزم (آسفة للي يحبون لابوتان أو جيمي تشو) ما عندي مشكلة مع الإثنين بس أحي كيركوود أكثر، و قررت أختار هذي الجزم، لأن اللوك كله سادة، حتى مجوهرات ما اخترت علشان الكريستال الموجود على القميص من ميو ميو و النظارات قررت إني أختار بعد شيء كلاسيكي نظارت "بسة" أو cat eye ما أعرف ليه بس حسيتها تمشي مع باقي اللوك. أعرف أن كل الأشياء الموجودة غالية مرة، السيت هذا مو شرط أنك تشترين الأشياء اللي فيه نفسها، أعتقد فيه كثير من الأفكار اللي فيه موجودة بالهاي ستريت، بس أنا عجازة ما ودي أدور (طبعا إلا الشنطة :). 

شرايكم بستايل يوليانا سيرقينكو؟

Women in Sports

جلست الصباح أدور على صور لسوزان لنقلين (لو كنتوا قد سمعتوا بهذا الأسم، هو اسم واحد من ملاعب التنس اللي يسوى عليها مباريات غولان قاغوس) و هي لاعبة تنس فرنسية قديمة. أعجبني كثير شكلها و هي تلعب تنس. لما شفت صورها بغيت أكتب عنها بأي شكل، علشان كذا قررت أسوي هذا السيت

Sports Pioneers by dejavuar featuring prada handbags

Topshop sleeveless dress, $80
3 1 Phillip Lim leather vest, $1,200
Suede shoes, $64
Prada handbag, $2,950
Melissa Odabash wide brim sun hat, $160

أول ما فكرت بالسيت كان ببالي إني أدمج الفكرة مع وحدة من أهم موضات الربيع و الصيف الجاي، هي الملابس الرياضية، و إنتهيت بسيت فيه مو بس ملابس رياضية، لكن ثلاثه من أهم ملابس الصيف الجاي: ملابس العشرينات، ملابس رياضية و ألوان باستيل أو شقري من سكر/ sugar :) من فترة و أنا ودي أتكلم عن موضة الألوان هذي خصوصا إني شفتها بأكثر من محل هاي ستريت (زارا بالذات)، لكن ما لقيت شيء مثير يخليني أتكلم عنها.

 أي موضة من ملابس الصيف الجاي مبسوطة عليها ودك تلبسينها؟ ممكن تلبسينهم سوا زي فكرة السيت؟

The Other Iron Lady

الفترة هذي فيه الترويج لفيلم ميريل ستريب ذا آيرون لايدي عن مارقريت ثاتشر ... قبل فترة مو قصيرة سوت هاربار بازار إيدتوريال عن هذا الشيء كان مرة ظريف (راح أرفعه لكم، و أحط رابطه، بس الحين فيني شوي نوم، فأنتظروا بكرا إن شاء الله، شيكوا على الموضوع من جديد و بتلقون رابط لها :). هذا هو الإيديتوريال إن شاء الله يعجبكم.

ما راح أتكلم عن لبس مارقريبت ثاتشر، و لا عن ميريل ستريب اللي أحبها مرة، لكن عن مرأة ثانية بعد مهمة، لكن بس اليوم لما شفتها بالأخبار، جا ببالي، ليه ما عمري تكلمت عنها، مع إنها تعجبني مرة.

المرأة هذي هي زعيمة المعارضة بمينمار (بورما)، إسمها أون سن سو تشي، شكلها كيوت، لبسها دائما مرتب، ما أعرف كيف غابت عن بالي، بس ما علينا سويت لها سيت تعويض. (بالمناسبة ما زلت أستقبل حساباتكم على بوليفور لو بغيتوا تشاركون معاي بالمدونة). 

The Other Iron Lady by dejavuar featuring j crew sandals

The Row slim fit shirt, $1,067
Jason Wu floral print skirt, $1,250
J.Crew j crew sandals, $198
Rodo leather clutch, $645
Gunmetal earrings, 50 AUD

دورت صور أحسن لها بس ما لقيت، لكن و أنا أدور على صور أكتشفت أنهم السنة هذي اللي خلصت طلع فيلم عنها تمثل دورها ميشيل يوه، لو بغيتوا تعرفون عنها أكثر، و تشوفون لبسها (تراني ما شفت الفيلم)، بس أحب بلبسها إنها دائما تلبس تننانير، كأنها لافتها عليها، و دائما مع بلوز قصيرة، يمكن أكثر شيء أحبه فيها، هي الزهور اللي تحطها على شعرها، و لأني ما أحب حركة الزهور تنحط على الطالعة و النازلة، قررت إني أختار بدل عنها هذي الحلقات اللي أعطتني شعور إنها زهور برية صغيرة، بس ذهبية. و تراي حبيت الصنادل كثير، بصراحة حابة اللوك كامل :). 

لو كنتوا تعرفون أون سن سو تشي، وش رأيكم بلبسها؟ و لو ما تعرفون وش رأيكم بالسيت؟

Cool Girls

من أكثر العارضات اللي يعجبوني دري هامنقوي، ما أعرف بس أحس إنها "كووول"، دايم مايك آب خفيف، ملابس بسيطة ... مرة تعجبني. الشيء الثاني اللي صاير يعجبني الفترة هذي نوعية من اللبس ما أعرف وش هي، بس كذا بعد أحسها "كووول" (أعرف إني كأني توي متعرفة على الكلمة، بس أحسها هي اللي تعبر عن بالي.

بأسابيع الموضة اللي كانت قبل شهرين، أظن بعرض فالنتينو كانت أليكسا شونق جاية، لعرض فالنتينو، اللي يعرفني قبل يعرف إني ما أحب لا أليكسا، و لا ستايلها كثير (طبعا هي تعتبر إن ستايلها ولادي)، لكن بذاك العرض كان شكلها بالنسبة لي غير.

أول مره شفت الصورة، كانت الجزء العلوي بس، مع أنه هذا شكل أليكسا بالعادة، يعني ما تسوي شيء غريب بشعرها، لكن أعجبني أختيارها للنظارة هذي مع فستان الفالنتينو الأحمر هذا ... حبيت كيف خلته فستان كاجوال مره، يمكن لأني شفته قبل على ريتشيل وايسز، و كانت مخليته فستان فخم مع تسريحة شعرها، و المجوهرات اللي لابستها معاه.

مو ما عجبني على ريتشيل، لكن حبيته مره على أليكسا ... بعد فترة شفت الصورة كاملة و حبيت شكلها زيادة، خصوصا إنها لابسة معاه سلبيرز حقات مارك باي مارك جايكوبز، السليبرز كانت عاجبتني من الموسم اللي فات، بس لما جت التخفيضات حقت نيت أي بورتيه، لقيتها مخلصة، فلما شفتها على أليكسا انبسطت أنه أحد لبسها بشكل حلو.

المهم نرجع للوك اللي سويته اليوم ... مع كل التعاونات اللي بين المصممين و بعض الماركات آخرها فيرساتشي لـ H&M زي ما تعرفون (ترى جزء من المجموعة كان بفرع المملكة، لو لحقتوا عليه و شريتوا منه شيء قولوا لي :).

أمس (على ما أظن) كان فيه حفل لتعاون بين كريستوفر كاين، و جي براند للجنوز، و كان جاي بعض هذولا الناس اللي يجون الحفلات :) و كانت من بينهم دري هامنقوي، طبعا اللي جايين كانوا لابسين قطع من هذي الجنوز. الشيء اللي أحبه بكريستوفر كين هو أنه يعرف يسوي ألوان نيون تشهي، يخلك كل مرة تحسين إن دولابك فاضي لأن ما فيه قطعة نيون.

Cool by alorwa featuring cutler and gross sunglasses

MTWTFSS Weekday jumper shirt, €7,50
Mulberry low jeans, $310
Keds suede shoes, $45
Proenza schouler bag, $2,804
Cutler and gross sunglasses, $495 قلت لكم هذي محاولة أجمع فيها كل الأشياء اللي أحس إنها بتخليني كول، سويتير نيون ... سنيكيرز و شنطة بروينزا سكولير .. دري بالصورة لابسة واحد من بناطيل المجموعة برتقالي نيون (واضح :) و قميص يلمع (قصديري) أعتقد أنه كريستوفر كين ريزورت 2012 ... لو بغيتوا تشوفون المجموعة، أو تشترون منها تلقونها هنا. 

Tintin

الفترة هذي بدأ الترويج لفيلم تين تين، علشان أكون صريحة ما قد قريت أي وحده من مغامراته، و لا أظن إني شفت بأي مرحلة من حياتي فيلم الكرتون حقه. لكن هذا ما يمنع إني أحبه، لأني أحب الكوميك بشكل عام، و أحب رسومه مره، أحس إنها نظيفة قوة. 

اليوم قررت إني أسوي لوك من وحيه، رغم إن تين تين طلع ببداية الثلاثينيات، بس ما أعرف ليه أحس لبسه شيء ستينيات أو سبعينيات ... أو يمكن تأثير الفيلم بوتيش لكاترين دينوف اللي شفته اليوم. 

Tintin by alorwa featuring genuine leather handbags

Carven short sleeve top, $560

Bally long sleeve top, $495Surface To Air high waisted cropped pants, $79Camel boots, £28Genuine leather handbag, €70Leather sunglasses, $410

الشيء اللي حابته هذي الفترة هي الهاي نيك، أو الرقبة، أو الاسم الجديد اللي اكتشفته لها ترتل نيك. مع إني ما كنت أحبها، خصوصا بالمدرسة، لما كنا نغصب على لبسها تحت المريول، و لفترة طويلة مو هي خياري الأول للملابس، بس الحين لسبب ما أعرفه عاجبتني، ودي ألبسها بشكل مختلف. شيء ثاني ما أحبه، و يمكن إلى الآن ما أحبه، بس أحسه بيطلع حلو مع بعض و هو شيء كمه قصير تحته شيء كمه طويل. بس يمكن الموضوع مختلف هنا، لأن كم السوتير وسيع، و الهاي نيك ضيقة.