ما أعرف كم مرة قلت لكم إني أحب لمكياج، لما ما يكون واضح أنه مكياج خصوصا مكياج البشرة، أكره أشوف البشرة فوقها طبقات من الألوان، أحس إن البشرة تصيح، تبغى أحد يفكها من المعاناة.
من فترة و أنا جالسة أدور على أشياء جديدة بالمايك آب، من أول الأشياء الي كان بخاطري أجربها هو مكياج توب شوب، بس المشكلة كانت أنه ما ينباع المايك آب عندنا، و الموقع ما يوصل للسعودية.
من أهم الأشياء اللي كان ودي أجربها من توب شوب هو Cheeks in:
هذا الشيء اللي كأنه روج، بس أعرض شوي، يجي بثلاثة درجات و هو من اسمه، يحط على الوجنات. أول مرة شفته، شفته بتيتوريال لتوب شوب، استخدموا على الموديل الدرجة الأفتح (طبعا الموديل كانت بيضاء). أعتقدت إن هذي الدرجة هي اللي راح تناسب علي، مو لأني ألمع من البياض، بس لما حطوه على الموديل، أعطاني شعور كأنه يخلي البشرة كأنها منيكان، و أعتقدت إن ماله لون بس شيء يعطي البشرة لمعة (مو بقليتير هذي الأشياء حقت الحفلات، بس شيء يخليه زي القزاز). ما أعرف كيف آصف تأثيره، بس شوفوا
التيتوريال هنا.
الشيء الجيد إن الموقع ما يوصل، لأنه صدق المايك آب هو الشيء الوحيد اللي المفروض ما تشترينه من دون ما تجربينه قبل. لأني لما جربته صار له لون، يعطي على بياض، و يمكن ما لاحظت هذا الشيء على الموديل، لأنه أصلها بيضاء.
ما أخترت اللون الثاني (الوردي) لأن ما أبغى شيء وردي، أو مو حقيقي، يعني ألعب على مين؟ من وين لي خدود وردية؟ جربت البرونز، و أنا مو مقتنعة، خصوصا إني ما أحب التان، و لا أحب كثير المايك آب التان، بس لما حطيته عجبني التأثير اللي يتركه، حبيته كثير، خصوصا إني أحب لما البشرة تكون عليها آثار الشمس أو اللي يسمونه sun kiss. و الشيء هذا يعطي تأثير حلو و كأنه طبيعي. إذا كنتوا بمكان توب شوب فيه ستاند للمكياج، أو تعرفون أحد لسا ما رجع من السفر، و يقدر يجيبه لكم من توب شوب، لا تفوتونه (سعره أقل من 100 ريال).
من فترة و أنا أدخل كل محل سيفورا، بكل مدينة أروح لها، خصوصا و إني شفت على موقعهم (اللي بعد ما يوصل للسعودية)، بخاخ يبخ على الشعر و لا يخليه ينفش مع الرطوبة (أغلب حياتي عشتها بالرياض، و شعري ما يعرف إلا للجو اللي ناشف زي جو الرياض) فعسى ما يكون بالجو شوية موية، بدل غبار يبدأ شعري ينفش و أحس كل شعره تصير لحالها.
للأسف ما لقيت هذا الشيء بالأماكن اللي رحت لها (ما بقى إلا نروح لأمريكا نجيبه)، بس تعرفت بسيفورا على شركة مايك آب عجبتني مرة. يمكن بعضكم يعرفها قبل، بس أنا ما عرفتها إلا هذا الأسبوع :).
بالخطأ وقفت عند ستاند Benefit الشيء اللي لفت لي نظري هي طريقة تغليفهم و تعليبهم للمايك آب، بس شفت بعض الأشياء، جلست قدام الستاند ساعة أدور على شيء يناسبني، (أعرف إني سطحية، بس ما أقدر أقاوم التغليف الكويس، لو شفت مشروب قارورته حلوة، أو بهذي الحالة مايك آب علبته حلوة، لازم اكافأ هذولا الناس اللي تعبوا على شغلهم، و أشتري منهم.
ما ندمت على الشيئين اللي شريتهم منهم الأول هو
some kind-a gorgeous:
الشيء هذا غير إن شكله حلو (على شكل إسطوانة زي ما أنتم شايفين) عجبني فيه إنه أساس مو أساس (كريمي مو بودرة) يعني بس حطي منه على الأماكن المبقعة من بشرتك، بعدين ولااااا كأنه بشرتك صافية من الأساس. جربته على وجهي يصلح مرة للبقع الحمراء، يعني من أول لمسة و البقعة مختفية تقريبا، أما الأثار السوداء اللي تكون من الجروح أو الحبوب، فتحتاج أكثر من طبقة على حسب غمقها. من الأشياء اللي حبيتها فيه أنه صحيح بس فيه منه ثلاث درجات، بس ينفع على أكثر من درجة بين الدرجة و اللي بعدها، يعني أنا جربت الثلاثة درجات و كلهم ما كانوا سيئات، اللي خلاني أختار الدرجة الوسط لأنه أقرب للون أساسي الأصلي، لو بغيت استخدمه مع مكياج أثقل شوي. آخر شيء سر هذا المنتج أنك ما تغطين وجهك كامل فيه سواء كنت تبغين تحطينه لحاله، يعني لمناسبة بسيطة، و لا تبغين أحد يدري إنك حاطة مكياج، أو لو بغيتيه أساس لأساس، حتى ما تكثرين طبقات الأساس و تضيع ملامحك :).
لأنه الأساس ما كفاني من بينيفيت رحت أدور على شيء ثاني أشتريه من عندهم، و لقيت هذا الشيء السحري، اسمه the POREfessional:
المنتج هذا كأنه خصيصا مصنوع لي، هو كريم تحطينه قبل الأساس علشان يخفي المسام. أنا عندي مسام وسيعة، خصوصا مع الجو الحار، أحيانا أتضايق منها خصوصا زي ما قلت لكم لا توسعت مع الحر، يعني شوي منه على المنطقة اللي تحت محجر العين بيريحني من شغل كثييييير.
حطوا هذي الأشياء من فوق لتحت، و بتطلعون حلوين من دون ما يعرف أحد أنكم حاطين مايك آب (جمال رباني p:)
قد جربتوا أي شيء من هذي الماركتين؟ و وشوا الشيء اللي مستحيل ما يكون بعلبة المكياج حقتكم؟
لقيت هذا الفستان (يمين)، أعرف أنه مو رخيص خصوصا على فستان لكل يوم أو حفلات أو مناسبات بسيطة، لكن تقريبا أقل من شهر و تبدأ تخفيضات الموقع، فممكن تحطونه بالويش ليست و تنتظرون التخفيضات. الفستان الثاني لقيته هنا عند أيسوس، أعجبتني طبعات الورد عليه و أعجبني طوله، و أعتقد سعره لحد ما مقبول. 
