Blue-ish

أمس كان حفل مراسلين البيت الأبيض، الصراحة بالعادة هذي مو مناسبة أكتب عنها هنا، و لا أهتم فيها، بس و أنا أقلب الصور أمس، أنتبهت أنه كثير من الحاضرات لابسات درجات الأزرق للتيل (أزرق مخضر). و أكثر من لبس من هذولي الملابس عجبوني، فقررت إني أكتب عنهم هنا.

ما أتذكر إني قد لبست لبس سهرة بهذا اللون (أي درجة للأزرق حتى الكحلي) ما أعرف ليه، مع إني ما عندي مشكلة مع الأزرق، يمكن أنساه بين  اللون الأخضر و الأسود.

من أكثر الملابس اللي أعجبتني أمس، هو لبس هناه دايفز بجورج شقرا (تحت يمين)، مرة أعجبني بالذات عند منطقة البطن، أحسه أعطى الجسم شكل (ساعة رملية)، أظن اللي ما عندها خصر واضح، هذا اللبس بيعطي شعور إن عندك خصر للي جالس يشوفك. 

قلت لكم السبب اللي ما يخليني أنتبه للأزرق لما أفكر بملابس سهرة، يمكن علشان الأخضر و الأسود (اللي أعتقد إنهم أكثر لونين ممكن تكونين متأكدة إن فستانك بيكون حلو). لكن أعتقد إن الأزرق هنا تغيير، و أكيد لو فكرت بلبس سهرة باحطه ببالي بالمرات الجاية. 

أنتم قد لبستوا أزرق و درجاته؟ أو تفكرون فيه لمناسبة جاية؟ 

Best of LFWSS15

صراحة عكس السنوات اللي فاتت هذي المرة لندن على الأقل من وجهة نظري، ما كان فيه عروض مميزة، لكن أعتقد كان فيه فساتين مرة حلوة، و أتمنى أشوفها على الريدكاربيت الفترة الجاية، لأني أحس إنها تستاهل أحد يعطيها وجه و حياة. ما علينا من الكلام الفاضي، هذي هي أحسن الملابس/ اللي ودي أو أحس إني أشوفها على الريدكاربيت. 

من أول الفساتين اللي أعجبتني من لندن، هو الفستان الأول (فوق يمين) من ماك كيو، عجبني أنه كأنه تغليفة هدايا قديمة، لونه عجبني، و عجبتني القطعة السوداء اللي على جمب، ما أعرف وش هي بالضبط، بس أحسها أعطت الفستان شكل، مع إني ما أتوقعها تلبسه، بس أتمنى أشوفه على نيكي ميناج. الفستان اللي بعده من إيميليا ويكستيد، ما أعرف ليه أحس بوبي دوليفان راح تلبسه. 

أعرف ثلاثة فساتين أوف شولدير!! الأوف شولدير مو جديد على الموضة، بس واضح أنه الحين مزاجي مرة. الفستان الثاني من اليمين تحت، من هولي فولتن عاجبني مرة، ودي أشوفه على لوبيتا، أحسه بيكون حلو مرة عليها. أما الفستان الأخير،  تحت، الأسود و الفضي من توب شوب يونيك، أحسه بيكون حلو على إيما واتسون أو كلوي مورتيز أو كايت مارا. الفستان الأبيض اللي فوق (أوف شولدير) من أوسمان، ودي أشوفه على أليكسا شونق، أما اللي تحته اللي من بيتير بلوتو (عاجبتني ألوانه مرة) ودي أشوفه على تيلير شلينق (من أورانج إز ذا نيو بلاك). 

أنتم وش رأيكم؟ 

The Color of the Moment

قلت لكم بأحسن لبس لشهر أبريل كان فيه لبس أحمر أو درجات الأحمر كثير هذاك الشهر، ما زال اللون يطلع على الريدكاربيت، و لا أعرف راح ينتهي قبل الصيف، أو بنشوف الأحمر إلى الخريف الجاي. ما يهم إلى متى راح يلبس بس هنا بعض الملابس. 

قد قلت لكم قبل قليل ألبس أحمر، عندي فستان واحد أحمر، أعتقد لبسته مرتين بس، و أظن أنه كان شكلي كويس فيها، بس ما أرتاح للون بشكل عام. أحب العنابي، بس الأحمر، ما أعرف، يمكن أغير رأيي فيه علي بعد فترة، ما حد يدري؟!! المهم ما أعرف ليه الفترة اللي فاتت كان كثير على الريدكاربيت، حتى كان موجود بالميت قالا مثل آنا هاثواي بكالفين كلاين. (أعتقد فيه أحد من الميت قالا بلبس أحمر راح يدخل قائمة أحسن لبس لشهر مايو) بعد فيه موضوع ثاني جاي، بيكون فيه لبس أحمر، بعد مهرجان كان بيدأ الأسبوع الجاي، ممكن نشوف فيه أحمر من جديد (معلومة جانبية، تراني دايم أكتب مهرجان مع كان علشان ما تتيهون و تحسبون أنه فعل كان، مع إن الشيء هذا ثقيل على أصابعي P:). 

من أكثر اللي أعجبوني بالأحمر ماري إليزابيث وينستيد بفيونيه (فوق وسط) أعجبني اختيارها للجزم، و أعجبني شعرها، لكن أحسن فستان عندي، فستان نيكول كيدمان من بيتر بلوتو. أعجبني أنه فيه درجتين من الأحمر بنفس الفستان. 

أنتم تلبسون أحمر؟ أو الصور هذي أغرتكم أنكم تجربون؟ وش أحسن وحدة بالنسبة لكم؟ 

Red Carpet Worthy: London Edition| F.W 2014

بصراحة باستثناء ماري كاترونتزو (تكلمت عنها تحت) ما فيه أحد بأسبوع لندن أثارني، ما أعرف ليه كنت أنتظر شيء مختلف، اللي شفته كأنها مجموعات، تكملة لمجموعات قديمة، مو شينة، بس ما فيه جديد. من دون ما أطول بالكلام، هنا أحسن الملابس بالنسبة لي من أسبوع لندن، و بعض الأشياء اللي شفتها فيه. 

• على عكس مصممين نيويورك اللي تقريبا كلهم تجاهلوا الطبعات، أكثر مصممين لندن، إلى الآن ملابسهم كلها طبعات ما عادا مصمم أو اثنين (منهم ماري اللي كانت هي ملكة الطبعات). 
• كان فيه أسود كثير، و أحمر و درجاته، الرمادي و الرصاصي كان موجود بس مو بكثرة عروض نيويورك

أول شيء أعرف إن اللبس الأول اللي على اليمين من هاوس أوف هولاند ما راح أحد يلبسه، لكن حبيته، و بغيت أحطه. من المجموعات اللي أعتقد إنها كانت مختلفة مجموعة ماثيو ويليمسون، خصوصا الجزء الأخير منها، حسيت كأنها فيقاس، أعجبني لبسين جمب سوت لبستها اليوم إيلي قولدنق و لا عجبتني عليها، لكن الثاني الفستان الأسود القصير، كتف واحد و فرو أحمر و أزرق، أحسه بيكون حلو على سيينا ميلر. فستان بيتر بلوتو (فوق الثاني من اليسار) أتمنى أشوفه على جينفير كونلي، مع أني عارفة إنها ما راح تلبسه. 

الفستان الباذنجاني اللي من أنتطونيو بيراردي، يمكنه أقل واحد مفضل عندي، لكن أعتقد إلى تسعين بالمية فيه أحد راح يلبسع للريدكاربيت، يمكن قوينث بالترو. 

اللبس اللي من كريستوفر كاين، ودي أشوفه على كايت بوسورث أو آن هاثواي، مع إني ما أعرف إذا هي ناوية تطلع بمناسبات أو لا. اللبس الأحمر من توم فورد أعرف أنه ما راح يعجب كثيرين، لكنه أعجبني كثير، ودي أشوفه على أحد عنده ستايل زي بوبي دوليفان أو وحدة مرة حلوة زي أجاك دينج. 

وش أعجبكم أنتم من عروض لندن، وش تنتظرون من ميلانو اليوم؟ 

Red Carpet Worthy: London Edition

أمس خلص أسبوع لندن للموضة، يمكن العرض الوحيد المهم بالنسبة لي هو عرض ميديم كيرشوف، أعجبتني المجموعة، بالذات الشنط، بس ما شفت شيء ممكت أتكلم عنه هنا. أو يمكن ما كنت متحمسة أكتب عن أي شيء، لأن أغلب وقتي أمس ما كنت عند الكمبيوتر. ما علينا، خلونا نحط الملابس اللي أعتقد إنها تستاهل الريد كاربيت من أسبوع لندن. 

من اليمين العروض ل: إيرديم، لورين سكوت، برين و هاوس أوف هولاند

ما أقدر أقولكم قد إيش عاجبني الفستان البنفسجي من هاوس أوف هولاند، أتمنى بجد أشوف على الريد كاربيت (سيينا ميلر مثلا) عرض هاوس أوف هولاند عجبني بشكل عام، أعتقد أنه أحسن من مجموعة الخريف، أتمنى أشوفه بهوليوود أكثر، لأني ما أشوف إلا البريطانيين يلبسون له. أعجبني بعد عرض إيرديم، اخترت هذا الفستان ما أدري جمب سوت أعتقد بنشوفها على الريدكاربيت يمكن بوبي دولفين. لورين سكوت كان عرضها بتأثير آسيوي شرقي واضح، أحس بنشوف هذا اللبس على الريدكاربيت (أعتقد معدل) يمكن على نيكول كيدمان، لأن لورين سكوت هي ستايلست نيكول. 

من اليمين: تمبرلي لندن، بيتير بلوتو، ماريوس شواب و كريستوفر كاين

تمبرلي لندن له حضور مو قليل على الريد كاربيت، كانت بهذي المجموعة فيه أكثر من لبس عليها طبعات الحيوانات هذي، حبيت إنها حاطتها هنا مع طبعات زهور، أتمنى أشوف كيري واشنطون بهذا اللبس من بيتير بلوتو، أعتقد بنشوف ملابسهم أكثر خصوصا مع تعاونهم مع تارقيت (قصدي يمكن بحفلة إطلاق المجموعة). الفستان اللي من كريستفور باختصار لو ما شفت أحد لابسه بأموت، لأنهم أغبياء يشوفون فستان زي كذا و الأغلب أنهم يقدرون عليه، و لا يلبسونه (قصدي السلبيرتي). 

إذا كنتوا تابعتوا عروض لندن، وش أكثر شيء عجبكم؟ 

Sparks

نرجع مرة ثانية لموضات الخريف و الشتاء الجايين 2012. طبعا لما أجيب الموضات مو شرط معناها أنه لازم كل موسم يصير لنا شكل جديد، الفكرة الأهم إن هذي الموضات اللي تطلع كل موسم، تكون جزء من طريقتنا باللبس مو كأننا منيكان يلبس و يفسخ من دون ما يكون له هو شكل أو بصمة على اللبس (على الأقل هذا الشيء اللي أعتقده)، يعني مو شرط كل موضة تعجبني، أو لازم ألبسها. هذا ما يعني إن الموضة اللي باكتب عنها اليوم ما تعجبني، بس كلام بغيت أقوله :)

أعتقد هذا الموسم ما فيه مجموعة ما حطت شيء يلمع. الشيء الحلو بالأشياء اللي تلمع ترتر أو أي شيء ثاني يسوي نفس التأثير، إنها بسهولة تحول لبس عادي، يعني لو حتى كان جينز لشيء يصلح حفلات أو سهرات. و أهم شيء أنه ما أعرف ليه أحس أنه "ينعش" اللبس. زي كل مرة أعتقد إننا بنشوف أشياء تلمع كثيرة بالهاي ستريت، و أعتقد بيكون فيه ملابس كثيرة بأسعار معقولة، تصلح سهرات و حفلات (أحس توب شوب و ريفير أيلاند بيطلعون أشياء حلوة).