بصراحة باستثناء ماري كاترونتزو (تكلمت عنها تحت) ما فيه أحد بأسبوع لندن أثارني، ما أعرف ليه كنت أنتظر شيء مختلف، اللي شفته كأنها مجموعات، تكملة لمجموعات قديمة، مو شينة، بس ما فيه جديد. من دون ما أطول بالكلام، هنا أحسن الملابس بالنسبة لي من أسبوع لندن، و بعض الأشياء اللي شفتها فيه.
- على عكس مصممين نيويورك اللي تقريبا كلهم تجاهلوا الطبعات، أكثر مصممين لندن، إلى الآن ملابسهم كلها طبعات ما عادا مصمم أو اثنين (منهم ماري اللي كانت هي ملكة الطبعات).
- كان فيه أسود كثير، و أحمر و درجاته، الرمادي و الرصاصي كان موجود بس مو بكثرة عروض نيويورك
أول شيء أعرف إن اللبس الأول اللي على اليمين من هاوس أوف هولاند ما راح أحد يلبسه، لكن حبيته، و بغيت أحطه. من المجموعات اللي أعتقد إنها كانت مختلفة مجموعة ماثيو ويليمسون، خصوصا الجزء الأخير منها، حسيت كأنها فيقاس، أعجبني لبسين جمب سوت لبستها اليوم إيلي قولدنق و لا عجبتني عليها، لكن الثاني الفستان الأسود القصير، كتف واحد و فرو أحمر و أزرق، أحسه بيكون حلو على سيينا ميلر. فستان بيتر بلوتو (فوق الثاني من اليسار) أتمنى أشوفه على جينفير كونلي، مع أني عارفة إنها ما راح تلبسه.
الفستان الباذنجاني اللي من أنتطونيو بيراردي، يمكنه أقل واحد مفضل عندي، لكن أعتقد إلى تسعين بالمية فيه أحد راح يلبسع للريدكاربيت، يمكن قوينث بالترو.
اللبس اللي من كريستوفر كاين، ودي أشوفه على كايت بوسورث أو آن هاثواي، مع إني ما أعرف إذا هي ناوية تطلع بمناسبات أو لا. اللبس الأحمر من توم فورد أعرف أنه ما راح يعجب كثيرين، لكنه أعجبني كثير، ودي أشوفه على أحد عنده ستايل زي بوبي دوليفان أو وحدة مرة حلوة زي أجاك دينج.
وش أعجبكم أنتم من عروض لندن، وش تنتظرون من ميلانو اليوم؟
