Red Carpet Worthy: London Edition| F.W 2014

بصراحة باستثناء ماري كاترونتزو (تكلمت عنها تحت) ما فيه أحد بأسبوع لندن أثارني، ما أعرف ليه كنت أنتظر شيء مختلف، اللي شفته كأنها مجموعات، تكملة لمجموعات قديمة، مو شينة، بس ما فيه جديد. من دون ما أطول بالكلام، هنا أحسن الملابس بالنسبة لي من أسبوع لندن، و بعض الأشياء اللي شفتها فيه. 

• على عكس مصممين نيويورك اللي تقريبا كلهم تجاهلوا الطبعات، أكثر مصممين لندن، إلى الآن ملابسهم كلها طبعات ما عادا مصمم أو اثنين (منهم ماري اللي كانت هي ملكة الطبعات). 
• كان فيه أسود كثير، و أحمر و درجاته، الرمادي و الرصاصي كان موجود بس مو بكثرة عروض نيويورك

أول شيء أعرف إن اللبس الأول اللي على اليمين من هاوس أوف هولاند ما راح أحد يلبسه، لكن حبيته، و بغيت أحطه. من المجموعات اللي أعتقد إنها كانت مختلفة مجموعة ماثيو ويليمسون، خصوصا الجزء الأخير منها، حسيت كأنها فيقاس، أعجبني لبسين جمب سوت لبستها اليوم إيلي قولدنق و لا عجبتني عليها، لكن الثاني الفستان الأسود القصير، كتف واحد و فرو أحمر و أزرق، أحسه بيكون حلو على سيينا ميلر. فستان بيتر بلوتو (فوق الثاني من اليسار) أتمنى أشوفه على جينفير كونلي، مع أني عارفة إنها ما راح تلبسه. 

الفستان الباذنجاني اللي من أنتطونيو بيراردي، يمكنه أقل واحد مفضل عندي، لكن أعتقد إلى تسعين بالمية فيه أحد راح يلبسع للريدكاربيت، يمكن قوينث بالترو. 

اللبس اللي من كريستوفر كاين، ودي أشوفه على كايت بوسورث أو آن هاثواي، مع إني ما أعرف إذا هي ناوية تطلع بمناسبات أو لا. اللبس الأحمر من توم فورد أعرف أنه ما راح يعجب كثيرين، لكنه أعجبني كثير، ودي أشوفه على أحد عنده ستايل زي بوبي دوليفان أو وحدة مرة حلوة زي أجاك دينج. 

وش أعجبكم أنتم من عروض لندن، وش تنتظرون من ميلانو اليوم؟ 

Once Again It's Meadham Kirchhoff

أعترف إني إلى الآن أحاول أفهم هذا الموسم، ما أقول أنه سيء، بس ما أعرف وش الفكرة اللي قايمة عليه أكثر المجموعات. أحاول أطلع معنى للموسم لحد الآن مو لاقية أي شيء :( مرة عاشرة يجي عرض ميديم كيرشوف و يخليني أنسى باقي العروض، و أفكر ليه يسوون أشياء حلوة و أنا فقيرة، و أعرف إنه ما فيه أحد راح يسوي شيء يشبه له؟!!. 

بالعادة أختار من 3 إلى 4 من "اللوكز" اللي بالعرض، هذي المرة قررت إني ما راح أحط هنا إلا هذا اللوك و أعتقد أنه يكفي، على الأقل بالنسبة لي، لو ما مشت إلا هذي العارضة بكل العرض كان قلت أنه أحلى عرض شفته بحياتي. هذا ما يعني إن الباقي مو حلو، لكني مفتونة بهذا اللوك. من السويتر الخفيف اللي عليه مطرز yes، للون التنورة، و شكلها، للشريطة اللي كأنها الحزام، و حتى البنطلون اللي تحت التنورة. ما أعرف وش أقول أعرف إني جالسة أوصف الصورة اللي قدامكم، لكن للأسف أحس لساني معقود. ما راح أطول عليكم بالكلام الفاضي، هنا تلقون باقي المجموعة. 

Celebrating Girlhood

أحب الهدايا، أكيد أحب تجيني، و أحب أعطيها (لو كان عندي فلوس:). أصعب شيء ممكن أسويه إني أعطي بنت "مراهقة" هدية، ما عمري عرفت وش ممكن يملأ عينهم ... (أختي وحده منهم). لكن الشيء اللي يسهل هذي المرة إني أعطي هدية لمراهقة، أنه الموضة هذا الصيف كلها تقريبا عن كل شيء بناتي. 

(كبروا الصورة، علشان تشوفون أسعار الأشياء)

أول شيء حاولت إني أخلي كل الأشياء ما تتجاوز 500 ريال، الشيء الثاني أخترت أشياء (زي جوسي كتور)، يمكن من قرن ما دخلتها أو فكرت أشتري شيء منها، لأني فيه شيء بالنسبة لي يحسسني إنه شوي تجاري (ما عليكم هذا شعوري الخاص)، لكن اليوم دخلته، و شفت عنده مجموعة تعليقات عجبني بعضها مرة، هي اللي خلتني أتحمس عن كتابة موضوع عن هدايا للمراهقات، خصوصا أنه جوسي تقريبا حلم كل بنت سعودية (هذي اللي أعرفه من اللي حولي :). 

الشيء الثاني اللي كان شاغلني من فترة هي بيلت فيها مكياج يصلح لبنات ما بين (16- 20)، شيء ممكن يكون فيه كل شيء، لو كنت أنا راح أصمم بليت، ممكن أحط فيها عينات من أرواج من رافيلون، ماسكارا من ماكس فاكتور و كحل من كليرز (طبعا كل اللي أخترتها ماركات رخيصة علشان يصير سعرها مقبول، و ممكن كثير يشرون منه كهدية، أو لهم)، المشكلة إني ما لقيت شيء زي كذا، كل الأشياء اللي لقيتها ما تناسب، و أكثر الباليتات اللي شفتها كانت للظل، قليل شيء فيه أرواج، و زين. لكن آخر شيء حصلت هذي الباليت من بوبي بروان فيها روج بدرجتين وردية مختلفات، قلوس، و ألوان محايدة و مافيها لمعة للظل. 

أخترت مناكير من رافيلون غير لأنه رخيص عاجبتني كثير ألوان مانكيرهم و شكلها النهائي، و خصوصا ألوان الباستيل (تلقونها بالستاند حقهم) منها هذا الأخضر الفستقي. 

باقي الأشياء أخترت التي من توب شوب تصميم ميديم كيرشوف بمناسبة 10 سنوات من تعاون توب شوب مع مصممين بريطانيين، لأنه عاجبني مرة، و أتمنى لو كان موجود علشان أشتريه. الطوق لأنه عجبني حسيته يصلح حفلات، و لأنه كان بكثير من العروض، و أكثر من سلبرتي لبسته على الريد كاربيت، و آخر شيء هذا الغطاء لأنه الحين أظن تقريبا ما فيه بيت إلا عندهم شيء من مجموعة أبل (أيبود/آيفون/آيباد)، قد طلبت من الموقع و صلني غطاء بلاستيكي، طبعاته مرة حلوة، و لا راحت، مع إني شاريته أكثر من 3 شهور. 

مو شرط تشترون نفس الأشياء، بس إن شاء الله أكون أعطيتكم فكرة، عن وش ممكن تشترون لبنت عندكم تبغون تعطونها هدية، أو حتى لو تبغين تعطين نفسك. 

RED

نرجع مرة ثانية لأهم موضات الشتاء اللي جايي ... من أكثر الثيمات اللي استخدمت لعروض شتاء 2012 كانت (الظلام، السواد، القتامة) أي معنى مقابل لكلمة dark بالإنجليزي. الظلامية أو القتامة ما كانت بس بالألوان، لكن حتى بشكل الملابس نفسها، أكثر من عرض كان مستوحى من العصر الباروكي و القوطي. مع ذلك كان فيه بكثير من العروض اللون الأحمر القاني. ما أعرف السبب الثورات العربية، أو أيش، لكن اللون الأحمر بيكون كثير للشتاء الجاي. 

علشان أكون صريحة، ما قد حسيت بالراحة باللون الأحمر، فأنا لا سوداء و لا بيضاء علشان أحس إن اللون يعطني شيء، كل اللي أحسه إني أزيد صفار :S ... يمكن لأنه لون قوي أخاف منه، لكني أحب كثير الإكسسوارت الحمراء (شنط، جزم، مجوهرات). أعرف إننا بنشوف كثير السنة هذي على الريد كاربيت هذا اللون، لكن الشيء اللي مو متأكدة منه، لو تحولت هذي الموضة للهاي ستريت كيف ممكن ألبس "حمار" بهذي الكمية، من دون ما أحس أنه بيغطي علي و لا يشوف الناس مني إلا شيء أحمر يتحرك. 

كيفكم مع اللون  الأحمر؟ ممكن أو قد لبستي شيء أحمر بالكامل و حسيتي أنه عطاك ما غطى عليك؟

Meadham Kichhoff: Back to School

اليوم خلص إسبوعين من الدراسة، و أمس خلص إسبوع لندن للموضة، قبل أمس كان فيه عرض لماركة أحبها مرة، صح غريبة مرة، لكن هذا ما يعطي تبرير أنه الناس ما تعطيها وجه :). 

قبل أمس كان عرض ميديم كيرشوف مع مجموعة ثانية من المصممين البريطانيين. أكثر شيء أحبه ببريطانيا أنه المصممين حقينها أشوفهم أكثر مصممين ما عندهم حدود تحدهم، أي شيء يجي على بالهم يسوونه. 

اللي أحبه بميديم كيرشوف إنهم حوسة، يسوون كل شيء بالطريقة اللي تعجبهم، بالشكل اللي يعجبهم، و الأهم أنه يسوونه بشكل طفولي. العرض أول ماشفته صور انتبهت للقسم الأخير من املابس، اللي أنا حاطة صور منه، عجبتني هذي القطع اللي فيها من الميدإيفل، حسيت بشيء يشبه فيلم ماري إنتطوانيت (لو ما شفتوا الفيلم شوفوه يفرح)، بعدين شفت العرض كامل، بعدين شفت فيديو للعرض. الشيء اللي حسيته كأنه عرض مدرسة، حوسة، الديكور أي كلام (بلونات، و زينات تلمع) حتى العرض منفصلين قسمين، تقسمهم فقرات كأنها فقرات مدرسية (أول شيء نساء يرقصون بقمصان ستان، ثم بنات صغيرات يرقصون باليه). 

الشيء اللي يعطني إحساس أكبر إن مصممين ميديم كيرشوف كانوا يفكرون بالمدرسة فيه كرديقان بالجزء الأول من العرض، مفتوح فتحتين عند الصدر، شفت هذي الصورة بتمبلر، وحده حاطة صورة الكارديقان، و لقطة لريتشيل ماك آدمز بمين قيرلز (دايم يجي على mbc 4) :). 

عروض ميلانو بدأت اليوم مع قوتشي، أحس بتكون العروض آلة زمن بين العشرينات و الستينات و السبعينات و الخمسينات ... :) 

Meadham Kirchhoff x Topshop

تعرفون إني أحب توب شوب، بس من رداة الحظ لا محلاتهم هنا حلوة، و لا موقعهم يوصل للسعودية. لكن نشر العلم واجب على كل مسلم و مسلمة P:.
مو كثير توب شوب يسوون تعاون مع مصممين كبار، أتذكر آخر مرة (و يمكني غلطانة) توب شوب مع كريستوفير كين، لما طلعوا بالتيشيرت اللي عليها فم دايناصور، و أعتقد كل بنات و عيال العالم شروه، إلا الموجودين هنا.

اليوم وصلني إيميل من توب شوب، (اللي مصرين يرسلون لي إيميلات، و هو الإيميل الوحيد اللي أنتظره منهم، هو أنهم صاروا يوصلون للسعودية).

المهم بالإيميل وصلني من توب شوب أنه ميديم كيرشوف مسوين كم قطعة لتوب شوب.
الماركة هذي من أكث الماركات البريطانية اللي أحب أشوفها، عروضهم كأنها مهرجان، أو حفلة، ألوان كثيرة، ملابس غريبة، و لا يخافون من موضوع أنه ملابسهم شكلها "كوستم" أكثر من إنها ملابس ممكن تنلبس لأي مناسبة.

قلت لكم أحب عروضهم، فيها حياة كثير، الصورة اللي على اليمين من عرض ربيع 2011، اللي كان فيه ألوان و طبعات كثيرة. المجوعة حلوة مرة تستاهل أنكم، ترجوعون و تلقون عليها نظرة.

المهم نرجع لتعاونهم مع توب شوب، لما شيكت على الموقع، القطع مو كثيرة أظن إنها ما تزيد على ثمانية، بس حلوة، و فيها روح ميديم كيرشوف، يعني من أول نظرة بتخمن أنه هذا  اللبس يشبه لهم كثير.

بشكل عام الأسعار متفاوته مرة من قطعة لقطعة، يعني زي ما تشوفون الشراب سعره فوق 100 ريال، التنورة فوق 200 ريال و التوب أو الفستان هذا طاير فوووق و سعره واصل لـ 1000 ريال.
ما أظن أنه راح ياصل السعودية شيء من هذي المجموعة، و زي ما قلت لكم موقعهم ما يوصل للسعودية، بس إذا كنتوا برا السعودية، و ممكن تاصلكم الأغراض من توب شوب، و عاجبتكم القطع اللي من هذي المجموعة حقت توب شوب ميديم كيرشوف، تلقون القطع اللي حطيتها و باقي القطع كلها هنا.