Prada + Christopher Kane = Mary Katrantzou Fall '15

أمس كان فيه عرض ماري كاترونتزو، بس قررت إني أأجل الكتابة عنه لبعد الأوسكار علشان ينشاف، و أهم شيء علشان أشوف العرض و أنا مركزه. لأني شفت صور للعرض متفرقة، و حسيت أنه عرض يستحق الكتابة عنه. و لما شفته كان فعلا يستاهل الواحد يتكلم عنه. 

من موسمين و ماري تطلع عن الخط اللي عرفها أكثر الناس فيه، و هو الملابس المطبعة، واضح إنها الحين جالسة تجرب بتصاميم و تقنيات جديدة، زي التطريز اللي من بلاستيك (على ما أظن) باللبس الأول من اليمين. أعجبتني الملابس، مع إني حسيت كأنها لو كريستوفر كاين، اشتغل مع برادا، هذي النتيجة اللي بتصير، أصلا خطوط الملابس الثلاثة الأولى، أحس إنها تشبه كثير وحدة من مجموعات برادا قبل كم موسم (بس عجزه أدور عليها الحين)، المهم النتيجة كانت حلوة من وجهة نظري. 

ودي أشوف ديان كروقر بالفستان الأخير (يسار) . أحس ريتا أورا ممكن تلبس البالطو (الثاني من اليمين)، و متحمسة أشوف الفستانين الباقيات على الريد كاربيت. 

New Direction?

إلى الآن ما أعتقد إن الشيء اللي يقدمه أسبوع لندن مثير، على الأقل مقارنة بالمواسم اللي فاتت، و حتى بأسبوع نيويورك. أكثر شيء أثارني لحد الآن هي مجموعة ماري كاترنزو. هذي المرة أعتقد إن المجموعة كانت أبعد ما تكون عن ماري كاترنتزو، ما يعني أنه ماري بالعادة سيئة، بس أعجبني إنها حاولت تغير عن موضوع الطباعة، و الملابس اللي كأنها ورق مقوى. 

ما أعرف عنكم أنتم، يكمني أتوهم، بس حسيت المجموعة فيها من نفس مجموعة فالنتينو الأخيرة لربيع 2014، للي ما يتذكر المجموعة كانت فيها تأثيرات يونانية (تلقونها هنا)، و معلومة صغيرة هنا، ماري أصلها يوناني، فيمكن كلامي صحيح، و أكيد يمكن يكون وهم، و لا له شغل بفالنتينو، بس يمكن لها شغل باليونان (ما شفت المود بورد، و لا قريت عن المجموعة بأي مكان). أعجبتني التنورة اللي نصها أحمر/عنابي و نصها ترتر فضي، لكن أكثر لبسين عجبوني الفستانين اللي على الطرف (ودي أشوف اللي على اليسار على دايان كروقر). صراحة تحمست أشوف وش راح تسوي بعدين، و كيف بيصير شكل الماركة. 

Made for the Red Carpet

ما أعرف إذا عرض مارك جايكوب هو اللي حمسني أكثر للعروض، أو إن لندن عندها شيء مختلف خلاني أكتب بحماس غير المرات اللي فاتت (مو ما كان لي خلق، بس ما كنت متحمسة مرة).  المهم بعد عرض أشيش (التدوينة اللي قبل هذي) صراحة ما توقعت إني أتحمس لشيء ثاني. لكن ماري كاترنتزو للأسف خلتني أتحمس من جديد P:. 

على عكس عرض أشيش (اللي كأنه ملابس شارع) ماري كاترنتزو باعتقادي إنها مصممة هذي المجموعة و ببالها شيء واحد "الريد كاربيت". أعتقد إننا بنشوف قطع مرة كثيرة من المجموعة على الريد كاربيت. كل الاختيارات اللي حطيتها أتمنى أشوفها برا الرانواي، و لا أتشرط من ودي يلبسها، بس أكثر قطعتين ودي أشوفهم هم الفستان الوردي اللي بالوسط، و الفستان الأصفر اللي يسار تحت. غير أشكالهم و ألوانهم، عجبني مرة الشك اللي عليها، أحس على أنه موجود على كل الفستان، بس بنفس الوقت ما أحس الفستان ثقيل (لو قوسيب قيرل لسا موجود، أظن ممكن يخلونه فستان تلبسه سيينا علشان تروح تتقهوى مع بلير بستار بكس). 

Best Dressed: January 2013

وصلنا لنهاية أول شهر من 2013 أعرف إني السنة اللي فاتت ما وصلت معاكم للنهاية، بس إن شاء الله هذي السنة بانزل لكل الشهور، و باسوي الشيء اللي كنت ناوية أسويه السنة اللي فاتت، و هو إني أحط كل الإثناعشر الفايزين بأحسن لبس للشهر، لوحدة كبيرة لأحسن لبس للسنة. 

الشيء الثاني بأحاول مو بس أتكلم عن الإختيارات، ودي أسوي تقرير بسيط عن أهم الموضات للشهر اللي أخترت منه هذي الملابس. 

زي دايم كبروا الصورة علشان تشوفون الأشياء أوضح

أقدر أختصر الموسم هذا ربيع/صيف 2013 أنه بيكون مربعات لوي فيتون. أعتقد إننا بس خلصنا الشهر الأول و أظن كل لوك من المجموعة لبسوه السلبرتيز ... أول من لبسه كريستين ستيوارت آخر السنة اللي فاتت. حبيت شكلها فيه مره (لكن هذا مو هدفنا)  من مجموعة السلبرتي اللي لبسوا من المجموعة هذا الشهر (أقدر أقول أنهم أكثر من عشرة من دون ما أعد) أعجبني شكل كيرستين دونست (ما يعني أنه الباقين ما كانت أشكالهم حلوه). لكن تعرفون مكانة كريستين بقلبي (أعتقد إننا بنشوف نسخ كثيرة من هذي المجموعة عند ماركات الهاي ستريت (زارا و إتش آن إم). 

الشهر اللي فات أقدر أقول أنه شهر كيري واشنطن، كيري كانت تروج لفيلم جينقو آنشيند و أعتقد إنها كانت موفقة بكل لوك تقريبا (بعد لبست من لوي فيتون، بس ما عجبتني الربطة اللي على راسها حسيتها شوي طفولية) أخترت هذا الفستان من جيلز اللي عليه طبعة حصان لأني أعتقد أنه خيار جريء (صراحة كل اختياراتها كانت مميزة). 

من الاختيارات الجريئة (برأيي) اختيار أيمي بولير إنها تلبس بدلة لريدكاربيت حفل زي قولدين قلوب، حبيت خيارها، و حبيت إنها ما خلت اللوك رجالي مرة، لما لبست هذا العقد الألماس.

اللوك اللي كان لازم يدخل بالنسبة لي هو لبس ساره جيسيكا باركر بفستان من ماري كاترنتزو و بالطو من جامباتيستا فالي كتور. حبيت شكلها مرة، ذكرني بلبس لها ب SATC الفيلم الأول بس أحس هذا نسخة مطورة و محسنة منه. 

كايت مارا بديور أصفر و بيكسي جيلدوف بهيوقو بوس وردي، كلهم طالعات بلوك مره نظيف (أحس أنه النوعية هذي من الملابس بتكثر مع راف سيمنز كمصمم لديور) الشيء اللي حبيته بلوك بيكسي غير أنه مره نظيف، أختيارها للجزمة. الجزمة هولوقرام (الشيء اللي يلمع) فيه عند ستيلا تشبه لها، بس هي لابسة وحدة من هيوقو بوس بعد (بالمناسبة الخامة هذا كان بأكثر من عرض، علشان كذا أعتقد بنشوف نسخ بالهاي ستريت (إتش آند إم، توب شوب) .

من أحسن لبس لشهر يناير 2013؟

Clash of Prints

من فترة طويلة ما حسيت إني شفت إيديتوريال مفيد، يعني فيه صور و أفكار حلوة، بس ما فيه أفكار حلوة للملابس، كل اللي أشوفه ملابس نفسها تنعاد بخلفيات مختلفة.

قبل أسبوع تقريبا شفت سكان، ما كان مرة واضح لإيديتوريال من عدد فوق يو إس لشهر مارس الجاي. عجبني مرة الإيديتوريال. مو لأن الصور فيه حلوة، لكن حبيت الملابس فيه مرة. ما أعرف كم مرة قلت فترة عروض ملابس صيف 2012 بسبتمبر اللي فات، إن الطبعات كانت موجودة بكل مكان، بكل الأشكال، و الأحجام و الألوان. لكن ما جاببالي أنه ممكن أحد يلبس طبعات بهذي الكثرة و إنها ممكن تطلع حلوة. حبيت كيف منسقين الملابس بهذا الإيديتوريال، خصوصا بهذي الصورتين (تلقون باقي الإيديتوريال هنا). عجبني مرة شكل كارا دوليفين بهذي البدلة من مجموعة ربيع 2012 ماري كاترنتزو. أكثر شيء عجبني بالإيدتوريال هذا كأنه يقولك خلط كل الطبعات اللي عندك مع بعض و لا تخافين إنها بتكون مبالغة، أو بتصير غلط على بعض.

الإيديتوريال مليان طبعات من كل الألوان كل شيء مخلط مع كل شيء، أعجبتني الألوان الصارخة (زي اللي على كارا مرة ثانية). و عجبتني الألوان الفاتحة مرة زي اللي على كارا (تحت)، و على سن فيفي (يمين تحت)، و طبعا التيور اللي بعده اللي من دريس فان نوتين (قد تكلمت لكم عنه قبل). من أحسن القطع بكل الإيديتوريال بالنسبة لي كانت الكعب الإيرديم، اللي لابستها العارضات (تحت). 

ما أعرف مين يقدر يلبس كل هذي الطبعات و يطلع شكله حلو و لا هو مكركب (غير الموديلز طبعا :)، يعني أحس أنه شيء ماله قوانين يعتمد على حدسك أنت، لكن يمكن الشيء الوحيد اللي أعتقد أنه لازم لازم تسوينه لو لبست لبس كله طبعات، أنه شعرك و مكياجك يكون أبسط شيء ممكن تسوينه، أو بيصير شكلك شوي مهرج D: 

 شرايكم بلبس طبعات على طبعات؟

RED

نرجع مرة ثانية لأهم موضات الشتاء اللي جايي ... من أكثر الثيمات اللي استخدمت لعروض شتاء 2012 كانت (الظلام، السواد، القتامة) أي معنى مقابل لكلمة dark بالإنجليزي. الظلامية أو القتامة ما كانت بس بالألوان، لكن حتى بشكل الملابس نفسها، أكثر من عرض كان مستوحى من العصر الباروكي و القوطي. مع ذلك كان فيه بكثير من العروض اللون الأحمر القاني. ما أعرف السبب الثورات العربية، أو أيش، لكن اللون الأحمر بيكون كثير للشتاء الجاي. 

علشان أكون صريحة، ما قد حسيت بالراحة باللون الأحمر، فأنا لا سوداء و لا بيضاء علشان أحس إن اللون يعطني شيء، كل اللي أحسه إني أزيد صفار :S ... يمكن لأنه لون قوي أخاف منه، لكني أحب كثير الإكسسوارت الحمراء (شنط، جزم، مجوهرات). أعرف إننا بنشوف كثير السنة هذي على الريد كاربيت هذا اللون، لكن الشيء اللي مو متأكدة منه، لو تحولت هذي الموضة للهاي ستريت كيف ممكن ألبس "حمار" بهذي الكمية، من دون ما أحس أنه بيغطي علي و لا يشوف الناس مني إلا شيء أحمر يتحرك. 

كيفكم مع اللون  الأحمر؟ ممكن أو قد لبستي شيء أحمر بالكامل و حسيتي أنه عطاك ما غطى عليك؟