Best Dressed: June 2014

قلت لكم ما أعتقد إن الشهر اللي فات كان فيه خيارات كثيرة، بس أعتقد الخيارات اللي بقت مو سيئة، أصلا المناسبات ما كانت كثيرة. أنجلينا جولي و إيل فانينق إلى الآن يروجون لميلافسينت، بس بشكل عام ما كان فيه مناسبات مهمة أو كبيرة، أو بالأصح لبس مميز (على الأقل من وجهة نظري). 

ببدأ من المفضلة عندي لهذا الشهر على طول، أليكسا شونق بهذا التيور الأحمر (أظن مخمل) من سان لوران، صحيح التيور حلو، و أنيق، و تسريحة أليكسا عاجبتني مرة إنها بسيطة، بس أكثر شيء حبيته هو الفلات اللي لابستها، أظنها من تيبيثا سايمونز. السنة اللي فاتت كان ديور تقريبا موجود بكل شهر، هذي السنة، أظن هذي المرة الأولى اللي فيه لبس لديور، كانديس سوانبيل بهذا الفستان الأسود من ديور، أعجبني شكله الرياضي بهذي الخيوط على جمب، و أعجبني إنها سوت شعرها بهذا الشكل.
أعجبني بعد شكل نيكول كيدمان بهذا الفستان اللي من أرشيف دولتشي آن قابانا (أظن من 2008). إكسسوارات سولانج مع هذي البدلة الفوشية أعجبتني مرة، و شعرها مرة حلو. قريتا بزاك بيزون و نيكولا بستيلا مكارتني أشكالهم مرة أنيقة و أعتقد أنه لوك ما يحتاج شغل كثير علشان يضبط.

أنتم وش رأيكم؟

من أحسن لبس لشهر يونيو 2014؟

كانديس سوانبيل بديور

كيري راسل بروزي أسولين

سولانج بقوتشي

نيكولا بلتز بستيلا مكارتني

تيلدا سوينتون بسكيامبرلي كتور

نيكول كيدمان بدولتشي آند قابانا

قريتا جيرويق بزاك بيزون

أليكسا شونق بسان لوران

Poll Maker

Best Dressed: May 2014 Winner

أعرف من زمان ما كتبت هنا، بس الشهر هذا تقريبا كنت مشغولة بس إن شاء الله الشهر الجاي بيكون أحسن، صح و نسيت أقولكم كل عام و أنتم بخير. الشهر هذا أنتم اخترتوا بعد لبس مرة فخم، و أحمر على إن الملابس الحلوة كانت كثيرة، بس أعتقد إن اختياركم كان يستاهل.

 بالميت قالا اللي تقريبا صاره له شهرين (أعرف كأنه السنة اللي فاتت). المهم إن الثيم كان شارلز جايمس (سووا عليه سيرش علشان تعرفون كيف تصاميمه) المهم أعتقد إن الفستان اللي اخترتوه و هو أريزونا ميوز بفستان رالف روسو كتور غير أنه هو من دون فكرة الميت قالا حلو، و مع الفكرة طالع مرة حلو. و للي ما يعرف أريزونا ميوز هي عارضة أمريكية، و وجه لإيستي لاودير. المهم الفستان جدا أنيق السفطة اللي فوق، طريقة نفشة التنورة، و اختياراتها للتسريحة و الإكسسوار أعتقد إنها جدا موفقة.

 بكرا إن شاء الله ترشيحات الشهر الجديد، ما أحس الخيارات سهلة، و أحس إنه قليل الأشياء الزينة بهذا الشهر اللي بيخلص، بس إن شاء الله نطلع بشيء حلو.

Best Dressed: May 2014

ما أعتقد إنه قد صار عندي شهر "أفخم" من هذا الشهر، قصدي طبعا خيارات الملابس، كل اللي صار عندي بالنهاية ملابس سهرة و على إني ما أظن فيه ألوان كثيرة، بس أعتقد الخيارات بالنهاية مختلفة، و تناسب ناس مختلفين. طبعا ما يحتاج أعيد أنه الشهر اللي فات كان الشهر اللي فيه ميت قالا و مهرجان كان، و بريميرات لكم فيلم صيفي.  

صراحة ما قدرت ما أحط إيل فانينق بتصويت هذا الشهر. بالصورة هذي إيل لابسة لجورج حبيقة، إيل و أنجلينا جولي جالسين يروجون لفيلم مالفيسينت، (أظن إني راح أتكلم عنهم بشكل منفصل بعدين). مصمم لبناني ثاني موجود بالقائمة هو جورج شقرا على فان بينق بينق (الثاني من اليسار فوق) ، مشكلتي الوحيد مع اللبس هذا أنه شوي طويل، بس يظل حلو، ما أقدر أتجاهله. بما إننا نتكلم عن الأبيض خلونا نتكلم عن كايت بلانشيت برالف لورين، صراحة هذي المرأة أناقة بشكل إنسان.

مو قلت لكم راح أتكلم عن أكثر من فستان أحمر، هذولا هم٬ أريزونا ميوز برالف آن روسو كتور، و مونيكا بالوتشي بدولتشي آن قابانا آلتا مودا.
ما يحتاج أتكلم عن نتاشا پولي، لأني قد تكلمت عن هذي المرأة و كيف إنها صدق عارضة، الصورة يمكن مو واضحة، بس كبروها للتفاصيل.

من أحسن لبس لشهر مايو 2014؟

إيل فانينق بجورج حبيقة

أريزونا ميوز برالف آن روسو كتور

فان بينق بينق بجورج شفرا

نايومي كامبل بأليكساندير ماكوين

كايت بلانشيت برالف لورين

نتاشا بولي بفيونيه كتور

أنجلينا جولي بأتلييه ڤيرساتشي

مونيكا بالوتشي بدولتشي آن قابانا ألتا مودا

Poll Maker

Best Dressed: April 2014 Winner

الشهر اللي فات، أقل شهر كنت متابعة فيه نتائج التصويت أول بأول، أظن إني انشغلت بكل هذي المناسبات اللي جالسة تصير من مت قالا، لمهرجان كان و الحفلات اللي فيه. الشيء اللي ماتوقعته لما جيت أشيك، الاختيار اللي اخترتوه لأحسن لبس، مو لأنه مو أحسن لبس بس لأني توقعت أنه لبس ما يعجب كثير، مرة ثانية يوضح إني اخطيت بتوقعي. 

إيما ستون بأتلييه ڤيرساتشي، أعترف إني مو مرة مع تصاميم ڤيرساتشي أو أتلييه ڤيرساتشي (المجموعة) لكن أعتقد إن دونتيلا تسوي فساتين كستم مايد مرة حلوة، و بعيدة عن الشكل المعتاد لملابس ڤيرساتشي، للي كلها فتحات و فيها إثارة مو دايم و مو على كل الناس تعجبني. 

بهذا اللبس، أعتقد اللون و التصميم كلهم مرة حلوات، أعجبني تنسيق إيما للبس مع الريترو وايفز، و الروج الأحمر الفوشي، أعتقد أنه هذا واحد من الملابس الكلاسيكية اللي دايم تكون حلوة. 

اللون الأصفر ما يلبس كثير ريد كاربيت (و لا أعتقد أنه لون سهل)، بس أكثر من مرة لما يلبس أعتقد أنه يطلع مرة حلو. 

انتظروا بكرا إن شاء الله أحسن لبس لشهر مايو. الخيارات كثيرة، بس أعتقد إني وصلت لفكرة عن إيش يستحق يدخل التصويت. 

Best Dressed: April 2014

الشهر هذا زي ما قلت بنهاية التدوينة اللي فاتت يمكن الخيارات مو مثيرة أو فخمة زي الشهرين اللي فاتوا، لكن فيه شوي حيوية، و ألوان حلوة، مع أنه كثار لبسوا أسود هذا الشهر، على عكس شهر مارس، لما قلت لكم كثار لابسين أبيض، ما علينا، خلونا نبدأ بالملابس.

كان فيه أسود، و كان بعد فيه درجات الأحمر زي ما أنتم شايفين. للي قروا الموضوعين اللي كتبتهم ريم عن كوتشيلا (هنا و هنا) يمكن قروا ردي، و عرفوا رأيي بالملابس بالمهرجان، بس أنا ما عندي مشكلة مع البوهو، لكن بالنسبة لي يلبسه اللي دايم يلبسه زي نيكول ريتشي، سيينا ميلر و كايت موس، أعرف أنه لبس كايت موس هذا ما يعتبر بوهو بمقاييس كوشيلا، بس بنظري، كذا أعتقد المفروض تكون أناقة البوهو، مو كأنه تهريج. أنجليزية ثانية سوكي واترهاوس بماركة من إنجليزية ثالثة (ڤيكتوريا بيكام) عجبني مرة شكلها، عجبني شعرها، و مكياجها، و أكيد جزمها، الشيء الوحيد اللي مو مرة عاجبني الشنطة السوداء. 

أيما ستون بفستان أصفر من أتلييه ڤيرساتشي، إما الوقت هذا جالسة تروج لفيلم Amazing Spiderman 2 كل الجولة إلى حد الآن شكلها فيه مرة حلو (أعتقد باكتب عنها بشكل منفصل لما تخلص) بس هذا الفستان بالنسبة لي يستاهل يدخل أحسن لبس للشهر. 

آخر شيء باتكلم عنه دو جوان ببرادا (وسط، تحت)، صراحة قليل جدا إني انفتن بجمال وحدة. لا تفهموني غلط العالم مليان نساء جميلات، بس من بعد انفتاني بشكل لوبيتا بنهاية السنة اللي فاتت، السنة هذي، هذي المرأة خلتني ساعات أدور بصورها.

من أحسن لبس لشهر أبريل 2014؟

كايت موس بسان لوران

ديانا أقرون بكوشني إي أوكس

جايمي كينج بفالنتينو

سوكي واترهاوس بفيكتوريا بيكام

إيما ستون بأتلييه فيرساتشي

دو جوان ببرادا

سولانج نولز بأكني ستوديو

ألونا فرانسيس ببلانسياقا

Poll Maker

Best Dressed: March 2014 Winner

المرة اللي فاتت (قصدي شهر مارس) كان فيه تعادل بالتصويتات بين ليلي ألدريج و دايان كروچر، و اخترت أنا ليلي، لأسباب قلتها الشهر اللي فات. هذا الشهر رجعتوا و اخترتوا دايان بلوك مختلف عن لوك الشهر اللي فات، و هذي المرة ما فيه تعادل، فما راح أقدر أختار أحد عليها P:. ما علينا دايان تستاهل لبسها دايم حلو و أنيق. 

بلبس بألوان مونكروم (أبيض و أسود). و لبس شكله عصري، بشوي طعم أربعينات (مع الجاكيت و الحزام). اللبس من مجموعة ثيوري الأخيرة (ثيوري كان اسمه تايسكنز ثيوري لو ما تعرفون أنه الاسم تغير). أعجبني كل شيء بهذا اللوك، من المكياج الأميل للطبيعي، الشعر بسيط، و حتى الجزمة. بالعادة الجزمة البيضاء تكون بايخة، بس مع هذا اللبس طالع شكلها مرة أنيق. 

عاجبني مرة شكلها، أعتقد كذا الواحد المفروض يكون أنيق من دون ما يحوس كثير. و لا يحتاج ألوان و قطع كثيرة. 

انتظروا اختيارات شهر مارس، الملابس مو زي الشهرين اللي فاتوا، بس أعتقد فيه أشياء مميزة. 

Best Dressed: March 2014

الشهر هذا كان مرة صعب، خصوصا مع الأوسكار، و الحملة الترويجية لفيلمين نوح و سبايدر مان. لكن بالأخير، قررت إني ممكن أتكلم عن جينفير كونللي بعدين بحملتها لفيلم نوح بتدوينة منفصلة، لأني صراحة أحس باظلم الناس و باظلمها لكن بالنهاية اخترت لبس واحد بس، أكثر لبس حبيته. ما علينا خلينا نتكلم عن أحسن ملابس هذا الشهر مارس 2014. 

خلونا نبدأ من لوپيتا، لوپيتا موجودة بالقائمة خمسة مرات بالستة شهور الأخير. برأيي كل مرة شكلها مختلف، هذي المرة بمايكل كورس، أحس شكلها كأنه لبس مكتبي/رسمي بتحوير شوي، مع الكروب توب ما أعرف الكت أوت، زيادة اختيارها للجزمة و الشنطة. نفس الشيء أعجبني شكل نايومي واتس بالجمب سوت من إيلي صعب، أعجبني اللون، و أعجبني مكياجها، و تسريحتها. طبعا ما يحتاج أقول شيء عن دايان، كل اللي أقوله، أظن أي مصمم إذا عنده لبس يعتقد ما فيه أحد يقدر يخليه حلو بسهولة، يعطيه دايان كروقر، دايان لابسة من المجموعة الأخيرة لثيوري. مرة عجبني شكل جايمي كينچ بيوليانا سيرچينكو كتور، ما أعرف ليه، انبسط لما أشوف ناس أكثر يلبسون لها، أحس تستاهل إنه تعطى وجه. مرة عاجبني شكل إيما واتسون بجي مانديل، أعجبني شكل ماكرينا قارثيا بألبيرتا فيراتي، أكثر شيء عجبني، اختيارها للحلق البرتقالي أو الأحمر، مع الأخضر، جنيفير كونللي لابسة أوت كتور من جيفنشي أعتقد 2010، و إيمي أدمز باللوك الوحيد اللي اخترته من الأوسكار بچوتشي بريمير، عجبني مرة شكلها، مرة أنيق و نظيف، و مرة ثانية عجبني اختيارها للون الحلق. 

أحسن لبس لشهر مارس 2014؟

لوبيتا ناينقو بمايكل كورس

نايومي واتس بإيلي صعب

دايان كروقر بثيوري

جايمي كينق بيوليانا سيرقنكو أوت كتور

إيما واتسون بجي مانديل

مكرينا قارثيا بألبيرتا فيراتي

جنيفير كونللي بجيفنشي أوت كتور

إيمي آدمز بقوتشي بريمير

make a poll

Best Dressed: February 2014 Winner

تصويت شهر فبراير كان تعادل بين ليلي ألدريج، و دايان كروقر، كلهم بفساتين بيضاء، بصراحة ودي لو أختارهم كلهم أحسن لبس لهذا الشهر، بس لازم أختار واحد، علشان تسهل عملية التصويت أخر السنة، و يكون فيه 12 لبس بس، عن كل شهر من شهور السنة. 

أخترت ليلي، تعرفون إني قلت إنها هي المفضلة، لكني ما فصلت ليه أشوف إنها هي المفضلة. أولا غير شكل فستانها اللي أعتقد أنه ممرة مميز، و أحس كأنه فستان آلهة بفيلم تاريخي، أعجبني إنه مكياجها و شعرها ما يغطون على شكل المكياج (حتى السموكي آي مو مبالغ فيها). لكن أكثر شيء عجبني هو العقد اللي اختارته للوك أحس كأنه جزء من الفستان، يربطه رابط ما ينشاف (سحري P:) أعرف بالغت، لكني مرة حابة اللوك كامل. 

ترا مرة عاجبني شكل دايان، بس أعتقد هذا أميز، هذا كل شيء، غير أنه ليلي لابسة لمصمم/ مصممة جديدة، و دايان لابسة لإيلي صعب، تعرفون أحب أحط عن المصممين الجدد.

بكرا إن شاء الله باحط أحسن لبس لشهر مارس، أحس إني مرة محتارة خصوصا مع ملابس الأوسكار وش أدخل و ش أطلع، بس انتظروا بكرا، أكيد لازم أتخذ قرار. 

Best Dressed: February 2014

لشهر فبراير صراحة ما أتذكر إني شفت قد هالكمية من الملابس الحلوة، حتى مع كمية الملابس و المناسبات ما بغيت أختار أكثر من 8، بنفس الوقت حاولت زي دايم أنوع بأشكال و ستايل الملابس اللي أخترتها لكم من الشهر اللي فات. مع أنه أكثر الموجودين (مصممين و نساء) قد تكلمت عنهم هنا، بس مع ذلك مبسوطة أنه أكثر من اسم جداد على قائمة أحسن لبس.

صراحة المفضل عندي هو الفستان الأول من اليمين فوق، ليلي ألدريج بروزي أسولين، أحس من زمان ما شفت فستان مختلف، و هذا بالنسبة لي الفستان المختلف اللي كنت أنتظر أشوفه على الريد كاربيت. اللون الأبيض كان كثير على الريد كاربيت الشهر اللي فات (فبراير) و ديان كروقر طلعت بفستان ثاني أبيض حلو من إيلي صعب، الفستان حلو، بس أعتقد إن ديان سوت ثلاثة أرباع الشغل بشعرها و مكياجها (بذات الروج الأحمر). نفس الشيء لوبيتا لبست أبيض من جامباتيستا فالي، أعجبني مرة شكل إيمي روسم (تحت الأول من اليمين) ببنطلون أبيض بعد و توب مشكوك، أعتقد أنه شكلها أنيق من دون تكلف، و أشوف أنه أسهل لوك ممكن "يقلد" من الثمانية، من دون ما يطلع الواحد كأنه قاعد يحاول أنه يصير "كشخة".

ريانا هي الشخص الوحيد اللي يقدر يسوي و يلبس أي لبس ويطلع لابق عليه، ممكن تلبس اليوم جيرزي بايس بول، و بنطلون باقي و بكرا فستان باك ليس و شيفون و لا يطلع كأنها ما تدري وش تسوي، و لا عندها ستايل . عجبني مرة لبس تيلدا بعد بروب بس بطريقة مختلفة عن ريانا، تيلدا و بوبي (الثانية من اليمين الصف الثاني)، بالنسبة لي كذا الواحد يلبس "آندروجين" اللبس اللي مو نسائي و لا رجالي، لبس يصلح للإثنين، يمكن لبس تيلدا يحتاج كاريزما، مع البالطو أو الروب، بس بوبي لبسها سهل، و عرفت كيف تضيف لون مع الجزم الخضراء.

للي يبغى يصوت الأسماء تحت من اليمين لليسار الصف الأول، بعدين من اليمين لليسار بعد الصف الثاني. 

من أحسن لبس لشهر فبراير 2014؟

ليلي ألدريج بروزي أسولين

تيلدا سوينتين بهايدر أكيرمان

ليا سيدو ببراد

لوبيتا نايونقو بجامباتيستا فالي

إيمي روسم بكارلوينا إريرا

بوبي دولفين ببوربري

ديان كروقر بإيلي صعب

ريانا بفينتاج

Poll Maker

Best Dressed: January 2014 Winner

مع كل زحمة أسبوع الموضة بباريس، لازم  ما أنسى موضوع تصويت أحسن لبس لشهر يناير 2014، صحيح إنه من أقل الأشياء اللي أبذل فيها مجهود، حتى الفايز أنتم تختارونه أغلب الوقت، بس أحب أكتب عنها، لأنها تعلمني عن ذوقكم، و الأشياء اللي تحبونها.  أحس معها أقدر أقول تقريبا وش يحب يلبس غيري، بما أنه دايم الموضوع يحدده ذوقي بالمواضيع الثانية. خلونا من الكلام هذا و نتكلم عن أحسن لبس للشهر اللي فات. 

ليا سيدو (للي ما يعرفها إلى الآن، هي ممثلة فرنسية)، هي الوجه لواحد من عطور برادا مو متأكدة أي واحد، بس أظن أنه كاندي، و أتذكر مرة كانت وجه لحملتهم الدعائية، و الفترة الأخيرة صارت وجه للحملة الدعائية لميو ميو، فمو غريبة إنها تلبس ميو ميو و برادا. كل القطعتين من مجموعة ربيع 2014، البالطو الوردي برادا، و الفستان ميو ميو، صح أنه الماركتين مختلفات (أعرف إن المصممة وحدة) بس صراحة أحس أنه لحد الآن، أحسن وحدة لبست لميو ميو و برادا من المجموعة الأخيرة، الألوان كأنه مصنوعة لبعض، الجزمة مرة حلوة، و أهم شيء الشعر و المكياج على أنهم "طبيعيات" بس كانوا أحسن إكسسوار للبس. 

بكرا إن شاء الله راح أحط أحسن لبس لشهر فبراير، و أعتقد إن الخيارات مرة حلوة، أنتظروا. 

Best Dressed: January 2014

وصلنا لنهاية شهر يناير، و أول تصويت لأحسن لبس لهذي السنة، صراحة أنا انبسطت بالموضوع السنة اللي فاتت، ما أعرف عنكم أنتم، صحيح التصويت كان فيه مشاكل، بس لقيت موقع جديد، إن شاء الله يكون أحسن. المهم، خلونا نتكلم بالملابس خصوصا أنه شهر كان مليان بالحفلات و الجوائز. 

أعتقد أنه هذا الشهر على أنه شهر حفلات و جوائز، بس فيه خيارات مختلفة للبس من ناحية الذوق (أظن). تعرفون أني أحب ليا سيدو، لكن صدوقني مو بس لأني أحبها اخترتها، من زمان ما شفت لبس بهذا الذوق، و عندي استعداد انسخه كامل من دون ما أغير فيه شيء، من فترة و أنا أفكر ببالطو وردي أعتقد إنها لبسته بذوق مرة، و خلتني أتحمس للفكرة (يمكن الشتاء الجاي P:). أعجبني مرة شكل آنا فاريس بهذي الجمب سويت من نعيم خان، من زمان ما حسيت إنه فيه جمب سويت طلعت حلوة على الريدكاربيت، بس اختيارها مع لون شعرها و مكياجها عجبني مرة. قلت رأيي لأوليفيا وايلد و لوبيتا بلبسهم بالقولدين قلوب، بس إيديل ما شفت صورها إلا بعد يوم أو كذا، عجبني مرة، خصوصا شكله من فوق (جهة الصدر) و عجبني ظهره (أعرف مو واضح بالصورة)، و بعد عجبني شكل الفستان من تحت. باختصار عجبني كله. 

أدريانا ليما بهذا الفستان الأسود، صح الفترة الأخيرة عجبتني فتحات الصدر العميقة، بس مو هذا الشيء اللي عجبني بشكلها، العقد اللي لابسته أكثر شيء عجبني (شفت شيء يشبه له على كيم كارداشيان) المهم أعتقد أنه هوسي الجديد. آخر شيء أليزابيث بهذي البدلة من آخر مجموعة لأرماني برافي (اللي قبل أسبوع بس) شكلها كله أنيق، بس أكثر شيء عجبني اختيار الجزم، شيء ما أدري زي الشباشب أو ما أعرف وش هو، بس أعجبني. 

من أحسن لبس لشهر يناير 2014؟

ليا سيدو بميوميو و برادا

ساندرا بالوك بأليكس بيري

آنا فاريس بنعيم خان

أوليفيا وايلد بقوتشي بريمير

لوبيتا نيانقو برالف لورين

إيديل إيكساكابوليس بميوميو

أدريانا ليما بجيني كاين

إليزابيث ديبكي بأرمارني برافي

Poll Maker

Best Dressed 2013 Winner

أعرف إني متأخرة عن باقي العالم، و يمكن أنكم ما عاد تهتمون، لكن بهذي الحالة أنا جالسة أقنع نفسي أنه: "أن تأتي متأخرا خيرا من ألا تأتي مطلقا"، أو شيء زي كذا. ما علينا خلونا نتكلم عن التصويت، و اللبس اللي اخترتوه، اسمحوا لي أقول للمرة اللي ما أعرف كم، إني ما توقعت هذا الاختيار، بس زي دايم، أعتقد أنكم اخترتوا لبس أنيق، و يمكنه من أكثر الاختيارات الموجودة "كلاسيكية". 

ترشيحاتكم اختارت نايومي هاريس بأليكساندير ماكوين. صحيح إني كثير أحب الفساتين و الاختيارات "الغريبة"، بس بعد أحب الملابس اللي مالها عمر. يعني تشوفها اليوم على أحد، أو تشوفها بعد سنتين على أحد ثاني، أو فرضا تلقى صورة قديمة أحد لابس نفس اللبس، كلها تحس إنها حلوة، و لا كأنها موضة قديمة. 

طبعا ما يحتاج أقول إني أحب الذهبي، إذا الذهبي لون، فهو لوني المفضل (يمكن)، أحب المجوهرات الذهبية "الصفراء"، أحب الترتر الذهبي، باختصار أحب أي شيء يلمع و لونه أصفر. 

أعرف أنه هذا اللبس ما عرضته على التصويت قبل، لأنه كان اختياري لشهر ديسمبر، أوعدك بافكر بطريقة لحل المشكلة من بدري هذي السنة، و انتظروا خيارات شهر يناير 2014 بعد أقل من أسبوع تقريبا، إن شاء الله بتعجبكم. و إن شاء الله يشتغل معاي خدمة التصويت الجديدة. 

Best Dressed for 2013

أولا خلوني أبدأ إني مرة مستحية منكم، أحس لازم ما أسوي شيء صح. سافرت، و أنا كنت أعرف إني باسافر، بس ما كنت أتوقع إني ما راح ألقى نت، فما قدرت أعلن لكم عن أحسن لبس لشهر نوفمبر. خلونا نقول القصة باختصار شديد. أعطيتوا أصوات متعادلة لأليكسا و جنيفير و ليتون و أليسون و شو كي، و اخترت أنا أليكسا، لأني قلت لكم أنه عاجبني "لستايلي". 

طبعا ما أمداني أسوي تصويت لشهر ديسمبر فاخترت أحسن لبس (أعتقد) و دخلته مع تصويت السنة. أخترت ناومي هاريس بأليكساندير ماكوين (الصورة آخر صورة من اليمين). 

على إني بداية السنة (الشهور الأولى) كنت أعتقد إن القائمة النهائية بتصير مليانة ديور، إلى أنه القائمة صار فيها لبس واحد لكل مصمم، لكن كيري واشنطن فازت مرتين بأحسن لبس (لشهر يناير و شهر أغسطس)، طبعا بلبسين لمصممين مختلفين. المصممين الفرنسيين هم أكثر بشانيل و ديور و فيونيه و بالمان. بس كان فيه بريطانيين و أمريكان، و حتى أوستورالي. 

المهم التصويت راح يستمر للأسبوع الثالث من يناير بعدها إن شاء الله نرجع للتصويت الشهري، و إن شاء الله لو سافرت السنة الجاية أو السنة هذي، بأحاول أحط التصويت بالوقت، يمكن أخلي أختي تكتب الموضوع. 

Create your free online surveys with SurveyMonkey , the world's leading questionnaire tool.

Best Dressed: November 2013

زي ما قلت لكم اليوم راح يكون عن أحسن لبس لشهر نوفمبر. إلى الآن أفكر بطريقة لترشيحات أحسن لبس، أعتقد إني بأخليها بالأسبوع الثالث من يناير، و طبعا بيكون فيها الفساتين الإثناعشر اللي فازت بترشيحات الشهور اللي أخترتوها. 

ما علينا من أحسن فساتين السنة، خلونا نشوف فساتين نوفمبر. 

أولا خلوني أقولكم إني مبسوطة، فستانيين من اللي قلت إنها راح تكون بالريدكاربيت انلبست، فيه فساتين ثانية انلبست بس النتيجة ما عجبتني، المهم هنا اليوم معانا روني مارا ببلانسياقا و شو كي بفالنتينو كتور. كل الثنتين أعجبوني مرة. بعد أعجبتني كايت بيكنسيل بالقوتشي، من زمان ما أعجبتني هذي الطريقة باللبس "هوليوود قلامور" بس مع لون الفستان أحس شكلها طالع مرة حلو. من زمان عن ليتون ميستر، بس عجبني شكلها هنا، أحسه مرة مرتاح، لكن لو سألتوني وشو اللوك المفضل عندي (اللي ممكن ألبسه على طول) من دون كلام أليكسا شونق (مو مفاجأة إني صايرة أحبها أو أحب ستايلها مرة). 

أنتم وش اللبس الأحسن عندكم؟ الأسماء محطوطة عكس عقارب الساعة. 

Create your free online surveys with SurveyMonkey , the world's leading questionnaire tool.

Best Dressed: October 2013 Winner

بصراحة توقعت أنكم ترشوحون اللبس اللي رشحته، مو لأني أنا اللي رشحته ولازم تطيعون كلامي، لكن ما أعرف ليه كنت أعتقد أنه هذا اللي بيعجبكم أكثر. اللبس اللي كان ببالي هو أنيا ريبوك بإيلي صعب، بس أنتم أخترتوا أشلي ميداكوي بزميرمان. 

لبس آشلي كان من أول الأشياء اللي شفتها بشهر أكتوبر، و على طول عرفت أنه لازم أدخلها القائمة، غير لون روجها اللي أعطى اللبس فخامة و جو "شتوي شوي"، ألوان اللبس مع فكرة أنه كروهات، أحسها مرة مناسبة للبس شتاء اللي ما عنده شتاء. مع أنه شيفون و خفيف، و قصير و من دون أكمام، إلا أنه أعطاني شعور أنها متدفية، وبنفس الوقت إن الجو برد. مرة عجبني شكلها، أنيق و جديد (على الأقل علي)، و أهم شيء أحس أي أحد ممكن يسوي هذا اللوك. فستان من زارا، و روج عنابي و صندل. مع شعر سلييك. 

أنتظروا بكرا ترشيحات شهر نوفمبر، إن شاء الله بتكون حلوة. و متنوعة. 

Best Dressed: October 2013

هذي المرة أحس أنه الأختيارات اللي كانت موجودة لشهر أكتوبر أفضل بكثير من شهر سيبتمبر، إن شاء الله تعجبكم. أقدر أقول إن الخيارات ما كان فيها شيء جديد أو لبس مثير بشكل ما توقعناه، لكنها كلها من وجهة نظري خيارات كلاسيكية أنيقة، أظن إنها تبقى حلوة لفترة طويلة. 

أولا خلوني أقول إني أول ما شفت آنيا ريبوك (الثانية من اليمين بالصف الأول) بهذا الفستان من أيلي صعب، تأكدت إني  لازم أحطها بالقائمة، ما ودي أتكلم أكثر آخاف أضيع المساحة هنا. نفس الشيء على لبس أليكساندرا روش بالفستان الكحلي المنقط، صح ما خلاني أشهق زي آنيا، لكن حسيت إني لازم أدخله لأنه منقط، و أعتقد إني ما قد اخترت شيء منقط هنا أو فيه دوائر (صححوني لو كنت غلطانه). 

آشلي ميداكوي و دايان كروقر يدخلون مرة ما أعرف كم أكيد ثالثة أو أكثر القائمة، ديور نفس الموضوع أظنه أكثر الماركات اللي دخلت القائمة (بعد مو متأكدة). ساندرا بالوك و لوبيتا كلهم عندهم أفلام يروجون لها، و أعتقد أنهم اثنيناتهم كانوا محافظات على مستوى عالي من ناحية أختيارهم للملابس، فكان لازم يدخل شيء من لبسهم القائمة. 

Create your free online surveys with SurveyMonkey , the world's leading questionnaire tool.

Best Dressed: September '13 Winner

تقريبا خلص شهر أكتوبر، و هذا يعني أنه ما بقى إلا شهرين على نهاية السنة، و التصويت لأحسن فستان للسنة. التوصيت هذي المرة جا مرة متقارب، أصواتكم كانت موزعة بالتساوي (ما عادا صوت واحد فرق الفايز) على ستة من الملابس المرشحة، لكن بالنهاية أنتم اخترتوا لوبيتا نوينقو ببرادا. 

أنا شخصيا حابة لوبيتا مرة،  غير إنها حلوة مرة، لبسها مرة حلو (أتوقع فيه لبس لها راح يدخل التصويتات لأحسن لبس لشهر أكتوبر (لسا ما حددت). المهم ما علينا خلينا نرجع للبس. أعجبني مرة الفستان، مع إنه عندي قناعة إن هي لها دور كبير بشكلة، الفستان أعطاني أحساس أنه فينتاج، و تعرفون أحب كثير من الأشياء الفينتاج، حبيت بعد إنها اختارت معها شنطة ذهبية، الخيار كله كلاسيكي، بس لسبب ما أحسه طلع مرة فريش و جديد عليها. 

قبل لا أقفل الموضوع لأنه قربت نهاية السنة إن شاء الله، عندكم فكرة معينة كيف ممكن نسوي تصويت لشهر ديسمبر و تصويت لنهاية السنة؟ أنا عندي تصور مو متأكدة منه، بس أبغى أسمع رأيكم. 

و كالعادة انتظروا بكرا إن شاء الله للتصويت لأحسن ملابس أكتوبر.

Best Dressed: September 2013

زي ما قلت لكم قبل، ما أعرف ليه الملابس الحلوة كانت كثيرة هذا الشهر، لدرجة إني لما جيت أختار القائمة النهائية، كل شوي أحذف أحد و أدخل أحد، كله علشان آصل القائمة النهائية الأحسن. بصراحة ما أعرف أنا قدرت أختار الأحسن، أو فيه ناس طلعوا من القائمة و هم يستاهلون، بس خلونا نركز على الموجودين، و إن شاء الله يعجبونكم. 

أقدر أقول إن الثيم حق هذا الشهر هو المنكروم (الأبيض و الأسود) ما عادا دايان كروقر بفالنتينو و آشلي ميداكوي بمونيك لوليه (بالمناسبة كل الثنتين كانوا قبل موجودات بأحسن لبس). أول وحدة عرفت إني راح أدخلها هي لوبيتا نيونقو (الصف الأول، أول وحدة من اليسار) بفستان برادا (أتمنى إني قلت اسمها صح)، بصراحة ما أعرف هو الفستان حلو، و إلا هي اللي محليته. بس بشكل عام أعتقد لو استمرت على الساحة قدامنا وحدة أعتقد إنها بتكون من الموجودات دايم على هذي المدونة. سيينا ميلر بعد من الأشخاص اللي أعتقد إني صايرة ما أقدر أقول لأي شيء تلبسه أنه مو حلو، ما أعرف بس من ولدت و هي صايرة حلوة بعيني، قولوا لي أنكم أنتم بعد تشوفونها حلوة، مو بس أنا أتوهم. إليزابيث موس (أول يمين) للي ما يعرف ماد مين مثلا أعجبني شكلها مرة بالإيمي، و إن خياراتها كلها كلاسيكية، من شكل الفستان، لألوانه للون الروج. 

Create your free online surveys with SurveyMonkey , the world's leading questionnaire tool.

Best Dressed: August '13 Winner

على عكس شهر أغسطس، حسيت شهر سبتمبر كأنه كان يزحف من البطء، ما أعرف ليه؟ يمكن لأنه كان فيه ملابس كثيرة حلوة بشهر سبتمبر و كنت متحمسة تجي نهاية الشهر علشان أحطها لكم.

أعرف إنكم صوتوا لكيري و كارا بالتساوي، لكن من أول ما بديت أحسن لبس للشهر، و أنا ببالي لبس واحد شهريا علشان يسهل التصويت لأحسن لبس للسنة. صراحة كنت حايرة من أختار، خصوصا أني قد اخترت كيري قبل (أحسن لبس لشهر يناير). آخر شيء قررت أختار كيري على كارا مع أني مرة حابة مكياج كارا، أولا لأني أعتقد أن جزم كارا ما كانت مرة حلوة (الحزام اللي فوق الكوع) هو حلو بشكل عام، لكن ما أعجبني إن البنطلون مغطيه. الشيء الثاني، أعتقد ملابس زي كذا (فستان كيري) قليل تلقى شيء بشفايف و قلوب مثلا، يطلع حلو مو رخيص. 

الشيء الأخير اللي خلاني أختار كيري على كارا، إن لبس كارا (من وجهة نظري) كارا هي اللي أعطته شكل، يمكن لو كان على أحد ثاني ما كان طلع حلو كذا. 

Best Dressed: August '13

ودي أقول كلمة، لو كنتوا تابعون أحد على اليوتيوب يمكن بتكونون طفشتوا منها، لكني بأقولها لأني أظن إني أول مرة أقولها و هي: أغسطس خلص بسرعة، ما كأنه أمس بس بدأ. حتى أحس ما أمداني أجمع ملابس :S ما علينا خلونا نحط الملابس اللي أعتقد إنها أحسن لشهر أغسطس. 

أعتقد هذا الشهر الملابس صيفية أكثر من الشهر اللي فات. أولا خلوني أقول قد إيش مستظرفة فستان كيري واشنطن و أحس أنه ممكن نشوف زيه بزارا مثلا، لكن ما يهم خلونا نرجع لكيري، أعجبني فستانها و أعجبني الروج اللي اختارته معاه. الشيء الثاني اللي انبسطت عليه هو إن كايت بلانشيت عندها فيلم تروج له فصايرة تطلع كثير، بالنسبة لي أعتقد كايت أكثر وحدة لبسها دايم حلو من عرفتها (أعرفها من بداية الألفية) يعني من عقد و أكثر أظن إنها ما زالت تلبس بشكل مرة حلو، انبسطت إنها لبست من مجموعة أرماني برافي الأخيرة اللي كانت عاجتني. 

سيلينا قوميز بعد لابسه فستان كتور، بس من فيرساتشي أتلييه، بصراحة لما شفت الفستان على الرانواي ما أعجبني أبدا(حسيته مرة رخيص)، لكن مرة عجبني على سيلينا خصوصا مع الحلق الأخضر (ما توقعت مجوهرات خضراء بتكون حلوة مع كحلي) بالمناسبة صاير كثير من لبس سيلينا يعجبني. 

Create your free online surveys with SurveyMonkey , the world's leading questionnaire tool.