Best Dressed: May 2014

ما أعتقد إنه قد صار عندي شهر "أفخم" من هذا الشهر، قصدي طبعا خيارات الملابس، كل اللي صار عندي بالنهاية ملابس سهرة و على إني ما أظن فيه ألوان كثيرة، بس أعتقد الخيارات بالنهاية مختلفة، و تناسب ناس مختلفين. طبعا ما يحتاج أعيد أنه الشهر اللي فات كان الشهر اللي فيه ميت قالا و مهرجان كان، و بريميرات لكم فيلم صيفي.  

صراحة ما قدرت ما أحط إيل فانينق بتصويت هذا الشهر. بالصورة هذي إيل لابسة لجورج حبيقة، إيل و أنجلينا جولي جالسين يروجون لفيلم مالفيسينت، (أظن إني راح أتكلم عنهم بشكل منفصل بعدين). مصمم لبناني ثاني موجود بالقائمة هو جورج شقرا على فان بينق بينق (الثاني من اليسار فوق) ، مشكلتي الوحيد مع اللبس هذا أنه شوي طويل، بس يظل حلو، ما أقدر أتجاهله. بما إننا نتكلم عن الأبيض خلونا نتكلم عن كايت بلانشيت برالف لورين، صراحة هذي المرأة أناقة بشكل إنسان.

مو قلت لكم راح أتكلم عن أكثر من فستان أحمر، هذولا هم٬ أريزونا ميوز برالف آن روسو كتور، و مونيكا بالوتشي بدولتشي آن قابانا آلتا مودا.
ما يحتاج أتكلم عن نتاشا پولي، لأني قد تكلمت عن هذي المرأة و كيف إنها صدق عارضة، الصورة يمكن مو واضحة، بس كبروها للتفاصيل.

من أحسن لبس لشهر مايو 2014؟

إيل فانينق بجورج حبيقة

أريزونا ميوز برالف آن روسو كتور

فان بينق بينق بجورج شفرا

نايومي كامبل بأليكساندير ماكوين

كايت بلانشيت برالف لورين

نتاشا بولي بفيونيه كتور

أنجلينا جولي بأتلييه ڤيرساتشي

مونيكا بالوتشي بدولتشي آن قابانا ألتا مودا

Poll Maker

Best Dressed: Golden Globe 2012

أمس أو الفجر كان حفل توزيع جوائز قولدين قلوب صحيح كنت متحمسة أشوف الحفل، و ما زلت، لكن الملابس اللي شفتها على الريد كاربيت ودي أقول إن أكثرها "يسد النفس"، ما أعرف ليه حسيت كل اللي جايات كأنه الحفلة كانت فجأة، بعض اللي جو صدق أشكالهم أي كلام. (حتى روني مارا ما لبست شيء من اللي كان ودي تلبسه :). 

لقد لكم بشكل عام كانت أشكال اللي جايات "مطاريس" أو بأحسن الأحوال ما كأنهم جايين لثاني أكبر حفلة بالسنة ... و لأني كنت مشتهية أشوف ملابس صدق راقية، أظن الشخص الوحيد اللي ما خيب ظني، هي أنجلينا جولي. 

قلت لكم إن أنجلينا جولي "بالنسبة لي" كانت هي الوحيدة قد الحفلة، بهذا الفستان من أتلييه فيرساتشي (خط الأوت كتو حق فيرساتشي)، الفستان مستحيل ألبسه، و لو شفته ما توقعت أنه راح يكون بهذا الشكل ... ألوانه شكله، كلها ما تحمسني إني أفكر أنه يطلع راقي بالشكل هذا، لكن أنجلينا عرفت كيف تخليه خلو، (أعتقد إن السبب، هو إن الفستان كأنه مخيط عليها). 

بصراحة كل شيء أنجلينا سوته، أتوقع إني كنت راح أتجنبه، لكنها قدرت تسوي لوك قد الريدكاربيت صدق. (التطقيم) تعرفون إني ما أحبه، لكن ما أعرف كيف مشي مع أنجلينا (جزم بالضبط زي لون الفستان، روج و شنطة تقريبا زي السفطة الحمراء). 

باختصار فستان ما كنت أتوقع يكون حلو، و إكسسوارات لو أحد قالي إنه بيختارها لهذا الفستان كان من الآخر قلت: يع. لكن أنجلينا طلعت بأحسن فستان شفته بحفل أمس. 

مين عجبكم من القولدين قلوب؟

Elie Saab Takes Over the Red Carpet

ما أعرف ليه هذي السنة أحس بفخر بإيلي صعب، صحيح أنه لبناني و مالي شغل فيه، بس جالسة أتذكر كيف قبل أكثر من عشر سنوات لما كنت أقلب كتالوقات الأزياء مع خالاتي، علشان زواج وحده منهم ... أتذكر كيف كانت تصاميمه، و كيف الحين صار. 

أتذكر بعد صدمتي الأولى لما كنت أتابع الأوسكار 2001 و اللي فازت فيه هالي بيري، أنه فستانها من تصميم إيلي صعب... ذاك اليوم ما كنت مصدقة أنه مصمم عربي فيه أحد يعرفه، طبعا ما كنت أعرف عاليا، لكن الفرق بينه و بين عليه، إن أيلي صعب بدأ بلبنان بعدين طلع لباريس، لكن عليه أعتقد حتى ما رسم رسمه بتونس. 

المهم السنة هذي أعتقد ما فيه مناسبة صارت، إلا و كان على الأقل واحده من الحاضرين لابسة لإيلي ... ما أعرف لازم يشكر الناس اللي تشتغل بالعلاقات العامة معاه، أو يشكر إيلي على فساتينه اللي إذا ما كانت حلوه، على الأقل ما قد صار أي فستان على أي أحد شين :). 

زي ما قلت لكم قبل، السنة هذي قررت إني أجمع الفساتين اللي أعجبتني من بداية السنة، علشان ما أنساها لما تجي نهاية السنة، لو بغيت أكتب عن أحسن الفساتين بالسنة اللي بتخلص ... المهم، بعد فترة لما شيكت على قائمتي اكتشفت إن القائمة مليانة فساتين من إيلي صعب، ففكرت إني أشارككم، باللي أشوف إنها أحسن، و أشوف تصوتون على أحسن واحد بالنسبة لكم ... من المجموعة اللي قدامي، بالنسبة لي الفستان اللي على اليمين من مجموعة أوت كتو خريف 2011 اللي لابسته كيرا نايتلي، أعجبني مرة، أعترف إني يمكن حتى ما انتهبت له لما كنت أقلب المجموعة، لكن لما لبسته كيرا عجبني مرة، خصوصا أكمامه. 

قلت لكم قائمتي كانت طويلة، حتى أطول من هذي الثمانية فساتين، لكن قلصت المجموعة بمساعدة خواتي :) ... المجموعة هذي أعجبني فيها الفستان الأخضر اللي على زوي سالدانا من مجموعة ربيع 2012، للحق ما شفت المجمعة زين، لأني عجازة، لكن بشكل عام قلبتها، عجبتني الألوان القوية فيها (فيها أخضر و أزرق نيلي، و أصفر) لأنها ألوان ما أتذكر إن إيلي قد استخدمها (بهذي القوة)، لما شفته زي ما قلت لكم على زوي، عجبني خصوصا مع لون بشرتها. لكن المفضل عندي من هذي المجموعة (مو كفستان) كشكل عام هو ليا سيدو (يسار) بالفستان الأوت كتو ربيع 2011، ما أحس إني من فترة طويلة اهتميت كيف جسم أي وحده، مادامها تلبس لبس يناسبة و يطلعه حلو، لكن أظن جسم ليا هو اللي أعطى شكل للفستان، أحب كيف إنها مليانه برشاقة (ما أعرف كيف آصفه)، لكنه يعطي الملابس شكل مختلف. 

Some Color Needed

أمس كانت أنجلينا جولي بسراييفو، تحضر ختام مهرجانهم السينمائي، بشكل عام أنجلينا مو مودي، قصدي لبسها، يعني ما أشوف إن لبسها يناسب لا لعمري و لا لذوقي، أظنه مناسب لنساء فوق 35. المهم أنه أنجلينا كانت لابسة فستان مشمشي، أو خوخي أو خربزي من إيلي صعب. 

تكلمت عن الفستان هذا قبل سنة تقريبا، أول ما شفته بعرض إيلي لربيع 2011. انبسط كثير لما أشوف فستان حبيته من الرانواي، ينلبس على الريدكاربيت، مو لشيء بس أحس أنه فيه أحد قدر هذي الأشياء زي ما أنا مقدرتها، بس أحد يقدر يدفع قيمتها P:. 

بالنسبة لي الفستان مرة مناسب لأنجلينا، و لا عندي مشكلة أنه هي اللي لبسته، خصوصا إن الفستان صعب شوي، و يحتاج وحدة زي أنجلينا لها كاريزما علشان يطلع حلو. عجبني المايك آب، ما عندي مشكلة كبيرة مع شعرها، مع إني أحس أنه يحتاج فاليوم شوي، يعني لو كان فيه شوي وايفز، أو لو حتى على شكله بس ما يكون كذا لاصق. 

مشكلتي الوحيدة معه، مع الإكسسوار اللي لابسته معاه، ما أشوف أنجلينا شايلة أي شنط (و هذا بعد مو مهم)، و لا هي لابسة عقد (بعد مو مهم)، لكن أكثر شيء ضايقني من ناحية الإكسسوار أنها ما لبست حلق، بجد تمنيت إنها لابسة حلق، و ببالي حلق لونه أخضر، شيء يشبه هذا. أنجلينا مو غريبة على الحلق الأخضر، أتذكر إنها قبل كم سنة لبست للأوسكار حلق أخضر أظنه يشبه هذا، و أظن بعد مع فستان أسود لإيلي صعب، يعني الموضوع مو صعب، و لا راح يكلفها شيء، بس تقتح دولابها و تطلع الحلق من جديد. 

قبل لا أخلص، كثير يسألون وش ممكن يلبسون لون جزم مع فستان خربزي، بالنسبة لي ممكن صندل ذهبي كعب، بيكون أكثر شيء مناسب، أنجلينا لابسة كعب نود، مو شين الاختيار، خصوصا مع فستان طويل زي هذا، بس مع فستان قصير بشكل عام ما أحب النود و خصوصا مع لون زي هذا، لأنه قريب كثير من اللون اللحمي أو النود، فكثير مرات يخليك كأنك حافية، فيطلع شوي "تو متش". 

Wool Gown !!

قلت كثير إني مو من الناس الي يظنون أنه أنجلينا جولي أحلي مخلوقة بالكون. بس مؤخرا ما أعرف أنا الي متغيرة، أو أنجلينا صدق محلوة؟!!

أنجلينا رجعت من جديد للبريمرات علشان هذي المرة فيلمها الجديد The Tourist. بجد أحس أنجلينا من أكثر الممثلات الي يطلع عليهم أنهم ممثلات، ما أعرف وش أفسر هذا الشي ... بس يعني الشكل، اللبس المجوهرات تحسسك زي الممثلات القدام الي لما يجون مكان كل الناس يلتفتون عليهم من فخامتهم ...

المهم نرجع للبسها ... أنجلينا مره ثانية بفيرساتشي (تلبق عليها مرة هذي الماركة)، طبعا الفستان معدل خاص فيها أو لا ... بس أكثر شي جنني عليها أنه صوف؟!! ما قد شفت فستان سهرة صوف، و لا قد تخيلت أنه الصوف ممكن يكون فخم كذا ... بالنسبة لي كل شكلها مضبوط مرة، بس لو كنت باغير بشي بس باختار لها كعب كلاسيكي أسود، مو العاجي اللي لابسته.

الفستان الصوفي هذا ذكرني بالعبايات الشتوية الي من مخمل أو فرو يلبسونها البنات ... صراحة ما أفهما (مو يعني أنه ما أفهم الفستان هذا، بس هي مجرد فكرة جت ببالي) يعني ما عندنا ذاك البرد، و لما نطلع نلبس العبايات بس بالأماكن العامة، يعني بنفسخها بالأماكن المغلقة، أما جوات المولات مثلا فيه تدفية، و السيارة دافية، و حنا ما نمشي بالشارع طيب ليه يلبسونها؟

شرايكم بالعبايات و بفستان أنجلينا الصوف؟