Lady in Yellow

ما أعرف إذا قد صرحت بعدم حبي للون الأصفر (على الملابس)، و إذا كنت صرحت لكم، ما أتذكر كم مرة قلتها لكم هنا، ما يهم إذا كنت قلتها قبل أو لا، لأني بأرجع أقولكم، إني ما أحب اللون الأصفر، بس كل مرة (أو أغلب المرات) أشوفه على الريدكاربيت، يكون لبس مرة يعجبني، زي شكل ليا سيدو بهذا الفستان اللي تحت من برادا، بحفل البافتا قبل كم يوم. 

أعتقد إن كل الثلاثة فساتين اللي حطيتها تحت، قد تكلمت عنها قبل، ميشيل وليمز بفيرا وانق بأوسكار 2006، إيما ستون بأتلييه فيرساتشي أظن السنة اللي فاتت بفرنسا، و دايان كروقر بجوائز ساق أعتقد 2009 بفستان من جايسون وو. لكن ما يمنع إني أجيب أشكالهم مرة ثانية علشان ندرس الموضوع من جديد. 

على إنها كلها لها أكثر من سنة (طبعا إلا ليا)، إلا إنها كلها بالنسبة لي لو أحد منهم لبسها أمس بأحبها زي ما حبيتها قبل سنة أو قبل عشر سنين. لما جمعت الصور على بعض أعتقد إن السر دايم يكون بالروج الغامق (أحمر أو فوشي أو عنابي) و العيون بس ماسكارا أو روموش صناعية، الشعر يكون ريترو، و أعتقد بعد إضافة مهمة، الواحد لازم ما يخاف من إختيار مجوهرات تكون ذهب أبيض يكسر اللون الأصفر اللي مسيطر على كل اللوك. 

إلى الآن ما جربت الأصفر، ما عندي مناسبة قريبة ببالي ممكن تخليني أجرب الأصفر و أشوف يمكني كنت ظالمته، و مو بس يطلع حلو على الريدكاربيت، بس أكيد أول مناسبة تحصل لي، باحط هذي الطلات ببالي. 

أنتم وش رأيكم بالأصفر بشكل عام؟ و بشكل ليا بالبافتا بشكل خاص؟ 

HC Fall '14 (Report)

الكتابة الفترة هذي شوي صعبة. كمبيوتري انكب عليه موية، و بعض حروف الكيبورد ما عاد تشتغل، فلازم ألقى جهازي ثاني أكتب منه، أو زي هذي الحالة أكتب من الآيفون. ما علينا، المهم الأسبوع اللي فات كان أسبوع الموضة لأوت كتور خريف 2014. و هنا "تقرير" عن الأسبوع.

هذي المرة على غير العادة، عرضي المفضل كان أتلييه ڤيرساتشي، أعتقد أنت مرة حلو، و مع إنه إلى الآن فيه تصاميم ڤيرساتشي "سيكسي". إلا إني أحس أنه فيه تنوع، و يصلح لناس كثار.

على غير العادة بعد، أعتقد إنه أكثر مجموعة بنشوفها على الريدكاربيت بتكون جامباتيستا ڤالي، مو إيلي صعب. أحس فساتين ڤالي تصرخ ريد كاربيت. مع ذلك اخترت هنا لوك أشك أنه راح يكون ريدكاربيت و هو اللبس اللي التوب حقه كأنه بيجاما (أعرف الناس لبسوا البيجامات و قطعوها، بس إلى الآن أحبها). لو أحد بيلبسها أعتقد بتكون يوليانا سيرچينكو. 

بالكلام عن يوليانا، أظن مجموعتها أسوأ مجموعة طلعتها من بدأت تصمم. أحسه خليط من كل المصممين و لا عجبني شيء. بالمناسبة مجموعتها الماضية انلبست كثير ريد كاربيت، مع إنها كانت عاجبتني، إلا إنها على ناس كثير ما طلعت حلوة.

أعجبني ديور، شانيل بالنسبة لي فساتين مرة حلوة، و ملابس مرة مو حلوة. أعجبني مرة الفستان الأحمر من أرماني براڤي، أظن إن كايت بلانشيت لازم تلبسه. ڤالنتينو كان كويس، مو مميز، لكن أعتقد مصممينه جالسين يحاولون يآخذونه لشكل جديد بعيد عن الشكل اللي كان عليه بالثلاث سنوات الأخيرة.

 آخر شيء هذا الفستان الأسود بكورسيه كريستال من جان بول چوتييه. هذا الفستان أحسه مخلوق لدينا فون تيس، لو ما لبسته لو بعد عشر سنوات، بأجمع فلوس و اشتريه لها. P:

 المهم صحيح إن ما عندي كيبورد صاحي، بس بآحاول أكتب عن فساتين الموسم اللي خلص، و اللي تمنيت/ خمنت إنها راح تلبس. 

بس الحين أنتم وش العروض المفضلة عندكم من أسبوع الأوت كتور؟

Best Dressed: May 2014

ما أعتقد إنه قد صار عندي شهر "أفخم" من هذا الشهر، قصدي طبعا خيارات الملابس، كل اللي صار عندي بالنهاية ملابس سهرة و على إني ما أظن فيه ألوان كثيرة، بس أعتقد الخيارات بالنهاية مختلفة، و تناسب ناس مختلفين. طبعا ما يحتاج أعيد أنه الشهر اللي فات كان الشهر اللي فيه ميت قالا و مهرجان كان، و بريميرات لكم فيلم صيفي.  

صراحة ما قدرت ما أحط إيل فانينق بتصويت هذا الشهر. بالصورة هذي إيل لابسة لجورج حبيقة، إيل و أنجلينا جولي جالسين يروجون لفيلم مالفيسينت، (أظن إني راح أتكلم عنهم بشكل منفصل بعدين). مصمم لبناني ثاني موجود بالقائمة هو جورج شقرا على فان بينق بينق (الثاني من اليسار فوق) ، مشكلتي الوحيد مع اللبس هذا أنه شوي طويل، بس يظل حلو، ما أقدر أتجاهله. بما إننا نتكلم عن الأبيض خلونا نتكلم عن كايت بلانشيت برالف لورين، صراحة هذي المرأة أناقة بشكل إنسان.

مو قلت لكم راح أتكلم عن أكثر من فستان أحمر، هذولا هم٬ أريزونا ميوز برالف آن روسو كتور، و مونيكا بالوتشي بدولتشي آن قابانا آلتا مودا.
ما يحتاج أتكلم عن نتاشا پولي، لأني قد تكلمت عن هذي المرأة و كيف إنها صدق عارضة، الصورة يمكن مو واضحة، بس كبروها للتفاصيل.

من أحسن لبس لشهر مايو 2014؟

إيل فانينق بجورج حبيقة

أريزونا ميوز برالف آن روسو كتور

فان بينق بينق بجورج شفرا

نايومي كامبل بأليكساندير ماكوين

كايت بلانشيت برالف لورين

نتاشا بولي بفيونيه كتور

أنجلينا جولي بأتلييه ڤيرساتشي

مونيكا بالوتشي بدولتشي آن قابانا ألتا مودا

Poll Maker

Best Dressed: April 2014 Winner

الشهر اللي فات، أقل شهر كنت متابعة فيه نتائج التصويت أول بأول، أظن إني انشغلت بكل هذي المناسبات اللي جالسة تصير من مت قالا، لمهرجان كان و الحفلات اللي فيه. الشيء اللي ماتوقعته لما جيت أشيك، الاختيار اللي اخترتوه لأحسن لبس، مو لأنه مو أحسن لبس بس لأني توقعت أنه لبس ما يعجب كثير، مرة ثانية يوضح إني اخطيت بتوقعي. 

إيما ستون بأتلييه ڤيرساتشي، أعترف إني مو مرة مع تصاميم ڤيرساتشي أو أتلييه ڤيرساتشي (المجموعة) لكن أعتقد إن دونتيلا تسوي فساتين كستم مايد مرة حلوة، و بعيدة عن الشكل المعتاد لملابس ڤيرساتشي، للي كلها فتحات و فيها إثارة مو دايم و مو على كل الناس تعجبني. 

بهذا اللبس، أعتقد اللون و التصميم كلهم مرة حلوات، أعجبني تنسيق إيما للبس مع الريترو وايفز، و الروج الأحمر الفوشي، أعتقد أنه هذا واحد من الملابس الكلاسيكية اللي دايم تكون حلوة. 

اللون الأصفر ما يلبس كثير ريد كاربيت (و لا أعتقد أنه لون سهل)، بس أكثر من مرة لما يلبس أعتقد أنه يطلع مرة حلو. 

انتظروا بكرا إن شاء الله أحسن لبس لشهر مايو. الخيارات كثيرة، بس أعتقد إني وصلت لفكرة عن إيش يستحق يدخل التصويت. 

Best Dressed: April 2014

الشهر هذا زي ما قلت بنهاية التدوينة اللي فاتت يمكن الخيارات مو مثيرة أو فخمة زي الشهرين اللي فاتوا، لكن فيه شوي حيوية، و ألوان حلوة، مع أنه كثار لبسوا أسود هذا الشهر، على عكس شهر مارس، لما قلت لكم كثار لابسين أبيض، ما علينا، خلونا نبدأ بالملابس.

كان فيه أسود، و كان بعد فيه درجات الأحمر زي ما أنتم شايفين. للي قروا الموضوعين اللي كتبتهم ريم عن كوتشيلا (هنا و هنا) يمكن قروا ردي، و عرفوا رأيي بالملابس بالمهرجان، بس أنا ما عندي مشكلة مع البوهو، لكن بالنسبة لي يلبسه اللي دايم يلبسه زي نيكول ريتشي، سيينا ميلر و كايت موس، أعرف أنه لبس كايت موس هذا ما يعتبر بوهو بمقاييس كوشيلا، بس بنظري، كذا أعتقد المفروض تكون أناقة البوهو، مو كأنه تهريج. أنجليزية ثانية سوكي واترهاوس بماركة من إنجليزية ثالثة (ڤيكتوريا بيكام) عجبني مرة شكلها، عجبني شعرها، و مكياجها، و أكيد جزمها، الشيء الوحيد اللي مو مرة عاجبني الشنطة السوداء. 

أيما ستون بفستان أصفر من أتلييه ڤيرساتشي، إما الوقت هذا جالسة تروج لفيلم Amazing Spiderman 2 كل الجولة إلى حد الآن شكلها فيه مرة حلو (أعتقد باكتب عنها بشكل منفصل لما تخلص) بس هذا الفستان بالنسبة لي يستاهل يدخل أحسن لبس للشهر. 

آخر شيء باتكلم عنه دو جوان ببرادا (وسط، تحت)، صراحة قليل جدا إني انفتن بجمال وحدة. لا تفهموني غلط العالم مليان نساء جميلات، بس من بعد انفتاني بشكل لوبيتا بنهاية السنة اللي فاتت، السنة هذي، هذي المرأة خلتني ساعات أدور بصورها.

من أحسن لبس لشهر أبريل 2014؟

كايت موس بسان لوران

ديانا أقرون بكوشني إي أوكس

جايمي كينج بفالنتينو

سوكي واترهاوس بفيكتوريا بيكام

إيما ستون بأتلييه فيرساتشي

دو جوان ببرادا

سولانج نولز بأكني ستوديو

ألونا فرانسيس ببلانسياقا

Poll Maker

Best Dressed: August '13

ودي أقول كلمة، لو كنتوا تابعون أحد على اليوتيوب يمكن بتكونون طفشتوا منها، لكني بأقولها لأني أظن إني أول مرة أقولها و هي: أغسطس خلص بسرعة، ما كأنه أمس بس بدأ. حتى أحس ما أمداني أجمع ملابس :S ما علينا خلونا نحط الملابس اللي أعتقد إنها أحسن لشهر أغسطس. 

أعتقد هذا الشهر الملابس صيفية أكثر من الشهر اللي فات. أولا خلوني أقول قد إيش مستظرفة فستان كيري واشنطن و أحس أنه ممكن نشوف زيه بزارا مثلا، لكن ما يهم خلونا نرجع لكيري، أعجبني فستانها و أعجبني الروج اللي اختارته معاه. الشيء الثاني اللي انبسطت عليه هو إن كايت بلانشيت عندها فيلم تروج له فصايرة تطلع كثير، بالنسبة لي أعتقد كايت أكثر وحدة لبسها دايم حلو من عرفتها (أعرفها من بداية الألفية) يعني من عقد و أكثر أظن إنها ما زالت تلبس بشكل مرة حلو، انبسطت إنها لبست من مجموعة أرماني برافي الأخيرة اللي كانت عاجتني. 

سيلينا قوميز بعد لابسه فستان كتور، بس من فيرساتشي أتلييه، بصراحة لما شفت الفستان على الرانواي ما أعجبني أبدا(حسيته مرة رخيص)، لكن مرة عجبني على سيلينا خصوصا مع الحلق الأخضر (ما توقعت مجوهرات خضراء بتكون حلوة مع كحلي) بالمناسبة صاير كثير من لبس سيلينا يعجبني. 

Create your free online surveys with SurveyMonkey , the world's leading questionnaire tool.

The Battle of the Red Carpet

أعتقد خلصت عروض أوت كتور خريف 2013. زي ما وعدتكم راح أتكلم عن العروض بشكل عام، و بنفس الوقت بأحط أحسن الملابس اللي بنفس الوقت أعتقد إنها أو أحب أعتقد إنها بتكون على الريدكاربيت (تعرفون أحب أتخيل نفسي إني صدق ستايلست P:). من العروض اللي فاتت خمسة (على الأقل متأكدة إني شفتها من التسعة اللي اخترتها لبست على الريد كاربيت) فأنتم سايروني و خلوني أخمن أو أتمنى وش راح يلبس الفترة الجاية من المجموعات اللي عرضت هذا الأسبوع. 

قلت لكم قبل شانيل بالنسبة لي كان سيء، ما قدرت أختار منه أي شيء، رجعت مرة ثانية وجلست أحاول أشوف شيء ممكن يطلع حلو، بس عجزت (فيه لوك أو ثنين قدرت أتخيل أنه ممكن يطلعون حلوات مع تعديل). المهم نجي للملابس أعتقد إن أرماني برافي أكثر مجموعة حسيت إنها شيء مختلف (على الأقل عن السنوات اللي فاتت)، ديور و فالنتينو مصممينهم جالسين شوي شوي يغيرون من شكلهم. أكثر شيء أعجبني و بجد أتمنى أشوفه هو الفستان القصير اللي فيه شيء أزرق سماوي من جامباتيستا فالي (مرة حبيته). ودي أشوف بعد أحد يلبس الفستان اللي عليه طبعات حيوانات من جان بول قوتييه، بس ودي اللي يلبسه ما يلبسه برخص (عندي طبعات الحيوانات "نمر، فهد" بسهولة تتحول للبس رخيص، بس لو لبست بأناقة تطلع حلوة). آخر شيء إيلي صعب بالنسبة لي ما كان عنده جديد، بس أعتقد أنه راح يكون أكثر واحد يلبس له على الريدكاربيت. 

إذا كنتوا تابعتوا العروض، وش أحسن عرض عندكم؟ و لو ما تابعتوا، وش أحسن شيء من الفساتين اللي حطيت صورتها هنا؟ 

Is it a sky blue night?

اليوم أو فجر الإثنين بيكون الأوسكار، قلت لكم قبل ما عندي توقعات كبيرة إننا بنشوف ملابس حلوة على الريد كاربيت، لكن مازال عندي أمل أنه بيطلع الحفل حلو، حتى لو ما كانت الملابس حلوة. 

زي كل سنة أكيد فيه أحد بيلبس أسود، أتوقع بعد بيكون فيه فساتين نود و ألوان باستيل، قلت لكم ما أتوقع فيه طبعات، و لا أظن أنه أحد بيجي بفستان قصير أبدا (زي العادة)، و يمكن نشوف أحمر أو أثنين. الشيء اللي أتوقع أني أشوفه الليلة هو أنه فيه أحد بيلبس فستان سماوي. 

اللون الأزرق كان موجود تقريبا بكل عرض شانيل أوت كتو الأخير ربيع 2012، و نفس الشيء كان فيه مجموعة فساتين بعرض إيلي سماوية، أليكسي مايبيل بعد كان عنده فستان سماوي. بعد ما شفت فستان أوسكار دي لارينتا (أول فستان من تحت على اليمين)، بعروض خريف 2012 حسيت إني باشوف فساتين سماوية بكل العروض، لكن الشيء هذا ما صار، لكن لاحظت أنه الماركات اللي بالعادة هي الموجودة على الريدكاربيت، على الأقل طلعت بفستان واحد سماوي، كأنه فيه منافسة سرية على مين يآصل فستانه للريدكاربيت. 

بصراحة ما أتوقع أشوف أكثر من ثنيتن (على الأكثر) لابسات سماوي الليلية، لكن لو كنت باتنقى أو باتوقع أتمنى أشوف ميشيل وليمز بشانيل خصوصا مع شعرها الي صبغته فاتح مرة أمس (شانيل الفستان اللي بالوسط). أظن أنه جيني بيكام يصلح لأنجلينا جولي، صحيح مو ألوان أنجلينا، لكن قصته تناسبها (بالوسط على اليسار). أما فستان أوسكار دي لا رينتا، فأتمنى إني أشوفه على جيسيكا شستاين مع إني عندي إحساس إنها راح تلبس لأرماني برافيه، لكن ما يمنع أتمني :). 

شرايكم باللون السماوي كفستان سهرة؟ 

VERSACE: Lack of respect for pluralism

أولا تعرفون إني مو من معجبين فيرساتشي، يعني فيه أشياء تعجبني عندهم لكن أظن إن الخط كامل مو ذوقي، ما أحب فايب "sexy" اللي بتصاميمهم. لكن هذا ما يعني أنه ما فيه أحد غيري من هنا أو من أي مكان ثاني بالعالم مو مسيحي ما تعجبة الماركة. 

الصورة هذي تجمع بعض تفاصيل العرض اللي كان أمس ... نصف المجموعة تقريبا كان صلبان. بالنسبة لي لو فيرساتشي محل ما أعرف عنه بأي مكان بالعالم باعتبر أنه هذا شيء عادي و هم أحرار، لكن لما تصمم مجموعة عليها علامة دينية واضحة و زباينك من كل الديانات، و عندك فروع بكل العالم، هذي أعتبرها قلة إحترام لثقافات الآخرين و معتقاداتهم. 

أعرف بعض الناس ما عندهم مشكلة بلبس ملابس عليها صلبان، و تبريرهم أنهم ما يعتقدون فيها، و لا يقدسونها، لكن بالنسبة لي لبس شعار ديني واضح، يمثل ديانة معينة حتى لو ما كنت أؤمن بالشعار أو بقدسيته هو موضوع فيه عدم احترام للناس و ثقافاتهم، و فيه إهانة اللي لابسنيه لو كانوا لابسينه بالغصب، أو مو بكيفهم. 

ما أعرف إذا أحد غيري عنده إعتراض على المجموعة؟ و بجد ودي أشوف إيش اللي بيآصل منها عندنا.

* رجاء لا أحد يقول قاطعوا، أنا ما قطعت و لا قلت كذا، كل فكرة الموضوع، إنك لما تكون شركة عالمية، و تستهدف مستهلكين من جميع الديانات و الثقافات أقل المطلوب إنك تحترمهم أو تحترم ثقافتهم باللبس. 

Oscars, who will win the red carpet?

بدأ و خلص أسبوع الأوت كتو  بصراحة ما قد شفت مجموعات أوت كتو كلها حلوة بالسنتين اللي فاتت يمكن ... لكن هذي المرة حتى ديور اللي وضعه متدهور بعد ما راج جوليانو طلعوا بعرض أعتقد كثير منه واح نشوفه على الويدكاربيت حتى لو مو بالأوسكار. حطيت هنا صور لفساتين من بعض المجموعات و اللي أتوقع إنها راح تنلبس مو شرط للأوسكا (مع إني أتمنى) لكن أعتقد راخ نشوفها بمناسبات مهمة. 

فيرساتشي أتلييه أول مرة (على الأقل بالسنوات الأخيرة) يسوون عرض لملابس الأوت كتو حقتهم، العرض كان مرة حلوة، أنوقع كثير منه راح ينلبس بالسنة هذي، خصوصا مع قطع المعدن اللي موجودة بأماكن مختلفة، حتى قبل الأوسكار أتوقع واح ينلبس من المجموعة للقرامي. 

قلت لكم عن ديور راجع بشكل حلو، صحيح بأشكال تشبه الأشياء اللي كان يسويها جوليانو، لكن هذا الشيء اللي كان ممشي الشركة، و مصمم ديور لحالي بيل قايتين كان مساعد لجوليانو لما كان مصمم ديور، أعتقد على الأقل فستان راح يكون من العرض موجود على الريدكاربيت. 

جامبتيستا فالي هذي ثاني مجموعة له أوت كتو ... بالنسبة لي المجموعة هذي أحلى من الأولي، خصوصا الفساتين اللي داخل الشك علي القماش (ما أعرف كيف آصفه)، لكنها مجموعة مرة حلوة، و تستاهل ريدكاربيت. 

شانيل هذي من أكثر المجوعات اللي شفتها، اللي تقول خذوني للأوسكار، أعتقد أنه هذي السنة على الأقل وحدة راح تلبس من شانيل للأوسكار، ببالي ميشيل وليمز، لكن نستنى شوي، لأني راح أحط إن شاء الله تخميني لوش راح تلبس الممثلات اللي بيجون للحفل. 

لعرض أرماني برافيه جت جيسيكا شيستين، و هي مرشحة لأوسكار أفضل ممثلة مساعدة، إلى الآن جيسيكار ما لبست شيء لأرماني، لكن مجموعة أرماني برافيه الأخيرة، واضح أنه أرماني مصر هذي السنة يكون بالأوسكار. أظن آخر ظهور لفستان من تصميمه على الريد كاربيت حق الأوسكار كان اللي لبسته آن هاثوي بـ 2009. 

بعرض إيلي صعب أوت كتو ربيع 2012 كان في مجموعة فساتين ببداية العرض مرة حلوة، و غير عن اللي يسويه إيلي بالعادة، لكن أتوقع إيلي راح يكون بالأوسكار (تقريبا زي كل سنة من عشر سنوات)، لكن بواحد من الفساتين المشكوكة هذي اللي تميز فيها بالسنوات الأخيرة. 

جيفانشي هذي المجموعة طلع بفساتين تختلف عن الشيء اللي كان يسويه بالأربع مواسم الأخيرة، الكثير يعتقدون أنه روني مارا راح تلبس منه للأوسكار، صراحة مو متأكدة لحد الآن، لكن أتمنى لو تيلدا سوينتين كانت فيه، و تلبس الفستان اللي فوق. 

مجموعة فالنتينو هذي، باحتصار مجموعة لإيل فانينق، (إلى الآن ما أعرف إيل راح تجي أو لا) أظن هذا الفستان بيكون حلو مرة عليها، لو مشيل وليمز بتلبس لفالنتينو، ما أتوقع هذا الشيء المناسب لها. باختصار فستان واحد (مو هذا) أعتقد ممكن يكون على ريدكاربيت الأوسكار هذي السنة. 

آخر شيء غير الأسود و الأبيض، أتوقع فيه أحد راح يلبس رمادي / فضي، و أتمني إني أشوف ألوان مختلفة عن دايم. على أنه مجموعة فالنتينو كانت تقريبا كلها طبعات (هي الوحيدة اللي كأنها مو مهتمة بالأوسكار)، ما أظن بنشوف طبعات بالأوسكار هذي السنة، خصوصا بعد فستان ساره ميشيل قلير بمونيك لوليه بقولدين قلوب. 

و لا ننسى غير مجموعات الأوت كتو فيه ماركيزا، و فيه مونيك لوليه و فيه ريم عكرا، كلهم ممكن يكونون موجودين على الريدكاربيت، أما وش راح تلبس ميريل ستريب اللي أتوقع إنها راح تفور بالأوسكار هذي السنة، هذا هو السؤال اللي ما أقدر حتى أخمن إجابته. 

Best Dressed: Golden Globe 2012

أمس أو الفجر كان حفل توزيع جوائز قولدين قلوب صحيح كنت متحمسة أشوف الحفل، و ما زلت، لكن الملابس اللي شفتها على الريد كاربيت ودي أقول إن أكثرها "يسد النفس"، ما أعرف ليه حسيت كل اللي جايات كأنه الحفلة كانت فجأة، بعض اللي جو صدق أشكالهم أي كلام. (حتى روني مارا ما لبست شيء من اللي كان ودي تلبسه :). 

لقد لكم بشكل عام كانت أشكال اللي جايات "مطاريس" أو بأحسن الأحوال ما كأنهم جايين لثاني أكبر حفلة بالسنة ... و لأني كنت مشتهية أشوف ملابس صدق راقية، أظن الشخص الوحيد اللي ما خيب ظني، هي أنجلينا جولي. 

قلت لكم إن أنجلينا جولي "بالنسبة لي" كانت هي الوحيدة قد الحفلة، بهذا الفستان من أتلييه فيرساتشي (خط الأوت كتو حق فيرساتشي)، الفستان مستحيل ألبسه، و لو شفته ما توقعت أنه راح يكون بهذا الشكل ... ألوانه شكله، كلها ما تحمسني إني أفكر أنه يطلع راقي بالشكل هذا، لكن أنجلينا عرفت كيف تخليه خلو، (أعتقد إن السبب، هو إن الفستان كأنه مخيط عليها). 

بصراحة كل شيء أنجلينا سوته، أتوقع إني كنت راح أتجنبه، لكنها قدرت تسوي لوك قد الريدكاربيت صدق. (التطقيم) تعرفون إني ما أحبه، لكن ما أعرف كيف مشي مع أنجلينا (جزم بالضبط زي لون الفستان، روج و شنطة تقريبا زي السفطة الحمراء). 

باختصار فستان ما كنت أتوقع يكون حلو، و إكسسوارات لو أحد قالي إنه بيختارها لهذا الفستان كان من الآخر قلت: يع. لكن أنجلينا طلعت بأحسن فستان شفته بحفل أمس. 

مين عجبكم من القولدين قلوب؟

Versace for H&M x Polyvore

أعتقد أنه كثير منكم يعرف أنه H&M سنويا تسوي تعاون مع مصمم كبير علشان يصمم لهم مجموعة بالعادة يحطونها بالسوق بشهر نوفمبر. 

المجموعات هذي ما تجينا، لأنها ما تنباع بمحلات H&M كلها، بس تنباع بفروع محددة، و زي ما قلت لكم ما تجي عندنا. المهم التعاون الجاي راح يكون مع فيرساتشي (لو كنتوا ما تعرفون إلى الآن)، طبعا زي دايم فيه eBay، صح الأسعار تصير "شوي" مو معقولة، مقارنة مع أسعارها الأصلية، بس لو كانت عاجبتكم مرة يمكن تتجاهلون الحقيقة هذي :). 

المهم بغض النظر عن إنها تنباع أو ما تنباع، أساسا هي لسا ما نزلت، و حتى اللوك بوك حقها ما طلع، لكن فيه مسابقة أظن إنها مفتوحة لكل العالم، على بوليفور. 

كيفية المشاركة:

1. لدخول المسابقة اصنع و انشر تصميمك للاحتفال بأفضل ما لدى مجموعة فيرساتشي لـ H&M. في نهاية الاسبوع دونتيلا ستختار التصميم المفضل لديها للفوز بثلاثة مظاهر كاملة من المجموعة. كل يوم سيتم اختيار 10 أفضل تصاميم للفوز بوشاح حصري من فيرساتشي لـ  H&M. 
2. بعد أن تنتهي انشرها على فايس بوك.   

دخلت بوليفور و لا لقيت شيء إلى الآن للمجموعة، لكن قبل فترة طلعت صور متفرقة من المجموعة، بشكل عام أنا مو من الناس اللي يحبون فيرساتشي، لكن أعتقد أنه فيه كثير يحبونه، لكن لحد الآن من الصور اللي طلعت قطعتي المفضلة هي جاكيت بايس بول من ملابس الرجال. 

وش رايكم بالصور اللي طلعت من المجموعة لحد الآن، لو كنتوا شفتوها؟ و متحمسين تحصلون على شيء من المجموعة هذي، أو ما تهمكم؟

Bra

بأسبوع نيويورك انتبهت للوك من عرض بروينزا سكولير، عجبني شكل اللوك، حسيت فيه جو كاريبي كثير، وصلت لحظة شك ممكن أحد يطلع بلوك يشبه كذا؟

أمس كنت أتصفح مواقع القوسيب زي العادة، و شفت هذي الصورة لريانا و هي تصور فيديو كليب ببلفاست.

للوهلة الأولآ أعنقد إن اللي منكم يعرف ريانا من قبل و يعرف كيف تلبس، ما يشوف أي غرابة بهذا اللبس (مع إني المفروض أكون وحده من هذولا اللي مو مستغربين)، إلا إني حسيت بشيء مختلف هذي المرة، و أحس إن اللوك اللي شفته عن بروينزا سكولير، و عند أكثر من ماركة منهم دولتشي آن قابانا و برادا (لحد الآن)، بيكون منشر هذي السنة، أعتقد بنشوفه على أكثر من سلبرتي (غير ريانا)، و حتى من الناس العادية بصور ستريت ستايل

.

اللبس زي ما أنتم شايفين تنورة و برا، ما فوقها شيء، و لا تحتها شيء ... للحق الشكل حلو، خصوصا لما يكون عندك بطن مشدود، لكن بغض النظر عن موضوع الجسم، بالنسبة ما أعتقد أسويها أبدا، أرجع و أقولكم شكلها حلو، بس عندي حساسية من تطليع البطن بشكل عام، كانت برا أو كروبد تي أو شيرت.

زي ما قلت لكم اللوك هذا كان ببرادا، كان ببروينزا سكولير، و بدولتشي آن قابانا، و بعروض ثانية كثيرة.

هذي صورة لبعض الأشكال اللي كانت بعروض مختلفة من نيويورك و ميلانو. من اليسار: (باند أوف أوتسايدرز، بروينزا سكولير، نمبر 21، فيرسانشي، و إيميليو بوتشي). العروض ما كانت بس برا، كان فيه كروبد توب. زي ما قلت لكم أعجبتني، أحس إنها حلوه، شيك، و صيفية، ما عندي فكرة إلى الآن كيف يمكن يسوى هذا اللوك من دون ما أحس إني مطلعة "لحم" كثير :)، أعتقد كل ما صغرت المساحة اللي بين التنورة و البرا، كل ما صار اللوك قابل أكثر للتطبيق :).

Wool Gown !!

قلت كثير إني مو من الناس الي يظنون أنه أنجلينا جولي أحلي مخلوقة بالكون. بس مؤخرا ما أعرف أنا الي متغيرة، أو أنجلينا صدق محلوة؟!!

أنجلينا رجعت من جديد للبريمرات علشان هذي المرة فيلمها الجديد The Tourist. بجد أحس أنجلينا من أكثر الممثلات الي يطلع عليهم أنهم ممثلات، ما أعرف وش أفسر هذا الشي ... بس يعني الشكل، اللبس المجوهرات تحسسك زي الممثلات القدام الي لما يجون مكان كل الناس يلتفتون عليهم من فخامتهم ...

المهم نرجع للبسها ... أنجلينا مره ثانية بفيرساتشي (تلبق عليها مرة هذي الماركة)، طبعا الفستان معدل خاص فيها أو لا ... بس أكثر شي جنني عليها أنه صوف؟!! ما قد شفت فستان سهرة صوف، و لا قد تخيلت أنه الصوف ممكن يكون فخم كذا ... بالنسبة لي كل شكلها مضبوط مرة، بس لو كنت باغير بشي بس باختار لها كعب كلاسيكي أسود، مو العاجي اللي لابسته.

الفستان الصوفي هذا ذكرني بالعبايات الشتوية الي من مخمل أو فرو يلبسونها البنات ... صراحة ما أفهما (مو يعني أنه ما أفهم الفستان هذا، بس هي مجرد فكرة جت ببالي) يعني ما عندنا ذاك البرد، و لما نطلع نلبس العبايات بس بالأماكن العامة، يعني بنفسخها بالأماكن المغلقة، أما جوات المولات مثلا فيه تدفية، و السيارة دافية، و حنا ما نمشي بالشارع طيب ليه يلبسونها؟

شرايكم بالعبايات و بفستان أنجلينا الصوف؟

The Women

الحين جينا لحقات Mad Men ... صحيح كنت متعشمة بجانواري جونز لإنها قال أنه راح تلبس شي صادم ... هو لسا غريب لبسها بس ما أعرف أول ما شفت الفستان انصدمت (بطريقة غير جيدة) حسيت أنه اثقل منها ... لكا شفت الشعر و المايك آب ما أعرف ممكن حبيته ... لسا ما أقدر أقرر، أظن أنه حلو و أكيد بيصير حلو بفوتو شوت ... بس شكلها كان غريب ... بشكل عام أظن أنه تستاهل ذكر على الاختيار الشجاع (الفستان من فيرساتشي أتلير مجموعة الربيع) ... شكرا إنها عرفت وش تسوي بشعرها و وجهها. اللوك يحتاج وقت للاستيعاب أنت مع أو ضد.

نجي لكريستينا هنديريكز ... ما أعرف أنا مو عندي مشكلة كعها، بس عندي مشكلة مع الي يسوي اكسبوز للصدر ... بالبداية على طول كرهت هذا الفستان من زاك بيزين ... بس لما شفت الناس هابة فيه رجعت أشوفه من جديد، أنا لسا مصرة أنه على جسم مو ممتلي كذا أحسن ... بس لاحظت أنه اللون اللافندير حلو عليها، ماشي مع لون شعرها، و لون بشرتها ... أظن أنه الألوان الباهتة بتكون خيار أحلى بكثير لها ... بس إلى الآن ودي لو تلبس لبس بتضحكون بس مستر شوي.

Little White Dress

اليوم أنا تعبانة مرة، بس قلت أكتب يمكن اتنشط شوي ... شفت هذا العدد من نميرو مصوره كارل لاغرفيلد و العارضة ناتاشا بولي يعرض فيه فساتين كتو من الموسم الأخير ...

لما شفت هذي الصورة الي على اليمين حسبت ناتاشا لابسه نفس الفستان الفيرساتشي الي لبسته جانواري جونز لبريمير Mad Men بس لما انتبها للأبوات شفت إنها من شانيل، قلت حليني أرجع اشيك و أشوف ... و شفت صورة جانواري و عرض شانيل و عرفت أنه الي على اليمين من شانيل، و الي على اليسار هو الأتيلير فيرساتشي ...

حطيت لكم الصور الفستان بالعكس، و لأني ما لقيت لوك بوك للفيرساتشي قلنا نحط صور جانواري من جديد ... المهم أنا أشوف الفستانين يتشابهون، بس أظن شانيل فيه فكرة من قدام يعني كارل حاس بأنه الفستانين يتشابهون جا وصور حقه من ورا كأنه يقول حقي أحسن ...

ما أعرف بس أنتم وش رايكم، وشو الفستان الأحسن؟ بالنسبة لي شانيل مو لشي بس أحسه ما يحتاج ألبس معاه أي مجوهرات.

High Street Goes Even Higher

دايم أقول إني أحب الهاي ستريت، لأنها تجيب لك ملابس حلوه و تقدر تدفع فلوسها ... اليوم جاني من ASOS رساله عن الفساتين الي عندهم، أنا صراحه شبعانه فساتين، بس لاحظت يا كثر الفساتين الي تشبه فساتين من الليبلز ... و حبيت أحطها هنا، لو ودكم بشي منها (ترا ما عليها تخفيض لسا).

قبل سنة أو أقل طلعت ستيلا ماكارتني مجوعه حلوه، كان فيهم هذا التي دريس الي عجب أختي مره ... و أنا أقلب لقيته بسعر لسا رخيص 44.4 دولار يعني 166 ريال، هنا الفستان

مؤخرا صايره مهبولة بفساتين فيرساتشي ... هذا الفستان من كارين ميلين على طول حسسني أنه فستان من فيرساتشي ... الفستان مو رخيص بس للزواجات يستاهل سعره هو ب 340 دولار يعني ب 1275 ريال، الفستان هنا

الفستان هذا من إليكسندير وانق ما فيه أحد من السليبرتي ما لبسه ... إذا كنت تحبين هذا اللوك الفستان بحوالي 67 دولار يعني 243 ريال الفستان هنا

أول ما شفت الفستان هذا حق نارسيسو رودريقز على سارا جيسيكا باركر بعدد فوق الي عن SATC و الي كتبت عنه قبل سنتين ... حبيت هذا الفستان الي حسيته على طول يصلح أنه يكون من كوليكشين رودريقيز الفستان ب 102 دولار ... يعني ب 384 ريال، هنا الفستان

هذا الفستان من كريستفور كين، لبسته إيما واتسون عند دايفيد ليترمان ... حلو و شعره رخيص .. سعره ب تقريبا 77 دولار يعني ب 288 ريال، الفستان هنا

الفستان هذا من ماكوين، أول ما شفته حبيته، لبسته درو بريمو و استهبلت فيه ... أختي لما شافت هذي النسخة عند أسوس مره انبسطت مو رخيصه بس أكيد أرخص من ماكوين، هو تقريبا ب 145 دولار يعني 544 ريال. هنا الفستان

* الموقع عنده تخفيضات قويه يجي موسم التخفيضات، بس مو على كل حال تبقى الأشياء.

Shoes Era

قبل سنتين و أكثر كانت الشناط هي السالفة ... قيمة الواحد تتحدد من شنطته، و الكل يحاول يجسيب شنطه ما فيه أحد ممكن يجيبها، و الكل لازم عنده يا لوي فيتو يا بوربري أو قوتشي ... الشي هذا التغير و المصممين هالمره لفوا على الجزم و طلعوا بجزم غريبه و مجنونه ... من الموسم هذا فيه جزم كثير حبيتها، بس قلصت القائمة ل 12 جزمة ... و كل ثلاثه حطيتهم مع بعض بتصنيف من راسي ...

التصنيف الأول خليته جزم الشارع، ما أعرف على أي أساس .. بس حسيت لو وحده عندي، و لبستها لطلعه بأمشي فيها كثير ما راح أتنكد ...أنه يمكن تخرب. من اليسار لليمين:

أيرديم، روبيرتو كفالي، و إيرميس

pollcode.com free polls

What is your favorite?

Erdem Roberto Cavalli Hermes

هذي جزم نص، نص، يعني تلبس بمناسبات عادية، بس يمكن ما أمش، عشان ما تتوسخ أو تتمخش :p و غير كذا كلها ألوان تقليدية أسود، رمادي، أبيض ... من اليسار لليمين:

فندي، لانفين، شانيل

pollcode.com free polls

What is your favorite?

Fendi Lanvin Chanel

هذي المجموعة الملونة زي ما أحب أسميها ... كذا لما جمعتهم على بعض اكتشفت أنهم كلهم ألوان، كل الجزم هنا ما تلبس للشارع، تلبس عشان تقولين للناس لا تشوفون إلا رجولي : ) من اليسار لليمني:

برادا، بلانسياقا، جان بول قوتييه

pollcode.com free polls

What is your favorite?

Prada Balenciaga Jean Paul Gaultier

هذولي جزم الحفلات، الي ما تلبس أبدا بغير الحفلات الكبيرة ... لامعه .. فخمة و تحتاج فساتين حلوه، من اليسار لليمين:

فيرساتشي، كريستيان ديور، ميو ميو

pollcode.com free polls

What is your favorite?

Versace Christian Dior Miu Miu

Versace: Niney Dress

ماراح تصدقون بس وأنا أقلب كوليكشين فيرساتشي صرت أقلب بسرعة حاسه أنه فيه شي بس يصلح لكايت هاديسون، شي يشبه هبالها بناين ... ما راح أتكلم كثير بس أنتم شوفوا و بالمناسبة حبيت الفستان مررررره ...