‏إظهار الرسائل ذات التسميات ريانا. إظهار كافة الرسائل
‏إظهار الرسائل ذات التسميات ريانا. إظهار كافة الرسائل

الثلاثاء، 5 مايو 2015

MET Gala 2015

أمس كان  ميت قالا، عنوان معرض هذي السنة: الصين من خلف زجاج العرض. علشان أقصر عليكم المقدمة، صراحة أكثر اللبس مخيب للأمال، أولا مرة قليل المصممين الصينين (أعتقد ريانا هي الوحيدة اللي كانت لابسة لمصممة صينية)، حتى المصممين الإمريكان من أصل صيني أو تايواني زي جايسون وو، فليب ليم، أليكساندر وانق، فيرا وانق، ديريك لام و جوزيف ألتوزارا كلهم كان حضورهم يا معدوم أو ضعيف.



و أنا أشوف الصور، أنتظرت كثير فان بينق بينق، صراحة عصبت شوي لأني أعتقدت أنهم ما دعوها، يعني وش دخل بيونسية مثلا تجي و لا تجي فان بينق بينق؟ (بالمناسبة، أعتقد أنه واحد من الفساتين اللي قد لبستها لمهرجان كان، معروض بالمعرض) لكن على آخر الليل لمحت صورة لها من ورا، و أنتظرت شوي، و لا طلع زيادة، و قررت أنام و أشوف بكرا. طبعا ما خيبتني فان بينق بينق حضورها كان جدا حلو، و ماشي مع ثيم الحفل/ العرض. 

أكثر وحدة عجبتني أمس هي كلوي سافني بهذا الفستان من جي دبليو أنديرسون، ما أعجب كثير، لكن أنا أعجبني مرة، كل شيء حلو، من تصميم الفستان و ألوانه و طبعاته، للإكسسوار و التسريحة، مرة عجبني شعرها بالفنقر وايفز عجبني لون الجزمة، و عجبني الشوكر اللي لابسته، و أهم شيء الإسوارة نفسها بكل اليدين. أعجبني إنها أخذت الثيم من جانب مو صيني، عطاني إحساس كأني أشوف وحدة من الجالية الإنجليزية وقت الإستعمار البريطاني بشنقهاي، أعتقد إنه إختيار مرة ذكي و مناسب للمناسبة. 

الشيء اللي عجبني بلبس ريانا، غير أنه جدا مبالغ فيه (هذا المطلوب بميت قالا)، إنها أختارت مصممة صينية قو بي (بالمناسبة قو بي مسوية تعاون مع ماك التغليف مرة أنيق). بس كنت أتمنى لو شوي طلعت البلاي سوت الفوشي أكثر على الأقل من فوق. 

زي ما قلت لكم مرة ما عجبتني أكثر الإختيارات، كان فيه ملابس أكثر صينية موجودة عند مصممين مختلفين، ما أعرف ليه ما فيه أحد لبسها، أعتقد راح أتكلم عن هذي الملابس بموضوع ثاني. 

الثلاثاء، 1 مايو 2012

Best Dressed: April '12

زي ما وعدتكم اليوم بأكتب عن أحسن ملابس شهر أبريل. بصراحة أعجتني ملابس كثيرة بهذا الشهر، ما أقول أنه فيه أشياء مبهرة، لكن كان فيه أشكال و أفكار حلوه كثير. و أهم شيء فيه أسماء جديدة ما قد كتبت عنها، فرصة لي أنه أتكلم لو شوي عن ستايلها. 


ريانا بستيلا مكارتني
مع إني ما أحب ريانا (ما أكرهها بعد). لكن لازم أعترف إن لها شخصية تعطي الملابس شكل مختلف. من فترة ما حسيت إن ريانا شكلها شيك و من دون ما أحس فيه شيء مخرب، و شيء رخيص (زي لون شعر بايخ، أو فتحة مبتذلة).

كايت بوسورث بإيزابيل ماران
أظن اللوك هذا من كايت هو المثال المناسب لفكرة السويتر بالصيف، اللي قلت لكم عنها. أعجبني لون و شكل التنورة، أعجبتني المجوهرات اللي لابستها. و بعد أعجبتني السنيكرز، أعتقد إنها مسوية تضاد حلو مع باقي اللبس.

فان بينق بينق بتاداشي شوجي
بالعادة ما أحب شكل فان بينق بينق. هي حلوة، لكنها كثير مرات تبالغ بالإكسسوار و أنا شخصيا ما أحب لما أحس إن الواحد قاعد يتغصب الأناقة.

مليسا جورج بكالفن كلاين
من فترة ما أتذكر إن فستان لكالفن كلاين أعجبني.مع كل فكرة المنيمليزم اللي هي خط الدار، بالنسبة لي صعب ينلبس شيء من الماركة من دون ما يطلع كأنه بيجاما أو قميص نوم. لكن مليسا عرفت كيف تلبسه، مع هذا الشعر و المكياج.


تايلور شيلينق بـ بيتر بلوتو
تايلور جالسة تروج لفيلمها مع زاك أفيرون ذا لوكي ون. شكلها كان أنيق بكل البريمرات، لكن كله أسود و رمادي. مع هذا الفستان حسيت فيه شيء منعش بشكلها، شيء يحسس بالصيف.

لي لي سوبيسكي بجيل ساندر
تكلمت قبل عن مكياج لي لي بافتتاح تربيكا الأفلام بنيويورك. وقتها قلت لكم أن شكلها مرة حلو. بصراحة أعتقد لي لي مخلوقة لماركات زي جيل ساندر.

دري هماينقوي بدولتشي آند قابانا
قد قلت لكم فيه شيء "كول" عند دري. دري كانت حاضرة لحفلة ملبري لكوتشيلا، لبست هذا اللوك من دولتشي آند قابانا ربيع 2012، تعرفون إني حابة طبعات الخضار اللي كانت تقريبا بكل المجموعة، فأكيد باحب هذا الشكل من دري.

داكوتا فانينق بـ برادا
صراحة قبل لا أختار اللوك كنت مرة مترددة، خصوصا إن داكوتا ما غيرت شكل شعرها. لكن الفستان عجبني مرة، فقررت إني أسوي نفسي كأني ما عمري شفت داكوتا، و لا أدري إنها ما تغير تسريحتها. و اللي خلاني أتخذ هذا القرار، إن شعرها مو سيء مع اللبس.


الخميس، 12 أبريل 2012

Coat As a Dress

تقريبا الصيف خلاص جا، ما أظن فيه أحد يلبس إلى الآن لبس ثقيل (شفت صور أنه فيه ثلج نازل على حائل و النماص)، لكن بكل الأحوال حتى حائل و النماص بيجيهم الصيف :) من الأشياء اللي كانت تقريبا موجودة بكل عروض صيف 2012 هو الكوت أو البالطو، طبعا أكيد صيفي و خفيف، لكن ببعض العروض خلته كأنه فستان. 

الصباح  اليوم شفت هذي الصورة لريانا لابسة بالطو ترينش من دون ما تلبس تحته شيء، يعني هو الفستان. 

ريانا مو هي اللي مخترعة هذي الحركة (أكيد)، و لا أول وحده تلبس بالطو بهذا الشكل، قلت لكم كان موجود بأكثر من عرض، و لبسته أكثر من سلبرتي بشكل هذا من بداية السنة (أتذكر بلايك لايفلي، و أليسكا شونق). لكن بالنسبة لي لما ريانا تلبس شيء أو تسوي موضة معينة، هذا معناها أنه راح تنتشر أكثر. (بالمناسبة مبسوطة إن ريانا صبغت شعرها أسود من جديد). 

ما أعرف مين راح نشوف المرة الجاية لابس بالطو كأنه هو الفستان (قصدي من المشاهير)، أو مين ممكن تلبس بالطو للريدكاربيت (أحسه ممكن يكون حلو على الممثلات الصغيرات زي إيل فاننيق). 

بصراحة ما انتبهت قد إيش البالطو موجود بمجموعات الصيف لمحلات الهاي ستريت، لكنه زي ما قلت لكم موجود بكثير من عروض الهاي فاشن لربيع و صيف 2012، مبسوطة على فكرة البالطو كثير، لأنه هذا يعني لما أدور على بالطوات صيفية بألقي خيارات كثيرة (قبل صيفين أو أكثر كنت أدور على بالطو ات صيفية، لصدقتي لكن بالموت حصلت على شيء، كنت مبسوطة عليه، بس الخيارات ما كانت أبدا كثيرة، و لا سهلة). حتى إني بعض المرات و أنا أدور و لا ألقى كنت أفكر فيه شيء أسمه بالطو صيفي أو أنا أخترعته، و صدقت أنه موجود :)

(من اليمين: جامباتيستا فالي، فالنتينو، إيرديم، كريستوفر كاين)

قلت لكم كثير عروض أختارت تعرض بالطواتها كأنها هي الفستان (من دون ما يكون تحتها شيء حتى تايت)، و بعضها شكله ما كان بس للطلعات العادية، و أنا جالسة أشوف بعض العروض بالطواتها كانت كأنها فساتين من فخامتها. (أتمنى أشوف جامبتيستا فالي على الريدكاربيت، خصوصا علي ممثلة صغيرة). 

(من اليمين: نينا ريتشي، بوربري، فيندي، أليكساندير وانق)

المجموعة الثانية اللي حطيتها (لأن الخيارات كانت كثيرة و تحسفت بس أعرض أربعة)، هي اللي أعتقد إنها ممكن تلبس كل يوم. أعجبني مرة بالطو نينا ريتشي و أليكساندير وانق (بس لو كان أطول شوي) أحس أنه ممكن ألبسها لحالها. حبيت فندي أحس أنه خفيف مرة، حتى من خفته، أحس ما يمكن يلبس تحته شيء. 

شرايكم بالبالطو كفستان، بالنسبة لي أحس ممكن ألبسه "كاجوال" لكن لمناسبة رسمية أحسه شوي رسمي على لبسي بالعادة. أنتم ممكن تلبسونه؟ 

الأحد، 1 يناير 2012

Men's Swim Short

قد تكلمت قبل من زماااان عن حبي لشورتات السباحة حقت الرجال، أتذكر سويت لوك لها، بعدين أقنعت أختي إنها تشتري (هي تحب هذي الأشياء) بعدين أكتشفت لما شفت سيكس آن ذا سيتي متأخر يمكن قبل سنتين إن كاري براد شو قد سوت الحركة، أظن بحفلة بالصيف كانت بهامبتونز. 


بأسبوع الموضة بنيويورك الخريف اللي فات شفت هذي الصورة (يمين) لهاناه قابي و هي لابسة هذا الشورت، زي تقريبا كل لبس تلبسه هاناه يعجبني كيف أنه كل مرة أحس إنها صدق تنبسط و هي تختار لها ملابس. 
شفت اليوم هذي الصورة لريانا و هي بإجازة أظن ببربادوس و هي لابسة هذا الشورت مع التي الأبيض هذا، أعجبني كيف مزينة ريانا اللبس (العقود)، يمكن أشوف الكعب شوي مبالغة، يعني بالنسبة لي بيكون شكله حلو مع جزم كونفيرس، أو يمكن شباشب. علشان كذا رحت أشوف مستر بورتيه، لأني أحب هذا الموقع، حتي لو ما كان يبيع إلا ملابس و أغراض رجال.


قلت لكم رحت لمستر بورتيه، و دورت بشورتات السباحة اللي عندهم، و لقيت أشياء كثيرة، لكن الشورتين هذولا اللي فوق، أكثر شيء عجبوني، بالذات الأزرق اللي على اليمين أتمنى لو ألبسه الحين، و زي ما سوت ريانا تي شيرت أبيض، سلاسل كبيرة ذهبية، و خلاص هذا كل شيء.
أسعارها مو رخيصة، بس لو بغيتوا تشيكون عليها، هنا تلقون السماوي، و هنا البيجي الفلورال.  

شرايكم بشورتات السباحة الرجالية؟

الأربعاء، 28 سبتمبر 2011

Bra

بأسبوع نيويورك انتبهت للوك من عرض بروينزا سكولير، عجبني شكل اللوك، حسيت فيه جو كاريبي كثير، وصلت لحظة شك ممكن أحد يطلع بلوك يشبه كذا؟


أمس كنت أتصفح مواقع القوسيب زي العادة، و شفت هذي الصورة لريانا و هي تصور فيديو كليب ببلفاست.
للوهلة الأولآ أعنقد إن اللي منكم يعرف ريانا من قبل و يعرف كيف تلبس، ما يشوف أي غرابة بهذا اللبس (مع إني المفروض أكون وحده من هذولا اللي مو مستغربين)، إلا إني حسيت بشيء مختلف هذي المرة، و أحس إن اللوك اللي شفته عن بروينزا سكولير، و عند أكثر من ماركة منهم دولتشي آن قابانا و برادا (لحد الآن)، بيكون منشر هذي السنة، أعتقد بنشوفه على أكثر من سلبرتي (غير ريانا)، و حتى من الناس العادية بصور ستريت ستايل
.

اللبس زي ما أنتم شايفين تنورة و برا، ما فوقها شيء، و لا تحتها شيء ... للحق الشكل حلو، خصوصا لما يكون عندك بطن مشدود، لكن بغض النظر عن موضوع الجسم، بالنسبة ما أعتقد أسويها أبدا، أرجع و أقولكم شكلها حلو، بس عندي حساسية من تطليع البطن بشكل عام، كانت برا أو كروبد تي أو شيرت.

زي ما قلت لكم اللوك هذا كان ببرادا، كان ببروينزا سكولير، و بدولتشي آن قابانا، و بعروض ثانية كثيرة.


هذي صورة لبعض الأشكال اللي كانت بعروض مختلفة من نيويورك و ميلانو. من اليسار: (باند أوف أوتسايدرز، بروينزا سكولير، نمبر 21، فيرسانشي، و إيميليو بوتشي). العروض ما كانت بس برا، كان فيه كروبد توب. زي ما قلت لكم أعجبتني، أحس إنها حلوه، شيك، و صيفية، ما عندي فكرة إلى الآن كيف يمكن يسوى هذا اللوك من دون ما أحس إني مطلعة "لحم" كثير :)، أعتقد كل ما صغرت المساحة اللي بين التنورة و البرا، كل ما صار اللوك قابل أكثر للتطبيق :).

الاثنين، 27 يونيو 2011

I ♥ 90's

ما أعرف وش شعوري تجاه ريانا (خصوصا ستايلها)، بس أعرف إني أحب ذكرياتي بالتسعينات خصوصا و إنها تقريبا الفترة الي عرفت فيها وش أنا جالسة ألبس أو وش أمي تلبسني. بعد بالتسعينات أعطتني أمي لقب أحتفظ فيه لنفسي لأنها تقول أني أحوس الملابس، بالتسعينات بعد قلت لخالتي و لعمتي بعد (عندي كثار) بس ثنتين منهم طلبت منهم إني آخذ ملابسهم لا كبرت، ما أعطوني شيء يوم كبرت، و لا أدري أساسا وش صار على أغلب ملابسهم اللي كانت تعجبني.
The 90's


Acne twist dress, £150
Zara heel pumps, $60
Jimmy Choo clutch bag, $1,295
Chan luu jewelry, $420

شفت الصورة اللي فوق لريانا أمس بعد واحد من حفلات الجوائز الإمريكية للموسيقى، و اللي ما أدري كم عددها، أو أصلا هم حتى يعرفون هذي الحفلات، و إلا فجأة يدق عليها مدير أعمالها و يقول لها فيه حفل جديد. ما علينا، بس لما شفت هذي الصورة لريانا، أعجبني شكلها مرة، فيه طعم تسعينيات بقوة، خصوصا الفستان الفضي هذا (ما أعرف من وين)، شكله بساطته، كلها تعطيه هذا الشعور، بعد ما أعرف ليه حسيت أنه كيري برادشو (جيسيكا باركر بسيكس آن ذا سيتي). 
المهم قررت إني أسوي سيت عن لبسها، أو لوك التسعينات هذا. أول شيء أخترت هذا الفستان من أكني، من فترة عاجبني خصوصا من ورا شيكوا عليه. 
بعد أخترت معاه هذا العقد الأحمر، لأنه من فترة طويلة من مجموعة Lanvin for H&M و فكرة إكسسوار أحمر عاجبتني. 
بغيت كلتش فضية مع اللبس، و كعب أسود ببوز (أعرف إن بعض الناس يسمونه كذا)، الكعب هذا أعجبني مرة، شكله حلو و غالي، مع إن سعره جدا معقول و من زارا، يعني لو عاجبكم شوفوا يمكن تلقونه بوحده من الفروع. الكلتش الفضية من جايمي تشو، شفتها ببوتيكهم بسنتريا قبل فترة، فيه وحدة ذهبية زيها، أظن كلتش زي هذي، ممكن تمشي مع أي لبس سهرة.

الأحد، 29 مايو 2011

Tour Time

منيب مرة مع الأغاني و المغنين، يعني اللي يصادف إني أسمعه، أسمعه، لكن ألاحق أخبارهم و ألبوماتهم، ما قد سويتها. و لا تعجبني كثير الخنبقة اللي يسوونها بالحفلات، هذي الملابس الغريبة "الكستومز" يعني ما أشوف إلا إنها فكرة فاشلة، و تأكدت من هذي الفكرة بفيديو كليب بيونسيه الأخير لأغنيتها Run the World، أغنية كلماتها تافهة و لا لها معنى، بس إنها كانت بكل مكان بالنت علشانها لبست عشرة، أو ما أعرف كم فستان من الهاي فاشن و الأوت كتو بالفيديو (سو عليه سيرش باليوتيوب، إذا ودكم تشوفونه).
زي ما قلت لكم مانيب مهتمة بأخبار المغنين، و لا أعرف من اللي راح يسوي جولة غنائية، و مين لا، بس هو بالعادة بالصيف العالم تحمي الطار :P.
علشان كذا سويت هذا الموضوع اللي أخترت فيه من مجموعات الخريف الأخيرة ملابس، ممكن تلبسها أربع مغنيات لحفلات الصيف.


تتذكرون التصنيف اللي قلت لكم عنه قبل "بيتاتيك"؟ اللي حطيت فيها آنا ديلو روسو. القائمة فيها بعد ليدي قاقا. هذي المخلوقة ما أحبها أبدا، و لا أحب أشوفها طريقتها "تراني شخص غريب" تنرفزني.
ما علينا هي موجودة، و لا أقدر أغير شيء، علشان كذا باقترح وش ممكن تلبس لوحدة من حفلاتها، طبعا هي تلبس ملابس غريبة كثيرة، و تلبس لأكساندير ماكوين كثير، خصوصا إنها غنت بعرضه الأخير اللي قبل لا ينتحر ...
أحس الفستان هذا بتعديل بسيط، ما أعرف وين ممكن يمشي عليها، لأنه بهذا الشكل، أحس أنه كبير مرة. يمكن تقلل الأشياء السوداء اللي متدلية من الفستان.


من قائمة المغنيات اللي اليوم بأحطهم يمكن فلورانس هي أكثر وحده أحبها، صح ما أعرف أسامي أغانيها، و لا ألبوماتها، بس ملابسها حلوة، و صوتها حلو (إذا تحبون الموسيقى "الروحية") دور عليها و أسمعوا لها.
تعجبني بملابس فلورانس، أنه أغلبها لو لبستها فيروز (طبعا و هي أصغر من الحين)، بتطلع عليها حلوة، أصلا ما أعرف وش يربطها ببالي بفيروز ؟! بس ما يهم أحس أنه الفستان الأخضر هذا من رالف لورين (و اللي بادية أحبه من جديد)، أحس بيطلع عليها حلو، لو بعد يطول من ورا.


بالأساس هذا الفستان، هو الفستان اللي خلاني أفكر بهذا البوست، أول ما شفته قبل شهور من عرض فيفيان ويستوود، ريانا أول من من جت ببالي، طبعا حفظتها عندي، و كنت راح أسوي بوست عن ريانا وش ممكن تلبس، بس إني تعيجزت، وراح الوقت و بطلت، و الحين قلت أحطه مع مجموعة مغنيات ... بس باختصار، هذا الفستان مخلوق لها.


بديت ببيونسية و الفيديو كليب و الأغنية البايخة، بس هذا ما يعني إني ما أكتب عنها، و أقدم لها خدمة P: المهم أخترت لها هذا الفستان لها من مجموعة دولتشي آن قابانا اللي أكثرها نجوم، صراحة أول ما تصفحت المجموعة، ما أعرف شعوري كان غريب تجاهها، بس الحين بعد شهور و أنا أشوفها حبيتها، خصوصا بعد ما شفت واحد من فساتينهم على زوي سالندا. أحس المجموعة الأخيرة بالنجوم، و الترتر تشبه بونسية خصوصا جو الديسكو نهاية السبعينات و الثمانينات.

وش رايكم أنتم بالأختيارات؟ و عندكم مغنية مفضلة من القائمة اللي حطيتها أو غير (ملابس و موسيقى)؟

الجمعة، 13 أغسطس 2010

Fashion Dairy: Rihanna



أنا مو من المعجبين بريانا (ما أعرف أغانيها زين) بس قصدي يعني ستايل و شخصية ... ملابسها أحسها sluty شوي، فيها تفسخ بايخ المهم الأسبوعين الي فاتت كل شوي طالعة، و لبسها كثير منه حلو و شعرها الأحمر، أحس أنه لابق عليها (أصلا من أول ما صبغته و أنا عجبني أكثر من البرتقالي) البايخ الأول .
أول لبس عجبني بالإسبوعين الي حطيت عنهم هو لبسها من بروينزا شولير الأخضر من مجموعة الربيع ل 2010 ... أنا بشكل عام حابة المجموعة كلها، صحيح مو حابة الحزام زي دايم، و لا عجبتني الصنادل الغلاديتر ... يعني ببالي لو لبست شبشب أسود كان بيكون أحلى ... بس هذي ريانا يعني لازم تخلي الشي edgy شوي.
اللبس الثاني جينز شورت مع وردي بوي فرايند جاكيت ... اللبس ما فيه شي جديد .. بس عجبني الكروبد تي لأنه شفاف.
اللبس الأخير ما أعرف من وين بالضبط شاكة بثلاثة أسامي (فيرسيس ، ستيلا، و أوسكار) بس عجبني مره، كلاسي الدانتيل و القصات حقاته مطلعته مره حلو، أظن أنه بيطلع حلو على أي أحد خصوصا أنه أسود و يغبي عيوب الجسم

الجمعة، 8 مايو 2009

Rihanna Rock 'n Roll Style


ريانا صاير لبسها حلو .. لما أقول حلو ترا مو يعني أني ممكن ألبس زيها، بس أنا ما أحب الناس تنسخ بعضها، يعني كل واحد يلبس زي ما يحس أنه لابق عليه .. ريانا ألوانها فاقعة، أقمشتها تلمع، و تلبس إكسسوارات كثيرة، أكثر شي أكرهه فيها شعرها .. ما أحبه أبدا .. شييييين

عجبني الجاكيت الأصفر، أكره البنطلون المقطع ما أعرف ليه بس الأشياء الي مقطعة ما أحبها كيلون مقطع، شيرت مقطع و كل شي مقطع، ما أحبه.

أحب البناطيل الهاي ويست و كلاسيكية عجبني اللوك كامل طبعا شعرها خارج الحسبة .. الكعب الذهبي مع السلاسل يذكرك إنها ريانا.

عجبني البنطلون الثالث قوووووة لونه حلو، ما أحب التوبز الجلد، ما أحب تكثير الجلد .. بس بشكل عام اللوك حليو.

هذا الشكل تحس أنه ريانا القماش المتيل .. مع الفوشيا و الجزم الجلد، مع الإكسسوار الكبير.

مواضيع ذات صلة:

ريانا بمونيك لولير فاصل إعلاني ..