أمس كان فيه تربيكا فيلم بنيويورك و حضر فيه مجموعة من المشاهير منهم داكوتا فانينق (اللي إلى الآن ما غيرت شكل شعرها). و من الحاضرين كانت لي لي سوبيسكي بفستان من مجموعة جيل ساندر ربيع 2012، يمكن تعرفون إني أحب جيل ساندر، لكن ما قد تكلمت عن لي لي بهذي المدونة، أولا لأنه ما حصل مناسبة، الشيء الثاني لأن ظهورها جدا قليل، لكن لي لي تعجبني مرة (أعتبرها من أجمل النساء الموجودات بهوليوود).
شخصيا ما أحس إن لي لي تحتاج شغل كثير لأنها حلوة، و عندها بشرة مخيفة :) لكن هذا ما يمنعها إنها دائما تطلع بأحسن شكل. غير اللبس (اللي أعتقد أنه يستاهل يدخل من أحسن فساتين شهر أبريل)، مكياجها عجبني مرة، عجبني الظل البرتقالي حوالي عيونها، ما أعرف ليه أحسه كأنه إشعاع يقول شوفوني ... لما شفت مكياجها (مو أول مرة تسوي الظل كذا، بس أول مرة أشوفه برتقالي بالشكل هذا). تذكرت كلام لمايك آب أرتيست (ما أعرف إذا تعرفونها قبل أو لا) ليسا إليدريج، (بالمناسبة أحس نفسي مالي شخصية لما أقرأ لها أي نصيحة بالمكياج على طول أطيعها :S) ما يهم أتذكر إني مرة قالت (مع إنها ما كنت مقتنعة مرة) أنه لو بغيتي تخلين لون عيونك يبرز أختاري ظل عكس لون عيونك و أتذكر إنها قالت لو عيونك بني غامق روحي للفضي، لو عيونك خضراء أختاري الأحمر و درجاته، لو عيونك زرقاء أختاري البرتقالي أو البني. و طبعا لأن ليسا ما كانت حابة الفكرة، ما حاولت أسوي شيء زي كذا (مو قلت لكم مالي شخصية :). بس لما شفت هذي الصورة للي لي أعتقد إني بأدور على لون الظل اللي عكس لون عيوني و أجرب أسوي زي مكياج لي لي (يمكن أطلع زيها:).
ملاحظة صغيرة أخترت هذا الظل من مايك آب فوريفير أسمه "أكوا كريم" مع أنه مو رخيص لكن لأني جربته و كان مرة حلو، ألوانه حلوه، يثبت على العين (ضد الماء)، سهل نشره و توزيعه على الجفن، و ينشف يعني بس تسوينه مضبوط على عينك ما عاد ينحاس معاك. و أهم شيء ممكن تستخدمينه كبلشر (أحب الأشياء اللي أقدر أستخدمها أكثر من إستخدام) هنا شوفوا بعض الألوان.
شرايكم بمكياج لي لي؟ قد جربتوا تستخدمون هذي النظرية حقت "أختاري لون ظل عكس لون عيونك"؟
ليست هناك تعليقات:
إرسال تعليق