Lilac & New Thing Added to My Wishlist

أعرف إني من زمان ما كتبت متواصل، و أعرف أني بطلت أطلع أعذار، لأن فعلا ما عندي عذر، إلا أنه ما جا ببالي أي شيء أكتبه، اليوم قبل لا أنام جا ببالي أكثر من صورة / لبس عجبوني بالفترة الماضية و حسيت أنه طلع معاي فكرة موضوع أتكلم عنه.

أول صورة بهذا الوكلاج قد شفتها، و عجبتني و علقت براسي هي صورة فيرونيكا هيلبورنير (ستايلست ألمانية)، بهذا الفستان الليلكي من كريستوفر كاين (تحت وسط)، الصورة قديمة، يمكن قبل سنة أو أكثر، بس علقت ببالي، لأنه مرة عجبني اللونين اللي اختارتهم مع بعض، و أحس إن جلست طول هذي الفترة أنتظر فرصة إني أخلط هذا اللون ( لون البالطو) اللي ما أعرف وش أسميه، (أعتقد كونياك) مع ليلكي. الصورة الثانية اللي علقت ببالي هي الصورة الأولى فوق من اليمين من عروض الخريف اللي كانت قبل شهر و نص، اللبس من لوك بوك سي باي كلوي، اللبس مو مميز، لكن أعتقد التنسيق مرة أنيق، و أول ما شفت التنورة/ البنطلون الوسيع من زارا (يسار فوق)، على طول جا هذا اللبس ببالي، و فكرت إني أنسق حولها لبس، بوحي من هذي صور، و أشياء شفتها و أعجبتني زي السنيكير الأديداس من تعاون فاريل وليمز اللي أسمه سوبر كلور. المجموعة تقريبا كلها سولد أوت على الموقع، بس إذا كانت موجودة بالمحلات، أعتقد هذا اللون و اللي أسمه mauve tint لون يمكن قليل يشوفه مميز، لكني أحسه مرة حلو و أنيق، بالذات مع لبس كله ألوان محايدة. التوب بغيت قميص رسمي و لا هو رسمي بنفس الوقت، و حسيت هذا القميص من مونكي بيكون حلو مع اللبس. آخر شيء و أغلى شيء، كنت أدور إكسسوار يكمل اللبس، و جا ببالي "شوكر" و طحت على هذا الشوكر من جينفير فيشير، و للأسف أنه الحين دخل قائمة الأمنيات حقتي، سعره مو مرة غالي (قصدي مو شيء فوق العشرة الآف أو شيء زي كذا، بس 495 دولار تحتاج له واحد كريم، يعرف يعطي هدايا حلوة (لا تستحون تطلبون رقم حسابي للتحويل P;). 

وش رأيكم بالمجموعة، و تفضلون أكتب كذا كل فترة شيء زي المود بورد، مع إقتراحات لملابس و إكسسوار ممكن تشترى؟ 

Off Shoulders, Ruffle Top?

لو كنتوا متابعين من فترة للمدونة، يمكن لاحظتوا إني اتكلم تقريبا كثير عن ڤيكا چازينسكايا (و إلى الآن مو متأكدة هذا النطق الصحيح لأسمها). للي فاته قبل كلامي عنها، هي مصممة روسية، بالنسبة لي مو بس أحسن مصممة روسية موجودة، بس من أحسن المصممين الجدد. المهم قبل فترة قصيرة ڤيكا أعلنت إن لها تعاون مع آن آذور ستوري (ماركة تابعة لإيش آند إم بس أغلى شوي).  بعدين لأنه محلات آوذير ستوري مو موجود غير بأوروبا عرفت إن مالي نصيب فيه، بس من اللوك بوك أعجبني مرة هذا التوب. 

حتى بعد ما عرضت المجموعة على موقع كوليت، خلصت قبل حتى ما أدري أنه موجود على الموقع. بالعادة (نظريا) لبس زي كذا أبدا ما أفكر فيه، طبعا قصدي لي: أوف شولديرز و رفلز، أبدا مو شيء ممكن يعجبني، مرة ثانية أقصد لي، أو علي. لكن لأنها ڤيكا اقتنعت أنه شيء أبغى ألبسه (أعرف مالي شخصية P:). 

بس علشان أوضح إني الموضوع مسألة ذوق شخصي لا أكثر، ما أعرف ليه أحس الرفلز و الأوف شولدرز (مع بعض) أنهم مرة بوهو (كوتشيلا P:) أو مرة بداية الألفية، أو بأحسن الحالات لبس إجازة على البحر. بس زي ما قلت لكم لأن ڤيكا صممت شيء زي كذا، حسيت أنه أنيق و لطيف. و لأني كذا دايم لما الشيء ما يحصل لي أشتريه لأسباب (عدم توفر أو سعر) بالمناسبة أسعارها ما كانت غالية، ما فيه شيء أكثر من 100 يورو، طبعا أنا أتكلم بالمقارنة مع أسعار ملابسها الأصلية شيكوا عليها عند نيت أي بورتيه.

زي ما قلت لكم لما ما أقدر أحصل على شيء عجبني أقنع نفسي أنه أحسن شيء موجود بالعالم، و هو الشيء اللي كنت أحتاجه علشان شكلي يطلع حلو. و لأني فقدت الفرصة بالحصول عليها (أيوه شيكت على إي باي) المهابيل هذي المرة ما دروا عن هذا التعاون. (المهابيل أقصد فيهم اللي يشترون هذي التعاونات علشان بس يبيعونها بعشرة أضعافها على إي باي للناس اللي ما حصل لهم فرصة أنهم يشترون الملابس). المهم زي ما قلت لكم دورت بإي باي و لا حصلت شيء، فقررت إني أدور أشياء تشبه لها بمواقع و محلات ثانية. طبعا قصدي بتشبه لها، إنها رفلز و أوف شولدرز. و أعتقد إني حصلت نتايج كويسة، موب كويسة قد التوب اللي من ڤيكا (على الأقل هذا رأيي)، لكنها كويسة. و أعتقد إنها تستاهل أحد يفكر فيها، و أهم شيء من وجهة نظري، على إنها تقريبا نفس الفكرة، إلا إني أشوف إن كل وحدة تصلح لستايل معين، و ممكن كل واحد يلقى الشيء اللي يعوض عليه خسارة توب ڤيكا چازينسكايا مع آند أوذير ستوري P:. 

خلوني أبدأ بشيء مهم يستحق الذكر، اللي هو أعتقد إن زارا صاير مرة حلو، أعرف أنه "يسرق" أفكار المصممين، بس بالنهاية يطلع بملابس شكلها راقي بأسعار معقولة نسبيا (لأن عندي قناعة إن كل المحلات ما عادت معقولة، و أنا عقلي إلى الآن مو راضي يتبرمج). 

طبعا ليه تكلمت عن زارا، لأني اخترت منه خيارين (الأول من اليسار فوق، و الأول من اليمين تحت) أعتقد إن الأول من اليمين تحت من أكثر الأشياء اللي تشبه التوب اللي من ڤيكا، مع ذلك أظن لي شخصيا أميل للي فوق. عجبني مرة التوب اللي من فري پيپول (فوق يمين)، أعتقد أنه مرة صيفي و مرة أنيق. الخيار الأخير (تحت يسار) يعني خيار ممكن "ناستي" لأنه من ناستي چال (; (أعرف نكتة بايخة)، لكن لو يعجبكم هذا الستايل، أظن هذا خيار حلو. 

أنتم وش رأيكم بهذا التوب؟

My Idol Summer

أعرف إني بعض المرات أتحمس للأشياء قبل وقتها بفترة طويلة، بس عندي قناعة إن حماسي هذا لو ما نفع ما ضر. المهم الشيء اللي من الحين جالسة أدور له هو أشياء عطلة صيفية (لبس و إكسسوار و غيره)، و طبعا لما أقول عطلة، قصدي مكان حلو أسافر له، و أشتري أشياء حلوة له. (ما أعرف ليه) صحيح أنبسط بالسفر، بس ما أعرف ليه، أحس إني بعض المرات أتحمس لأشياء مالها معنى (تحملوني شوي). 

أولا لازم أقولكم إني من فترة طويلة و أنا أدور زيت يعطي لمعة ذهبية للجسم، دورت كثار منهم زيت بودي شوب و أشوف أنه لما يفرك يروح اللون ما يبقى غير قليتر على الجسم، و لو بغيت التأثير هذا كان حطيت قليتر من البداية ما يحتاج أتعب نفسي و أدور على زيت للجسم. فتقريبا كل فكرة التدوينة هذي تدور حول الزيت. 

أخيرا حصلت زيت يعطي اللون واللمعة الي أبغاها و أعتقد أنه زين، صحيح أنه مو رخيص أبدا، لكن أعتقد أنه "الإكسسوار المناسب" لأي مناسبة كبيرة بهذا الصيف، أو أي صيف، ما دامت الناس تعتقد أنه البشرة اللي فيها لمعة ذهبية شيء حلو. 

الفستان اللي كأنه شيرت من زارا (تقريبا ب 200 ريال، و منه لونين غير هذا)، شفته قبل فترة و أعجبني، حبيت أنه أطول من ورا، حبيت بعد خفته، شكله، أعتقد أنه من نوعية الفساتين  اللي تطلع حلوة على نوعية أجسام مختلفة، و تخلي أي أحد يلبسها ذوق. 

الشنطة من ريتشيل زو، هي شنطة/ حزام، عاجبتني من شفتها بعرضها لربيع و صيف 2013، أحس فيها شيء ما أعرف كيف بس ذوق براحة، شيء هيبي. الربطة بعد من واحد من عروض ربيع و صيف 2013، تكلمت عنها قبل هنا، هي من عرض مارك باي مارك جايكوبز (أعتقد إني لازم أدور أو أسوي لي ربطة ملوية زي هذي) أحسها تصرخ عطلة. 

الجزمة أو الصندل الجلي (هم كذا يسمونه) من توب شوب، عاجب أختي مرة، أتذكر إنه هذي النوعية من الصنادل كانت المفضلة عند أمي و أنا صغيرة (ما أعرف كم شرت لي فردة)، بس أتذكر آخر وحدة كانت سوداء، و مرة باستراحة بالظلام كنت لابستها، بس ما ربطت الحزام، قعدت أصارخ أحسب أنه عقرب علق برجلي :S. آخر شيء، الحلق من أيسوس، تلقونه هنا لو كان عاجبكم. 

From day to night with Poppy

أعرف إن قائمة الناس اللي أتكلم عنهم هنا تتوسع، و شخصيا أحاول أطلع عن الناس المعتادة، لأن بالعادة السلبريتيز المعروفين أكثرهم ستايلهم ممل (حقيقة). صحيح إني بعد أحاول ما أتكلم عن ناس مالهم وظيفة، و وظيفتهم الوحيدة الترزز بالحفلات، فيعني بالنهاية أحاول آصل لحل بالوسط. 

قبل يومين شفت هذي الصور لبوبي دوليفين (للي ما يعرفها هذي الأخت الكبيرة لكارا، و للي ما يعرف كارا، كارا عارضة بريطانية موجودة بكل مكان بتمبلر) بوبي بعد عارضة، صحيح مو بشهرة كارا (و لا بحلاها على الأقل من وجهة نظري)، لكنها (بعد من وجهة نظري) ذوقها أحلى بكثير من كارا. 

بوبي مشاركة بشيء على موقع فوق يو كي اسمه today i'm wearing و فيه تعرض لبسها كل يوم لمدة شهر. كثير من الملابس أعجبتني، لكن قررت أكتب عن لبسها بالثلاث صور اللي فوق، و أحاول أبين كيف ممكن الواحد يلبس اللبس المناسب لكل وقت من اليوم. 

من اليمين: بوبي بلوك يصلح لدوام، ببنطلون و تي شيرت (أنيقة من دون تكلف) ثم أضافت لهم هذا العقد، و أهم شيء شنطة نيون أعطت اللبس حياة (يمكن ما أضيف عليه إلا بلايزر لدوام). فوق يسار: بوبي بفستان شيفون (من أيسوس بس للأسف ما لقيته شكله خلص)، و لابسة تحته مايوه بطبعات من توب شوب، قد قلت لكم قبل إن هذي المايوهات عاجبتني، بطلت أفكر فيها من فترة، بس بعد الصورة هذي لبوبي أظن إني بافكر جديا بواحد. أعتقد هذا اللبس مناسب جدا لحفلة بالنهار. يسار تحت: بوبي بلبس حفلات (ليلية)، تنورة و توب أزرق ملكي. روج أحمر، و بالنسبة لي أهم شيء إنها لبست معاه هذا الجاكيت جلد و ستودز من زارا، أعتقد أعطى اللبس شوية حديه "إيج". 

هنا تلقون باقي الصور اللي أعجبتني، من أكثر الأشياء اللي أعجبتني الجاكيت الجيشي من بوتشي (أول واحد بالألبوم). 

أيش أحسن لوك عندكم؟ و أعجبكم ستايل بوبي؟

Sweaters for Summer

من فترة مو قصيرة شفت إيدتوريال لإموجين بوتز (ممثلة بريطانية للي ما يعرفها) على مجلة تانك. الإيديتوريال ما فيه شيء مبتكر، أكثره مأخوذ مباشرة من العروض نفسها، لكن أختيار الملابس كان حلو، و الصور حلوة. اليوم و أنا جالسة أفكر بفكرة سويتير صيفي، تذكرت صورة بالإيدتوريال، و قررت إني أتكلم عن السويتر للصيف هنا.

إموجين لابسة بالصورة سويتير من رودارتي ربيع 2012، صحيح واضح أنه فيه شمس، بس بالنسبة لي مو هذا إقتراحي لسويتر للصيف، خصوصا هنا بالسعودية (أو بالخليج) لكن لو كنت بلوس إنجليس (زي مو واضح من الصورة إن إموجين مصورة هذا الإيدتوريال هناك)، أعتقد ممكن ينلبس هذا السويتير للصيف "هناك".

لما رحت أدور على سويترز أو كنزات تصلح للصيف أول شيء جاء ببالي إنه لازم أوانها تكون فاتحة، أو بيطلع شكلك كأنك شريتي لبس شتوي، و لا أمداك تلبسينه، و أنت مصرة :) لما شفت هذي سويتير من إيما كوك (يسار) تذكرت جينا ليون بميت قالا السنة اللي فاتت ذاك الوقت قلت لكم إنها عجبتني، ما زالت عاجبتني، و بغيت أحط شيء ممكن يمشي على اللوك اللي هي أختارته، خصوصا و إنه ميت قالا السنة هذي قرب (بعد أسبوع تقريبا).

السويتر الثانية اللي على اليمين من ثيوري أعرف إنها مو رخيصة بس عجزت أقاومها (لونها مرة حلو) مو بس لونها، ظهرها مرة حلو أحس لو أحد لبسها بالصيف مع سكيني جينز بتطلع مرة حلوة، و فيها شيء رياضي و لو أنت مهتمة (الملابس الرياضية موضة بهذا الصيف، أعتقد من تأثير أولمبياد لندن)،.

تعرفون إنه يأنبني ضميري لما بس أدلكم على أشياء غالية، بس وش أسوي بعض المرات ما يملأ العين إلا هي، لكن هنا بعض الإقتراحات من إيسوس كنزة أو سويتر لماع خفيف (حتى هم منسقينه بشكل حلو و عليها تخفيض). و هنا عند زارا سويتر أصفر حلو بعد. و هنا باقي الإيدتوريال لو حابين تشوفونه.

شرايكم بالسويتر للصيف؟

I ♥ 90's

ما أعرف وش شعوري تجاه ريانا (خصوصا ستايلها)، بس أعرف إني أحب ذكرياتي بالتسعينات خصوصا و إنها تقريبا الفترة الي عرفت فيها وش أنا جالسة ألبس أو وش أمي تلبسني. بعد بالتسعينات أعطتني أمي لقب أحتفظ فيه لنفسي لأنها تقول أني أحوس الملابس، بالتسعينات بعد قلت لخالتي و لعمتي بعد (عندي كثار) بس ثنتين منهم طلبت منهم إني آخذ ملابسهم لا كبرت، ما أعطوني شيء يوم كبرت، و لا أدري أساسا وش صار على أغلب ملابسهم اللي كانت تعجبني.

The 90's by alorwa featuring clutch bags

Acne twist dress, £150
Zara heel pumps, $60
Jimmy Choo clutch bag, $1,295
Chan luu jewelry, $420

شفت الصورة اللي فوق لريانا أمس بعد واحد من حفلات الجوائز الإمريكية للموسيقى، و اللي ما أدري كم عددها، أو أصلا هم حتى يعرفون هذي الحفلات، و إلا فجأة يدق عليها مدير أعمالها و يقول لها فيه حفل جديد. ما علينا، بس لما شفت هذي الصورة لريانا، أعجبني شكلها مرة، فيه طعم تسعينيات بقوة، خصوصا الفستان الفضي هذا (ما أعرف من وين)، شكله بساطته، كلها تعطيه هذا الشعور، بعد ما أعرف ليه حسيت أنه كيري برادشو (جيسيكا باركر بسيكس آن ذا سيتي). 

المهم قررت إني أسوي سيت عن لبسها، أو لوك التسعينات هذا. أول شيء أخترت هذا الفستان من أكني، من فترة عاجبني خصوصا من ورا شيكوا عليه. 

بعد أخترت معاه هذا العقد الأحمر، لأنه من فترة طويلة من مجموعة Lanvin for H&M و فكرة إكسسوار أحمر عاجبتني. 

بغيت كلتش فضية مع اللبس، و كعب أسود ببوز (أعرف إن بعض الناس يسمونه كذا)، الكعب هذا أعجبني مرة، شكله حلو و غالي، مع إن سعره جدا معقول و من زارا، يعني لو عاجبكم شوفوا يمكن تلقونه بوحده من الفروع. الكلتش الفضية من جايمي تشو، شفتها ببوتيكهم بسنتريا قبل فترة، فيه وحدة ذهبية زيها، أظن كلتش زي هذي، ممكن تمشي مع أي لبس سهرة.