Lilac & New Thing Added to My Wishlist

أعرف إني من زمان ما كتبت متواصل، و أعرف أني بطلت أطلع أعذار، لأن فعلا ما عندي عذر، إلا أنه ما جا ببالي أي شيء أكتبه، اليوم قبل لا أنام جا ببالي أكثر من صورة / لبس عجبوني بالفترة الماضية و حسيت أنه طلع معاي فكرة موضوع أتكلم عنه.

أول صورة بهذا الوكلاج قد شفتها، و عجبتني و علقت براسي هي صورة فيرونيكا هيلبورنير (ستايلست ألمانية)، بهذا الفستان الليلكي من كريستوفر كاين (تحت وسط)، الصورة قديمة، يمكن قبل سنة أو أكثر، بس علقت ببالي، لأنه مرة عجبني اللونين اللي اختارتهم مع بعض، و أحس إن جلست طول هذي الفترة أنتظر فرصة إني أخلط هذا اللون ( لون البالطو) اللي ما أعرف وش أسميه، (أعتقد كونياك) مع ليلكي. الصورة الثانية اللي علقت ببالي هي الصورة الأولى فوق من اليمين من عروض الخريف اللي كانت قبل شهر و نص، اللبس من لوك بوك سي باي كلوي، اللبس مو مميز، لكن أعتقد التنسيق مرة أنيق، و أول ما شفت التنورة/ البنطلون الوسيع من زارا (يسار فوق)، على طول جا هذا اللبس ببالي، و فكرت إني أنسق حولها لبس، بوحي من هذي صور، و أشياء شفتها و أعجبتني زي السنيكير الأديداس من تعاون فاريل وليمز اللي أسمه سوبر كلور. المجموعة تقريبا كلها سولد أوت على الموقع، بس إذا كانت موجودة بالمحلات، أعتقد هذا اللون و اللي أسمه mauve tint لون يمكن قليل يشوفه مميز، لكني أحسه مرة حلو و أنيق، بالذات مع لبس كله ألوان محايدة. التوب بغيت قميص رسمي و لا هو رسمي بنفس الوقت، و حسيت هذا القميص من مونكي بيكون حلو مع اللبس. آخر شيء و أغلى شيء، كنت أدور إكسسوار يكمل اللبس، و جا ببالي "شوكر" و طحت على هذا الشوكر من جينفير فيشير، و للأسف أنه الحين دخل قائمة الأمنيات حقتي، سعره مو مرة غالي (قصدي مو شيء فوق العشرة الآف أو شيء زي كذا، بس 495 دولار تحتاج له واحد كريم، يعرف يعطي هدايا حلوة (لا تستحون تطلبون رقم حسابي للتحويل P;). 

وش رأيكم بالمجموعة، و تفضلون أكتب كذا كل فترة شيء زي المود بورد، مع إقتراحات لملابس و إكسسوار ممكن تشترى؟ 

My Idol Summer

أعرف إني بعض المرات أتحمس للأشياء قبل وقتها بفترة طويلة، بس عندي قناعة إن حماسي هذا لو ما نفع ما ضر. المهم الشيء اللي من الحين جالسة أدور له هو أشياء عطلة صيفية (لبس و إكسسوار و غيره)، و طبعا لما أقول عطلة، قصدي مكان حلو أسافر له، و أشتري أشياء حلوة له. (ما أعرف ليه) صحيح أنبسط بالسفر، بس ما أعرف ليه، أحس إني بعض المرات أتحمس لأشياء مالها معنى (تحملوني شوي). 

أولا لازم أقولكم إني من فترة طويلة و أنا أدور زيت يعطي لمعة ذهبية للجسم، دورت كثار منهم زيت بودي شوب و أشوف أنه لما يفرك يروح اللون ما يبقى غير قليتر على الجسم، و لو بغيت التأثير هذا كان حطيت قليتر من البداية ما يحتاج أتعب نفسي و أدور على زيت للجسم. فتقريبا كل فكرة التدوينة هذي تدور حول الزيت. 

أخيرا حصلت زيت يعطي اللون واللمعة الي أبغاها و أعتقد أنه زين، صحيح أنه مو رخيص أبدا، لكن أعتقد أنه "الإكسسوار المناسب" لأي مناسبة كبيرة بهذا الصيف، أو أي صيف، ما دامت الناس تعتقد أنه البشرة اللي فيها لمعة ذهبية شيء حلو. 

الفستان اللي كأنه شيرت من زارا (تقريبا ب 200 ريال، و منه لونين غير هذا)، شفته قبل فترة و أعجبني، حبيت أنه أطول من ورا، حبيت بعد خفته، شكله، أعتقد أنه من نوعية الفساتين  اللي تطلع حلوة على نوعية أجسام مختلفة، و تخلي أي أحد يلبسها ذوق. 

الشنطة من ريتشيل زو، هي شنطة/ حزام، عاجبتني من شفتها بعرضها لربيع و صيف 2013، أحس فيها شيء ما أعرف كيف بس ذوق براحة، شيء هيبي. الربطة بعد من واحد من عروض ربيع و صيف 2013، تكلمت عنها قبل هنا، هي من عرض مارك باي مارك جايكوبز (أعتقد إني لازم أدور أو أسوي لي ربطة ملوية زي هذي) أحسها تصرخ عطلة. 

الجزمة أو الصندل الجلي (هم كذا يسمونه) من توب شوب، عاجب أختي مرة، أتذكر إنه هذي النوعية من الصنادل كانت المفضلة عند أمي و أنا صغيرة (ما أعرف كم شرت لي فردة)، بس أتذكر آخر وحدة كانت سوداء، و مرة باستراحة بالظلام كنت لابستها، بس ما ربطت الحزام، قعدت أصارخ أحسب أنه عقرب علق برجلي :S. آخر شيء، الحلق من أيسوس، تلقونه هنا لو كان عاجبكم. 

From day to night with Poppy

أعرف إن قائمة الناس اللي أتكلم عنهم هنا تتوسع، و شخصيا أحاول أطلع عن الناس المعتادة، لأن بالعادة السلبريتيز المعروفين أكثرهم ستايلهم ممل (حقيقة). صحيح إني بعد أحاول ما أتكلم عن ناس مالهم وظيفة، و وظيفتهم الوحيدة الترزز بالحفلات، فيعني بالنهاية أحاول آصل لحل بالوسط. 

قبل يومين شفت هذي الصور لبوبي دوليفين (للي ما يعرفها هذي الأخت الكبيرة لكارا، و للي ما يعرف كارا، كارا عارضة بريطانية موجودة بكل مكان بتمبلر) بوبي بعد عارضة، صحيح مو بشهرة كارا (و لا بحلاها على الأقل من وجهة نظري)، لكنها (بعد من وجهة نظري) ذوقها أحلى بكثير من كارا. 

بوبي مشاركة بشيء على موقع فوق يو كي اسمه today i'm wearing و فيه تعرض لبسها كل يوم لمدة شهر. كثير من الملابس أعجبتني، لكن قررت أكتب عن لبسها بالثلاث صور اللي فوق، و أحاول أبين كيف ممكن الواحد يلبس اللبس المناسب لكل وقت من اليوم. 

من اليمين: بوبي بلوك يصلح لدوام، ببنطلون و تي شيرت (أنيقة من دون تكلف) ثم أضافت لهم هذا العقد، و أهم شيء شنطة نيون أعطت اللبس حياة (يمكن ما أضيف عليه إلا بلايزر لدوام). فوق يسار: بوبي بفستان شيفون (من أيسوس بس للأسف ما لقيته شكله خلص)، و لابسة تحته مايوه بطبعات من توب شوب، قد قلت لكم قبل إن هذي المايوهات عاجبتني، بطلت أفكر فيها من فترة، بس بعد الصورة هذي لبوبي أظن إني بافكر جديا بواحد. أعتقد هذا اللبس مناسب جدا لحفلة بالنهار. يسار تحت: بوبي بلبس حفلات (ليلية)، تنورة و توب أزرق ملكي. روج أحمر، و بالنسبة لي أهم شيء إنها لبست معاه هذا الجاكيت جلد و ستودز من زارا، أعتقد أعطى اللبس شوية حديه "إيج". 

هنا تلقون باقي الصور اللي أعجبتني، من أكثر الأشياء اللي أعجبتني الجاكيت الجيشي من بوتشي (أول واحد بالألبوم). 

أيش أحسن لوك عندكم؟ و أعجبكم ستايل بوبي؟

In the Mood for Tropical Gateway

قبل فترة شفت صورة لكيرستين دونست و هي رايحة لهاواي، أو جاية من هاواي أو ما أعرف يمكن بحفلة ثيمها هاواي. بالصورة اللي ما أعرف من وين جاية كانت كريستين لابسة توب من مجموعة ستيلا مكارتني ريزورت 2012، للحق ما كنت متحمسة للمجموعة و طباعاتها الهوائية، و لا تغير رأيي لما شفت كيرستين لابستها بس طبعي كذا أستظرف كيرستين وش أسوي بنفسي :) ؟!!

مع الوقت (زي كثير أشياء) يتغير رأيي بالطبعات الإستوائية بعد وقت. بالفترة الأخيرة أحس إني أبغى شيء بطبعات إستوائية، أعرف إنها موضة بتخلص بسرعة، بس أحس إنها من أكثر الأشياء اللي تعبر عن عطلة حلوة بعيد عن كل شيء مزعج.

من بنطلون من إليزابيث آند جيمس اللي كأنه بنطلون بيجاما (عاجبني من زمان)، تعرفون إن موضة البيجاما عاجبتني. لتي شيرت سبونج بوب الهوائي (مين ما يحب بوب سبونج بوب؟). و أنا أدور على أشياء إستوائية لقيت هذي "نيل آرت" من عند إيسوس و عليها طبعات إستوائية (مرة أعجبتني ألوانها)، غير إنها أعجبتني، أعتقد إن نيل آرت الحين بكل مكان، علشان كذا تستاهل إنه نتكلم عنها هنا لو بشيء صغير زي كذا. آخر شيء من أكثر الأشياء اللي حمستني للطبعات الإستوائية هذا الكعب من شارلوت أولمبيا مو رخيص بس الجزم تعيش و تنلبس كثير (جالسة أعطي تبرير لسعرة) حبيت طبعاته، حبيت الجزء الشفاف فيه، أعتقد لو أحد يبغى يستثمر بجزمة غالية أظن هذا الكعب يستاهل.

شرايكم بالطبعات الإستوائية؟

Sweaters for Summer

من فترة مو قصيرة شفت إيدتوريال لإموجين بوتز (ممثلة بريطانية للي ما يعرفها) على مجلة تانك. الإيديتوريال ما فيه شيء مبتكر، أكثره مأخوذ مباشرة من العروض نفسها، لكن أختيار الملابس كان حلو، و الصور حلوة. اليوم و أنا جالسة أفكر بفكرة سويتير صيفي، تذكرت صورة بالإيدتوريال، و قررت إني أتكلم عن السويتر للصيف هنا.

إموجين لابسة بالصورة سويتير من رودارتي ربيع 2012، صحيح واضح أنه فيه شمس، بس بالنسبة لي مو هذا إقتراحي لسويتر للصيف، خصوصا هنا بالسعودية (أو بالخليج) لكن لو كنت بلوس إنجليس (زي مو واضح من الصورة إن إموجين مصورة هذا الإيدتوريال هناك)، أعتقد ممكن ينلبس هذا السويتير للصيف "هناك".

لما رحت أدور على سويترز أو كنزات تصلح للصيف أول شيء جاء ببالي إنه لازم أوانها تكون فاتحة، أو بيطلع شكلك كأنك شريتي لبس شتوي، و لا أمداك تلبسينه، و أنت مصرة :) لما شفت هذي سويتير من إيما كوك (يسار) تذكرت جينا ليون بميت قالا السنة اللي فاتت ذاك الوقت قلت لكم إنها عجبتني، ما زالت عاجبتني، و بغيت أحط شيء ممكن يمشي على اللوك اللي هي أختارته، خصوصا و إنه ميت قالا السنة هذي قرب (بعد أسبوع تقريبا).

السويتر الثانية اللي على اليمين من ثيوري أعرف إنها مو رخيصة بس عجزت أقاومها (لونها مرة حلو) مو بس لونها، ظهرها مرة حلو أحس لو أحد لبسها بالصيف مع سكيني جينز بتطلع مرة حلوة، و فيها شيء رياضي و لو أنت مهتمة (الملابس الرياضية موضة بهذا الصيف، أعتقد من تأثير أولمبياد لندن)،.

تعرفون إنه يأنبني ضميري لما بس أدلكم على أشياء غالية، بس وش أسوي بعض المرات ما يملأ العين إلا هي، لكن هنا بعض الإقتراحات من إيسوس كنزة أو سويتر لماع خفيف (حتى هم منسقينه بشكل حلو و عليها تخفيض). و هنا عند زارا سويتر أصفر حلو بعد. و هنا باقي الإيدتوريال لو حابين تشوفونه.

شرايكم بالسويتر للصيف؟