Craftswoman

بالسنوات الخمسة اللي فاتت (أعتقد) أنه تحولت "الموضة" من هوس شنط لهوس جزم، و أظنه الحين أو من سنة و زيادة وصلنا لهوس شنط الكلوتش. 

بالنسبة لي، ما أعرف أول شنطة كلوتش أعجبتني (يمكن أليكساندير ماكوين الخواتم). لكن بعد فترة تعرفت على ماركات شنط كلوتش ثانية، و صارت هي "هوسي" الجديد. 

صراحة ما أتذكر عرفت شارلوت أولمبيا أول أو أولمبيا لو تان، لكن الأكيد أنه لفترة طويلة ظليت أفكر بالكلوتش اللي من شارلوت أولمبيا، اسمها باندورا بوكس. يمكنها كانت من أوائل الشنط الشفافة (اللي الحين صارت موضة). ما طاحت من بالي (علشان ما تقولون طفية)، لكن لما لقيت نسخ أرخص، أكيد بأفكر بالأرخص. (عند زارا وحدة برتقالية). 

اللي يعجبني بشارلوت أولمبيا، إنها تطلع أشياء ظريفة و يمكن "بايخة" بالنسبة لبعض الناس، زي كلوتش العطر و كلبر بورد حق الإخراج. هنا تلقون شنط شارلوت أولمبيا. و بالمناسبة مطلعة شنط جديدة على شكل بطيخ و ليمون ظريفات مرة (أحس بنشوف نسخ منها عند توب شوب أو زارا.

أولمبيا لو تان ما أعرف إذا تعرفونها قبل، بس أكيد قد شفتوا شنطها الكلوتش اللي على شكل كتب. أولمبيا ما تسوي بس شنط كتب (عندها شنط على شكل علبة حليب و كافيار). لكن شنطها الكتب بكل مكان، حتى إيسوس عندهم نسخة (مو رهيبة) لكلتش كتاب (شارلوت أولمبيا بعد سوت مجموعة كلتش كتب). هنا تلقون شنط أولمبيا لو تان.

بينديتا بروتزيكيس (إذا كان هذا النطق صحيح). مصممة جديدة لشنط كلوتش بعد. (على الأقل أنا توي أعرفها). بينديتا عندها شنط كأنها مخدة، و عندها شنط كأنها سبورة و عندها شنط كأنها هدية مغلفة (هذي كلها "علامات تجارية").  هنا تلقون شنط بينديتا بروتزيكيس. أعجبتني شنط بينديتا، أعتقد إنها ظريفة مرة، خصوصا الهدية و الطباشير. لكن من بين الثلاثة، أظن إني أفضل لو أقدر أحصل شنطة من أولمبيا لو تان. 

أنتم مين مصمم الشنط المفضل عندكم؟ و إيش رأيكم بموضة الكلتش؟

From Russia with Love

من أول الأفلام الفرنسية اللي شفتها فيلم كان اسمه "الدمى الروسية"، ما أعرف من متى و أنا أعرف الدمى الروسية (العرائس الخشبية اللي تدخل ببعض). لكني أعرف إني من عرفتها و أنا أحبها. و ما أعرف حبيت الفيلم علشان أسمه و لا هو كان ظريف :). 

بالتدوينة اللي قبل هذي، تكلمت لكم عن ستريت ستايل خصوصا وقت أسابيع الموضة، قبل أسابيع الموضة ما كنت متحمسة إني أشوف نفس الناس اللي يجون و يستعرضون بأشكالهم، لكن شفت كلتش من شارلوت أولمبيا، و انتظرت أشوف يكمن أناظرها مع وحدة من "Russaian Pack" خصوصا يوليانا سيرقنكو، لكن شكل يوليانا عرفت إني جالسة أنتظر و قررت تعاند، و لا تطلع بكل مكان زي كل مرة. 

Russian Doll by dejavuar featuring a maxi skirt

ما عندي فكرة إذا تعرفونها قبل، أو قد مرت عليكم، لكن إذا كان عندك تمبلر، أعتقد أنكم شفتوها على الأقل مرة. أعترف إني أول مرة شفتها انبهرت فيها، لكن مع الوقت حسيت إنها من مجموعة الناس اللي جاية علشان تقول للناس أنا غنية شوفوني. حتى و أنا أتضايق منها (و من كثير من اللي بالفاشن)، ما زلت أعتقد إن ستايلها حلو، حتى لو كان شوي مصطنع. ما علينا لكن لو كنتوا تحبون لوك كلاسيكي أروستقراطي، دوروا على يوليانا Ulyana Sergeenko. يولينا الحين عندها خط أزياء (ما أعرف أنه ينباع برا روسيا). بعد عرضت بأسبوع الأوت كتو الماضي بباريس أول مجموعة أوت كتو لها، لو مهتمين تلقونها هنا.

نرجع للسيت، اللي قلت لكم أهم شيء فيه بالنسبة لي هي شنطة شارلوت أولمبيا ما أعرف وش قصتي مع شناطهم (الكلتش) بس كل وحدة تصرخ بوجهي تقولي أشتريني أنا. من فترة طويلة و أنا عاجبتني هذي التنورة من صوفي كوكوسلاكي أعرف بعض البنات مسخوها بالتنانير الشفافة هذي، لكن بالنسبة لي فيه أشياء مالي شغل بالناس وش قاعدين يسوون بالأشياء، زي الكوب كايك، مالي شغل إذا الناس يعتبرونها موضة و تلقينها بكل مكان، أو بطلوا يعتبرونها، إذا قررت إني باشتري كوب كايك، باشتري بأي نكهة أبغى (بالمناسبة نكهتي المفضلة فستق من كوب من الكايك :). الجزم من نيكولاس كيركوود أحب جزمة أحس أنه أذكى مصمم جزم (آسفة للي يحبون لابوتان أو جيمي تشو) ما عندي مشكلة مع الإثنين بس أحي كيركوود أكثر، و قررت أختار هذي الجزم، لأن اللوك كله سادة، حتى مجوهرات ما اخترت علشان الكريستال الموجود على القميص من ميو ميو و النظارات قررت إني أختار بعد شيء كلاسيكي نظارت "بسة" أو cat eye ما أعرف ليه بس حسيتها تمشي مع باقي اللوك. أعرف أن كل الأشياء الموجودة غالية مرة، السيت هذا مو شرط أنك تشترين الأشياء اللي فيه نفسها، أعتقد فيه كثير من الأفكار اللي فيه موجودة بالهاي ستريت، بس أنا عجازة ما ودي أدور (طبعا إلا الشنطة :). 

شرايكم بستايل يوليانا سيرقينكو؟

In the Mood for Tropical Gateway

قبل فترة شفت صورة لكيرستين دونست و هي رايحة لهاواي، أو جاية من هاواي أو ما أعرف يمكن بحفلة ثيمها هاواي. بالصورة اللي ما أعرف من وين جاية كانت كريستين لابسة توب من مجموعة ستيلا مكارتني ريزورت 2012، للحق ما كنت متحمسة للمجموعة و طباعاتها الهوائية، و لا تغير رأيي لما شفت كيرستين لابستها بس طبعي كذا أستظرف كيرستين وش أسوي بنفسي :) ؟!!

مع الوقت (زي كثير أشياء) يتغير رأيي بالطبعات الإستوائية بعد وقت. بالفترة الأخيرة أحس إني أبغى شيء بطبعات إستوائية، أعرف إنها موضة بتخلص بسرعة، بس أحس إنها من أكثر الأشياء اللي تعبر عن عطلة حلوة بعيد عن كل شيء مزعج.

من بنطلون من إليزابيث آند جيمس اللي كأنه بنطلون بيجاما (عاجبني من زمان)، تعرفون إن موضة البيجاما عاجبتني. لتي شيرت سبونج بوب الهوائي (مين ما يحب بوب سبونج بوب؟). و أنا أدور على أشياء إستوائية لقيت هذي "نيل آرت" من عند إيسوس و عليها طبعات إستوائية (مرة أعجبتني ألوانها)، غير إنها أعجبتني، أعتقد إن نيل آرت الحين بكل مكان، علشان كذا تستاهل إنه نتكلم عنها هنا لو بشيء صغير زي كذا. آخر شيء من أكثر الأشياء اللي حمستني للطبعات الإستوائية هذا الكعب من شارلوت أولمبيا مو رخيص بس الجزم تعيش و تنلبس كثير (جالسة أعطي تبرير لسعرة) حبيت طبعاته، حبيت الجزء الشفاف فيه، أعتقد لو أحد يبغى يستثمر بجزمة غالية أظن هذا الكعب يستاهل.

شرايكم بالطبعات الإستوائية؟