20s Redo

ما أعرف كم مرة تكلمت عن الفلابير و العشرينات بهذي المدونة، بس أكيد كثير، لو بحثتوا "عشرينات". أبشركم أظن إن هوسي فيه قل، لكن بعد ما شفت صورة لأوليفيا كوك ببريمير قبل أمس (الصورة تحت، الأولى من اليمين)، تذكرت لوك عجبني قبل فترة لكارولينا كاركوفا، فقررت أكتب زي طريقة المود بورد، اللي كتبها قبل بهذا الموضوع. 

ما أعرف إذا كنتوا متابعين لردود و النقاشات اللي تصير تحت المواضيع، بس بنقاش مع Elegant Always سألتني عن ذوقي، بالغالب، الأشياء اللي أسويها هنا، هي ذوقي، و طريقتي بكيف أنسق لبس معين، أو موضة معينة، لو قررت ألبسها كيف ألبسها. 

نرجع للبس للمود بورد مرة ثانية، صراحة ما أعجبني مرة لبس أوليفيا، لكنه مختلف عن لبسها بالعادة، و ذكرني بلبس كارلوينا قبل كم شهر (بالمناسبة كارولينا 98 بالمية من ملابسها مرة حلوة، فلو أنتم من الناس اللي يحبون يتابعون أشخاص يلبسون بطريقة حلوة، تابعوا كارولينا). المهم، من أكثر الأشياء اللي ما عجبتني بلبس أوليفيا إني حسيت أنه مرة شتوي، و أنا صراحة مرة قرفانة من الحر P;، فأول شيء فكرت فيه، إنه الروج العنابي بالنسخة اللي سويتها لازم يصير أحمر/ برتقالي. علشان كذا فكرت بهذا الروج من سيفورا (ترا جودة الروج مرة كويسة لو جالسين تدورون على روج كريمي مات) المهم الدرجة اسمها 10 Mandarin Muse. مع إني أحب الترتر، و الأشياء اللماعة، إلا إن أكثر النسخ اللي شفتها لقصة تشبه فساتين فلابير كانت مرة مملة، و ما فيها شيء جديد، فحسيت هذي النسخة "الجديدة" مع قماش الميش اللي فوق. نسيت أقولكم وش الشيء اللي حبيته بلبس كارولينا، هو إن اللبس ما فيه حوسة كثيرة، بعدين لابسة جزم مرة مثيرة، اللي فكرت فيه، إني أحول هذا اللبس لنسخة صيفية، و لأنه صنادل الجلي راجعة من كم صيف، و أنا مستظرفتها، و لأن كعب ماري جاين كان منتشر مرة بالعشرينات، خصوصا مع رقصة الشارلستون، حسيت هذي الجزمة من صوفيا لوبستير مرة مناسبات، و يعطون اللبس روح. زيادة على كذا، أعتقد جزم صوفيا من أرخص الماركات الهاي إيند. الشيء اللي عجبني بلبس أوليفيا، هي إنها لبست حلق ستايتمنت، ففكرت بحلق ملونات و كبار، و يضيفون للجزمة و الروج. 

وش رأيكم؟ تفضلون الفلابير تقليدي بروج غامق و ترتر؟ أو أصلا ما تحبون موضة العشرينات؟ 

Bling, Bling

من فترة و أنا انتبه للمجوهرات، ما أدري أنا توي بادية أنتبه، أو صدق هذي الأشياء اللي باكتب عنها مميزة مرة؟ لا أكيد فيه أشياء مميزة مثل حلق شوبار اللي على كايت بلانشيت. أولا قبل ما أبدأ أنا زي أي مرأة بالعالم (أظن) أحب المجوهرات، بس ما أحب دايم الأشياء الكبيرة، أو اللي بس الهدف منها إن الواحد يوضح أنه يقدر يشتري مجوهرات غالية. علشان كذا أعتقد إني دايم أميل للأشياء الأنيقة، أو شكلها قديم، أو مميزة (من ناحية التصميم مو إن الحجر اللي فيها طلعوه بعد ما حفروا ثلاثة جبال، و مات 20 و هم يطلعونه، و .. و .. و. ما علينا خلونا نتكلم عن الأشياء اللي عاجبتني مؤخرا. 

يمكن هذا الموضوع بيكون أقل موضوع فائدة، لأني صراحة ما تعبت أدور الأشياء من وين، أو إذا فيه شيء يشبه لها، بس بغيت أوريكم وش عاجبني و أتكلم عنه. 

أولا خلوني أقولكم إن الألبوم هذا كل ماله يكبر أكثر، فقررت أكتب عنه قبل لا يتحول الموضوع لتمبلر كامل خاص بالمجوهرات (أعتقد إنه طلعت معاي الحين فكرة تمبلر جديد P:) أظن الموضوع بدأ مع جيزيل، بغلافها لمجلة بورتيه، كنت أقلب صورة الغلاف لأنه شكلها عليه مرة عاجبني، فيه أحساس ما أعرف أشرحه، بس أحب وجيه النساء 30+ و هم مرتاحات (لبس، وجه، شعر). قلت لكم يمكن ما فيه أحد يفهم هذ الإحساس اللي أحبه، لكن أحبه. فو أنا جالسة أشوف الصورة، انتبهت للخاتم، ما أعرف هو خاتم واحد، أو خاتمين واحد عليه الفص الأخضر (يمكن زمرد) و الثاني عادي دبلة الزواج (يمكن لو سويت بحث لقيته، بس أظن إني أعجز من إني أسوي بحث الحين). 

بعد أعجبني مرة (مع أنه المفترض يكون عادي) الحلق اللي على ميوشا برادا، ما أعرف وش اللي أعجبني فيه، يمكن لأنه بالعادة الحلق اللي بهذا الشكل يكون كبير، مو حلق حق "كل يوم"، بس مرة عجبني، لو فكرت أشتري حلق ألماس لكل يوم، أكيد بأفكر بشيء يشبه هذا. 

جاسيكا بايل (أيوه المرأة اللي بشفايف وردية فاقعة هي جاسيكا) لابسة عقد من تيفاني، أعجبني أنه كأنه شريطة معقودة. بعد مرأة ثانية ما طلع وجهها هنا أدل إيكساكوبلوس لابسة خاتم بأربع أصابع، صراحة ما قد أعجبني الخاتم أبو أربع أصابع، أحسه كأنه سوارة ما دخلت، بس هذا لأنه كأنه خيط أعجبني مرة، مع إني مو مرة مع الفيونكات، بس أحس هذا ظريف (متحمسة أعرف من وين). 

إذا ما كنتوا تدرون، من فترة و أنا عاجبتني الحلق اللي يلبس على الصيوان، هذي الصورة (ما أعرف لمين)، بس لقيتها بإنستچرام "مان ريبالير" عجبني مرة. 

آخر وحدة كايت بلانشيت بهذي الحلقات (الربيان) من شوبار، للي يعرفني، يعرف إن هذي نوعية المجوهرات اللي تعجبني، أعتقد أنهم لما يكونون فخمات بسهولة تنلبس مع ملابس سهرات، و مع ملابس كاجوال، و تكون حلوة بكل الحالتين، صراحة ما أقدر أوقف أشوف صورة كايت، أظنها بالنسبة لي غطت على كل الصور الثانية. 

بالمناسبة، و أنا أدور على بعض المواضيع علشان أحط لها رابط هنا، اكتشفت إن هوسي بالمجوهرات مو جديد، بس شكل عندي ذاكرة قصيرة P:. 

Helix Piercing?

ما فيه شيء معين (قصدي موضة معينة) باتكلم عنه، لكن فيه شيء من فترة طويلة و هو عاجبني، الشيء اللي عاجبني، و أعرف أنه ما يعجب كثير، و أنا كنت منهم (أعترف إني كنت ما أحبها) هي الخروم على صيوان الإذن. بعد أعترف إني كنت أشوف إنها تخرب الشكل. (كلنا نتغير مو عيب، صح؟!!) 

زي ما قلت لكم، لأنها من فترة عاجبتني، كنت أدور على صور أدور على "إنسبريشين" وش الشيء اللي بالضبط أبغاه، و يعجبني. من فترة و أنا عاجبني الإيركوف (يمكن تكلمت عنها قبل) لكن ما فكرت إني أخرم خرم جديد أظن إلا بعد ما شفت الصورة الثانية تحت، لإيدتوريال ما أعرف وين، ما أعرف ليه عجبني شكل الموديل مرة، لدرجة فكرت جديا إني أسوي خرم جديد أخيرا. 

أتذكر أول كنت أفكر فيها إنها ما تطلع حلوة مع ملابس السهرة، بس لما دورت بالصور، و شفت دايان كروقر بكان السنة اللي فاتت (أول اللي قبلها نسيت) بس إنه شكلها إلى الآن ذوق، حتى مع تسريحة و حلق فخم. 

أنتم وش رأيكم بالخرم اللي على صيوان الإذن؟ عندكم؟ أو تفكرون فيه؟ أو ما يعجبكم؟ أو حتى لو الصور هذي غيرت رأيكم؟ 

Mixed Metals

من فترة، ما أعرف متى بدأت بس توي أنتبه لنفسي، إني صايرة أحب المجوهرات اللي مخلط فيها الذهبي و الفضي سوا (أنا مو مرة مع القولد روز) بس ما يمنع أنه يكون موجود مع الباقين. 

زي ما قلت لكم ما أعرف متى الهوس هذا بدأ، بس بعد ما شفت صور من عرض رودارتي لخريف 2013 تذكرت إن المجوهرات كانت عاجبتني، و إنها بعد مخلطة، فيها ذهب أصفر و أبيض و وردي. بعد ما أعرف إذا كان هذا هو السبب أو لا، بس يوضح لكم إن المشكلة بتكمل سنة، فلازم نناقش الموضوع هنا سوا. 

و لأني طيبة و ما أبخل عليكم بهوسي، هنا جمعت لكم مجموعة من المجوهرات اللي مخلطة، و أعجبتني مرة. حاولت إني أختار من كل تصنيف شيء. يعني خاتم، سوارة، حلق و سلسال. 

الأشياء روابطها هنا الترتيب عكس عقارب الساعة (1) حلق من أنثربولجي ب 75 ريال تقريبا (2) سلسال حصان من مجوهرات أوديت ب 405 ريال (3) خاتم عين تقريبا ب 200 ريال (4) سوارة فيها قلب ب 430 ريال تقريبا. 

أكيد بتلقون أشياء أرخص لو بغيتوا، بس أنه حطيت هنا الأشياء اللي أعجبتني بجد. و لو ما أعجبتكم الأشياء اللي اخترتها، بس أعجبكم أغراض رودارتي، هنا تلقون الإكسسوار و المجوهرات بآخر الصفحة.  

أنتم وش رأيكم بلبس مجوهرات بألوان مختلطة؟ أو تفضلون لون واحد مع كل لبس؟ 

Summer Essential: Chandelier Earrings

قد قلت أكثر من مرة إني (أنا لنفسي) ما أحب أتعب بلبس كل يوم (دوام، سوق، مطعم، سفر) أحب ألبس اللي يريحني و اللي ما أحس آخر اليوم إني بأموت من التعب، وودي أرجع البيت بس علشان لبس موب مريح. أستوعب مستوى معين من "التكشخ" يعني لبس حلو بس مريح، نظارات حلوة، مجوهرات حلوة بس خفيفة.

شيء ثاني لو سألتوني شو قطعة المجوهرات اللي أعتقد إنها فعلا تفرق بالشكل، و إذا تبغى شيء يغير شكلك من شكل "مو مهتم" أو "مو مرة حلو" لشكل حلو، بالنسبة لي حلق حلو و مناسب. 

الأسبوع اللي فات شفت صورة لنتالي بورتمان تتمشى و لابسة حلق طويل، ما أعرف وش ممكن يسمى بالعربي، بس بالإنجليزي أسمه شاندلير. المهم بعد ما شفت الصورة خلتني أدور على حلق زي هذي الطريقة، لأني أظن أنه زي ما قلت لكم يمكن يحول لوك عادي للوك حلو (على الأقل كذا أعتقد) خصوصا بالصيف، لما ما تبغين تلبسين لبس ثقيل أو قطع كثيرة، ممكن تلبسين حلق زي هذا مع شعر مرفوع بفوضوية، و أظن شكلك بيكون مرة حلو (يصلح حتى لمناسبة بسيطة النهار، مع فستان صيفي خفيفي). 

كل الأسبوع اللي فات و أنا أدور صورة أحسن لنتالي، و خيارات حلق تكون أكثر، و لو حصل أرخص، بس هذا اللي طلعت فيه. 

1. رقم واحد من أيسوس، هو أرخص واحد (قلت لكم لما دورت ما حصلت كثير مع إني كنت أظن بألقى اللي ببالي بكل مكان) سعره تقريبا 250 ريال. 

2. من لولو فروست تقريبا ب 337 ريال. 

3. من إيام باي إيلينا ماركي ب 15018 ريال تقريبا. 

أعرف إن كلهم صفر، أحب الذهب الأصفر و المجوهرات الصفراء أكثر من الأبيض، لكن فعلا تحمست أشوف لي حلق كذا شكله قبل لا يخلص الصيف.

* بالنسبة لي ما فيه شيء أسمه Summer essential أو أي كلام فاضي زي كذا، لأنه ما أعتقد أنه فيه أي إكسسوار أر لبس مهم لدرجة ممكن أقول عنه essential. بس يعني لأنهم يكتبونه قررت أكتب زيهم (أعرف إمعة). 

New Obsession?

بدت عروض آوت كتور خريف 2013 كانت فكرتي إني أكتب عن العروض بشكل عام (طبعا اللي أعجبني) بعد نهايتها كلها، لكن للأسف فتحت تمبلر وشفت الصورة اللي تحت على اليمين و لا تحملت، فقرتت إني بس أكتب عن هذا الشيء، و باكتب إن شاء الله موضوع فيه عن الأشياء اللي أعجبتني بالعروض. 

أولا خليني أقول إن عرض شانيل ما أعجبني أبدا، أبدا ... أعتقد من دون مبالغة و لا قطعة لفتت انتبهاي. و لا فكرت زي ما قالت أختي إني دايم أروح أدور على فيديو للعرض علشان أطلع فيه شيء زين. المهم للأسف ودي أخيب ظنها بي و أقول إني طلعت شيء زين من دون ما أدور، هو كذا جاني على الداش بورد بتمبلر و هي زي ما قلت لكم هذي اليد اللي كلها خواتم. 

بعرض صيف 2012 كان على بعض العارضات هذا الحلق اللي أنا و أختي انهبلنا عليه، و صرت فترة بس أدور على هذي النوع من الحلقات اسمها ear cuff (تتذكرون اللي قلت لكم عليها من عرض دريس فان نوتين). المهم ما زال النوع من الحلق هذا يعجبني، لكن أعتقد إني باحول للمنظر هذا (يد كلها خواتم). بعرض نيكولا قاسكيه الأخير لبلانسياقا كان فيه يد كلها خواتم. بس ما أقنعتني، و لفترة جالسة أشاور نفسي إذا تستاهل الخواتم اللي فوق المفصل الثاني للإصبع إني أجربها، أو بتكون مو مريحة، كارل بعرض شانيل الأخير طلع مو بس ب "خواتم" فوق المفصل، لكن طلع بخاتم على الظفر. صراحة أعجبتني مرة شكل اليد و تحمست إني ألبس شيء زي كذا. 

أنتم وش رأيكم؟ أو تحبون تلبسون المجوهرات بشكل تقليدي؟

If I Were A ... Thief

يوم و يخلص مهرجان كان، بالنسبة لي ما أعتقد أنه كان مثير من ناحية "الفاشن"، ما أعرف عن الأفلام (هذا الجانب الأهم) لكن كان دايم مكان لأستعراض أحسن الملابس و المجوهرات (كأنه أوسكار يجلس عشرة أيام) :).  

بالكلام عن المجوهرات، يمكن من أهم الأشياء اللي تميز هذا المهرجان عن باقي المهرجنات السينمائية، هي قطع المجوهرات اللي توجع القلب فيه. و بحالة مهرجان هذي السنة، تثير شطارة الحرمية :). 

السنة هذي انسرقت مجوهرات من المهرجان مرتين، المرة الأولى من شوبار انسرقت مجوهرات بقيمة 1.4 مليون دولار. و المرة الثانية عقد ألماس من مجوهرات دي قريسونو بقيمة 2.6 مليون دولار. لو كنت حرامي مجوهرات (أحس أختي بتنبسط على الخبر اللي كتبته قبل، لو ما كانت تدري عنه). المهم لو كنت حرامي مجوهرات، و كنت بكان، بتكون القطع اللي فوق هي القطع اللي باسرقها، ما يهمني سعرها يكفيني شكلها :). 

أول قطعة أثارتني هي العقد "الثعبان" اللي على جيسيكا بيل، من الأشياء اللي بعد عجبتني مرة حلق نيكول كيدمان، (أحب المجوهرات اللي فيها طعم أنتيك). حبيت بعد الحلق الأخضر اللي على كريستين سكوت توماس، أعتقد إنها أقنعتني أنه حلق بحجر أخضر قطعة مهمة بصندوق مجوهرات أي مرأة (لا تصدقوني، ما فيه شيء مهم:)). لكن فعلا لو كنت تدورين حلق فخم ممكن تلبسينه مع أكثر من لبس أعتقد أنه حلق بحجر أخضر هو الحلق اللي بيخلي كل شيء حلو (أعتقد أكثر من حلق بألماس). 

إذا كنتوا متابعين المهرجان، وش أكثر قطع المجوهرات أعجبتكم؟ أو حتى من القطع اللي أنا حاطتها.

My Idol Summer

أعرف إني بعض المرات أتحمس للأشياء قبل وقتها بفترة طويلة، بس عندي قناعة إن حماسي هذا لو ما نفع ما ضر. المهم الشيء اللي من الحين جالسة أدور له هو أشياء عطلة صيفية (لبس و إكسسوار و غيره)، و طبعا لما أقول عطلة، قصدي مكان حلو أسافر له، و أشتري أشياء حلوة له. (ما أعرف ليه) صحيح أنبسط بالسفر، بس ما أعرف ليه، أحس إني بعض المرات أتحمس لأشياء مالها معنى (تحملوني شوي). 

أولا لازم أقولكم إني من فترة طويلة و أنا أدور زيت يعطي لمعة ذهبية للجسم، دورت كثار منهم زيت بودي شوب و أشوف أنه لما يفرك يروح اللون ما يبقى غير قليتر على الجسم، و لو بغيت التأثير هذا كان حطيت قليتر من البداية ما يحتاج أتعب نفسي و أدور على زيت للجسم. فتقريبا كل فكرة التدوينة هذي تدور حول الزيت. 

أخيرا حصلت زيت يعطي اللون واللمعة الي أبغاها و أعتقد أنه زين، صحيح أنه مو رخيص أبدا، لكن أعتقد أنه "الإكسسوار المناسب" لأي مناسبة كبيرة بهذا الصيف، أو أي صيف، ما دامت الناس تعتقد أنه البشرة اللي فيها لمعة ذهبية شيء حلو. 

الفستان اللي كأنه شيرت من زارا (تقريبا ب 200 ريال، و منه لونين غير هذا)، شفته قبل فترة و أعجبني، حبيت أنه أطول من ورا، حبيت بعد خفته، شكله، أعتقد أنه من نوعية الفساتين  اللي تطلع حلوة على نوعية أجسام مختلفة، و تخلي أي أحد يلبسها ذوق. 

الشنطة من ريتشيل زو، هي شنطة/ حزام، عاجبتني من شفتها بعرضها لربيع و صيف 2013، أحس فيها شيء ما أعرف كيف بس ذوق براحة، شيء هيبي. الربطة بعد من واحد من عروض ربيع و صيف 2013، تكلمت عنها قبل هنا، هي من عرض مارك باي مارك جايكوبز (أعتقد إني لازم أدور أو أسوي لي ربطة ملوية زي هذي) أحسها تصرخ عطلة. 

الجزمة أو الصندل الجلي (هم كذا يسمونه) من توب شوب، عاجب أختي مرة، أتذكر إنه هذي النوعية من الصنادل كانت المفضلة عند أمي و أنا صغيرة (ما أعرف كم شرت لي فردة)، بس أتذكر آخر وحدة كانت سوداء، و مرة باستراحة بالظلام كنت لابستها، بس ما ربطت الحزام، قعدت أصارخ أحسب أنه عقرب علق برجلي :S. آخر شيء، الحلق من أيسوس، تلقونه هنا لو كان عاجبكم. 

The Feminine Touch

ما أعتقد أنه فيه أحد مهتم بالملابس الحلوة، ما يعرف net-a-porter.com، ما راح أشرح إيش هو أولا لأني زي ما قلت من قبل ما أظن فيه أحد ما يعرفه، الشيء الثاني، أظنه أكثر موقع تكلمت عنه، يمكن هو و asos تكلمت عنهم قد بعض، مع فارق الإمكانيات طبعا :). 

الشيء الجديد الي ما أعرف إذا كنتوا انتبهتوا له أو لا، أنه net-a-porter صار عندهم مجلة اسمها The Edit، من زمان و الموقع له مجلة (على الأقل على الأبليكيشين حقهم) لكنها كانت شهرية، قبل فترة (ما أتذكر من متى بالضبط) جابوا رئيسة تحرير هاربر بازار البريطانية لوسي يومانز و أعتقد هي اللي سوت المجلة اللي صارت أسبوعية و اسمها The Edit و موجدة على الموقع. 

المجلة خفيفة مرة، ما فيها موضيع دسمة، إيديتوريال واحد مع لقاء كل عدد مع وحدة مشهورة بالفاشن (أول ما كان عندهم مشاهير) و بعض الزوايا الخفيفة. 

العدد هذا فيه إيدتوريال و لقاء مع العارضة البريطانية جوردن دون. ما عمره أعجبني شكلها قد هذي المرة (صح الإيدتوريال مو ستايلي)، بس التصوير، المكياج، التسريحة كله مرة حلو. 

بالعدد نفسه فيه زي الموضوع المصور أعجبتني مرة فكرته، هو عن المجوهرات الصغيرة، أو زي مو هم مسمينها "اللمسات الأنثوية". أحب مرة العقود و الخواتم و بعض المرات الأساور الصغيرة (مشكلتي مع الأساور إنها على اليدين فممكن تضايق و أنت تشتغلين). 

أعرف إني قريب مرة متكلمة عن المجوهرات، بس مين ما يحب يتكلم عنها. قلت لكم لما شفت موضوع المجوهرات الصغيرة بذا إيديت قررت إني أسوي أنا نسختي و أحط من كل "نوعية" مجوهرات شيء واحد. 

أحب العقود اللي معها تعليقة صغيرة، بشكل عام قلت لكم أحب هذي المجوهرات الصغيرة اللي ما تصارخ بوجهك شوفوني، ممكن تلبسها كل يوم مع كل شيء و تحسين إنها ما فرقت كثير باللبس، بس هي فارقة عندك. ماركة العقود هذي عرفتها من أختي كانت تفتش فترة على عقود. عندهم عقود صغيرة بكل شكل أعتقد على الأقل بتلقين عندهم لو شيء واحد يعجبك. 

للأساور، أحب أساور "فريندشيب" مع إنه ما عندي و لا وحدة، لأني أعتقد حلاوتها بتجميعها، أعترف إني كسولة، و أكره أفسخ و ألبس، خصوصا أني ما أحب أتروش فيها، أحس إنها تتوسخ و تجمع الوسخ. علشان كذا اخترت هذي الأسوارة الذهب، مع الأحجار. 

ما يحتاج أقولكم إني أحب الخواتم بأحجار، خصوصا لما تكون ذهب أصفر و أحجار ملونة، يعني باختصار كل شيء بهذا الخاتم يعجبني. 

آخر شيء حاولت أختار أشياء أسعارها معقولة، لأنك لما تلبسين شيء كل يوم ما تبغين شيء يكون غالي تخافين عليه، و بنفس الوقت ما تبغينه شيء أي كلام، علشان ما يخرب أو يلون على جلدك. هنا تلقون مجلة نيت أي بورتيه لو مهتمين، ممكن تشيكون فيها على الموضوع اللي قلت لكم عنه. 

Pop of Color

قبل أسابيع الموضة شفت إيدتوريال أعجبني مرة على فوق كوريا، فقررت أكتب شيء عنه لأني انتبهت إني من زمان ما كتبت عن إيدتوريال، و هذا بذات يستاهل إنكم تشوفونه. (تذكرت كتبت عن إيدتوريال ساندي اللي على فوق الأمريكية، بس هذا ما يحسب لأنه ما عجبني).

الإيديتوريال اسمه Room with a Garden و من اسم الإيديتوريال تعرفون إن كله ورد. من أكثر الصور اللي أعجبتني هذي الصورة اللي فوق، و فيها العارضات لابسات قطع من أشهر مجموعة لربيع و صيف 2013 و هي مجموعة لوي فيتون اللي تكلمنا عنها من قبل.

اللي عجبني بهذي الصورة بالذات إنها عطتني فكرة عن كيف ممكن تلبس وحدة من أبرز موضات الصيف الجاي و هي الملابس الأسود و أبيض: مربعة، مقلمة، كاروهات، بلوكز (الأبيض و الأسود جا بكل الأشكال بمجموعات ربيع و صيف  2013) المهم أنه كيف تنلبس هذي الموضة من دون ما تكون مملة. الشيء اللي فكرت فيه من الصورة، هو شوية ألوان. ما أقول ألبسي أكليل ورد، لكن الفكرة اللي جتني ليه ما يلبس معاه عقد ملون مثلا؟

العقود من اليسار لليمين الأرخص للأغلى: من اليمين العقد اللي كل أحجاره بلون واحد (ما أعرف إذا هذا مشمشي) من جي كرو العقد بالنسبة لي لو كنت تخافين من كثرة الألوان بالمجوهرات، فهذا بيكون خياري الأول، أولا لأن ما فيه ألوان كثيرة، ثانيا لأن سعره معقول، فما راح تدفعين شيء كثير على عقد ما راح تلبسينه. العقد سعره ب 424 ريال تقريبا. العقد الثاني من جيرارد يوسكا العقد ب 620 ريال تقريبا، و بالنسبة لي هذا، لو كنت تحبين العقود الملونة و تبغين تستثمرين بواحد، تقريبا فيه كل شيء، فيه أحجار ملونة، فيه سلسلة ذهب، و فيه لولو. آخر واحد من أريكسون بيامون أعتقد إن سعره خيالي على وشو هو (عقد ملون ما راح ينلبس بكل مكان و مع كل شيء). لكن ما يمنع الواحد يمتع نظره شوي (مو جماله فظيع؟!!). شخصيا لو كنت بألبس قطعة من لوي فيتون (لو كنت) أعتقد هذا العقد هو اللي يستحقه. 

إذا تبغون تشوفون باقي الإيدتوريال تلقونه هنا. 

Chunky/Rapper Necklace

أمس كان فيه عروض كثيرة مثيرة يعني على سبيل المثال عرض بلانسياقا بعد ما تركه نيكولا قاسكيه، و صار أليكساندير وانق هو مصمم الدار. العرض يستاهل أنك تتفرج عليه، خطوطه نظيفة و مرتبة، و فيه قطع مثيرة (بالذات بعض الفساتين السوداء). 

ما علينا، صحيح أمس كان مليان، و لا شيكت إلى الآن على كل شيء، لكن من أكثر الأشياء اللي أثارتني هي المجوهرات بعرض لانفين.  

الشيء اللي أول شيء لفتني أول ما شفت أول صورة من عرض لانفين هو هذا العقد اللي مكتوب عليه Cool، تذكرت العقود اللي يكتب عليها الاسم (كيري برادشو"ساراه جيسيكا باركر" كانت تلبس واحد) فكنت كل اللي أفكر فيه، ممكن أحد يلبس عقد عليه أسمه بهذا الحجم؟ لما رحت أشيك على المجموعة، شفت أنه ألبير إيلبز مسوي تقريبا كل العرض عقود و إكسسوار كبيرة مرة، لكن العقود هي أكثر شيء أثارني بالكلام "البايخ" اللي مكتوب عليها (كلها مكتوب عليها كلمات مثل Happy، Help، Cool، You على قلب و أشياء ذكرتني أشكالها بالعقود اللي يلبسها بعض مغنين الراب (أفتحوا MTV و بتعرفون وش أقصد). 

باختصار، أعتقد إننا بنشوف نسخ من هذي الموضة بالهاي ستريت من نيولوك و ريفير آيلاند مثلا، إيش رأيكم بالعقود الكبيرة هذي ممكن تلبسونها؟ 

"I'm Obsessed"

أعترف إن عندي مشكلة تجاه إن عرض لدريس فان نوتين من دون ما أتكلم عنه. أمس كان العرض و الكعادة يقدر دريس يخليني أتمنى لو أعيش ببوتيك له، و ألبس من لبسه و خلاص هذي هي حياتي. خطتي الجاية لازم ألبس هذا اللبس لمناسبة (هذا اقتراح ثاني غير تنورة ديور). 

لما شفت البمبر هذا على طول طحت بحبه (ما يحتاج أصلا أنا من قبل ما أفتح عرض لدريس أجهز نفسي إني أحبه). قد تكلمت عن البمبر كلبس سهرة من عرض بوتشي لصيف 2013 لكن لو كنت بالبس واحد منهم، أبغى يعطوني حق دريس، ما أعرف هو مطرز أو مشكوك (مع أنه الأغلب أنه مطرز لأن كل العرض فيه تطريز حتى الكعب) بهذي الخيوط الفضية، و قماشة شكله مرة حلو. الشيء اللي خلاني لازم أتكلم عن هذا العرض، هو هذا الفستان، مو بالضبط الفستان، الشيء اللي تحت الفستان، أولا أعترف إني أحب كل شيء مرسوم على الجلد (أحب نقش الحنا الحلو)، فشيء زي كذا بيكون أحسن قطعة بدولابي بلا منازع، أحس إنه ممكن تحول أكثر قطعة من دون شكل، لقطعة كلها حياة (شوفي كيف سوت بهذا الفستان الأسود). آخر شيء لما فتحت العرض من جديد علشان "أراجعه" شفت هذا الحلق اللي على العارضة أعرف أنه شرح ما يشجع بس مع هذا الحلق اللي على كل الأذن أحس من الفخامة كأنها كانت تسبح بمجوهرات. باختصار هذي الثلاثة أشياء، هي الأشياء اللي أبغى ألبسها لو عزمت لأقرب زواج. 

Big Beanie

الفترة اللي فاتت لو كان فيه إكسسوار أقدر أقول أنه كل العالم "طايحة" فيه فهو بيكون بلا نقاش البيني أو ناس يسمونها أيس كب. رجال و نساء كلن يلبسها، بكل الأشكال و الألوان. لا تأخذون على كلامي، لكن أعتقد لإنها كانت بعرض جيل ساندير للصيف السنة اللي فاتت، هو اللي جابها كموضة. 

بعرض جيلز (ما أعرف كان اليوم أو أمس) ما يهم المهم أنه بالعرض كان ملبس العارضات بيني، مو بس بيني عادي بيني مرة كبيرة ... و ملبسها العارضات مع فساتين سهرة بعد. ما أعرف إذا هذا يعني إننا بنشوف بيني على الريد كاربيت؟!! بيكون غريب شوي، بس ما تدرون كل شيء وارد أنه يصير موضة على الريدكاربيت. (الريدكاربيت الوحيد اللي ممكن أتخيل بيني فيه، هو ريدكاربيت مهرجان سندانس اللي يسوى بيوتاه بالشتاء). 

للحق أنا إلى الآن ما لبست بيني، يمكن لأني اكتشفت إني شخص ما يحب يحط أي شيء على رآسه، بس البيني اللي بعرض جيلز أغرتني إني أجرب و ألبس وحده. 

إيش رأيك بالبيني؟ لبستوها أو تعتقدون إنها موضة ما تستاهل أنكم تجربونها؟ 

Oz

أمس كان بريمير فيلم Oz The Great and Powerful، بطولة الفيلم طبعا مع جايمس فرانكو كانت لميلا كونيس، ميشيل وليمز و ريتشل فايس. الحلو بالموضوع إن كل الثلاثة دايما لبسهم حلو.

ما راح أتكلم كثير عن لبسهم بالبريمر، لأني أعتقد على الأقل وحدة منهم بتدخل قائمة أحسن الملابس لشهر فبراير. بس بشكل عام ميلا كانت لابسة دولتشي آن قابانا، ميشيل وليمز ببرادا و ريتشيل فايس بفيكتوريا بيكام (أعجبني مكياجها مرة).

 ما يحتاج إني أقولكم إتي متحمسة مرة للفيلم وودي أشوفه، لكن اللي خلاني أتحمس و أقرر أكتب عنه، غير إن شكل الثلاثة عجبني بالبريمر (بشكل متفاوت)، لكن اليوم لما كنت أدور بالمكتبة شفت هذا الكتاب Everything Oz (موجود بالصورة) و أعجبني مرة. الكتاب عبارة عن أشياء ممكن تسوينها (أشغال و أكل) كلها لها علاقة ب Oz بشكل أو بآخر. لما رجعت للبيت قررت إني أسوي سيت عن الموضوع (أنا سويت السيت بإيحاء من الفيلم القديم The Wizard of Oz اللي ما أحبه)، هو صح أنا ما أحبه، و أتذكر أول مرة تفرجت عليه كنت معصبة مرة، لأني تزلته تورينت و كان تحميل فيلم يآخذ قرن و بعدين شفت الفيلم و لقيته سخيف و زعلت. ما علينا من قصة زعلي، بس إني بعيد عن سخافة القصة أظني مع الوقت بديت أستظرف الشخصيات و أشكالهم، خصوصا جزم دروثي الحمراء (بالكتاب فيه كيف تسوين جزمة حمراء لماعة). أعتقد بسببه صرت أستظرف الجزمات الحمراء. أخترت الجزمة الحمراء هذي النص كعب (ما أعرف من وين جبت الاسم) من سيلفاتوري فرقامو، و الفستان المربعات من أيسوس (لأن دورثي كانت لابسة فستنان مربعات "قينام" بالفيلم). أخترت الخاتم هذا لأنه عاجبني، و لأن فيه شخصية الأسد (البسة أخت الأسد). و هذي الشنطة (بعد لأن هذا ستايل اللونش باق عاجبني من زمان) علشان شخصية التنكة. آخر شيء حبيت احط علبة الظل هذي من أوربان داكي مطلعين مجموعتين وحدة للساحرة الشريرة (اللي أنا حاطتها) و وحدة للساحرة الطيبة.

 ترى كل الخيارات مبنية على القصة القديمة، ما أعرف إذا الفيلم الجديد له علاقة بالقديم.

Bow ... Wow

قلت لكم لما تكلمت عن أحسن ملابس شهر يناير إن مجموعة لوي فيتون لربيع 2013 (بمربعاتها) مسيطرة على الريد كاربيت من نهاية السنة اللي فاتت. واضح إن المجموعة اللي فيها كثير من موضة المود اللي كانت بالستينات، مو بس مكتسحة بمربعاتها، لكن بعد جايبة معاها "الفيونكة".

زي ما تشوفون من كيري واشنطن بواحد من بريمرات فيلمها الأخير جنقو، لميروسلافا دوما بعروض الأوت كتور قبل أسبوعين تقريبا، و فيرجين كليزنز (حفيدة كليرنز حق مستحضرات التجميل) و كلهم لابسين من المجموعة نفسها (لوي فيتون ربيع 2013). و آخر شيء هانلي موستابارتا بمارني، بحفل إطلاق عطر مارني (بالمناسبة ودي أشمه أحس ريحته منعشة، شي يشبه ديزي حق مارك جايكوبز). 

بصراحة ما أعرف موقفي من الموضوع هذا، يمكن دايم أحس أنه الربطة أو الطوق لعمر معين و لمناسبات محدودة، شخصيا ما أظني راح أسويها، لأنها "كيوت" بزيادة (وهذا مو أنا)، و الشيء الثاني أحسها تصلح لبنات صغار، مو لأحد فوق العشرين. 

أنتم وش رأيكم ممكن تلبسونها؟ أو تشوفونها ماتناسب لأي سبب.

Turban

من قبل فترة طويلة كانت العمايم عاجبتني قوة. ما زلت أحب أشوفها، لكن لما جربت ألبسها، اكتشفت إني ما أحب أحط شيء زي كذا على رآسي لأني أحسه يثقل راسي :) ما أعرف شعور ولد صغير لابس شماغ أول مرة. :). الفترة هذي كل مرة أشوف صور من عرض مارك باي مارك جايكوبز لصيف 2013 أحب الربطة اللي لافها على رآس العارضات كأنها عمامة أكثر. و تحمست مرة إني ألبسها (أعتقد إني لازم أسويها بأي مكان). 

من الأشياء اللي أنا طايحة فيها هذي الفترة، هي Etsy جالسة أكتشف فيه أشياء مرة حلوة، صح البحث عندهم تعبان، لكن لأني جالسة أدور على أشياء جديدة أو مختلفة موسعة صدري عليه و جالسة أدور فيه على كل شيء. لما كبرت فكرة الربطة هذي بعيني قررت إني ما أدور على شالات بمحلات أو مواقع عادية، و قلت باشوف إذا ممكن ألقى شيء عند Etsy. و هذا اللي طلعت فيه.

آسفة على الأشياء اللي مو واضحة مرة من الصورلكن تأكدوا إنها حلوة (على الأقل هذا اللي أنا أشوفه). 1. جزيئات الشوكولاته و الكافيين 2. السماء المظلمة 3. زهرة الرودندرون 4. الأمير الصغير 5. وجوه 6. بيكاسو.

وش رايكم بالحركة (الربطة العمامة)؟ فيه شيء أعجبكم من الخيارات اللي حطيتها؟

In Mood: Chainmail Purse

من يومين أو أكثر شفت صورة للورين دومنيقو (محررة بمجلة فوق) ما أعرف وشي المناسبة، و لا مهتمة أعرف صراحة، بس لورين كثير مرات تطلع بلبس حلو (دوروا على صور زواجها بالنسبة لي فستانها كان خرافي). المهم إن لورين كانت شايلة شنطة صغيرة فيها مكياج (أعتقد إنها كانت منتشرة بالعشرينات، أكيد من القرن اللي فات). 

لأني ما لقيت (أو ما دورت بضمير) عن نفس نوعية الشنطة اللي مع لورين (متأكدة إن اللي معها فينتاج)، فقررت أجيب أشياء ممكن تكون "بديل" لها (أهم شيء الفكرة)، خصوصا و إنه من زمان عاجبتني الشنطة اللي من هاوس أوف هارلو. حاولت قد ما أقدر إني أختار أشياء أسعارها معقولة، أو قصدي خيارات أسعار أكبر. أعرف أنه حتى أرخص وحدة مو رخيصة مرة، بس أعتقد إنها ظريفة :) الشنطة الأولى أو الأرخص من نالي على شكل نجمة تلقونها عند أيسوس هنا، فيه عندهم أكثر من لون، شخصيا هذا اللون هو اللي أعجبني. 

الشنطة الثاني من هاوس أوف هارلو، أعتقد من تشكيلة السنة اللي فاتت، بس لقيتها بأكثر من مكان تنباع، و نفس الموضوع فيه أكثر من لون (مو رخيصة بس حلوة). 

آخر وحدة من جيمي تشو أعجبتني الشنطة كثير، ما عادا شيئين ما عجبوني فيها سعرها أكيد (ما أشوفه طبيعي). و أنه مكتوب عليها جيمي تشو.

شرايكم بالشكل هذا من الشنط مع ملابس السهرة؟

Nicolas Ghesquiere

من أكثر الأشياء اللي كانت عاجبتني بعروض صيف 2013 هو عرض بالنسياقا و بالذات إكسسوارت الشعر (أو الأطواق المقلوبة). و بمناسبة إني سمعت الخبر هذا، قررت لازم أكتب عنه لو كان كلامي ماله معنى (لأني من شفت العرض و أنا أحاول أكتب و لا راضي يجي معاي شيء). 

قريت هذا الخبر عن أنه نيكولا قاسكيه (مصمم بلانسياقا) راح يترك أو ترك الماركة، ما أعرف لحد الآن مين راح يجي بداله، لكن لقيتها فرصة إني أتكلم عن مجموعته الأخيرة (ما أعرف ليه أكثر المصممين يطلعون بأحسن المجموعات لما يجون يتركون الماركة؟). المهم ذاك الوقت (قبل شهر تقريبا، ما كان فيه أي كلام عن نيكولا و أنه بيترك بلانسياقا، بس المجموعة بالنسبة لي كانت من أحسن المجموعات اللي شفتها مثل ما قلت لكم. 

أعجبني كيف أخذ موضة مثل "الرفلز" (بنشوفها كثير بملابس الصيف الجاي) و سواها بس مو بطريقة "دلوعة" أو "بناتية" (تعرفون إن عندي مشكلة مع الأشياء البناتية مرة :). 

أكثر الأشياء اللي أعجبتني زي ما قلت لكم هو الطوق اللي كانوا العارضات لابسينه على ورا (ودي ألبس شيء بالطريقة هذي). ما كان العرض بس فيه هذا الطوق الغريب اللي فيه أغصان، لكن كان فيه أطواق ذهبية سادة، و كلها ملبوسة على ورا. 

اللي أعرفه إن نيكولا موجود ببلانسياقا من 97 يعني تقريبا له 15 سنة مع الماركة طلع معاها أشهر علاماتها و هي الشنطة موتوسايكل و سيتي (اللي أعتقد ما فيه بنت على الأقل بالرياض، ما تعرف أحد عنده نسخة من هذي الشنطة (موتوسايكل، أو سيتي) :). 

ننتظر مين بيجي مكانه، ما أعرف أحد فاضي من المصممين إلا جون قوليانو اللي ترك ديور علشان موضوع هتلر و المحرقة. و بعد نشوف وين نيكولا بيروح بعد بلانسياقا. 

From Russia with Love

من أول الأفلام الفرنسية اللي شفتها فيلم كان اسمه "الدمى الروسية"، ما أعرف من متى و أنا أعرف الدمى الروسية (العرائس الخشبية اللي تدخل ببعض). لكني أعرف إني من عرفتها و أنا أحبها. و ما أعرف حبيت الفيلم علشان أسمه و لا هو كان ظريف :). 

بالتدوينة اللي قبل هذي، تكلمت لكم عن ستريت ستايل خصوصا وقت أسابيع الموضة، قبل أسابيع الموضة ما كنت متحمسة إني أشوف نفس الناس اللي يجون و يستعرضون بأشكالهم، لكن شفت كلتش من شارلوت أولمبيا، و انتظرت أشوف يكمن أناظرها مع وحدة من "Russaian Pack" خصوصا يوليانا سيرقنكو، لكن شكل يوليانا عرفت إني جالسة أنتظر و قررت تعاند، و لا تطلع بكل مكان زي كل مرة. 

Russian Doll by dejavuar featuring a maxi skirt

ما عندي فكرة إذا تعرفونها قبل، أو قد مرت عليكم، لكن إذا كان عندك تمبلر، أعتقد أنكم شفتوها على الأقل مرة. أعترف إني أول مرة شفتها انبهرت فيها، لكن مع الوقت حسيت إنها من مجموعة الناس اللي جاية علشان تقول للناس أنا غنية شوفوني. حتى و أنا أتضايق منها (و من كثير من اللي بالفاشن)، ما زلت أعتقد إن ستايلها حلو، حتى لو كان شوي مصطنع. ما علينا لكن لو كنتوا تحبون لوك كلاسيكي أروستقراطي، دوروا على يوليانا Ulyana Sergeenko. يولينا الحين عندها خط أزياء (ما أعرف أنه ينباع برا روسيا). بعد عرضت بأسبوع الأوت كتو الماضي بباريس أول مجموعة أوت كتو لها، لو مهتمين تلقونها هنا.

نرجع للسيت، اللي قلت لكم أهم شيء فيه بالنسبة لي هي شنطة شارلوت أولمبيا ما أعرف وش قصتي مع شناطهم (الكلتش) بس كل وحدة تصرخ بوجهي تقولي أشتريني أنا. من فترة طويلة و أنا عاجبتني هذي التنورة من صوفي كوكوسلاكي أعرف بعض البنات مسخوها بالتنانير الشفافة هذي، لكن بالنسبة لي فيه أشياء مالي شغل بالناس وش قاعدين يسوون بالأشياء، زي الكوب كايك، مالي شغل إذا الناس يعتبرونها موضة و تلقينها بكل مكان، أو بطلوا يعتبرونها، إذا قررت إني باشتري كوب كايك، باشتري بأي نكهة أبغى (بالمناسبة نكهتي المفضلة فستق من كوب من الكايك :). الجزم من نيكولاس كيركوود أحب جزمة أحس أنه أذكى مصمم جزم (آسفة للي يحبون لابوتان أو جيمي تشو) ما عندي مشكلة مع الإثنين بس أحي كيركوود أكثر، و قررت أختار هذي الجزم، لأن اللوك كله سادة، حتى مجوهرات ما اخترت علشان الكريستال الموجود على القميص من ميو ميو و النظارات قررت إني أختار بعد شيء كلاسيكي نظارت "بسة" أو cat eye ما أعرف ليه بس حسيتها تمشي مع باقي اللوك. أعرف أن كل الأشياء الموجودة غالية مرة، السيت هذا مو شرط أنك تشترين الأشياء اللي فيه نفسها، أعتقد فيه كثير من الأفكار اللي فيه موجودة بالهاي ستريت، بس أنا عجازة ما ودي أدور (طبعا إلا الشنطة :). 

شرايكم بستايل يوليانا سيرقينكو؟

Would You Wear ... ?

أخترت هذا العنوان علشانه ما أعجبني اسمها بالإنجليزي، لأني كنت أسميها شيء مختلف. والشيء الثاني لأني أتذكر أول شيء عرفته عن الموضة بالنت كان على موقع مجلة people المهم و كان عندهم استفاء كل فترة له نفس العنوان :). ما علينا ندخل بالموضوع الأساسي أصلا ما أظن فيه أحد منكم قد اهتم بالعناوين أصلا D:.

ما فيه كلام أنه جزء من الموضة الآن هو street style خصوصا وقت أسابيع الموضة، و الأشياء اللي تلبسها أو يلبسها المحررين و العارضين و العارضات، و الناس اللي عندهم فلوس و يترززون بهذي المناسبات. صحيح خف اهتمامي فيهم، لأنه كثير منهم صار ينرفزني بالاستعراض اللي بعض المرات يآصل لمستوى مستفز، و لا حد الله إني أشوفهم و أتنرفز :). المهم، من فترة لاحظت هذا الشيء اللي راح أتكلم عنه (إلى الآن ما تكلمت :) و هو النظارات الشمسية اللي كأنها مرايا، (كنت أسميها العدسات اللي تعكس) (أعرف مشوار). 

بصراحة أنا ما أحب هذي العدسات، ما أعرف ليه تذكرني بالرياضيين، و أحس الرياضيين اللي يلبسونها يحسون أنفسهم كشخة، و الواقع أنه أشكالهم مو حلوة فيها، خصوصا فيه نوع مموج مرة، و نوع ثاني عدساته صغيرة و تجي كأنها لبس فضائي.

لما شفتها تتكرر على أكثر من شخص، كأني بديت أستظرفها شوي (ما يعني إنها عجبتني)، و لا أعتقد إني أفكر بوحدة زيها لكن أعترف إنها مو بمستوى القبح اللي كنت أحسه.

هنا لقيتها عند نيت آي بورتيه باسم عدسات المرايا.