All About Great Inspirations

أعرف من فترة ما كتبت هنا، و من زمان ما تكلمت عن فيلم و الملابس اللي فيه. ما أعرف ليه؟ هم بطلوا يسوون أفلام بملابس حلوة؟ ما يهم، اللي بأقوله أمس شفت فيلم قديم (خارج الموضوع، أول كنت أشوف أفلام قديمة أكثر من الحين، ما أعرف ليه، بس صرت أحس لازم لها مزاج خاص). المهم الفيلم اسمه للي ما عرفه من الصور All About Eve، بالمناسبة الفيلم حلو للي يبغى يشوفه. 

طبعا بعيد عن الفيلم و كان هو كويس أو لا، الملابس بالفيلم مرة حلوة، و حسيت بأحيان كثيرة إن كثير من المصممين يآخذون أفكار من الملابس اللي فيه. أعترف إن بحثي عن ملابس تشبه الملابس الموجودة، و اللي حسيت إنه فيه تصميم حديثة تشبه له كان كسول شوي، جزء منه إني من زمان ما كتبت هنا، و لو كنت بأدور أشياء بالضبط تشبه الموجود بالفيلم، أعتقد ما راح أخلص الموضوع إلا بعد أيام، و أنا متحمسة أكتب عنه اليوم. السبب الثاني و هو الأهم إني عجازة بأغلب الوقت. 

كثير من الملابس اللي لبستها وحدة من البطلات (إيڤ) حسيت كأني شفت أشياء كثير يشبه لها عند ڤالنتينو و أونر. فيه لبس لبسته بطلة ثانية (مارچو الأولى من اليسار الصف الثالث)، ما أعرف ليه أحس إني شفته بمجموعة قديمة لإيڤ سان لوران (لما كان هو المصمم)، بس لأني مرة كسلانة، قررت إني ما أدور على اللبس. 

فيه أكثر من لبس (لكل البطلات) أعجبوني، بس ما حطيتهم هنا، لأنهم أحلى بالحركة، و لأني ما بغيت أخرب عليكم كل الملابس، لو تبغون تشوفون الفيلم. 

New Classic

قبل فترة شفت فيلم بلو جازمين (معلومة جانبية: عجبني) المهم بعد ما شفته قررت إني أروح أشوف فيلم I Am Love، الفيلم للي ما يعرفه هو فيلم إيطالي لتيلدا سوينتين. الفيلم من زمان نازل (مو بلو جازمين)، و أتذكر إني لما شفت الستيل حقات الفيلم تحمست له (تحمست حتى للملابس)، المهم بعد فترة شفت التريلير و خف حماسي و بعدها كل مرة أأجل المشاهدة . ما أعرف ليه كان ببالي أنه الستايل تيلدا سونتين و كايت بلانشيت بالفيلم متشابهين. بس طلعوا ما يتشابهون. الشبه الوحيد كلهم ثريات. 

Chic by dejavuar featuring a print pencil skirt

Carven print pencil skirt / Semi Couture sweater / Burberry ankle strap heel sandals / Yves Saint Laurent shoulder bag, $1,700 / Tom Binns pearl chain necklace, $785 / Tom Ford fragrance

بس الفيلمين أعطوني فكرة هذا السيت و هو لبس "الكلاس" أولا لازم أحط توضيح أنه لبسي مستحيل يكون كذا (مو أسعاره) صحيح ما أقدر على الأسعار، لكن قصدي حتى الشكل. و لأني ما أقدر أسوي شيء "ممل" قررت أحافظ على الفكرة نفسه، يعني مثلا أحس عقد لولو و تنورة بنسيل و كنزة كشمير، شيء أساسي بهذا اللوك. أول شيء جا ببالي هذي التنورة من كارفين اللي على شكل جلد غزال، من زمان عاجبتني و لقيتها فرصة إني أحطها بهذا السيت. الشيء الثاني قررت أختار هذا العقد اللولو اللي محيوس، أحس تعطي لمسة غير على هذا اللوك اللي مرة سلييك. قررت إني أختار ألوان خريفية و كلاسيكية و أهم شيء لقيتها فرصة إني أختار هذا العطر من توم فورد اللي اسمه "جازمين مسك" (ترا ما قصدت إني أربطها ببلو جازمين :P) بس لو ما حصل لكم أي شيء من هذا السيت روحوا و شموا العطر هذا عند باريس قاليري ريحته مره حلوة و يصلح هدية. 

Logorama

أعرف من زمان ما كتبت هنا، بس رمضان و عيد و سفر، أظن حتى أنتم مالكم خلقي. علشان كذا ما راح أتكلم بشيء جاد لكن الأسبوع اللي فات شفت هذا الموضوع الظريف عن ملابس مسلسل سيكس آند ذا سيتي اللي صارت "موضة قديمة". فيه صورة بالذات عجبتني ، و عجبني التعليق عليها، و بغيت أتكلم فيها و أشوف رأيكم، لو عندكم رأي بهذا الموضوع. 

ما أعرف عنكم أنتم، بس من عرفت الماركات (الماركات الغالية) و أنا بالنسبة لي الشنط اللي عليها مونوقرام (حروف الماركة) أقل الشنط اللي تعجبني، ما أعرف ليه، يجيني إحساس إنها حركة رخيصة. 

بعدها بفترة (فترة طويلة) أتذكر قريت لواحد (نسيت مين) بس أتذكر أنه رجل، قال أنه ما يحب يلبس ماركات واضحة، بالذات لما تكون غالية، لأنه يقول أنا دفعت فلوس كثيرة عليها، ليه فوق كذا أسوي لهم دعاية؟!! أعجبتني فكرته (لو تعرفون من اللي قال هذا الكلام قولوا لي). 

المهم حتى بعد كلامه إلى الآن ما أعرف ليه ما أحب طبعات المونوقرام، بس قبل فترة قصيرة كنت أكلم أختي عن هذا الموضوع، عن الأشياء اللي شعارها واضح، و أتذكر قلت لها ما عندي مشكلة مع شعار شانيل على الشيء اللي يفتح الشنطة مثلا (ما أعرف وش أسمه)، بس ما عندي استعداد ألبس سي سي حلق على أذاني، لأني ما أشوف إن شكلها حلو. 

اللي عجبني بالصورة اللي فوق، أحس أنه أقرب تفسير لي ليه ما أحب لبس شعارات الماركات الغالية (أفضل ألبس تي شيرت عليه شعار كولا على إني لبس شيء عليه شعار دي آن جي أو دي كي إن واي). صحيح أحس اللي يلبس شيء عليه شعار كبير كأنه جالس يقول شوفوني أنا عندي فلوس، مو أنا أنيق، أو أنا أعرف ألبس أو لبسي حلو، بالنسبة لي هدفي من اللبس مو علشان يعرف الناس كم حسابي بالبنك، بس علشان أكون راضية عن نفسي. 

The Great Gatsby Weekend

الجمعة اللي فات بدأ عرض The Great Gatsby النسخة اللي ما أعرف كم رقمها. لكن هذي المرة الفيلم موسيقي و اللي أخرجه هذي المرة باز لورمان مخرج روميو و جوليت و مولان روج (لو كنتوا مهتمين). أعترف إني مو متحمسة أشوف الفيلم إلا لشيء واحد (مع إني أحب تمثيل دي كابريو و كيري موليقان) لكن أنا تحمست أشوفه علشان أشوف الملابس اللي من تصميم برادا و المجوهرات من تصميم تيفاني. 

تعرفون إني من زمان أحب الفلابير، (لبس العشرينيات بشكل عام)، لكن هذي المرة قررت أسوي نسخة مبسطة منه خصوصا بعد ما شفت هذي القطعة (الشيء اللي يحط على الرأس) عند أيسوس ب 25 دولار. بالنسبة لي إذا عندك هذي القطعة، تكفي عن أي شيء ثاني علشان يصير اللبس عشرينيات أو فلابير. 

هنا قائمة بالأشياء اللي ممكن تسويها إذا ما حصل لك تروح لحفلة زي حفلات قاتسبي. أولا إقرا الرواية أو أشتري عقدها P: شوف الفيلم اللي أنتج عام 1974 من بطولة روبيرت ريدفورد و ميا فارو (أحب هذا الفيلم). و الملابس كانت فيه من تصميم رالف لورين. أما أسهل خيار تصفح هذا الإيديتوريال من عدد فوق لسبتمبر 2007 (أحب هذا الإيدتوريال مرة من أول مرة شفته). 

الفستان من سي سي توب شوب، موجود هنا. الرواية موجودة هنا عند أمازون أو ممكن تحملونها من أبل ستور أو من أمازون كيندل أو حتى بي دي إف مجاني راح تحصلونها على الإنترنت (الرواية حلوة بعد). 

90's Kid

من زمان ما كتبت عن فيلم، أو كذا أحس. بشكل عام أحب الأفلام، و بالخصوص أفلام الكرتون اليابانية أو أفلام ميازاكي ... اليوم شفت فيلم مع أختي (كان من زمان ودي أشوف فيلم كرتون ياباني). المهم، الفيلم اللي شفته اليوم اسمه Whisper of Heart. الفيلم قديم (من التسعينات). الفيلم غير أنه لطيف، ممكن تشوفون فيه لبس التسعينات و حتى الشعر (بذات على الأم).

Whisper of the Heart by dejavuar featuring a distressed leather backpack

Topshop / MSGM / Happy Socks socks / J.Crew sneaker / Private Stock distressed leather backpack

لأني أعتبر نفسي طفل من التسعينات أقدر أقول أنه لبسي لما كنت صغيرة كان يشبه كذا (من الصور)، صحيح إني ما كنت راضية عن لبسي (كنت أحس أمي تهينني و تلبسني ملابس أطفال و أنا كبيرة). لكن ما دامت ملابس التسعينات خصوصا القورنج راجعة موضته، و الفيلم زي ما قلت لكم بالتسعينات عن بنت بالمدرسة، قررت أني أختار ست فيه من لبس التسعينات و أحسه لبس طلاب. 

ما فيه شيء كثير ينشرح بالسيت، كله واضح بس حبيت أختار مع الملابس سنيكرز لأني من فترة أفكر فيها، و لأن بالفيلم تلبس جاكيت بمبر و لأني أحب جاكيتات البمبر قررت أحطه بالسيت، طبعا ما دامه لبس مدارس (أو مستوحى منه)، أكيد فيه لازم شنطة باك باك. 

Oz: The editorial

رحت أشوف أوز ذا قريت آن باورفول. باختصار أقدر أقول لكم إني تفريبا صرت زي الأطفال لما يشوفون فيلم أو يسمعون قصة تعجبهم، و تصير هي شغلهم الشاغل. يدورون على ألعاب زيها، و تصير كل الأشياء تفسر على أساس هذي القصة. يعني ممكن تعطينه الغداء يقرر أنه يحوله ساحة لعب لشخصيات هذي القصة أو الفيلم.

من زمان ما حسيت إني اندمجت مع فيلم قد اندماجي مع هذا الفيلم. أول شيء سويته لما رجعت للبيت بعد ما شفت الفيلم دورت على مين صمم الملابس لأن الملابس صراحة تحفة. حاولت بعدها أدور على صور واضحة للملابس لكن ما قدرت ألقى شيء (يمكن لأن الفيلم جديد). و لأني ما لقيت صور، بس متحمسة مرة أتكلم عن ملابس الفيلم، قررت أختار ملابس من مجموعات خريف 2013 (اللي توها خلصت) و أحطها على هذا البوستر. الفكرة إني أختار من المجموعات شيء يشبه اللبس اللي لابسته الممثلات بالفيلم.

صراحة أعتقد اللي ناقص الحين، أنه مجلة أزياء تسوي إيدتوريال مستوحى من الفيلم. بعد الباليت المكياج اللي طلعتها أوربان دكاي للفيلم (عن الشخصيتيت قيلندا و ثيدورا (هنا و هنا). و نيكولاس كيركوود سوا مجموعة جزم تنباع بسلفريج بلندن عن الفيلم (لا تضيق صدوركم مرة غالية). 

 قلت لكم إني حبيت الفيلم، الملابس كانت مرة حلوة خصوصا أعجبتني ملابس قيلندا (ميشيل وليمز). و أعجبني مرة المكياج خصوصا مكياج ثيودورا (ميلا كونيس). (لو كنتوا مهتمين كيف يسوا مكياجهم تلقون هنا و هنا و هنا مكياج قيلندا و ثيدورا و  إيفانورا (ريتشيل فايز). 

الملابس اللس حاطتها من اليمين لليسار الأخضر لإفينورا من مونيك لوليه، الأبيض لقيلندا من أليكساندير ماكوين، الأحمر الفوشي لثيدورا من بالمان و الفستان الأسود لثيدورا بعد (لو شفتوا الفيلم بتعرفون ليه اخترت له لبسين) من قريث بيو.

تحديث:
لآن أختي تقول صور الملابس صغيرة، حطيت روابط للفساتين من العروض (تراني مقتنعة أنها واضحة) بس هذا من إرضاء الجمهور P:.

Oz

أمس كان بريمير فيلم Oz The Great and Powerful، بطولة الفيلم طبعا مع جايمس فرانكو كانت لميلا كونيس، ميشيل وليمز و ريتشل فايس. الحلو بالموضوع إن كل الثلاثة دايما لبسهم حلو.

ما راح أتكلم كثير عن لبسهم بالبريمر، لأني أعتقد على الأقل وحدة منهم بتدخل قائمة أحسن الملابس لشهر فبراير. بس بشكل عام ميلا كانت لابسة دولتشي آن قابانا، ميشيل وليمز ببرادا و ريتشيل فايس بفيكتوريا بيكام (أعجبني مكياجها مرة).

 ما يحتاج إني أقولكم إتي متحمسة مرة للفيلم وودي أشوفه، لكن اللي خلاني أتحمس و أقرر أكتب عنه، غير إن شكل الثلاثة عجبني بالبريمر (بشكل متفاوت)، لكن اليوم لما كنت أدور بالمكتبة شفت هذا الكتاب Everything Oz (موجود بالصورة) و أعجبني مرة. الكتاب عبارة عن أشياء ممكن تسوينها (أشغال و أكل) كلها لها علاقة ب Oz بشكل أو بآخر. لما رجعت للبيت قررت إني أسوي سيت عن الموضوع (أنا سويت السيت بإيحاء من الفيلم القديم The Wizard of Oz اللي ما أحبه)، هو صح أنا ما أحبه، و أتذكر أول مرة تفرجت عليه كنت معصبة مرة، لأني تزلته تورينت و كان تحميل فيلم يآخذ قرن و بعدين شفت الفيلم و لقيته سخيف و زعلت. ما علينا من قصة زعلي، بس إني بعيد عن سخافة القصة أظني مع الوقت بديت أستظرف الشخصيات و أشكالهم، خصوصا جزم دروثي الحمراء (بالكتاب فيه كيف تسوين جزمة حمراء لماعة). أعتقد بسببه صرت أستظرف الجزمات الحمراء. أخترت الجزمة الحمراء هذي النص كعب (ما أعرف من وين جبت الاسم) من سيلفاتوري فرقامو، و الفستان المربعات من أيسوس (لأن دورثي كانت لابسة فستنان مربعات "قينام" بالفيلم). أخترت الخاتم هذا لأنه عاجبني، و لأن فيه شخصية الأسد (البسة أخت الأسد). و هذي الشنطة (بعد لأن هذا ستايل اللونش باق عاجبني من زمان) علشان شخصية التنكة. آخر شيء حبيت احط علبة الظل هذي من أوربان داكي مطلعين مجموعتين وحدة للساحرة الشريرة (اللي أنا حاطتها) و وحدة للساحرة الطيبة.

 ترى كل الخيارات مبنية على القصة القديمة، ما أعرف إذا الفيلم الجديد له علاقة بالقديم.

The New Suffragist

من زمان شفت بالتلفيزيون بداية فيلم لهيلاري سوان أعجبني، بس صار شيء معين و اضطريت إني أطلع من البيت ... بس قبل يومين رحت أدور على الفيلم من جديد و نزلته. الفيلم عن الـ"سفريج" اللي هي حركة حقوقية كانت بأمريكا و بريطانيا بدايات القرن الواحد وعشرين علشان يعطون النساء حق التصويت الفيلم حلو اسمه "أيرون جاود إنجيلز" (لو بغيتوا تشوفونه). الفيلم مو بس قصته حلوه، لكن بعد فيه ملابس كثيرة، حسيت أنه فيه أشياء كثيرة تشبه لها بعروض الشتاء الأخيرة، خصوصا كثرة القبعات.

(يسار). بعرض إيزابيل ماران، ما أنكرت إيزابيل إن المجموعة استوحتها من النساء الإمريكيات، خصوصا الروديو (راعيات البقر)، و لأنه الثيم كان أمريكي، كان فيه كثير قطع دانتيل بهذي المجموعة (يمين). عرض رالف لورين كان فيه كثير "ملابس الرجال للنساء"، وحدة من هذولي سفريج كانت تلبس أكثر من مرة كرافات (الأولى على اليمن فوق)، أعجبني شكلها خصوصا أنه المفروض أحداث الفيلم تكون قديمة، يعني لا كانت موضة، و لا أكيد عرض رالف لورين طلع P:.

(يسار). ما أعرف إن كان مارك جايكوبز قبل ما يصمم هذا العرض للوي فيتون شاف الفيلم، لكن فكرة البالطو و "القبعات المجنونة" زي ما هو قال عنها، كلها توحي أنه إما شاف الفيلم قريب، أو على الأقل كان مهتم بالفترة هذي اللي تسمى "الإدوردية". (يمين). بالفيلم المرة اللي على اليمين تمثل شخصية حقيقة لوحدة من سفرجيست إسمها "لوسي بيرنز" تقريبا أكثر مشاهدها بالفيلم كانت لابسة هذا البالطو اللي ذكرني بالطبعات بعرض برادا الأخير.

قد قلت لكم قبل أنه فكرة الملابس الداخلية كملابس طلعات من زمان عاجبتني، الشيء هذا كان بأكثر من عرض من عروض الصيف، و بعد نينا ريتشي، و بعض العروض الثانية عرضت بعض القطع اللي تقريبا نفس الفكرة، أعجبني هذا اللوك من العرض، خصوصا أنه يشبه كثير الملابس الداخلية، بس طبعا تلبس برا :).

Eliza Doolittle

من أمس و أنا أحاول أنزل هذا الموضوع، المشكلة لما يكون عندك أنترنت خايس ... قبل أمس كان فيه عرض مارك جيكوبز، ما يحتاج أقول أنه من أهم عروض نيويورك، لكن الأهم من العروض القليلة اللي قدرت أشوفها، بسبب النت الخايس :S

أول صور للعرض شفتها، كانت صور لقبعة فرو كبيرة كانت موجودة بالعرض، لما شفت العرض ما أعرف ليه حسيت كأنه من فيلم My Fair Lady ... بالمناسبة هذا ثاني فيلم شفته لأودري هابيرون، فله معزة خاصة بقلبي، حتى لو إنه في ناس تطنزوا فيني بعد ما أقترحته عليهم :)

الصورة الأولى من اليمين ما أعرف ليه هي اللي خلتني أحس أنه صدق كأنه ماي فير لايدي، خصوصا و هي شايلة وردة (للي ما يعرف قصة الفيلم، أودري هابيرون كانت فيه تبيع ورد)، مو بس هذا الشيء اللي خلاني أكتب عن العرض، الفستان نفسه (أول واحد من اليمين) عجبني مرة، أتمنى الحين أشوفه على أحد (يمكن كيرستين دونست)، مع إني ما أتذكرها بشيء من مارك جايكوبز. أو زوي سالدانا. اللوك الأول من اليسار، علي طول ذكرني بشكل أودري بالصورة اللي فوق، بالمناسبة عجبتني خطوط الملابس هذي (المنتفخة)، شفتها بأكثر من عرض، بعد عجبني الفستان اللي تحته قميص أبيض، أحس راح نشوفه على أليكسا شونق. اللبس الثاني من اليمين ما يشبه ماي فير لايدي، بس حبيت ألوان التنورة، و بعد عجبني المشبك الكبير، و أهم شيء عجبني بالمجموعة هذي الجزم، أحس ودي لوعندي وحده منها، و أظن إننا بنشوف نسخ رخيصة منها بالهاي ستريت.

 مرة ثانية الفرو، و الخلقنة، و القبعات الكبيرة، و أهم شيء الوردة حسستني إن مارك كان يفكر بماي فير لايدي، لما صمم هذي المجموعة. 

 لو كنتوا مشيكين على المجموعة، وش رأيكم فيها؟

In Grieving

شفت قبل يومين فيلم نادين لبكي الجديد "و هلأ لوين؟" ... ما يحتاج أقول إني حبيته، يكفي إن نادين هي اللي مسويته P:، بس بجد مع أنه لبس النساء بأفلام نادين مو شيء ممكن ألبسه، لكن فيها شيء يخلي الواحد يشتهي "يخلقن"زيهم :) ... المهم بالفيلم هذي المرة، المشهد الأول كان هذي الصورة. 

قد كتبت أكثر من مرة عن ناس بجنازات، ما أعرف ليه صور النساء بالجنازات تثيرني، أتذكر من أول الصور اللي وعيت فيها إن الجنازات تعجبني، هي صورة لمغنية صربية بجنازة زوجها، أظن أنه واحد من جنرالات الجيش الصربي. 

إلى الآن زي ما قلت لكم أحب هذي الصور، أحب أشكال النساء وهم "متكشخات" و لا هم متكشخات (صحيح أتنرفز لما أروح لعزاء أهله محولينه لزواج من كثر ما هم جالسين يستعرضون فيه. لكن للمرة المليون ما يمنع إني أحب أشوف الصور ... علشان كذا المشهد أعجبني ... 

لأنه الأسود بهذا الصيف، كان تقريبا موجود بكل عرض، فكرت إني أدور على الملابس اللي ممكن تطلع حلوة، بجنازة، للمرة بعد المليون بجنازة أو عزاء "بالصور" :) ... بس هذا ما يعني إنه اللوك هذا ماراح ألبسه إلا لعزاء (لأني على الأغلب ما راح ألبسه لعزاء)، علشان كذا لو أحد شافني هذا الصيف مقررة إني أسوي نفسي ولو مرة كأني طالعة من عزاء بفيلم أو بصورة بجريدة، لا أحد يقول لي: ليه كأنك جاية من عزاء :) 

بيعد عن سواليف العزاء و الموت (جالسة أناظر "ذا بيق سي" وشوي موضوع الموت مأثر فيني)، لو كنتوا ببلد فيه سينما، شيكوا على سينمات البلد، و روحوا ناظروا "و هلأ لوين؟" قلت لكم الفيلم يستاهل، لو كنتوا قراب من البحرين بهذي الإجازة، تراه يعرض بسينما الدانة. 

آخر شيء، شرايكم بلوك "العزاء"؟ و قد عجبتكم صور الجنازات زيي؟

Effected

ما كنت أؤمن أنه ممكن ممثلة يتأثر شكلها بدور هي مثلته، مع إني ما زلت أردد إن آن هاثواي ما تعدل لبسها إلا بعد "ذا ديفيلز وير برادا". لكن بعد ما شفت كيف روني مارا تغيرت بعد تمثيلها فيم "ذا قيرل ويذ ذا دراقون تاتو" عرفت كيف الدور ممكن يأثر على حياة ممثله. 

من اليسار روني قبل ما تصور الفيلم، و من اليمين صورة لروني قبل شهر بوحدة من المناسبات، (شوفوا هنا شكل روني بالفيلم). بالنسبة لي أنا حابة التغيير اللي سوته، عاجبني القوثيك عليها، الشعر الأسود، مع الحواجب و الغره القصيرة، مناسبة مرة عظام وجهها، و بالنسبة لي أتمنى تبقى على هذا الشكل. 

لما شفت الصباح هذي الصورة لروني و هي تروج للفيلم حقها (نفسه)، بالسويد، و لابسة هذا الفستان الأسود من برابل قرونق، تأكدت أنه روني المفروض ما ترجع لشكلها الأول، مو لأنها مو حلوة فيه، لكن لأنه بهذا الشكل مستحيل أحد يشوفها و ينساها، لكن يوم بشكلها الأول شفتها أكثر من مرة، و كل مره أنسى كيف شكلها، لما أقرى عنها شيء.

شرايكم باللوك القوثيك؟ و بأي شكل عجبتكم روني أكثر؟

Heathers

من زماااان ما كتبت عن ملابس فيلم معين، أحس الأفلام ما عادت تحط ملابس حلوه، كلها مكرره ... بس قبل فترة مو قصيرة شفت فيلم قديم من الثمانينات مره حلو اسمه Heathers لو ما كنتوا تعرفونه أو ما شفتوه، الفيلم يستاهل. 

مو بس قصة الفيلم حلوه، لبس أبطال الفيلم بعد كان مره حلو، أحس كل السيت كان أنيق، (طبعا كل واحد بذوقه)، بس من دون مبالغة زي، و كالعادة أجيب أسوء مثال عندي قوسيب قيرل :). 

كالعادة، ما راح أتكلم بالتفصيل عن ملابسهم، لأنه أنتم جالسين تناظرون، فما يحتاج أشرح شيء تناظرونه، بس لو كان فيه تعليق، راح أعلق.
باحط الصور على حسب أصحابها ... و أول وحده أكيد بتكون الشخصية الأساسية للفيلم: وينونا رايدر "فيرونيكا".

عجبني هذا الفستان الأسود، أعرف أنه مو واضح مره هنا، لكن لو شفتوها تتحرك، قصته مره حلوه، عريض عند الاكتاف، بعدين بعد الحوض فيه زم كبير ... عاجبني أنه أسود كامل.

ما أدري لو قد قلت لكم قبل أو لا، بس كثير أحب الملابس أوفر سايز ... صحيح الأوفر سايز بعض المرات يكون صعب، خصوصا لو كان عندك "كرفز" لأنه ممكن يخلي هذا الجزء أكبر مما هو عليه أصلا، و كثير بشكل مو حلو. 

الروب هذا أول ما شفته ابتسمت ... تذكرت لما كنت السنة اللي فاتت، أنا و أختي جالسين ندور على شيء زي كذا (قبل ما أشوف الفيلم)، بس ما لقينا ... و الحين ما أدخل محل، إلا و ألقى، آخر مره لقيت شيء يشبه هذا تقريبا (نفس الألوان و ورود) عند توب شوب، للي تبغى، بس ما أعرف كم سعره :). 

هيذير 1 و 2 و 3:

الفيلم فيه ثلاثة بنات أسمهم هيذير، و كلهم لبسهم حلو كل وخده، بشكل مختلف عن الثاني.

بعد يمكن مو واضح هنا من رداءة السكرين كاب ... لكن اللي حبيته بهذا اللوك إن وحده من الهيذيرز، لابسه إكسسوارات صفراء مع الفستان الأسود، قايلة لكم، إني صايره أحب هذي الأشياء الملونة، و الغريبة، لكن يمكن اللي عاجبني أكثر، هي إنها لابسة هذا الإكسسوار بجنازة :). 

آخر شيء، هذي صوره لاثنين من الأولاد اللي بالفيلم، صحيح أنه اللي لابسها أولاد، لكن من فترة بعد و أنا بخاطري هذي الجاكيتات المنتفخة اللي يسمونها بومبير. أحس إني أحتاج واحد بأي شكل :).

California Dreaming

من زمان ما كتبت عن أزياء بالأفلام، مو الغلط غلط الأفلام، هي غلطي بالأساس، لأني مالي خلق أكتب عن ملابس قديمة، و الشيء الثاني أنا أشوف الأفلام اللي أظن أنها حلوة، مو اللي ملابسهم حلوة (إلا سيكس آند ذا سيتي) :)

قبل يمكن شهر أو أكثر شفت بداية فيلم The Kids Are Alright و اليوم خلصته، مو لأنه قبيح و لا ممل، بس شغلته أول مرة و أنا فيني نوم، و اليوم قررت إني أكمله.

الفيلم مو فاشن فورورد، يعني ممكن تشوفون فيه ملابس "تجنن"، بس حبيت بساطة اللبس، و الجو العام للفيلم. الفيلم من الأجواء واضح أنه بكالفورنيا فجا ببالي إني أسوي سيت يشبه له. قبل ما أوريكم السيت، بأحط بعض الصور من الفيلم.

هذي المرأة اللي ما أعرفها لا قبل الفيلم ، لا بعدة، أعجبتني مرة، غير إنها جميلة بشكل غير طبيعي، أعجبني ستايلها الأفريقي، شعرها الأفرو، السلاسل و حتى تلبس تنانير (وزرة) من أقمشة أفريقية، طبعا ما يحتاج أقول إنها هي اللي حفزتني أرجع و أكمل الفيلم علشان أكتب عنه هنا.

من السنة اللي فاتت و الجينز على جينز ماشية بقوة، و مع عروض صيف 2011 خصوصا عند ستيلا و سيلين، الجينز بيكون أساسي بهذا الصيف.

القبعات بكل أشكالها راجعة بقوة خصوصا فلوبي و الفيدورا بس أنا أشتهيت قبعة تشبه قبعة البنت بالفيلم و تذكرت قبعة من إيترو ذكرتني بقبعة سفاري غريبة كانت تلبسها رئيسة تحرير فوق الفرنسية اللي راحت كارين.

Alright by alorwa featuring rock handbags

T by Alexander Wang asymmetric top, $130
Citizens of humanity jeans, 29,400 JPY
Shellys ankle strap sandal, $108
Wrangler rock handbag
ACB wrap around bracelet, $210
Tom binns jewelry, $2,175
Etro safari hat, $440
Retro sunglass, $410

السيت صح عن كارلفونيا، بس هذي فكرة خيالية عنها، لأنه الناس هناك ما يلبسون شيء زي كذا، بس ما أعرف ليه كذا الشيء اللي يجي ببالي. المهم.

كل الأشياء اللي بالسيت أخذتها من أحد من الشخصيات زي ما قلت قبل، العقد و التانك (بس بغيته أبيض) من البنت السودا اللي إسمها تانيا. الجينز من الأم، و القبعة من البنت، و الأسوار، على آخر شيء أنتبهت إن الأمهات يلبسون أساور كثيرة على يدينهم، فقلت بتكون حلوة مع كامل اللوك.

The Great Gatsby Ed

من السنة اللي فاتت تقريبا أعلن باز لورمان اللي أخرج أستوراليا و مولان روج أنه راح يسوي إعادة لفيلم The Great Gatsby الفيلم ما أظنه راح يطلع قريب، بس أكيد لما يطلع راح يكون عنه إيديتوريالز كثيرة لأن اللي بيمثل فيه هم ليوناردو دي كابريو و كيري مولقان.

مو هذي النسخة الأولى من الفيلم، سوو قبله نسخ كثيرة، طبعا هو أساسا مأخذ من رواية مشهورة بالأدب الإنجليزي بنفس الأسم. يمكن أكثر النسخ شهرة و نجاح اللي كانت عام 74 و مثلها روبيرت ريدفورد و ميا فارّو. النسخة أظنها أحسن النسخ لبس بعد (أنا ما شفت إلا هذي النسخة بس من الصور قررت).

للي ما يعرف وش القصة بالضبط، القصة تصير بالعشرينيات، على ناس ساكنين بلونق آيلند (قريب من نيويورك) و هم أثرياء و العلاقات بينهم، و واحد أسمه قاتسبي غني مره، و لا يعرفون عنه شي.

ما يحتاج أقول إني أحب كثير ملابس العشرينيات، و لا أعرف مين ما يحبها؟ لأنها صراحة من أرقى الملابس اللي شفتها أو عرفتها ... و للي يحبون اللبس الرومانسي، أو الإتجاه الرومنسي باللبس اللي على طريقة ألبرتا فيراتي، لازم، لازم يحبون ملابس العشرينيات.

طبعا إن كنتوا تتذكرون أو متابعيني من زمان، تتذكرون لما كنت بأنجن و ألقى فستان فلابير ... طبعا ما لقيت، وطاح من بالي زي كل الأشياء ... بس إلي الآن أحبها .

بعرض إليسا بالومينو، و علشان أكون صادقة معكم أول مرة أنتبه لها . بس أنتبهت أنه فساتينها حلوه، و أغلبها عليها طابع العشرينيات. الأقمشة، القصات و النقشات ... يعني صراحة لو شفت الفستان كان حسيته فينتاج. يمكن الشي الوحيد المختلف بعض الألوان شوي غريبة، أو مو من ألوان ملابس العشرينيات، زي فستان الفلابير اللي بالوسط، و اللي داخل فيه الزيتي على الوردي أو المشمشي. طبعا زي ما قلت لكم كل المجموعة تقريبا ممكن تكون إيديتوريال عن ذا قرايت قاتسبي، أو حتى أنت لو بغيتي تلبسين زي فيلم معين. بس المفضل عندي هو البني اللي على اليسار. مع إني مو مره مع البني، بس حبين هذا الفستان مرة، حسيت أنه مع شال فرو بيكون شي ثاني، كأنك طالعة من فيلم. 

Burberry's trademark

قبل يومين كان فيه القولدين قولب، و زي ما شفتوا أكثر شي أعجبني كان لبس ليتين الي من مجموعة قبل الخريف لبوربري ... الفستان حلو مر، بس الفستان مو أكثر شي عجبني بالمجموعة، أول ما شفتها قبل أكثر من شهر.

طبعا قلت مليون مرة إني ما أتابع أبدا، أبدا GG، بس أكيد أهتم باللبس الجديد لبلايك لايفلي ... فشفت هذي الصورة لها و أثرها صورة لها من سيت المسلسل. بلايك لابسة بالطو من من مجموعة قبل الخريف، عجبني شكلها مرة بس مو هذا البالطو المفضل عندي بالمجموعة لما شفت المجموعة أول مرة.

إن كان فيه شي يسوونه بوربري أكيد أحسن من أي أحد ثاني هي البالطوات، و خصوصا الترينش. قبل فترة جاني بحث مكتوب فيه: موديلات بالطو ماركه، علشان كذا إذا عندك فلوس أول شي ممكن أقترحه بوربري. أكثر شي عجبني من كل المجموعة هو البالطو الي على اليمين، صحيح أنه ما ينلبس بأي مكان خصوصا مع لمعة قماشة و الكريستالات الي فوق، بس حلو مرة. البالطو الثاني بالبداية ما عجبني، ما أعرف ليه بس ما أحب كثير لما يكون فيه بس رقعة خفيفة فرو، يعني أحب الفرو كامل بس رقعة خفيفة ما تعجبني كثير، لكن لما شفته على بلايك عجبني.

Black Swan

يمكن الحين أنتم مالين  من كل الكلام عن بلاك سوان، أو أي شي عن الملابس فيها. للي ما يعرف هذا الشي، ردوارتي هم الي مصممين أزياء الفيلم.

صح أنا قلت لكم إني راح أتكلم عن الفيلم لما أشوفه، بموضوع تنورة الباليه ... أمس شفت الفيلم، و من قبل ما أشوفه شلت من بالي إني أتكلم عن اللبسين الأشهر البلاك سوان و الوايت سوان (كلهم حلوات، حبيت الأسود أكثر) بس ما أظن ما فيه مكان بالأنترنت إلا وحطوها، تلقونها هنا (1) و (2) ... فجا ببالي إني أنتبه لملابس ثانية.

من زمان طايحة من عيني التنورة البالية النفاشة، بسبب تجربة سيئة، لما أكون الحالي أعترف إني أتفرج على أشياء أستحي أسويها قدام الناس، فكنت مره أشوف باريس هيلتون بي إف إف، علي Mtv و عطت مهمة لوحدة إنها تلبس كل الي يتنافسون على أنهم يصيرون باريس هيلتون بي إف إف ... المهم هذيك البنت، حتى ما أتذكر إسمها، لبستهم كلهم تنورة بالية قصيرة (هذي التول النافش) و حطت لهم شريطه على رووسهم، حتى كان بينهم متسابق ولد سوت له نفس الشي، طبعا كانت معتقده إنها أكثر وحده فنانة، ما أعرف ليه جاني إحساس أنه ليمتيد تو اللي الحين جستس، فأنتم تخيلوا بنت فوق العشرين مسوية هذا الشي ؟!!!!

المهم نرجع للصورة، هذا اللوك لنتالي أعجبني مره، حبيت كركبة الشربات الي تحت ... حبيت شكل التنورة مع الشي اللي فوق لابسته، أعرف أنه ممكن مو شي ينلبس، بس يمكن يكون لطيف بالبيت :)

أكثر لبس حبيته، حبيته قوه، هو الفستان الي فوق، أول ما شفته حسيته من رودارتي، و صار صحيح من رودارتي، و تشوفون السكيتش شكله من ورا أعجبني قوه، ما أعرف كيف بعض الناس يعرفون يحطون هذي التفاصيل الي تسوي فرق كبير بالفستان ... ما لقيت صور مضبوطة، و أخذتها من الفيلم، بس أنتوا شوفوا الفيلم و بتناظرون قد إيش حلو.

قبل الأخير نتالي راح تكون على غلاف فوق لعدد يناير 2011 و نفس الشي بثيم البلارينا، حبيت الغلاف، الفستان من جاي منديل ... الصور الي جوا ما حبيتها كثير كنت أتمنى لو فيه صور أكثر هنا الإديتوريال.

الشي الأخير، قبل ما تنتهي هذي السنة، انصدمت من خبر حمل نتالي، حسيتها آخر وحده طبعا بعد كيرستين دونست، ممكن تكون أم :).

Like a princess

ما عندي شي هذي اليومين، و جالسة أدور على شي أكتبه و ما لقيت المهم، أنه قبل يومين شفت فيلم Princess Diaries أدري فيلم سخيف و بايخ، بس و الله مو ذنبي ذنب mbc Max  ...

الفيلم للحق ما فيه شي يسوى .. بس لما شفت الأخير، لما بدت آنا هاثوي ترقص مع ذاك الحلو (شوفوا الوصف بس). بعد زواج نيكول رتشي، الي قلت لكم عنه (ترا الصور طلعت شوفوها هنا). جاي على الربيع زواج كايت ميديلتون من وليم (حاسة فستان زواجها بيكون بايخ) ... قلت لكم شفت آن بالفستان، و جا ببالي هذا الفستان من مجموعة خريف 2011 لجايسون وو.

ملابس الخريف لسا بالمحلات، بس على ما أظن أنه جايسون ما ينباع برا أمريكا، يعني للي خاطرها فيه، و لسا ما جوا الناس الي تعرفهم من أمريكا، يمكن توصي عليه قبل ما تنشال ملابس الشتاء من المحلات و ترا فيه تخفيضات، و المواقع الي تبيعه، ما عرضت هذا الفستان. بشكل عام أنا ما أحب الفساتين هذي  fairy-tale ، بس لو كانت فستان عروس يمكن الوضع مختلف، ما أظن أنه كايت راح تلبس لجايسون وو، لأنه أمريكي، و الأغلب إنها بتلبس لمصمم بريطاني.

قلت لكم عندي فراغ، و لما شفت الفستان حق آنا زي ما قلت لكم، قلت يالله نكتب عنه، للي يحب هذي النوعية من الفساتين، خصوصا إني لو ما كنت مره مع الفساتين النفاشة، أحب كثير النقش الذهبي.

ما لقيت صور أحسن لفستان آن، بس أنتم لو تحبون الأفلام البايخة (شرايكم بالأسلوب؟!!)، شوفها.

Stud Necklace on GG

قبل يومين كتبت عن العقد الكبير، و قلت لكم أنه حلو مع كثير أشياء ... و حتى مع الملابس البسيط (يعني ملابس طلعات كل يوم)، و من فترة قصيرة، و أنا أشوف صور GG الي اليوم طالعة، قلت لأختي أنه بليك عاطينها وجه لبسها صاير أحلى ... ثم قالت لي أختي إنها ممكن تترك المسلسل، فطلعت أختي الثانية :) بنظرية أنه ممكن خلو لها شوي سلطة على أختياراتها للملابس ...

اللبس هذا عجبني ... التوب الأصفر شكله فينتاج كروبد و بأزارير ذهبية قديمة طالع حلو مع الهاي ويستيد شورت الي قماشة كأنه قماش رجالي، ما حبيت كثير الشنطة، بس بالعموم اللوك طبيعي و مقبول أنه الواحد يطلع فيه ... بس أهم شي أنه بلايك أو سرينا لابسه عقد كبير و طالع مره حلو مره مع اللبس.

أنتم شرايكم، باللبس و بالعقود الكبيرة؟

Whip It

من زمان ما كتبت عن فيلم ... اشتهيت اكتب عن هذا الفيلم الي مسويته درو باريمور ... المهم أنه ممكن تقولون لي خير وشو هذا بس صدقوني لو شفتوا الفيلم بتعرفون قيد إيش كانت إيلين بايج كيوت ... و لبسها كله طالعه فيه مره حلوه، بسيط حلو . فوضوي، مو متكلف شوي روك بس مليان تنانير يعني بناتي ...

هذي اللقطة هي الي خلتني ما أحذف الفيلم على طول ... مو واضح فيها شي بس لابسه شيرت عليه علم بريطانيا، ممكن من فترة لاحظتوا أنه فيه أشياء كثيرة صاير عليها العلم ... ما أعرف بس أحسه يعطي لمسة cool شوي على أي لبس :)


هذا هو اللبس صح بعيد شوي .. بس حاولوا تكبرون الصورة، لابسه مع التي تنورة فلورال غامقة و تايت، يعني اقتراح لو عندك شرت أبيض عليه علم بريطانيا أحس تنوره فلورال فاتحة بتكون حلوة مرة معاه.

هنا لابسة تي عليه باند ما أعرف اسمها، مع تنورة مشجرة بألوان دافية ... شفت عند H&M تي بس ولادي ما أعرف إذا فيه للبنات عليه KISS، كيس أو رولنق ستونز أو بيتلز بيكون حلو مع تنورة عليها نقشات هندية (كثير تلقون منها بآخر فرصة) أهم شي أقروا ش على التي كثير مرات يكون كلام مهين.

نفس التي مع تنورة ثانية بس الشي الغير هنا، إنها دخلته جوا التنورة، أحلى شي لما تدخل تي جوا التنورة هو لما يكون التي مو نص كم يا ربع أو من دون أكمام (بس مو سيء لما يكون نص) و يكون كمان للتنورة كمر.

يااااه كيوت، تي أسود ما عليه شي مع بنطلون رمادي سكني مقنصع، و أهم شي هذي الأبوات الي ما فسختها (ما أحب الأبوات بشكل عام) بس عليها صايره كيوت، خصوصا إنها ما ربطتهم للأخير طالع مره حلو.

هذي ثلاث صور بس بغيت أحطها أوريكم كيف الستايل حقها بشكل عام ... حلو بسيط، وزي ما قلت لكم شوي روك ... عشان تناظرون اللبس بشكل أحسن أنصحكم بتنزيل الفيلم، الفيلم مو سيء يعني ما أعتقد بتندمون.