Who Wear What SS 2014

مثل ما وعدت لوليتا قبل، و لمحت أكثر من مرة إني ممكن أكتب عن الملابس اللي خمنت إنها راح تلبس على الريد كاربيت من العروض، و انلبست، هذي الملابس اللي باتكلم عنها اليوم هي من عروض صيف 2014 يعني اللي خلص بس من شهر، طبعا ما يعني أنه خلص إنه ما فيه أحد بيلبس منهم أبدا، لأنه ممكن المصمم يعطي ملابس من الأرشيف، و ممكن يكون فيه أحد شاري اللبس و محتفظ فيه، بس لأنه بالعادة الملابس الجاهزة قليل مرة ما تلبس بعد ما يخلص موسمها (بالذات على الريدكاربيت، راح أتكلم عنها هنا. 

أول شيء راح أتكلم عن أحسن 3 ملابس انلبست (الترتيب ماله دخل بمين أحسن). من اليمين كريستين رايتر من برايكينج باد و لها مسلسل ما طول اسمه: Don't Trust the B in Apartment 23، كريستين لابسة من تمبرلي لندن (هنا تكلمت عنه)، كريستين لبست الفستان من دون القطعة اللي فوق، و أعتقد إنه خيار مرة موفق، الطبعات أعجبتني، التسريحة أعجبتني و المكياج (بالذات لون الروج) أعتقد أنه مرة مناسب. زوي سالدانا لبست من برابل قرونق لقولدين قلوب اللي فات، بالبداية ما حبيته مرة بس كل مرة أناظر صورتها يعجبني شكلها أكثر (هنا تكلمت عن اللبس)، أعتقد أنه لبس أنيق، و من الطلات اللي فترة طويلة بتظل حلوة، و لا تطلع قديمة أبدا. آخر لبس من اللي أعجبوني هي روني مارا ببلانسياقا (هنا تكلمت عنه)، لو رجعتوا و قريتوا، بتشوفون إني كنت متوقعة أنه بيكون على الريد كاربيت (لأنه فستان يستاهل)، و تمنيت أشوفه على ثلاثة، كانت منهم روني مارا، و أعتقد إن روني ما خيبتني أبدا. 

هنا صورة بشكل عام للملابس اللي توقعت إنها تلبس و لبست (اللي أعرف إنها لبست)، بشكل عام فيه ملابس طلعت مرة حلوة على الريد كاربيت (تكلمت عنها فوق) و فيه ملابس كنت أتوقع منها أكثر، زي بروينزا سكولير اللي لبسته إليزابيث أولسين، و الفستان الأبيض من جايسون وو اللي لبسته دايان كروقر (توقعت دايان تلبسه هنا). و فيه ملابس ما أعجبتني أبدا، زي الجمب سوت اللي من سان لوران لبسته هايلي ستاينفيلد، كان ودي أحد زي ريانا يلبسه، أحد بكاريزما و حضور أقوى، و اللبس الثاني اللي مو مرة عجبني هو فستان روشا الفضي على ساره جيسيكا باركر (تكلمت عنه هنا)، ما كان ودي بالجاكيت، يمكن لو أحد زي كيرا نايتلي لبسه يمكن بيكون أحلى. 

من المفضل عندكم؟ و مين خيبكم؟ 

Best Dressed: November 2013

زي ما قلت لكم اليوم راح يكون عن أحسن لبس لشهر نوفمبر. إلى الآن أفكر بطريقة لترشيحات أحسن لبس، أعتقد إني بأخليها بالأسبوع الثالث من يناير، و طبعا بيكون فيها الفساتين الإثناعشر اللي فازت بترشيحات الشهور اللي أخترتوها. 

ما علينا من أحسن فساتين السنة، خلونا نشوف فساتين نوفمبر. 

أولا خلوني أقولكم إني مبسوطة، فستانيين من اللي قلت إنها راح تكون بالريدكاربيت انلبست، فيه فساتين ثانية انلبست بس النتيجة ما عجبتني، المهم هنا اليوم معانا روني مارا ببلانسياقا و شو كي بفالنتينو كتور. كل الثنتين أعجبوني مرة. بعد أعجبتني كايت بيكنسيل بالقوتشي، من زمان ما أعجبتني هذي الطريقة باللبس "هوليوود قلامور" بس مع لون الفستان أحس شكلها طالع مرة حلو. من زمان عن ليتون ميستر، بس عجبني شكلها هنا، أحسه مرة مرتاح، لكن لو سألتوني وشو اللوك المفضل عندي (اللي ممكن ألبسه على طول) من دون كلام أليكسا شونق (مو مفاجأة إني صايرة أحبها أو أحب ستايلها مرة). 

أنتم وش اللبس الأحسن عندكم؟ الأسماء محطوطة عكس عقارب الساعة. 

Create your free online surveys with SurveyMonkey , the world's leading questionnaire tool.

That Was Cool

آعتقد هذي آخر تدوينة عن ميت قالا. هنا بعض الأشياء اللي أعجبتني، مو كل اللوك أعجبني لكن أشياء فيه، باحطها هنا، و باقولكم وش الشي اللي ما عجبني بباقي اللوك .

• من اليمين فوق إيمي روسم، بدونا كارين أتلييه، الفستان ما أعجبني لا على ثيم المعرض، و لا أعتقد بيعجبني بأي مناسبة ثانية. لكن مكياجها (للمناسبة) و تسريحتها أعجبوني مرة، خصوصا التسريحة، أعتقد أنه أحسن ماهوك كان بالحفل أمس. (كثير أمس سووا تسريحات كأنها ماهوك). أعجبتني الجدايل مرة.
• لي لي سوبايسكي على غير العادة ما أعجبني شكلها (بعيد عن ثيم الحفلة) حسيت الفستان مطلع جسمها شكله غريب، لكن حبيت مرة الأكمام/القفازات. هي مو الوحيدة اللي جاية بأكمام قفزات (شيكوا على كيم كرداشيان إذا مهتمين). لكن اللي يخلي نسخة لي لي حلوة بالنسبة لي (عكس اللي مسويته كيم) هي إنها قماشها خفيف مرة، تطريز الورود عليه.
• من أكثر الأشياء اللي أعجبتني أمس حلق جيسيكا ألبا الثعبان. الحلق من جاك فارتنيان، يمكن أكثر شيء ما عجبني بالحلق، إنها لبسته على الإذنين. بالنسبة لي حلق زي هذا ما يلبس إلا على إذن وحدة، و الإذن الثانية يكون عليها حلق صغير.
• لبس روني مارا كان جيفانشي أوت كتور، لبسها مرة حلو، بس بالنسبة لي مو مختلف عن لبسها دايم. لكن اللي أعجبني لون روجها اللي شبه أسود. أول ما شفت روني (يمكنها أول اللي شفت من الريدكاربيت أمس)، كنت أحسب الكل بيحط روج أسود أو غامق زيها، لكن أظنها كانت الوحيدة (لو مهتمين بروج أسود، ريميل كايت موس عنده روج أسود).
• آخر شيء أيميلي بلنت بالظل هذا الوردي النيون، عجبني مرة، أعرف إني ما راح أسويه، أتذكر الدرس الأول اللي عرفته بالمكياج لاتحطين ألوان فاقعة (حمراء، صفراء، وردي) ما أعرف عن هذي النظرية، بس ما أعتقد إني راح أجربه، لكن أعتقد أنه لوك حلو لحفلة مو رسمية.

Best Dressed: February '13

صراحة الشهر هذا كان صعب مرة، بعد لو كان 31 يوم كان يمكن بطلت و قلت لكم خلاص ما أبغى أختار، طبعا مع البافتا الأوسكار، و أسابيع الموضة أكيد بيكون الاختيار مرة صعب، بس بالنهاية صفت القائمة على 8 بالضبط زي شهر يناير (أنا حاطة ببالي إنها كل شهر الخيارات بين 6 و 8 خيارات للشهر على حسب عدد الملابس الحلوة اللي تطلع عندي نهاية كل شهر. 

إذا كان شهر يناير شهرلوي فيتون، و كيري واشنطن، فشهر فبراير شهر ديور و أليسيا فايكندير. بصراحة ما قد توقعت أنه بحياتي بيعجبني هذا العدد من فساتين ديور، بالنسبة لي ديور ما كان ذوقي إطلاقا، الفساتين النفاشة اللي كأنها من هوليوود الخمسينات مو هو الشيء اللي أميل له، لكن واضح إن راف سيمنز عارف وش كانت تحتاج الماركة. 

من الأشياء اللي كنت متأكدة إنها لازم تكون بالمجموعة الأول هو روني مارا بفستان  ألكساندر ماكوين الأبيض، و ليا سيدو بهذا الفستان الأحمر من أليكسي ميبل غير أنه شكلها حلو، أحب لما أحد يلبس لماركة مو معروفة مرة و يطلع شكله حلو (انبسط إن الخيارات كثرت). 

ريزموند بايك من أول مرة شفتها ببرايد آند برجيديس عجبتني، بس هذا كل شيء، مع آنه لبسها بالمجمل مرتب، ما قد حبيت شيء عليها زي هذا الفستان من ديور صيف 2013 اللي تنورته تعطي على لمعة ملونة (ما أعرف وش تسمى). شكلها فيه كله حياة. 

قلت لكم هذا شهر أليسيا فايكندير من 4 مناسبات لها بهذا الشهر 3 أعجبوني، لكن قررت إني بس أختار 2 بالكثير، لأني زي ما قلت لأختي ما أبغاه يتحول لوش أحسن لبس لبسته أليسيا (قلت لكم شكلها بتصير فتاتي المفضلة :).

آخر شيء باتكلم عنه هو اختياري لجنيفير لورانس، جنيفير شكلها حلو و أعجبني، قلت لكم أنا بشكل عام ما أفضل هذا النوع من الفساتين، بس قررت إني أضيفة لأنكم حابينه مرة، و بالنهاية هو أنتم اللي تصوتون مو أنا :).

من أحسن لبس لشهر فبراير 2013؟

Best Dressed: Oscar's 2012

الشيء الوحيد اللي توقعته من الأوسكار، أنه البس فيه ما كان ذيك الدرجة، يعني مو سيء جدا، لكن مو شيء يخليك تقول واااو، ما فيه أحد لبس سماوي، بينالوبي كروز لبست أزرق على رمادي من جورجيو أرماني. نتالي بورتمان لبست أحمر فينتاج من ديور، و ميشيل وليمز لبست أحمر من لوي فيتون، و إيما ستون لبست فوشيا أوت كتو من جامباتيستا فالي (إذا هذا ممكن نعتبره أحمر بعد :)، و أكيد طبعا كان فيه أسود تكفلت "كالعادة" أنجلينا جولي فيه بفستان من ألتييه فيرساتشي (بالمناسبة ما أفهم ليه لازم تطلع الرجل بالشكل البايخ هذا)؟!!. 

أعجبني شكل كايت مارا أخت روني مارا، لكن لما عرفت أنه الفستان مو إيلي صعب بطلت أختاره، لأنه كأنه مسروق من إيلي، ما أقدر أشكر مصمم ما قدر يفكر بنفسه، و لا يسرق شغل أحد ثاني :). 

Rooney Mara in Givenchy HC:

بصراحة أنا ما شفت الحفل لأني لما صحيت الساعة وحدة أكتشفت أنه ما فيه إشارة على تردد القناة، حاولت أدور حل بس ما قدرت و قررت أنام :). 

أعرف أنه الشكل هذا مو غريب على روني، يمكن أكثر لونين لبستهم على الريدكاربيت هذي السنة هي الأبيض و الأسود، و لا غريب بعد إنها تطلع بفستان من جيفانشي لأنه نصف الملابس اللي لبستها كانت جيفانشي، لكن هذا ما يمنع إنها كانت أحسن وحدة اليوم الفجر بفستان أوت كتو ربيع 2009 من الماركة ... حاولت أدور تفاصيل أوضح للفستان لأن قماشة مرة حلو، لكن ما قدرت (هنا بتشوفونه علي الرنواي من دون بطانة)، عندي قناعة لو شفته فيديو بيكون أحلى بكثير، علشان كذا أخترته. 

لو كنتوا تابعتوا الأوسكار مين أعجبكم؟ و وشرايكم بروني مارا؟

Sisters in Competition

أعرف أنه الحين أسبوع الموضة بنيويورك، و الأوسكار ما بقى عليه شيء، و فيه ملابس كثير حلوة بالعروض (صحيح إلى الآن ما عندي نت صاحي)، لكن لما شفت هذا الشيء، مع أنه مو مهم، لكن اشتهيت أكتب عنه. 

قبل شهر طلعت روني مارا بهذا الفستان الأسود من ميو ميو، صحيح أنه الحين كل الأنظار على روني خصوصا بعد ذا قيرل ويذ ذا دراقون تاتو، و بعد ما ترشحت للأوسكار، لكن أختها اللي كانت أقدم منها بهذا المجال كايت، إلي الآن ما اعتزلت، و يبدو إنها بتدخل منافسة مع أختها، بعد ما قررت إنها تلبس نفس الفستان الأسود اللي لبسته روني قبل. يمكن روني هي اللي أعطتها إياها، و يمكن ميو ميو أعطت كل الثنتين، و يمكن وحده شرته، وحده ميو ميو أخذته، لكن اللي واضح إنه كايت لما لبست الفستان كانت بالجو اللي أنا متأكدة ما فيه بنت عندها أخت أو خوات إلا مرة حاولت وحده تلبس فستان الثانية، و ماتت علشان يطلع عليها أحلي :). 

بالنسبة لي كايت قدرت تفوز بهذي المنافسة، مع الحزام و لون الجزم. 

أنتم على مين تشوفون الفستان أحلى؟

Rooney for the Golden Globe?

قبل لليلتين كنت روني مارا بوحده من المناسبات، ما أعرف بريمير جديد لفيلمها الأخير "ذا قيرل ويذ ذا دراقون تاتو" أو شيء ثاني، بصراحة ما يهمني، لكن اللي لازم أقوله، أظن روني مارا هي السلبرتي الوحيدة بهذي الفترة اللي أنتظر كل مرة وش تلبس، ما أقول إنها ما قد عاجبتني بالشهر الأخير، لكن و لا مرة بالنسبة لي كان شكلها مو حلو، و الأهم إنها أكثر المرات شكلها فوق العادة. 

بالمناسبة هذي اللي لسا ما أعرف وش هي، روني كانت لابسة من مجموعة فالنتينو الأخيرة ربيع 2012 ... بصراحة أنا مبهورة بشغل اللي يختار لها ملابسها، ما أعرف هو اختيار الملابس المثير، أو يمكن شعرها (لونه، و الغرة) هي اللي تعطي الملابس هذا الشكل المثير ... 

روني على إنها لبست لون غير الألوان المعتادة اللي كانت تلبسها الفترة اللي فاتت (أسود و رمادي و أبيض و درجاتها)، و لون قوي زي الأحمر، لكن لون الفستان ما سيطر على اللوك قلت لكم الشعر، و يمكن الحواجب الثقيلة خلت صعب تلبس شيء، و ما يصير كل الإهتمام على وجهها، مو على أي شيء ثاني، حتى لو كان فستان أحمر من فالنتينو. 

الخبر السعيد بالنسبة لي إنه حتى لو حلصت روني ترويج لفيلمها، هي جالسة الحين تصور فيلم جديد مع رايان قوزلينق، و الأهم بالنسبة لي شعرها إلى الآن أسود (أتمنى ما تغيره). لكن قبل ما ينزل أي فيلم جديد لها، روني مرشحة لقولدين قلوب، و أتمنى ترشح لأوسكار، مع إني لسا ما شفت تمثيلها، بس علشان أشوف وش راح تلبس. و لأنه ما بقى إلا 4 أيام على قولدين قلوب، و بعد ما شفت روني بهذا الفستان، انشغلت وش ممكن تلبس للحفل؟ 

من اليسار فستان من مجموعة فالنتينو أوت كتو خريف 2011، المجموعة بشكل عام أول ما شفتها أعجبتني، و لما جلست أدور فساتين لروني، على طول رحت أشوف المجموعة من جديد، مو بس لأن روني لبست لفالنتينو، لكن لأن هذي المجموعة أتوقع إنها راح تكون من أنجح مجموعات الأوت كتو لموسم الجوائز هذا، و أهم شيء لو لبسته قبل روني، لو تلبسه أتمني تختار روج غامق، علشان تحول هذا اللوك الناعم لقوثيك. 

الفستان المخمل الأسود من عزالدين عاليا، الفستان بعد من مجموعة أوت كتو خريف 2012، من أكثر الأشياء اللي أعجبتني بالمجموعة، أتمنى أشوفه على أحد، ما كان ببالي أحد أول ما شفته، لكن الحين أظن أنه مناسب لروني.

الفستان الأبيض من مجموعة رالف لورين ربيع 2012 الأخيرة، المجموعة أعجبتني مرة، المجموعة بشكل عام مو ستايل روني، لكن هذا الفستان بالأشياء اللي على الكتف أتوقع بيطلع حلو عليها. 

الفستان الأخير من مجموعة حيدر أكيرمان، أول ما شفت العرض أعجبني مرة حسيته يستاهل ريد كاربيت، لكن ما كنت أعرف روني أو على الأقل ما كنت أعرف ستايلها، لكن الحين أظنها هي الوحيدة اللي ممكن تلبس شيء زي كذا، و لا يطلع مبتذل عليها.

شرايكم بالإختيارات؟ و وش رأيكم بستايل روني مارا لو كنتوا متابعين؟

Effected

ما كنت أؤمن أنه ممكن ممثلة يتأثر شكلها بدور هي مثلته، مع إني ما زلت أردد إن آن هاثواي ما تعدل لبسها إلا بعد "ذا ديفيلز وير برادا". لكن بعد ما شفت كيف روني مارا تغيرت بعد تمثيلها فيم "ذا قيرل ويذ ذا دراقون تاتو" عرفت كيف الدور ممكن يأثر على حياة ممثله. 

من اليسار روني قبل ما تصور الفيلم، و من اليمين صورة لروني قبل شهر بوحدة من المناسبات، (شوفوا هنا شكل روني بالفيلم). بالنسبة لي أنا حابة التغيير اللي سوته، عاجبني القوثيك عليها، الشعر الأسود، مع الحواجب و الغره القصيرة، مناسبة مرة عظام وجهها، و بالنسبة لي أتمنى تبقى على هذا الشكل. 

لما شفت الصباح هذي الصورة لروني و هي تروج للفيلم حقها (نفسه)، بالسويد، و لابسة هذا الفستان الأسود من برابل قرونق، تأكدت أنه روني المفروض ما ترجع لشكلها الأول، مو لأنها مو حلوة فيه، لكن لأنه بهذا الشكل مستحيل أحد يشوفها و ينساها، لكن يوم بشكلها الأول شفتها أكثر من مرة، و كل مره أنسى كيف شكلها، لما أقرى عنها شيء.

شرايكم باللوك القوثيك؟ و بأي شكل عجبتكم روني أكثر؟