Best Dressed: July '13

ما أعرف ليه أحس شهر يوليو مر ببطء، على الأقل بالنسبة لي، يعني فيه ملابس انتبهت لها بداية الشهر، يوم رجعت أناظرها من جديد حسيت إنها أقدم من شهر يوليو. بداية الشهر كان فيه عروض الأوت كتور، غير كذا ما أتذكر فيه أحداث مهمة، غير بريمرات متفرقة. بشكل عام أقدر أقول الملابس الحلوة كانت قليلة، بس بالنسبة لي كانت تستاهل. 

بالنسبة لي أعتقد إن هذي القائمة أكثر القوائم اللي سويتها تنوع. الشيء اللي مستغربته (على نفسي) على إني أحب تيلدا، أظن إن هذي أول مرة تكون بقائمة أحسن لبس للشهر. 

أعتقد أول لبس تأكدت إني ما راح أشيله من القائمة المقترحة لأحسن لبس، هو كايت بلانشيت بالفستان الوردي من بلانسياقا. مع إنه لذوقي الخاص بأفضل ألبسه من دون القطعة اللي فوق زي هنا، لكنا قدرت تطلع فيه بشكل حلو. لي لي  سوبايسكي ترجع بديور مرة ثانية لقائمة أحسن لبس، هذي المرة بجمب سوت. أعجبني فستان كريستوفر كاين على كايت بوسورث (فوق يسار) صراحة لما شفت مجموعة كاين للخريف، كانت شاكة أنه فيه أحد ممكن يلبس بذات الفساتين بشكل حلو، لكن كايت بالنسبة لي قدرت، خصوصا مع مكياجها و تسريحتها. 

حبيت مرة شكل هيلين ميرين (يسار تحت) حسيته مناسب لعمرها، بنفس الوقت مو لبس جدات. آخر شيء بأعلق عليه هو نتاليا بشانيل، أظن أنه هذا اللبس أكثر لبس تقليدي، لكن بالنسبة لي، شكل الجاكيت و شكل التنورة (من تحت) شوي أعطت للبس شكل مختلف، خصوصا مع وجه نتاليا اللي مرة "فريش". 

Create your free online surveys with SurveyMonkey , the world's leading questionnaire tool.

That Was Cool

آعتقد هذي آخر تدوينة عن ميت قالا. هنا بعض الأشياء اللي أعجبتني، مو كل اللوك أعجبني لكن أشياء فيه، باحطها هنا، و باقولكم وش الشي اللي ما عجبني بباقي اللوك .

• من اليمين فوق إيمي روسم، بدونا كارين أتلييه، الفستان ما أعجبني لا على ثيم المعرض، و لا أعتقد بيعجبني بأي مناسبة ثانية. لكن مكياجها (للمناسبة) و تسريحتها أعجبوني مرة، خصوصا التسريحة، أعتقد أنه أحسن ماهوك كان بالحفل أمس. (كثير أمس سووا تسريحات كأنها ماهوك). أعجبتني الجدايل مرة.
• لي لي سوبايسكي على غير العادة ما أعجبني شكلها (بعيد عن ثيم الحفلة) حسيت الفستان مطلع جسمها شكله غريب، لكن حبيت مرة الأكمام/القفازات. هي مو الوحيدة اللي جاية بأكمام قفزات (شيكوا على كيم كرداشيان إذا مهتمين). لكن اللي يخلي نسخة لي لي حلوة بالنسبة لي (عكس اللي مسويته كيم) هي إنها قماشها خفيف مرة، تطريز الورود عليه.
• من أكثر الأشياء اللي أعجبتني أمس حلق جيسيكا ألبا الثعبان. الحلق من جاك فارتنيان، يمكن أكثر شيء ما عجبني بالحلق، إنها لبسته على الإذنين. بالنسبة لي حلق زي هذا ما يلبس إلا على إذن وحدة، و الإذن الثانية يكون عليها حلق صغير.
• لبس روني مارا كان جيفانشي أوت كتور، لبسها مرة حلو، بس بالنسبة لي مو مختلف عن لبسها دايم. لكن اللي أعجبني لون روجها اللي شبه أسود. أول ما شفت روني (يمكنها أول اللي شفت من الريدكاربيت أمس)، كنت أحسب الكل بيحط روج أسود أو غامق زيها، لكن أظنها كانت الوحيدة (لو مهتمين بروج أسود، ريميل كايت موس عنده روج أسود).
• آخر شيء أيميلي بلنت بالظل هذا الوردي النيون، عجبني مرة، أعرف إني ما راح أسويه، أتذكر الدرس الأول اللي عرفته بالمكياج لاتحطين ألوان فاقعة (حمراء، صفراء، وردي) ما أعرف عن هذي النظرية، بس ما أعتقد إني راح أجربه، لكن أعتقد أنه لوك حلو لحفلة مو رسمية.

Best Dressed: April '12

زي ما وعدتكم اليوم بأكتب عن أحسن ملابس شهر أبريل. بصراحة أعجتني ملابس كثيرة بهذا الشهر، ما أقول أنه فيه أشياء مبهرة، لكن كان فيه أشكال و أفكار حلوه كثير. و أهم شيء فيه أسماء جديدة ما قد كتبت عنها، فرصة لي أنه أتكلم لو شوي عن ستايلها. 

ريانا بستيلا مكارتني

مع إني ما أحب ريانا (ما أكرهها بعد). لكن لازم أعترف إن لها شخصية تعطي الملابس شكل مختلف. من فترة ما حسيت إن ريانا شكلها شيك و من دون ما أحس فيه شيء مخرب، و شيء رخيص (زي لون شعر بايخ، أو فتحة مبتذلة).

كايت بوسورث بإيزابيل ماران

أظن اللوك هذا من كايت هو المثال المناسب لفكرة السويتر بالصيف، اللي قلت لكم عنها. أعجبني لون و شكل التنورة، أعجبتني المجوهرات اللي لابستها. و بعد أعجبتني السنيكرز، أعتقد إنها مسوية تضاد حلو مع باقي اللبس.

فان بينق بينق بتاداشي شوجي

بالعادة ما أحب شكل فان بينق بينق. هي حلوة، لكنها كثير مرات تبالغ بالإكسسوار و أنا شخصيا ما أحب لما أحس إن الواحد قاعد يتغصب الأناقة.

مليسا جورج بكالفن كلاين

من فترة ما أتذكر إن فستان لكالفن كلاين أعجبني.مع كل فكرة المنيمليزم اللي هي خط الدار، بالنسبة لي صعب ينلبس شيء من الماركة من دون ما يطلع كأنه بيجاما أو قميص نوم. لكن مليسا عرفت كيف تلبسه، مع هذا الشعر و المكياج.

تايلور شيلينق بـ بيتر بلوتو

تايلور جالسة تروج لفيلمها مع زاك أفيرون ذا لوكي ون. شكلها كان أنيق بكل البريمرات، لكن كله أسود و رمادي. مع هذا الفستان حسيت فيه شيء منعش بشكلها، شيء يحسس بالصيف.

لي لي سوبيسكي بجيل ساندر

تكلمت قبل عن مكياج لي لي بافتتاح تربيكا الأفلام بنيويورك. وقتها قلت لكم أن شكلها مرة حلو. بصراحة أعتقد لي لي مخلوقة لماركات زي جيل ساندر.

دري هماينقوي بدولتشي آند قابانا

قد قلت لكم فيه شيء "كول" عند دري. دري كانت حاضرة لحفلة ملبري لكوتشيلا، لبست هذا اللوك من دولتشي آند قابانا ربيع 2012، تعرفون إني حابة طبعات الخضار اللي كانت تقريبا بكل المجموعة، فأكيد باحب هذا الشكل من دري.

داكوتا فانينق بـ برادا

صراحة قبل لا أختار اللوك كنت مرة مترددة، خصوصا إن داكوتا ما غيرت شكل شعرها. لكن الفستان عجبني مرة، فقررت إني أسوي نفسي كأني ما عمري شفت داكوتا، و لا أدري إنها ما تغير تسريحتها. و اللي خلاني أتخذ هذا القرار، إن شعرها مو سيء مع اللبس.

Contrast

أمس كان فيه تربيكا فيلم بنيويورك و حضر فيه مجموعة من المشاهير منهم داكوتا فانينق (اللي إلى الآن ما غيرت شكل شعرها). و من الحاضرين كانت لي لي سوبيسكي بفستان من مجموعة جيل ساندر ربيع 2012، يمكن تعرفون إني أحب جيل ساندر، لكن ما قد تكلمت عن لي لي بهذي المدونة، أولا لأنه ما حصل مناسبة، الشيء الثاني لأن ظهورها جدا قليل، لكن لي لي تعجبني مرة (أعتبرها من أجمل النساء الموجودات بهوليوود). 

شخصيا ما أحس إن لي لي تحتاج شغل كثير لأنها حلوة، و عندها بشرة مخيفة :) لكن هذا ما يمنعها إنها دائما تطلع بأحسن شكل. غير اللبس (اللي أعتقد أنه يستاهل يدخل من أحسن فساتين شهر أبريل)، مكياجها عجبني مرة، عجبني الظل البرتقالي حوالي عيونها، ما أعرف ليه أحسه كأنه إشعاع يقول شوفوني ... لما شفت مكياجها (مو أول مرة تسوي الظل كذا، بس أول مرة أشوفه برتقالي بالشكل هذا). تذكرت كلام لمايك آب أرتيست (ما أعرف إذا تعرفونها قبل أو لا) ليسا إليدريج، (بالمناسبة أحس نفسي مالي شخصية لما أقرأ لها أي نصيحة بالمكياج على طول أطيعها :S) ما يهم أتذكر إني مرة قالت (مع إنها ما كنت مقتنعة مرة) أنه لو بغيتي تخلين لون عيونك يبرز أختاري ظل عكس لون عيونك و أتذكر إنها قالت لو عيونك بني غامق روحي للفضي، لو عيونك خضراء أختاري الأحمر و درجاته، لو عيونك زرقاء أختاري البرتقالي أو البني. و طبعا لأن ليسا ما كانت حابة الفكرة، ما حاولت أسوي شيء زي كذا (مو قلت لكم مالي شخصية :). بس لما شفت هذي الصورة للي لي أعتقد إني بأدور على لون الظل اللي عكس لون عيوني و أجرب أسوي زي مكياج لي لي (يمكن أطلع زيها:). 

ملاحظة صغيرة أخترت هذا الظل من مايك آب فوريفير أسمه "أكوا كريم" مع أنه مو رخيص لكن لأني جربته و كان مرة حلو، ألوانه حلوه، يثبت على العين (ضد الماء)، سهل نشره و توزيعه على الجفن، و ينشف يعني بس تسوينه مضبوط على عينك ما عاد ينحاس معاك. و أهم شيء ممكن تستخدمينه كبلشر (أحب الأشياء اللي أقدر أستخدمها أكثر من إستخدام) هنا شوفوا بعض الألوان. 

شرايكم بمكياج لي لي؟ قد جربتوا تستخدمون هذي النظرية حقت "أختاري لون ظل عكس لون عيونك"؟