السبت، 7 سبتمبر 2013

Cool Summer?!!

أقدر أقول أنه بعد اليوم الثالث لأسبوع الموضة بنيويورك صار تقريبا عندي فكرة عن الموضوع P: طبعا قصدي يعني تريند اللي بنشوفها لربيع و صيف 2014. 
أمس تقريبا كان فيه عروض "كبيرة" أو عروض لمصممين نشوفهم كثير على الريدكاربيت، و بالنسبة لي كان أكثر شيء مثير (قصدي عرض) هو عرض جايسون وو. 



بعرض كريتشيرز أوف ذا ويند (العرض اللي تكلمت عنه قبل أمس) تلقون الموضوع بعد هذا. المهم بالعرض كانت الملابس فيها من ملابس الأربعينيات، و سألت لو تتوقعون فيه أحد غيرهم بيسويها؟ إلى الآن ما شفت، لكن جايسون "استحوى" زمن ثاني و هو التسعينيات (أكثر الخيارات اللي حطيتها لكم مو مرة تسعينيات، ما عادا اللوك اللي بالوسط، ذكرني بقوينث بالترو بالتسعينات لما كانت صديقة وينونا رايدير). يمكنه أكثر لوك تسعينات بالعرض أعجبني (أتمنى أشوفه ريد كاربيت) على دايان كروقر مثلا (مع إني أحس إنها ممكن تلبس الأبيض اللي على اليسار تحت). طبعا الفستانين اللي حطيتهم تعرفون ليه حطيتهم، أكيد لأنهم كأنهم ملابس داخلية (إيه عندي مشكلة تحتاج حل). عجبني مرة الجاكيت اللي على هانا قابي (تحت يمين) و حبيت اللوك اللي فوق يسار، عجبني خلط الجاكيت (العمالي هذا) مع تنورة أو فستان ترتر. 
العرض مليان فساتين ترتر أعطتني شعور تسعينيات، ذكرتني بفستان كان موجود بفيلم Eyes Wide Shut (بالمناسبة الفيلم بايخ و لا كملته). 
و نسيت أقول وش الموضة اللي أتوقع إنها بتكون من موضات صيف 2014، الموضة اللي انتبهت لها، هي الألوان الباردة، حتى الذهبي زي ما تشوفون بارد مو أصفر، فيه أكثر من لبس برونزي/بني كانت بعد درجته باردة، طبعا أكيد مع هذي الدرجات الباردة بيكون فيه أزرق كثير. 
خلونا ننتظر و نشوف صحيح الكلام هذا، أو بس مصادفة بكذا عرض و أنا حسيتها بتكون موضة؟!!. و بعد نشوف وش موضات ثانية بتكون للصيف الجاي.