الجمعة، 29 مايو، 2015

Something Old

خلص مهرجان كان، بغيت أكتب عنه، بس عنه، بس أكثر الفساتين اللي عجبتني لونها أزرق، و أنا تكلمت عن الفساتين الزرقاء بعشاء مراسلين البيت الأبيض، و لا للأسف ما فيه أحد لبس من الملابس اللي بغيتها تلبس للمهرجان (اللي تكلمت عنها بهذا الموضوع). 
المهم هنا نرجع لبعض مجموعات الريزورت اللي صارت تطلع الفترة هذي، و منها مجموعة أوسكار دي لا رينتا. و إذا تتذكرون أوسكار قبل لا يموت، سلم مهمة التصميم لبيتر كوبينق. اللي كان يصمم لنينا ريتشي. 

مجموعة الخريف ما أعجبتني مرة، فيها فساتين حلوة، بس حسيتها كأنها فساتين قديمة من أوسكار دي لا رينتا و تصاميم كأنها من نينا ريتشي. بس قبل لا أتكلن عن هذي المجموعة، بأعطيكم معلومة عني، هو إن أوسكار دي لا رينتا يمكنه من أول المصممين الأمريكان اللي عرفتهم، و بسببه صرت مهتمة بالفاشن، أتذكر كنت مبهورة بملابسه، الكلام هذا له شيء عشر سنين، أقل شوي. المهم الفكرة اللي أبغى أوصلها، إني لما شفت بعض القطع من هذي المجموعة، تذكرت الشعور اللي حسيته أول مرة عرفت فيها أوسكار دي لا رينتا. 
عجبني مرة خلط الألوان مع بعض، الفستان الأول من اليمين أحس لازم بيكون على الريدكاربيت، أحسه بيكون حلو على كيري واشنطن، بس عندي إحساس إيمي روسم بتلبسه. الفستان اللي بعده (الفوشي مع الأسود) ذكرني بفستان من جايسون وو لبسته دايان كروقر بمهرجات كان قبل خمسة سنوات (هنا الفستان). أحس هذا الفستان بيطلع حلو على مرة على جيسيكا ألبا. الفستان اللي بعده كان لازم أدخله، أحس فيه كل المقومات اللي تقول أنه فستان هوليوودي، أتمنى أشوفه على لوبيتا مع روج أحمر. الفستان الأخير، أحسه موجود لمهرجان سنمائي صيفي، صح خلص كان، بس فيه كثار، أحس بيكون حلو على جيسيكا شستاين. 

وش رأيكم بالفساتين؟ عجبتكم قد ما عجبتني؟