Shades of Pink for Him

أعرف إني كل مرة أكتب عن ملابس الرجال، أقول إني ما أكتب عن ملابس الرجال كثير. بس هذا جزء من الموضوع لازم أقوله و إلا بيصير الموضوع ناقص P: المهم تعرفون إني حابة الوردي من فترة (بالذات البنطلون)، أكثر شيء ما أحبه بالوردي أنه مربوط بالبنات، ما أعرف من قرر هذا لون بنات و هذا لون أولاد؟!! صراحة ودي أعطيه كف، كل واحد حر يلبس اللي يبغى و اللون اللي يحس أنه حلو عليه. 

(جورجيو أرماني، توم فورد، كالفين كلاين، ميسوني)

من الأشياء اللي انتبهت ليه ما أكتب عن ملابس الرجال، باختصار لأنها مملة، الرجال عندهم فرصة أنهم بأشياء بسيطة زي اللون، يغيرون شكل لبسهم و يخلونه حلو، لكنهم يقررون يلبسون ملابس لو مر قدامي عشرة رجال، ما تذكرت و لا واحد منهم وش لابس (طبعا أنا ما أتكلم عن الثوب، أتكلم عن البدلات اللي المفروض تكون أكثر إثارة. 

بعد نقاش مع زوجي عن اللبس الوردي، حاولت أقنعه أنه لما يلبس بأناقة ما "يأثر" على صورتك "الرجولية". ما علينا من النقاش التافهة، هنا لبسين أو اقتراحين للبس الوردي للرجال، أعتقد إنها مو "مخيفة" زي البدلة الثانية من اليمين اللي من مجموعة توم فورد لصيف 2014. 

أظن هذا اللبس عادي، بس بدل الجينز الأزرق، جينز وردي، أعتقد إن اختيار الجزم و التي شيرت (إنها كلها سوداء) يعطي اللبس إيج، تعرفون إني أحب الكونفيرس، و بذات البوت اللي كله أسود، أنا شخصيا لو شفت واحد بالشارع لابس كذا ما راح أشيل عيني عنه، اللي بعد حبيته باللبس هذا أنه بسيط، يعني اللي يلبسه ما أحس أنه جالس ساعة على لبسه، بس أحس أنه واحد "كول" و لا عنده مشكلة يلبس أي شيء حلو. 

اللبس هذا أحسه عكس اللبس اللي فوق، يعني اللي يلبسه جالس أيام يفكر فيه، لأن الجاكيت خيار شوي صعب عند بعض الناس، اخترت معاه شورت رمادي علشان "يخفف" من حدة لون الجاكيت، بعد بغيت الشورت يكون فيه طابع رسمي شوي، مو جينز، علشان يصير شكله أقل "بناتية"، أنا ما أشوفه بناتي، بس لأن البنات يلبسون اللون الوردي من دون مشاكل، و دايم يلبسونه مع جينز، فأشوف أنه كذا لما ينلبس ما يربط بشكل نسائي أو بناتي. و بالنسبة لي ما أحس أنه حلو لما يتسكر الجاكيت زي اللي بالصورة، يعني لو لبست جايت صيفي لونه وردي زي كذا، أفضل يكون مفتوح و تحته تي شيرت أبيض علشان ما يكون فيه تضاد كبير و يسطع لون الوردي أكثر. 

ممكن تلبس أو ممكن يعجبك أحد لابس وردي، أو تحسون الوردي لون للبنات بس؟

* أي شيء موجود تبغون أعلمكم من وين، أطلبوا مني بالردود و راح أجاوبكم إن شاء الله.