Red Carpet Worthy: New York Edition| F.W 2014

تقريبا أسبوع نيويورك خلص، كل العروض الكبيرة، عرضت. بالنسبة لي كانت أغلب العروض حلوة، و مو مملة، إذا كنتوا تهتمون بهذي الأشياء، أقدر أقولكم أنه اللون الرمادي بيكون بكل مكان يمكن علشان فيلم 50 Shades of Grey P: ما علينا نتكلم عن العروض، و أكثر الملابس اللي أعجبتني، و أتوقع نشوفها على الريدكاربيت/أنا ودي أحد يلبسها على الريد كاربيت بالفترة الجاية. طبعا غير اللي تكلمت عنه بتغطيات منفصلة قبل. 

قبل لا أتكلم عن الملابس اللي بالصورة، بس باعطيكم ملخص عن الأسبوع إذا أنتم مهتمين:

• قلت لكم اللون الرمادي كان بكل مكان
• مارك جايكوبز ما عاد هو مصمم مارك باي مارك، صاروا مصممتين بريطانيات وحدة منهم هي مصممة الماركة اللي كنت أحبها بس أفلست لويلا، طبعا هذا يعني إن مارك الحين ما يصمم إلا لمارك جايكوب بعد ما ترك لوي فيتون الموسم اللي فات. 
• رالف لورين طلع بماركة جديد اسمها بولو رالف لورين، شكلها بتكون ماركة للملابس الكاجوال، و يبغى يخلي رالف لورين أفخم (أنا جالسة أخمن). 
• هيوقو بوس عينوا مصمم جديد و عرضوا بنيويورك (هيوقو بوس ألمانية) مصممهم هو جايسون وو، و هذي أول ماركة يصممها غير ماركته. 

أظن هذا كل شيء، خلونا نتكلم عن الملابس اللي فوق. أعتقد هذي المرة كل العروض أو الملابس المميزة، كانت من المصممين المعروفين، قصدي معروفين على الريدكاربيت، يمكنهم متحمسين على للأوسكار. من أكثر الأشياء اللي أعجبتني، و أعرف إنه ما راح يلبس على الأقل للأوسكار، ممكن نشوفه بإفينت أو فيلم بريمير هو اللبس اللي من مايكل كورس (تحت الثاني من اليسار) حبيت أنه فخم من فوق و كاجوال شوي (مع البنطلون الرسمي). أتخيل أحد زي زوي سالدانا لابسه. نفس الشيء عجبني اللون الأحمر مع الوردي من أوسكار دي لا رينتا (فوق ثاني من اليسار) أتمنى أشوفه على إيمي آدمز بالأوسكار هذي السنة، الفستان الوردي (تحت أول من اليسار) من رالف لورين حبيته بعد مرة درجة الوردي أعجبتني مرة، أحسه بيكون حلو على جيسيكا شستاين. الفستان الذهبي من توم براون، أحس بيكون حلو، على كايت بلانشيت مثلا، ودي أشوفه عليها بالأوسكار، مع إني أعتقد إنها بتلبس شيء أوت كتور (الأغلب لأرماني). الفستان الرمادي من جايسون وو، أعرف أنه مو فستان أوسكار، بس أبغى أشوفه على لوبيتا نيونقو أحسه بيطلع عليها مرة راقي. 

Best Dressed: January 2014

وصلنا لنهاية شهر يناير، و أول تصويت لأحسن لبس لهذي السنة، صراحة أنا انبسطت بالموضوع السنة اللي فاتت، ما أعرف عنكم أنتم، صحيح التصويت كان فيه مشاكل، بس لقيت موقع جديد، إن شاء الله يكون أحسن. المهم، خلونا نتكلم بالملابس خصوصا أنه شهر كان مليان بالحفلات و الجوائز. 

أعتقد أنه هذا الشهر على أنه شهر حفلات و جوائز، بس فيه خيارات مختلفة للبس من ناحية الذوق (أظن). تعرفون أني أحب ليا سيدو، لكن صدوقني مو بس لأني أحبها اخترتها، من زمان ما شفت لبس بهذا الذوق، و عندي استعداد انسخه كامل من دون ما أغير فيه شيء، من فترة و أنا أفكر ببالطو وردي أعتقد إنها لبسته بذوق مرة، و خلتني أتحمس للفكرة (يمكن الشتاء الجاي P:). أعجبني مرة شكل آنا فاريس بهذي الجمب سويت من نعيم خان، من زمان ما حسيت إنه فيه جمب سويت طلعت حلوة على الريدكاربيت، بس اختيارها مع لون شعرها و مكياجها عجبني مرة. قلت رأيي لأوليفيا وايلد و لوبيتا بلبسهم بالقولدين قلوب، بس إيديل ما شفت صورها إلا بعد يوم أو كذا، عجبني مرة، خصوصا شكله من فوق (جهة الصدر) و عجبني ظهره (أعرف مو واضح بالصورة)، و بعد عجبني شكل الفستان من تحت. باختصار عجبني كله. 

أدريانا ليما بهذا الفستان الأسود، صح الفترة الأخيرة عجبتني فتحات الصدر العميقة، بس مو هذا الشيء اللي عجبني بشكلها، العقد اللي لابسته أكثر شيء عجبني (شفت شيء يشبه له على كيم كارداشيان) المهم أعتقد أنه هوسي الجديد. آخر شيء أليزابيث بهذي البدلة من آخر مجموعة لأرماني برافي (اللي قبل أسبوع بس) شكلها كله أنيق، بس أكثر شيء عجبني اختيار الجزم، شيء ما أدري زي الشباشب أو ما أعرف وش هو، بس أعجبني. 

من أحسن لبس لشهر يناير 2014؟

ليا سيدو بميوميو و برادا

ساندرا بالوك بأليكس بيري

آنا فاريس بنعيم خان

أوليفيا وايلد بقوتشي بريمير

لوبيتا نيانقو برالف لورين

إيديل إيكساكابوليس بميوميو

أدريانا ليما بجيني كاين

إليزابيث ديبكي بأرمارني برافي

Poll Maker

Report: Golden Globe 2014

أمس كان قولدين قلوب، يمكن كلكم تعرفون قبلي، بس ما يهم، باتكلم عن الأشياء اللي شفتها، و علشان أكون صريحة معكم شيئين حمسوني أكتب: أوليفيا وايلد و زوي داشنيل. ما أعرف هي الفساتين اللي قللت حماسي بحفلات توزيع الجوائز (إني أحس الفترة الأخيرة ما عاد فيه فساتين تخلي الواحد يشهق) أو لأن اهتمامي بالأفلام قل، مو بالأفلام، بالجوائز هذي، صرت ما عاد أحس لها قيمة، و إنها كلها مجاملات و مصالح. ما علينا، خلونا نتكلم عن  الملابس و الموضة. 

خلوني أبدأ بأوليفيا وايلد، أولا أحط توضيح إني ما أشوف الحمل "كيوت"، عادي ناس يظلون زي ما هم + البطن، و ناس ما يصيرون حلوين، بس هي مرحلة و تعدي، الفكرة إني ما أشوف إن البطن حلو، علشان تعرفون إن رأيي بأوليفيا يستحق منكم أنتم بعد الإهتمام P: المهم اللي بأقوله، إن شكل أوليفيا بهذا القوتشي بريمير أحسن شكل حامل قد شفته بحياتي (أظن)، ما عمري شفت حامل شكلها مثير كذا، المهم ما علينا، بس تحذير، أظني راح أدخلها بأحسن لبس لشهر يناير. 

أوه لوبيتا، أظن لو لفت قماش و طلعت من البيت بأقول هذا فستان حلو، لوبيتا لابسة فستان رالف لورين أعجب ريم من عروض نيويورك، لو قريتوا الردود على الموضوع، عرفتوا أنه ما كان عاجبني لأسباب، بس وش أسوي لوبيتا تحلي كل شيء. 

زوي داشنيل لابسة بعد فستان كان عاجب ريم من أوسكار دي لا رينتا (بعد بالردود واضح). عجبني شكلها بالفستان، بس عندي مشكلة كبيرة مع الوردة اللي حاطتها، أولا: إني أعتقد إنها حركة قديمة، بعدين ما أحسه مكانها، بعدين نفس الوردة شكلها رخيص بعد. 

عجبني شكل أيمي آدمز بفالنتينو، بعد هي لابسة فستان أحمر (أظن الأحمر و درجاته كان أكثر لون لبس أمس). (حطتيه هنا بالملابس اللي ودي أشوفها على الريدكاربيت) مشكلتي الوحيدة معه مو مشكلة، بس كان ودي لو خلت شعرها فيرونيكا لايك وايفز، يمكن ما كانت تبغى شكلها يصير زي شخصيتها بأمريكان هوسيل. 

آخر شيء ما حطيت صورتهم فوق، بس هذا رابط للصورة، زوي سالدانا لابسة فستان بعد تمنيت يلبس من برابل قرونق، عجبني شكله هنا بالأفتر بارتي، بس بالريد كاربيت ما كان عاجبني مرة. و ميشيل دوكري لابسة فستان من أوسكار دي لا رينتا، كانت أقول أنه يصلح فستان زواج، بعد عجبني شكلها فيه.

أنتم وش رأيكم؟ وش عجبكم؟ من عجبكم و أيش ما عجبكم؟ 

What Kind of Man Are You?

أحس أنه تقريبا ما فيه شيء ما عرفتوه عن الأشياء اللي أحبها بالفاشن، أظن إني قلت لكم كل شيء. أظن من أكثر الأشياء اللي قد قلت لكم إني أحبها، هي الملابس الرجالية طبعا على النساء. خصوصا اللبس الرسمي. الشيء المثير أنه ثنتين بهوليوود بالأسبوع اللي فات طلعوا يروجون لأفلامهم الجديدة بملابس "رجالية". الغريب أنهم كلهم ممثلات اشتهروا بالثمانينات/التسعينات، لكن ما راح أناقش فكرة اللبس على هذا العمر باتكلم عن اللبس نفسه. 

كيم باسنجير و جوليا روبيرتس كلهم عندهم أفلام جديدة (موضوع جانبي متحمسة لفيلم جوليا لأن فيه ميريل ستريب). كيم طلعت ببدلة رجالية أعتقد من رالف لورين، اللبس كامل كأنه "مين كلوب" مع السلسلة و الجاليه، باختصار أخذت اللبس الرجالي زي ما هو (يبدو لي حتى الجزمة أكسفورد) يمكن الشيء الوحيد اللي ما يخلي اللبس رجالي هو الروج الأحمر. جوليا بالمقابل أخذت فكرة التوكسيدو، بس إذا ممكن نقول بلمسة نسائية أكثر. مع تنورة، و صندل كعب، و يمكن أهم شيء إنها ما لبست كرافة. مرة أعجبني شعرها و مكياجها. 

المهم بين الثنتين أي نسخة من اللبس الرجالي التفضلون؟ (إذا كنتوا تفضلونه أصلا). نسخ الملابس الرجالية كاملة؟ أو تدخيل قطعة أو قطعتين على اللبس؟

The New Suffragist

من زمان شفت بالتلفيزيون بداية فيلم لهيلاري سوان أعجبني، بس صار شيء معين و اضطريت إني أطلع من البيت ... بس قبل يومين رحت أدور على الفيلم من جديد و نزلته. الفيلم عن الـ"سفريج" اللي هي حركة حقوقية كانت بأمريكا و بريطانيا بدايات القرن الواحد وعشرين علشان يعطون النساء حق التصويت الفيلم حلو اسمه "أيرون جاود إنجيلز" (لو بغيتوا تشوفونه). الفيلم مو بس قصته حلوه، لكن بعد فيه ملابس كثيرة، حسيت أنه فيه أشياء كثيرة تشبه لها بعروض الشتاء الأخيرة، خصوصا كثرة القبعات.

(يسار). بعرض إيزابيل ماران، ما أنكرت إيزابيل إن المجموعة استوحتها من النساء الإمريكيات، خصوصا الروديو (راعيات البقر)، و لأنه الثيم كان أمريكي، كان فيه كثير قطع دانتيل بهذي المجموعة (يمين). عرض رالف لورين كان فيه كثير "ملابس الرجال للنساء"، وحدة من هذولي سفريج كانت تلبس أكثر من مرة كرافات (الأولى على اليمن فوق)، أعجبني شكلها خصوصا أنه المفروض أحداث الفيلم تكون قديمة، يعني لا كانت موضة، و لا أكيد عرض رالف لورين طلع P:.

(يسار). ما أعرف إن كان مارك جايكوبز قبل ما يصمم هذا العرض للوي فيتون شاف الفيلم، لكن فكرة البالطو و "القبعات المجنونة" زي ما هو قال عنها، كلها توحي أنه إما شاف الفيلم قريب، أو على الأقل كان مهتم بالفترة هذي اللي تسمى "الإدوردية". (يمين). بالفيلم المرة اللي على اليمين تمثل شخصية حقيقة لوحدة من سفرجيست إسمها "لوسي بيرنز" تقريبا أكثر مشاهدها بالفيلم كانت لابسة هذا البالطو اللي ذكرني بالطبعات بعرض برادا الأخير.

قد قلت لكم قبل أنه فكرة الملابس الداخلية كملابس طلعات من زمان عاجبتني، الشيء هذا كان بأكثر من عرض من عروض الصيف، و بعد نينا ريتشي، و بعض العروض الثانية عرضت بعض القطع اللي تقريبا نفس الفكرة، أعجبني هذا اللوك من العرض، خصوصا أنه يشبه كثير الملابس الداخلية، بس طبعا تلبس برا :).

Rooney for the Golden Globe?

قبل لليلتين كنت روني مارا بوحده من المناسبات، ما أعرف بريمير جديد لفيلمها الأخير "ذا قيرل ويذ ذا دراقون تاتو" أو شيء ثاني، بصراحة ما يهمني، لكن اللي لازم أقوله، أظن روني مارا هي السلبرتي الوحيدة بهذي الفترة اللي أنتظر كل مرة وش تلبس، ما أقول إنها ما قد عاجبتني بالشهر الأخير، لكن و لا مرة بالنسبة لي كان شكلها مو حلو، و الأهم إنها أكثر المرات شكلها فوق العادة. 

بالمناسبة هذي اللي لسا ما أعرف وش هي، روني كانت لابسة من مجموعة فالنتينو الأخيرة ربيع 2012 ... بصراحة أنا مبهورة بشغل اللي يختار لها ملابسها، ما أعرف هو اختيار الملابس المثير، أو يمكن شعرها (لونه، و الغرة) هي اللي تعطي الملابس هذا الشكل المثير ... 

روني على إنها لبست لون غير الألوان المعتادة اللي كانت تلبسها الفترة اللي فاتت (أسود و رمادي و أبيض و درجاتها)، و لون قوي زي الأحمر، لكن لون الفستان ما سيطر على اللوك قلت لكم الشعر، و يمكن الحواجب الثقيلة خلت صعب تلبس شيء، و ما يصير كل الإهتمام على وجهها، مو على أي شيء ثاني، حتى لو كان فستان أحمر من فالنتينو. 

الخبر السعيد بالنسبة لي إنه حتى لو حلصت روني ترويج لفيلمها، هي جالسة الحين تصور فيلم جديد مع رايان قوزلينق، و الأهم بالنسبة لي شعرها إلى الآن أسود (أتمنى ما تغيره). لكن قبل ما ينزل أي فيلم جديد لها، روني مرشحة لقولدين قلوب، و أتمنى ترشح لأوسكار، مع إني لسا ما شفت تمثيلها، بس علشان أشوف وش راح تلبس. و لأنه ما بقى إلا 4 أيام على قولدين قلوب، و بعد ما شفت روني بهذا الفستان، انشغلت وش ممكن تلبس للحفل؟ 

من اليسار فستان من مجموعة فالنتينو أوت كتو خريف 2011، المجموعة بشكل عام أول ما شفتها أعجبتني، و لما جلست أدور فساتين لروني، على طول رحت أشوف المجموعة من جديد، مو بس لأن روني لبست لفالنتينو، لكن لأن هذي المجموعة أتوقع إنها راح تكون من أنجح مجموعات الأوت كتو لموسم الجوائز هذا، و أهم شيء لو لبسته قبل روني، لو تلبسه أتمني تختار روج غامق، علشان تحول هذا اللوك الناعم لقوثيك. 

الفستان المخمل الأسود من عزالدين عاليا، الفستان بعد من مجموعة أوت كتو خريف 2012، من أكثر الأشياء اللي أعجبتني بالمجموعة، أتمنى أشوفه على أحد، ما كان ببالي أحد أول ما شفته، لكن الحين أظن أنه مناسب لروني.

الفستان الأبيض من مجموعة رالف لورين ربيع 2012 الأخيرة، المجموعة أعجبتني مرة، المجموعة بشكل عام مو ستايل روني، لكن هذا الفستان بالأشياء اللي على الكتف أتوقع بيطلع حلو عليها. 

الفستان الأخير من مجموعة حيدر أكيرمان، أول ما شفت العرض أعجبني مرة حسيته يستاهل ريد كاربيت، لكن ما كنت أعرف روني أو على الأقل ما كنت أعرف ستايلها، لكن الحين أظنها هي الوحيدة اللي ممكن تلبس شيء زي كذا، و لا يطلع مبتذل عليها.

شرايكم بالإختيارات؟ و وش رأيكم بستايل روني مارا لو كنتوا متابعين؟

Taxi ..

خلص أسبوع الموضة بنيويورك أمس، و اليوم بدأ أسبوع الموضة بلندن، ألوان و أشكال كثيرة كانت بنيويورك، أهم شيء الطبعات، و درجات الأزرق، لكن الشيء اللي أنتبهت له أكثر شيء هو اللون الأصفر تقريبا بكل عرض. 

الشيء اللي خلاني أكتب عن هذا اللون بالذات من بين كل الألوان اللي كانت بالعروض، زي ما قلت لكم أنه كان موجود تقريبا بكل العروض، يا قطعة ملابس، أو شنطة، أو جزمة، مشجر و سادة، بكل الدرجات. كان موجود بكل مكان.

الشيء الثاني إني أحب لون تكسي نيويورك، يمكنه أشهر شيء فيها بعد الناطحات السحاب (و لأني حابة الصورة اللي أخترتها لنيويورك، يوم كانت الكابريس سيارة لكل شيء:). 

السبب الأخير، أنه ببداية الصيف رحت لزواج، و شفت ثنتين لابسات فستان أصفر، و لما رجعت لخواتي، قلت لهم أنه اسوء لون يكون فستان اللون الأصفر، ما أعرف كان السبب البنتين نفسهم لأنه المايك آب كان شوية كارثي، أو الفستان أو ما أعرف وش السبب، لكن اللي شفته بالعروض كان شيء مختلف، و أعتقد أنه كان فيه خيارات كثيرة، أظن هدف مصممين نيويورك كانوا يحاولن يثبتون لي إن الأصفر مو سيء، يمكن مشكلته أنه ما قد حصل فرصته من قبل، أو يمكن يكون بالنسبة لي الأخضر الجديد (أول كنت أعتقد إن اللون الأخضر هو أقبح لون للملابس، بس الحين أظن أنه من أفضل الألوان، لو الناس لبسوا درجة من الأخضر حلوة، مو أخضر علم السعودية، لأنه رخيص مرة، خصوصا اللي بلمعة. 

من اليسار لليمين (بيتر سوم، جيل ستيوارت، و برين). كل الثلاثة أعجبوني أحس تي أبيض مع التنورة اللي من بيتر سوم و جاكيت بوي فريند أي لون بيطلع حلو. 

اللبس اللي بالوسط من جيل ستيوارت ما أعجب خواتي، بس أعجبني أنه أصفر على أصفر، خصوصا إن درجة الأصفر فيه (ليموني). آخر فستان من برين بعد عاجبني، حبيت خلط الألولن فيه، أحسه كأنه غرفة أطفال، حبيت شكله، حبيت قصاته، حبيت إن الألوان فيه كذا سادة من دون أي نقش. 

المجموعة هذي مجموعة الملابس اللي يسمونها "سمارت"، باختصار يعني ملابس الشغل. من اليسار لليمين (راق آن بون، تومي هيلفقير، و آركز). أعجبني الجاكيت حق راق آن بون، و الجمب سوت اللي من تومي، بس أكثر شيء أعجبني، هي البرا الصفراء مع الفستان الأبسض اللي عارضينه آركز، أعرف أنه بالمواقع ما راح يصير لبس عمل بس حبيته قوة. 

المجموعة الأخيرة ما أعرف وش أصنفها، بس يمكن الملابس الرومانسية، من اليسار لليمين (تيبي، أوسكار دي لا رينتا، رالف لورين)، بالنسبة لي فستان تيبي الأصفر فستان مريح، سهل لبسهة، من الملابس اللي بسهولة تتحول من فساتين طلعات عادية لفساتين سهرات، بس زيدي إكسسوار أو إلبسي معاها شيء مختلف، و يختلف شكلها تماما. الجمبر اللي من رالف لورين أعرف إن شكلها عادي، بس عجبني كيف نسقوها بالعرض، أما فستان أوسكار دي لا رينتا، فعاجبني مرة، أعرف أنه صعب يكون حلو، لكنه عاجبني أحسه كأنه طالع من فيلم تاريخي، و لو يتحول الأصفر لعاجي، و الأبيض لذهبي أو فضي، بسهولة يتحول لفستان عروس مررررررة حلو.

شرايكم بالأصفر للملابس؟

Tour Time

منيب مرة مع الأغاني و المغنين، يعني اللي يصادف إني أسمعه، أسمعه، لكن ألاحق أخبارهم و ألبوماتهم، ما قد سويتها. و لا تعجبني كثير الخنبقة اللي يسوونها بالحفلات، هذي الملابس الغريبة "الكستومز" يعني ما أشوف إلا إنها فكرة فاشلة، و تأكدت من هذي الفكرة بفيديو كليب بيونسيه الأخير لأغنيتها Run the World، أغنية كلماتها تافهة و لا لها معنى، بس إنها كانت بكل مكان بالنت علشانها لبست عشرة، أو ما أعرف كم فستان من الهاي فاشن و الأوت كتو بالفيديو (سو عليه سيرش باليوتيوب، إذا ودكم تشوفونه).

زي ما قلت لكم مانيب مهتمة بأخبار المغنين، و لا أعرف من اللي راح يسوي جولة غنائية، و مين لا، بس هو بالعادة بالصيف العالم تحمي الطار :P.

علشان كذا سويت هذا الموضوع اللي أخترت فيه من مجموعات الخريف الأخيرة ملابس، ممكن تلبسها أربع مغنيات لحفلات الصيف.

تتذكرون التصنيف اللي قلت لكم عنه قبل "بيتاتيك"؟ اللي حطيت فيها آنا ديلو روسو. القائمة فيها بعد ليدي قاقا. هذي المخلوقة ما أحبها أبدا، و لا أحب أشوفها طريقتها "تراني شخص غريب" تنرفزني.

ما علينا هي موجودة، و لا أقدر أغير شيء، علشان كذا باقترح وش ممكن تلبس لوحدة من حفلاتها، طبعا هي تلبس ملابس غريبة كثيرة، و تلبس لأكساندير ماكوين كثير، خصوصا إنها غنت بعرضه الأخير اللي قبل لا ينتحر ...

أحس الفستان هذا بتعديل بسيط، ما أعرف وين ممكن يمشي عليها، لأنه بهذا الشكل، أحس أنه كبير مرة. يمكن تقلل الأشياء السوداء اللي متدلية من الفستان.

من قائمة المغنيات اللي اليوم بأحطهم يمكن فلورانس هي أكثر وحده أحبها، صح ما أعرف أسامي أغانيها، و لا ألبوماتها، بس ملابسها حلوة، و صوتها حلو (إذا تحبون الموسيقى "الروحية") دور عليها و أسمعوا لها.

تعجبني بملابس فلورانس، أنه أغلبها لو لبستها فيروز (طبعا و هي أصغر من الحين)، بتطلع عليها حلوة، أصلا ما أعرف وش يربطها ببالي بفيروز ؟! بس ما يهم أحس أنه الفستان الأخضر هذا من رالف لورين (و اللي بادية أحبه من جديد)، أحس بيطلع عليها حلو، لو بعد يطول من ورا.

بالأساس هذا الفستان، هو الفستان اللي خلاني أفكر بهذا البوست، أول ما شفته قبل شهور من عرض فيفيان ويستوود، ريانا أول من من جت ببالي، طبعا حفظتها عندي، و كنت راح أسوي بوست عن ريانا وش ممكن تلبس، بس إني تعيجزت، وراح الوقت و بطلت، و الحين قلت أحطه مع مجموعة مغنيات ... بس باختصار، هذا الفستان مخلوق لها.

بديت ببيونسية و الفيديو كليب و الأغنية البايخة، بس هذا ما يعني إني ما أكتب عنها، و أقدم لها خدمة P: المهم أخترت لها هذا الفستان لها من مجموعة دولتشي آن قابانا اللي أكثرها نجوم، صراحة أول ما تصفحت المجموعة، ما أعرف شعوري كان غريب تجاهها، بس الحين بعد شهور و أنا أشوفها حبيتها، خصوصا بعد ما شفت واحد من فساتينهم على زوي سالندا. أحس المجموعة الأخيرة بالنجوم، و الترتر تشبه بونسية خصوصا جو الديسكو نهاية السبعينات و الثمانينات.

وش رايكم أنتم بالأختيارات؟ و عندكم مغنية مفضلة من القائمة اللي حطيتها أو غير (ملابس و موسيقى)؟

Clean Gangs

من عدد فبراير الي كان غلافة كيرستين ستيوارت بشعر أشقر و حواجب غامقة (تعجبني هذي الحركة، و حبيت الغلاف). المهم فيه إيديتوريال أسمه Gangs of New York أو (عصابات نيويورك). أسم الإيديتوريال زي اسم فيلم قديم ما أتذكر كل شي بالضبط، بس أكيد أنه كان شكل الناس مخيس، و ريحتهم طالعة :) الغليلم حلو بس الناس كانوا مخيسين.

لما كانت فيه عروض نيويورك لربيع 2011 ما حسيت إن عرض رالف لورين كان مميز، فيه أشياء حلوة بس مو مميزة. بالإيدتوريال هذا فيه أكثر من مصمم بس أكثر واحد حبيت الشغل حقة كان رالف لورين. من فترة طويلة و أنا حابة الفساتين الطويلة البيضاء ، المشرشحة. فيها نعومة و أناقة، و لا أحس يحتاج لها شغل كثير، يمكن بس حلقات كبيرة، و مايك آب مناسب و بتكونين جاهزة لأي مناسبة، أهم شي لا يكون فيه مبالغة بالشكل.

ما أعرف صراحة، موقع يبيع رالف لاورين (قصدي أونلاين) ... بس فيه بوتيك لرالف لورين بالمملكة، بالرياض للي يبغي شي من عرض رالف لورين الي موجود بالإديتوريال أو بالعرض هنا. بس أنا من فترة طويلة، حتى من قبل التخفيضات، الي كانت عند أي نيت بورتيه، و أنا حاطة عيني على هذا الفستان من آنا سوي، عاجبني مرة، عاجبني طوله، و أنه أبيض، و خرابيطه الكثيرة ... ميزت الأبيض أنه مهما كثرت خربيطة ما يطلع بشع، و جلف علشان كذا حبيت هذا الفستان، زي ما أنتم شايفين الفستان عليه تخفيض الحين و صاير بحوالي 2700 ريال.

طبعا إذا تشوفون السعر غالي، بسو ودكم تجربون هذا اللوك الي مسمينه ببداية الإيدتوريال فيكتوري، أو ودكم بفستان أبيض طويل حلو، بس رخيص ... فيه موقع أسمه Free People يبيع أشياء مرة حلوة، صح مو رخيصة مرة، بس أسعارها معقولة، و أعتقد أنه كثير من الأشياء الي عندهم تستاهل سعرها.
فيه خيارين للبس هذا واحد أنا حبيته أكثر من عندهم، و الثاني خيار أختي. قلت لكم سعرهم مو رخيص دايم، بس أرخص من غيرهم، تقدرون تفتشون باقي الموقع علشان تصدقوني :). 

Frank & Chic

من زمان ما أحس إني شفت لبس أنيق، و من دون أي تكلف خصوصا القاونز ... أليكسا دافولاس ببريمر فيلمها الجديد Clash of the Titans المهم اللبس ذووووق تنوره سودا طويلة من رالف لورين، و جاليه أسود توكسيدو من رالف لورين بعد .... هذا كل شي، لو أنا ألي لبسته أو لبستها باختار لها كلتش أكثر فخامة ...

* تحديث

Tuxedo by alorwa featuring Miu Miu shoes

Items in this set:

Ann Demeulemeester Leather waistcoat with straps, 1,090 GBP

Silk-lamé maxi skirt, $1,680

Satin platform pumps, $610

JOANNA LOUCA 715-A BLACK&GOLD LEATHER/FABRIC -, 250 GBP

Betsey Johnson Official Store - Square Stone Drop Earrings, $55

صراحة ما تحملت إني ما أسوي لها سيت ... سويت هذا السيت معتمده علي فكرة الجالية التكوسيدو التنوره الماكسي ...

فاصل إعلاني ..

يا رب تقتص لي منها، يا أنا أكرهها كره، لا و بعد لابسه رالف لورين يعني في سبب وجيه لكراهيتها .. مع القبعة مسويه نفسها بآسكوت بجد تبطييين.

من مجموعة Ralph Lauren ربيع و صيف ٢٠٠٨. العارضة (برونا تنوريو) و (هايدي مونتاغ)