Best of NYFWSS15

ما أعرف هذا الموسم كان عادي أو أنا ما كان عندي الحماس الزايد اللي بالعادة يكون عندي هذي الفترة (فترة أسبوع الموضة)، أعتقد فيه بشكل عام كان فيه ملابس حلوة، بس ما أظن أنه كان فيه مجموعات مثيرة بنيويورك. مجموعة ڤيرسوس ڤيرساتشي أعجبتني مع أنتوني ڤكارويلو و رودارتي. 

ما أعرف ليه عندي أحساس إني اختياراتي هذي المرة قليل منها بيطلع على الريدكاربيت، شخصيا و أنا أختار الأحسن ما كنت أفكر كثير بإيش اللي ممكن ينلبس، قد ما كنت أختار الملابس اللي أنا أعجبتني. لكن بكل الأحوال، خلونا نتكلم عن الملابس اللي اخترتها. 

فوق يمين، أعجبني هذا اللبس من ساس آن برايد، ما أعرف ليه أحس من فترة هذا اللبس موجود (يمكني أتخيل)، بس إلى الآن ما شفته علي الأقل بشكل حلو، على الريد كاربيت (بنطلون و فستان)، أعرف إن إيما ستون لبست شيء نفي الفكرة (تقريبا) من ديور بقولدين قلوب السنة اللي فاتت، بس أحس لو تلبسه هي أو لوبيتا بيطلع مرة حلو (أتمنى أشوفه على لوبيتا). أعجبني بعد لبس التنورة الشفافة اللي عليها ورود (تحت يسار) من مايكل كورس، أحسه بيكون حلو على جيسيكا شستاين. اللوك اللي جمبه من بوس (الفستان الأسود القصير)، عجبني أناقته (مع أنه فستان أسود قصير) يعني مو اختراع جديد، بس عجبني سيوره، أحسه بيكون حلو على ديان كروقر أو كلير دينس. الفستان الأسود الثاني من ڤيرسوس (فوق الثاني من اليمين) ما أقدر أتخيله إلا على ريانا. الفستان العنابي يسار فوق من ريم عكرا، أحسه بيكون حلو على سيلينا قوميز (مع  إني ما أتذكر إنها تلبس لريم عكرا). 

أنتم وش رأيكم بنيويورك، وش أحسن الملابس أو المجموعات لو كنتوا متابعين؟

Are Ombré Clothes Happening?

بجموعة إيلي صعب الأوت كتور الأخيرة انتبهت أنه عنده ملابس فيها تدريجات ألوان، نفس الشيء صار بمجموعتة لخريف 2014، مو بس كان هو كان فيه بعد أكثر من مصمم عنده قطع فيها أومبريه. صراحة ما أعرف موقفي من الفكرة بشكل عام، يمكن لأني طفشت مرة من موضة أومبريه الشعر. و أعتقد إنها من أكثر الموضات اللي شوهت (أكثر من قصة الفراولة) P:. 

قبل يومين نزلت مجموعة بوربري ريزورت 2015، و كان فيها أكثر من لوك، فيه أومبريه، منها البالطور (أقصى اليسار). لما شفت المجموعة تذكرت إني منتبهة لموضوع الأومبرية عند أكثر من مصمم و أكثر من مجموعة، إلى أمس، ما كنت متوقعة إنها ممكن تكون موضة، بس بعد بوربري أعتقد إننا بنشوفها أكثر بالمجموعات الجاية، و بالهاي ستريت. لسا ما انتبهت لو كانت أساسا موجودة بالهاي ستريت، بس أعتقد أنه بس ممكن سلبرتي أو اثنين يلبسون شيء أومبريه، أعتقد رسميا بتصير موضة. 

قلت لكم ما أعرف رأيي بالفكرة، مثلا عاجبني فستان إيلي صعب (الأول يمين)، و تنسيق جاي كرو (الثاني من اليسار)،  بس مو متأكدة إذا كنت باحبها على كل شيء أو لا. ننتظر و نشوف. 

أنتم مبدئيا وش رأيكم بالفكرة؟ 

Best Dressed: March 2014

الشهر هذا كان مرة صعب، خصوصا مع الأوسكار، و الحملة الترويجية لفيلمين نوح و سبايدر مان. لكن بالأخير، قررت إني ممكن أتكلم عن جينفير كونللي بعدين بحملتها لفيلم نوح بتدوينة منفصلة، لأني صراحة أحس باظلم الناس و باظلمها لكن بالنهاية اخترت لبس واحد بس، أكثر لبس حبيته. ما علينا خلينا نتكلم عن أحسن ملابس هذا الشهر مارس 2014. 

خلونا نبدأ من لوپيتا، لوپيتا موجودة بالقائمة خمسة مرات بالستة شهور الأخير. برأيي كل مرة شكلها مختلف، هذي المرة بمايكل كورس، أحس شكلها كأنه لبس مكتبي/رسمي بتحوير شوي، مع الكروب توب ما أعرف الكت أوت، زيادة اختيارها للجزمة و الشنطة. نفس الشيء أعجبني شكل نايومي واتس بالجمب سوت من إيلي صعب، أعجبني اللون، و أعجبني مكياجها، و تسريحتها. طبعا ما يحتاج أقول شيء عن دايان، كل اللي أقوله، أظن أي مصمم إذا عنده لبس يعتقد ما فيه أحد يقدر يخليه حلو بسهولة، يعطيه دايان كروقر، دايان لابسة من المجموعة الأخيرة لثيوري. مرة عجبني شكل جايمي كينچ بيوليانا سيرچينكو كتور، ما أعرف ليه، انبسط لما أشوف ناس أكثر يلبسون لها، أحس تستاهل إنه تعطى وجه. مرة عاجبني شكل إيما واتسون بجي مانديل، أعجبني شكل ماكرينا قارثيا بألبيرتا فيراتي، أكثر شيء عجبني، اختيارها للحلق البرتقالي أو الأحمر، مع الأخضر، جنيفير كونللي لابسة أوت كتور من جيفنشي أعتقد 2010، و إيمي أدمز باللوك الوحيد اللي اخترته من الأوسكار بچوتشي بريمير، عجبني مرة شكلها، مرة أنيق و نظيف، و مرة ثانية عجبني اختيارها للون الحلق. 

أحسن لبس لشهر مارس 2014؟

لوبيتا ناينقو بمايكل كورس

نايومي واتس بإيلي صعب

دايان كروقر بثيوري

جايمي كينق بيوليانا سيرقنكو أوت كتور

إيما واتسون بجي مانديل

مكرينا قارثيا بألبيرتا فيراتي

جنيفير كونللي بجيفنشي أوت كتور

إيمي آدمز بقوتشي بريمير

make a poll

Red Carpet Worthy: New York Edition| F.W 2014

تقريبا أسبوع نيويورك خلص، كل العروض الكبيرة، عرضت. بالنسبة لي كانت أغلب العروض حلوة، و مو مملة، إذا كنتوا تهتمون بهذي الأشياء، أقدر أقولكم أنه اللون الرمادي بيكون بكل مكان يمكن علشان فيلم 50 Shades of Grey P: ما علينا نتكلم عن العروض، و أكثر الملابس اللي أعجبتني، و أتوقع نشوفها على الريدكاربيت/أنا ودي أحد يلبسها على الريد كاربيت بالفترة الجاية. طبعا غير اللي تكلمت عنه بتغطيات منفصلة قبل. 

قبل لا أتكلم عن الملابس اللي بالصورة، بس باعطيكم ملخص عن الأسبوع إذا أنتم مهتمين:

• قلت لكم اللون الرمادي كان بكل مكان
• مارك جايكوبز ما عاد هو مصمم مارك باي مارك، صاروا مصممتين بريطانيات وحدة منهم هي مصممة الماركة اللي كنت أحبها بس أفلست لويلا، طبعا هذا يعني إن مارك الحين ما يصمم إلا لمارك جايكوب بعد ما ترك لوي فيتون الموسم اللي فات. 
• رالف لورين طلع بماركة جديد اسمها بولو رالف لورين، شكلها بتكون ماركة للملابس الكاجوال، و يبغى يخلي رالف لورين أفخم (أنا جالسة أخمن). 
• هيوقو بوس عينوا مصمم جديد و عرضوا بنيويورك (هيوقو بوس ألمانية) مصممهم هو جايسون وو، و هذي أول ماركة يصممها غير ماركته. 

أظن هذا كل شيء، خلونا نتكلم عن الملابس اللي فوق. أعتقد هذي المرة كل العروض أو الملابس المميزة، كانت من المصممين المعروفين، قصدي معروفين على الريدكاربيت، يمكنهم متحمسين على للأوسكار. من أكثر الأشياء اللي أعجبتني، و أعرف إنه ما راح يلبس على الأقل للأوسكار، ممكن نشوفه بإفينت أو فيلم بريمير هو اللبس اللي من مايكل كورس (تحت الثاني من اليسار) حبيت أنه فخم من فوق و كاجوال شوي (مع البنطلون الرسمي). أتخيل أحد زي زوي سالدانا لابسه. نفس الشيء عجبني اللون الأحمر مع الوردي من أوسكار دي لا رينتا (فوق ثاني من اليسار) أتمنى أشوفه على إيمي آدمز بالأوسكار هذي السنة، الفستان الوردي (تحت أول من اليسار) من رالف لورين حبيته بعد مرة درجة الوردي أعجبتني مرة، أحسه بيكون حلو على جيسيكا شستاين. الفستان الذهبي من توم براون، أحس بيكون حلو، على كايت بلانشيت مثلا، ودي أشوفه عليها بالأوسكار، مع إني أعتقد إنها بتلبس شيء أوت كتور (الأغلب لأرماني). الفستان الرمادي من جايسون وو، أعرف أنه مو فستان أوسكار، بس أبغى أشوفه على لوبيتا نيونقو أحسه بيطلع عليها مرة راقي. 

Best Dressed: April 2013

أقدر أختصر الشهر هذا أنه شهر الملابس السوداء (مع أنه المفترض إننا خلاص بالربيع). ما عندي أعتراض على اللون الأسود، خصوصا لما يكون حلو، و أقدر أقول إني مبسوطة على تقريبا على كل اللي طلعوا لابسين أسود بشهر مارس. 

بشكل عام أقدر أقول إن كل الخيارات لهذا الشهر كانت "راقية"، و لما أقول راقية قصدي ملابس سهرات، ما عادا سولانج بالبنطلون اللي عليه طبعات سحاب من مايكل كورس.
مرة ثانية أولقا تدخل القائمة هذي المرة بفستان "بيبي بلو" من إيلي صعب. و بعد ديور يرجع من جديد للقائمة، بعد ما كان موجود بياناير و فبراير، و هذي المرة مع لي لي سوبيسكي، بتنورة سوداء من المجموعة الأخيرة لديور، و تيشيرت أبيض.

أخر شيء متحمسة مرة لشهر مايو، خصوصا إن فيه ميت قالا و قريت قاتسبي و مهرجان كان. أنتم صوتوا و علموني وش أكثر شيء عجبكم.

Create your free online surveys with SurveyMonkey , the world's leading questionnaire tool.

Best Dressed: Golden Globe 2013

ما أعرف إذا كان اختيار أحسن لبس للقولدين قلوب هذي السنة كان سهل أو صعب، أدري أنه سؤال ماله معنى، لكن أكثر اللي جو أمس كانت أشكالهم حلوة (موب مميزة) بس فيه مستوى معين من الأناقة. (ما أعرف ليه أحس ما عاد صارت هذي الحفلات مميزة زي ما كنت أحسها أول). ما علينا خليني أقولكم مين أكثر شيء عجبني. و ما يحتاج أقول إني أحبطت زي دايم و لا أحد لبس فستان منقط. 

إيميلي بلونت بهذا الفستان الذهبي من مايكل كورس بالنسبة لي كان أحسن لوك بالحفل. أول شيء لونه حلو، عجبني كيف تصميم ميناليزيم (بسيط) أختار له هذا القماش الفخم (كبروا الصورة لو بغيتوا تشوفون التفاصيل) الفستان مو بس هو لحاله حلو. الإكسسوار و المكياج و التسريحة اللي أختارتها إيميلي مع الفستان كلها أعطت الفستان شكل مميز. أعجبتني مرة إنها اختارت معه مجوهرات ما أعرف وشو هذا الحجر بس بخمن أنه سافير وردي. (شوفوا السواره و الحلق). الشنطة ما غطت على الفستان و المجوهرات و المكياج مرة مناسب. 

Fur Vest

جآني سؤال عن كيف ينلبس الجاليه الفرو ... أولا بالنسبة لي أكثر قطعة فرو مناسبة لجونا هي الجالية، يعني إذا كان خاطرك بفرو، و لأن الجو هنا مو بارد لدرجة يستاهل إننا نلبس جاكيت فرو، فالجاليه بيكون خيار جدا مناسب. 

(من اليمين: ألبيرتا فيراتي، مايكل كورس، باند أوف أوتسايديرز، أوسكار دي لا رينتا)

الشيء اللي خلاني أكتب عن هذ الشيء (الجاليه الفرو)، مو بس السؤال، لكن لأني بغيت أكتب عنه قبل لا يحتر الجو مرة (ما أتوقع يبرد من جديد خلاص دخل مارس)، و الأهم أنه بعروض الموضة لخريف 2012 يعني للشتاء الجاي، تقريبا الفرو موجود بكل عرض، بكل شكل، من شال لقبات، لجاكيتات، و أكيد جاليه. 

أول ما قريت السؤال بصراحة ما جا ببالي إلا طريقة وحدة للبس الجاليه، و لا أعرف ليه ببالي دائما مرتبطة صورة الجاليه الفرو بالسبعينات. كل الفكرتين اللي جو ببالي كانوا سبعينات بوهو ... الأولى جاليه فرو مع بنطلون جينز فلير، و قميص مطبع عليه بألوان باهتة، و الثاني فستان مطبع عليه (أقرب فكرة هي لوك باند أوف أوتسايديرز). لكن تذكرت إن العروض كانت مليانه فرو، فقررت إني أناظر أفكار ثانية و أجيبها لكم. 

ما أعرف ليه، مع إني ما راح ألبس جاليه فرو بهذا الشكل، لكن أظن اللوك اللي من ألبيرتا فيراتي، هو أكثر لوك ممكن يصلح على مجموعة كبيرة من الناس ... فستان أو تنورة بنسيل، جاليه فرو مع حزام و تايت و كعب من دون أي تعقيدات، حبيت هذي الفكرة لأن ما فيها تعقيدات، سهلة، و تصلح على أجسام كثيرة، خصوصا أنه الفرو يغطي على مناطق كثيرة (لو كنت مو مرتاحة تطلعينها)، و الشيء الثاني الحزام يعطي شكل لجسمك و لا يصير كأنه كتلة وحدة. 

للي يسأل عن كيف يلبس جاليه الفرو، هذي مجموعة أفكار، جربي وشوفي وشو اللي ترتاحين له، وش يناسب ذوقك و جسمك. 

Suggestions for Pregnant Beyonce

قبل أسابيع الموضة لموسم ربيع 2012، كان فيه موضوع ببالي، وهو عن وش ممكن تلبس بيونسيه لحملها. بس قررت أأجله لبعد عروض ربيع و صيف 2012.

اليوم قررت إني أكتب عن هذا الموضوع مو لأنه طلع إشاعات أنه بيونسيه مو حامل، و حاطة شيء ببطنها علشان تسوي نفسها حامل، أصلا ما نيب مهتمة لحمل بيونسية، و لا للإشاعات، بس لما طلعت بالفستان اللي من لانفان انبسطت، و توقعت إننا بنشوف ستايل حمل حلو، لكن للأسف لا :S

قلت لكم ما يهمني إن كانت بيونسيه حامل أو طالعة بحمل كذبي، لكن كل اللي أفكر فيه، خصوصا أنه بعض الناس قالوا بعد ما طلعت حكاية حملها، أنه حملها راح يغير الموضة. 

اللي أشوفه لحد الآن، هو بيونسيه قاعدة تتهيبل بصراحة، يعني لبس ما أعرف مين قالها أنه يمكن يمشي على حامل، أعرف أنه بيونسه حلوه، و كثير يحبونها، و يحبون لبسها و جسمها، بس هذا ما يعني أنه الواحد يصدق نفسه، و يعتقد أنه ما فيه مشكلة يلبس اللي يبغى. خصوصا إذا أنت مفكر إن شكلك حلو، مو أنه مو فارقة معاك كيف يطلع شكلك. 

قلت لكم لبس بيونسيه بعد الفستان اللانفان من جرفة لدحديرة. ملابس ضيقة بشكل ما أعرف كيف. فتحات صدر مرة واسعة، فساتين نفاشة، و فساتين مفتوحة من الجوانب!! يعني من الآخر كل شيء المفروض الحامل ما تسويه، بيونسيه سوته، و كأنها تقول: أنا غير كل العالم، أنا أحلى وحدة، و أقدر أسوي كل شيء و كل شيء بيطلع حلو علي. يعني الفكرة النهائية، اللي راح آصل لها، وضع بيونسيه مو زين، لأنه يا إنها مو مستوعبة وش الحامل تسوي، أو أنها واثقة بنفسها بشكل غير صحي (و هذا لازم يتغير). و زي ما قلت لكم ما يهمني حملها صدق أو كذب، المهم إنها داخلة دور الحمل، فعلى الأقل تحاول تطلع بشكل حلو. 

مقابلات و لقاءات صحفية:

(الملابس من اليمين لليسار: روبيرتو كفالي، ماثيو ويليمسون، يونيك فور توب شوب)

شفتوا مثال من لبس "المشاوير" و اللقاءات الصباحية اللي صايره بيونسية تلبسه و هي حامل فوق بأول التدوينة. صراحة ما أعرف وش آصف لبسها فيه غير أنه مستفز، يعني تقدر تكون حلوة و أنيقة من دون ما تلبس أشياء زي كذا. حتى تقدر تلبس ألوان أحلى من الألوان اللي جالسة تلبسها.

حفلات، و حفلات توزيع جوائز:

(الفساتين من اليمين لليسار: دولتشي آن قابانا، أنتطونيو بيراردي، مايكل كورس)

زي ما قلت لكم من بعد MTV VMA ما شفت شيء يفتح النفس على بيونسيه، حتى إني شفتها بفستان من مايكل كوس كان أقل ما يقال عنه أنه كارثة. 

شرايكم ببيونسه و موضوع حملها؟ و إن كنتوا متابعين أحد معين، مين أكثر سلبرتي أعجبكم ستايل الحمل حقها؟

Men's Talk

أسابيع الموضة اللي بدأت من نيويورك طبيعي أنها تكون عن ملابس المرأة، لكن بعض العروض مثل عرض مايكل كورس يدخل فيها ملابس رجال. 

زي كل عرض أشوف صوره أحط ببالي إني راح أتكلم عن الملابس "النسائية" فيه، لكن لما شفت الصورة هذي (الأولى من اليسار) قررت إني أتكلم عن ملابس الرجال هذي المرة. 

أعرف إني قليل ما أتكلم عن ملابس الرجال، لأني زي ما قلت أكثر من مرة أنه ما يهموني كثير، لما أحس إني أبغى أتكلم، أتكلم عن شيء حتى أنا ممكن ألبسه أو أسويه، و بالنسبة لي من أكثر الأشياء اللي أحبها بالفاشن الآن، أنه فيه أشياء كثيرة صارت تصلح للجنسين، لأني ما أعرف ليه بعض الأشياء يقرر الناس إنها خاصة بالرجال، أو خاصة بالنساء (مثل التنورة أو الوزرة) يعني فيه ناس كثيرة يلبس فيها الرجال وزرة، أو مثل حالتنا ثوب (أخو الفستان)، أو تنورة زي الإسكتلنديين، مع ذلك ما نشوف شيء زي كذا بمحلات و أقسام ملابس الرجال. 

يمكن العكس أقل، من زمان و الجاكيتات و البدلات الرسمية (مثلا) داخلة من زمان على ملابس النساء. أرجع فيكم للعرض، زي ما قلت لكم أعجبني اللبس الأول من اليسار ألوانه حلوة، كيف إن شكله "مكروف" عجبني كثير، أظن أنه حلو للرجال (أعرف قليل راح يلبسونه)، بس لو بنت قررت تلبسه أظن إنها بس تحتاج تلبس معاه إكسسوار ذهبي (سلاسل مثلا) و بيطلع لبس مرة حلو، خصوصا لطلعة بسيطة. 

الشناط من أكثر الأشياء اللي يمكن تنلبس من الجنسين، حبيت شكلها، و إنها واقفة، ذكرتني شوي بشنطة ذا رو، اللي ما زقدر عليها، بس بأقل آناقة.

آخر شيء الجاكيت الجلد، تمويجه عجبني مرة، أحسه شوي كبير (على مرأة)، بس يمكن مع قميص حرير أوف وايت خفيف، و شورت جينز بيطلع مرة حلو (على مرأة).