Showtime

يمكن قليل اللي يعرفون عني هذا الشيء (يمكن بس صديقاتي بذاك الوقت، و أختي الكبيرة)، لكن بفترة من الفترات كان عندي هوس "ستيانات"، أعرف أنه شيء غريب، و يمكن هذا مو المكان "المناسب" إن أعلن فيه عن الهوس هذا، بس على إني أعتقد إني تجاوزته، أظن أنه كل مرة أشوف ستيانة حلوة أتمنى لو إنها عندي، أو حتى لو شفت ستاينة حلوة، أتمنى أنه ممكن شيء مصنوع بهذا الشكل كمية أكبر من الناس تشوفه P:. 

هوس تجميع ستيانات كان عندي لما كنت بالمتوسط، لدرجة أعتقد إن أمي بدأت تقلل علي، و صارت كل مرة ترجع الأشياء اللي جمعتها عند الكاشير. خف بعدها هوس التجميع، بس أتذكر من أكثر المجموعات اللي أتذكرها (أول ما تعرفت علي الفاشن و العروض بشكل فاهم) كان عرض لدي آن جي. 

أكيد إني ما كنت بالمتوسط (لأني لما رجعت أدور على المجموعة تاريخهاكان بعد المتوسط)، أتذكر إن كل العارضات كانت ستياناتهم واضحة بشكل و بآخر. أتذكر عجبتني أشكالهم، بس قلت ممكن أحد يلبس كذا للشارع؟ ما أتذكر وقتها أحد لبس، بس علشان أكون واضحة، ما أتذكر إني كنت أتابع أو أصلا كان فيه مواقع قوسيب تتابع السلبرتي قد كذا، فما أعرف لو أحد لبسها و لا تصور، أو أنا ما شفت الصورة، غير إني ما كنت أتابع أصلا. (تلقون المجموعة هنا). 

من اليسار: قبل فترة (يمكن شهر) بحملة ترويج فيلمها الجديد ستار ترك زوي سالدانا لبست هذي الجمب سوت البيضاء من إيلي صعب، و كانت لابسة ستيانة واضحة، بعدها بفترة كارا دوليفين طلعت بعد ميت قالا لابسة هذي البدلة من ستيلا، نفس الموضوع طالعة بستيانة دانتيل واضحة. أمس شفت هذي الصورة (يمين) لنيكول ريتشي، بهذي الجمب سوت بعد من جي براند، ولابسة "البرا توب" الأسود هذا مع الجمب سوت. 

إيش رايكم بالتريند هذا؟ ممكن تلبسونه، أو تعتقدون أنه "ما يصلح" لنا؟

Met Gala 2013: Hair Trend

من الأشياء اللي كانت أمس تقريبا على كلن هو خصل ملونة (بالمناسبة، إذا هذا التصرف بنك، ودي أقولكم أختي بنك) . أعجبني الشكل بالذات على ديان كروقر لأنه لبسها مرة فخم (لابسة شانيل أوت كتور، و الفستان واحد من الفساتين اللي تمنيت أشوفها بالأوسكار). المهم ما أبغى أطول، بس من بين أكثر الأشخاص اللي عجبني شكلهم كانت نيكول ريتشي بشعره الأبيض (كامل). 

إذا كنتوا حابين الفكرة، و لا تبغون تصبغون شعوركم صدق، و لا تعرفون من ين تحطون خصل ملونة، هذا تيتوريال سريع كيف تسوون شعركم كذا ملون. بللوا أطراف الشعر (أو خصلة كاملة إذا تبغون) و مرروا عليها ألوان باستيل (اللون اللي تبغون و أكثر من مره علشان يقوى اللون) و بيمسك اللون على الشعر (طبعا يروح لما تتروشون). 

ملعومة جانبية علشان ما تقولون لي ما نفع، كل ما كان الشعر أفتح كل ما وضح عليه اللون أكثر. 

إيش رأيكم بالشعر الملون؟ 

Best Dressed: April 2013

أقدر أختصر الشهر هذا أنه شهر الملابس السوداء (مع أنه المفترض إننا خلاص بالربيع). ما عندي أعتراض على اللون الأسود، خصوصا لما يكون حلو، و أقدر أقول إني مبسوطة على تقريبا على كل اللي طلعوا لابسين أسود بشهر مارس. 

بشكل عام أقدر أقول إن كل الخيارات لهذا الشهر كانت "راقية"، و لما أقول راقية قصدي ملابس سهرات، ما عادا سولانج بالبنطلون اللي عليه طبعات سحاب من مايكل كورس.
مرة ثانية أولقا تدخل القائمة هذي المرة بفستان "بيبي بلو" من إيلي صعب. و بعد ديور يرجع من جديد للقائمة، بعد ما كان موجود بياناير و فبراير، و هذي المرة مع لي لي سوبيسكي، بتنورة سوداء من المجموعة الأخيرة لديور، و تيشيرت أبيض.

أخر شيء متحمسة مرة لشهر مايو، خصوصا إن فيه ميت قالا و قريت قاتسبي و مهرجان كان. أنتم صوتوا و علموني وش أكثر شيء عجبكم.

Create your free online surveys with SurveyMonkey , the world's leading questionnaire tool.

High Waisted Jeans

ما عمري أنكرت إني سريعة التأثر، يعني ممكن أشوف صورة تعجبني أقرر إني ودي بهذا الشيء. ما عمره ما صار عندي بنطالون جينز، الجينز بالنسبة لي منقذ. ممكن يكون لبس كل يوم، ممكن يصير لبس حفلات، باختصار يصير كل شيء، و أهم شيء عندي أنه يتحمل، و لو ينلبس كل يوم (طبعا مع توب مختلف) ما فيه أحد بيقول جالسة تكرر لبسة. 

ما عمره صار عندي أكثر من ثلاث بناطيل جينز (صالحة للاستعمال) بنفس الوقت (أظن كذا). جربت ألوان كثيرة، و أشكال كثيرة، بس شيئين ما جربيتهم هو الهاي ويستيد جينز و لا الفلاير (اللي وسيع من تحت). 

بالأسبوع اللي فات شفت هذي الصورتين ليوليانا سيرجينكو و نيكول ريتشي بهاي ويستيد جينز (و نيكول جينزها فلاير بعد). غير أنه هاي ويستيد، الثنتين كلهم لابسينه مع تي شيرت  أو تانك عادي ما فيها أي شيء (من زمان و أنا أحب التي شيرتات الرمادية). المهم الصورتين هذولي حمسوني إني أشوف لي جينز بخصر مرتفع (إلى الآن ما أظن إن عندي رغبة بتجريب الفلاير حتى لو كان شكله حلو على نيكول). اللي حمسني زيادة، هو لو ما عجبني شكل الهاي ويست، بسهولة ما ألبس معاه توب قصير، و لا أدخل التوب جوا البنطلون، و على الأغلب ما راح أحد يدري أنه هاي ويست. 

وش رأيكم بالجينز الهاي ويست؟ ممكن تلبسونه؟ أو عندكم أصلا؟

The Unbearable Lightness of Being

أعرف إني قلت لكم أكتب عن أسبوع الموضة بنيويورك، بس ما أعرف وش جاني، أحس أني كل شيء أشوفه (إلا قليل) ما يبهرني أبدا. مو شين، لكن ما أحسه جديد، و أهم شيء أحس كأنها ملابس خريف مو صيف. ما علينا أوعدكم إني راح أتكلم عن واحد من عروض نيويورك اليوم (وقت ثاني من اليوم). بس أول اسمحوا لي أحط هذي الصورة هنا علشان أقدر أقفل المتصفح :).

من يوم ما شفت الصورة هذي قبل يمكن يومين أو أكثر، و أنا مو قادرة أسكرها، كذا غصب علي. أعرف إني المفروض إن كايت هادسون ما تشكل عندي مرة، و أعرف أنه المفروض يكون "فستان أسود عادي". لكن المشكلة إني عجزت أشوف أنه عادي. عاجبني مرة، من الطلات اللي لا شفتها أصير زي الطفل، أبغى زيها.

أعترف إني من فترة و أنا أعتقد أن كايت صايرة مرة حلوة، بس مو هذا السبب، مع أنه ما عجبتني الجزم، لكن كل ما شفت سيور الفستان ودي أصيح، أو على الأقل أبغى زيه فيه شيء تسعيني فيه (يمكن قوينث بالترو أو كايت موس لبسوا زيه بالتسعينات).

أمس شفت هذا اللقاء لكايت، ما أعرف ليه أحس إنها خفيفة، و دايم مبسوطة، ذايم لقاءاتها حتى لو كنت لحالي أبتسم و أنا أشوفها. أهم شيء إنها كانت لابسة وينتر كايت (ماركة نيكول ريتشي). و عندها أكثر من قطعة منها.

بالحديث عن وينتر كايت و نيكول ريتشي (بالمناسبة كلهم على الأقل فترة كانوا زباين لريتشل زو). نيكول مسوية تعاون مع مايسيز إيمبولس و المجموعة طلعت. لو تقدرون تآصلون لمايسيز و عجتكم الأشياء، لا تفوتونها (هنا تلقون الممجموعة). 

Mixed Prints

لو بس سألتوني قبل 5 سنوات وش رأيي بنيكول ريتشي كان يمكن قلت لكم من هي نيكول ريتشي؟!! مو لأني ما أعرفها، لكن لأنه الشيء الوحيد اللي أعرفها فيه وقتها، غير إنها بنت ليونيل ريتشي، إنها جالسة تسوي برنامج تافه مع باريس هيلتون، يكفيني إنها صديقة باريس هيلتن علشان أقرر إنها تافة ذاك الوقت.

الحين نيكول ريتشي مو هي نفسها اللي كل يوم طايحة بفضيحة، أم و عندها ماركة ملابس و ماركة إكسسوار، مو دائما يعجبني لبسها، لكنها على الأقل على ما يبدو لي صار لها هدف بالحياة غير الصياعة :).

أمس شفت هذي الصورة لنيكول، ما أعرف وين رايحة. قلت لكم فوق مو دايم يعجبني شكلها، لكن هذي المرة عجبني شكلها قوة، عجبني إنها أختارت الشيء الفوقي و الشيء التحتي نفس الألوان بس النقشات مختلفة مرة. حبيت لون الجزم مع اللبس أعطى روح للبس. أعتقد مع وجود الطبعات بكل مكان بملابس هذا الصيف، ودي ألبس الطبعات بالطريقة هذي (نفس الألوان، نقشات مختلفة). أفكر أشوف لي لبس عليه طبعات إستوائية (من زمان عاجبتني)، و ألوانها تتشابه. (من زمان ما أحس أنه لبس أحد حفزني إني أروح الحين و أشتري لبس يشبه لبسه). 

شرايكم بالطبعات للصيف؟ و شرايكم بخلط طبعات مختلفة بالنفس اللون مع بعض؟

Boho

قبل تدوينتين يمكن، تكلمت لكم عن ريتشيل زو، و الكوليكشين الريزورت حقها، قلت لكم بذيك التدوينة إني ما أحبها، و علشان تعرفون أنه خطأ الواحد يصدر أحكام من دون ما يعرف عن الشخص أكثر :)، أنا طحت بهذا الخطأ، و ريتشيل مو هي الوحيدة الي بنيت تصور عنها قبل لا أشوفها، و أعرف كيف تتصرف.
كنت قبل أسبوع تقريبا فاتحة اليوتيوب الصفح الرئيسة، و اقترح علي اليوتيوب مقطع من برنامجها، المقطع كان قصير بس حمسني إني أنزله، نزلته، و أعجبني، و ما أقول إني بديت أحبها، بس كثير من الأسباب الي كانت تخليني ما أحبها أكتشفت إنها أشياء أنا متخيلتها، أو بانيتها من كلام مواقع القوسيب.
ما يهم نجي للي لكلام اليوم، و هو هذي الصورة اللي شفتها لنيكول ريتشي، و هي طالعة من بيت وحدة من صديقاتها، أعجبني شكلها كثير، حسيته مريح، مع إني شفت ناس يسبونها، بس ما يهم، أنا أحب الأشياء المريحة، و اللي أحس فيها إني ما لبست شيء، خصوصا بالصيف.

Rachel & Nicole by alorwa featuring chunky beaded necklaces

Tibi maxi dress, $770
Camper shoes, 180 CAD
Bex Rox chunky beaded necklace, £245
Ileana Makri gold ring, £4,250
Chain necklace, £569
Hair accessory, £18
TopShop round sunglasses, $45

و أنا أشوف البرنامج، عرفت أشياء كثيرة عن ريتشيل ما كنت أعرفها قبل، أهم شيئين: إنها تحب الفينتاج و تحب المجوهرات. صحيح إلى الآن كثير من لبسها أو اللوك النهائي حقها ما يعجبني، بس بعد ما شفت البرنامج أكتشفت إن عندها قطع بذات فنتاج تخليني ودي الحين أسرق بيتها.
من جهة ثانية نيكول ريتشي (و اللي كانت وحدة من زباين ريتشيل، و الحين صديقتها) تحب كثير ستايل "البوهو"، حتى أنه خط المجوهرات و خط الملابس حقها كلهم تشوفون فيه تأثير البوهو و الستينات.
اللوك اللي اخترته قلت لكم أخترته بتأثير الثنتين، أخترت فستان أبيض، ستايل ستينات (بوهو)، و عمامة زي نيكول تقريبا، و أخترت إني أكثر المجوهرات (و بالعادة ما زسوي كذا بالحياة الحقيقية)، لكن هذا من تأثير ريتشيل علي، خصوصا و إني لما أشوفها أحسها بتطيح على وجهها من كثر المجوهرات، و أهم شيء أخترت سلسال شانيل فينتاج علشان أعطي شعور (ريتشيل زو).
الجزمة أخترت هذي الجزمة الفلات، مع إني ما أحب تطقيم الألوان خصوصا الملابس مع الجزم، بس هذي الجزم أعجبتني مرة، مع إني ما أحب أقول هذي الكلمة، بس إنها كيوت. 

Which Team Kate Would Join

السنة هذي شكلها سنة الزواجات. أنبسط كثير على موضوع الزوجات، أحب حفل الزواج المنظم و شكله حلو، و جديد. زي ما قلت لكم أقل من شهر و وليم ولد ولي عهد بريطانيا راح يتزوج خطيبته كايت ميدلتون اللي نشف ريقها من عشر سنين.

علشان هذا الزواج كل العالم هابة، كأنه ما تزوج غيرهم، زي ما قلت مليون مرة مع إني أحسه بيكون زواج بايخ. المهم Vogue UK طلعت عدد مايو كله تقريبا خاص بهذا الزواج، وسوت الإيدتوريال اللي فوق، و علشان أوفر عليكم صراحة الإيدتوريال بايخ، بس أنا جبت صور منه علشان قضية وحدة، خصوصا لما شفت الفستان الأوت كتو الديور الموف (أكيد يمين)، و جا ببالي هل ممكن تلبس كايت لون غير الأبيض و درجاته؟ أشك.

السنة هذي كان فيه زوجين للسلبرتي الأول (اليسار) زواج نيكول ريتشي، و لبست فستان فيه من ماركيزا، الفستان أبيض زي ما تشوفون، و يميل كثير للكلاسيكي. أساسا نيكول كانت تبغى فستان مستوحى من فستان قريس كيللي اللي تزوجت رينيه أمير موناكو.

الزواج الثاني هو زواج ريز ويذيرسبون الثاني، تزوجت بفستان وردي من مونيك لولير، كفكرة أنا أساسا ما يدخل مزاجي إلا الأبيض و درجاته، لكن على قلة الصور اللي شفتها لها (جلست أنتظر و عيا يطلع مع الناس صور زيادة) أعجبني شكلها (لولا شريطة وردية عند الخصر) بس أكثر شيء عجبني بالموضوع إنها لبست طرحة بيضاء مع الفستان، طلع شكلها مرة رايق. و هذا نفس الشيء اللي مسويته فوق مع الفستان الموف، ملبسه الموديل طرحة بيضاء.

أنا ما أتوقع بتلبس من أي وحدة من المصممتين مونيك أمريكية، و ماركيزا هي مصممة بريطانية، بس دار الأزياء مكانها نيويورك، و الغالب إن كايت بتلبس لبريطانيين (أو الأكيد).
الشيء الثاني ما أتوقع بعد تلبس لون مو تقليدي، لأن الزواجات الملكية الأوربية اللي قبلها كلها كانت أبيض: ماري أوف دينامارك، ميته مرييت أوف نوريج و آخر وحده الصيف اللي فات هي ولية عهد السويد فكتوريا.
و آخر شيء أتوقع أكيد ماراح تلبس شيء يشبه فستان ديانا، مو لأنه قديم، لأنه بيكون شكلها مثير للشفقة لو جلست تنسخ دايانا من جديد، خصوصا أنه خاتم الخطوبة، هو خاتم خطوبة ديانا.

لاحظتوا كل الزواجات الملكية ما فيها سترابليس، و أكثر شيء مكشوف كانت فيكتوريا، تتوقعون تلبس كايت سترابليس، أو من دون أكمام؟ بالنسبة لي لا. 

Harness on the Cover

نيكول ريتشي على غلاف وحده من المجلات اللي ما أعرف وشي :) بس المهم أنه شكلها حلو. ما يهمني شكل نيكول، و لا وش قايلة للمجلة، بس أكثر شيء أنا مهتمة فيه، هو هذا الحزام أو السرج (ما عجبتني التسمية، بس كذا ترجمتها عن الإنجليزي).
أول مرة شفت هذا الشيء أو انتهبت له كان بعرض إيرميس لربيع 2011 عجبني مرة، و لو كنتوا متابعين دخلته بقائمتي لأحسن الأشياء اللي كانت بإسبوع باريس.
إيرميس ما كان الوحيد بعرض لانفان بعد ربيع 2011 كان فيه بعد هذي الأحزمة، و مو بس كانت بالعرض لبسوها سلبرتيز، و طلعت على غلاف مجلات.

قبل يومين و قبل ما أشوف غلاف نيكول، جا ببالي من جديد، و قلت بأروح أدور عليها بـ asos لو كانوا مسوين نسخ منها، كعادة أسوس مل يخيبون ظني و لقيت الحزلمين هذولي. (اللي على اليمين أعجبني مرة)، و بعد أرخص من اللي على اليسار.
اللي على اليسار سعره بـ 182 ريال، أما اللي علي اليمين بـ 90 ريال.
أظن أنه إكسسوار ممكن يغير كثير باللبس، و علشان تعرفون أنه حلو و يستاهل هذي صورة لهانا قابي (عارضة بلجيكية) لبسته مع سبورت برا (أعرف ما راح تلبسونه كذا) بس ممكن تشوفون كيف يغير اللبس من لبس عادي، للبس ملفت.

HC Shades

قلت لكم إني راح أتكلم عن عروض الأوت كتو اللي كانت بباريس قبل إسبوعين أو أكثر بشكل متفرق كل ما جت مناسبة ... و بعد ما شفت هذي الصورة من باكستايج حق عرض جان بول قوتييه قررت أكتب لكم عن النظارات اللي كانت بالعرض.

عرض جان بول قوتييه كان حلو، قلت لكم أنه ما فيه أحد حسيته كذا دفعني إني أكتب بقوة، يعني عرضة الأوت كتو للخريف كان بالنسبة لي أحلى ... ما علينا أول ما شفت العرض و شفت النظارات ذكرتني بنظارات لانفان من إتش آن إم، و هي تقريبا الشي الوحيد اللي من المجموعة كان و مازال بخاضر قوة، بس ما يطاوعني قلبي أشتريها بمية دولار أو أكثر، و أنا أعرف أنه لما كانت معروضة بالمحل كان سعرها 12  دولار بس.

طبعا اللي خلاني أرجع أكتب عن موضوع نظارات عرض جان بول قوتييه هي الصورة الحلوة هذي، و الكلوليكشين الجديد من نظارات ماركة نيكول ريتشي هاوس أوف هارلو.

للي يعرفني، أو متابعني من زمان، كان عندي هوس غير طبيعي بالنظارات الشمسية، بكل أشكالها، و أحجامها، خق الهوس الحمد لله، بس لما شفت النظارات لانفان لإتش آن إم (فوق على اليسار) زي ما قلت لكم، تولعت فيها، عجبني حجمها و إنها كلها سوداء، طبعا و لأنه ما عندنا إتش آن إم تريند فما قدرت أشتري شي، و قلت نستنى لحد ما أحد يعرضها للبيع علي إي باي، إنعرضت بس الناس حرمية، يطلبون فيها أسعار خيالية.

قبل يومين شفت برومو لمجموعة هاوس إوف هارلو الجديدة للنظارات الشمسية، للي ما يعرف وشي هذي هاوس أوف هارلو، هي ماركة مجوهرات سوتها نيكول ريتشي، من أول مجموعة و أنا حابة المجوهرات، بس توي أنتبه لمجموعة النظارات، و أعجبوني قوة. فيهم تقريبا نفس فكرة جان بول قوتييه و لانفان إتش آن إم: كلبرة، و فريم و عدسات سوداء ... يعني من الآخر إذا تبغين نظارات كتو أعتقدي هذا الشكل أحسن خيار.

إن كنتوا تبغون تشترون من نظارات هاوس أوف هارلو، هنا تنباع. 

Weekend Wedding

الويك إيند هذا زواج نيكول رتشي ... أحس إنها راح تسوي شي حلو مره، أو شي بايخ مره، الي عرفته أنها راح تلبس من ماركيزا، أحسه شي خاص فيها مو موجود من الكوليكشين الأخير ... بس لو كنت باختار أنا منه كنت راح أختار هذا الفستان:

الفستان من أول ما شفته عجبني، و على طول فكرت فيه أنه يصلح لزواج، يمكن أكثر شي عجبني فيه أنه يشبه لبس أودري هذا الي ب My Fair Lady و تعرفون أنه أنا زي كل بنات العالم أحب أودري هابيرون.

هذا الموضوع خلاني أجيب طاري موضوع ثاني من زمان بخاطري بس مستحية منكم لأنه بتقولون الحمد لله على النعمة.

المهم الي بقوله ... قبل تقريبا أسبوعين حلمت حلم سخيف، حلمت أنه مجلة أزياء (ما أعرف أي وحده) طلبت مني إنهم يصورون زواجي، قلت لهم إني تزوجت و خلصت، بس إذا ما عندكم مشكلة أسوي زواج ثاني ... المهم قمت من النوم قبل ما أفكر كيف شكل الزواج الكذبي الي راح يصورونه لي المجلة ... و جلست أفكر، ما أبغى أعيد زواجي الأصلي صح مو شين يعني شين، بس مو واااو لدرجة أنه أبغى مجلة تصوره (دايم تصير لما نبغى شي يطلع حلو مستحيل يطلع زي اللي ببالنا) بس هذي المره ما راح أشيل هم لأني راح آخذ فلوس من المجلة ... جلست أفكر وشو ثيم الزواج أول شي فكرت فيه هذا الفستان ، الفستان من مجموعة أليكساندير ماكوين الأخيرة ... على طول حسيت إني أبغى أسوي زواج بالغابة (أعرف أنرحم) حتى تراني سويت بحث عن الكاسات الي بتنحط على الطولات ... أبغى أقدم حلويات ألمانية أحسها تمشي مره مو زي الفرنسية، يعني الألمانية حلو طعمها بس شكلها حوسة، و أكثرها ألوانها غانقة، مو زي الفرنسية ملونة، يعني بتلبق على الغابة، و أكيد أبغى بوكيه الورود فيه برية ...

الي يبي يجي زواجي الثاني الكذبي الله يحييه بس شرط يدفع قطه، و القطة تبدأ بألف ريال P:

Watch&Learn

هذولي ثنتين بنفس المدينة طلعوا أمس ... كلهم عندهم فلوس، بس المشكلة مو كلهم عندهم ذوق، أول ما شفت شفت برتني ... أولا عندي أنا سؤال لم يطحوون الناس بشي، قصدي موضه، ما أعرف مين قال لبعض الناس، ترا أي شي الناس يطفون فيه لازم أنت تسويه، حتى لو شكل بايخ فيه ... النظارة الطبية صايره موضة، و بالأخص النظارات بإطارات سودا كبيره ... كل من هب و دب لبسها، حلوه عليه و لا مو حلوه ... لابقه على اللوك و لا مو لابقه، كأنهم يقولون لابسينها لا بسينها ....

برتني سبيرز كارثه من الأول للآخر ... شعرها مو حلو فستانها ما أعرف إيش معناه (يعين طالعه تتمشيين بفستان سترابليس؟) .. الشنطة سخيفه مررررره و لا لابقة على الملابس ... الجزم كأنها طقم مع الفستان ... أما النظارات عذي الي مالها محل باللوك أبدا ... يعني فستان لابسه معاه نظارات؟!!! ولا مو أي فستان ... فستان حق حفلات نهار، و نظارات سودا كبيرة ؟!!!!

على الجهة الثانية نيكول ريتشي ..، نيكول من بعد ما صبغت شعرها أسود و أنا حابتها، اللون طالع عليها ذووووووق ..... القصه حلوه، النظارات الشانيل تجنن ... تنورتها حلوه، حلو لما تلبس هذا التايت الغامق، و ماشيه مره مع الشنطة البلانسياقا مع إني مو مره مع هذي الشنطة، بس طالعه حلوه ... حلو التوب الرمادي مع كل هذا اللوك و خصوصا و هي حاطه هذا لاشي الأحمر، ما أعرف شال أو كنزه، جزمها عاطيه اللوك ختمه حلوه ما أعرف إيش بس عجبني إنها لابسة فلات سودا (اللوك يصلح نيويورك).