Happily Ever After

ريم عكرا إن كنتوا متابعين بالسنوات الأخيرة صارت اسم ثابت على الريدكاربيت، على الأقل لو تطلع بخمسة فساتين على الريدكاربيت بالسنة. و على عكس المجموعتين اللي فاتت، هذي المرة الملابس مرة كلاسيكية، كلاسيكية لدرجة كأنها طالعة من مسرحية أو فيلم تاريخي. يمكن هذا تأثر بأفلام هوليوود الفترة الأخيرة من مليفسينت و إنتو ذا وودز، و الحين سيندريلا. 

مع أنه الملابس زي ما قلت لكم قبل ما كأنها تشبه المجموعات اللي فاتت، لكن عاجبني التغيير، زي ما قلت لكم الملابس كأنها من مسرحية، بعض الملابس النتيجة شوي رخيصة (على الأقل من الصور)، لكن فيه قطع ثانية مرة عجبتني، مثل الفستان القصير (الثاني من اليمين)، أحسه بيكون حلو على ليلي كولينز. الفستان الأسود أحسه بيكون حلو على إيما ستون (مع إني أشك إنها راح تلبسه)، أما الفستان الأبيض الأخير، هذا فستان عروس، أعرف بنات كثير لبسوا لريم عكرا بزواجهم (التصميم التقليدي لها، الكم اللي فيه كريستالات) ما أقول إن ذاك مو حلو، بس صراحة أعتقد إنه لطيف بس مو مميز، لكن هذا يستاهل يكون على عروس. 

وش رأيكم بريم عكرا هذي المرة؟ ووش رأيكم بالفستان الأبيض (الأوف وايت) كفستان زواج؟ 

Brides in Couture

ما فيه زواج معين ببالي (زواج مشاهير) علشان أتمنى أنه أحد يلبس من هذي الفساتين شيء (أعرف أنه أوليفيا وايلد بتتزوج، و أندريا كاسيراقي ممكن يتزوج، و يمكن كيم كرداشيان بعد) بس كلهم ما يهموني (طبعا من ناحية الملابس و وش ممكن راح يلبسون لزواجاتهم) يمكن الشخص الوحيد اللي بيهمني أعرف وش راح يلبس هي شارلوت كاسيراقي لو قررت تتزوج (مع أنه الغالب راح تلبس شانيل) ما علينا، بس بعد ما شفت عرض أرماني برافي، حسيت ودي أحط صور للفساتين اللي كانت بعروض الأوت كتور و ودي لو أشوف أحد لابسها كفستان زواج. 

(جامباتيستا فالي، فالنتينو، إيلي صعب، يوليانا سيرقينكو، مارقيلا، أرماني برافي) 

 زي ما قلت لكم إن عرض أرماني برافي هو اللي حمسني إني أكتب و أختار فساتين أعتقد إنه تصلح فساتين عرايس من عروض الأوت كتور لخريف 2013 (الفستان اللي أقصى اليسار من عرض أرماني). بالبداية زي ما قلت لكم عجبني مرة عرض جامباتيستا فالي كان فيه فساتين كثير بيضاء، بس حبيت أختار هذا (الأول من اليمين) من العرض لأنه ذكرني بفستان زواج جيسيكا بيل اللي ما أعجبني و كان من تصميم جامباتيستا فالي (بس لو انتظرت سنة علشان تلبس هذا ما دام بخاطرها فستان وردي P:). 

أعجبني فستان إيلي صعب (الثالث من اليمين) اللي كأنه رداء (كايب). شفنا الفترة اللي فاتت كثير بمناسبات رسمية أحد يلبس كايب من ساره جيسيكا باركر، شارلوت كاسيراقي، موزة المسند، و آخر شيء ملكة هولندا. حبيت بعد فستان مايسون مارتين مارقيلا (الثاني من اليسار) حسيت فيه شيء فينتاج، أحب الفساتين الفينتاج بذات لما يكون شكلها كأنه "مهترية" زي هذا الفستان. 

وشو فستانكم المفضل (كفستان زواج)  من هذي الخيارات أو من أي فستان عرض بمجموعات أوت كتور خريف 2013؟

Wedding Fever

بداية الأسبوع طلعت صور مسربة لزواج آن هاثواي (اللي ما كنت أعرف إنها بتتزوج قريب) (كانت لابسة فالنتينو). قبلها طلع خبر إن بلايك لايفلي تزوجت و لبست لزواجها من ماركيزا (بالمناسبة صور زواجها بتطلع على مجلة Wedding حقت مارثا ستيوارت أظن بالشهر هذا). و بعد بداية الأسبوع كان أكثر موضوع قراءة هو موضوع Weekend Wedding، اللي كتبته علشان زواج نيكول ريتشي السنة اللي فاتت. 

بس قبل لا أبدأ الموضوع كان هذا الموضوع ببالي من أسبوع الموضة بنيويورك بس قلت باستنى لحد ما يخلص باريس، علشان أشوف أكبر عدد من العروض. 

بصراحة متحمسة أشوف صور زواج بلايك، و بعد ودي أشوف صور أحسن لزواج آن هاثوي، ما أعرف ليه أتحمس لصور الزوجات مرة. الشيء اللي يحبطني دائما، على كثير ما رحت لزواجات ما أعرف ليه العالم تختار نفس الفساتين من جديد، بجد كثير زواجات ما أتذكر بالضبط فستان العروس (مع إني أختار مكان "ستراتيجي" وقت الزفة)، بس بطريقة ما، يصيرون كلهم نفس الشكل: فستان أبيض سترابليس نافش ؟!!!. و لأني ودي بجد أشوف "عرايس" بأشكال مختلفة، أخترت من العروض الفساتين، اللي ودي لو رحت لزواج أشوفها على العروس. 

(من اليمين لليسار: أوسكار دي لا رينتا، فيفيان ويستوود، ماركيزا)

عرض مار كيزا من أول العروض بنيويورك من أول ما شفت هذا الفستان (الأول من اليسار) طحت بغرامة، و عجزت أفكر فيه إلا أنه فستان زواج. أعتقد لو أحد خلاني الحين أختار فستان زواجه ما راح أفكر بفستان غير هذا، و لو كان بيدي خليتها تلبسه بالغصب. عيا يجي ببالي أحد ما يمكن يطلع عليه الفستان هذا حلو. فستان أوسكار دي لا رينتا أتمنى أشوفه مع طرحة بيضاء طويلة ما فيها أي شيء. أما فيفيان ويستوود أعرف أنه تقريبا مستحيل أروح لزواج فيه أحد لابس زي كذا، من زمان و أنا تفتني صور الزواجات الريفية، اللي الوحدة فيه كأنها قررت الحين بس تتزوج، طبعا حلاوة هذا الفستان مع جو ريفي كامل، مو داخل قاعة بألوان بنفسجية (متعقدة). 

(من اليمين لليسار: آندرو قن، فالنتينو، ريك أوينز)

ما أعرف وش السبب بس إلى الآن ما حضرت زواج قررت فيه العروس إنها ما تلبس فيه نفاش! أعجبني فستان فالنتينو، فيه كل شيء كلاسيكي (اللون، التطريز، حتى التصميم ما فيه أي تعقيد) لكنه راقي. أعرف إني بحياتي مو بس ما راح أحضر، ما راح أشوف أحد بهذا الريك أوينز، لكن هذا ما يمنع إني أحلم إني أشوف عروس لابسة هذا الفستان معها بوكية من الورد البيضاء الصغيرة اللي تحط بالبوكيهات اسمها (baby's breath). ما أعرف إذا ودي أحضر زواج ملكي أو أصلا ما يهمني، بس ودي بجد أشوف وحدة ما لبست سترابليس، علشان كذا لو رحت لزواج العروس لابسة فيه زي فستان أندرو قن أكيد بأكون مبسوطة، و باتذكر شكل فستانها بعد ما يخلص الزواج (و الله ما أفهم إنك تدفعين فلوس كثيرة على فستان ما فيه أحد بيتذكر شكله). 

وشو الفستان اللي أعجبكم؟ و قد رحتوا لزواج إلى الآن تتذكرون فستان العروس؟

Unending Wedding Season

السنة هذي من الربيع إلى قبل أسبوع و العالم زواج ورا زواج، ما أقصد الناس العادية اللي أعرفهم، لكن المشاهير، من نيكول ريتشي، ريس ويذيرسبون و ليم و كايت (أعرف طفشتوا منهم) إلى كايت موس. القائمة طويلة، لكن اختصرتهم بهذولا، لأنه مو هذي هي الفكرة. زي ما قلت لكم بدأ أسبوع الموضة بنيويورك، و الشيء اللي أحبه بنيويورك، أنه تقريبا كل سنة أشوف اسم جديد طالع، و هذي المرة قبل لا يبدون الكبار يعرضون، شفت هذا العرض، لماركة أول مرة أسمع فيها اسمها: إميتاشين أوف كرايست. 

العرض كان على شكل زواج، أو هو زواج خلته المصممة عرض، ما أعرف بس أرجح الفكرة الأولى، أنه العرض على شكل زواج، المهم العرض أو الزواج كان كله ملابس من العشرينات فترة الجاز و فساتين الفلابير، كثير فساتين حبيتها من العرض، بس أكثر شيء حبيته، أنه الفساتين اللي كانت بالعرض، مو بس تصميمها قديم، هي كأنها فينتاج، شيء تبغين تسرقينه على طول، لو شفتيه قدامك. 

الزواج بطابع قديم كان شكله الموضة هذا الصيف من زواج ليلي آلين، و زواج وحدة إسبانية اكتشفتها بالصدفة (شكلها بالزواج مرة حلو) و آخر شيء كايت موس، تلقون صورها هنا عد فوق. 

زي ما قلت لكم العرض/الزواج كان كله فلابير، مو شيء جديد، بس فيه أناقة، و حس قديم مرة حلو، أعجبتني فساتين كثيرة، لكن أكثر واحد حبيته، و هو اللي بيخليني مجرمة و أسرق الفستان الثاني من اليسار، الموجود بالصورة الأولى من اليسار (هم عارضتين وحدة سوداء، و وحدة بيضاء، اللي على البيضاء هو اللي عاجبني. 

هنا شيكوا على باقي المجموعة، و قولوا لي رايكم بالعرض، و بهذي النوعية من الفساتين (اللي شكلها فينتاج)؟.

Headwear Master

إلى الآن ما فيه أحد لبس من شانيل مجموعة الريزورت (متعشمة بكيرستين)، المهم أصلا شانيل مو كثير بهذا المهرجان، أظن أنه ما نلبس إلا مرتين. المهم أمس أظن أنه كان يوم إيلي صعب، على الأقل ثلاثة كانوا لابسات إيلي.
السنة هذي شكل كل العالم صاروا مدعوين، و أمس ببريمير واحد من الأفلام كان فيه آنا ديلو روسو ... قد قلت لكم عنها قبل.

صحيح الهدف من هذا البوست إني أحط شيء عجبني، بس لازم أتكلم عن مكنونات قلبي ... فأول شيء باشتم بعدين نتحول للفكرة الأساسية. آنا ديلو روسو تدخل عندي من ضمن قائمة أسميها "بيتاتيك" مالها شغل بـ بتيت، الكلمة تعني بالفرنسي مثير للشفقة. آنا مثال على الإنسان اللي يحسب إن قيمته بملابسه، لذا كثير مرات أشوفها مهرج، أكثر من إنها وحده تعرف تلبس ... خصوصا لما أقرأ مقابلاتها، تأكد لي إن عقلها فاضي.
أهم شيء نجي للبس اللي قدامنا، بالأساس الهدف من الصورة هو الشيء اللي تحطه على رأسها، و هي طايحة بهذا الشيء إنها تلبس شيء على رأسها، ما أعرف من وين تجيب هذي الأشياء خصوصا إنها ما تحب أحد يسوي زيها، بس هذا الشيء اللي على شكل حزمة سنابل أعجبني مرة، حسيته مع الفستان (اللي بعد ما أعرف من وين) يصلح لعروس مرة، طبعا أنا ما حطيت الصورة من قريب لأنه صراحة شكل الصورة من قريب مو حلو، خصوصا أنه يوضح إنها مو صغيرة، و الأخت انا مو مقتنعة، بس هذا رابط :).

وش رايكم بهذي الأشياء بدل الطرحة و التاج التقليديات؟

Short Cut

ما راح أطول السالفة، لأن الزواج ما أعجبني مو لأني حاطة ببالي أنه ماراح يكون حلو، و قلت لكم الكلام هذا يمكن مليون مرة قبل، إني ما أتوقع أنه يكون حلو ...
الزواج عادي جدا، عربات صلاوات عيت تخلص و فستان العروس مو شين بس أنه مصممته ساره بورتن من أليكسندير ماكوين، بالنسبة لي كلام فاضي، يعني ألكسندر ماكوين يطلع منه فستان زي كذا؟ نسخة مبسطة من فستان قرايس كيللي (زوجة الأمير رينيه أمير موناكو اللي مات، و أم ألبير أمير موناكو الحين).

الفستان اللي فوق، هذا يسمى فستان زواج ملكي ... اللي لبسته كايت كان فستان حلو، بيكون حلو لزواج عادي، و لمصمم أو مصممة غير ساره بيرتون ... قلت لكم إني زعلانة، و ما عجبني شيء، لكن فيكتوريا بيكام كانت هناك، و انبسطت منها كثير، شكلها مرة حلو.

أكيد أغلبكم شاف الزواج و شاف فيكتوريا، علشان كذا ما بغيت أنتظر أكثر علشان ألقى صور أحلى لفكتوريا ... فكتوريا من بين تقريبا كل الحضور اللي أنتبهت لهم قدرت تطلع حلوة بزواج تقليدي الناس لازم تلبس فيه لبس ممل كله تيورات و قبعات ... فيكتوريا من الرأس للرجول كانت لابسة كحلي، كل شيء من تصميمها (ما أدري عن القبعة) القبعة حلوة، الشعر مرة حلو ...

بالزواج سمعت أنه موزة المسند بتجي، كنت متحمسة أشوف وش راح تلبس، لأن موزة بالنسبة لي تقريبا هي أحسن سيدة أولى بالعالم تلبس ... لمحت بعد بالزواج لولا سلمى زوجة ملك المغرب، و شكلها لابسة قفطان وردي حلو، بعد لمحت ليدي ساره بنت أخت الملكة اليزبيث كانت لابسة لبس كأنها أودري هاببيرون.
لو ألقى صورة لأي أحد منهم، إن شاء الله راح أجيبها لكم.

قولوا لي رأيكم أنتم بالزواج، و توافقوني أو لا ؟

Which Team Kate Would Join

السنة هذي شكلها سنة الزواجات. أنبسط كثير على موضوع الزوجات، أحب حفل الزواج المنظم و شكله حلو، و جديد. زي ما قلت لكم أقل من شهر و وليم ولد ولي عهد بريطانيا راح يتزوج خطيبته كايت ميدلتون اللي نشف ريقها من عشر سنين.

علشان هذا الزواج كل العالم هابة، كأنه ما تزوج غيرهم، زي ما قلت مليون مرة مع إني أحسه بيكون زواج بايخ. المهم Vogue UK طلعت عدد مايو كله تقريبا خاص بهذا الزواج، وسوت الإيدتوريال اللي فوق، و علشان أوفر عليكم صراحة الإيدتوريال بايخ، بس أنا جبت صور منه علشان قضية وحدة، خصوصا لما شفت الفستان الأوت كتو الديور الموف (أكيد يمين)، و جا ببالي هل ممكن تلبس كايت لون غير الأبيض و درجاته؟ أشك.

السنة هذي كان فيه زوجين للسلبرتي الأول (اليسار) زواج نيكول ريتشي، و لبست فستان فيه من ماركيزا، الفستان أبيض زي ما تشوفون، و يميل كثير للكلاسيكي. أساسا نيكول كانت تبغى فستان مستوحى من فستان قريس كيللي اللي تزوجت رينيه أمير موناكو.

الزواج الثاني هو زواج ريز ويذيرسبون الثاني، تزوجت بفستان وردي من مونيك لولير، كفكرة أنا أساسا ما يدخل مزاجي إلا الأبيض و درجاته، لكن على قلة الصور اللي شفتها لها (جلست أنتظر و عيا يطلع مع الناس صور زيادة) أعجبني شكلها (لولا شريطة وردية عند الخصر) بس أكثر شيء عجبني بالموضوع إنها لبست طرحة بيضاء مع الفستان، طلع شكلها مرة رايق. و هذا نفس الشيء اللي مسويته فوق مع الفستان الموف، ملبسه الموديل طرحة بيضاء.

أنا ما أتوقع بتلبس من أي وحدة من المصممتين مونيك أمريكية، و ماركيزا هي مصممة بريطانية، بس دار الأزياء مكانها نيويورك، و الغالب إن كايت بتلبس لبريطانيين (أو الأكيد).
الشيء الثاني ما أتوقع بعد تلبس لون مو تقليدي، لأن الزواجات الملكية الأوربية اللي قبلها كلها كانت أبيض: ماري أوف دينامارك، ميته مرييت أوف نوريج و آخر وحده الصيف اللي فات هي ولية عهد السويد فكتوريا.
و آخر شيء أتوقع أكيد ماراح تلبس شيء يشبه فستان ديانا، مو لأنه قديم، لأنه بيكون شكلها مثير للشفقة لو جلست تنسخ دايانا من جديد، خصوصا أنه خاتم الخطوبة، هو خاتم خطوبة ديانا.

لاحظتوا كل الزواجات الملكية ما فيها سترابليس، و أكثر شيء مكشوف كانت فيكتوريا، تتوقعون تلبس كايت سترابليس، أو من دون أكمام؟ بالنسبة لي لا. 

Bride's Stuff

ما أعرف ليه أتحمس لأغراض الزواج، أحب أشوف الزواجات الحلوة (طبعا مو بالسعودية) بالأفلام. ودي لو مرة أسوي شيء حلو لو بسيط زي اللي أشوفه بالأفلام. ما يهم برا قاعة جوا قاعة أهم شيء يفتح النفس.

التاج اللي أنا حاطة صورته من تصميم جواهرجي بريطاني أسمه لويس مارييت، المهم لما جيت أتزوج عجبني من عنده هذا التاج كنت مصممة إني أشتريه حتى مع سعره (داخلة جو إني من أسرة مالكة، و أنه عيالي بيتوارثون هذا التاج) المهم الكريديت كارد ما اشتغلت معاي و الحمد لله. الفكرة إني لما تورطت و جلست أدور هنا بالرياض ما لقيت شيء، و بنفس الوقت كانت صديقتي بتتزوج، و دورت لها طرحة، و لا لقت و آخر شيء فصلت، و كمان خربت و قبل الزواج بيوم شحذت من أخت زوجها اللي كانت توها متزوجة بالإجازة اللي فاتت طرحتها و خلصت أمورها. 

عندي صديقة ثانية بعد بتتزوج، و نفس الشيء شايلة همها، طبعا عناء الطرحة و التاج تجدد. هالمرة ودي لو أعرف منكم إذا تعرفون محل بالرياض أو بالسعودية بشك عام يبيع أشياء زي كذا و خيارت كثيرة و حلوة، الله لا يهينكم إذا تعرفون ردوا على. 

أما للي يقرون لي بتمبلر إذا تعرفون بعد أدخلوا المدونة و ردوا (تلقون عنوانها فوق أعلى صفحة التمبلر حقي) و إذا ما تعرفون بأكون مشكورة لو سويتوا للبوست ريبلوق يمكن يقراه أحد يعرف و يعلمنا. 

Wedding .. Wedding .. Wedding

ما أعرف ليه فجأة صرت أهتم بالزوجات، مو يعني أحبها ودي أروح لها، بس صارت عيني تلقط الأشياء اللي ممكن تمشي لزواج،  فساتين، ورود مجوهرات ... إلخ .

الفستان هذا من جامبتيستا فالي أعجبني مرة، أول ما شفته، ما فكرت فيه لريد كاربيت أو علي أي أحد ثاني، فكرت أنه يصلح فستان زواج، طبعا مو باللون الأحمر، أنا من الناحية هذي قصدي لون الفستان فكري تقليدي مرة، يعني ما أحب الفستان إلا بالألوان اللي كلنا نعرفها يعني الأبيض ودرجاته، كانت مايلة للذهبي أو للفضي.
يمكن لأول وهلة بتقولن أنه فستان عادي، يعني وش اللي خلاني أحبه، بالنسبة لي مو عادي خصوصا الجزء الفوقي، الجزى الفوقي كأنه منحوت نحت، حتى تشوفون كيف شكله عن الكتوف، ما أعرف وش مستخدم، بس لاحظوا أنه الكتوف مرتفعة شوي، كأن القماش محشي، بنفس الوقت جسم العارضة يوضح أنه مو محشي.
أعجبني بعقوة من ورا، دورت كثير لصورة له من ورا و لا لقيت إلا هذي الصورة، الذيل و نهايته، أساسا الفستان كله الجزء العلوي و الجزء السفلي بينهم تضاد، ما تتقعها مع بعض، يعني ممكن لو شفتوا الصورة بس من فوق بتتوقعون تحت فستان قصير مع تنورة بنسل تحت الركبة بشوي، و لو شفتوه من تحت ممكن تتوقعون شيء شيفون و أوف شولدير بس الفستان مفاجأة.

وش رايكم بالفستان؟ و وشرايكم فيه كفستان زواج؟

Like a princess

ما عندي شي هذي اليومين، و جالسة أدور على شي أكتبه و ما لقيت المهم، أنه قبل يومين شفت فيلم Princess Diaries أدري فيلم سخيف و بايخ، بس و الله مو ذنبي ذنب mbc Max  ...

الفيلم للحق ما فيه شي يسوى .. بس لما شفت الأخير، لما بدت آنا هاثوي ترقص مع ذاك الحلو (شوفوا الوصف بس). بعد زواج نيكول رتشي، الي قلت لكم عنه (ترا الصور طلعت شوفوها هنا). جاي على الربيع زواج كايت ميديلتون من وليم (حاسة فستان زواجها بيكون بايخ) ... قلت لكم شفت آن بالفستان، و جا ببالي هذا الفستان من مجموعة خريف 2011 لجايسون وو.

ملابس الخريف لسا بالمحلات، بس على ما أظن أنه جايسون ما ينباع برا أمريكا، يعني للي خاطرها فيه، و لسا ما جوا الناس الي تعرفهم من أمريكا، يمكن توصي عليه قبل ما تنشال ملابس الشتاء من المحلات و ترا فيه تخفيضات، و المواقع الي تبيعه، ما عرضت هذا الفستان. بشكل عام أنا ما أحب الفساتين هذي  fairy-tale ، بس لو كانت فستان عروس يمكن الوضع مختلف، ما أظن أنه كايت راح تلبس لجايسون وو، لأنه أمريكي، و الأغلب إنها بتلبس لمصمم بريطاني.

قلت لكم عندي فراغ، و لما شفت الفستان حق آنا زي ما قلت لكم، قلت يالله نكتب عنه، للي يحب هذي النوعية من الفساتين، خصوصا إني لو ما كنت مره مع الفساتين النفاشة، أحب كثير النقش الذهبي.

ما لقيت صور أحسن لفستان آن، بس أنتم لو تحبون الأفلام البايخة (شرايكم بالأسلوب؟!!)، شوفها.

Weekend Wedding

الويك إيند هذا زواج نيكول رتشي ... أحس إنها راح تسوي شي حلو مره، أو شي بايخ مره، الي عرفته أنها راح تلبس من ماركيزا، أحسه شي خاص فيها مو موجود من الكوليكشين الأخير ... بس لو كنت باختار أنا منه كنت راح أختار هذا الفستان:

الفستان من أول ما شفته عجبني، و على طول فكرت فيه أنه يصلح لزواج، يمكن أكثر شي عجبني فيه أنه يشبه لبس أودري هذا الي ب My Fair Lady و تعرفون أنه أنا زي كل بنات العالم أحب أودري هابيرون.

هذا الموضوع خلاني أجيب طاري موضوع ثاني من زمان بخاطري بس مستحية منكم لأنه بتقولون الحمد لله على النعمة.

المهم الي بقوله ... قبل تقريبا أسبوعين حلمت حلم سخيف، حلمت أنه مجلة أزياء (ما أعرف أي وحده) طلبت مني إنهم يصورون زواجي، قلت لهم إني تزوجت و خلصت، بس إذا ما عندكم مشكلة أسوي زواج ثاني ... المهم قمت من النوم قبل ما أفكر كيف شكل الزواج الكذبي الي راح يصورونه لي المجلة ... و جلست أفكر، ما أبغى أعيد زواجي الأصلي صح مو شين يعني شين، بس مو واااو لدرجة أنه أبغى مجلة تصوره (دايم تصير لما نبغى شي يطلع حلو مستحيل يطلع زي اللي ببالنا) بس هذي المره ما راح أشيل هم لأني راح آخذ فلوس من المجلة ... جلست أفكر وشو ثيم الزواج أول شي فكرت فيه هذا الفستان ، الفستان من مجموعة أليكساندير ماكوين الأخيرة ... على طول حسيت إني أبغى أسوي زواج بالغابة (أعرف أنرحم) حتى تراني سويت بحث عن الكاسات الي بتنحط على الطولات ... أبغى أقدم حلويات ألمانية أحسها تمشي مره مو زي الفرنسية، يعني الألمانية حلو طعمها بس شكلها حوسة، و أكثرها ألوانها غانقة، مو زي الفرنسية ملونة، يعني بتلبق على الغابة، و أكيد أبغى بوكيه الورود فيه برية ...

الي يبي يجي زواجي الثاني الكذبي الله يحييه بس شرط يدفع قطه، و القطة تبدأ بألف ريال P:

Boring

أمس تزوجت شيلسي كلينتون ... الي أمي تقول إنها حلوة ... المهم كل العالم قبل الزواج قاعدة تحزر لمين راح تلبس، و أكثر الكلام كانوا يتوقعون أنها بتلبس لأوسكار دي لا رينتا ... لأنه لبس أمها أكثر من مرة (أشك إن أمها لابسه منه للزواج فستان كذا بيذنجاني) المهم ما طلع أوسكار طلع فيرا وانق. فيرا اشتهرت أساسا بفساتين الزواج، و أنا كل مره أشوف فيلم أشوفهم ميتين على فستان من فيرا ما أعرف وش عاجبهم فيه، بس الدنيا حظوظ ... الفستان حق شيلسي ما أعجبني، عادي جدا، متوقعا جدا ما فيه أي ابتكار ... يمكن قماشة حلو بس هو مو مميز أبدا، و لا يمكن ألبسه لو حتى جاني ببلاش.

أحس لبس الزواج لازم يكون شي غير عن الي تعودوه الناس، شي حتى أنت ما توقعت نفسك راح تلبسينه، شي لو حتى ما كنت ناوية تتزوجين، لما تشوفينه تقولين أبغى هذا.

أهم شي فستان يتذكر الناس تفاصيله، مو بس إيه كانت حلوه.

هنا اقتراحات للبس زواج أعتقد أنها بتكون حلوة مرة و مميزة

فترة كنت أتمنى إني ألبس فستان قصير بزواجي، ما لبست مو لأني حسيت أنه غلط، لا لأني من زمان ما لبست طويل، و لأني حبيت الفستان، و لأني لو أفكر بقصير بتموت أمي خصوصا إننا بغينا نتقاتل على أشياء أتفه، بس الأهم إني كنت حابة الفستان. الشانيل الي على لارا ستون ما أعرف ليه بس أحس أنه شي زي الحلاوة ... عجبني جدا، أحس أي وحده بتلبسه أي وحده بيطلع حلو عليها ...

الكالفن كلاين بسيط جدا ... أتخيله مع طرحة طويلة زيه، و بوكيه أبيض بيطلع رايق خصوصا للزواجات الي مو فخمة (يعني باستراحة، أو بالبيت) و لو زواجي كان صغير، أكيد باختار شي بسيط و حلو زي الكالفن كلاين.

الدولتشي قابانا هذا ذابحني، خصوصا أنه دانتيل ... أحب الدانتيل أحس فستان زي كذا مع بوكيه بري و من دون أي شي (يعني تاج و طرحة) بيكون وااااو بجد بس حلقات حلوة و أحس إني بطير.

طبعا الجفنشي ما يحتاج أقول إني منجنه على الكوليكشين كامل ... أرشحه كل يكون لبس زواج، بس لأني حابة الأبيض الوقت هذا بقوة أختار هذا ... عجبني صدره الي كأنه مشد، كأنه شلحة ... بس شلحة فخمة مرة لو لبسته أكيد بفك شعري و ممكن ألبس تاج معاه .

و أنا جدا منفتحة على أي لون يلبس لحفل زواج ... بس أحب الأبيض، يمكن لأن كثير مننا ما قد لبس أبيض قبل

sex and the city .. (WEDDING DRESSES).

(تحديث فيديو)

اليوم باتكلم عن ملابس العروس في SATC .. للأسف أنها مو لبس واحد، و المشكلة الأكبر ما لقيت صور كثير عن الموضوع هذا عشان أحرق قلبكم زي ما احترقت P: بس ما تهونون على نزلت الفيلم حتى لو كانت نسخة سينما و مو واضحة، أخذت لكم بعض الصور :) ..

باحكي لكم الحكاية، كيري تبغى تتزوج طبعا هي مسوية نفسها very simple و لا تحب الكلافة، شرت لها بالأول تيور أبيض رسمي يقاله فستان الزواج، المهم درت مديرتها بمجلة vogue و قالت اشرايك نسوي إشيو كامل عن كيف ممكن تلبس العروس الي فوق الأربعين، لأن هذا الشي نادر يصير، طبعا قصدها أن مرة تتزوج فوق الأربعين .. ok إلى الأن ما في مشاكل، ردت عليها مديرة التحرير: بس ترى أنت الموديل (و الله أنهم آخذين فيها مقلب كبيييييييير)، بدينا تصوير العدد و اللهم سلم سلم .. وش ذيك الفساتين تخليك تقولين أبغى أتزوووووووووج.

أول فستان كان فيرا وانق .. واااو ماله نهاية :(

ثاني فستان و أعذروني عالصورة بس ما حصلت أفضل، كارولينا إيريرا، صراحة الشي الي بدل الطرحة لو أعرف وين ألقاه بس .. ؟؟
بعده كان فستان قصير مرة (فوق الركبة) ما عجبني، ما سمعت زين من وين بس أظن لانفين، ماأخذت الصورة، لأنه غلبني برنامج أخذ الصور ..


هذا فستان لكغستيان لاكوا .. أموووووووت بهذا المصمم، مع أني ما أظن ألبس هذا الفستان بزواجي D: ..
بعده لديور .. كمان ما أعجبني و فضلت عدم تصويره (أنا حره) ذوقي و مدونتيP: ..


آه آه آه .. بعدها أوسكار دي لا رينتا، وش ذاك الشغل يجنن يآخذ العقل، ما أعرف مين الي يشتغل على أقمشته ؟؟!! (أصلا شلة المصممين الي يشتغلون بنيويورك صايرين فلته) ..

آخر فستان من فيفيان ويستوود .. طبعا هذا مالي النت صور، لأن كمالة الحكاية، يقالها ترجع للبيت، و يطق الباب تفتح و أثر فيفيان أرسلت لها الفستان هدية، و قررت تلبسه بزواجها ..

هذي صورته و هي تصور للعدد مو بزواجها .. و الي تحت و هي بالزواج ..

الله ياخذها هي و الريشة الي حاطتها، عاطية الطرحة شكل ووااااو مو فنكي بس شوي مو معتاد

هب عليها، شوفوا القطعة الي زي البروش عند الصدر :(

المسكة و لون الفستان و طبقاته، كلها تقتل آه بس ..

حكايتها مع الجزم حكاية، و إلا وش علاقة الجزم بهذا اللبس؟ .. لو هي بس لابستهم للفستان الي البسته بأول الفيلم كان أصرف ..

حسبي الله و نعم الوكيل، من وين و إلا وين أجيبها لا الفستان و لا الطرحة .. كل شي يخليك تقول الله يآخذ أبو الحظ.

ـــــــــــــ
* تنويه شفتوا قد إيش الصور خايسه، نشف ريقي لحد ما لقيت مكان يحملها، كل ما حملتها بمكان حذوفها بحجة (حرام صور النساء) .. و الله لولا أنه صور بلوقير محجوبه هنا، و إلا كان حملتها و ارتحت من المذلة.

شي ثاني للي عاجبته الفساتين و يبغاها، في كتاب في صور كل الأزياء الي بالفيلم، ماني متأكده إذا فساتين الزواج فيها، بس واحد قالي إنها موجوده، الكتاب يباع على أمازون، ما أدري إذا مكاتب السعودية تبعه (قصدي جرير يعني).

هذي إن شا الله الحلقة قبل الأخيرة بـ SATC بعدها حلقة وحده (على ما أظن) D: بس ما راح أعلمكم عن إيش، بخليها مفاجأة :) ..

مواضيع ذات صلة:

sex and the city ..

sex and the city .. 2

sex and the city .. 3

.