Rising Star

قبل فترة مو قصيرة تكلمت لكم عن إيما واتسون، و إنه لبسها طالع حلو مرة، و قليل مرات بالنسبة لي ما يعجبني لبسها فيه. اليوم راح اتكلم عن وحدة ثانية، بعد هذي السنة كان لبسها فيه مره حلو، و تستاهل أنه أحد يتابع ستايلها، أكيد لو استمرت بهذا الشكل. 

للحق أنا ما أعرف فليستي جونز ليه هذي السنة متواجدة بكثرة، أعرف إنها ممثلة بريطانية، شفت لها فيلم، كان دورها مو كبير فيه، بس وش جالسة تسوي الحين على المستوى المهني، ما أعرف :) كل اللي أعرفه إنها جالسة تلبس لبس حلو :).

من بداية السنة يمكن بفبراير طلعت فاليستي بهذا الفستان المخمل الكحلي (أكيد على اليسار)، أعجبني كيف مسوية شعرها، و أعجبتني الشنطة اللي شايلتها معاها، أعطت شكل مختلف للفستان اللي بسيط جدا. اللبس اللي بالوسط هو فستان من بروينزا سكولير مجموعة صيف 2012، فليستي مو أول وحده تلبس من المجموعة اللي ما نزلت للأسواق إلى الآن، لكن أعجبني أختيار اللون، الصندل حلو، و أكثر شيء عجبني بطانة الفستان المنقشة (بعد لبست لوك ثاني من المجموعة). آخر شيء على اليمين، فستان أزرق من كالفن كلاين ... يعجبني فيها كيف تلبس فساتين لون واحد، مع أقل التفاصيل، و تطلع حلوه مره فيه.

المجموعة الثانية التفاصيل بالفساتين أكثر شوي (من اليسار) من الفساتين القليلة اللي لبستها فليستي و عليها طبعات أكثر من لون، إن كنتوا منتبهين هو واحد من مجموعة الخضار اللي صمموها دولتشي آن قابانا بعد لصيف 2012، عجبني مره فستان الباذنجان عليها، و بعد مو هي الوحيدة اللي لبست من هذي المجموعة قبل لا تنزل (لو حصل لي راح أكتب عن "الوحده الثانية" :). الفستان الذهبي اللي بالوسط من كلوي، عاجبني لونه، و أكثر شيء عاجبني اختيار الجزم معاه، لونها مره حلو ... آخر فستان من بوربري، الفستان مو هو الوحيد الأسود اللي لبسته فليستي، يمكن لبست 3 غيره هذي السنة، لكن حبيت فيه زي كل اختيارات فليستي بساطة الشكل، و كيف إنها بمايك آب بسيط و تسريحة بعد بسيطة تطلع حلوه. 

أظن لو أنت بنت، و ما تعرفين كيف بالضبط تختارين ستايل، أعتقد إن ستايل فليستي، يناسب كل بنت، و لا هو صعب، و فيه كثير من أشكال الملابس اللي تلبسه، موجود بمحلات الهاي ستريت، يعني حتى مو مكلف :)

Rachel Zoe: Kate in White Tux?!

اليوم شفت فديو لريتشيل زو تعلق على ستايل كايت ميديلتون. بصراحة ما تهمني كايت ميديلتون، لا أنا بريطانية، و لا لبسها مميز، و أحس أنه لبسها لو تلبسه أي وحدة جسمها من عادي لنحيف، بيطلع شكلها مرتب و مناسب. موب مميز، بس زي ما يقولون "لعب على المضمون".

مثل ما قلت لكم ما يعجبني ستايل كايت ميدلتون، و لا يعجبني المايك آب حقها. بس مو هذي الفكرة اللي راح أكتب عنها، يعني أهزء بستايلها، فيه ناس تعجبهم، و أنا صايرة أمشي بنظام إذا مو عاجبني، ما أحد حادني إني أتابعه. 

زي ما قلت لكم ريتشيل كانت تعلق على ستايل كايت، و الشيء الوحيد اللي تأكدت منه لما شفت برنامج ريتشيل Rachel Zoe's Project إن ريتشيل ما حصلت كل هذولا الزباين لأن ذوقها يجنن (خياراتها كثير حلوة). بس أظن أهم شيء إني ما قد سمعتها و لا مرة تقول لوحدة من زبوناتها (حتى المصممين) لو بلطف لا مو حلو هذا اللبس، يعني تطلع أي عذر إلا إنها تقول ما عجبني. 

علشان كذا أنا مقتنعة إن تعليقها على ستايل ريتشيل على كايت كان داخل ضمن هذا الأسلوب، لأنه شكل ريتشيل بخاطرها بقوة تصير الستايلست حق كايت. 

بالفيديو اللي تلقونه هنا، بتشوفون كيف ريتشيل جلست تمدح بستايل كايت، و تقول أنه أحسن شيء بالعالم، و إنها رهيبة و وو و، الشيء اللي أوافق ريتشيل عليه، إن كايت دايم مبتسمه و ابتسامتها حلوة، و إنها ما فيه تكلف بلبسها، و أهم شيء إنها كثير تعيد ملابسها، و حتى تلبس من محلات هاي ستريت مثل زارا و ويرهاوس (تلقونه عند دبنهامز). فهي يعني تخلي كثير من اللي عاجبهم ساتيلها و يشترون أي شيء تلبسه، يقدرون أنهم يشترون ملابسها. 

أهم شيء بهذا اللقاء كان غير المدح، كان لما قالت ريتشيل إنها تتمنى إنها تشوف كايت بتوكسيدو بيضاء. 

أول ما سمعت اقتراح ريتشيل على طول تخيلت كايت ببدلة توكسيدو بيضاء زي ما تقول ريتشيل، و أعجبتني قوة الفكرة. كايت طويلة، نحيفة، شعرها غامق، و عندها حواجب ثقيلة. كل شيء بيخلي هذا اللوك ينجح عليها بالنسبة لي. طبعا على طول رحت أدور لها عن توكس بيضاء من العروض. من اليمين لليسار (كالفن كلاين - ريزورت 2012، إيف سان لوغان خريف 2011، جايسون وو خريف 2011). 

كل خياراتي مو لمصممين بريطانيين، مع إني دورت عندهم بس ما لقيت، خصوصا أنه كايت إلى حد الآن تقريبا 90٪  من ملابسها بريطانية. 

من الخيارات الثلاثة أكثر شيء ودي أشوفها فيه، هي بدلة سان لوغان، و هي البدلة اللي متأكدة إنها مستحيل تلبسها خصوصا مع فتحة زي كذا. 

كالفن كلاين ممكن تكون خيار "كاجوال" أكثير. ممكن تلبس تحته تي شيرت أبيض بعد، و تترك الجاكيت مفتوح و تلبس معاه صندل كعب تان، و أوفرسايزيد كلتش.

البدلة الأخيرة من جايسون وو، أحسها بتطلع حلوة عليها، خصوصا إنها نحيفة، و البنطلون بهذا اللوك سليم، فراح يطلعها طويلة مرة، مع هذا الجاكيت القصير، و شكلها بيطلع شيك مرة، و لا هو "safe" زي اختياراتها دائما، يعني ما أعرف ليه بس باحس بانتعاش لو شفتها ببدلة توكس بيضاء زي ما قلت ريتشل. 

لكل الخيارات الثلاثة بيطلع شكلها حلو مع شعرها مفكوك زي دايم، و ممكن تسوي كعكة مو مشدودة و بسيطة مع بدلة كالفن كلاين.

You Can't Fake Fashion

قبل أسبوع تقريبا عرفت أنه فيه تعاون بين eBay و CFDA اللي هي جمعية المصممين الإمريكان، على أنهم بيطلعون شنطة مكتوب عليها: "you can't fake fashion" "لا يمكنك تزييف الموضة". الهدف منه أنهم يوعون الناس من الأشياء المقلدة. 

صراحة أنا ما أحب بذات الشنط المقلدة و خصوصا تقليد الماركات المعروفة مثل قوتشي و لوي فيتون و ووو المهم، سببي مو أخلاقي، بس إن شكلها رخيص، أفضل شنطة من محل عادي على شيء مقلد بشكل سخيف، و أظن أنه مع هذي الموجة، موجة "نسخ" الموضة من الهاي فاشن للستريت فاشن صار فيه كثير شناط حلوة، و على الموضة، بسعر مقبول. 

اليوم قريت إيميل من eBay أنه تم عرض الشنط للبيع، فتحت على الصفحة و لقيت شنط مرة حلوة (طبعا كلها خلصت، ما أعرف كم نسخة مسوين)، أكثر وحدة أعجبتني فيهم، هذي اللي فوق من تصميم آدم. سعر كل الشناط كان 150 دولار، طبعا ليه أكتب لكم عنها و هي مخلصة، لأنه لو أعجبكم شيء منها أعتقد بعد فترة راح نلقى ناس عارضينها للبيع من جديد على eBay و طبعا بتكون أغلى من السعر الأصلي، بس لو كانت عاجبتكم مرة، دوروا عليها من جديد بالموقع. 

و لو ما كنتوا متحمسن للشراء، و بس تفرجتوا على الصفحة لقافة زيي، قولوا لي وش أكثر شيء أعجبكم.

The Constance Billard School Collar *

أرجع لكم لقصتي الحزينة اللي اختصارها أنه فيه أوقات من السنة ودي أكتب شيء هنا بس ما ألقى. اليوم لما خلصت جولتي اليومية على مواقع الكلام الفاض (القوسيب) علشان أشوف لو فيه أحد لابس لبس يخليني أتكلم عنه ما لقيت، فقلت خليني أروح أشوف جديد بعض المواقع اللي تعودت أشيك على الأغراض حقتهم، أو شريت منها.
و رحت أشوف شارم أن شاين. بالمناسبة الأشياء اللي طلبتها منهم وصلت من فترة طويلة، كانت كلها كويسة، و تعاملهم جدا مريح، و متفهمين جدا.

من الأشياء اللي كانت جديدة عندهم، هذا العقد اللي على شكل قبة من إسحاق ميزراحي.أول ما شفتها عجزت أشيك على أي شيء ثاني، عيوني طايرة بس أقلب فيه، و أقرأ عنه، و أهم شيء اقرأ سعره اللي أبدا مو رخيص سعره بـ 25000 دولار يعني تقريبا حوالي 10,000 ريال و هو زي ما هو مكتوب بالوصف أنه كريستال، يعني لو شريتوه و على بالكم ألماس لا تحطونها براسي إني خدعتكم :). 

المهم من شفته زي ما قلت لكم اتشغلت فيه، و رحت أدور عليه بالعرض نفسه، لقيته بمجموعة ربيع 2011 زي مو موجود بالصورة اللي بالموقع هنا. 

زي ما قلت لكم من شفته أنشغلت، الله لا يشغلنا إلا بطاعته، و فكرت أسوي فيه شيء، طايحة فيه من فترة، وهو شيء ما أعرف أنا مخرفته أو أحد مسويه قبلي، المهم إني مسميته fashion DJ، و فكرته إني ألصق أشياء من عروض مختلفة على بعض و أسوي لوك كامل منها ... إن شاء الله بس يصير عندي مجموعة كاملة أوريكم إياها كلها، بس الصورة اللي فوق هذي آخر شيء سويته، و حطيت فيه العقد.

العنوان بايخ و لا له معنى صدقي مدرسة كونستانس بيلارد هي المدرسة اللي بقوسيب قيرل، و لأن لبسهم زي ما تخبرون مبالغ فيه، و لا جابه للمدارس، فأنا أتطنز و أقول إن هذي القبة تصلح لهم :)

وش رايكم بالعقد، و بعد باللوك؟

Boring

أمس تزوجت شيلسي كلينتون ... الي أمي تقول إنها حلوة ... المهم كل العالم قبل الزواج قاعدة تحزر لمين راح تلبس، و أكثر الكلام كانوا يتوقعون أنها بتلبس لأوسكار دي لا رينتا ... لأنه لبس أمها أكثر من مرة (أشك إن أمها لابسه منه للزواج فستان كذا بيذنجاني) المهم ما طلع أوسكار طلع فيرا وانق. فيرا اشتهرت أساسا بفساتين الزواج، و أنا كل مره أشوف فيلم أشوفهم ميتين على فستان من فيرا ما أعرف وش عاجبهم فيه، بس الدنيا حظوظ ... الفستان حق شيلسي ما أعجبني، عادي جدا، متوقعا جدا ما فيه أي ابتكار ... يمكن قماشة حلو بس هو مو مميز أبدا، و لا يمكن ألبسه لو حتى جاني ببلاش.

أحس لبس الزواج لازم يكون شي غير عن الي تعودوه الناس، شي حتى أنت ما توقعت نفسك راح تلبسينه، شي لو حتى ما كنت ناوية تتزوجين، لما تشوفينه تقولين أبغى هذا.

أهم شي فستان يتذكر الناس تفاصيله، مو بس إيه كانت حلوه.

هنا اقتراحات للبس زواج أعتقد أنها بتكون حلوة مرة و مميزة

فترة كنت أتمنى إني ألبس فستان قصير بزواجي، ما لبست مو لأني حسيت أنه غلط، لا لأني من زمان ما لبست طويل، و لأني حبيت الفستان، و لأني لو أفكر بقصير بتموت أمي خصوصا إننا بغينا نتقاتل على أشياء أتفه، بس الأهم إني كنت حابة الفستان. الشانيل الي على لارا ستون ما أعرف ليه بس أحس أنه شي زي الحلاوة ... عجبني جدا، أحس أي وحده بتلبسه أي وحده بيطلع حلو عليها ...

الكالفن كلاين بسيط جدا ... أتخيله مع طرحة طويلة زيه، و بوكيه أبيض بيطلع رايق خصوصا للزواجات الي مو فخمة (يعني باستراحة، أو بالبيت) و لو زواجي كان صغير، أكيد باختار شي بسيط و حلو زي الكالفن كلاين.

الدولتشي قابانا هذا ذابحني، خصوصا أنه دانتيل ... أحب الدانتيل أحس فستان زي كذا مع بوكيه بري و من دون أي شي (يعني تاج و طرحة) بيكون وااااو بجد بس حلقات حلوة و أحس إني بطير.

طبعا الجفنشي ما يحتاج أقول إني منجنه على الكوليكشين كامل ... أرشحه كل يكون لبس زواج، بس لأني حابة الأبيض الوقت هذا بقوة أختار هذا ... عجبني صدره الي كأنه مشد، كأنه شلحة ... بس شلحة فخمة مرة لو لبسته أكيد بفك شعري و ممكن ألبس تاج معاه .

و أنا جدا منفتحة على أي لون يلبس لحفل زواج ... بس أحب الأبيض، يمكن لأن كثير مننا ما قد لبس أبيض قبل