Kate Middleton: Less Conservative?!!

قلت أكثر من مرة هنا، و بأماكن ثانية (لما يجي طاري الموضوع)، إن كايت ميدلتون مو أنيقة، و لا أعتقد إنها مثال (على الأقل بالنسبة لي)، أختياراتها للملابس كأنها لوحدة عمرها 40 أو 50. باختصار مملة. يمكن الشيء الوحيد اللي يخليني أمدح طريقة لبسها، إنها آمنة لدرجة ما أتذكر إن شكلها كان سيء لو مرة. من يومين طلعات بشكلين مختلفات عن دايم. 

الفستان الأول (الأبيض) أو العاجي ... من رولان موريه، عجبني مرة يمكن أقل شيء عجبني فيه هو شعرها، كايت فيه كملت طريقتها الدايمة و هي تشيل كلتش معاها تقريبا نفس لون اللبس ... عجبني صندلها من جيمي تشو (أعتقد لبسته قبل لبافتا بلوس أنجليس). زي ما تشوفون الفتحة مرة طويلة (تقريبا إلي نص الفخذ)، صحيح أكثر الصور ما طلعت فيها سيقانها، لأنه واضح إنها تحاول ما تطلعها (حتى لما نزلت من السيارة كانت ماسكة الفستان بيدها علشان ما تنفتح الفتحة). لكن بالأساس لو ما كانت تبغى الفستان ما كان لبسته، أو أقل شيء كان تطلب أنه تقصر الفتحة. 

الفستان الثاني من جيني باكام (ما عجبني مرة، عليها بالذات)، لكن عجب كثيرين (هنا تلقون صورته كاملة). ما أتذكر كايت لبست فستان ظهره كذا مكشوف (حتى لو عليه دانتيل)، لكن بالنسبة لي يكفي بالفترة هذي إنها حاولت تلبس شيء أجرأ، يعني أسم أنه بعض الناس يسمونها "fashion icon" على الأقل أنتظر أنه يطلع منها شيء قد اللقب هذا، مع أنه صاير رخيص هذي الأيام :). 

وش رايكم بستايل كايت ميدلتون؟ وش رايكم بالفستانين هذولي؟

The Duchess

كايت ميدلتون أمس كانت حاضرة مناسبة، ما أعرف وين، بس أهم شيء كان شكلها مرة حلو، لدرجة و أنا أدور صور زينة لها علشان أوريكم إياها، لما سويت بحث، و أول مرة من تزوجت بدل ما أدور بحث باسم كايت ميدلتون، من دون شعور، كتبت ببحثي دوقة كيمبرج :).

كايت بهذا العشاء، كانت لابسة فستان أسود مخمل من أليكساندير ماكوين (فستان أسود جديد يعجبني بهذي السنة)، لو ما كنتوا قريتوا موضوع الفساتين السوداء، هنا تلقونه. المهم زي ما قلت لكم، صدق أول مرة أحس إنها دوقة أو إنها شخصية ملكية، و أول مرة أصلا يعجبني شكلها من قبل ما تتزوج، و من بعد ما تزوجت، و حتى يوم زواجها ما عجبتني مرة (لو تتذكرون كتبت عنها). الفستان هذا واضح أنه نسخة مسوية لها لحالها، لكن عند نيت آي بورتيه، يبيعون واحد نفس الموديل، لكن الجزء السفلي فيه شفاف، يمكنه بالأساس نفس الفستان، لكن أكيد إن كايت ماراح تطلع بشيء شفاف زي كذا. عجبتني المجوهرات اللي لابستها، عجبني مكياجها (أول مرة أحبه)، بالعادة كحل عيونها سيء جدا، شعرها زي دايم حلو. يمكن لو فيه شيء وحيد ودي أغيره، هو الشنطة اللي شايلتها، ما عجبني كثير إنها سوداء مخمل (صراحة ما أعرف شعوري تجاهها، هي عاجبتني إنها مطقمتها مع الفستان أو لا :).

 شرايكم بستايل كايت ميديلتون؟ وش أكثر لوك لها عجبكم هذي السنة؟

The few pieces aren't for the duchess

توقعت إمي ماراح أكتب عن لندن، بس توي أشيك على مجموعة إيرديم، خصوصا إني إلى الآن ما شفت شيء مميز من ميلانو، بصراحة المجموعة مو سيئة، لكن أعتقد لو إيرديم كان مصمم كايت ميدلتون كنت راح أحبها، لكنه مصمم يشتري له كل الناس، فما أعرف على أي أساس يصمم مجموعة كاملة، تقريبا كل القطع مسوية علشان تلبسها كايت. 

كايت لبست لإيرديم مرتين كلها بكندا لما راحت لها بالصيف، لكن هذا ما يعني أنه إيرديم صار لكايت ميديلتون، صحيح أنا توقعت أنه راح تطلع ملابس تصلح لكايت خصوصا من إيسا لأنها لبست لها كثير، واحد منهم فستان الخطوبة الأزرق، لكن مو من إيرديم. 

صراحة ما أفهم طيران الناس بكايت ميديلتون، يعني لما كانت بنت عادية تتزوج أمير فهمنا الموضوع، لكن أنه يجلسون الناس يقولون لي أنه لبسها رهيب، مانيب مقتنعة، ممكن يعجب أذواق، لكن بالنسبة لي لبسها ممل جدا، و لا أنتظر منها إنها تونسني، فيه ناس كثير بالعالم يقومون بهذا الدور، و بعد ما أنتظر منها إنها تصير ديانا ثانية، علشان كذا أعتقد أنه "يغصب" الناس على أنهم يحبون ذوقها موضوع سخيف جدا. 

قلت لكم العرض مو سيء، بس رغم إني ما ألبس من إيرديم (لأن ما عندي فلوس:)، ما أبغس أشتري شيء فوق 800 جنيه علشان أطلع زي كايت، أروح أشتري من زارا أو مانقو أوي أي شيء ثاني لو بغيت أكون زيها، علشان كذا أظن أنه القطع اللي صدق كانت حلوة (من وجهة نظري) هي القطع القليلة اللي أعتقد أنه مستحيل كايت ميدلتون تلبسها. (هنا باقي المجموعة). 

شرايكم بالمجموعة؟ و ستايل كايت ميدلتون، تعجبكم، أو تطفشون منها زيي؟

Rachel Zoe: Kate in White Tux?!

اليوم شفت فديو لريتشيل زو تعلق على ستايل كايت ميديلتون. بصراحة ما تهمني كايت ميديلتون، لا أنا بريطانية، و لا لبسها مميز، و أحس أنه لبسها لو تلبسه أي وحدة جسمها من عادي لنحيف، بيطلع شكلها مرتب و مناسب. موب مميز، بس زي ما يقولون "لعب على المضمون".

مثل ما قلت لكم ما يعجبني ستايل كايت ميدلتون، و لا يعجبني المايك آب حقها. بس مو هذي الفكرة اللي راح أكتب عنها، يعني أهزء بستايلها، فيه ناس تعجبهم، و أنا صايرة أمشي بنظام إذا مو عاجبني، ما أحد حادني إني أتابعه. 

زي ما قلت لكم ريتشيل كانت تعلق على ستايل كايت، و الشيء الوحيد اللي تأكدت منه لما شفت برنامج ريتشيل Rachel Zoe's Project إن ريتشيل ما حصلت كل هذولا الزباين لأن ذوقها يجنن (خياراتها كثير حلوة). بس أظن أهم شيء إني ما قد سمعتها و لا مرة تقول لوحدة من زبوناتها (حتى المصممين) لو بلطف لا مو حلو هذا اللبس، يعني تطلع أي عذر إلا إنها تقول ما عجبني. 

علشان كذا أنا مقتنعة إن تعليقها على ستايل ريتشيل على كايت كان داخل ضمن هذا الأسلوب، لأنه شكل ريتشيل بخاطرها بقوة تصير الستايلست حق كايت. 

بالفيديو اللي تلقونه هنا، بتشوفون كيف ريتشيل جلست تمدح بستايل كايت، و تقول أنه أحسن شيء بالعالم، و إنها رهيبة و وو و، الشيء اللي أوافق ريتشيل عليه، إن كايت دايم مبتسمه و ابتسامتها حلوة، و إنها ما فيه تكلف بلبسها، و أهم شيء إنها كثير تعيد ملابسها، و حتى تلبس من محلات هاي ستريت مثل زارا و ويرهاوس (تلقونه عند دبنهامز). فهي يعني تخلي كثير من اللي عاجبهم ساتيلها و يشترون أي شيء تلبسه، يقدرون أنهم يشترون ملابسها. 

أهم شيء بهذا اللقاء كان غير المدح، كان لما قالت ريتشيل إنها تتمنى إنها تشوف كايت بتوكسيدو بيضاء. 

أول ما سمعت اقتراح ريتشيل على طول تخيلت كايت ببدلة توكسيدو بيضاء زي ما تقول ريتشيل، و أعجبتني قوة الفكرة. كايت طويلة، نحيفة، شعرها غامق، و عندها حواجب ثقيلة. كل شيء بيخلي هذا اللوك ينجح عليها بالنسبة لي. طبعا على طول رحت أدور لها عن توكس بيضاء من العروض. من اليمين لليسار (كالفن كلاين - ريزورت 2012، إيف سان لوغان خريف 2011، جايسون وو خريف 2011). 

كل خياراتي مو لمصممين بريطانيين، مع إني دورت عندهم بس ما لقيت، خصوصا أنه كايت إلى حد الآن تقريبا 90٪  من ملابسها بريطانية. 

من الخيارات الثلاثة أكثر شيء ودي أشوفها فيه، هي بدلة سان لوغان، و هي البدلة اللي متأكدة إنها مستحيل تلبسها خصوصا مع فتحة زي كذا. 

كالفن كلاين ممكن تكون خيار "كاجوال" أكثير. ممكن تلبس تحته تي شيرت أبيض بعد، و تترك الجاكيت مفتوح و تلبس معاه صندل كعب تان، و أوفرسايزيد كلتش.

البدلة الأخيرة من جايسون وو، أحسها بتطلع حلوة عليها، خصوصا إنها نحيفة، و البنطلون بهذا اللوك سليم، فراح يطلعها طويلة مرة، مع هذا الجاكيت القصير، و شكلها بيطلع شيك مرة، و لا هو "safe" زي اختياراتها دائما، يعني ما أعرف ليه بس باحس بانتعاش لو شفتها ببدلة توكس بيضاء زي ما قلت ريتشل. 

لكل الخيارات الثلاثة بيطلع شكلها حلو مع شعرها مفكوك زي دايم، و ممكن تسوي كعكة مو مشدودة و بسيطة مع بدلة كالفن كلاين.