On a High Note

اليوم كان فيه عرض لفالنتينو و شانيل أليكساندير ماكوين، مع إنه شانيل أكثر مجموعة ملونة بين الثلاثة مجموعات، أعتقد إني أفضل عرض فالنتينو و ماكوين من هذا اليوم على عرض شانيل حتى لو كان السيتينق حقه كأنه كافيه. بما إنه ما بقى إلا يوم على نهاية أسبوع باريس، راح أخليهم ببوست واحد، بدل ما أكتب تدوينتين متفرقات. 

من مسك بيرباولو بايشولي و ماريا قرازيا كيوري فالنتينو و هذي أقل مجموعة ألوان، و أكثر مجموعة كأنها أوت كتور من وجهة نظري. الفستان الأسود أكثر شيء عجبني، أتمنى لو لبس على الريدكاربيت يكون التبطين مناسب لشكل الفستان، يعني مثلا ما يصير أسود، أعجبني مرة الكريستالات اللي عليه، و شكل الأكمام، أحس فستان زي كذا بيكون حلو على فان بينق بينق أو يوليانا سيرقينكو، الفستان اللي بجمبه (الثاني من اليمين) متحمسه أشوفه على الريدكاربيت، أحسه بيكون حلو، ممكن على أحد زي جينا مالون (مع إني ما أتذكر إنها تلبس فساتين مو ماسكة عند الخصر. الفستان الأحمر، أتمنى لو لبس على الريدكاربيت ما تحط تحته بطانة، يلبسه أحد مع ستيان تراينقل ناعم أسود أو عنابي. الفستان الأسود و الأبيض أحس بيكون حلو إيمي آدمز، أتمنى أشوفه عليها، أحس من فترة ما شفت عليها شيء مثير. 

نسبة المجموعات اللي أعجبتني من أليكساندير ماكوين من صارت ساره بورتون مصممته مرة قليلة، هذي المجموعة من هذي المجموعات القليلة، أحس فيها شغل ساره بورتون واضح، بس بعد أكثر مجموعة تشبه تصاميم أليكساندر ماكوين، و أهم شيء أعتقد إنها بتكون أكثر مجموعة لساره بورتون نشوفها على الريدكاربيت من فترة. مرة عجبني اللبس اللي كأنه روب آسيوي، أحس مكانه لجنة تحكيم بمهرجان، أحد زي كاترين دينوف أو هيام عباس. الفستان اللي بعده أحس بيكون حلو لوبيتا أو إيمي روسم. الأخير أحس بيكون حلو على كايت بلانشيت، أو نايومي كامبل. 

أنتم وش رأيكم بكل العرضين؟ فيه شيء أعجبكم؟ كلهم أو و لا واحد؟ 

A Red Touch

بالعادة اللونين الأحمر و الأسود ما يجون ببالي مع بعض، يمكن لأنهم مرة متوقعات، و يمكن لأنهم كلهم لونين قويات (قصدي لما يكونون موجودات يطغون بشكل ما على باقي الألوان. إلى ما انتبهت لأكثر من لوك أعجبوني على الريدكاربيت بالفترة الأخيرة.

من اليمين عكس عقارب الساعة: (نايومي هاريس ببدلة من أليكساندير ماكوين، جنيفير أنستون بفستان من أنتطونيو بيراردي، و كيري راسل بجامب سوت من جي منديل).

لما شفت الملابس هذي، قررت إني أسوي لوك (أعرف من زمان ما سويت واحد، فقلت فرصة) المختلف، إني ما بغيت أدور لبس أسود بشوية أحمر، زي الملابس اللي حطيتها فوق. كان ببالي إني أختار لوك بنفس هذي الألوان من دون ما يكون اللونين موجودات بنفس القطعة (إذا كان كلامي واضح). 

My Name is Red by dejavuar featuring a pleated skirt

الأشياء هنا كلها فوق المية الدولار، (أعتذر للي يدور اقتراحات أرخص، بس دايم أحاول أنوع) هذي المرة اشتهيت أختار أشياء كلها هاي إيند. و زي أي لبس بالعالم، لو كان غالي عليكم، بالغالب فيه أشياء تشبه للاقتراحات هنا، بأسعار أرخص. المهم خلونا نتكلم عن اللبس.

ما أعرف ليه، أحس إن هذا اللبس قد شفته على أحد (لو كنت ناسخة أحد و أنا ما أدري، ممكن تحطون لي رابط للصورة بالتعليقات). المهم الفكرة زي ما وضحت، الأحمر بين السواد. لما كنت أفكر باللبس قررت ببالي إن الأحمر بيكون إكسسوار مو جزء من اللبس نفسه، و كان ودي بشيء بس أحمر، و لقيت هذي الكلوتش من هلموت لانچ بس مستطيل أحمر، و أعتقد إنها مرة مناسبة للفكرة. بعد ما لقيت الشنطة، أعتقد كل شيء صار ببالي واضح، أبغى سويتر و أبغى تنورة،  و أبغى بوت كلهم سود. فاخترت هذي السويتر من فانيسا برونو، أعرف إن شكلها بايخ هنا، بس شيكوا على الرابط، و ناظروا اللون الثاني منها، بالذات، الفتحة من ورا. (وش أسوي، يوكس عنده أشياء حلوة كثيرة، بس عرضهم بايخ)، شيء ثاني بعد من يوكس، هذي التنورة الجلد مكسرة، حسيت ما دام اللبس أسود بأسود، نحتاج يكون فيه ملمس مختلف بين القطعتين، أو بيكون ممل و سايح على بعض، التكسير، و لمعة الجلد، أحس أعطت هذا الإحساس. آخر شيء اخترت بوت جيفانشي، تلقونه هنا ، أولا بغيت بوت من الأساس، بس حبيت أنه مفتوح من قدام، بما إن اللبس مغطى بالكامل (على الأقل من قدام)، و بنفس الوقت بغيته كعب علشان أبعده من هومليس ستايل، لستايل أكثر شيك.

وش رأيكم بلمسة الأحمر على لبس أسود كامل؟ تحسونه ما فرقت كثير، و إلا أعطت حياة أكثر للبس؟ 

Best of PFWSS 2015

رسميا شهر الموضة خلص، أعرف إنه فيه مجموعات لسا ما طلعت صور اللوك بوك، لكني راح أعتبره خلص، و اتكلم عن أحسن الملابس من باريس، و لو طلع شيء يستاهل إني أتكلم عنه، أكيد راح أتكلم عنه. دايم كانوا يقولون إن باريس أحسن الأسابيع، و أظن أنا رأيي مختلف من موسم لموسم بخصوص وش أحسن أسبوع، لكن هذي المرة أعتقد صحيح باريس كانت أحسن أسبوع. 

خلونا نبدأ من البدلة الثانية من اليسار تحت من إيلي صعب، إيلي أعتقد هذي المرة قدم عرض مختلف عن عروضه السنوات الأخيرة، فيه لمسة رياضية، مع الفخامة اللي دايم نشوفها من ملابسة، بس الشك أقل و الملابس أكثر راحة (يعني مو ماسكة على الجسم)، أعجبني هذا اللبس اللي فيه تأثير رياضي مع الجاكيت البومبر بأكمام دانتيل، و لسببت ما أعرفه أحس أكثر اللبس اللي اخترته من هذا الأسبوع يصلح لكايت بلانشيت منها هذا اللبس، و مادام الكلام الحين عن أمل علم الدين، أعتقد هذي البدلة بتكون حلوة عليها، رغم إنه ماشفنها إلى الآن بإيلي و هو بالعادة مهتم كثير بتلبيس اللبنانيات. الفستان اللي بعده من أليساندرا ريتش أحسه بيكون حلو مرة على ميريل ستريب، ما أعرف إذا ميريل بتطلع هذي السنة أو لا، لأنه بالعادة ميريل ما تحضر مناسبات إلا إذا كان عندها فيلم، و إذا ما كانت ميريل ودي أشوفه على كيرستين دونست. من العروض اللي كانت بتأثير ملابس رياضة كان كارفين (الثاني من اليمين فوق)، كارفين مو بس استخدم الملابس الرياضية اللي كانت موجودة بكثير من العروض، بعد استخدم النقشات الآسيوية (اليابانية بالذات) اللي كانت بعد موجودة بقوة بكثير من العروض. الفستان هذا ودي أشوفه على أليكسا شونق أحسه بيكون حلو مرة عليها. اللبس اللي بعده (البدلة) من مايسن مارتين مارقيلا، من الملابس اللي قلت لكم ودي أشوفها على كايت بلانشيت، أو تيلدا، بس أحس بتكون على كايت أحلى. الفستان الفضي اللي تحت (الأول من اليمين) من ماكوين ودي أشوفه على لوبيتا لكن أحس ممكن أحد زي كلوي مورتيز بتلبسه. (الملابس الباقية: أول فستان فوق يمين من فونيه، الأخير من اليسار فوق بعد من جون قوليانو، الثاني تحت من اليمين سيلين). 

وش رأيكم أنتم بباريس؟ ووشي كانت أحسن العروض و الملابس بالنسبة لكم؟ 

Best Dressed: May 2014

ما أعتقد إنه قد صار عندي شهر "أفخم" من هذا الشهر، قصدي طبعا خيارات الملابس، كل اللي صار عندي بالنهاية ملابس سهرة و على إني ما أظن فيه ألوان كثيرة، بس أعتقد الخيارات بالنهاية مختلفة، و تناسب ناس مختلفين. طبعا ما يحتاج أعيد أنه الشهر اللي فات كان الشهر اللي فيه ميت قالا و مهرجان كان، و بريميرات لكم فيلم صيفي.  

صراحة ما قدرت ما أحط إيل فانينق بتصويت هذا الشهر. بالصورة هذي إيل لابسة لجورج حبيقة، إيل و أنجلينا جولي جالسين يروجون لفيلم مالفيسينت، (أظن إني راح أتكلم عنهم بشكل منفصل بعدين). مصمم لبناني ثاني موجود بالقائمة هو جورج شقرا على فان بينق بينق (الثاني من اليسار فوق) ، مشكلتي الوحيد مع اللبس هذا أنه شوي طويل، بس يظل حلو، ما أقدر أتجاهله. بما إننا نتكلم عن الأبيض خلونا نتكلم عن كايت بلانشيت برالف لورين، صراحة هذي المرأة أناقة بشكل إنسان.

مو قلت لكم راح أتكلم عن أكثر من فستان أحمر، هذولا هم٬ أريزونا ميوز برالف آن روسو كتور، و مونيكا بالوتشي بدولتشي آن قابانا آلتا مودا.
ما يحتاج أتكلم عن نتاشا پولي، لأني قد تكلمت عن هذي المرأة و كيف إنها صدق عارضة، الصورة يمكن مو واضحة، بس كبروها للتفاصيل.

من أحسن لبس لشهر مايو 2014؟

إيل فانينق بجورج حبيقة

أريزونا ميوز برالف آن روسو كتور

فان بينق بينق بجورج شفرا

نايومي كامبل بأليكساندير ماكوين

كايت بلانشيت برالف لورين

نتاشا بولي بفيونيه كتور

أنجلينا جولي بأتلييه ڤيرساتشي

مونيكا بالوتشي بدولتشي آن قابانا ألتا مودا

Poll Maker

A Month with Jennifer Connelly

أتذكر أول مرة عرفت و حبيت جنيفير كونللي من يوم شفتها ببيوتيفول مايند، كل شيء فيها حلو، عيونها لون شعرها، حتى حواجبها اللي كانت ثقيلة قبل كارا، و قبل لا يطيح كل العالم بالحواجب العريضة (مو طبعا قبل أودري هابيرون)، بس أتكلم عن الناس العايشة. 

المهم ما علينا، الشهر اللي فات جنيفير كانت تروج لفيلمها الجديد نوح، علشان كذا طلعت كثير على الريد كاربيت، و زي ما قلت لكم بموضع أحسن لبس لشهر مارس، قررت إني أكتب عنها موضوع منفصل. 

طبعا غير شكلها، و جمالها، الشيء اللي أحبه بستايلها إنها مو مملة، و قدرت بشهر كل مرة تطلع، تطلع بشكل مختلف، و بالنسبة لي بالحملة الترويجية لفيلم نوح، غطت على أيما واتسون اللي تشارك معاها بنفس الفيلم، مع إنه إذا تكلمنا بنفس طريقة التفكير اللي تعتقد إن الوحدة إذا كبرت صارت أقل جاذبية. بالنسبة لي جنيفير و عمرها 43 كانت أميز و أجمل من إيما و هي عمرها  23. 

ما أعرف وش اللوك المفضل عندي، حبيت طول الجامباتيستا فالي، و مكياجها و جزمها معاه. بعد حبيت البدلة الإيف سان لوغان، شكلها فيه مرة أنيق، فستانها الماكوين ما أعتقد أحد يقدر يلبسه زيها، و لا يحتاج أذكركم إنه وحده عمرها 40 تلبس الجلد بالكولنيس هذا بلوي فيتون. 

أنتم وشو اللبس المفضل عندكم؟ 

Best Dressed 2013 Winner

أعرف إني متأخرة عن باقي العالم، و يمكن أنكم ما عاد تهتمون، لكن بهذي الحالة أنا جالسة أقنع نفسي أنه: "أن تأتي متأخرا خيرا من ألا تأتي مطلقا"، أو شيء زي كذا. ما علينا خلونا نتكلم عن التصويت، و اللبس اللي اخترتوه، اسمحوا لي أقول للمرة اللي ما أعرف كم، إني ما توقعت هذا الاختيار، بس زي دايم، أعتقد أنكم اخترتوا لبس أنيق، و يمكنه من أكثر الاختيارات الموجودة "كلاسيكية". 

ترشيحاتكم اختارت نايومي هاريس بأليكساندير ماكوين. صحيح إني كثير أحب الفساتين و الاختيارات "الغريبة"، بس بعد أحب الملابس اللي مالها عمر. يعني تشوفها اليوم على أحد، أو تشوفها بعد سنتين على أحد ثاني، أو فرضا تلقى صورة قديمة أحد لابس نفس اللبس، كلها تحس إنها حلوة، و لا كأنها موضة قديمة. 

طبعا ما يحتاج أقول إني أحب الذهبي، إذا الذهبي لون، فهو لوني المفضل (يمكن)، أحب المجوهرات الذهبية "الصفراء"، أحب الترتر الذهبي، باختصار أحب أي شيء يلمع و لونه أصفر. 

أعرف أنه هذا اللبس ما عرضته على التصويت قبل، لأنه كان اختياري لشهر ديسمبر، أوعدك بافكر بطريقة لحل المشكلة من بدري هذي السنة، و انتظروا خيارات شهر يناير 2014 بعد أقل من أسبوع تقريبا، إن شاء الله بتعجبكم. و إن شاء الله يشتغل معاي خدمة التصويت الجديدة. 

Best Dressed: October 2013

هذي المرة أحس أنه الأختيارات اللي كانت موجودة لشهر أكتوبر أفضل بكثير من شهر سيبتمبر، إن شاء الله تعجبكم. أقدر أقول إن الخيارات ما كان فيها شيء جديد أو لبس مثير بشكل ما توقعناه، لكنها كلها من وجهة نظري خيارات كلاسيكية أنيقة، أظن إنها تبقى حلوة لفترة طويلة. 

أولا خلوني أقول إني أول ما شفت آنيا ريبوك (الثانية من اليمين بالصف الأول) بهذا الفستان من أيلي صعب، تأكدت إني  لازم أحطها بالقائمة، ما ودي أتكلم أكثر آخاف أضيع المساحة هنا. نفس الشيء على لبس أليكساندرا روش بالفستان الكحلي المنقط، صح ما خلاني أشهق زي آنيا، لكن حسيت إني لازم أدخله لأنه منقط، و أعتقد إني ما قد اخترت شيء منقط هنا أو فيه دوائر (صححوني لو كنت غلطانه). 

آشلي ميداكوي و دايان كروقر يدخلون مرة ما أعرف كم أكيد ثالثة أو أكثر القائمة، ديور نفس الموضوع أظنه أكثر الماركات اللي دخلت القائمة (بعد مو متأكدة). ساندرا بالوك و لوبيتا كلهم عندهم أفلام يروجون لها، و أعتقد أنهم اثنيناتهم كانوا محافظات على مستوى عالي من ناحية أختيارهم للملابس، فكان لازم يدخل شيء من لبسهم القائمة. 

Create your free online surveys with SurveyMonkey , the world's leading questionnaire tool.

Best Dressed: September 2013

زي ما قلت لكم قبل، ما أعرف ليه الملابس الحلوة كانت كثيرة هذا الشهر، لدرجة إني لما جيت أختار القائمة النهائية، كل شوي أحذف أحد و أدخل أحد، كله علشان آصل القائمة النهائية الأحسن. بصراحة ما أعرف أنا قدرت أختار الأحسن، أو فيه ناس طلعوا من القائمة و هم يستاهلون، بس خلونا نركز على الموجودين، و إن شاء الله يعجبونكم. 

أقدر أقول إن الثيم حق هذا الشهر هو المنكروم (الأبيض و الأسود) ما عادا دايان كروقر بفالنتينو و آشلي ميداكوي بمونيك لوليه (بالمناسبة كل الثنتين كانوا قبل موجودات بأحسن لبس). أول وحدة عرفت إني راح أدخلها هي لوبيتا نيونقو (الصف الأول، أول وحدة من اليسار) بفستان برادا (أتمنى إني قلت اسمها صح)، بصراحة ما أعرف هو الفستان حلو، و إلا هي اللي محليته. بس بشكل عام أعتقد لو استمرت على الساحة قدامنا وحدة أعتقد إنها بتكون من الموجودات دايم على هذي المدونة. سيينا ميلر بعد من الأشخاص اللي أعتقد إني صايرة ما أقدر أقول لأي شيء تلبسه أنه مو حلو، ما أعرف بس من ولدت و هي صايرة حلوة بعيني، قولوا لي أنكم أنتم بعد تشوفونها حلوة، مو بس أنا أتوهم. إليزابيث موس (أول يمين) للي ما يعرف ماد مين مثلا أعجبني شكلها مرة بالإيمي، و إن خياراتها كلها كلاسيكية، من شكل الفستان، لألوانه للون الروج. 

Create your free online surveys with SurveyMonkey , the world's leading questionnaire tool.

Best Dressed: June 2013

أقدر أقول إن شهر يونيو ما كان أحسن شهر من ناحية الملابس، على أنه كان فيه بريميرات أفلام مثل ذا بلينق رينق و سوبرمان إلا إنه الملابس ما كانت مرة مميزة، مو سيئة لكن مو مميزة. أقدر أختصر الموضوع أقول أنه أربعة إنجليزيات دخلوا القائمة هذي المرة (أظنه أكبر عدد من بديت أسوي التصويت). و الثلاثة أشياء اللي مو جديدة على "أحسن لبس" هم: سيينا ميلر، لوي فيتون و فالنتينو. 

أظن إن القائمة هذي المرة متنوعة مرة (من ناحية خيارات اللبس). من اللبس الناعم مرة زي الفالنتينو اللي لابسته جايسا شيمينازو (الصف الثاني يسار) للبس كارا دوليفان ببنطلون بوربري و كعب أحمر (مو قايلة لكم أحس إن الجزم الحمراء/الكورال كاثرة على الريدكاربيت). بالنسبة لي أكثر لبس ما يمثلني هو صوفيا فيرقارا من إيرفي ليرو، يمكن اللي متابعني من زمان يعرف أنه هذي النوعية من اللبس ما تعجبني (كليفيج و كرفز و أشياء زي كذا)، لكن حبيت المجوهرات اللي اختارتها مع الملابس حسيتها أعطت اللبس "رقي" و أظن بهذا الشكل حتى لو ما كان ذوقي فهو (على الأقل على حسب علمي ذوق كثيرين).

حبيت لبس أوليفيا باليرمو، و بذات اختيارها للجزم، حبيت لون فستان أشلي ميداكوي (الصف الثاني، الأول من اليمين) مرة حلو مع لون بشرته، آخر شيء حبيت مرة شكل هايلي بينيت بلوي فيتون خريف 2013، هايلي مو أول وحدة تلبس من المجموعة (أتذكر إن كايت موس و فلورانس ويلش و كارلي كلوس كلهم لبسوا منها) لكن بالنسبة لي هايلي أحسن من لبس. لون الفستان مع لون شعرها و بشرتها و تسريحتها و مكياجها و أهم شيء كيف الفستان ماسك عليها كله خلاني أظن أنها تستاهل مكان بالقائمة.

* أعرف إن حالتي حالة مع التصويتات، بس صلحت التصويت، و حطيته على موقع ثاني، إن شاء الله ما يخرب. 

Create your free online surveys with SurveyMonkey , the world's leading questionnaire tool.

Good Stuff from Kim

من يتخيل أنه فيه شيء من كيم كرداشيان ممكن يعجبني!! الشيء اللي باتكلم عنه ماله شغل بحملها (علشان أريحكم من البداية). بالمناسبة ستايل حملها كل مرة أشوفها بلبس يستفزني إني أكتب عنه، لكن أتراجع باللحظة الأخيرة، و أقول "بالطقاق". 

كيم للمرة الثانية تعرض مجموعة من أغراضها للبيع على إي باي، و صراحة اللقافة وحدها هي اللي خلتني أفتش بالأشياء اللي عارضتها، و الشيء المثير (على الأقل بالنسبة لي) لقيت أشياء حلوة، و ممكن الواحد يفكر يشتريها.

بالبداية، علشان أكون صادقة معاكم مو بس هذي الأشياء اللي تستحق أنه أحد يفكر يشتريها من عندها، لكم هذي أكثر شيء آثارني. بالمقابل في أشياء بايخة مرة.

أول شيء أعجبني هي هذي الجزمة المخمل من دولتشي آن قابانا. حاولت أقاوم أعجابي علشانها بس من كيم، لكن ما قدرت، لكن كويس لميزانيتي إنها مو بمقاس رجلي. الكعب محطوط للمزايدة ب .99 بينس لكن أظن لوقت ما كتبت هذا الكلام وصلت 15 دولار و باقي تقريبا 8 أيام. 

الشيء الثاني اللي عجبني هو فستان أليكساندير ماكوين، الفستان كأني أتذكر إني شفته عليها (مو متأكدة)، لكنه فستان مرة حلو، و لا هو فستان موضة و ينتهي (أسود و ذهبي) يعني متى صاروا موضة قديمة. 

آخر شيء هو هذا الجاكيت البايكر الأخضر من ريك أوينز تعرفون إني أحب البايكر، و بشكل عام أعتقد إن جاكيت جلد المفروض أنه يكون قطعة أساسية بدولاب أي أحد، علشان كذا أعتقد أنه الجاكيت هذا بيكون "صيد" حلو لو أحد قدر يحصل عليه (صح سعره من الآن مو رخيص بدأ بنفس السعر .99 بينس و الحين 255 دولار، لكنه أكيد أرخص من جاكيت بايكر جديد لريك أوينز. 

هنا تلقون باقي الأشياء (فيه ساعات "كارتيه" و شنط "شانيل")، لو مهتمين و أعتقد كلها بتخلص بعد تقريبا 8 أيام. 

Oz: The editorial

رحت أشوف أوز ذا قريت آن باورفول. باختصار أقدر أقول لكم إني تفريبا صرت زي الأطفال لما يشوفون فيلم أو يسمعون قصة تعجبهم، و تصير هي شغلهم الشاغل. يدورون على ألعاب زيها، و تصير كل الأشياء تفسر على أساس هذي القصة. يعني ممكن تعطينه الغداء يقرر أنه يحوله ساحة لعب لشخصيات هذي القصة أو الفيلم.

من زمان ما حسيت إني اندمجت مع فيلم قد اندماجي مع هذا الفيلم. أول شيء سويته لما رجعت للبيت بعد ما شفت الفيلم دورت على مين صمم الملابس لأن الملابس صراحة تحفة. حاولت بعدها أدور على صور واضحة للملابس لكن ما قدرت ألقى شيء (يمكن لأن الفيلم جديد). و لأني ما لقيت صور، بس متحمسة مرة أتكلم عن ملابس الفيلم، قررت أختار ملابس من مجموعات خريف 2013 (اللي توها خلصت) و أحطها على هذا البوستر. الفكرة إني أختار من المجموعات شيء يشبه اللبس اللي لابسته الممثلات بالفيلم.

صراحة أعتقد اللي ناقص الحين، أنه مجلة أزياء تسوي إيدتوريال مستوحى من الفيلم. بعد الباليت المكياج اللي طلعتها أوربان دكاي للفيلم (عن الشخصيتيت قيلندا و ثيدورا (هنا و هنا). و نيكولاس كيركوود سوا مجموعة جزم تنباع بسلفريج بلندن عن الفيلم (لا تضيق صدوركم مرة غالية). 

 قلت لكم إني حبيت الفيلم، الملابس كانت مرة حلوة خصوصا أعجبتني ملابس قيلندا (ميشيل وليمز). و أعجبني مرة المكياج خصوصا مكياج ثيودورا (ميلا كونيس). (لو كنتوا مهتمين كيف يسوا مكياجهم تلقون هنا و هنا و هنا مكياج قيلندا و ثيدورا و  إيفانورا (ريتشيل فايز). 

الملابس اللس حاطتها من اليمين لليسار الأخضر لإفينورا من مونيك لوليه، الأبيض لقيلندا من أليكساندير ماكوين، الأحمر الفوشي لثيدورا من بالمان و الفستان الأسود لثيدورا بعد (لو شفتوا الفيلم بتعرفون ليه اخترت له لبسين) من قريث بيو.

تحديث:
لآن أختي تقول صور الملابس صغيرة، حطيت روابط للفساتين من العروض (تراني مقتنعة أنها واضحة) بس هذا من إرضاء الجمهور P:.

RED

نرجع مرة ثانية لأهم موضات الشتاء اللي جايي ... من أكثر الثيمات اللي استخدمت لعروض شتاء 2012 كانت (الظلام، السواد، القتامة) أي معنى مقابل لكلمة dark بالإنجليزي. الظلامية أو القتامة ما كانت بس بالألوان، لكن حتى بشكل الملابس نفسها، أكثر من عرض كان مستوحى من العصر الباروكي و القوطي. مع ذلك كان فيه بكثير من العروض اللون الأحمر القاني. ما أعرف السبب الثورات العربية، أو أيش، لكن اللون الأحمر بيكون كثير للشتاء الجاي. 

علشان أكون صريحة، ما قد حسيت بالراحة باللون الأحمر، فأنا لا سوداء و لا بيضاء علشان أحس إن اللون يعطني شيء، كل اللي أحسه إني أزيد صفار :S ... يمكن لأنه لون قوي أخاف منه، لكني أحب كثير الإكسسوارت الحمراء (شنط، جزم، مجوهرات). أعرف إننا بنشوف كثير السنة هذي على الريد كاربيت هذا اللون، لكن الشيء اللي مو متأكدة منه، لو تحولت هذي الموضة للهاي ستريت كيف ممكن ألبس "حمار" بهذي الكمية، من دون ما أحس أنه بيغطي علي و لا يشوف الناس مني إلا شيء أحمر يتحرك. 

كيفكم مع اللون  الأحمر؟ ممكن أو قد لبستي شيء أحمر بالكامل و حسيتي أنه عطاك ما غطى عليك؟

Military, Again

خلصت أسابيع الموضة، صراحة كان صعب إني ألحق و أقلب كل العروض اللي نزلت لها صور على نت، خصوصا مع كمية المناسبات هذي السنة، اللي وافقت العروض. 

ما علينا، حبيت بكم موضوع جاي أكتب عن أهم الموضات اللي كانت بعروض الخريف و الشتاء الجايين (مو هذا اللي تقريبا خلص)، طبعا الكلام بشكل عام، و زي دايم إن شاء الله مع الوقت راح أتكلم عن هذي الأشياء أكثر. 

ما أعرف كم مرة بهذي المدونة أعلنت عن حبي للأشياء الجيشية، ما زلت أحبها، ما طفشت أبدا منها، و لا أعتقد إني راح أطفش، مادام كل مرة راح أشوف شيء جديد فيها. 

الجيشي بالعروض اللي خلصت كان تقريبا بكل عرض، لون أو إيحاء تصاميم أو حتى مدمج بالثيم الأكبر اللي كان ثيم لكثير من العروض، هي موضوع "المرأة القوية"، ما أعرف كيف أفسرها، لكن يمكن الشيء الأوضح أنه تصاميم الملابس كانت أقل نعومة و أنثوية، يعني بناطيل كثيرة، قصات واقفة، و قليل مرة ملابس ماسكة على الجسم. 

قلت لكم مبسوطة كثير على وجود الجيشي بكثرة بالعروض، أكيد أتوقع أنه الموضة هذي بتكون من الموضات اللي بتنسخ بالهاي ستريت (أتوقع زارا، و إتش آن إم) بيسوون نسخ حلوة. الشيء الحلو بالجيشي هذي المرة، أنه جاي بأشكال مختلفة كثير، من جمب سوت، لفساتين، جاكيتات و بالطوات، شيء وسيع، و شيء ضيق، شيء ثقيل، و شيء أخف ... فأعتقد أنه كل شخص بيلقى شيء يناسب ذوقه بهذي الموضة. 

وش رايكم بالجيشي؟ عندك شيء جيشي أصلا؟ متحمسة تلبسين شيء جيشي للشتاء الجاي؟

The Duchess

كايت ميدلتون أمس كانت حاضرة مناسبة، ما أعرف وين، بس أهم شيء كان شكلها مرة حلو، لدرجة و أنا أدور صور زينة لها علشان أوريكم إياها، لما سويت بحث، و أول مرة من تزوجت بدل ما أدور بحث باسم كايت ميدلتون، من دون شعور، كتبت ببحثي دوقة كيمبرج :).

كايت بهذا العشاء، كانت لابسة فستان أسود مخمل من أليكساندير ماكوين (فستان أسود جديد يعجبني بهذي السنة)، لو ما كنتوا قريتوا موضوع الفساتين السوداء، هنا تلقونه. المهم زي ما قلت لكم، صدق أول مرة أحس إنها دوقة أو إنها شخصية ملكية، و أول مرة أصلا يعجبني شكلها من قبل ما تتزوج، و من بعد ما تزوجت، و حتى يوم زواجها ما عجبتني مرة (لو تتذكرون كتبت عنها). الفستان هذا واضح أنه نسخة مسوية لها لحالها، لكن عند نيت آي بورتيه، يبيعون واحد نفس الموديل، لكن الجزء السفلي فيه شفاف، يمكنه بالأساس نفس الفستان، لكن أكيد إن كايت ماراح تطلع بشيء شفاف زي كذا. عجبتني المجوهرات اللي لابستها، عجبني مكياجها (أول مرة أحبه)، بالعادة كحل عيونها سيء جدا، شعرها زي دايم حلو. يمكن لو فيه شيء وحيد ودي أغيره، هو الشنطة اللي شايلتها، ما عجبني كثير إنها سوداء مخمل (صراحة ما أعرف شعوري تجاهها، هي عاجبتني إنها مطقمتها مع الفستان أو لا :).

 شرايكم بستايل كايت ميديلتون؟ وش أكثر لوك لها عجبكم هذي السنة؟

Questioning a Stylist

من فترة و أنا مو عاجبني ستايل إيما واتسون، خصوصا بعد ما قصت شعرها، بس صايرة أحط لنفسي نظام إني ما راح أهزأ أحد هنا، على الأقل من دون سبب، اللي ما يبغى يلبس زين لا يلبس زين هو حر. 

اللي خلاني أكتب عنها اليوم هو أنه الستايلست حقتها هي كارولين سيبر (على خبري)، و اللي أشوفه إن كارولين تلبس أحسن من لبسها، الشيء اللي بأقوله، إذا كارولين تفضل إن شكلها يطلع أحسن من زباينها، تترك الشغل، و تصير زي كثير من السلبرتي، اللي مالهم وظايف بس بكل مكان طالعين و يلبسون ملابس غالية و الناس تصورهم زي أوليفيا باليرمو و أليكسا شونق. 

الفترة هذي هي فترة الترويج للجزء الأخير من هاري بوتير، إلى الآن ما شفت شيء على إيما خلاني أقول واااااو أو على الأقل، أفكر إن شكلها حلو. البنت كيوت، جسمها طبيعي بسهولة تقدر تكون حلوة أو على الأقل أحلى من كذا. 

اليوم كانت إيما عند دايفيد ليترمان، لبست له لبس من بليمان خريف 2011، الفستان معدل، بس حتى بعد التعديل ما عجبني عليها. الأكتاف الكبيرة ما لبقت لها، خصوصا و إن رأسها صغير (هنا من زاوية ثانية  و بتعرفون وش أقصد). 

الشيء الثاني اللي ما عجبني أبدا أبدا أبدا ... هي الجزم ويجز؟!! يعني فستان زي كذا غريب، و ترتر الظن المفروض تختار له خيارات أكثر فخامة و تطرف و تناسب اللبس مو وجز تصلح مع فستان صيفي فلورال أو جينز و تي شيرت. 

الصورة اللي على اليسار زي ما تشوفون هي الصورة الأصلية، الصورة اللي على اليمين تعديلاتي، و سامحوني على البربسة هذي، بس ما عندي فوتوشوب، فالشغل على قد الحال و الشكوى لغير الله مذلة P:. 

لأنه ما عجبتني الأكمام شلتها من الطرف الثاني مع إن شكل الفستان عاجبني كذا، بس مو عليها، أعرف أنه تقريبا راحت فكرة الفستان، بس على الأقل أظن أنه كذا بيطلع مناسب لها. 

الجزم من أليكساندير ماكوين حلوة مرة، صحيح أنا شوهتها بالشغل حقي، بس تلقونها هنا عند net-a-porter.com بـ 2731 ريال تقريبا. 

شرايكم بشكل إيما، و وشرايكم بالتعديل؟

Tour Time

منيب مرة مع الأغاني و المغنين، يعني اللي يصادف إني أسمعه، أسمعه، لكن ألاحق أخبارهم و ألبوماتهم، ما قد سويتها. و لا تعجبني كثير الخنبقة اللي يسوونها بالحفلات، هذي الملابس الغريبة "الكستومز" يعني ما أشوف إلا إنها فكرة فاشلة، و تأكدت من هذي الفكرة بفيديو كليب بيونسيه الأخير لأغنيتها Run the World، أغنية كلماتها تافهة و لا لها معنى، بس إنها كانت بكل مكان بالنت علشانها لبست عشرة، أو ما أعرف كم فستان من الهاي فاشن و الأوت كتو بالفيديو (سو عليه سيرش باليوتيوب، إذا ودكم تشوفونه).

زي ما قلت لكم مانيب مهتمة بأخبار المغنين، و لا أعرف من اللي راح يسوي جولة غنائية، و مين لا، بس هو بالعادة بالصيف العالم تحمي الطار :P.

علشان كذا سويت هذا الموضوع اللي أخترت فيه من مجموعات الخريف الأخيرة ملابس، ممكن تلبسها أربع مغنيات لحفلات الصيف.

تتذكرون التصنيف اللي قلت لكم عنه قبل "بيتاتيك"؟ اللي حطيت فيها آنا ديلو روسو. القائمة فيها بعد ليدي قاقا. هذي المخلوقة ما أحبها أبدا، و لا أحب أشوفها طريقتها "تراني شخص غريب" تنرفزني.

ما علينا هي موجودة، و لا أقدر أغير شيء، علشان كذا باقترح وش ممكن تلبس لوحدة من حفلاتها، طبعا هي تلبس ملابس غريبة كثيرة، و تلبس لأكساندير ماكوين كثير، خصوصا إنها غنت بعرضه الأخير اللي قبل لا ينتحر ...

أحس الفستان هذا بتعديل بسيط، ما أعرف وين ممكن يمشي عليها، لأنه بهذا الشكل، أحس أنه كبير مرة. يمكن تقلل الأشياء السوداء اللي متدلية من الفستان.

من قائمة المغنيات اللي اليوم بأحطهم يمكن فلورانس هي أكثر وحده أحبها، صح ما أعرف أسامي أغانيها، و لا ألبوماتها، بس ملابسها حلوة، و صوتها حلو (إذا تحبون الموسيقى "الروحية") دور عليها و أسمعوا لها.

تعجبني بملابس فلورانس، أنه أغلبها لو لبستها فيروز (طبعا و هي أصغر من الحين)، بتطلع عليها حلوة، أصلا ما أعرف وش يربطها ببالي بفيروز ؟! بس ما يهم أحس أنه الفستان الأخضر هذا من رالف لورين (و اللي بادية أحبه من جديد)، أحس بيطلع عليها حلو، لو بعد يطول من ورا.

بالأساس هذا الفستان، هو الفستان اللي خلاني أفكر بهذا البوست، أول ما شفته قبل شهور من عرض فيفيان ويستوود، ريانا أول من من جت ببالي، طبعا حفظتها عندي، و كنت راح أسوي بوست عن ريانا وش ممكن تلبس، بس إني تعيجزت، وراح الوقت و بطلت، و الحين قلت أحطه مع مجموعة مغنيات ... بس باختصار، هذا الفستان مخلوق لها.

بديت ببيونسية و الفيديو كليب و الأغنية البايخة، بس هذا ما يعني إني ما أكتب عنها، و أقدم لها خدمة P: المهم أخترت لها هذا الفستان لها من مجموعة دولتشي آن قابانا اللي أكثرها نجوم، صراحة أول ما تصفحت المجموعة، ما أعرف شعوري كان غريب تجاهها، بس الحين بعد شهور و أنا أشوفها حبيتها، خصوصا بعد ما شفت واحد من فساتينهم على زوي سالندا. أحس المجموعة الأخيرة بالنجوم، و الترتر تشبه بونسية خصوصا جو الديسكو نهاية السبعينات و الثمانينات.

وش رايكم أنتم بالأختيارات؟ و عندكم مغنية مفضلة من القائمة اللي حطيتها أو غير (ملابس و موسيقى)؟

Short Cut

ما راح أطول السالفة، لأن الزواج ما أعجبني مو لأني حاطة ببالي أنه ماراح يكون حلو، و قلت لكم الكلام هذا يمكن مليون مرة قبل، إني ما أتوقع أنه يكون حلو ...
الزواج عادي جدا، عربات صلاوات عيت تخلص و فستان العروس مو شين بس أنه مصممته ساره بورتن من أليكسندير ماكوين، بالنسبة لي كلام فاضي، يعني ألكسندر ماكوين يطلع منه فستان زي كذا؟ نسخة مبسطة من فستان قرايس كيللي (زوجة الأمير رينيه أمير موناكو اللي مات، و أم ألبير أمير موناكو الحين).

الفستان اللي فوق، هذا يسمى فستان زواج ملكي ... اللي لبسته كايت كان فستان حلو، بيكون حلو لزواج عادي، و لمصمم أو مصممة غير ساره بيرتون ... قلت لكم إني زعلانة، و ما عجبني شيء، لكن فيكتوريا بيكام كانت هناك، و انبسطت منها كثير، شكلها مرة حلو.

أكيد أغلبكم شاف الزواج و شاف فيكتوريا، علشان كذا ما بغيت أنتظر أكثر علشان ألقى صور أحلى لفكتوريا ... فكتوريا من بين تقريبا كل الحضور اللي أنتبهت لهم قدرت تطلع حلوة بزواج تقليدي الناس لازم تلبس فيه لبس ممل كله تيورات و قبعات ... فيكتوريا من الرأس للرجول كانت لابسة كحلي، كل شيء من تصميمها (ما أدري عن القبعة) القبعة حلوة، الشعر مرة حلو ...

بالزواج سمعت أنه موزة المسند بتجي، كنت متحمسة أشوف وش راح تلبس، لأن موزة بالنسبة لي تقريبا هي أحسن سيدة أولى بالعالم تلبس ... لمحت بعد بالزواج لولا سلمى زوجة ملك المغرب، و شكلها لابسة قفطان وردي حلو، بعد لمحت ليدي ساره بنت أخت الملكة اليزبيث كانت لابسة لبس كأنها أودري هاببيرون.
لو ألقى صورة لأي أحد منهم، إن شاء الله راح أجيبها لكم.

قولوا لي رأيكم أنتم بالزواج، و توافقوني أو لا ؟

Weekend Wedding

الويك إيند هذا زواج نيكول رتشي ... أحس إنها راح تسوي شي حلو مره، أو شي بايخ مره، الي عرفته أنها راح تلبس من ماركيزا، أحسه شي خاص فيها مو موجود من الكوليكشين الأخير ... بس لو كنت باختار أنا منه كنت راح أختار هذا الفستان:

الفستان من أول ما شفته عجبني، و على طول فكرت فيه أنه يصلح لزواج، يمكن أكثر شي عجبني فيه أنه يشبه لبس أودري هذا الي ب My Fair Lady و تعرفون أنه أنا زي كل بنات العالم أحب أودري هابيرون.

هذا الموضوع خلاني أجيب طاري موضوع ثاني من زمان بخاطري بس مستحية منكم لأنه بتقولون الحمد لله على النعمة.

المهم الي بقوله ... قبل تقريبا أسبوعين حلمت حلم سخيف، حلمت أنه مجلة أزياء (ما أعرف أي وحده) طلبت مني إنهم يصورون زواجي، قلت لهم إني تزوجت و خلصت، بس إذا ما عندكم مشكلة أسوي زواج ثاني ... المهم قمت من النوم قبل ما أفكر كيف شكل الزواج الكذبي الي راح يصورونه لي المجلة ... و جلست أفكر، ما أبغى أعيد زواجي الأصلي صح مو شين يعني شين، بس مو واااو لدرجة أنه أبغى مجلة تصوره (دايم تصير لما نبغى شي يطلع حلو مستحيل يطلع زي اللي ببالنا) بس هذي المره ما راح أشيل هم لأني راح آخذ فلوس من المجلة ... جلست أفكر وشو ثيم الزواج أول شي فكرت فيه هذا الفستان ، الفستان من مجموعة أليكساندير ماكوين الأخيرة ... على طول حسيت إني أبغى أسوي زواج بالغابة (أعرف أنرحم) حتى تراني سويت بحث عن الكاسات الي بتنحط على الطولات ... أبغى أقدم حلويات ألمانية أحسها تمشي مره مو زي الفرنسية، يعني الألمانية حلو طعمها بس شكلها حوسة، و أكثرها ألوانها غانقة، مو زي الفرنسية ملونة، يعني بتلبق على الغابة، و أكيد أبغى بوكيه الورود فيه برية ...

الي يبي يجي زواجي الثاني الكذبي الله يحييه بس شرط يدفع قطه، و القطة تبدأ بألف ريال P:

Stop Using McQ

فيه ناس يحسبون إنهم أذكياء، و هم كثير من صنف السليبرتي ... الحركة الي يحسبونها ذكية هو من مات أليكساندير ماكوين، و الي بيفك نفسه من نقد الناس له بالريدكاربيت يلبس ماكوين، عشان نجي و نقول: واااااو لبس من ماكوين هذا أكيد يحب الفاشن و يقدر أنه هذا المصمم كان عبقري ...

بالضبط هذا الي سوته آنا بيكوين حقت True Blood طبعا عشان تعرفون أنه آنا صدق أخذت فستان ماكوين عشان هذا السبب، هي بس قبل اسبوع متزوجة يعني طول الفترة الي فاتت كانت تفكر بزواجها و لا جا علي بالها الإيميز، أحد قالها ماكوين إلبسي ماكوين لو لبستيه كل الناس بتقول: وااااااااو ....

أنا صراحة كان ودي لو لبست هذا الفستان من ستيلا ... خصوصا إنها لبست من ستيلا بالقولدين قلوب للسنة الي فاتت، و كان حلو عليها.

Cannes Diaries: Cate Blanchett

أستورالية و بعد شقراء جديدة أخترتها ليوميات كان ... كايت بلانشيت بفيلمها الجديد روبين هود، كايت للأناقة النظيفة الكلاسيكية للنساء الي يحبون يصيرون كلاسيكيات بس مو قديمات يشوفون كيف كايت تلبس ... الصباح كايت طلعت بسوت من أرماني برافي لونها وردي فاتح كل شي كان متكتك ... المايك أب الشعر المجوهرات و أهم شي الكعب الي ما أعرف من وين بس يجنن ... نظاراتها حكاية ثانية ...

بالليل لبست كايت فستان من ماكوين الشي الحلو بكايت إنها كثير مرات تلبس ملابس شوي غريبة (زي الطبعات الي علي فستان ماكوين هذا) و تخليها شي عادي، كأنها ما طلعت بشي غريب الفستان حلو .. المايك آب حلو و الشعر حلو بعد.