My Sister in My Mother's Clothes

شفت اليوم عرض أليساندرا ريتش، تعرفون إنها تعجبني، يمكن قليل أتكلم عن مجموعة كاملة، لأن مجموعاتها دايم صغيرة، لكن هذي المرة عجبتني مرة، على إنه الملابس بالمجموعات اللي فاتت ذوقي أكثر من هذي المجموعة، لكن اللي عجبني إنها جالسة تستوحي من فترات ثانية زي هذي المجموعة اللي كأنها من بداية التسعينات، مع ذلك ما زالت بالخط حقها، الدانتيل و الملابس الأنيقة. 

قلت لكم المجموعة مو ذوقي، أول ما شفتها على طولي جا ببالي أختي، و جا ببالي ملابس أمي بالتسعينات، بالذات الإكسسوار (الشنط و الأحزمة). و باعتبار إن أختي أكثر وحدة تأخذ من أغراض أمي القديمة، أعتقد خلاص كل قصة المجموعة أقدر أختصرها بهذي الجملة: ملابس أختي اللي أخذتها من أمي. زي ما قلت لكم اللي أعجبني بهذي المجموعة إن أليساندرا محافظه على خطها، بس من دون ما تكرر نفسها. مرة أعجبني الفستان اللي فيه فتحة جهة البطن (الأول من اليمين) أحسه بيكون حلو على ريانا. أعجبتني الجمب سوت، الفستان اللي أظن إن لونه أخضر، مع إنه ممكن يكون أسود بس الإضاءة في اللي تعطيني هذا الإحساس. اللوك الأخير اللي أعجبني فيه إن أعتقد بهذي المجموعة أول مرة أليساندرا تسوي بنطلون، بس مع التوب و الحزام، ما زال اللبس يصلح لسهرات. أحسه بيكون حلو على أولقا كوريلنكو، أو حتى الفستان اللي قبله. 

أنتم وش رأيكم؟ أو تفضلون المجموعات اللي فاتت لأليساندرا؟ 

Best of PFWSS 2015

رسميا شهر الموضة خلص، أعرف إنه فيه مجموعات لسا ما طلعت صور اللوك بوك، لكني راح أعتبره خلص، و اتكلم عن أحسن الملابس من باريس، و لو طلع شيء يستاهل إني أتكلم عنه، أكيد راح أتكلم عنه. دايم كانوا يقولون إن باريس أحسن الأسابيع، و أظن أنا رأيي مختلف من موسم لموسم بخصوص وش أحسن أسبوع، لكن هذي المرة أعتقد صحيح باريس كانت أحسن أسبوع. 

خلونا نبدأ من البدلة الثانية من اليسار تحت من إيلي صعب، إيلي أعتقد هذي المرة قدم عرض مختلف عن عروضه السنوات الأخيرة، فيه لمسة رياضية، مع الفخامة اللي دايم نشوفها من ملابسة، بس الشك أقل و الملابس أكثر راحة (يعني مو ماسكة على الجسم)، أعجبني هذا اللبس اللي فيه تأثير رياضي مع الجاكيت البومبر بأكمام دانتيل، و لسببت ما أعرفه أحس أكثر اللبس اللي اخترته من هذا الأسبوع يصلح لكايت بلانشيت منها هذا اللبس، و مادام الكلام الحين عن أمل علم الدين، أعتقد هذي البدلة بتكون حلوة عليها، رغم إنه ماشفنها إلى الآن بإيلي و هو بالعادة مهتم كثير بتلبيس اللبنانيات. الفستان اللي بعده من أليساندرا ريتش أحسه بيكون حلو مرة على ميريل ستريب، ما أعرف إذا ميريل بتطلع هذي السنة أو لا، لأنه بالعادة ميريل ما تحضر مناسبات إلا إذا كان عندها فيلم، و إذا ما كانت ميريل ودي أشوفه على كيرستين دونست. من العروض اللي كانت بتأثير ملابس رياضة كان كارفين (الثاني من اليمين فوق)، كارفين مو بس استخدم الملابس الرياضية اللي كانت موجودة بكثير من العروض، بعد استخدم النقشات الآسيوية (اليابانية بالذات) اللي كانت بعد موجودة بقوة بكثير من العروض. الفستان هذا ودي أشوفه على أليكسا شونق أحسه بيكون حلو مرة عليها. اللبس اللي بعده (البدلة) من مايسن مارتين مارقيلا، من الملابس اللي قلت لكم ودي أشوفها على كايت بلانشيت، أو تيلدا، بس أحس بتكون على كايت أحلى. الفستان الفضي اللي تحت (الأول من اليمين) من ماكوين ودي أشوفه على لوبيتا لكن أحس ممكن أحد زي كلوي مورتيز بتلبسه. (الملابس الباقية: أول فستان فوق يمين من فونيه، الأخير من اليسار فوق بعد من جون قوليانو، الثاني تحت من اليمين سيلين). 

وش رأيكم أنتم بباريس؟ ووشي كانت أحسن العروض و الملابس بالنسبة لكم؟ 

Red Carpet Worthy: Paris Edition| F.W 2014

وصلنا لنهاية آخر أسبوع، صحيح بعض الأشياء عديتها، لأنه كانت لوك بوك و لا طلعت إلا بعد ما خلص الأسبوع، بس لو حصل لي أتكلم عنها بوقت ثاني راح أتكلم، بس خلونا نحط أحسن الملابس بالنسبة لي من باريس، و كلام عن العروض بشكل عام. 

زي دايم قبل ما أتكلم عن الملابس، باتكلم عن العروض بشكل عام، و للي ما أنتبه بس أوضح لكم إن أسبوع باريس تقريبا أسبوعين، أظنه أطول أسبوع بعده يجي أسبوع نيويورك. المهم خلونا نتكلم عن العروض. 

• آخر يوم من العروض عرض لوي فيتون بعد ما تركه مارك جايكوب، و صار مصممه نيكولا قاسكيه (مصمم بلانسياقا السابق). للي ما يعرف إن نيكولا هو اللي طلع شنط بلانسياقا متروسايكل و سيتي، و شكله تخصصه الشنط، لأنه بالنسبة لي كانت الشنط بالعرض مرة حلوة (يمكن أتكلم عنها بوقت ثاني). 
• كان فيه لبس رمادي، بس إذا كان فيه لون لعروض باريس فهو اللون الأحمر و درجاته. 
• أعجبتني كثير من ملابس ديور و أعتقد أنه بيكون كثير على الريد كاربيت (من كذا مجموعة قبل ما أعجبني عنده شيء كثير، ريزورت و أوت كتور)، لكن ما أعرف وش السبب اللي خلاني ما أكتب عنه يمكن لأن فيه اتجاهات كثيرة بالملابس، بس واحد من أكثر الملابس اللي أعتقد بتلبس هي الأشياء اللي عليها بروش أو ما أعرف إيش (مثال الثاني فوق من اليمين). 
• صحيح اختياراتي مو كلها أكمام طويلة، لكن بنشوف فساتين بأكمام طويلة أكثر على الريد كاربيت

طيب خلونا نتكلم عن الملابس، قلت لكم ديور كان فيه فساتين عندي شعور إنها بتكون على الريد كاربيت كثير، يمكن بكثرة مجموعته للصيف اللي فات 2013 للي ما يعرف وش قصدي، هي المجموعة اللي فيها أقمشة لماعة، أعتقد ماريون بتلبس الفستان اللي فوق، هي أكيد بتلبس ديور، بس أحس الفستان اللي فوق بنشوفه عليها. أعجبني اللبس الأسود اللي من إيلي (تحت أول من اليسار) ما أتذكر إني شفت شيء زيه قبل، اللي عجبني فيه، لما تشوفه تحسه شيء تقليدي، بس كونه بنطلون، و بكم واحد طالع شكله مختلف، أحسه بيكون حلو على هيلاري سوانك. اللبس الأول من اليمين فوق أحس ممكن نشوفه على سارا جيسيكا باركر، صراحة ودي أشوفه على أحد ثاني بس ما أعرف مين؟ فستان أليساندرا ريتش (الثاني من اليمين تحت) أحسه يصلح للي دايم يصلح عليها كل شيء، دايان كروقر، بس ودي أشوفه على ليا سيدو. 

أفكر لما ينتهي الموسم، لو كنت فاضية و ما عندي شيء أتكلم عنه راح أتكلم عن الملابس اللي أعجبتني كانها لبست أو لا، ما راح أتكلم عن الأوت كتور، لأنه ما يعتمد على الموسم، ممكن بعد عشر سنين أحد يلبس منه. 

وش رأيكم بباريس؟ 

Eye Candy

أمس متأخر، أو الصباح و أنا نايمة (ما أعرف متى بالضبط) طلعت صور اللوك بوك لمجموعة أليساندرا ريتش. صراحة ما أعرف متى أول مرة عرفت أو تكلمت بالمدونة هنا عن ملابس أليساندرا، يمكن لما لبست منها دايان كروقر الفستان الأخضر هذا، كنت قبلها شايفة نفس الفستان بنيت أي بورتيه. لكن أعتقد بعدها صارت مصممة مفضلة على الريد كاربيت (صح من زمان ما شفتها) لكن أعتقد مع هذي المجموعة بنشوف أكثر من فستان لها على الريدكاربيت بالفترة الجاية. 

بشكل عام أشكال فساتين أليساندرا، مو هي الأشكال اللي أختارها لما أبغى أشتري فستان، لكن هذا ما يمنع إني كل مرة أشوفها (قصدي ملابسها) أشعر بسعادة إني شفت شيء جميل (ما أدري عنكم أنتم، بس أنا أحب أشوف الملابس الحلوة). و أحب أشوف أحد لابس لبس حلو. من أكثر الأشياء اللي أعجبتني بالمجموعة، مع إني أشك أنه ممكن أحد يسويها (على الأقل على الريدكاربيت) البنطلون اللي تحت الفستان (بالصورة اللي فوق يمين) اللوك هذا ما كان الوحيد اللي نسقته أليساندرا بهذي الطريقة، حبيت شكلها مرة، خصوصا إن ملابسها أنثوية مرة، أحس البنطلون أعطاها شكل "غريب" بس إلى الآن "رومانسية". أتمنى أشوف أحد لابس الفستان اللي عليه نجوم، أحس فيه ظرافة، لكن الشيء اللي أتمناه بجد، أتمنى أشوف دايان كروقر لابسة الفستان اللي تحت يمين، أحسه بيطلع مرة حلو عليها. 

وش رأيكم بالمجموعة؟ تحبون فساتين أليساندرا؟ أو تشوفونها أنثوية بزيادة على ذوقكم؟ 

Best Dressed: January '12 Winner

الشهر اللي فات ليناير 2012 أول مرة تختارون معي أحسن لبس لهذا الشهر، و قلت لكم وقتها، علشان نهاية السنة إن شاء الله، يكون عندنا قائمة واضحة لأحسن ملابس سنة 2012، و ما أسوي زي كل سنة و أحوس بقائمة ما تنتهي، ناس أتذكرهم، و ناس لا. 

المهم التصويت قفل خلاص، و أنتم أخترتوا رامولا قاراي بأليساندرا ريتش. 

رامولا كانت حاضرة لقولدين قلوب و هي لابسة من أليساندرا ريتش زي ما قلت لكم من مجموعة ربيع 2012 (بالمناسبة شفت ناس كثير يسألون وين يلقون فساتينها، ما أعتقد ملابسها تنباع بالسعودية، لكن راح تلقونها هنا عند نيت أي بورتيه أو عند بوتيك 1). 

بصراحة أول ما شفت صورة رامولا بعد قولدن قولب مباشرة أعجبني شكلها مرة، مع إني ما قد شفت أشياء كثيرة لرامولا، لكن مشاعري تجاهها سلبية، لكن بعد ما شفت المسلسل اللي كانت مرشحة عنه لجائزة، ذا أور، حبيتها مرة، بشرتها جميلة بشكل غير طبيعي، شعرها حلو، و لون عيونها حلوة.

أعجبني بالفستان غير شكله، و كيف طالع على جسمها، لونه على بشرتها (تقريبا نفس اللون)، أعجبني بعد أنها اختارت جزمة نود، الشيء الوحيد الملون باللوك هذا، روج وردي خفيف، و لون عيونها طالعة زرقاء مرة مع هذا اللبس الباهت. 

بالمناسبة مو بس أنتم اللي عاجبتكم فساتين أليساندرا ريتش، كثير من السلبرتي أختاروا فساتيها على الريدكاربيت، من دايان كروقر، لميريل ستريب. 

* الليلة إن شاء الله راح أحط الملابس المرشحة لشهر فبراير. 

Best Dressed: January '12

السنة اللي فاتت 2011 قررت إني أسجل عندي أي لوك عجبني، علشان نهاية السنة أحط قائمة لأفضل الملابس و لا أنسى شيء ... بالآخر طلعت بمجموعة كبيرة مرة، و بطلت أكتب لأني عجزت أقلص القائمة.السنة هذي سويت نفس الشيء، لكن قبل يومين قررت بدل ما أجمعها كلها للأخير، و أبطل زي السنة اللي فاتت، قلت أحط استفتاء لكم كل شهر أنتم تقررون وش أحسن لبس لهذا الشهر، خصوصا يناير ما خلص.

إيل فانينق برودارتي:

فستان عباد الشمس كان عاجبني مرة من العرض، توقعت كريتسن دونست تلبسه، لكن إيل هي اللي لبسته، و طلعت بشعر مرة حلو، و وجه فريش.

كيري موليقان بلانفين:

للأسف ما فيه صور كثيرة لكيري بهذا الفستان، لكن فيه فيديو لها، يوريك قد إيش كان شكلها حلو، الفستان شكله غير الأشياء اللي بالعادة تلبسها كيري، أهم شيء عجبني كيف متموج.

روني مارا بفالنتينو:

تلكمت عن هذا اللوك قبل، بالنسبة لي ما زال أحسن لبس طلعت فيه روني، و هو أكثر لبس ملون لبسته لحد الآن.

رامولا قاراي بأليساندرا ريتش:

قلت قبل إن أليساندرا ريتش صايرة فساتينها مفضلة على الريد كاربيت. ما ألوم اللي يلبسها بأغلب الحالات طلعت أشكالهم حلوة، رامولا مو استثناء، لون لافستان مناسب لون بشرتها ... و شكله طالع حلو على جسمها.

تيلدا سوينتين بحيدر أكيرمان:
هذا اللوك بالنسبة لي كان من أحسن الأشياء اللي لبستها تيلدا سوينتين، لونه علي بشرتها مرة حلو، ذكرني بفستان من جان بول قوتييه تقريبا بنفس اللون لبسته كايت بلانشيت بعد لقولدين قلوب 2005.

كايت بوسورث بأنتطونيو بيراردي:
كل شيء بهذا اللوك يخليني أختاره، أولا الفستان، ثانيا الشعر (عجبني أنه مشدود على ورا)، أكثر شيء عجبني أنه كل شيء أحمر بهذا اللوك من الفستان للروج، و آخر شيء الجزم.

دايان كروقر بإرديم:
كثير أقول صعبة على ديان إنها تطلع بشكل مو حلو ... الفستان هذا من أكثر الأشياء اللي أعجبتني بعرض إرديم، لكن بالنسبة لي دايان حلته أكثر خصوصا مع شعرها، و كيف ماسك على جسمها.

روز بيرن بإيلي صعب:
تكلمت عن روز بالبوست اللي قبل هذا، عن أحسن ملابس جوائز ساق ... رجعت أكثر من مرة أشوف اللي جوا، و ما زلت أظن أنه روز كانت من أحسن من لبس بالجوائز، و بكل شهر يناير.

A Good Year for Black

السنة هذي قررت إني أجمع أحسن الفساتين أول ما أشوفها، ما أنتظر إلى ديسمبر علشان أفتش و أقعد أتذكر، توفير للوقت و الجهد D:. الشيء اللي لاحظته أنه السنة هذي حبيت فساتين سوداء كثير، مع إني بالعادة ما تعجبني ... مو لأنها بايخة، لأني أشوف الفستان الأسود من أسهل الفساتين لبس، يعني اللي ما عنده أدنى حس بالموضة، يكفيه يلبس فستان أسود مرتب، و يزين شعره زين، و أكيد مايك آب نظيف، و يطلع شكله حلو. 

لكن الفساتين هذي السنة، ما كانت بس سوداء زي العادة، كان حتى شكلها حلو. 

من أول الفساتين اللي حبيتها هذي السنة و كانت سوداء، هو الفستان اللانفين اللي على شارلوت كاسيراقي، شارلوت دايم تلبس أسود، لكن هذا الفستان المخمل كان بالنسبة لي شيء ما أحس إني شفت برقيه و أناقته أي فستان ثاني. 

فستان أنقارو اللي على جيزيل، من الفساتين القليلة اللي خلتني أشوف إن جيزيل مرأة حلوة، شكله حلو، قصته حلوه، و أهم شيء شكل القماش حلو مرة (مع إني ما لمسته) P:. 

آمبير هيرد السنة هذي من الأوجه الجديدة اللي طلعت، لبسها كثير أنيق (مو اللي يعجبني شخصيا)، لكن بهذي المناسبة، ما أعرف السبب آمبير، أو لون الفستان هو اللي خلاني للمرة الأولى (بعد :)، أحب فستان فيفيان ويستوود بالتصميم التقليدي هذا. 

قلت لكم قبل إني حابة ستايل إيما ستون هذي السنة، الفستان الأتزارو هذا بيكون عادي بالنسبة لي، لكن مع السلسلة الذهبية، اللي عليها كريستالات طالع شكل الفستان حكاية ثانية. 

السنة هذي فيه ناس طلعوا بستايل حلو زي إيما ستون، و فيه مصممين طلعوا بفساتين حلوة، و صار ينلبس لهم كثير على الريد كاربيت، و لو كانت هذي السنة سنة مصمم معين، أظن إنها سنة إليساندرا ريتش. الفستان هذا اللي على إيل ماكفيرسون، هو اللي خلاني أصمم على كتابة موضوع عن الفساتين السوداء.

بس قبل ما أفكر، متى راح أكتب الموضوع، و جالسة أجمع ببالي مين عجبني بفستان أسود، شفت هذي الصورة لقوين ستيفاني من قالا أمس و هي لابسة فستان "أكيد" أسود من كارفين، من فترة طويلة ما عجبني شكل قوين، زي هذي المرة بالفستان الأسود هذا. 

ما أعرف مين أحدد أحسن لوك بالنسبة لي، بس لو كنت أبغى فستان من هذي الستة فساتين، راح أختار أليساندرا ريتش. أنتم مين أعجبكم أكثر من هذولي الستة نساء؟

Emmy Awards Best Dressed

أمس كانت جوائز الإيمي، صراحة ما كنت مهتمة كثير، لأنها جت وسط أسابيع الموضة، (دايم كذا؟) أحس هذي أول مرة تصير، المهم أكثر اللبس كان يا أسود يا أحمر، أغلب اللبس مو سيء، بس ما كان مميز، على الأقل بالنسبة لي، يمكن أكثر وحدة أعجبتني، وحدة ما أعرفها لكن شكلها عجبني اسمها لينا هيدي. 

لينا كانت لابسة فستان من أليساندرا ريتش، المصممة هذي اكتشفتها بالصدفة و أنا أفتش بنيت أي بورتيه، بداية الصيف على ما أظن لبست لها ديان كروقر، قبل أسبوع تقريبا لبست لها ريتشيل إيفيان وود مرتين (الأسود)، (الأبيض) بمهرجان فينيسيا (مبسوطة أنه الناس بدت تقدرها)، فساتينها حلوة، فيها شيء مسرحي، مع شكل خاص ما أعرف كيف بس يميز المصممة. (هنا تلقون بوتيكها بنيت آي بورتيه، و فيه الفستان اللي على لينا، و الأسود اللي على إيفيان). 

لينا كانت لابسة كعبات فوشيا (ما طلعت بهذي الصورة). شعرها كان حلو، و شنطتها كانت حلوة، أهم شيء إنها ما لبست عقد، بس لبست حلقات، و لا غطت على فتحة الفستان من فوق. 

للحفل كان جاي بعد الممثل بمسلسل ذا قود وايف، الآن كومينق، كان لابس لابس ما أعتقد أنه غيره أحد ممكن يلبسه، بس حبيت شكله. 

الآن كان لابس من جان بول قوتييه (زي ما هو قال بحسابه على تويتر)، بعد بحسابة قال أستعدوا يا فاشن بوليس (البرنامج اللي يجي على قناة E إذا كنتوا تابعونه)، أعرف أنه البرنامج راح يسبه، و ممكن كثير منكم ما راح يعجبه لكن أعجبني كيف لابس جاكيت توكسيدو مع بنطلون حرير كأنه بيجاما، قلت لكم عجبني مرة و أظن إني ودي أجرب هذا الستايل :). 

إن كنتوا تابعتوا الجوائز، وش رأيكم؟