Razzle Dazzle

ما أتذكر كم مرة فوت الكتابة عن عرض لرودارتي بالثلاثة سنوات الأخيرة، ما أظن أكثر من إثنين. ما علينا اليوم جا الدور على رودارتي من جديد. ما أعرف ليه ما أقدر أتجاهل عرض لرودارتي، خصوصا لما يكون كذا فيه ملابس فيها كل الأشياء اللي أحبها: قطع مو متساوية، ترتر، و أقمشة شفافة. 

عرض رودارتي للصيف كان كأنه حوريات بحر، هذي المرة أحس الملابس كأنه كانت بالطبيعة، مو طبيعة هادية، لا شيء كانت بغابة، بعدين نفس الملابس حطت عليها ترتر، و طلعت فيه حفلة/عرض. أو العكس، بنت طالعة من حفلة، و بعدين عاشت بملابس الحفلة بالغابة. ما يهم وش القصة ورا الملابس، بس مادام فيه أشياء تلمع بالملابس، خلاص أعتبروا إن المجموعة ناجحة عندي. 

الفستان اللي عجبني مرة، و ودي بس لو ألمسه (أعرف إني مثيرة للشفقة، بس يكفيني بهذي اللحظة)، هو الفستان الأول من اليسار، ودي أشوفه على تيسا ثامبسون. الفستان الأبيض اللي بعده، أحسه بيكون حلو على إيل فانينق. الفستان اللي عليه ورود برتقالية عجبني مرة تفصيل خطوط الشك عند فتحة الصدر على اليمين، أهم شيء ودي أشوفه على لوبيتا أو جوليان مور، أو كلهم، ما فيه أحد يمنع. بس أهم شيء ينلبس. 

أنتم وش رأيكم بالمجموعة؟ أو هذي النوعية من الملابس ما تعجبكم؟ 

Mermaids

لسا نيويورك ما خلص، لكن تقريبا على وشك، و أظن صار عندي فكرة معينة عن الأشياء اللي ممكن تكون موضة بالصيف الجاي. من الأشياء اللي شفتها بأكثر من عرض و أعجبتني مرة، هي الفساتين الزرقاء الفاتح (بدرجات مايلة من الأخضر للسماوي الرمادي). 

(من اليمين: تاداشي شوجي، زايميرمان، ديلبوزو و رودارتي)

صراحة ما أعرف كيف هذي الفساتين بتصير على الريدكاربيت (لو لبست)، و لا لو بغيت ألبس شيء زيها كيف بيكون اللون علي (أعتقد غير الجينز ما قد لبست شيء أزرق). لكن وش ما تكون النتيجة عاجبني شكلها على الرانواي، حسيت كأنها حوريات، مع هذي الألوان، و الأقمشة الخفيفة اللي (مطرزة، دانتيل، و شك). صحيح ما أميل دايم للملابس اللي مرة أنثوية، لكن هذي كأنها من فيلم أو قصة خرافية.

أتمنى أشوف إيل فانينق مثلا بفستان زايميرمان، صحيح ما قد شفت كايت بلانشيت بتاداشي شوجي، بس أحسه بيطلع مرة حلو عليها لو لبسته. عجبني بعد رودارتي، من زمان رودارتي تاركين هذا الخط، ذكرتني بالذات الفساتين بالمجموعة (و هذا واحد منهم) بملابسهم 2009 - 2010، لكن أعتقد هذا اللبس لو ما لبس على ريدكاربيت عادي، لازم يكون موجود بالميت قالا، و لو ما حملت (ما أعرف ليه أحس إنها راح تحمل كيرستين دونست، أتوقع بيكون حلو عليها). أما فستان يلبوزو أتمنى أشوفه على لوبيتا. 

أنتم وش رأيكم بهذي الفساتين؟ ألوانها و أشكالها؟ 

Ugly Chic

من العروض اللي دايم أنتظرها كل أسبوع موضة بنيويورك هو عرض رودارتي، شخصيا أشوفه أكثر عرض مثير، ممكن مو دايم فيه أحلى الملابس، بس على الأقل بالسنوات اللي فاتت اللي تابعته أغلب مجموعاتهم كانت مثيرة. و هذي المرة بالنسبة لي مو استثناء.

صراحة ما أعرف وش فكرة الأخوات ردارتي هنا (قد قلتها قبل، بس للي ما يعرف رودارتي مو عايلتهم، بس اسم ماركتهم). المهم لكن بعد ما شفت المجموعة (أكثر من مرة) أعتقد إن الفكرة اللي ببالهم يجيبون أي شيء قبيح (لبس من الأرشيف)، لأني حسيت فيه ملابس كأنها بداية الألفية (زي الفستان الثاني من اليسار)، وفيه ملابس كأنها من نهاية الثمانينات بداية التسعينات (اللبس الثاني من اليمين). بالنسبة لي كثير من التنسيق بالعرض كان قبيح، بس عندي إحساس لو أحد فكك القطع، و لبسها مع قطع ثانية بتطلع مرة حلوة، أو مرة مو حلوة، على حسب ذوق الشخص (لكن من جد متحمسة أشوف النتيجة على الواقع كيف بتكون). 

وش رأيكم ممكن تدورن بدواليبكم (إذا كنتوا كبار كفاية بداية الألفية) أو دواليب خواتكم/ أمهاتكم تدورن على قطع قبيحة تلبسونها مع ملابسكم الحين؟ 

Mixed Metals

من فترة، ما أعرف متى بدأت بس توي أنتبه لنفسي، إني صايرة أحب المجوهرات اللي مخلط فيها الذهبي و الفضي سوا (أنا مو مرة مع القولد روز) بس ما يمنع أنه يكون موجود مع الباقين. 

زي ما قلت لكم ما أعرف متى الهوس هذا بدأ، بس بعد ما شفت صور من عرض رودارتي لخريف 2013 تذكرت إن المجوهرات كانت عاجبتني، و إنها بعد مخلطة، فيها ذهب أصفر و أبيض و وردي. بعد ما أعرف إذا كان هذا هو السبب أو لا، بس يوضح لكم إن المشكلة بتكمل سنة، فلازم نناقش الموضوع هنا سوا. 

و لأني طيبة و ما أبخل عليكم بهوسي، هنا جمعت لكم مجموعة من المجوهرات اللي مخلطة، و أعجبتني مرة. حاولت إني أختار من كل تصنيف شيء. يعني خاتم، سوارة، حلق و سلسال. 

الأشياء روابطها هنا الترتيب عكس عقارب الساعة (1) حلق من أنثربولجي ب 75 ريال تقريبا (2) سلسال حصان من مجوهرات أوديت ب 405 ريال (3) خاتم عين تقريبا ب 200 ريال (4) سوارة فيها قلب ب 430 ريال تقريبا. 

أكيد بتلقون أشياء أرخص لو بغيتوا، بس أنه حطيت هنا الأشياء اللي أعجبتني بجد. و لو ما أعجبتكم الأشياء اللي اخترتها، بس أعجبكم أغراض رودارتي، هنا تلقون الإكسسوار و المجوهرات بآخر الصفحة.  

أنتم وش رأيكم بلبس مجوهرات بألوان مختلطة؟ أو تفضلون لون واحد مع كل لبس؟ 

Red Carpet Worthy: NYC Edition

خلص أسبوع نيويورك، غير العروض اللي تكلمت عنها، فيه عروض أعجبتني فيها ملابس، ودي أشوفها بالريدكاربيت. فيه ملابس كثيرة أعجبتني بس قررت إني أختار أحسن ثمانية بالنسبة لي، و اللي بجد أتمنى أشوفهم بالريدكاربيت. قراري كان على أساس إني أرجع و أختار اللبس اللي أعجبني من أول مرة قلبت المجموعة و علق ببالي، علشان ما أخليها قائمة طويلة مرة. 

العروض من اليمين لليسار: (برابل قورونق، ألتازورا، نعيم خان و بيتر سوم)

من الأربعة العروض اللي فوق من أول مرة شفت المجموعات أعتقد أنه برابل مجموعته راح تكون موجودة كثير بالريدكاربيت، ألوانها حلوة، و أعتقد إنها تستاهل الريد كاربيت. التوكسيدو اللي من ألتازورا عجبني من أول مرة، طبعا السبب أعتقد أنه واضح الشريط الكريستالي اللي ماسك الجاكيت، بصراحة لما رحت أشوف المجموعة من جديد علشان أحفظ صورة هذا اللوك، اكتشفت إنها مجموعة حلوة، فيها تفاصيل حلوة، بس تحتاج أكثر من نظرة. 

العروض من اليمين لليسار: (فيلوسفي، رودارتي، بروينزا سوكلير و ديلبوزو)

صراحة أكثر فستانين حرضوني إني أكتب هذا الموضوع هم رودارتي و ديلبوزو، إذا ما كنتوا تعرفون أحب طبعات الحيوانات لما تستخدم استخدام ذكي يخليها أنيق مو رخيص (شوفوا مجموعة أونقارو خريف 2013). ديلبوزو مصمم إسباني أول مرة يعرض بنيويورك، أعجبتني مجموعته مرة، أتمنى أشوفه على الريدكاربيت لأني أعتقد إن هذا المصمم يستاهل تقدير أكثر (هذي المجموعة و مجموعات قبل). و بعد موجود عند نيت أي بورتيه .

بالمناسبة تعرفون إني انبسط على شيء تافه زي كذا، لكن ميروسلافا دوما لبست واحد من الفساتين اللي اخترتها لموضوع جايسون وو (أدري ما أمدانا) بس تلقونه هنا.

What I Want to Wear: Rodarte

قبل أمس (إذا كانت حسبتي صحيحة) كان فيه عرض رودارتي، إذا ما كنتوا تدرون إلى الآن، أحب رودارتي مرة، ما كنت مبسوطة كثير على مجموعة ربيع 2013 ما أعرف ليه حسيته ما تشبه لهم، لكن المجموعة الأخيرة لخريف 2013 طمنتني إني ما راح أخسر هذي العلاقة (اللي من طرف واحد) :). جلست أقلب المجموعة ما أعرف كم مرة، و أدور على فيديو للعرض و أشوف التفاصيل، و الباكستايج و كل صورة ممكن تجي من العرض. 

الخوات يقولون أنهم صمموا اللبس بإيحاء من المكان اللي كبروا فيه (شمال كالفورنيا)، أنا ما يهمني صراحة وش خلفية المجموعة، و لا قد رحت شمال كالفورنيا علشان أعرف المجموعة تشبه لها أو لا، لكن أقدر أقول ما عمري شفت أفكار كذا رخيصة (داي تاي مثلا) أحد قدر يخليها فخمة كذا. تقريبا حبيت كل قطعة بالعرض، من المجوهرات اللي على شكل أسيام (بالذات الأطواق)، الشرابات اللي كأنها تاتو الليقينق اللي تحت أكثر من فستان، و أكيد التاي داي. 

و أنا أقلب (زي ما قلت لكم سويتها ما أعرف كم مرة) حاولت أعرف وش اللوك اللي حبيته أكثر ما قدرت. ما أعرف أبدأ بالفستان أو الجمب سوت اللحمي اللي عليه جنحان من ورا. أو الفستان الأسود اللي صدره جلد (أتوقع تلبسه أو تلبس اللحمي منه إيل)، أكيد واحد من الفساتين الداي تاي، بس يمكن اللحين أقولكم إني عادي أرضى بالفستان الأبيض، ما راح أطلب غيره لو أحد عطاني إياه. 

وش أعجبكم من أسبوع نيويورك؟

Best Dressed: January '12

السنة اللي فاتت 2011 قررت إني أسجل عندي أي لوك عجبني، علشان نهاية السنة أحط قائمة لأفضل الملابس و لا أنسى شيء ... بالآخر طلعت بمجموعة كبيرة مرة، و بطلت أكتب لأني عجزت أقلص القائمة.السنة هذي سويت نفس الشيء، لكن قبل يومين قررت بدل ما أجمعها كلها للأخير، و أبطل زي السنة اللي فاتت، قلت أحط استفتاء لكم كل شهر أنتم تقررون وش أحسن لبس لهذا الشهر، خصوصا يناير ما خلص.

إيل فانينق برودارتي:

فستان عباد الشمس كان عاجبني مرة من العرض، توقعت كريتسن دونست تلبسه، لكن إيل هي اللي لبسته، و طلعت بشعر مرة حلو، و وجه فريش.

كيري موليقان بلانفين:

للأسف ما فيه صور كثيرة لكيري بهذا الفستان، لكن فيه فيديو لها، يوريك قد إيش كان شكلها حلو، الفستان شكله غير الأشياء اللي بالعادة تلبسها كيري، أهم شيء عجبني كيف متموج.

روني مارا بفالنتينو:

تلكمت عن هذا اللوك قبل، بالنسبة لي ما زال أحسن لبس طلعت فيه روني، و هو أكثر لبس ملون لبسته لحد الآن.

رامولا قاراي بأليساندرا ريتش:

قلت قبل إن أليساندرا ريتش صايرة فساتينها مفضلة على الريد كاربيت. ما ألوم اللي يلبسها بأغلب الحالات طلعت أشكالهم حلوة، رامولا مو استثناء، لون لافستان مناسب لون بشرتها ... و شكله طالع حلو على جسمها.

تيلدا سوينتين بحيدر أكيرمان:
هذا اللوك بالنسبة لي كان من أحسن الأشياء اللي لبستها تيلدا سوينتين، لونه علي بشرتها مرة حلو، ذكرني بفستان من جان بول قوتييه تقريبا بنفس اللون لبسته كايت بلانشيت بعد لقولدين قلوب 2005.

كايت بوسورث بأنتطونيو بيراردي:
كل شيء بهذا اللوك يخليني أختاره، أولا الفستان، ثانيا الشعر (عجبني أنه مشدود على ورا)، أكثر شيء عجبني أنه كل شيء أحمر بهذا اللوك من الفستان للروج، و آخر شيء الجزم.

دايان كروقر بإرديم:
كثير أقول صعبة على ديان إنها تطلع بشكل مو حلو ... الفستان هذا من أكثر الأشياء اللي أعجبتني بعرض إرديم، لكن بالنسبة لي دايان حلته أكثر خصوصا مع شعرها، و كيف ماسك على جسمها.

روز بيرن بإيلي صعب:
تكلمت عن روز بالبوست اللي قبل هذا، عن أحسن ملابس جوائز ساق ... رجعت أكثر من مرة أشوف اللي جوا، و ما زلت أظن أنه روز كانت من أحسن من لبس بالجوائز، و بكل شهر يناير.

Designers' Like, 235 SR and Less

جا وقت التخفيضات، و لأول مرة أسوي ويش ليست على نيت آي بورتيه، علشان أشوف كم تصير بالتخفيض، بس أحسن شيء أنهم ودهم يوفرون علي، و حتى بعد التخفيض أسعار الأشياء اللي عاجبتني مو رخيصة :).  لو بغيتوا تشيكون تلقون تخفيضاتهم هنا. 

و لأن أسعار نيت آي بورتيه، ما تتماشى مع ميزانيتي رحت أشوف تخفيضات أسوس :)، و أنا جالسة أدور بأسوس لقيت أشياء كثيرة تشبه ملابس مصممين (من اللي ما أقدر عليها عند نيت آي ورتيه:)، لكن هنا أخترت أكثر الأشياء اللي أعجبتني عند أسوس تشبه تصاميم مصممين. 

الفستان هذا نسخة من فستان كان بعرض رودارتي خريف 2011، عجبني الفستان مرة (تعرفون إني أحب الفساتين الطويلة)، أحسه مع جاكيت جلد بيطلع مرة حلو، أو لو كنت تبغين تلبسينه بالصيف، أظن أنه بيكون حلو مرة، مع سلاسل ذهبية كثيرة، بأطوال مختلفة.

على اليسار صورة من عرض برين، بعد خريف 2011، لو تتذكرون كان هذا العرض عاجبني مرة، و بذات هذا اللوك، أنبسطت كثير لما شفت هذي النسخة من الجمبر حقتهم، شكلها حلو، طول أكمامها حلو، يمكن بس الألوان، أفضل ألوان برين عليها، لكنها حلوة مرة، حتى لو ما فيها ألوان برين. أعتقد إنها مع بنطلون جينز سكيني بتكون مرة حلوة. 

القميص الشفاف هذا، نسخة من القميص اللي كان بعرض أليكساندير وانق خريف 2011، تعرفون إني أحب كثير القطع الشفافة، خصوصا لما تكون سوداء، فأكيد هذا القميص بيكون من قائمة الأشياء المنسوخة، اللي أعجبتني. 

عرض بوتشي هذا (خريف 2011) من أحسن عروض بوتشي اللي شفتها الفترة الأخيرة، أعجبني فيه استخدام المخمل، صح النسخة اللي يبيعونها بأسوس مو مخمل، بس لما شغلت الفيديو حق العرض أعجبني كثير شكل الفستان. أعتقد أنه خيار جدا مناسب لحفلات، أو زواجات صغيرة. 

شرايكم بالنسخ؟ أو تفضلون الأصليات منها، حتى لو كان سعرها فوق 2000 ريال؟

It's a Gallery!

من فترة طويلة ما شفت أسبوع نيويورك بالشكل هذا، لدرجة بديت أحس بصداع، ما أعرف وش بتكون حالتي بعد لندن، ثم ميلانو و باريس. أظن نيويورك هذا الموسم صعبت على الباقين شغلهم، بالموسمين اللي فاتوا ما كان يهمني أو ممكن يبهرني من نيويورك إلا مارك جايكوب رودارتي، و بعض المرات أليكساندير وانق، هذي المرة ما أعرف مين أختار أو مين أتمنى ملابسه :)؟!!!

الشيء اللي انتبهت له قبل أمس بعرض برين، أنه الطبعات فيه ذكرتني بالفوتوشوب و شغلات البيكسيل، أتذكر لما كنت أصمم، و كانت هذي الشغلات مهمة مرة، وقفت أصمم أو ألعب بالفوتوشوب، لآنه ما صار عندي أصلا، صح بعض المرات أشتاق إني أسوي مايك آب فيه، بس عرض برين خلاني أتمنى لو أحوس فيه من جديد.

الألوان حلوة، تصميم الطبعات حلو، كل شيء كان حلو بالنسبة لي، قلت لكم نيويورك هذي السنة بتكون مسؤولة عن تدهور صحتي النفسية.

 بالمقابل أمس بعرض رودارتي أول ما شفت عباد الشمس على طول جا ببالي فان قوخ، صحيح مانيب فنانة، و فقيرة يعني ما أقدر أجمع فن، بس لو كان عندي فلوس و فسقت لدرجة ما أدري وش أسوي فيها، راح أشتري لوحة له، أحب رسمه، يمكن أقدر أقول أنه "فناني المفضل"، مع إني ما أحب العبارة هذي.

قلت لكم أول ما شفت عباد الشمس حسيت بفان قوخ، بس بعد ما شفت الفستان الأزرق تأكدت أنه رودارتي كانوا ببالهم فان قوخ لما صمموا المجموعة. على فكرة ترى مو بس رودارتي من عروض نيويورك للي متأثرين بأعمال فنان معين، برابل قرونق يمجموعة كانت مستوحاة من أعمال مصور ياباني، ما أعرف وش أسمه :).   

وش عجبكم أكثر، البيكسيلز أو فان قوخ؟

You Can't Fake Fashion

قبل أسبوع تقريبا عرفت أنه فيه تعاون بين eBay و CFDA اللي هي جمعية المصممين الإمريكان، على أنهم بيطلعون شنطة مكتوب عليها: "you can't fake fashion" "لا يمكنك تزييف الموضة". الهدف منه أنهم يوعون الناس من الأشياء المقلدة. 

صراحة أنا ما أحب بذات الشنط المقلدة و خصوصا تقليد الماركات المعروفة مثل قوتشي و لوي فيتون و ووو المهم، سببي مو أخلاقي، بس إن شكلها رخيص، أفضل شنطة من محل عادي على شيء مقلد بشكل سخيف، و أظن أنه مع هذي الموجة، موجة "نسخ" الموضة من الهاي فاشن للستريت فاشن صار فيه كثير شناط حلوة، و على الموضة، بسعر مقبول. 

اليوم قريت إيميل من eBay أنه تم عرض الشنط للبيع، فتحت على الصفحة و لقيت شنط مرة حلوة (طبعا كلها خلصت، ما أعرف كم نسخة مسوين)، أكثر وحدة أعجبتني فيهم، هذي اللي فوق من تصميم آدم. سعر كل الشناط كان 150 دولار، طبعا ليه أكتب لكم عنها و هي مخلصة، لأنه لو أعجبكم شيء منها أعتقد بعد فترة راح نلقى ناس عارضينها للبيع من جديد على eBay و طبعا بتكون أغلى من السعر الأصلي، بس لو كانت عاجبتكم مرة، دوروا عليها من جديد بالموقع. 

و لو ما كنتوا متحمسن للشراء، و بس تفرجتوا على الصفحة لقافة زيي، قولوا لي وش أكثر شيء أعجبكم.

Praising America

الثلاثة أيام اللي فاتت كان فيه حفل غنائي بأمريكا بالهواء الطلق أسمه كوتشيللا ... المهرجان السنة هذي كان مكان استعراض للمشاهير علشان يورونا كيف يلبسون للمهرجانات.

من الناس اللي لي كم سنة أشوفهم، (يعني من زمان يستعرضون) كايت بوسورث.أنتم تعرفون إني أحب ذوقها، فلما أجيب صورة لها و هي لابسة لبس حلو، هذا مو شيء غريب.

كايت هذي المرة لابسة ما قل ودل :) ... لابسة شورت أوف وايت، و تانك من توب شوب عليه علم أمريكا.
أمريكا، و الأشياء الي تخص أمريكا (يعني غير العلم) مثلا ثيم الغرب الأوسط (رالف لورين) أو شيء مستوحي من الطبيعة الأمريكية (رودارتي) ... الجينز، البايسبول و قبعة الكاوبوي و الجلود. كانت كلها موجودة بعروض ربيع 2011

يمكن لعروض الربيع كانت أكثر الماركات اللي جابت أشياء أمريكية، هي الماركات اللي مو أمريكية. لكن بعروض الخريف 2011 زي ما راح أوريكم إن شاء الله، بتشوفون أنه أكثر المصممين الإمريكان مقدمين عروضهم بثيم أمريكي.

عروض الربيع من موسكينو إيزابيل مارني و بيلمان (من اليسار لليمين) كلهم كانت عروضهم أمريكية. لكن عروض خريف 2011 زي ما قلت لكم كان أكثر المصممين الأمريكان جايين بثيمات أمريكية.  

زي ما قلت لكم عروض الإمريكان لخريف 2011 كانت تقريبا بالمجمل عن أمريكا من ديان فون فورتسبيرق (يسار) للرودارتي (وسط) اللي كان العرض حقهم بين نساء 1800 و فساتين مطبوع حقول قمح ... أما بروينزا سكولير راحوا لأبعد من تاريخ أمريكا الأبيض و سووا فساتين و ملابس عليها نقشات هندية حمراء أو اللي يسمونها الحين أزتيك. 

فيه قطع كثيرة حلوة، من الجلد المشرشح للبالطوات الطويلة، الشيء الوحيد اللي ما اتجرأ أقتنيه هو شيد عليه علم أمريكا، مو لأنه حرام أو شيء ... بس كذا العلم الأمريكي يعطيني شعور مو مريح لأني أشوفه رمز للإمبريالية. 

أنتم وشرايكم بأمريكيا و هي داخلة بالموضة بقوة؟ 

Welcoming Rodarte

قرب زواج كايت ميدلتون من وليم، صراحة ما أعرف الوقت متى، و أخاف أنه اليوم و أنا ما أدري زي باقي كل المواعيد اللي ما أعرف عنها إلا بنفس اليوم.

راح أكتب إن شاء الله عن الزوجات بهذي المناسبة، بس اليوم باتكلم عن شيء ثاني، و هو وحده من ماركتي المفضلة "رودارتي". 

الصورة هذي قديمة، مو مرة بس أكيد أكثر من شهرين، إن كنتوا تابعوني من زمان، يعني من أكثر من سنتين، بتتذكرون إني كنت أكره كلوي سيفانجي، ما أقولكم إني أحبها الحين، بس صراحة يطلع معاها لبس حلو كثير. و ما أعرف العتب علي، أو عليها كان لبسها شين. 

المهم نرجع للصورة، بالصورة كلوي لابسة من رودارتي مجموعة ربيع 2011، المجموعة أعجبتني كثير، و لو تتذكرون بوقتها تكلمت عن أنه المجموعة كانت تشبه بعض البورسلان المنقش بأزرق.

عجبني مرة شكل كلوي (إلا شعرها) بس الشنطة، و الجزم مرة حلو (الشنطة بوكس كلتش ذهبية). 

كل ما شفت لبس من رودارتي تذكرت أول مرة عرفتهم، لما رحت أدور عليهم بكل مكان، و لا حصلتهم، و آخر شيد حصلت بس قطع من Rodarte for Targe. قبل فترة قريت أسمهم بموقع net-a-porter.com نسيت الموضوع، بس أمس قريت خبر عن أنه وصلت قطع منهم للموقع أنبسطت لما شفتهم (تلقونهم هنا)، صح الأسعار ما تفرح، بس مجرد شوفتهم قريبين، و ممكن ينباعون لأي إنسان بالعالم (أدخلت السرور على قلبي). 

الموقع ما فيه كل الكوليكشين، قطع قليلة مرة، بس فيه التنورة اللي لبستها كيرا نايتلي قبل فترة، و أخترتها ضمن أحسن ملابس 2010، و فيه فستانين واحد من الفساتين اللي شكلها كأنه بورسلان زي ما قلت لكم، و الثاني من الفساتين الخشبية. 

كلوي و كيرا مو الوحيدات اللي لبسوا من هذا الكوليكشين، كيرستين دونست، و إيل فانينق لبسوا بعد منهم ، و إيل صورت معاهم الفيلم الدعائي القصير، للي يبغى يشوفه هنا. 

Black Swan

يمكن الحين أنتم مالين  من كل الكلام عن بلاك سوان، أو أي شي عن الملابس فيها. للي ما يعرف هذا الشي، ردوارتي هم الي مصممين أزياء الفيلم.

صح أنا قلت لكم إني راح أتكلم عن الفيلم لما أشوفه، بموضوع تنورة الباليه ... أمس شفت الفيلم، و من قبل ما أشوفه شلت من بالي إني أتكلم عن اللبسين الأشهر البلاك سوان و الوايت سوان (كلهم حلوات، حبيت الأسود أكثر) بس ما أظن ما فيه مكان بالأنترنت إلا وحطوها، تلقونها هنا (1) و (2) ... فجا ببالي إني أنتبه لملابس ثانية.

من زمان طايحة من عيني التنورة البالية النفاشة، بسبب تجربة سيئة، لما أكون الحالي أعترف إني أتفرج على أشياء أستحي أسويها قدام الناس، فكنت مره أشوف باريس هيلتون بي إف إف، علي Mtv و عطت مهمة لوحدة إنها تلبس كل الي يتنافسون على أنهم يصيرون باريس هيلتون بي إف إف ... المهم هذيك البنت، حتى ما أتذكر إسمها، لبستهم كلهم تنورة بالية قصيرة (هذي التول النافش) و حطت لهم شريطه على رووسهم، حتى كان بينهم متسابق ولد سوت له نفس الشي، طبعا كانت معتقده إنها أكثر وحده فنانة، ما أعرف ليه جاني إحساس أنه ليمتيد تو اللي الحين جستس، فأنتم تخيلوا بنت فوق العشرين مسوية هذا الشي ؟!!!!

المهم نرجع للصورة، هذا اللوك لنتالي أعجبني مره، حبيت كركبة الشربات الي تحت ... حبيت شكل التنورة مع الشي اللي فوق لابسته، أعرف أنه ممكن مو شي ينلبس، بس يمكن يكون لطيف بالبيت :)

أكثر لبس حبيته، حبيته قوه، هو الفستان الي فوق، أول ما شفته حسيته من رودارتي، و صار صحيح من رودارتي، و تشوفون السكيتش شكله من ورا أعجبني قوه، ما أعرف كيف بعض الناس يعرفون يحطون هذي التفاصيل الي تسوي فرق كبير بالفستان ... ما لقيت صور مضبوطة، و أخذتها من الفيلم، بس أنتوا شوفوا الفيلم و بتناظرون قد إيش حلو.

قبل الأخير نتالي راح تكون على غلاف فوق لعدد يناير 2011 و نفس الشي بثيم البلارينا، حبيت الغلاف، الفستان من جاي منديل ... الصور الي جوا ما حبيتها كثير كنت أتمنى لو فيه صور أكثر هنا الإديتوريال.

الشي الأخير، قبل ما تنتهي هذي السنة، انصدمت من خبر حمل نتالي، حسيتها آخر وحده طبعا بعد كيرستين دونست، ممكن تكون أم :).

Rodarte for Target in High Fashion Version

الحمد لله ما خيب ظني كين، طبعا لما أقول الحمد لله أنا جواتي أقول الحمد لله على كل حال، يعني ما يحتاج أشكي إني ما أقدر عليه ... و عشان تعرفون قد إيش أنا مو أنانية شوفوني و أنا ما أقدر على كين انبسط أنه سوا شي كويس يقدر يشتريه ناس ثانين ماعندهم مشكلة دفع 4000 دولار على فستان منه ...
طبعا أحاول أعزي نفسي و أحط لكم اللوك الي فوق من عرضة الأخير بس ما راح أكذب و أقول مو حلو يعني على قولتهم الكذب خيبة، بس باقول أنه استوحاه من هذا اللوك من رودارتي لتارقيت .



طبعا أنا حابة مره هذي المجموعة، مو بس لأني شريت منها (تنورة العيد المسترد هذي هي) و تراها مو من الهرم للي قالي أنه شاف زيها بالهرم، طبعا هي مو غالية، مو أحبها بس لأنها مو غالية، أحبها عشان التل الي عليها، و أحبها عشانها زي الدانتيل، أنا أساسا كان خاطري بالبلوفر بس لقيته غالي 64 دولار، أدري بتقولن من وين غالي، بس أنا كان خاطري أشتري أشياء رخيصة، و أثبت لنفسي إني أقدر أشتري ملابس رخيصة و أحبها مره، و هذا الي صار ...

بس إن شاء الله الله بيعوضني بدل الرودارتي هذا بكريستفور كين ببلاش، أعرف إني أضحك، بس يالله نضحكم معاي :)

TeaTime

يمكني شوي بس شوي متأخرة عن بعض الناس بس وش أسوي ببلوقير كل يوم طالع لي بتحفة جديدة تعطل على شي ... أمس عرضوا رودارتي و أنتم تعرفون إني أحبهم، صحيح ما سهرت أشوفهم لأني كنت تعبانة وودي أنام، بس لما قمت وشفتهم صحت ودي بشي منهم، إلى الآن أول عرض من نيويورك أبغى شي منه بجد حتى مارك جايكوبز (و بالمناسبة حتى مارك جايكوبز و مارك باي مارك جايكوبز حلوات، بس الفرق أنهم يمكن ودك تشتريها بس مو ودك تسرقها على طول من العارضة) و تعرفون عاد العارضات ما عندهم مشكلة لو آخذ الملابس منهم يعني يقدرون يمشون من دون ملابس :)

الي يعرف الأخوات رودارتي (وترا هذا مو اسمهم بس اسم ماركتهم) أنهم بأكثر من مكان قالوا أنهم يحبون الريف الإنجليزي (من ما يحبه؟) يعني الورود، و الشاهي و المعجنات الشاهي كلها أشياء تخلي الواحد يحب أنه يعيش ولو لمره جو الريف الإنجليزي ... أول ما شفت صور الفساتين (تحت) تذكرت كلامهم هذا أنهم يحبون الريف الإنجليزي، و بعد تذكرت نقشات البورسلان المشهورة هذي الزرقاء هي صراحة مو المفضلة بالنسبة لي لو راح أشتري طقم شاهي بورسلان بس رودارتي خلوني أفكر فيها بجد، لأنه شكلها أقرب لي من فساتينهم.

زي ما قلت لكم الفساتين و الجزمة (فوق) (لا تنسون انتبهوا للشربات، يجننون) تلاحظون أنها تشبه نقشات هذا البورسلان، كلهم قصدي الثلاثة فساتين و حتى باقي المجموعة بس هذي بذات ودي أسرقها و لا أستحي إني أقول كذا :) بس لو رودارتي ما يبغوني أغلط و يخيروني من الثلاثة فساتين باختار حق كارلي (الأول من اليمين) بس لو يعني يبغون يظمنون ولائي ودي بحق كارلي و من تحت أبغى يشبه حق دروثا (الوسط) و ترا عادي جدا عادي يعطوني الثالث :).

الصورة الي فوق (الي مع الجزمة) أخذتها من هنا، طبعا ليه هذي المرة حطيت من وين أخذتها، مو لأني دايم أنا الي أصور، بس لأنه هي أو هو الله يعفيهـ/ـا على تجميعه للبورسلان الأزرق هذا و فكني من تعب التدوير :)

Natalie Protman & The free make up bags

تعجبني نتالي بورتمان، تمثيلها ... لبسها حق كل يوم (يعجبني إنها تلبس لبس مريح، مو شي معقد) و بعد يعجبني كثير أشياء من لبسها بالحفلات ...

نتالي زي جيسيكا ألبا جاية لمهرجان فنيسياو فيلمها الجديد The Black Swan افتتح المهرجان ... كل لبسها عاجبني وجهها جنة لأي واحد يبغى يسوي مايك آب (عظمها حلوة، و فيه مساحات حلوة بوجهها).

المهم لبسها من جت إلى حد الان حلو و حلو مرة ... من أول لبس طلعت فيه للفوتو كول بالفستان البنفسجي الميو ميو ... لحد البريمير حق الفيلم و هي لابسه الفستان الأحمر من رودارتي ...

قلت لكم أنه كل شي مضبوط ... المايك آب ... شعر (يعجبني شعرها أنه مسرح بس بشكل لطيف كأنه ما سوت فيه شي باللوكين الأول و الثاني الي لابسة فيه أزرق لحفلة كوكتيل سوتها رابطة الصحفيين الأجانب في هوليوود). الفستان الأحمر الرودارتي حكاية ثانية ... ما أعرف مين الي خلى فستان أحمر حلو كذا هم رودارتي و إلا نتالي عجبني كل تفصيل فيه، السيور و الكتوف مع بعض ... الكسرات الصغيرة الي عند الصدر، و أهم شي من تحت طبقات الشيفون. بس الشي الي محيرني وش قصة الشنطة الديور هذي الي عندها منها 3 ألوان ؟!!! و صايرة بذات مع الفستان الأحمر كأنها شنطة مكياج الي دايم لما أطلب من فافافوم هدية إذا شريت منهم شي يعطوني زي هذي الشناط المجانية :)

ما أفهم أكيد فيه سر، خصوصا لما تلبسها مع فستان سهرة حلو كذا :)