Seductive

تعرفون الملابس اللي تشوفونها على أحد و تتمنون أنكم تقدرون تلبسونها؟ أنا كذا كان وضعي و أنا أشوف مجموعة ألتزورا. طبعا أنا هنا ما أتكلم عن السعر، أتكلم عن شكل الملابس، الملابس مرة مثيرة (على الأقل من وجهة نظري)، ما أحس إني ممكن يوم أقدر ألبس شيء زي كذا. 

أولا خلوني أقول إنه إلى الآن عاجبني أسبوع الموضة، ما أحس إني شفت شيء مثير ما قدر شفته إلى الآن، بس عاجبتني الملابس، فيها فخامة، و ألوانها جدا غنية، أكثر المجموعات أحس ملابسها ممكن حتى بعد سنوات تظل  حلوة. نفس الكلام ينطبق على هذي المجموعة، اللي زيادة بهذي المجموعة إني أشوف إن الملابس مرة مثيرة، ملابس مسوية لأحد زي ريانا (أتمنى أشوفها بالفستان الأبيض). اللبس اللي بعده (البنطالون مع الجاكيت) ذكرني بملابس عارضة هولندية كانت مشهورة شوي بمنتصف الألفية، إسمها إيكيلين ستيق (إذا كان كذا النطق الصحيح لإسمها). الفستان الأخير، كان بالعرض أكثر من فستان يشبه له، أي واحد منهم بيلبس على الريدكاربيت بانبسط، بس اخترت هذا لأني حبيت الألوان فيه أكثر شيء، ودي أشوفه على ميشيل مونقان أو كارولينا كوركوفا.

وش رأيكم بهذي الملابس؟ ممكن تلبسونها؟ أو أساسا مو ذوقكم؟ 

Team Altuzarra or Team Wang?

شكل الفترة هذي جا دور المصممين الإمريكان بالتعاونات، زي ما قالت لكم ريم بتغطيتها لكوتشلا، إنه أليكساندير وانق هو التعاون الجديد لإيش آن إم. بالمقابل تارقيت قبل أسبوع أعلنت أنه ألتوزرا هو تعاونها الجديد. مع إني أحب ألتوزرا أكثر من وانق، لكني أعتقد إن نتائج تعاون وانق مع إيش آن إم بيكون أحسن من تارقيت. 

كل المصممين "كول" و عندهم ملابس مرة مثيرة، لكن لذوقي الشخصي أفضل آلتوزرا، لكن الشيء اللي خلى حماسي يقل للتعاون هذا، هو الصورة اللي على اليمين، الصورة اللي على اليمين وحدة من تارقيت (صراحة ما أعرف منصبها) حطت باحسابها بإنستاجرام هذي الصورة، بهذا الفستان، الي تقول أنه من التعاون. شخصيا ما أعجبني أبدا، هذا لبس أظن ألقاه بأي محل (على الأقل شكله بالصورة). لما سمعت عن التعاون، تحمست أشوف شيء يشبه الملابس اللي حاطتها أنا بالصورة على اليمين (من مجموعات مختلفة ألتوزارا)، شيء أورقانيك، بنفس الوقت فيه أناقة و خياطة نظيفة، أبغى أشوف تسلز، أبغى ميتاليك، أبغى شك (مو لازم يكون شغل دقيق أو صعب)، بس أبغى تعاون يشبه فليب ليم لتارقيت، يعني باختصار ملابس الماركة نفسها، بجودة أقل (أكيد ما عندي مشكلة إن جودتها أقل، دامي بأدفع أقل من ربع المبلغ). 

أنتم وش رأيكم؟ أو وش متحمسين له؟ 

Red Carpet Worthy: NYC Edition

خلص أسبوع نيويورك، غير العروض اللي تكلمت عنها، فيه عروض أعجبتني فيها ملابس، ودي أشوفها بالريدكاربيت. فيه ملابس كثيرة أعجبتني بس قررت إني أختار أحسن ثمانية بالنسبة لي، و اللي بجد أتمنى أشوفهم بالريدكاربيت. قراري كان على أساس إني أرجع و أختار اللبس اللي أعجبني من أول مرة قلبت المجموعة و علق ببالي، علشان ما أخليها قائمة طويلة مرة. 

العروض من اليمين لليسار: (برابل قورونق، ألتازورا، نعيم خان و بيتر سوم)

من الأربعة العروض اللي فوق من أول مرة شفت المجموعات أعتقد أنه برابل مجموعته راح تكون موجودة كثير بالريدكاربيت، ألوانها حلوة، و أعتقد إنها تستاهل الريد كاربيت. التوكسيدو اللي من ألتازورا عجبني من أول مرة، طبعا السبب أعتقد أنه واضح الشريط الكريستالي اللي ماسك الجاكيت، بصراحة لما رحت أشوف المجموعة من جديد علشان أحفظ صورة هذا اللوك، اكتشفت إنها مجموعة حلوة، فيها تفاصيل حلوة، بس تحتاج أكثر من نظرة. 

العروض من اليمين لليسار: (فيلوسفي، رودارتي، بروينزا سوكلير و ديلبوزو)

صراحة أكثر فستانين حرضوني إني أكتب هذا الموضوع هم رودارتي و ديلبوزو، إذا ما كنتوا تعرفون أحب طبعات الحيوانات لما تستخدم استخدام ذكي يخليها أنيق مو رخيص (شوفوا مجموعة أونقارو خريف 2013). ديلبوزو مصمم إسباني أول مرة يعرض بنيويورك، أعجبتني مجموعته مرة، أتمنى أشوفه على الريدكاربيت لأني أعتقد إن هذا المصمم يستاهل تقدير أكثر (هذي المجموعة و مجموعات قبل). و بعد موجود عند نيت أي بورتيه .

بالمناسبة تعرفون إني انبسط على شيء تافه زي كذا، لكن ميروسلافا دوما لبست واحد من الفساتين اللي اخترتها لموضوع جايسون وو (أدري ما أمدانا) بس تلقونه هنا.

Contrast Shirt: A New Take

علاقتي بالملابس الرجالية جيدة جدا، ما أتذكر إني قد كرهتها، ما عندي مشكلة ألبسها، و لا أشوف أبدا إنها مملة. المهم الشيء اللي باتكلم عنه اليوم من عرض ألتزورا (يمكن من أول عروض نيويورك) هو القميص اللي لونه سماوي أو بعض المرات مقلم سماوي و أبيض و ياقته تكون بيضاء. 

ما أتذكر أول مرة شفت هذي النوعية من القمصان صراحة، بس أكيد شفتها على رجال (يمكن مهمين)، و أظن أني كنت صغيرة، أو كنت ما أدري :) لأنها ما أعجبتني كنت أقول كيف القميص لون و الياقة لون ثاني؟!!.

(كبروا الصورة لتفاصيل أوضح)

مثل ما أتذكر متى أول مرة شفتها و لا حبيتها، ما أظن أتذكر متى عجبتني، مع إني الحين أفكر إني شفتها بفيوتشراما بحلقة عن وال ستريت و عجبتني (أعرف إن الموضوع محرج إني أحب شيء من كرتون، بس لازم أعترف إن أفلام الكرتون حددت كثير من الأشياء اللي أحبها و يمكن اللي ما أحبها) :). 

ما عندي قميص زي كذا، مع إني قلت لكم أنه يعجبني، بس أختي أعتقد إنها ممكن تسوي دولاب خاص بالقمصان اللي كذا :). المهم أعجبني كيف ألتزورا "صممها" من جديد، مع إني بالأغلب ما ألبس أشكال الفساتين اللي سواها و لا أحب كثير التنورة البينسل، لكن أعتقد إني مستعدة أجرب شيء زي كذا. بعد أعجبني أنه حاط عليها كريستالات، كل الفكرة أنه أخذها من شكل الجدي، لشكل أكثر أنوثة، بس إلى الآن بجدية. (المجموعة فيها أشياء حلوة ثانية، لو حبيتوا شيكوا عليها هنا). 

شرايكم بالقميص هذا؟ تحبونه من قبل أو ما يهمكم؟ شرايكم باللي سواه ألتزورا؟