Best dressed 2010

ما قد فكرت إني أحط قائمة لأحسن الفساتين بالسنة لسبب معين، هو إني ما ودي أحصر الفساتين الحلوة بعدد معين، يعني عشرة أو عشرين أو أي رقم ...
هذي المرة من شهرين صرت أنزلهم بتمبلر واحد واحد و لا أعرف إلى أي رقم راح آصل ... حاولت أدخل جنسيات كثيرة، أعراق مختلفة، و أعمار مختلفة، و أشكال أجسام مختلفة، و آخر شي مصممين مختلفين،
القائمة دخل فيها كل حقات قوسيب قيرل (تقريبا) يعني بلايك، لايتن و حتى أعرف مفاجأة تايلور مومسين دخلت ... أظن أكبر وحده هي كارولين دو مناكو يمكنها بالخمسينات، و أصغر وحده إيل فينانق بالقائمة عمرها 12.
زي ما قلت لكم حاولت أجيب من ماركات مختلفة، و أنواع ملابس مختلفة ... هنا القائمة أو اضغطوا على الصورة ... شوفوها و قولوا لي رايكم، لو شي ما أعجبكم، أو شي أعجبكم، أو شي أعجبكم و لا لقيتوه بالقائمة، يعني وشي قائمتكم؟

Gray

ما أعرف عنكم أنتم بس أنا أحب كثير ملابس السهرات، على إني ما زحب الزواجات، بس المشكلة إنها هي المكان الوحيد الي ممكن تنلبس فيه هذي الفساتين ... أو الحل الثاني إني أصير سلبرتي P:

لسا باقي حول الشهرين على عروض الخريف، بس بعض الماركات عندها مجموعات قبل الخريف أو Pre-fall بالعادة ينزلون فيها ملبس شوي شتوية، و عدد القطع أقل من مجموعات الشتاء أو الربيع ...

الي لاحظته من أكثر من مجموعة، أنه الشتاء الجاي بيكون فيه ألوان ساطعة مره، زي الأحمر، و النيلي و البرتقالي و كمان لونين الأول: شي بين الماسترد و البني و الثاني الرمادي.

ما عمري كنت من معجبين هذا اللون (الرصاصي، و الرمادي و درجاتهم) ما أعرف ليه، حتى أتذكر سنة من السنين طاحوا فيه حسيته طلع من خشمي، كرهته كره العمى، يمكن هو الي خلاني أحب التلوين ... بعض المرات أحس فيه بلادة غير طبيعية. زي ما قلت لكم أني شفته متكرر بأكثر من مجموعة، جبيته على قطعه، قطعتبن من دون لا يكثر، و أهم شي حبيته أكثر شي على ملابس السهرات ... حمسني أني أفكر بشي رمادي كفستان زواج، بالذات الأوسكار دي لا رينتا (اللي بالوسط) حبيته بقوة، ودي أشتريه و ألبسه باللقلب يعني أخلي الأزارير ورا ...

كمان حبيت الشانيل (الي على اليمين) من زمان ما حبيت فستان لشانيل، كمه ظريف (أدري ماله معنى الوصف) بس عجبني أنه الشيفون الي بالأكمام ما بدأ من الكنف، بعد حبيت فيه الحلقات الذهبية.

الفستان الأخير، و أكيد ما بقى إلا الي على اليسار من كارولينا إيريرا ... عجبني الفستان، حسيته مع إكسسوار ذهبي، و شعر مشدود ذيل ناعم  بيطلع مره حلو، و أكيد مع كعبات سودا طويله مره.

شرايكم باللون الرمادي على الملابس، خصوصا ملابس السهرات؟ قد لبستوا فساتين سهرة رمادية؟ 

AMAZING

أعرف إني كثرت عليكم من كيرستن دونست، بس أكيد أنكم توافقوني التكثير منها مو شين، و لا مضر بالصحة ... أمس أو قبل أمس كان فيه حفلة للفن الحديث بمتحف لوس أنجليس، و كان جايين له ناس كثار ... كنت أقدر أكتب عن الجايين بشكل عام، بس لما شفت كيرستن قلبي ماطوعني إني أحطها مع الثانين :)

تأخرت يوم كامل عن إني أحط البوست هذا كنت مصرة إني ألقى من وين هو، ما فيه ماركه ما شكيت فيها إلا نبشتها من الأول للأخير، و لا لقيت شي حتى يشبه له، طلعت الأخبار و قالوا أنه من شانيل ... من زمااااااان ما خلاني فستان من شانيل أقول وااااااو، بس هذا خلاني ... الفستان من مجموعة الريسورت (منتجعات) الأخيرة ما لقيت شي يشبه له بالعرض إلا هذا (أدري وش دخله، بس هو الوحيد الي ياقته تشبه ياقتها، و القماش شكله نفس النوعية)، فما أعرف هذي نسخة مسويه خصيصا لكيرستين و إلا بتصير بالمحلات موجوده؟!! لو كانت لها لحالها تستاهل، و لو كانت بتنزل بالبوتيكات أعتقد إنها تحفة، لو تقدر على فستان شانيل، هذا ما يتفوت.

طبعا ما فيه شي باللوك مو حلو ... الشعر نظيف، من فترة طفشت من اللوكOld Hollywood glamour بس كيرستن أظن إنها ساحرتني، شعرها حلو، مو لاصق مره زي شغل كثير من الي يسوون ريترو (إليسا مثال) الفرقة حلوه، طول الشعر حلو ... المايك آب حلو صارخ بس مو ثقيل ... الحلقات آه بس وش أسوي فيها؟ فيه أحد أحلى من كذا؟!!

قلت لكم قبل ناس كثير لبسوا لبس حلو ... هذي صورهم هنا رفعتها لكم، الغريب أنهم كلهم معاهم كلتش سوداء

Paris Wish List

أعرف إن شماعة الدراسة صارت بايخة، بس بجد شهر أتابع ملابس أوجع لي راسي، أحس ما صرت أسوي شي بالنت غير أشوف هالعروض ... قلت آخذ نفس و أرجع أجمع لباريس من جديد ...

بالعادة أنا أحط ترتيب الأشياء علي حسب ترتيب العروض، بس لأني نسيت ترتيب العروض (ما ورا لنا أسبوع مخلصين) فقلت أحطه على حسب ما أتذكر وش كان أول

Haider Ackermann's Black Dress

تعرفون بالعادة الفساتين السوداء ما تلفت نظري، مو معناه إني ما أحبها، بس يعني نوعا ما أحس إنها قليل فيها الخطأ، يعني ما يتعب المصمم معاها ... بس هذا الفستان من حيدر أكيرمان عجبني قوة، خصوصا هذي الحبال الي على الصدر، طبعا لو كان عندي ماراح و لا أقدر ألبسه لحاله بس حسيت هذا من بين فساتين كثيرة أكثر فستان ممكن ألبس تحته شي و يطلع حلو ... لسا ما فيه شي ببالي بالضبط يصلح تحته بس أعتقد توب بأكمام طويلة ملونه بيطلع حلو مره، و لو بعد جاكيت ريش بيكون حلو مره.

Cacharel's Pink Sunglasses

على أنه خف هوسي بالنظارات، و تحول لأختي الي أظن إنها ما قد سمعت بشي اسمه الطنزه بطوف الثوب، بس هذا ما يعني أني فقدت تقديري لهذا المنتج الرائع ...

الفترة الأخيرة أميل كثير للنظارات الكلاسيكية يعني بفرايم أسود أو هافانا إلا أنه "قليل من المتعة ما يمنع" عجبني اللون الوردي و عجبني لون العدسات المايل للبرتقالي.

Sonia Rykiel's Hairstyle

ما أعرف متى حبيت هذي التسريحة، بس أول ما شفتها حسيت علاقتي فيها قديمة، ودي أسويها عاجبتني قوة ... حتى ما أقدر أتكلم عنها بس الحين ودي أسوي هذي التسريحة و ألبس الفستان الإيلي صعب هذا (قصدي اللي بالوسط) و أروح أدور لي مهرجان أو حفلة توزيع جوائز، أو يعني لو كان شي على مستواي يعني زواج بس أقل شي زواج يفتح النفس.

Viviane Westwood's Dress

بالعادة ما أحب ملابس فيفيان ويستوود بالرانواي ما أحس فيها مع كل هذي الكركبة هذا الفستان ما ودي اتكلم فيه كثير اتأملوا فيه بس، ما أدري بالضبط وش تفكرون فيه، بس أحس لو كان بمحل ما فيه منه إلا واحد بيتقاتلون كل البنات عليه :)

Givenchy's Oversized Vest

بكون خبلة لو فووت هذا الموسم من دون ما أحط شي فيه طبعات فهد... و و بكون خبلة زيادة لو ما اخترت شي من جيفنشي، مو لأنها جيفنشي لأنه الفترة الأخيرة صايره تصاميمه تقتل ... لما أخترت هذا الشي ما حطيت ببالي أني باجمعه مع أي شي ثاني موجود بس و أنا أحطه حسيته يصلح للفستان الأول الي من حيدر أكيرمان و يكون تحت الفستان قميص أبيض.

Yves Saint Laurent's Necklace

قلت لكم قبل إني حابة المجوهرات الكبيرة، و بعد قلت لكم إني أحب المجوهرات تكون أقل تعقيد يعني أحبها تكون بدائية أكثر ... الأحجار أحب تكون على شكلها ... الحدود مو متساوية و التصاميم شكلها كأنها شي من قبائل بدائية.

Miu Miu's Golden Leather Jacket

ميو ميو صاير خايس ... و لما أقول خايس قصدي أنه يضيق صدري و يحسسني أنه جالس يقول لي "حامض على بوزج" ما راح تقدرين تشتريني ...الجاكيت هذا على غير كل الأشياء الي شفتها و تشبه السبعينات خصوصا بأسبوع لندن، هذا الجاكيت بألوانه اللماعة يفتح النفس ... هو من فئة الأشياء الي يقول إلبسي تحتي خيشة و بيطلع لبسك حلو.

Yohji Yamamoto's Skirt

مع إني أحب التنانير الميدي ... أحسها كيوت، إلا أظن أنه طول الشهر هذا ما أخترت شي ميدي، مو عشان أرضي هذا الحب فيني أخترت هالتنورة من ياماموتو لكن لأنها بجد حلوة، ألوانها الشراشيح الي طالعة منها، و أهم شي شكلها من تحت، أحس إنها لبس حلو مره للصيف.

بالعادة أختار ثمانية أشياء بس لأنه باريس آخر إسبوع، و لأن هذا الموسم هو آخر موسم لجان بول غوتييه كمصمم لإيرميس أخترت شي تاسع من مجموعته و الي بجد كانت حلوة.

الصورة هذي اعجبتني فيها أشياء كثيرة، أعجبني الجاليه الداخلي ... أعجبني الجاكيت ... و أكيد أعجبتني القبعة بس الشي الي ودي أشوفه كثير، هو هذا الشي الجلدي الي نص حزام نص مخنق أو ما أعرف كيف، أحسه على فستان أبيض سادة بيطلع مره حلو.

Clothes in 2D

شوي متأخرة بأسبوع باريس، بس بتعذروني الدراسة الي عييت تخلص رجعت مره ثانية ... على أنه يمكن مر يومين أو أكثر هلى هذا العرض، بس توي أشوفه كامل الي هو عرض Maison Martin Margiela

العرض فيه ملابس غريبة، كأنها صحيفة مو ملابس يعني كأنها ورقة، ما أعرف صعب الشرح بس زي ما أنتم شايفين بالصور شلون شكل الملابس. العرض بشكل عام كله أعجبني بس لو جينا كيف بتلبس بعدين صراحة ما أعرف، عشان كذا ودي أشوف كيف بيصير عليها ... يمكن الصورتين الي على الأطراف هي الي ممكن تلبس زي شكلها الحين ... يعني أنا ما عندي مانع ألبس الجاكيت الي على اليمين و بصراحة عاجبني شكله مره، نفس الشي التنورة الي على اليسار، بس أحسها بتطلع غريبة شويا خصوصا و أنا مره طويلة P: ... عشان تفهون كيف جاي شكل الملابس، يعني تراها مو ورقة، و لا العارضات نحيفات للدرجة هذي أنعم ينكبسون كذا زي الي يصير لتوم لما يتسلط عليه جيري و يرمي عليه صخرة أو الباب أو أي شي. هذا بريفيو للعرض.

(لجودة أفضل روحوا لصفحته باليوتوب)

JPG ♥ The Runaways

جت الدراسة و كالعادة يعني الموضوع صار أصعب إني أكتب كل يوم ... بس أحاول ألحق على أسبوع باريس قد ما أقدر خصوصا أنه فيه أكبر و أكثر المصممين كلاسيكية ... من العروض الكبيرة خلص ديور و تقريبا ما عجبني، مو كرهته بس ما عجبني و اليوم ما أدري أمس كان فيه عرض جان بول غوتييه.

الموسمين الي فاتوا يعني مجموعة الخريف، و الأوت كتو لغوتييه حبيتها مره، و هو مو من عادتي، يعني أحس ذوق غوتييه غريب علي شوي ... شكله جان ما تحمل إني أحب عروضه و طلع بعرض كأنه فيلم ذا رانوايز (أنا لسا ما شفته و أقدر أعطي مية سبب إني ما شفته، بس شفت صوره) بالذات اللوك هذا الي فوق على إأرس، حسيته هو نفسه الي لابسته كيرستين ستيوارت بالفيلم.

بصراحة قصة الجاكيت بذات أعجبتني بس لو أنه لون ثاني مو أحمر، ما أعرف أنا مو متصالحة مع الجلد الأحمر كملابس أحسه رخيص مره. الشي الثاني القصة المولييه هذي حكاية ثانية، أساسا هذي القصة بس أشوفها على أحد صدق تنسد نفسي أحس الشعر يصيح من هذي القصة ...

العرض بشكل عام مو قبيح، يعني فيه أشياء حلوه، بس المولييه ما أقدر اتقبلها ولو بمليون سنة :)

شرايكم أنتم بالموليية و الجلد الأحمر للملابس؟

From the Projects?!!

ما كتبت شي عن إسبوع باريس، لأنه بس أمس أو قبل أمس بدت تعرض الأسماء الكبيرة، العروض حلوه، بس لسا ما شفت شي يآخذ العقل مثلا، يعني زاك بيسين الي ما عرض هذي السنة بنيويورك و قدم عرضه بباريس قدم عرض أعتقد أننا بنشوف كثير منه بالريد كاربيت، و أنا بعد أتمنى ألقى شي بسعر معقول عشان أشتري لي واحد.

بالمين أمس كان عرضه، ما توقعت منه شي زي كذا، يعني توقعت يكمل على موال الفساتين اللامعة الي شفنا كثير منها على الريد كاربيت الفترة الي فاتت، بس شكلهم هذي المره طفشوا من الريدكاربيت و قرروا أنهم يتحولون للشارع :) ،و أي شارع لا الشوارع القذرة ...

أول قطعه شفتها بالعرض هي الي على اليمين علي سنيانا و الصورة صغيرة توقعت أنه التانك هذا بيكون ترتر، توقعت و تمنيت، لأنه زي ما قلت لكم العرض الي فات لبالمين كان كله ترتر، بس لما كبرت اكتشفت أنه حرير مسوا على شكل تانك منهري و مليان وسخ ؟!!! ما أحبطت صراحة و أنا أشوف الشكل هذا، و حتى لما نزلت تحت وشفت الجينز الي عليه صدا، أعجبتني الفكرة ورحت أشوف العرض كامل.

قطع كثيرة بالعرض عجبتني، عجبني الجلد مره منهري، عجبتني التنورة الي على كاسيا (الأولى من اليسار)، يعني بالمين لسا تاركين أشياء تلمع، ما أعرف الي عليها دبابيس أو كريستالات ... بعد عجبني شكل البنطلون الي على فريا (وسط) أصلا أحس كل العرض يصلح لها ... مو قلت لكم بقائمتي لميلان أنه عجبني البنطلون الجلد الي من غوتشي بتأثير من فريا بيها؟

المهم العرض خلاني جديا أفكر أخرب لي تي أو جينز و أشوف كيف تطلع، يعني أكب على التي كلوريكس، أو أترك جينز مع مسامير و موية :)

أنتم شرايكم بالملابس المبهذلة هذي؟

Milano Wish List

ميلان كان حلو، يعني لندن بعدين ميلان نستني خيبتي بنيويورك ... أمس انتهى أسبوع ميلانو، و اليوم إن شاء الله داخلين على آخر آهم أسبوع الي هو إسبوع باريس.

باختصار أقدر أقول ميلان جايبه معاها للصيف الجاي ملابس بخطوط واضحة، ورود قليلة، و خطوط كثيرة، قصدي تقليم و كروهات.

Gucci's Leather Pants

بشكل عام أنا مو من محبين لوك المتروسايكل، (يعني جلود، و أسود و أبوات) لكن يمكن تأثير فريا بيها، و هذا المايك آب من غوتشي حبيت هذا البنطلون الجلد قوه، هو تقريبا أول لوك شفته و حبيته (يعني لنفسي) من أسبوع ميلانو، لأنه أول عرض شفته من ميلانو كان عرض غوتشي، و أظن أنه هذا أول لوك جلد بالعرض . الجلد شكله حلو مره خصوصا من الجوانب، ما قد جربت ألبس بنطلون جلد، بس يعني قد لبست ليقنق لماع لأختي و كانت أموري ماشية، حتى و أنا ما عندي سيقان طويله زي سيقرد (العارضة).

Prada's Shoes

بالنسبة لي عرض برادا، يا إما تحبه أو تكرهه، أعتقد أني حبيته، و شوي شوي أحس أني بأحب الأشياء الي منه، الأشياء كانت أكثرها كأنها شيرت من هاواي، يعني قرود و موز على أكثر الأشياء ... من أكثر الأشياء الي حبيتها هذي الجزمة المقلمة، أحس لها شخصية (قصدي الجزمة) يعني أحس مع أي لبس ممكن تبرز هي من نفسها، بالنسبة لي يكفي اللون الأخضر، و أكيد شعار برادا الذهبي.

D&G Lace Top

مو شي غريب إني أحب شي دانتيل. و على أنه عرض دي آن جي كان مليان أشياء حلوة (أكثرها ورود) لكن هذا الشي الدانتيل عجبني مره، خصوصا لو أنلبس، زي العرض، يعني تحته شي فلورال و أحس أنه مع تنورة أو بنطلون أي شكل بيطلع حلو مره.

Jil Sander's Dress

لو سألتوني من كل بين كل الأشياء الي شفتها بالثلاثة أسابيع وشو الفستان الي ودي أخذوه و ألبسه الحين، بيكون هذا الفستان من جل ساندر ... فيه كل شي أحب، شيفون، فستان طويل، و ألوان يعني شي مو بس أسود. غير كذا التقليمات فيه عاطيته شكل مره حلو.

Dolce & Gabbana's Bag

عرض دولتشي آن قابانا كان المره هذي ماراح أقول خرافي، يعني ما أحب استخدم كلمات كبيرة بس أنه صدق كان حلو، أكثره أبيض، بس مو ممل ...

و مرات كثيرة قلت إني ما أحب كثير أشيل شنط، بس الفترة هذي خاطري بشنطة بسلسال يعني تحط كروس بودي. سلسلة هذا الشنطة حلوه، مره ... و أحلى شي فيها بعد هذا الشي الي يشبه الأبواك القديمة موجود بمقدمة الشنطة ... باختصار كيوت.

Salvatore Ferragamo's Short

من السنة الي فاتت و أنا حابة هذا الشكل من الشورتات، الي يشبه الملابس الرياضية بالسبعينات، بس فراقامو سوا نسخة حتى أنا ما حلمت أنه أحد يسويها، مع اللون الكامل هذا، و حرير أحس أنه الشي الي صدق صدق ودي فيه من كل هذي المجموعات ما أعرف وش أقول عنه، بس ذووووق.

Missoni's Hat

قلت هنا أكثر من مره إني أحب القبعات، و لا أمل من شراها ... فمو شي غريب أنه أختار من عروض هذا الصيف قبعة، خصوصا عروض كثيرة كان فيها قبعات ...

الشي الي ميز هذا الصيف هي القبعات الفلوبي، عندي وحده شريتها الصيف مو هذا الي قبله، صح أقدر أقول تقريبا إني ما لبستها بس يعني القبعات شي ما أقدر أقاومها ... زي ما قلت لكم على كثرة القبعات بصراحة ما فيه شي عجبني، يعني خلاني أتمني ألبسه، إلا هذي القبعة المربعة من ميزوني، بصراحة القبعة هذي تخليك تتمنى أنه الصيف يطول بعد مع إني طفشت منه خصوصا هنا في الرياض.

Versus Sheer Cardigan

هذا البلوفر من فيرسس بكون تافهه لو ما حطيته، لأنه ما فيه سبب ما أحطه، أولا إني صايره أحب فيرسس بس ليه هذا البلوفر لأني أحب لما الأشياء تخلط مع بعض يعني كاجوال مع فورمال سبورت مع لبس سهرات و هذا البلوفر فيه هذا الشي يعني بلوفر شكله شوي سبور، قماشة شفاف، لونه حلو، و الأهم أنه مصمم فيرسس هو كريستفور كين مع دونتيلا فيرساتشي،

Jil Sander's Plastic Bag

وقفت اليومين الي فاتت كانت معاي زكمة شينة، و هالشي خلاني مالي خلق أسوي أو أشوف شي ... رجعت اليوم أشوف العروض الي فاتتني من ميلانو.

ما أقول إن العروض كانت بايخة و لا تستاهل أنه ينكتب عنها، بس لاحظت بميلانو أحسن القطع هي الفساتين السوداء، و ما أعرف شي داخلي يحسسني أنه ما فيه داعي أعرض فساتين سوداء لأني أحس أنه أكثر الفساتين السوداء حلوه أساسا، و لا تثيرني لما أشوفها، تطلع حلوه، و الي يعرف يلبسها صح يطلع ما أعرف بس ما جت ببالي إلا كلمة فخم.

من العروض الي أعجبتني و ما كنت فساتين سوداء هو عرض جيل ساندير. بس بعيد عن الملابس لفتت نظري الشناط الي حاطتها بأكثر من لوك.

الشنط زي ما تشوفون كأنها أكياس بلاستيكية، بصراحة أعجبتني خصوصا السوداء و الحمراء أحس فيها بساطة و أناقة بنفس الوقت. مشكلتي معها بتكون سعرها، أعرف أنه سعرها بيكون غالي، و مع إني حابتها بس يعني للحق ما راح أدفع فيها أكثر من 15 دولار، و لأني أدري أنه ما راح تكون بهذا السعر، أتمني أنه يكون فيه نسخ منها عند ماركات الهاي ستريت، و بألوان و نقشات أكثر ...

شرايكم أنتم بالشنطة، يعني ممكن تشترون شنطة كأنها كيس بلاستيك؟ ولو كنتوا مستعدين تشترونها وش السعر المناسب لكم؟

London Wish List

يا سرع ما خلص إسبوع لندن، و إن شاء الله اليوم يبدأ إسبوع ميلانو، للحق لو أنا ما سويت تصفيات على الأشياء الي شفتها بلندن، كان كل شي دخل بهذي القائمة، لأنه صراحة لندن كان مره، مره، مره حلو ... بس حاولت أحط الأشياء الي ودي فيها صدق ...

فيه عروض كاملة أعجبتني بلندن، و عشان ما أتعب نفسي بالتفكير فيها حاولت آخذ الشي الي عجبني من أول نظرة :)

Unique's

هذا الفستان من يونيك، الي ما يعرف وشو يونيك، يونيك هو عرض لتوب شوب ... ما أعرف هو فستان أو تنورة و توب بس المهم كله عاجبني، أتمنى أنه ينباع بمحلات توب شوب، لأنه بالعادة مو كل شي بالعرض يبيعونه ... الفستان ألوانه حلوه، بعد لو تكبرون الصوره (كبروها برابط لحاله عشان ترجعون تقرون كامل الموضوع:) نرجع لو كبرتوا الثوره بتشوفون أنه التنورة أو الجزء التحتي يلمع، اللون عاجبني، و التخريمات الي فوق حلوه، و حتى أنه كل شي وسيع حلو.

Antonio Berardi's Earrings

أول ما شفت عرض أنتطونيو حبيت الحلقات أكثر من أي شي ثاني (ما أعرف هي من تصميمه أو من ماركة ثانية)، بشكل عام أنا ما أحب الحلق الكبير بشكل دائم، بس هذا عجبني لونه حلو، و أحس أنه خفيف مره، و شكله يشبه الإكليل الي يحطونه على رووس القياصرة الرومان ... أحسه بيكون إكسسوار حلو للصيف، و يصلح لحفلات، و بعد لطلعات عادية، أظن أنه هذا الحلق بيغير النظرة الي ببالي للحلق الكبير أنه يخلي الواحد كأنه غجري، لأن تصميمه و ضربه، فيه خطوط جديدة.

Vivienne Westwood Red Label Skirt

التنورة هذي من فيفيان ويستوود ريد ليبل أعجبتني مره، أعجبني قماشها، و لونها، أعجبتني عفطاتها أو ثنياتها ما يهم و يمكن الي خلاني أدخلها قائمتي للأشياء الي أتمناها، هي طريقة عرضهم لها، أعجبني شكلها قوه مع القميص، خلوني أفكر بشي يشبه كذا، يعني تنورة فخمة زي هذي مع قميص عادي و ألوانه باهتة، أتمنى أشوف اللوك هذا على أحد ثاني أحس أنه بيطلع مره حلو.

Meadham Kirchhoff's Collar

يمكن كثير لو شافوا هذي الصورة يتذكرون قبات المدارس، يعني قصدي العجز زيي اللي لحقوا على ذيك الفترة ... بس بجد بخاطري بقبة أو ياقة وش ما تبغون تسمونها، اللياقة المفصولة جت موضتها مع مجموعة ميو ميو للصيف الي فات (المجموعة الي مطبع عليها، سوو سيرش داخل المدونة على ميو ميو و بتشوفونها) كانوا يبيعون ياقات منفصلة ... الياقات راجعة بقوة بكل أشكالها و منها هذي الدائرية الي يسمونها بيتر بان ... ودي بهذ الياقة يمكن ألبسها مع كثير أشياء يعني أعتبرها شي زي العقد.

Paul Smith's Briefcase

قالت لي shosha أنها تبغاني اتكلم عن الشنط، للحق أكثر العروض ما كان فيها شنط، إلا الماركات الي أساسا عندهم خط شنط زي بوربري مثلا ... قلت الكلام هذا قبل، بس الشنط ما عادت سالفة زي أول، و أكثر الشنط الحين صارت كلاسكية أكثر.

أحب أنا الماسنجر باق حقت بول سميث و شي ثاني أحبه هو اللون الكونياك أو التان، الشنطة هذي من بول سميث هي الشنطة الي ودي أشيلها الحين لو أنا اتحمل أشيل شناط :) شكلها الي يعطيك جو إكسفورد بالثلاثينيات و لونها، و الأهم الشي الي سوا فيها بول و هو دخل عليها هذا الخط النيون الأصفر أعطاها روح جديدة، حبيتها.

Christopher Kane's Jacket

الحين قلبي توقف عن الشغل، كريستفور كين كل مرة يقتلني بالأشياء الي يطلعها، ما أكتفى بالدانتيل الي أنا أحبه قوه، سوا ملابس شي كأنه جلد بس ما أظنه جلد زي الدانتيل. الجاكيت هذا من مجموعة أشياء مسويها بالطريقة نفسها، الألوان تذبح الفكرة أساسا مجنونة، و أنا باكون مجنونة لو ما دخلت قطعه من هذا الدانتيل البلاستيكي من قائمتي، ما يحتاج اتكلم أكثر (تأملوا أنتم).

Erdem's Hairdo

بذات هنا أحس إني أكسر الخاطر، من كثر ما تعقدت وش بالضبط أكثر شي ودي فيه من مجموعة إيرديم الأخيرة، و لا لقيت حل، من كثر الأشياء الي توجع الراس، قررت إني أوقف على ابسط شي أقدر عليه، و إن شاء الله أختي بتتعلم كيف تسويها.

مع أنه راسي و طبيعة شعري ما يطلع عليها حلو السف (هذا الي أحسه) إلا إنه هذا الشعر من إيرديم عجبني قوه، الواحد وده يسويه و ما يوقف إلا بكوخ بمكان نائي بالسويد، كيف جت الفكرة هذي ببالي ما أعرف بس الشعر هذا فيه كل شي يحسه الواحد بالصيف و الريف حلو مره.

Fashion East's Summer Coat

البالطو الصيفي شي أحبه مره، و لا ألقى منه أشياء كثير تفتح النفس، الصيف الي فات تعبت و أنا أدور و انتهيت شاريه واحد من نرسيسو رودريقز و بالأخير نسيته و لا لبسته :).

ليه أحب البالطو الصيفي؟ أولا لأنه يخليك غير عن كل الي بالشارع يمشون يعني كل العالم تانك من دون أكمام، و أنت لابسه شي مشرشح كأنك وحده من بنات أولسين. أحبه ما أعرف ليه، و هذا البالطو من فاشين إيست حسيته كأنه جكيت شايب معدل :) أدري وصف غريب بس حبيته، أحب الأشياء الي كأنها مطلعة من صندوق قديم، شي زي الي يصير بالأفلام.

Rodarte for Target in High Fashion Version

الحمد لله ما خيب ظني كين، طبعا لما أقول الحمد لله أنا جواتي أقول الحمد لله على كل حال، يعني ما يحتاج أشكي إني ما أقدر عليه ... و عشان تعرفون قد إيش أنا مو أنانية شوفوني و أنا ما أقدر على كين انبسط أنه سوا شي كويس يقدر يشتريه ناس ثانين ماعندهم مشكلة دفع 4000 دولار على فستان منه ...
طبعا أحاول أعزي نفسي و أحط لكم اللوك الي فوق من عرضة الأخير بس ما راح أكذب و أقول مو حلو يعني على قولتهم الكذب خيبة، بس باقول أنه استوحاه من هذا اللوك من رودارتي لتارقيت .



طبعا أنا حابة مره هذي المجموعة، مو بس لأني شريت منها (تنورة العيد المسترد هذي هي) و تراها مو من الهرم للي قالي أنه شاف زيها بالهرم، طبعا هي مو غالية، مو أحبها بس لأنها مو غالية، أحبها عشان التل الي عليها، و أحبها عشانها زي الدانتيل، أنا أساسا كان خاطري بالبلوفر بس لقيته غالي 64 دولار، أدري بتقولن من وين غالي، بس أنا كان خاطري أشتري أشياء رخيصة، و أثبت لنفسي إني أقدر أشتري ملابس رخيصة و أحبها مره، و هذا الي صار ...

بس إن شاء الله الله بيعوضني بدل الرودارتي هذا بكريستفور كين ببلاش، أعرف إني أضحك، بس يالله نضحكم معاي :)

I think I'm in love

أسبوع لندن بدا يحمى، و لحد الآن شكلي حابته أكثر من نيويورك ... المره هذي اللندنيين ما عكسوا العالم، زي ما شفنا بنيويورك الناس رايحة للألوان الفاتحة، المصممين الإنجليز ماشين على نفس الموال، و تقريبا مستخدمين نفس الخامات الي بنيويورك كانت هي الي مميزة العروض، طبعا أهمها الأقمشة الشفافة ...

ماري كاترنتزو عرفتها بإسبوع موضة لندن الي فات، و أظني خلاص حبيتها، ما تهمني وشي جنسيتها، و لا من أبوها و لا شي ... أهم شي إنها تسوي ملابس حلوة ... ترجع هذي المرة بنفس الأقمشة المطبوعة بس أظن غير القماش، يعني بمجموعة الخريف كانت الأقمشة على ما أظن ساتان، هذي المرة حتى لما كبرت ما عرفت، أحسها كأنها بلاستيك، ما يهم نرجع للبس نفسه الطبعات كانت كأنها جواهر، هذي المرة الأقمشة عليها رسمات بيوت صيفية وورود يمكن الملابس نفسها قصدي القصات، يعني مو شي ما قد صار إلا منها، مع أنه لها أسلوب بقصاتها الواقفة، بس الرسمات الي على الفساتين قصة، أتمنى ألبس شي كذا، مو طبيعي ...

الشي الي بعد مختلف عن مجموعة الخريف، هو إنها بأكثر من قطعة استخدمت أقمشة شفافة، و زيها زي كثير من عروض نيويورك استخدمت أقمشة شفافة سادة، و كمان أقمشة منقوش عليها ...

المفضل عندي من المجموعة الي حطيتها، الوسط أحسه كأنه قصة رسماتها حلوة أو شي تعرفون فيلم كرتون أسمه صوفي أو أظن يارا على حسب القناة الي شفتوه عليه ... المهم أحس أنه الرسمات تشبه له كثير.

Twenty8Twelve: Slip

سيينا ميلر للي ما يعرف عندها خط ملابس مع أختها أسمه Twenty8Twelve ما أعرف كم لهم بس بالمرات الي فاتت تابعته يعني كعرض كان العرض ممل، بس هذي المرة أحس أنه في شي مختلف و الملابس شوي لها روح ... طبعا لما أقول مملة ما أعني إنها ما تنشرى بس باعتقادي أنها ما تستاهل أنها تعرض، يعني المفروض على طول تروح للمحلات.

هذي المرة بالعرض الملابس بناتية أكثر يعني كأنها ملابس عرايس شوي، مو بالطريقة البايخة بس هذا الإنطباع الي خلته عندي، خصوصا مع الشلحات النفاشة الي تحت بعض الفساتين و التنانير ... هذا مو أول عرض أشوف فيه شلحات، شفتها بعرض راج آن بون و أعجبتني مرة، خصوصا هذي الي على آبي ... بس نفاشة ما أعرف، أعجبني الفستان الأول بذات، أحس كلها تحتاج أنه الواحد يكون حريص معاها شوي، خصوصا إني أحس إنه لو الواحد مسخها بالأشياء البناتية الي بيلبسه معاها بيصير كأنه بحفلة تنكرية زيه بنت بالروضة.

المهم أنتم شرايكم بفكرة الشلحة؟ يعني ممكن تشترون لكم وحده من الشلحات القديمة و تلبسونها تحت وحده من التنانير الي عندكم؟ طبعا أكيد تكون واضحة.

TeaTime

يمكني شوي بس شوي متأخرة عن بعض الناس بس وش أسوي ببلوقير كل يوم طالع لي بتحفة جديدة تعطل على شي ... أمس عرضوا رودارتي و أنتم تعرفون إني أحبهم، صحيح ما سهرت أشوفهم لأني كنت تعبانة وودي أنام، بس لما قمت وشفتهم صحت ودي بشي منهم، إلى الآن أول عرض من نيويورك أبغى شي منه بجد حتى مارك جايكوبز (و بالمناسبة حتى مارك جايكوبز و مارك باي مارك جايكوبز حلوات، بس الفرق أنهم يمكن ودك تشتريها بس مو ودك تسرقها على طول من العارضة) و تعرفون عاد العارضات ما عندهم مشكلة لو آخذ الملابس منهم يعني يقدرون يمشون من دون ملابس :)

الي يعرف الأخوات رودارتي (وترا هذا مو اسمهم بس اسم ماركتهم) أنهم بأكثر من مكان قالوا أنهم يحبون الريف الإنجليزي (من ما يحبه؟) يعني الورود، و الشاهي و المعجنات الشاهي كلها أشياء تخلي الواحد يحب أنه يعيش ولو لمره جو الريف الإنجليزي ... أول ما شفت صور الفساتين (تحت) تذكرت كلامهم هذا أنهم يحبون الريف الإنجليزي، و بعد تذكرت نقشات البورسلان المشهورة هذي الزرقاء هي صراحة مو المفضلة بالنسبة لي لو راح أشتري طقم شاهي بورسلان بس رودارتي خلوني أفكر فيها بجد، لأنه شكلها أقرب لي من فساتينهم.

زي ما قلت لكم الفساتين و الجزمة (فوق) (لا تنسون انتبهوا للشربات، يجننون) تلاحظون أنها تشبه نقشات هذا البورسلان، كلهم قصدي الثلاثة فساتين و حتى باقي المجموعة بس هذي بذات ودي أسرقها و لا أستحي إني أقول كذا :) بس لو رودارتي ما يبغوني أغلط و يخيروني من الثلاثة فساتين باختار حق كارلي (الأول من اليمين) بس لو يعني يبغون يظمنون ولائي ودي بحق كارلي و من تحت أبغى يشبه حق دروثا (الوسط) و ترا عادي جدا عادي يعطوني الثالث :).

الصورة الي فوق (الي مع الجزمة) أخذتها من هنا، طبعا ليه هذي المرة حطيت من وين أخذتها، مو لأني دايم أنا الي أصور، بس لأنه هي أو هو الله يعفيهـ/ـا على تجميعه للبورسلان الأزرق هذا و فكني من تعب التدوير :)

Chinese collar ?!!

أعترف إني محبطة لحد ما من العروض، دايم كنت أشوف عروض نيويورك هي الأكثر تفتح، ما أعرف بس أحس المصممين الإمريكان يعني متحررين من أي صورة نمطية عن لبسهم، مو مثل مثلا أرماني أو شانيل فيه شي معين تعرف أنه بيكون بالعرض. بس ضراحة ما توقعت آصل لهذي المرحلة من الإحباط.

أول ما شفت صور من عرض فيلسوفي دورت صور أكبر بس ما نزلت، و لا قدرت أصبر أكثر فقلت زي دايم الجود بالموجود.

ماراح أسب كل مجموعة فيلسوفي دي ألبرتا فيراتي، لأني صراحة أشوف أنه في منها قطع حلوه، و مع أشياء ثانية غير الي كانت بالعرض بتصير مميزة مرة.

مع إني طفشت مره من أي شي صيني، إلا إني ما عندي مشكلة مع الطبعات الصينية و حتى القبعة الصينية الي كانت موجودة بالعرض، بس الي ما أقدر أدخله مزاجي هي الياقة الصينية، يعني أحس أنها تجيب الغم، مو بس قديمة، ما عندي مشاكل مع القديم بس مستهلكة قوة، ولا فيها شي مثير أبدا، يعني باختصار أرخص شي ممكن أشوفه، و الشي الي ما أقدر أرقع له أبدا، على الأقل الحين.

هذها قدامكم، شوفوا أنتم و أحكموا، لا ألوان القماش و لا الياقة زي ما قلت لكم قبل أنه حلو، الجزم عجبتني الفستان الي على فريدا (الأول من اليمين) بيكون اللون حلو (وهو بيكون لون دارج للربيع الجاي) لولا هذي اللمعة الرخيصة، من الآخر لو أنا ودي أشتري ملابس صينية الله يخلي المعارض، ما فيه سنة ما يجون فيها الصينين و يبيعون ملابسهم و لا تزيد عن 30 ريال مو فستان راح يكون من 200 - 300 دولار.

Turban

طبعا قلت أكثر من مرة أحب العمايم، بس وش عقبه يا جيسون وو؟ عقب خلاص ما نشف ريقي و أنا أدور عليها، و عقب ما شريت وحده من بداية الصيف هذا الي بيخلص ؟!!

ما علينا نتكلم عن الأشياء الثانية بالمجموعة، واضح أنه جايسون عرف وش هو يبغى باختصار خطه هو كل شي بناتي مرة، يعني ورود و فساتين نافشة و أقمشة منقشة ... عجبتني أشياء كثير من هذي المجموعة، الجاكيت الي على اليسار جبيته مرة، يعني مو بوي فريند جاكيت، أعتقد أنه شي بيكون اسمه دريس جاكيت بس حلو خصوصا أنه لبس تحته قميص فيه شيين إلى الآن لاحظت أنهم من أهم مميزات هذا الموسم الي هو الأقمشة الشفافة، و اللون الأبيض.

الفستان الثاني أشوفه كيوت، و أظن أي أحد بيلبسه بيطلع عليه حلو، و أعتقد أنه رح ينلبس من السليبز.

الفستان الأخير شيفون زي ما قلت قبل، و ورود الي أظن أن جايسون بيخليها علامته الفارقة، ما أعرف ننتظر و نشوف، بس الفستان حلو، و خصوصا مع هذي العمامة، و حتى من دونها بيكون حلو.

بس اللوك المفضل عندي هو أكيد الأول.

What angel wears?

بس إلى أمس ما كنت مبسوطة على إسبوع الموضة بنيويورك، لما صحيت وشفت مجموعة مايكل إنجيل، نسيت كل شي ... انجنيت على كل قطعة بالمجموعة. كل شي كان حلو الأقمشة المطبع عليها، القبات (و الي بتكون منتشرة كثير بمجموعات الربيع للسنة الجاية) جاكيتات المطر الي مو شفافة مرة زي حقات مارك جايكوب بالخريف، يعني عجبني مرة إنها كذا مجمدة، الجاكيتات و القمصان القصيرة، الفتحات ... باختصار كل شي، يعني من الآخر مجموعة زي كذا ودي بجد أشتري شي منها.

هنا كمالة المجموعة الي أخترتهم اخترتهم بشكل اعتباطي شوي، لأني لو حطيت أكثر شي عجبني كان حطيت كل المجموعة.

Jason Wu: The Venetian Perfection

نرجع مرة ثانية لتشكيلات الريسورت أو المنتجعات ... طبعا التشكيلات هذي صاير المصممين يهتمون فيها، صح مو كلهم يسويها، بس يعني كل سنة أشوف عدد المصممين الي يسوونها يكثر، و السبب على قولتهم أنه هي الملابس الي تطول بالمحلات أكثر بين مجموعتين الربيع و الخريف ...

جايسون أول ما شفت مجموعته أعجبتني، ناعمة و رايقة، بجد ما فيه شي قلت واااو أبغى هذا، بس بالمجمل حبيتها.

الفستانين الي حطيتهم كلهم انلبسوا بمهرجان فانيسيا الأول من نتالي بورتمان بحفلة نقابة الصحفيين الأجانب بهوليوود زي ما قلت لكم، و لأني عجزة أحمل الصورة من جديد هنا رابط الموضوع ... :)

الثاني اليوم لبسته ميشيل وليمز لبريمير فيلمها الجديد ميكز كوت أوف ... أول ما شفته بجد ما عرفت من وين مع إني شايفة المجموعة قبل، بس على طول حسبته شي من أتزاروا شي خلاني أحس أنه يقرب لهذا الي لبسته كيري موليغان بكان، حتى أختي الصغيرة أول ما شفات الصورة قالت هذا أحسن من الأزرق :)

نرجع لمجموعة جايسون بظني أنه أختار مكان كويس أنه يروج لها، أعتقد أنه فانيسيا المكان الي بالضبط يلبق للمجموعة، أساسا لما تشوفون القبعة البوتر الي موجودة بالمجموعة هي زيها القبعة الي يلبسها الرجال الي يجدفون بالجندول :) ألوان المجموعة هادية مرة يعني ألوان صيف و إجازات ... و أهم شي تشوف فيها لمسة كلاسية تمشي مع مدينة عريقة زي فنيسيا اللمسة هذي تشوفونها بالقطع اللماعة الصغيرة، بالشيفونات ...

باختصار لو باحب هذي المجموعة باحب جايسون أنه عرف يختار مكان حلو لفساتينة من دون ما يدفع و لا دولار.

Natalie Protman & The free make up bags

تعجبني نتالي بورتمان، تمثيلها ... لبسها حق كل يوم (يعجبني إنها تلبس لبس مريح، مو شي معقد) و بعد يعجبني كثير أشياء من لبسها بالحفلات ...

نتالي زي جيسيكا ألبا جاية لمهرجان فنيسياو فيلمها الجديد The Black Swan افتتح المهرجان ... كل لبسها عاجبني وجهها جنة لأي واحد يبغى يسوي مايك آب (عظمها حلوة، و فيه مساحات حلوة بوجهها).

المهم لبسها من جت إلى حد الان حلو و حلو مرة ... من أول لبس طلعت فيه للفوتو كول بالفستان البنفسجي الميو ميو ... لحد البريمير حق الفيلم و هي لابسه الفستان الأحمر من رودارتي ...

قلت لكم أنه كل شي مضبوط ... المايك آب ... شعر (يعجبني شعرها أنه مسرح بس بشكل لطيف كأنه ما سوت فيه شي باللوكين الأول و الثاني الي لابسة فيه أزرق لحفلة كوكتيل سوتها رابطة الصحفيين الأجانب في هوليوود). الفستان الأحمر الرودارتي حكاية ثانية ... ما أعرف مين الي خلى فستان أحمر حلو كذا هم رودارتي و إلا نتالي عجبني كل تفصيل فيه، السيور و الكتوف مع بعض ... الكسرات الصغيرة الي عند الصدر، و أهم شي من تحت طبقات الشيفون. بس الشي الي محيرني وش قصة الشنطة الديور هذي الي عندها منها 3 ألوان ؟!!! و صايرة بذات مع الفستان الأحمر كأنها شنطة مكياج الي دايم لما أطلب من فافافوم هدية إذا شريت منهم شي يعطوني زي هذي الشناط المجانية :)

ما أفهم أكيد فيه سر، خصوصا لما تلبسها مع فستان سهرة حلو كذا :)

Valentino Second Chance by Jessica Alba

قلت لكم من قبل إن فالنتينو الأوت كتو للخريف المجموعة الأخيرة ما عجبتني ... و هي لسا ما عجبتني لحد الآن ... بس فالنتينو واضح أنهم جالسين يدورون على فرصة ثانية يسوقون لأنفسهم من جديد مع جيسيكا ألبا بمهرجان فينيسيا خصوصا أنه جيسيكا ما راح يلقون وحده كيوت أكثر من جيسيكا ألبا.
طبعا جيسيكا الفترة الأخيرة متغير لبسها بشكل كبير، صايره تلبس لبس حلو مرة، و تلبس لمصممين مختلفين، و بعد ملابس بتصاميم و أشكال مختلفة، و مو حده نفسها بلوك أو بمصمم واحد.

أول ما شفت صورة جيسيكا هنا، مررت بحالة ذهول :) كيف خلت الفستان هذا الي على اليسار كذا كيوت، صح ما عجبتني الشنطة بس يظل شكلها حلو و الفستان طالع عليها أنيق و أحلي بكثير من سيري الي أساسا تعجبني ...

الفستان الثاني لبسته جيسيكا لبريمير فلمها الجديد ماشيتي بفانيسيا بعد، و نفس الشي بفستان من نفس المجموعة، الفستان ما فيه أي شي زود أسود قصير من قدام، طويل من ورا و سترابليس بس جيسيكا خلته زود، و الأهم شي أنه فالنتينو ما كفاهم بس يلبسونها منم، لا و سوو لها مع الفستان الأسود نفس التسريحة الي ما حبيتها أبدا للشو و حسيتها كأنها شعر مولود (شوفوا الصورة الأولي) و مرة ثانية جيسيكا تخلي التسريحة كيوت.