Never Again

دائما أتكلم عن الأشياء اللي تعجبني، قليل أقول عن الأشياء اللي جربتها، و كانت تجربتي معاها مو جيدة، مع إني أعتقد أنه لازم الواحد يعرف عن تجارب الناس الثانين علشان ما يصيع وقته و فلوسه، هنا الأشياء اللي أعتقد إنها أكثر شيء أحبطني بالفترة اللي فاتت. 

1. سيروم الشعر بوتز

بالأساس كنت أدور على بخاخ يبخ على الشعر و يخليه ما ينفش مع الرطوبة، قالت وحده من صديقاتي إن أختها شرت شيء زي كذا من سيفورا (فرع مو بالسعودية) و رحت أدور عليه عندنا أو بأي مكان قريب (البحرين/الإمارات) لكن ما لقيته، لقيت على النت أشياء بس كل المواقع اللي أعرفها ما توصل للسعودية أي سوائل. زرت مرة بوتز البحرين و سألتها عن هذا الشيء (قصدي بخاخ الرطوبة) و أعطتني بدل عنه هذا.جربته كان جدا سيء أصلا هو يزيد نفشة الشعر. الحين و أنا أقرا علبته أعتقد إني أتحمل جزء من المسؤولية لأني ما قريت وش مكتوب عليه. مكتوب أنه يعطي كثافة للشعر.

2. أدفانسيد نايت ريبير إيستي لودير 

حق التبييض هذا المنتج أبدا مو رخيص، كان المفروض أنه يوحد لون البشرة، اللي باعه لي قالي أنه ينزل تحت البشرة و يفتت صبغة الميلانيين اللي تغمق لون البشرة بس بالأماكن اللي متجمع فيها (زي آثار الحبوب و الجروح). يمكن لي أمثر من 6 شهور أستخدمه، ما أشوف أنه سوا شيء (على الأقل لي). بالمناسبة أنا ما أقول إن باقي أشياء إيستي لاودير مو مفيدة (عندي أشياء ثانية أعجبتني مرة) لكن هذا ما راح أشتريه مرة ثانية.

3. لصق الملابس

قبل لا أشوف هذا الشيء عند أيسوس، كنت أسأل بعض اللي حوالي لو يعرفون شيء ممكن أستخدمه علشان ألصق الملابس علي علشان ما تتحرك (خصوصا بعض الفتحات لو تحركتي ممكن يطلع كل شيء). لما شفته على الموقت طلبته و جربته أبدا ما نفع، كأنه لصق عادي بوجهين، يلصق على الجسم مضبوط بس يخرب الصمغ اللي عليه من جهة الملابس و بعد فترة يطيح.

4. مرطب شفايف إتش آن إم

هذا الشيء أنا شاريته و عارفة أنه ما راح يكون مفيد لي. بس لما شفت العلبة ما قومت (قلت لكم أحب التغليف الحلو). أساسا أنا ما أستخدم مرطب شفايف، دائما أعتقد إن السعابيل موجوده للوظيفة هذي، ليه أشتري شيء و هو عندي أساسا؟!. لكن لو كنت تحبين أو تعرفين وحده تحب مرطبات الشفايف أحس أنه بيكون هدية حلوة صحيح الحرامي الشايع ما يبيعه بسعره الأصلي (كان ب9 ريال و هو يبيعه أظن ب16) لكن علبته حلوه، ريحته حلوة (ما أدري عن جودته، لأني أساسا مو مهتمة بالمرطبات). لكن بس يخلص أكيد ما راح أشتري ثاني، بس بأحتفظ بالعلبة.

5. سوب آند قلوري كلنزير

هذا الشيء المفروض أنه ينظف البشرة، صراحة أحس إني جزئيا مسؤوله عن فشله. لأني لما شفت سوب آن قلوري، ما فكرت كثير كان أهم شيء عندي إني أشتري منهم شيء، و شريت هذا. ريحته ذكرتني بكريم شعر بريطاني قديم، تجي معاه زي الشاش، المفروض إني أدلك وجهي بهذا الشيء بعدين أحط الخرقة على وجهي بعد ما تكون مبللة بموية دافية (الخرقة هي الشيء الوحيد اللي أستفدت منه).

6. فرشة ماك

بعد ما تعبت من فرشة الأساس اللي كانت عندي (ما أعرف وش ماركتها). بس لأنه فيه كثير يستخدمون فرش ماك قررت أشتري منهم، مع إني ما أعرف كثير عن الفرش. بغيت فرشة 187 بس اللي كان يبيع لي بماك أقنعني بعد محاولات إني أشتري مجموعة من الفرش (أربعة فرش وحده منهم اللي المفروض إنها 187) بسعر تقريبا أرخص من الفرشة الغالية لحالها. لما بديت أستخدم الفرشة، ما فرقت لقيت شعرات تطيح منها و تلصق بوجهي و أنا أستخدمها. بعدين أكتشفت أنه إسمها 187ES و لما بحثت زيادة عرفت أنه فرش ماك اللي نهايتها ES المفروض إنها أرخص و أقل جودة، ما أعرف من اللي أعطاهم هذي الفكرة، خصوصا إنها مو رخيصة مرة علشان أمشيها عليهم. لكن أكيد ماراح أشتريها ثانية.

لو كانت لكم تجارب مختلفة مع شيء من هذي الأشياء قولوا لي، أو أشياء ثانية أشتريتوها و تحسون إنها ضياع فلوس، بعد أكتبوا عنها، أو صوروها و خلونا نشوفها. 

VERSACE: Lack of respect for pluralism

أولا تعرفون إني مو من معجبين فيرساتشي، يعني فيه أشياء تعجبني عندهم لكن أظن إن الخط كامل مو ذوقي، ما أحب فايب "sexy" اللي بتصاميمهم. لكن هذا ما يعني أنه ما فيه أحد غيري من هنا أو من أي مكان ثاني بالعالم مو مسيحي ما تعجبة الماركة. 

الصورة هذي تجمع بعض تفاصيل العرض اللي كان أمس ... نصف المجموعة تقريبا كان صلبان. بالنسبة لي لو فيرساتشي محل ما أعرف عنه بأي مكان بالعالم باعتبر أنه هذا شيء عادي و هم أحرار، لكن لما تصمم مجموعة عليها علامة دينية واضحة و زباينك من كل الديانات، و عندك فروع بكل العالم، هذي أعتبرها قلة إحترام لثقافات الآخرين و معتقاداتهم. 

أعرف بعض الناس ما عندهم مشكلة بلبس ملابس عليها صلبان، و تبريرهم أنهم ما يعتقدون فيها، و لا يقدسونها، لكن بالنسبة لي لبس شعار ديني واضح، يمثل ديانة معينة حتى لو ما كنت أؤمن بالشعار أو بقدسيته هو موضوع فيه عدم احترام للناس و ثقافاتهم، و فيه إهانة اللي لابسنيه لو كانوا لابسينه بالغصب، أو مو بكيفهم. 

ما أعرف إذا أحد غيري عنده إعتراض على المجموعة؟ و بجد ودي أشوف إيش اللي بيآصل منها عندنا.

* رجاء لا أحد يقول قاطعوا، أنا ما قطعت و لا قلت كذا، كل فكرة الموضوع، إنك لما تكون شركة عالمية، و تستهدف مستهلكين من جميع الديانات و الثقافات أقل المطلوب إنك تحترمهم أو تحترم ثقافتهم باللبس. 

Suggestions for Pregnant Beyonce

قبل أسابيع الموضة لموسم ربيع 2012، كان فيه موضوع ببالي، وهو عن وش ممكن تلبس بيونسيه لحملها. بس قررت أأجله لبعد عروض ربيع و صيف 2012.

اليوم قررت إني أكتب عن هذا الموضوع مو لأنه طلع إشاعات أنه بيونسيه مو حامل، و حاطة شيء ببطنها علشان تسوي نفسها حامل، أصلا ما نيب مهتمة لحمل بيونسية، و لا للإشاعات، بس لما طلعت بالفستان اللي من لانفان انبسطت، و توقعت إننا بنشوف ستايل حمل حلو، لكن للأسف لا :S

قلت لكم ما يهمني إن كانت بيونسيه حامل أو طالعة بحمل كذبي، لكن كل اللي أفكر فيه، خصوصا أنه بعض الناس قالوا بعد ما طلعت حكاية حملها، أنه حملها راح يغير الموضة. 

اللي أشوفه لحد الآن، هو بيونسيه قاعدة تتهيبل بصراحة، يعني لبس ما أعرف مين قالها أنه يمكن يمشي على حامل، أعرف أنه بيونسه حلوه، و كثير يحبونها، و يحبون لبسها و جسمها، بس هذا ما يعني أنه الواحد يصدق نفسه، و يعتقد أنه ما فيه مشكلة يلبس اللي يبغى. خصوصا إذا أنت مفكر إن شكلك حلو، مو أنه مو فارقة معاك كيف يطلع شكلك. 

قلت لكم لبس بيونسيه بعد الفستان اللانفان من جرفة لدحديرة. ملابس ضيقة بشكل ما أعرف كيف. فتحات صدر مرة واسعة، فساتين نفاشة، و فساتين مفتوحة من الجوانب!! يعني من الآخر كل شيء المفروض الحامل ما تسويه، بيونسيه سوته، و كأنها تقول: أنا غير كل العالم، أنا أحلى وحدة، و أقدر أسوي كل شيء و كل شيء بيطلع حلو علي. يعني الفكرة النهائية، اللي راح آصل لها، وضع بيونسيه مو زين، لأنه يا إنها مو مستوعبة وش الحامل تسوي، أو أنها واثقة بنفسها بشكل غير صحي (و هذا لازم يتغير). و زي ما قلت لكم ما يهمني حملها صدق أو كذب، المهم إنها داخلة دور الحمل، فعلى الأقل تحاول تطلع بشكل حلو. 

مقابلات و لقاءات صحفية:

(الملابس من اليمين لليسار: روبيرتو كفالي، ماثيو ويليمسون، يونيك فور توب شوب)

شفتوا مثال من لبس "المشاوير" و اللقاءات الصباحية اللي صايره بيونسية تلبسه و هي حامل فوق بأول التدوينة. صراحة ما أعرف وش آصف لبسها فيه غير أنه مستفز، يعني تقدر تكون حلوة و أنيقة من دون ما تلبس أشياء زي كذا. حتى تقدر تلبس ألوان أحلى من الألوان اللي جالسة تلبسها.

حفلات، و حفلات توزيع جوائز:

(الفساتين من اليمين لليسار: دولتشي آن قابانا، أنتطونيو بيراردي، مايكل كورس)

زي ما قلت لكم من بعد MTV VMA ما شفت شيء يفتح النفس على بيونسيه، حتى إني شفتها بفستان من مايكل كوس كان أقل ما يقال عنه أنه كارثة. 

شرايكم ببيونسه و موضوع حملها؟ و إن كنتوا متابعين أحد معين، مين أكثر سلبرتي أعجبكم ستايل الحمل حقها؟

No don't even think to touch Versus ever again

دايم أقول للي متابعيني من زمان تعرفون أنه كنت أسب كثير، بجد أحن أسب بعض الناس، بس بيني و بين نفسي قررت أنه ما أكتب إلا عن الأشياء الي ممكن تفيد. يعني من الآخر مين راح يستفيد من السب ...

لكن للأسف إن كيم كرداشيان سوت شي ما ينسكت عنه و هو إنها لبست فستان من فيرسيز، أكره إني أكون سخيفة بس come on كيم نعرف أنه حتى لو أنت الي جايبته من وين جبيته يعني ما شاء الله ما عرفت أحد غيرك يسوي نود بعد ما عدا الثلاثين ؟!!! تسوين نود كيفك أنت حره، بس تلبسين فيرسيز لا ... هذا مو لبسك، يعني إلبسي ماركيزا ... ماكس أزريا عادي أسكت، بس فيرسيز لا ...

طبعا تبغون مبرراتي إني أقولها لا ما تلبس فيرسيز أولا جسمها، يعني أنا عمري و لا أحب أقول أنه الحل لكل شي العصاله، بس يعني الواحد يحترم نفسه من صغر جسمك يوم تلبسين فستان زي كذا يعني لا إله إلا الله من كل جهه متنفخة ... الشي الثاني لون التان حقها مقرف ... شعرها يحوم الكبد، وجهها الي متروس صبغ!!! ... و أهم شي شوفوا كيف مرخصة اللبس مع هالإكسسوار البايخ الي زي وجهها ... علشان تعرفون إني ما ظلمتها شوفوا الفستان على الموديل و أحكموا. كلمة أخيرة التايت غلط ...

It did clash with her hair

ما أعرف ليه مؤخرا أحس إني انبش تنبيش عن شي أكتبه ... :) ما علينا من كثر ما نبشت ضاقت فيني و قلت راح اتكلم عن لوك طلعت فيه كارين إيلسون للي ما يعرفونها هي عارضة بريطانية، ما أعرف و ين كانت رايحة، بس كارين زي كثير من السلبرتيز ما قدروا ينتظرون لآخر الشتاء علشان يشترون من ملابس الربيع حقت 2011، و علشان يعلموننا أنهم مو زينا P:


كارين كانت لابسه من مجموعة مارك جايكوبز الأخيرة فستان أساسا بالعرض كان لونه بنفسجي، ما أعرف وش قردها و خلاها تلبس الأحمر، بس شكلها ما تشوف 30 Rock، للي يشوفون المسلسل بالموسم الرابع جاك دونقي (أليك بولدوين) كان يتكلم عن جوليان مور و اسمها كان نانسي أنها لبست لانجري أحمر فهو جالس يقول لليز لمون: "بتفكرين أنه بيتصادم مع لون شعرها؟ ... بس لا"،

you would think it would clash with her hair ... but it didn't

أعرف بعضكم بيقول وش هالكلام، بس حسيته بالضبط يصلح لكارين بس بالعكس، يعني عليها الأحمر ما مشى مع لون شعرها الأحمر ... هو الفستان من الأساس مو أحسن شي بالمجموعة بالنسبة لي، بس فكرة أحمر على أحمر ما عجبتني أبدا، أتوقع أنها بتصير أحلى بكثير ببنفسجي، يعني يطلع فيه تباين باللوك ... أما الجزم حسيتها جايبتها من محل لانجري مع الريش الي عليها ... من بين كل الأحمر الي هي مختارته أظن الشنطة هي الشي الوحيد الي كان أختيار صحيح.


هذي هدية لكم جلست عليها من قمت الصباح أحاول أسويها، و يالله طلعت معي بالحجم الصغير هذا. جيف لجاك دوناقي (إليك بولدوين) و جوليان مور (نانسي دونفان) من الحلقة الي قلت لكم عنها قبل ... :) مناسبة الهدية أنه هذا إن شاء الله الويك إيند الأخير قبل الإجازة.

Chinese collar ?!!

أعترف إني محبطة لحد ما من العروض، دايم كنت أشوف عروض نيويورك هي الأكثر تفتح، ما أعرف بس أحس المصممين الإمريكان يعني متحررين من أي صورة نمطية عن لبسهم، مو مثل مثلا أرماني أو شانيل فيه شي معين تعرف أنه بيكون بالعرض. بس ضراحة ما توقعت آصل لهذي المرحلة من الإحباط.

أول ما شفت صور من عرض فيلسوفي دورت صور أكبر بس ما نزلت، و لا قدرت أصبر أكثر فقلت زي دايم الجود بالموجود.

ماراح أسب كل مجموعة فيلسوفي دي ألبرتا فيراتي، لأني صراحة أشوف أنه في منها قطع حلوه، و مع أشياء ثانية غير الي كانت بالعرض بتصير مميزة مرة.

مع إني طفشت مره من أي شي صيني، إلا إني ما عندي مشكلة مع الطبعات الصينية و حتى القبعة الصينية الي كانت موجودة بالعرض، بس الي ما أقدر أدخله مزاجي هي الياقة الصينية، يعني أحس أنها تجيب الغم، مو بس قديمة، ما عندي مشاكل مع القديم بس مستهلكة قوة، ولا فيها شي مثير أبدا، يعني باختصار أرخص شي ممكن أشوفه، و الشي الي ما أقدر أرقع له أبدا، على الأقل الحين.

هذها قدامكم، شوفوا أنتم و أحكموا، لا ألوان القماش و لا الياقة زي ما قلت لكم قبل أنه حلو، الجزم عجبتني الفستان الي على فريدا (الأول من اليمين) بيكون اللون حلو (وهو بيكون لون دارج للربيع الجاي) لولا هذي اللمعة الرخيصة، من الآخر لو أنا ودي أشتري ملابس صينية الله يخلي المعارض، ما فيه سنة ما يجون فيها الصينين و يبيعون ملابسهم و لا تزيد عن 30 ريال مو فستان راح يكون من 200 - 300 دولار.

The other options

أعرف إني قديمة بالنسبة لبعض الناس بس توي أشوف Glee لأسباب كثيرة، أهمها إني أحب أشوف المسلسلات السيزين كامل مرة وحدة ... و للحق ما كنت أعرف من حقين المسلسل إلا ليا المهم لما شفته عرفت ديانا أقرون و صرت انتبه للبسها بالبريمرات ...

هذي صور لها بأكثر من مناسبة، أنا ما عرفتها إلا بالمناسبتين الآخيرتين ... تشوفون لبسها كثير أصفر، و فساتين بعد. بالنسبة لي ذوقها ممل، و لولا إنها حلوة كان صار اللبس بايخ مرة، يمكن أحلى الثلاثة فساتين هو الأخير (الي على اليمين) من كارلولينا إيريرا ...

و لأن البنت عجبتني مرة قلت و قبل ما تبدأ أسابيع الموضة من نييورك لباريس أعرض آخر شي عن كوليكشينات الريسورت، و الي ودي لو أشوف ديانا لابسه شي منها ...

قلت لأختي صح إنها كيوت بس أنا ما أحب أبدا لوك البنت الدلوعة، يعني هي يكفي شكلها و حركاتها، بالمقابل ما راح أختار لها شي هبال يعني روك ستايل أو متروسايكل ستايل أو حتى اللوك الي مخترعته تايلور مومسين (هاي كلاس هور) S: !!!!

كل الي فكرته لها لبس بخطوط جديدة، مو ملابس كأنها ملابس باربي بس كبيرة :)

من اليسار لبس من إيرديم (أنا أحب إيرديم) أحب خطوطه النظيفة، و أحب أقمشته المطبعة ... ودي أشوف على ديانا شورت، مو بس هذي الفساتين النافشة، شي من دون أي حركات دلع (أنا حتى ما أعرف وش هذا الشي، بس بتفهمون إني اللوك الي تراني كيوت، و هي كيوت جد، بس يعني ما أحبه) فهذا اللبس من إيرديم بنقشاته بيطلع مع وجهها و شعرها مرة حلو، من دون أي شي من هذي الملابس الي زي ما قلت ملابس (أنا دلوعة).

الي بالوسط من بروينزا سكولير يمكن الفستان مو أحسن خيار لها، يعني لو أشوفه على كيرا نايتلي أظن بيكون أحسن، بس الفستان حلو، و دي أشوفها بشي وسيع مو مخصر، يعني لو أعجنها مع أختي ممكن يتعدلون (أختي تكره أي شي له خصر، و أكثر خياراتها ملابس مستقيمة).

الفستان الأخير من بيرن، دايانا مو قصيرة، و نحيفة، يعني هذا اللبس بيمشي مرة عليها، أولا فستان، ثانيا فيه أصفر :) و له خصر بعد، بجد الفستان الأخير ودي أشوفها لابسته لحفلة أو شي، ممكن صعب تلبسه للقولدين قلوب، بس أعتقد بيكون مناسب لساق.

Natalie Protman & The free make up bags

تعجبني نتالي بورتمان، تمثيلها ... لبسها حق كل يوم (يعجبني إنها تلبس لبس مريح، مو شي معقد) و بعد يعجبني كثير أشياء من لبسها بالحفلات ...

نتالي زي جيسيكا ألبا جاية لمهرجان فنيسياو فيلمها الجديد The Black Swan افتتح المهرجان ... كل لبسها عاجبني وجهها جنة لأي واحد يبغى يسوي مايك آب (عظمها حلوة، و فيه مساحات حلوة بوجهها).

المهم لبسها من جت إلى حد الان حلو و حلو مرة ... من أول لبس طلعت فيه للفوتو كول بالفستان البنفسجي الميو ميو ... لحد البريمير حق الفيلم و هي لابسه الفستان الأحمر من رودارتي ...

قلت لكم أنه كل شي مضبوط ... المايك آب ... شعر (يعجبني شعرها أنه مسرح بس بشكل لطيف كأنه ما سوت فيه شي باللوكين الأول و الثاني الي لابسة فيه أزرق لحفلة كوكتيل سوتها رابطة الصحفيين الأجانب في هوليوود). الفستان الأحمر الرودارتي حكاية ثانية ... ما أعرف مين الي خلى فستان أحمر حلو كذا هم رودارتي و إلا نتالي عجبني كل تفصيل فيه، السيور و الكتوف مع بعض ... الكسرات الصغيرة الي عند الصدر، و أهم شي من تحت طبقات الشيفون. بس الشي الي محيرني وش قصة الشنطة الديور هذي الي عندها منها 3 ألوان ؟!!! و صايرة بذات مع الفستان الأحمر كأنها شنطة مكياج الي دايم لما أطلب من فافافوم هدية إذا شريت منهم شي يعطوني زي هذي الشناط المجانية :)

ما أفهم أكيد فيه سر، خصوصا لما تلبسها مع فستان سهرة حلو كذا :)

Bad Hairstylist

كايتي هولمز كيوت إيه، و فتره كنت أحبها مره إيه، بس انحدر ذوقها و بطلت أحبها ... الفترة الأخيرة كأنها تحاول ترجع بس شعرها مو عاجبني أبدا أحس إنها مسويته عند وحده من الكوفيرات الي عندنا الي على قولة أمي (يتلعمون على رووس اليتامى) المهم ... إنه الشعر مو حلو فيره رخيص مره، ما أعرف ليه بس يعني بالصورة الي على اليسار أحس لو هي فككت البيرمز كان صارت أحلى ... طالعه مره حوسه خصوصا من فوق (مو قلت لكم كأنه شغل حقينا) :) بالصورة الثانيه (ما لقيت وحده أقرب، بس أضغطوا عليها تكبر) أحسها بغت beachy waves و ما ضبط قالت يالله مش حالك زي لما نجي بصوره لتسريحة لحدا المشاغل و يطلع لنا شغل يجيب الهم و لا يقرب للأصل، بس وش نسوي خلاص ما بقى وقت :)

لمسة شرقية

أعرف إني متسلطة شوي على اللبنانيين بس وش أسوي هم يجبروني ... كل مره يوضحون لي إنهم مو وجه عالمية يعني الواحد لم يلبس له مشاهير عيب أنه ينسخ من مصمم ثاني ... يعني لما تصل هذي المرحلة لازم تفرق بين النسخ و الإلهام ... مثلا ممكن يكون فيه إلهام من مصمم ثاني كتوف كبيره كلها كريستال ... ممكن يكون فستان نص شيفون ... ممكن لون أو نوعية معينة من الأقمشة بس تقريبا تنسخ الفستان بلمسه شرقية و بالضبط بعد مجموعه مو حلوه أبدا ... طبعا هذي مو أول مره لبناني ينسخ من مصمم ثاني تتذكرون زهير مراد بأوسكار 2009، بس هذي المره باسيل صودا قلد فستان حبيته كثير و تكلمت عنه كثير الي هو فستان كيرستين من شانيل.

Why does GG ruin everything I love?

كالعادة متأخرة، ما أعرف ليه صاير عندي بطأ استيعاب بعد ما يخلص الشي يجي ببالي إني أكتب عنه، بس زين على الأقل أظن الحين ما فيه أحد ما شاف هذي الصورة، طبعا للي ما يعرف هذي صوره من تصوير Gossip Girl للموسم الجديد الي بيصورون حلقتين منه بباريس ... (أدري الله يعين) ... ما أكذب عليكم أول ما شفت الصوره جتني غمته زيادة على الي تجيني بالعادة لما أشوف صور لهم، لسببين الأول أنه الصور هذي جت بعد ما شفت المسلسل أخيرا (يعني شفت حلقات) و غير أنه بايخ الملابس عليهم طالعه عفوا بس زباله ... الشي الثاني مو لأنهم بباريس ما يهمني الي مقطع قلبي الفستان الي على بلير (لايتن) آه منها بس هذا الفستان من أحسن فساتين السنة الي فاتت بالنسبة لي، لما شفته بعرض موسكينو قتلني ما أعرف ليه بس أحس شوي لآكله من حلاوته بس كالعادة هذا المسلسل و بقدرة قادر يخرب الأشياء، أولا مين يلبس هذا الفستان لتمشي؟!!! أكيد لايتن و واحد قروي توه عارف النعمة ... الشي الثاني وشي هذي البيني الي لابستها يا شيخه و الله الفستان ما يتحمل أساسا لو راح ألبسه (ياليت) أولا لحفلة ثانيا بس راح أحط ذيل مستشور و بس هذا كل شي ... أما إذا كنت مصره على القبعة القبعة الوحيدة الي ممكن ألبسها معاه قبعة بوتير زي هذي ... المشكله مو بس هنا الشنطة حكاية ثانية، الحين شايفة هي كيف الفستان ألوانه و أقمشته كثيرة؟!!! كيف تزيد عليه كذا و تخربه ؟!!! المفروض ما تآخذين شي و إذا لازم لازم (زي القبعة) على الأقل خليها كلتش مو شي يعلق

ما راح أتكلم عن سيرينا و فستان جورج شقرا الي يبلص و هي تتمشى فيه بالصباح لأنه للحق أهون من بلير و من بعيد ما يبين أنه ما يصلح أبد خصوصا مع البوي فريند جاكيت

آخر شي عشان أوريكم قد إيش أنا تعذبت هذي صورة الفستان من مجموعة ربيع 2010 لموسكينو زي ما قلت لكم على فريدا قوستافنسون (سبحان من خلق و فرق).

What not to wear

أنا مو مره مع الأبوات ... أحسها قطع حساسه، يعني مو بسهولة تطلع حلوة ... بس بريتني سةت كارثة مو بس ما خلتها مو حلوة ... يعني فيه أحد يلبس أبوات sheepskin مع فستان أبيض صيفي؟!!!

يعني هذا إيش يسمى تطبيع بين الصيف و الشتاء؟!! أو إنها تتعامل مع نفسها كأنها الأرض شمال صيف و جنوب شتاء؟!! من الأساس ما احب هذي الأبوات ... بس تلبسها مع فستان صاير كأنه شلحة مصيبة (ترا أنا أحب الفساتين البيضاء للصيف) بس لما تكون خفيفة لدرجة نشوف الأندير وير من تحتها يعني شوي هذي إسمها قل دبره خصوصا لما يكون حجم الأنديروير مو مضبوط زي حجم الفستان ...

الفستان طايحة سيوره من البهذلة و الكلوت (اسفة نزلنا لهذا المستوى بس هي الي نزلتني) واضح أنه طايح ... ؟!!!!

Hatoyama's Shirt

من أول ما بديت الكتابة هنا، و أنا قايلة إني راح اتكلم بكلن، المهم تقريبا الله لا يضرني بكل مجال بالحياة اتلقف فيه، سياسة، رياضة، فن ... كل شي ...

كتبت أكثر من مرة عن لوك سبورت و أخرها الي قبل هذا البوست، و قد كتبت عن لبس The Obamas أول ما فاز أوباما بالإنتخابات ... المره هذي اعترف إني ما كنت أعرف من هو رئيس وزراء اليابان الجديد بعد كيوزومي و أبي، المهم لما نزل مستوى وسامة رؤوساء الوزراء اليابانيين بطلت أعرفهم ... بس من إسبوع كل العالم تتكلم عن كارثة رئيس الوزراء بالشيرت الي لبسه لحفلة باربكيو ... و الي طالع فوق، لما شفت كل العالم قايمة عليه، كسر خاطري و قلت أنه العالم مالهم شغل فيه، حتى لو كان الشيرت ب 500 دولار ... دخلت الموقع الي يبيعه Shirts My Way المصيبة طلع أنه الشيرت كستم ميد، يعني رئيس الوزراء لقى وقت يصمم شيرت له .... و مخيلته كانت خصبه لدرجة ما فيه لون ما حطه ...

لما سويت بحث أكثر اكتشفت أنه الرجل موهوب و مو هذي أول خبطه له بالفاشن، اقترح عليه بعد ما يترك المنصب و يتلحوس و يصير داعية سلام زي كل الرؤوساء يصير رئيس تحرير vogue nippon .

هنا موقع للتصويت على أحسن لبس ليوكيو هوتوياما

أختي حبت القلوب، أنا حبيت الغابة ... أنتم وش تحبون؟؟؟

What is boho and what is fake boho

أحب اللوك البوهو مره، و معنى إني أحبه خصوصا كاجوال إني أقدر الي يلبسه صح و ينرفزني الي يحاول زي تايلور سويفت ... لما شفت الصوره هذي استفزتني بجد ... يعني الهيبي هيدباند الي فيها كرستالات من كبرها كأنها صخر، و الي ما أفهم إيش معناه لما تكون سويت بيرم لشعرك يقاللك هيبي ؟!!! البوهو مو شغل تقعد عليه ساعات البوهو عفوي ... ما أعرف وش أقول الحزام بايخ التنوره سقيمة ... ما عجبتني أبدا ...

بالمقابل عندك كايت هادسون، كايت تعلمك كيف تسوي لوك بوهو من لافستان الماكسي المشجر للشنطة، عجبني إنها مدخله شي جديد على لوك الستينات وهو الجاكيت وتحته البلوفر البوت حكايه ثانيه ...

الي يبغى يصير بوهو يكون عفوي بس

Be Proud, But Also Clever

ما أحب اتكلم بالأجسام، لأني دايم زقول وش ما كان جسمك، بتلقين حل لأكثر الأشياء ... خصوصا إن كثير من مشاكل الشكل الخارجي ما للواحد دخل فيها ... بس لما يكون عندك مشاكل بتناسق الجسم، على الأقل كن ذكي و ألبس زين ... يعني مو تلبس لبس عشان الناس تضحك عليك، بعدين تدخل ريهاب ... يعني آسفة يا ميشا، فترة كنت تجنين، لكن هذا الشكل ما أعرف وش أفسره ... يعني لا ربط القميص .. و لا لون الكعب الأحمر غير شكله مه كل اللوك ... أما البنطلون حكاية ثانية ... عاجبك ما عندي مشكلة بس كان ما عقدتي القميص هذي المشكلة رقم واحد ... الشي الثاني مادام عندك حوض عريض ليه ما لبستي مثلا كارديقان طويل مثلا ... يعني يا شيخه فيه ألف حل و حل شغلي عقلك بس.

Hermès: I can't do it all by myself

صدق هذا الي أحس أن شنطة إيرميس تقوله، فيه ناس تظن إنها لما تمسك هذي الشنطة أو أي شنطة (عندنا مثلا لوي أو بعض الناس قوتشي) أنه الشنطة ممكن تعدل الحال ... لا الشنطة ما تعدل الحال، أنت الي تقرر إن كانت الشنطة بتطلع حلوه أو بتطلع و لا تسوى أتقه تقليد صيني منها ... يعني بذمتكم لما تطلع بشورت شورت و كعبات فوشيا و تي أبيض و معاك شنطة إيرميس أنه حالك بيتصلح آسفة ...

و إلا لما تلبس هاي هاي بوت شامواه مع بلايزر بس و تي شيرت دريس و إيريمس بتكون حلو، بعد آسفة و خصوصا لإيفا لآني استظرفها، بس ما يعجبني ذوقها مره ...

الحقيقة إن الشنطة شفتوا لما يقولون سلاح ذو حدين ... بالضبط هذي حتي لو كانت حلوه (و غالية) مع لبس كله سخيف بتشين اللبس زيادة، و جتى لو كانت رخيصة و حليوه مع لبس حلو بتحلي اللبس ... تكفون لا تغلطون كثير على الشناط خصوصا لما تكون زي إيرميس مو كل الناس يقدرون يجيبون شنطة ب20 ألف دولار.

Tacky

أكثر شي أكرره لما الواحد يسوي نفسه فنان ويقعد يخبص ... إمي روسيم أخيرا تخلصت من الكيرلز ... لأنه الشي لا زاد عن حده، المهم كلها كيوت، فستانها عادي بس مقبول، المايك آب مرتب و هي حليانه، بس القروي قروي ... لما شفت الجزمه الي مختارتها مع الملابس ذكرتني ببعض الناس الي يطابقون الجزمة على نفس درجة الملابس ... بس إيمي عند نفسها إنها مسويه شي أحلى اللونين كلهم موجودين بالفستان ... صراحة مسخت جزم لوبتين الي العام كانت جزم الأحلام بالنسبة لي.

Watch&Learn

هذولي ثنتين بنفس المدينة طلعوا أمس ... كلهم عندهم فلوس، بس المشكلة مو كلهم عندهم ذوق، أول ما شفت شفت برتني ... أولا عندي أنا سؤال لم يطحوون الناس بشي، قصدي موضه، ما أعرف مين قال لبعض الناس، ترا أي شي الناس يطفون فيه لازم أنت تسويه، حتى لو شكل بايخ فيه ... النظارة الطبية صايره موضة، و بالأخص النظارات بإطارات سودا كبيره ... كل من هب و دب لبسها، حلوه عليه و لا مو حلوه ... لابقه على اللوك و لا مو لابقه، كأنهم يقولون لابسينها لا بسينها ....

برتني سبيرز كارثه من الأول للآخر ... شعرها مو حلو فستانها ما أعرف إيش معناه (يعين طالعه تتمشيين بفستان سترابليس؟) .. الشنطة سخيفه مررررره و لا لابقة على الملابس ... الجزم كأنها طقم مع الفستان ... أما النظارات عذي الي مالها محل باللوك أبدا ... يعني فستان لابسه معاه نظارات؟!!! ولا مو أي فستان ... فستان حق حفلات نهار، و نظارات سودا كبيرة ؟!!!!

على الجهة الثانية نيكول ريتشي ..، نيكول من بعد ما صبغت شعرها أسود و أنا حابتها، اللون طالع عليها ذووووووق ..... القصه حلوه، النظارات الشانيل تجنن ... تنورتها حلوه، حلو لما تلبس هذا التايت الغامق، و ماشيه مره مع الشنطة البلانسياقا مع إني مو مره مع هذي الشنطة، بس طالعه حلوه ... حلو التوب الرمادي مع كل هذا اللوك و خصوصا و هي حاطه هذا لاشي الأحمر، ما أعرف شال أو كنزه، جزمها عاطيه اللوك ختمه حلوه ما أعرف إيش بس عجبني إنها لابسة فلات سودا (اللوك يصلح نيويورك).

The Grandma

أحب كيري موليقان ... كيوت و أنيقة، بس آسفة ببريمير فيلمها الجديد The Greatest لابسه فستان (أعتقد من شانيل أو برادا) صراحه اللوك يصلح للملكة اليزبيث ... :) يعني لا اللون و لا التصميم ... و لا طول القستان ، حتى الكعب قله يقول أنا جده ... ؟!!!!
من جد قهرتني بهذا اللوك ... بس قبل يومين انبسطت من إيما على لبسها، لأني زي ما قلت حبيت أنه مو الستايل تبعها ... كيري شكلها كانت تبغى تسوي شي زي إيما فطلعت بلوك ما توقعنها لوك الجده

You Hurt Me

أدري أن الموضوع تقريبا صار فديم، بس ما حصل لي أكتب عنه طول أمس ... شفت كريستن بيل بهذا لافستان الفلابير من منويك لوهلير ... وش بس أقول، من جد أحس إنها طعنتني :) لأني أحب فساتين الفلابير و هذا الفستان عفوا فاشل ؟!!!

أنه نص كم مو حلو أبدا، يعني لو كان من دون أكمام مع الخرابيط الي فوق يمكن الشي لاثاني التسريحة غلط ... يعني ليه شايله شعرك لا وبعد ناعم كأنه تسريجة مضيفة طيران ؟!!!

المايك آب غلط ... باهت، سخيف كل شي كان متعمدينه عشان يخربون علي حبي لفساتيين الفلابير