Denim Skirt, Once Again

أعرف إني قلت لكم راح أكتب عن أحسن ملابس يونيو، لكن المشكلة إني ما لقيت شيء يفتح النفس، كل الملابس الزينة كانت لابستها إيما ستون، صح حطيت ببالي إني أكتب عن جولة الترويج حقتها لفيلمها الجديد The Amazing Spider-Man بس أصبروا شوي علي :) المهم إنه صار عندي جهاز جديد، و إن شاء الله كل الأمور بتمشي تمام.

جاني اليوم إيميل من Net- A- Porter عن أنه الأحد الجاي آخر أيام التخفيضات الموسمية حقتهم، و قررت أفتش للمرة الأخيرة بالموقع، و أنا أفتش تذكرت أنه بعرض شانيل أوت كتو اللي كانت جايه له بوبي ديلفين، كان شكلها عاجبني مرة.

ما أعرف وش ما أحب بهذا اللوك، حبيت فيه بساطتة، لكنه بنفس الوقت فخم، أعجبني كيف دخلت النظارات عليه أعطته جو سبعينات شوي، بعد حبيت أنه الأشياء مايلة للدفا شوي، يعني بس جاكيت حلو معاه، و يتحول لبس شتوي بالكامل (طبعا مع جزمة مختلفة). و لأنه أعجبني مرة، رحت أدور على تنانير جينز عند نيت آي بورتيه، لو عجبكم اللوك حقها زيي، وودكم تلبسون زيها.

التنورة الأولى من اليسار مارقريت هويل هي التنورة الأرخص، صحيح لونها مو نفس اللون اللي لابسته بوبي، لكن شكلها (بينسل)، أقرب للشكل اللي لابسته بوبي بالصورة. على اليمين هذي التنورة من مولبري صحيح أغلى، لكن غير إن شكلها حلو، لونها يمكنه أقرب للون اللي لبسته بوبي (التنورتين كلهم عليهم %50). 

شرايكم بلبس بوبي؟ و بالتنورة الجينز؟

The New Star in NYFW

أمس كان فيه تخمة عروض، إلى الآن ما شيكت إلا على برابل قرونق. من موسمين (الخريف 2011 و ريزورت 2012) و أنا صايرة أحب كثير من ملابسة، علشان كذا كنت حاطه ببالي أن عرضه الموسم هذا بيكون من العروض اللي أهتم أشوفها بنيويورك (مو يعني أروح له صدق)، بس أنتظره، و لا أمر على صور العرض مرور الكرام. 

العرض ما خيب ظني كان حلو مرة، كله طبعات، حسيت فيه خيال علمي، ألوانه تتدرج من البنفسجي للأزرق المخضر (تيفاني) (الأزرق بكل درجاته، بيكون لون مهم بملابس الصيف). كثير فساتين و قطع أعجبتني، أخترت منها كثير و دخلته قائمتي للملابس اللي أتوقع إنها تلبس (أدري للمرة المليون أقول لكم لو بغيتوا تشوفونها تلقونها على القائمة اللي على جنب) (هنا تلقون العرض كامل). 

المفاجأة بالنسبة لي كانت لما شيكت على إيميلي و لقيت هذا الإيميل من موقع مودا أوبراندي، اللي قلت لكم عنه قبل، يبيع الملابس قبل لا تعرض بالسوق، يعني بأقل من 24 ساعة كان فيه بعض القطع معروضة للبيع، بأسعار أصلا ما اجرأ أنطقها P: يعني واحد من الفساتين اللي دخلته القائمة، لقيتهم يبيعونه بـ 6600 دولار، تقريبا بـ 24,000 ريال ؟!!.

You Can't Fake Fashion

قبل أسبوع تقريبا عرفت أنه فيه تعاون بين eBay و CFDA اللي هي جمعية المصممين الإمريكان، على أنهم بيطلعون شنطة مكتوب عليها: "you can't fake fashion" "لا يمكنك تزييف الموضة". الهدف منه أنهم يوعون الناس من الأشياء المقلدة. 

صراحة أنا ما أحب بذات الشنط المقلدة و خصوصا تقليد الماركات المعروفة مثل قوتشي و لوي فيتون و ووو المهم، سببي مو أخلاقي، بس إن شكلها رخيص، أفضل شنطة من محل عادي على شيء مقلد بشكل سخيف، و أظن أنه مع هذي الموجة، موجة "نسخ" الموضة من الهاي فاشن للستريت فاشن صار فيه كثير شناط حلوة، و على الموضة، بسعر مقبول. 

اليوم قريت إيميل من eBay أنه تم عرض الشنط للبيع، فتحت على الصفحة و لقيت شنط مرة حلوة (طبعا كلها خلصت، ما أعرف كم نسخة مسوين)، أكثر وحدة أعجبتني فيهم، هذي اللي فوق من تصميم آدم. سعر كل الشناط كان 150 دولار، طبعا ليه أكتب لكم عنها و هي مخلصة، لأنه لو أعجبكم شيء منها أعتقد بعد فترة راح نلقى ناس عارضينها للبيع من جديد على eBay و طبعا بتكون أغلى من السعر الأصلي، بس لو كانت عاجبتكم مرة، دوروا عليها من جديد بالموقع. 

و لو ما كنتوا متحمسن للشراء، و بس تفرجتوا على الصفحة لقافة زيي، قولوا لي وش أكثر شيء أعجبكم.

Things to Invest in

كل يوم تقريبا من أسبوع يجيني إيميل من net-a-porter.com يذكروني بتخفيضات نهاية الموسم. بالسنوات اللي فاتت لاحظت أنه بالإنترنت تخفيضات نيت أي بورتيه زي العيد عند الناس الي يحبون الفاشن و الماركات الغالية. 

الصيف اللي فات خربت سيرفرات الموقع تقريبا و أنا أدور على فستان أقدر ألبسه لزواج ولد خالتي، و لا حصلت شيء يناسبني. السنه هذي للحق ما دورت على شيء و لا فكرت، لأني ما أحس أني أبغى أشتري أي شيء منهم. بس فيه أشياء عاجبتني لو قالوا لي خوذي أربع قطع من دون ما تدفعين و لا ريال، باختار هذولي. 

هو صراحة مو هذي الأشياء اللي أختارها، لأن عنوان التدوينة للأشياء اللي ممكن تشترينها بسعر غالي، و لا تطيح موضتها بكرا، و تقريبا تصير "قديمة" و لا تستاهل إنها تنلبس. فيعني من الآخر شيء تقريبا نقدر نقول أنك تستثمرين سعرها. (الأسعار اللي خاطتها فوق كلها بعد التخفيض).

البالطو، ما أعرف الكارديقان الملون هذا من ميسوني عاجبني مرة من العرض، ألوانه مرة حلوة، و أكثر شيء يعجبني بميسوني أن كثير من القطع، مو سهل تعرفين من أي موسم، فهي تقريبا أكثر قطعهم ما تصير "قديمة" أبدا. بصراحة النسخة اللي عاجبتني هي النسخة القصيرة (شوفوها هنا) بس هذي بعد حلوة.

الشيء الثاني اللي أكيد بانصح أي وحدة لو بغت تشتري شيء غالي تشتريه، هو كعب أسود، الكعب الأسود أظن أنه أقدم شيء بالتاريخ، و لا يطلع أبدا من الموضة، و يصلح من ملابس كثيرة (سهرة، و صباح)، الكعب هذا اللي من فونيه، عجبني مرة، خصوصا على عارضة الموقع (شيكوا عليه من الرابط). شكل الجزمة حلو، خصوصا أنه تقليدي تقريبا من قدام، بعدين من ورا جاي بكعب أبيض. 

يقولون الجزم هي الشنط الجديدة، مو يعني أنه يحط فيها شيء، بس تتذكرون قبل 3 سنوات و أكثر كل العالم كانت هابة بالشنط، الوقت هذا جا دور الجزم، علشان كذا أقترحت عليكم أكثر من جزمة. الشبشب هذا من ميو ميو عاجبني مرة، أحسه يجيب الانتعاش، الأهم و اللي أنا أحسه، أنه يتحمل كثير (خصوصا قاعدته خشب)، و يصلح ينلبس مع أشياء كثيرة، من طلعة عادية، لحفلة نهارية بسيطة، و بجو زي جونا تقريبا كل السنة صيف، ما راح أتحسف أجيبه.

آخر شيء الشنطة هذي من مارك جايكوبز، أعتقد أنه هذا الشكل من الشناط (سلسلة، و جلد أسود، و صغيرة) ماراح ينقرض أبدا، و الدليل شنطة شانيل مودموزيل، فإذا كانت شانيل بخاطرك، بس ما تقدرين على سعرها، بالنسبة لي هذي خيار مرة حلو، و عن ذوقي، أشوف إنها أحلى.

آخر شيء، على أنه نيت آي بورتيه ما يبيع أشياء رخيصة، بس الموقع هذا من أسهل المواقع الي تعاملت معها، يغلفون لك الشيء اللي شريتيه مجانا، يوصلون بسرعة، و أهم شيء أنه جدا متعاونين، مرة وصلني منهم عقد مكسور، بدلوه لي بسهولة، و من دون ازعاج. 

Missoni for Target

اليوم قريت هذا الخبر عن أنه تارقيت بتسوي تعاون مع ميسوني، يطلعون مجموعة بأسعار مقبولة ... الخبر فرحني مو لأنه ميسوني بس، لأنه تارقيت بالنسبة لي من أحسن الناس اللي يسوون تعاون مع ماركات كبيرة، و الأهم أنه أسعارهم صدق مقبولة، مو تجي بـ 200 دولار أو شيء زي كذا.

المهم هذا التعاون خلاني أتكلم عن شيئين ... الأول الصورة اللي فوق و هي من الحملة الدعائية لميسوني، و اللي اختاروا وجه لها ليتين ميستر. عجبني الكمباين مرة، النوعية هذي من التصوير تعجبني، علشان كذا أخذت الصورة و لصقت عليها شعار تارقيت.
متحمسة أشوف وش راح تارقيت يسوون، أو وش ميسوني راح يسوون لتارقيت، لأنه قلت لكم زيليون مرة إنه من أكثر الأشياء اللي شريتها و أحبها هي تنورة من رودارتي فور تارقيت، و الشيء الثاني، يمكن أي أحد مهتم بالفاشن، يفكر لو مرة يقتني شيء من ميسوني مو بس لأنه عندهم ملابس منسوجة كل العالم يعرفونها بشكل الزقزاق، بس لأنه قطعهم بالنسبة لي timeless يعني ما تحس إن موضتها راحت.

المهم هذي فرصة إني اتكلم عن مجموعة خريف 2011 لميسوني. المجموعة أعجبتني مرة، خصوصا ألوانها و نقشاتها ... صحيح أنه نقشاتها و ألوانها ما كأنها خريف و شتاء، بس أنا ما تشكل عندي هذي الأشياء، بس يمكنها فكرة من ميسوني أنهم يطلعون الشخص اللي يلبسها من جو كآبة الشتاء :) و اللي يخليني ما أهتم، أحس أنه أحسن الملابس اللي تقدر تلبسها أي وقت، يعني ألبس فوقها كم قطعة تصير للشتاء، ألبسها لحالها تصير للصيف.

Meadham Kirchhoff x Topshop

تعرفون إني أحب توب شوب، بس من رداة الحظ لا محلاتهم هنا حلوة، و لا موقعهم يوصل للسعودية. لكن نشر العلم واجب على كل مسلم و مسلمة P:.
مو كثير توب شوب يسوون تعاون مع مصممين كبار، أتذكر آخر مرة (و يمكني غلطانة) توب شوب مع كريستوفير كين، لما طلعوا بالتيشيرت اللي عليها فم دايناصور، و أعتقد كل بنات و عيال العالم شروه، إلا الموجودين هنا.

اليوم وصلني إيميل من توب شوب، (اللي مصرين يرسلون لي إيميلات، و هو الإيميل الوحيد اللي أنتظره منهم، هو أنهم صاروا يوصلون للسعودية).

المهم بالإيميل وصلني من توب شوب أنه ميديم كيرشوف مسوين كم قطعة لتوب شوب.
الماركة هذي من أكث الماركات البريطانية اللي أحب أشوفها، عروضهم كأنها مهرجان، أو حفلة، ألوان كثيرة، ملابس غريبة، و لا يخافون من موضوع أنه ملابسهم شكلها "كوستم" أكثر من إنها ملابس ممكن تنلبس لأي مناسبة.

قلت لكم أحب عروضهم، فيها حياة كثير، الصورة اللي على اليمين من عرض ربيع 2011، اللي كان فيه ألوان و طبعات كثيرة. المجوعة حلوة مرة تستاهل أنكم، ترجوعون و تلقون عليها نظرة.

المهم نرجع لتعاونهم مع توب شوب، لما شيكت على الموقع، القطع مو كثيرة أظن إنها ما تزيد على ثمانية، بس حلوة، و فيها روح ميديم كيرشوف، يعني من أول نظرة بتخمن أنه هذا  اللبس يشبه لهم كثير.

بشكل عام الأسعار متفاوته مرة من قطعة لقطعة، يعني زي ما تشوفون الشراب سعره فوق 100 ريال، التنورة فوق 200 ريال و التوب أو الفستان هذا طاير فوووق و سعره واصل لـ 1000 ريال.
ما أظن أنه راح ياصل السعودية شيء من هذي المجموعة، و زي ما قلت لكم موقعهم ما يوصل للسعودية، بس إذا كنتوا برا السعودية، و ممكن تاصلكم الأغراض من توب شوب، و عاجبتكم القطع اللي من هذي المجموعة حقت توب شوب ميديم كيرشوف، تلقون القطع اللي حطيتها و باقي القطع كلها هنا.

It's a Jungle

انتصف التيريم و من الحين جالسة أشم ريحة سفرة محترمة مع إنه عندي أحساس كبير إني باجلس بحر الرياض :) ما يهم كالعادة ألف يمين و يسار أدور لي عن شيء أكتبه أو أتكلم فيه، و جاني اليوم إميل من أسوس أنه عندهم تخفيضات، و جلست أفتش بالتيشيرتات لأنه عندي نقص حاد فيها.

بمجموعة برادا للربيع 2011 كان فيه قطع كثيرة جوها جو غابات موز و قرود :) و سبحان الله يعز من يشاء و يذل من القرود اللي ما كان أحد يحترمها، صارت على ملابس برادا و الحين مطلوبة :) الموز من الأساس ما عندي مشكلة معاه،و يمكنه الفاكهة الوحيدة اللي علاقتي فيه ثابته من يوم كنت صغيرة إلى الآن، لأنه سهل ينوكل و سهل يقشر و ما يبقى للواحد إلا يشيل هم الموز ناضج أو لا.
عجبتني كثير من القطع بالمجموعة، و طبعا ما أفكر فيها أبدا مو علشان القرود أو الموز، طبعا كالعادة السعر هو الرادع الأساسي لأي نية شراء.

أحسن شيء بالهاي ستريت أنهم يعطونك إحساس أنه فيه أحد يحس بالفقراء و المساكين، و أنا جالسة أقلب بـ asos شفت التانكين يعني المثني من (Tank) و على طول جا ببالي مجموعة برادا حقت صيف 2011 القرد و الموز ... كل القطعتين عليهم خصم، و الحين تقريبا سعرهم بـ 85 ريال سعودي. 

بالنسبة لي هالقطعتين بتكون شيء حلو لملابس الصيف، و بالنسبة لي بيطلعون حلوات مرة مع هذي التنورة المقلمة أو هذي الجينز، خصوصا أنه التقليم و الجينز كلها من موضات الصيف، و بتلقونها تقريبا بكل محل. 

Fringed Earrings

قلت لكم راح أتكلم عن الأوت كتو كل ما جت فرصة. إن كنتوا تتذكرون أسبوع الأوت كتو بباريس كان تقريبا قبل أسابيع الموضة لخريف 2011 بإسبوعين، أو شيء زي كذا.

من فترة لاحظت حركة الحلقات الطويلة اللي متفرقة كذا، ما أعرف وش أسميها بالعربي، بس إذا مهتمين بها، تلقون إسمها بالإنجليزي موجود بالعنوان.

أول ما شفتها، شفتها عند أوسكار دي لا رينتا بمجوعة ريزورت (المنتجعات) 2011، ثم بعرض شانيل لربيع 2011، و بعدين آخر مرة شفتها بعرض أليكسي مايبيل بعروض ربيع2011 الأوت كتو ... بعرض مايبيل يمكنها أكثر شيء عجبني، حبيتها و حسيت إنها من الأشياء اللي تستاهل إنك تشتريها... اللي عجبني فيها أنه ممكن تلبسها و شعرك مشدود أو شانون، و ممكن تلبسينها و شعرك مفكوك، و بكل الحالتين بتطلع حلوة إن شاء الله.

المهم الشيء اللي بأقوله لكم هو إني رحت أدور شيء يشبه لها عند Charm & Chain، و قد قلت لكم عن هذا الموقع اللي ما يبيع إلا مجوهرات قبل (مجوهرات من كل الماركات).

الحلقات مو طويلة مرة زي اللي موجودات بعرض أليكسي مايبيل، طولها 7.5 تقريبا يعن ما تنزل على الكتوف (هنا بتلقون باقي التفاصيل)، طبعا ودي أقول لكم سبب البوست هذا. أولا أنا جربت أشتري من الموقع، لسا ما وصل الطلب علشان كذا ما أقدر أعطيكم رأيي، بس حتى الآن كل شغلهم محترم على الوقت و ما فيه تأخير، بس أمس وصلني منهم كود خصم %20 مدة صلاحيته إلى نهاية هذا الشهر مارس، و أنا ما فيه ببالي إني أشتري أي مجوهرات إن شاء الله هذي الفترة، فقلت أكتب موضوع عن هذا الشيء و اللي يبغى الكود يكتب رد و يحط إيميله و أرسله له. الموقع فيه مجوهرات أشكال و ألوان، و بكل الأسعار (شيكوا عليه فوق)، و أهم شيء ترا الخصم مو بس على هذي الحلقات، أنا أخترتهم علشان أكلمكم عن الموضوع.

Bright Winter

لو تسمحون لي بأرجع شوي، يعني مو شوي بس بارجع لأسبوع الموضة بلندن، و خصوصا عرض جونثان ساندرز، اللي أعجبني كثير أكثر من مجموعة الربيع حقت سنة 2011، يعني اللي قبل هذي.

العرض أعجبني مرة أول ما شفته، زي ما قلت لكم حبيته أكثر من عرض الربيع و الصيف، صحيح ألوانه فاقعة، بس الأقمشة و النقشات مرة شتوية.

طبعا حبيت النقشات اللي تقريبا من أهم مميزات ملابس الخريف لـ2011. صحيح فيه ملابس كثيرة تعجبني من الرانواي، بس يعني الواحد زي ما يقولون يمد رجوله على قد لحافه، علشان كذا ما أفكر إني أبغى كل شيء يعجبني، أقصي تفكيري أو أمنياتي تكون أنه ألقى بالمحلات الهاي ستريت شيء حلو زيها. اللي وصلتني دعوة لموقع جديد أسمه Moda Operandi، المهم لما قريت مكتوب أنه بيعرض اللوكز اللي بارانواي للبيع على طول، يعني ما يحتاج الواحد ينتظر شهور لحد ما تنزل المجموعة للمحلات، و بعد قريت أنه الدعوة محدودة، فكرت ألبي هذي الدعوة أو لا، خصوصا إني أعرف قيمة هذي القطع، و الحمد لله ما وصل فيني الهوس إني أبغي الأشياء أول ما أشوفها بالرانواي زي آنا ديل روسو، آخر شيء قبلت الدعوة أولا لقافة، أبغى أشوف إيش عندهم، و ثانيا قلت الواحد ما يدري يمكن يوم من الأيام أصير مليونيرة، و أشوف فستان و خاطري فيه علشان مناسبة أو شيء، و لا أقدر عليه و تفوت المناسبة قبل لا ينزل (أعرف دراما). المهم لما دخلته لقيت الكوليكشين هذا لساندرز موجود، و لرحت أشوف اللوكز اللي عجبتني أكثر شيء و اللي حطيتها فوق، طبعا ما انصدمت، كنت متوقعه أسعار زي كذا، شوفوا بانفسكم الأسعار، هذا برينت سكرين للشاشة. (الأسعار شوفوها فوق على اليمين للتوب و التنورة، للوك اللي بالوسط).

Clean Gangs

من عدد فبراير الي كان غلافة كيرستين ستيوارت بشعر أشقر و حواجب غامقة (تعجبني هذي الحركة، و حبيت الغلاف). المهم فيه إيديتوريال أسمه Gangs of New York أو (عصابات نيويورك). أسم الإيديتوريال زي اسم فيلم قديم ما أتذكر كل شي بالضبط، بس أكيد أنه كان شكل الناس مخيس، و ريحتهم طالعة :) الغليلم حلو بس الناس كانوا مخيسين.

لما كانت فيه عروض نيويورك لربيع 2011 ما حسيت إن عرض رالف لورين كان مميز، فيه أشياء حلوة بس مو مميزة. بالإيدتوريال هذا فيه أكثر من مصمم بس أكثر واحد حبيت الشغل حقة كان رالف لورين. من فترة طويلة و أنا حابة الفساتين الطويلة البيضاء ، المشرشحة. فيها نعومة و أناقة، و لا أحس يحتاج لها شغل كثير، يمكن بس حلقات كبيرة، و مايك آب مناسب و بتكونين جاهزة لأي مناسبة، أهم شي لا يكون فيه مبالغة بالشكل.

ما أعرف صراحة، موقع يبيع رالف لاورين (قصدي أونلاين) ... بس فيه بوتيك لرالف لورين بالمملكة، بالرياض للي يبغي شي من عرض رالف لورين الي موجود بالإديتوريال أو بالعرض هنا. بس أنا من فترة طويلة، حتى من قبل التخفيضات، الي كانت عند أي نيت بورتيه، و أنا حاطة عيني على هذا الفستان من آنا سوي، عاجبني مرة، عاجبني طوله، و أنه أبيض، و خرابيطه الكثيرة ... ميزت الأبيض أنه مهما كثرت خربيطة ما يطلع بشع، و جلف علشان كذا حبيت هذا الفستان، زي ما أنتم شايفين الفستان عليه تخفيض الحين و صاير بحوالي 2700 ريال.

طبعا إذا تشوفون السعر غالي، بسو ودكم تجربون هذا اللوك الي مسمينه ببداية الإيدتوريال فيكتوري، أو ودكم بفستان أبيض طويل حلو، بس رخيص ... فيه موقع أسمه Free People يبيع أشياء مرة حلوة، صح مو رخيصة مرة، بس أسعارها معقولة، و أعتقد أنه كثير من الأشياء الي عندهم تستاهل سعرها.
فيه خيارين للبس هذا واحد أنا حبيته أكثر من عندهم، و الثاني خيار أختي. قلت لكم سعرهم مو رخيص دايم، بس أرخص من غيرهم، تقدرون تفتشون باقي الموقع علشان تصدقوني :). 

Sales Time

فيه ناس يتحرون هذا الوقت من السنة علشان يضففون ملابس بوعي و من دون وعي. أنا عندي مشكلة مع بعض الناس وقت التخفيضات، أحسهم ماجانين ما يدرون ويش يشترون وش يتركون، ما يهم إن كانت الملابس حلوة أو لا بس أهم شي أنه عليها خصم 50 ٪. حتى أعرف ناس لو شافوا مثلا جينز بـ 200 من دون تخفيض، ما يشترونه بحجة أنه غالي، بعدين يشوفون جينز ثاني أخو الأول بس بالتخفيضات، و سعره بعد التخفيض 200 ريال يشترونه ؟!!!

اليوم كنت بالرياض غاليري، ومريت بعض المحلات و أخترت لكم أحسن ما شفت من التخفيضات.

الفستان هذا من ميس سيلفرج، ليلى ببوست عن اللون البرتقالي، قالت إنها تحب اللون الخربزي أكثر، مو بس ليلى كثير يدورن بهذي المدونة هن اللون الخربزي أو المشمشي ... عجبني الفستان، ناعم سهل ينلبس معاه أي شي، تحت فوق، ألوان كثيرة نقشات كثيرة، بس لو أنا لبسته ممكن ألبسه مع جاكيت ميتروسايكل جلد.

هذا الجاليه الترتر من زارا عجبني بعد مره، فيه بحث جاني كذا بالضبط "اشياء فخمة تناسب التنورة السوداء ". بالنسبة لي هذا شي فخم يناسب التنورة السوداء ... التنورة اللي ببالي ممكن تلبس مع هذا الجاليه أهم شي تكون ماكسي (طويلة)، ما يهم وسيعة أو ضيقة، لأنهم باعتقادي كلهم ممكن يكونن حلوات ... وش راح ألبس تحت الجالية؟!!! ببالي تي أبيض مطبوع عليه شي معين على حسب ذوقك.

عند ديساجول أشياء غريبة، صح ممكن ما تعجب أي أحد، بس صدقوني فيه عندهم قطع تستاهل إنك تشتريها مثل هذا الفستان ... تقريبا من أكثر من شهرين و يجيني على المدونة بحث ملابس شتوية حلوة. إذا بتسألوني هذا الفستان ممكن أقول عنه كذا؟ إيه هذا فستان شتوي حلو، و أهم شي أنه مو حق موضة، أو موسم واحد أقدر أقولكم بثقة أنه لو بتلبسينه بعد عشرة سنوات بيظل حلو.

أكثر شي أعرفه من البنات إنهم يروحون لبيرشيكا يدورون فيه بنطلونات، للحق ما قد شريت من عندهم، و لا قد انتبهت كان عندهم بناطيل حلوة أو لا ... بس اليوم طاحت عيني على هذا الفستان عجبني مره، خصوصا فيه كريستالات على الرموش ... أحس أنه مع ليقنق أسود، و برا باندو بأي لون تحبون. 

Cheap Winter

أرجع لكم ثانية بموضوع ملابس من الهاي فاشن، و أشياء تشبه لها من الهاي ستريت. أحب هذا الشي كثير، لأنه فيه ذكاء، الذكاء يكون لما تلبس ملابس رخيصة و يطلع شكلك حلو ... يعني هو تعزية، مو بس تعزية إثبات أنه مو كل لبس غالي يحلي، و لا كل لبس رخيص يشين ... و شوفوا الدليل كيم كرداشيان بفيرسيز (إلى الآن محترقة:).

اليوم باجيب لكم ثلاثة أشياء أعجبتني بقوة بفترات مختلفة، و كلها من الأشياء الرائجة بقوة هذا الشتاء ... و النسخ الرخيصة منها ...

رقم واحد عندنا هو الفستان الزيتي هذا، قلت لكم قبل إني حابة الزيتي. اللون هذا حبيته يمكن بسبب المجموعة هذي من بوربري بريزيوم بالذات (مجموعة خريف 2011) ... البالطوات و الجاكيتات الجيشية مع الفساتين الزيتية الدانتيل برمت لي راسي ... حبيتها قوة حبيت اللون، و أظنه لون مطواع، راح يمشي مع أشياء كثيرة زي الذهبي، الفضي و حتى الأنيمال برينت.

ما أعرف تتذكرون هذا الشي أو لا .. فترة كنت راح أموت و أحصل آذان الأرنب هذي، حتى كان عندي استعداد اشتري الأصلية هذي الي من لوي فيتون لو لقيتها، من رحمة ربي ما لقيتها، علشان ما أتهور و أشتري إكسسوار شعر بشي أكيد أنه فوق 100 دولار. و لو تتذكرون قلت لكم إن أختي سوت لي وحده دانتيل و أنا مبسوطه فيها مره، و لبستها بحفلة و كنت باطير من الفرح. كالعادة لما ألقى الشي أو يطيح من راسي ألقى مليون نسخة منه، و هذي وحده من النسخ الي عجبتني قوه، و لو ما عندي كان شريتها.


إن كنتوا بعد تتذكرون قائمتي لأحسن الأشياء من نيويورك الي سويتها بعد أسبوع الموضة، تكلمت عن البوت المسترد هذا من إليكساندير وانق، و بعد قلت لكم قبل إني أحب اللون الماسترد ... مع الجو الي عندنا، قصدي الحر أكثر أيام السنة، ما يصير لنا نلبس بوت إلا بالشتاء، و هذا الشتاء أكثر من أي شتاء قبل، البوت عنصر أساسي بالموضة فيه تلقاه بكل شكل بكل طول.

زي دايم أي شي تبغونه من هذي بس أكتبوا رد أطلبوه مني (ترى كتابة الرد سهلة، اضغطوا تعليق و أختاروا يا زائر أو إن كان عندكم حساب على قوقل و بس و صلى الله و بارك) المره هذي الي يرد و مهتم قوة بالشراء أونلاين و خصوصا من asos يكتب لي بالرد وراح أرسله كود تخفيض %20 صالح إلى ديسمبر).

شي أخير، لأنه التخفيض من asos و لقيت أكثر من مره بحث عن الشنطة الي على شكل مجلة، الشنطة موجودة عند أسوس ب 250 ريال، و فيه أشكال كثيرة منها، بس أدخلوا على Bags و راح تلقونها و هذا رابط وحده

Real Shopping Comeback

أعرف إني ازعجتكم بموضوع إني تقريبا بطلت أشتري من أسواقنا لأن أكثرها تسد النفس، و تعامل البياعين زفت ... بس إني الإسبوع هذا زرت السوق أكثر من مرة و للجد كانت فيه أشياء كثير حلوة ...

انتبهت أنه كثير دانتيل، و تعرفون إني أحب الدانتيل، بس ما شريت أي شي دانتيل ... بعد فيه كثير فساتين طويله (ماكسي) للسهرات و للبس كل يوم ...

من الأشياء الي لفتت لي نظري على طول الفستان هذا الي من مانقو (على اليمين) على طول صورته لأنه ذكرني بفستان من مجموعة قبل الخريف من ستيلا مكارتني. الفستان عاجبني مره و النسخة القصيرة منه مانقو مقلدينه بعد بس ما شفته بالمحل شفته على الموقع المهم النسخة الي تنباع و الي شفتها على السلبرتي ما عجبتني لأنه بطنتها بأسود و لا طلع مره حلو، و حتى قلت لاختي ليه ما خلته لحمي بيكون أحلى بكثير ...

هذا هو الشي الي سووه مانقو بنسختهم، يعني ما بطنوه أسود، بطنوه لحمي عشان كذا عجبني مره، للحق ما شفت سعره بس أكيد وش ما كان سعره بيكون أخف على الجيب من نسخة ستيلا الي تنباع هنا ب net-a-porter.com ب 7,101.021 ريال (شي جواتي يقول سلامات؟!!!) أما نسخة مانقو فهي ب 389.224 ريال ... و عليكم حساب الفرق، و تخمين كم قيمة هذا الفستان الطويل، الي أحسه بيكون حلو لو بغيتي فستان لزواج ناس شوي بعاد :)

Rodarte for Target in High Fashion Version

الحمد لله ما خيب ظني كين، طبعا لما أقول الحمد لله أنا جواتي أقول الحمد لله على كل حال، يعني ما يحتاج أشكي إني ما أقدر عليه ... و عشان تعرفون قد إيش أنا مو أنانية شوفوني و أنا ما أقدر على كين انبسط أنه سوا شي كويس يقدر يشتريه ناس ثانين ماعندهم مشكلة دفع 4000 دولار على فستان منه ...
طبعا أحاول أعزي نفسي و أحط لكم اللوك الي فوق من عرضة الأخير بس ما راح أكذب و أقول مو حلو يعني على قولتهم الكذب خيبة، بس باقول أنه استوحاه من هذا اللوك من رودارتي لتارقيت .



طبعا أنا حابة مره هذي المجموعة، مو بس لأني شريت منها (تنورة العيد المسترد هذي هي) و تراها مو من الهرم للي قالي أنه شاف زيها بالهرم، طبعا هي مو غالية، مو أحبها بس لأنها مو غالية، أحبها عشان التل الي عليها، و أحبها عشانها زي الدانتيل، أنا أساسا كان خاطري بالبلوفر بس لقيته غالي 64 دولار، أدري بتقولن من وين غالي، بس أنا كان خاطري أشتري أشياء رخيصة، و أثبت لنفسي إني أقدر أشتري ملابس رخيصة و أحبها مره، و هذا الي صار ...

بس إن شاء الله الله بيعوضني بدل الرودارتي هذا بكريستفور كين ببلاش، أعرف إني أضحك، بس يالله نضحكم معاي :)

High Street Goes Even Higher

دايم أقول إني أحب الهاي ستريت، لأنها تجيب لك ملابس حلوه و تقدر تدفع فلوسها ... اليوم جاني من ASOS رساله عن الفساتين الي عندهم، أنا صراحه شبعانه فساتين، بس لاحظت يا كثر الفساتين الي تشبه فساتين من الليبلز ... و حبيت أحطها هنا، لو ودكم بشي منها (ترا ما عليها تخفيض لسا).

قبل سنة أو أقل طلعت ستيلا ماكارتني مجوعه حلوه، كان فيهم هذا التي دريس الي عجب أختي مره ... و أنا أقلب لقيته بسعر لسا رخيص 44.4 دولار يعني 166 ريال، هنا الفستان

مؤخرا صايره مهبولة بفساتين فيرساتشي ... هذا الفستان من كارين ميلين على طول حسسني أنه فستان من فيرساتشي ... الفستان مو رخيص بس للزواجات يستاهل سعره هو ب 340 دولار يعني ب 1275 ريال، الفستان هنا

الفستان هذا من إليكسندير وانق ما فيه أحد من السليبرتي ما لبسه ... إذا كنت تحبين هذا اللوك الفستان بحوالي 67 دولار يعني 243 ريال الفستان هنا

أول ما شفت الفستان هذا حق نارسيسو رودريقز على سارا جيسيكا باركر بعدد فوق الي عن SATC و الي كتبت عنه قبل سنتين ... حبيت هذا الفستان الي حسيته على طول يصلح أنه يكون من كوليكشين رودريقيز الفستان ب 102 دولار ... يعني ب 384 ريال، هنا الفستان

هذا الفستان من كريستفور كين، لبسته إيما واتسون عند دايفيد ليترمان ... حلو و شعره رخيص .. سعره ب تقريبا 77 دولار يعني ب 288 ريال، الفستان هنا

الفستان هذا من ماكوين، أول ما شفته حبيته، لبسته درو بريمو و استهبلت فيه ... أختي لما شافت هذي النسخة عند أسوس مره انبسطت مو رخيصه بس أكيد أرخص من ماكوين، هو تقريبا ب 145 دولار يعني 544 ريال. هنا الفستان

* الموقع عنده تخفيضات قويه يجي موسم التخفيضات، بس مو على كل حال تبقى الأشياء.