السبت، 18 سبتمبر، 2010

NY Wish list

الأشياء الي حبيتها من أول نظرة قلت لكم عليها و هي فساتين رودارتي بالمقام الأول، رجعت قبل لا يبدأ لندن و لا راح أقول إني متعشمة عشان ما يخيب ظني، بس أنا من داخل متعشمة بلندن خصوصا فيه كثير مصممين أحبهم بلندن و أهمهم كين و إرديم ... المهم لندن بدأ اليوم بس لسا ما بدوا الكبار فقلت أحط الأشياء الي عجبتني بنيويورك وودي أشتريها.

Michael Angel's White Dress

اللون الأبيض صاير بكل مكان بهذا السيزون و نفس الشي الأقمشة المطبوعة. قلت لكم إني حبيت مرة المجموعة هذي من مايكل إنجيل، الفستان الأبيض هذا لو كانت معاه الياقة أظن أنه من أحسن الأشياء الي شفتها بالعرض ... خطوط نظيفة قصات حلوة، و أهم شي دخل عنصر يكسر الأبيض مع الياقات.

Jason Wu's Sunglasses

شي ما أظن إني راح أغير رايي فيه لو صارت موضته مغبرة هي النظارات الكبيرة، أحبها بشكل يكفي إنها تستر، ما يحتاج تحطين بوجهك شي تغطي كل المشاكل ... يعني حبوب، عيون متنفخة و أهم شي تخلي الواحد يشك أنت تناظره أو لا (خصوصا للي مالهم خلق يسلمون على بعض الناس زيي)
A. Wang's Mustard Boots


لسا ما حبيت مرة أليكساندير وانق، و أنا قصدي هنا عرضة الأخير، ما زلت مصرة أنه لازم ينلبس على ناس أجسامهم أملا شوي من العارضات. فيه كم شي حبيتها و منها هذي الجزمة الي لونها أصفر يسمونه مسترد أو خردل الي تبغون، المهم أنه هذا اللون موجود بكثير عروض هذي الموسم، بس حبيت هذا البوت لأنه أولا غير عن الباقين يعني الباقين سوو ملابس و وانق سوا منها جزم، الشي الثاني أنا أحب هذا اللون و مبسوطة أنه بيكون دارج على الصيف الجاي.
أعرف فيه ناس لو شافوها ممكن يقولون هذي أحسن كان لبستيها مع تنورة العيد (يعني من باب التطقيم P:) بس آسفة أقولهم تواها ما نزلت الأسواق و إلا كان طقمت و لا لبست ألوان مرقعة :)
Proenza Schouler's Jacket

نفس الشي الي كان بعرض جايسون وو، بس بروينزا سكولير كانوا لسا ما عرضوا، اخترت هذا مو لأني أساسا أحب بروينزا سكولير بس لأنه صدق عجبني أكثر ... كذا شكله المتهري يعطيك أحساس أنه فينتاج مثلا فينتاج شانيل، و غير كذا حبيت النظارات معاه.

Marc Jacobs's Wide Leg Pants

البناطيل الوسيعة (نسيت وش كنا نسميها، و عجزة أكلم أمي أسآلها، يعني الي يعرف يذكرني الله لا يهينه) المهم راجعة، و موجودة بأكثر من عرض، بس أخترت هذا الي من مارك أولا لأنه غير أنه بنطلون واسع، مختار له قماش لامع شوي، مو لامع مره، و الأقمشة اللامعة صايرة دارجة بعد بالعروض، لسا ما حبيتها بس يعني اللامع شوي ماشي ... غير كذا لونه أعجبني أحب الألوان الصارخة، يعني شوي الواحد يطفش من الألوان التقليدية للبناطيل. لو تلبس زي ما سوا مارك بالعرض مع جمبر ملونه بيطلع حلو ... و لو مع قميص لحال بيطلع، حلو بعد، و لو مع جاكيت قصير بيطلع حلو.

Ralph Lauren's Skirt

من زمان و أنا مبطلة أحب رالف لورين، هذا ما يعني إني أكرهه، بس ما عاد يبهرني زي أول بس حبيت قوة هذي التنورة، أعرف إنها راح تكون غالية، بس بجد ودي أشتريها و ألبسها مع تي. أكثر من مرة قلت إني أحب الفلابير، و فترة كان بخاطري فستان فلابير، بس خلاص بطلته ... بس هذي ما ظن بتطيح من بالي.
Oscar de la Renta's Necklace


أنا مو مرة مع أوسكار دي لارينتا، يعني أحس أنه كلاس بزيادة على ذوقي، بس أول ما شفت هذي الصورة من بعيد لكارلي (يعني صورة اللبس كامل) حبيت شكلها عشان العقد، أساسا أحب اللون الأخضر و للمجوهرات أحب المجوهرات لما تكون الأحجار تقريبا متروكه على قصتها الطبيعية، عشان كذا ما أحب الألماس كثير :) نرجع للعقد لونه و شكله يخليه يحللي أي لبس، و الأهم أنه يصلح للبس كل يوم، و لمناسبات كبيرة.

هذي قائمتي، إذا عندكم قائمة حطوها :)