Mexican Marchesa

رأيي بماركيزا أنه يا حلو يا موب حلو، ما فيه شيء عادي. بعض المرات أحسه شغل خياط، و بعض المرات، أحسه اللبس اللي مصنوع علشان يكون ريدكاربيت أو بمناسبة حلوة. رأيي بهذي المجموعة اللي هذي المرة أول مرة تعرض في لندن، نفس رأيي بالماركة بشكل عام. بعض الملابس حسيتها مرة حلو، و بعضها "شغل خياط". 

أكثر شيء عجبني بهذي المجموعة التأثير الواضح للملابس المكسيكية، خصوصا الفستان الأول و الأخير، اللي كأنه من فساتين منطقة يوكتان بالمكسيك، بس نسخة للريد كاربيت. ما أشوف أحد بيلبس اللبس الأخير، لأني أحسه كأنه فستان حفلة على البحر، بس ما يمنع إني أعبر عن إعجابي. الفستان الأسود و الفوشي، أحسه بيكون حلو على كريستينا هيندريكز (من ماد مين)، ما أعرف وش أسمها بالمسلسل، بس اللي شعرها أحمر، و أظن دورها سكرتيرة. بعد أحس نايومس واتس بيطلع شكلها حلو باللبس الأبيض (الثاني من اليمين) أو حتى الأخير اللي ما أحس أنه بينلبس. الفستان الأول أعتقد بيكون حلو على بلايك لايفلي أو دايان كروقر (يمكن بتعديل يقصرونه مثلا)، أو ودي أشوفه على فريدا بينتو. 

إذا كنتم شفتوا المجموعة وش رأيكم فيها، أو رأيكم بماركيزا بشكل عام؟ 

Best Dressed: October 2013

هذي المرة أحس أنه الأختيارات اللي كانت موجودة لشهر أكتوبر أفضل بكثير من شهر سيبتمبر، إن شاء الله تعجبكم. أقدر أقول إن الخيارات ما كان فيها شيء جديد أو لبس مثير بشكل ما توقعناه، لكنها كلها من وجهة نظري خيارات كلاسيكية أنيقة، أظن إنها تبقى حلوة لفترة طويلة. 

أولا خلوني أقول إني أول ما شفت آنيا ريبوك (الثانية من اليمين بالصف الأول) بهذا الفستان من أيلي صعب، تأكدت إني  لازم أحطها بالقائمة، ما ودي أتكلم أكثر آخاف أضيع المساحة هنا. نفس الشيء على لبس أليكساندرا روش بالفستان الكحلي المنقط، صح ما خلاني أشهق زي آنيا، لكن حسيت إني لازم أدخله لأنه منقط، و أعتقد إني ما قد اخترت شيء منقط هنا أو فيه دوائر (صححوني لو كنت غلطانه). 

آشلي ميداكوي و دايان كروقر يدخلون مرة ما أعرف كم أكيد ثالثة أو أكثر القائمة، ديور نفس الموضوع أظنه أكثر الماركات اللي دخلت القائمة (بعد مو متأكدة). ساندرا بالوك و لوبيتا كلهم عندهم أفلام يروجون لها، و أعتقد أنهم اثنيناتهم كانوا محافظات على مستوى عالي من ناحية أختيارهم للملابس، فكان لازم يدخل شيء من لبسهم القائمة. 

Create your free online surveys with SurveyMonkey , the world's leading questionnaire tool.

Wedding Fever

بداية الأسبوع طلعت صور مسربة لزواج آن هاثواي (اللي ما كنت أعرف إنها بتتزوج قريب) (كانت لابسة فالنتينو). قبلها طلع خبر إن بلايك لايفلي تزوجت و لبست لزواجها من ماركيزا (بالمناسبة صور زواجها بتطلع على مجلة Wedding حقت مارثا ستيوارت أظن بالشهر هذا). و بعد بداية الأسبوع كان أكثر موضوع قراءة هو موضوع Weekend Wedding، اللي كتبته علشان زواج نيكول ريتشي السنة اللي فاتت. 

بس قبل لا أبدأ الموضوع كان هذا الموضوع ببالي من أسبوع الموضة بنيويورك بس قلت باستنى لحد ما يخلص باريس، علشان أشوف أكبر عدد من العروض. 

بصراحة متحمسة أشوف صور زواج بلايك، و بعد ودي أشوف صور أحسن لزواج آن هاثوي، ما أعرف ليه أتحمس لصور الزوجات مرة. الشيء اللي يحبطني دائما، على كثير ما رحت لزواجات ما أعرف ليه العالم تختار نفس الفساتين من جديد، بجد كثير زواجات ما أتذكر بالضبط فستان العروس (مع إني أختار مكان "ستراتيجي" وقت الزفة)، بس بطريقة ما، يصيرون كلهم نفس الشكل: فستان أبيض سترابليس نافش ؟!!!. و لأني ودي بجد أشوف "عرايس" بأشكال مختلفة، أخترت من العروض الفساتين، اللي ودي لو رحت لزواج أشوفها على العروس. 

(من اليمين لليسار: أوسكار دي لا رينتا، فيفيان ويستوود، ماركيزا)

عرض مار كيزا من أول العروض بنيويورك من أول ما شفت هذا الفستان (الأول من اليسار) طحت بغرامة، و عجزت أفكر فيه إلا أنه فستان زواج. أعتقد لو أحد خلاني الحين أختار فستان زواجه ما راح أفكر بفستان غير هذا، و لو كان بيدي خليتها تلبسه بالغصب. عيا يجي ببالي أحد ما يمكن يطلع عليه الفستان هذا حلو. فستان أوسكار دي لا رينتا أتمنى أشوفه مع طرحة بيضاء طويلة ما فيها أي شيء. أما فيفيان ويستوود أعرف أنه تقريبا مستحيل أروح لزواج فيه أحد لابس زي كذا، من زمان و أنا تفتني صور الزواجات الريفية، اللي الوحدة فيه كأنها قررت الحين بس تتزوج، طبعا حلاوة هذا الفستان مع جو ريفي كامل، مو داخل قاعة بألوان بنفسجية (متعقدة). 

(من اليمين لليسار: آندرو قن، فالنتينو، ريك أوينز)

ما أعرف وش السبب بس إلى الآن ما حضرت زواج قررت فيه العروس إنها ما تلبس فيه نفاش! أعجبني فستان فالنتينو، فيه كل شيء كلاسيكي (اللون، التطريز، حتى التصميم ما فيه أي تعقيد) لكنه راقي. أعرف إني بحياتي مو بس ما راح أحضر، ما راح أشوف أحد بهذا الريك أوينز، لكن هذا ما يمنع إني أحلم إني أشوف عروس لابسة هذا الفستان معها بوكية من الورد البيضاء الصغيرة اللي تحط بالبوكيهات اسمها (baby's breath). ما أعرف إذا ودي أحضر زواج ملكي أو أصلا ما يهمني، بس ودي بجد أشوف وحدة ما لبست سترابليس، علشان كذا لو رحت لزواج العروس لابسة فيه زي فستان أندرو قن أكيد بأكون مبسوطة، و باتذكر شكل فستانها بعد ما يخلص الزواج (و الله ما أفهم إنك تدفعين فلوس كثيرة على فستان ما فيه أحد بيتذكر شكله). 

وشو الفستان اللي أعجبكم؟ و قد رحتوا لزواج إلى الآن تتذكرون فستان العروس؟

Incredible India

الموضوع اللي راح أتكلم عنه اليوم شوي عائلي :)، مو مرة شوي ... بالصيف أختي و أمي شروا ساري (يعني قماش ساري). للحق ما تورطوا فيها، لأنهم ما أظن فكروا فيها كثير. بس لما شفت أمس عرض ماركيزا (اللي بالمجمل ما أعجبني) و اللي كان مستوحى من الهند (عرض شانيل بري فول 2012 كان بعد مستوحى من الهند بالخصوص البنجاب). ما علينا قلت لكم العرض مو مرة أعجبني، بس حسيت فيه أشياء ممكن تعطي فكرة لأحد زي أمي و أختي، عندهم ساري، أو ودهم يشترون ساري بس ما يبغون يلبسونه مثل "الساري" علشان ما يطلع شكلهم كأنهم بحفلة تنكرية :). 

(اضغطوا على الصورة، علشان تشوفونها أكبر)

قلت لكم أكثر من مرة ما عجبني العرض مرة (هنا تلقون الباقي). صراحة نسيت أشكال الساري حقات أمي و أختي، بس كأني أتذكر أنه فيه واحد ألوانه تشبه الثاني من اليمين. الثالث من اليمين عجبني (أعرف أنه التصميم مو جديد) بس أعجبني إنهم سووا الساري بشكل أكثر عصرية (أعتقد لو كنت تحت 30) أو تحسين إنك تقدرين تلبسين شيء زي كذا، و عندك قماش ساري، أعتقد أنه خيار مرة حلو، آمن و أنيق. 

أعجبني بعد الفستان الأبيض، أعرف أنه مو لأي أحد، بس لو كان عندي ساري من لون واحد، بالنسبة لي أكيد بأروح للفستان الأول من اليمين.

شرايكم أنتم بلبس الساري؟ ممكن تلبسونه زي ما هو؟ و وشرايكم بعرض ماركيزا؟

Best Dressed: March '12

زي ما وعدتكم، هذي أحسن الملابس لشهر مارس. على عكس شهر فبراير شهر مارس كان صعب أختار مو لأنه مليان أشياء حلوة، لأني ما اقتنعت بكثير من الملابس فيه، مع أنه فيه أحداث، بس بالنسبة لي ما كانت الملابس مرة حلوة، مع أنه كان فيه بريمير The Hunger Games بأكثر من مكان بالعالم.

أوليفيا باليرمو بروشا:

تعرفون يمكن إني ما أحب أوليفيا باليرمو، مو لشيء، لكن لأنها بالنسبة لي مالها فايدة بالحياة (بجد مالها وظيفة)، و كثير مرات أحس إنها جالسة تتغصب "الكشاخة"، ما أحب اللي يسوي شي بالقوة. ما علينا، أحب روشا أحب ملابسهم، و بهذا اللوك حبيت إنها شايلة مع لبس أسود شنطة بنية (بعد من روشا).

أليسكا شونق ببيلا فرويد تي شيرت و تنورة سيلين: 

علاقتي بأليكسا جدا متأرجحه مره تعجبني، و مره ممكن لو شفتها بغرفة يمكن أحبسها فيها و أخليها تصارخ لما يبح صوتها D:. لكن الآن أنا بفترة تقارب و صايرة تعجبني، أعجبتني مرة بهذا اللوك، و لا عندي مانع إني آخذه منها، و ألبسه الحين. حابة مره بساطته، و بنفس الوقت أناقته.

إليزابيث أولسين بـ ذا رو:

إليزابيث أولسين لابسه لبس كامل من ماركة خواتها ذا رو، أعجبني اللون عليها، كذا حسيت فيه دفا ... فيه شيء من السبعينات، (يمكن اللون من جديد)، أعجبني أنه البنطلون و الجاكيت كلها طقم، أعجبتني النظارة، و أعجبني شعرها.

جورجينا شابمان بماركيزا: 

جورجينا وحده من مصممات ماركيزا، لابسة من ماركيزا، بصراحة بالنسبة جورجينا أحسن من يلبس لماركيزا، أصلا هي حلوة، لكن غير إنها حلوة، تعرف كيف تلبس فساتينها، أحس لو أحد ثاني لبس هذا الفستان اللي من مجموعة ربيع 2012، ما طلع عليه حلو، بس عليها طالع مره راقي.

فانيسا باردي بشانيل: 

بصراحة من زمان ما حبيت فستان من شانيل، ما أقول إنها قبيحة، لكنها ما تخليني أقول واااو، هذا الفستان من مجموعة أوت كتو خريف 2011 على فانيسا ما أعرف هو الحلو، أو فانيسا هي اللي محليته، كل شيء بمكانه، مكياجها، شعرها، الجزم اللي هي مخترتها، و حتي الكيلون، بالنسبة لي على أنه الشيد الوحيد الملون هو روجها، أبدا ما حسيت إن اللوك سايح على بعضه.

أولقا كويالينكو بتود لين: 

بالنسبة لي هذا اللوك أعتقد أنه من الملابس اللي الأشخاص هم اللي يحلونها، و إلا لو أحد ثاني لبسها أبدا ما تطلع حلوة، صحيح إن الجزمة الحمراء ما أعجبتني لكن بشكل عام أعجبني شكلها، خصوصا شعرها، و الحلقات اللي لابستها.

ميشيل وليمز بفالنتينو:

هذا اللوك مو أحسن لوك شفت ميشيل وليمز فيه، و لا أحسن فستان فالنتينو قد شفته، لكن أعجبني كيف أعطى ميشيل إحساس كأنها بإعلان مستحضرات تجميل (هذا اللي أنا حسيته) حلو لون الفستان مع لون شعرها و بشرتها، طوله حلو، لون جزمتها حلوه، و المكياج مره مناسب.

إليزابيث بانكس ببيل بلاس: 

لو سألتوني وش أكثر لون أكرهه على فساتين السهرات، راح أقولكم الأصفر، ما أعرف ليه بالنسبة لي فيه درجة من التنفير غير طبيعية، هذا ما يعني إن شكل إليزابيث كان قبيح، و لا يعني إني بديت أحب، أو أقتنع باللون كفستان سهرة. بس حبيت إن إليزابيث تجرأت و لبست هذا اللون القوي، خصوصا أنه واحد من أكثر الألوان اللي كانت منتشره بعروض ربيع 2012. 

.

Is it a sky blue night?

اليوم أو فجر الإثنين بيكون الأوسكار، قلت لكم قبل ما عندي توقعات كبيرة إننا بنشوف ملابس حلوة على الريد كاربيت، لكن مازال عندي أمل أنه بيطلع الحفل حلو، حتى لو ما كانت الملابس حلوة. 

زي كل سنة أكيد فيه أحد بيلبس أسود، أتوقع بعد بيكون فيه فساتين نود و ألوان باستيل، قلت لكم ما أتوقع فيه طبعات، و لا أظن أنه أحد بيجي بفستان قصير أبدا (زي العادة)، و يمكن نشوف أحمر أو أثنين. الشيء اللي أتوقع أني أشوفه الليلة هو أنه فيه أحد بيلبس فستان سماوي. 

اللون الأزرق كان موجود تقريبا بكل عرض شانيل أوت كتو الأخير ربيع 2012، و نفس الشيء كان فيه مجموعة فساتين بعرض إيلي سماوية، أليكسي مايبيل بعد كان عنده فستان سماوي. بعد ما شفت فستان أوسكار دي لارينتا (أول فستان من تحت على اليمين)، بعروض خريف 2012 حسيت إني باشوف فساتين سماوية بكل العروض، لكن الشيء هذا ما صار، لكن لاحظت أنه الماركات اللي بالعادة هي الموجودة على الريدكاربيت، على الأقل طلعت بفستان واحد سماوي، كأنه فيه منافسة سرية على مين يآصل فستانه للريدكاربيت. 

بصراحة ما أتوقع أشوف أكثر من ثنيتن (على الأكثر) لابسات سماوي الليلية، لكن لو كنت باتنقى أو باتوقع أتمنى أشوف ميشيل وليمز بشانيل خصوصا مع شعرها الي صبغته فاتح مرة أمس (شانيل الفستان اللي بالوسط). أظن أنه جيني بيكام يصلح لأنجلينا جولي، صحيح مو ألوان أنجلينا، لكن قصته تناسبها (بالوسط على اليسار). أما فستان أوسكار دي لا رينتا، فأتمنى إني أشوفه على جيسيكا شستاين مع إني عندي إحساس إنها راح تلبس لأرماني برافيه، لكن ما يمنع أتمني :). 

شرايكم باللون السماوي كفستان سهرة؟ 

You Can't Fake Fashion

قبل أسبوع تقريبا عرفت أنه فيه تعاون بين eBay و CFDA اللي هي جمعية المصممين الإمريكان، على أنهم بيطلعون شنطة مكتوب عليها: "you can't fake fashion" "لا يمكنك تزييف الموضة". الهدف منه أنهم يوعون الناس من الأشياء المقلدة. 

صراحة أنا ما أحب بذات الشنط المقلدة و خصوصا تقليد الماركات المعروفة مثل قوتشي و لوي فيتون و ووو المهم، سببي مو أخلاقي، بس إن شكلها رخيص، أفضل شنطة من محل عادي على شيء مقلد بشكل سخيف، و أظن أنه مع هذي الموجة، موجة "نسخ" الموضة من الهاي فاشن للستريت فاشن صار فيه كثير شناط حلوة، و على الموضة، بسعر مقبول. 

اليوم قريت إيميل من eBay أنه تم عرض الشنط للبيع، فتحت على الصفحة و لقيت شنط مرة حلوة (طبعا كلها خلصت، ما أعرف كم نسخة مسوين)، أكثر وحدة أعجبتني فيهم، هذي اللي فوق من تصميم آدم. سعر كل الشناط كان 150 دولار، طبعا ليه أكتب لكم عنها و هي مخلصة، لأنه لو أعجبكم شيء منها أعتقد بعد فترة راح نلقى ناس عارضينها للبيع من جديد على eBay و طبعا بتكون أغلى من السعر الأصلي، بس لو كانت عاجبتكم مرة، دوروا عليها من جديد بالموقع. 

و لو ما كنتوا متحمسن للشراء، و بس تفرجتوا على الصفحة لقافة زيي، قولوا لي وش أكثر شيء أعجبكم.

Which Team Kate Would Join

السنة هذي شكلها سنة الزواجات. أنبسط كثير على موضوع الزوجات، أحب حفل الزواج المنظم و شكله حلو، و جديد. زي ما قلت لكم أقل من شهر و وليم ولد ولي عهد بريطانيا راح يتزوج خطيبته كايت ميدلتون اللي نشف ريقها من عشر سنين.

علشان هذا الزواج كل العالم هابة، كأنه ما تزوج غيرهم، زي ما قلت مليون مرة مع إني أحسه بيكون زواج بايخ. المهم Vogue UK طلعت عدد مايو كله تقريبا خاص بهذا الزواج، وسوت الإيدتوريال اللي فوق، و علشان أوفر عليكم صراحة الإيدتوريال بايخ، بس أنا جبت صور منه علشان قضية وحدة، خصوصا لما شفت الفستان الأوت كتو الديور الموف (أكيد يمين)، و جا ببالي هل ممكن تلبس كايت لون غير الأبيض و درجاته؟ أشك.

السنة هذي كان فيه زوجين للسلبرتي الأول (اليسار) زواج نيكول ريتشي، و لبست فستان فيه من ماركيزا، الفستان أبيض زي ما تشوفون، و يميل كثير للكلاسيكي. أساسا نيكول كانت تبغى فستان مستوحى من فستان قريس كيللي اللي تزوجت رينيه أمير موناكو.

الزواج الثاني هو زواج ريز ويذيرسبون الثاني، تزوجت بفستان وردي من مونيك لولير، كفكرة أنا أساسا ما يدخل مزاجي إلا الأبيض و درجاته، لكن على قلة الصور اللي شفتها لها (جلست أنتظر و عيا يطلع مع الناس صور زيادة) أعجبني شكلها (لولا شريطة وردية عند الخصر) بس أكثر شيء عجبني بالموضوع إنها لبست طرحة بيضاء مع الفستان، طلع شكلها مرة رايق. و هذا نفس الشيء اللي مسويته فوق مع الفستان الموف، ملبسه الموديل طرحة بيضاء.

أنا ما أتوقع بتلبس من أي وحدة من المصممتين مونيك أمريكية، و ماركيزا هي مصممة بريطانية، بس دار الأزياء مكانها نيويورك، و الغالب إن كايت بتلبس لبريطانيين (أو الأكيد).
الشيء الثاني ما أتوقع بعد تلبس لون مو تقليدي، لأن الزواجات الملكية الأوربية اللي قبلها كلها كانت أبيض: ماري أوف دينامارك، ميته مرييت أوف نوريج و آخر وحده الصيف اللي فات هي ولية عهد السويد فكتوريا.
و آخر شيء أتوقع أكيد ماراح تلبس شيء يشبه فستان ديانا، مو لأنه قديم، لأنه بيكون شكلها مثير للشفقة لو جلست تنسخ دايانا من جديد، خصوصا أنه خاتم الخطوبة، هو خاتم خطوبة ديانا.

لاحظتوا كل الزواجات الملكية ما فيها سترابليس، و أكثر شيء مكشوف كانت فيكتوريا، تتوقعون تلبس كايت سترابليس، أو من دون أكمام؟ بالنسبة لي لا. 

The Oscar

هذا تقرير مختصر عن اللي شفته بالأوسكار. أول شيء زي كالعادة، ما فيه شيء من توقعاتي صار، إلا شيء واحد و مو مضبوط غوينث بالترو لبست الفستان اللي من مايكل كورس و اللي أنا اقترحته لأيمي آدمز (إلى الآن مصرة أنه مع شعر أحمر بيطلع حلو أيمي تكفين ألبسيه)، ترى غوينث ما لبست الفستان بالأرايفلز، لبسته بالحفل لما كانت تغني، و لبسته بحفلة فانتي فير آفتر بارتي.

شيء ثاني كان فيه فالنتينو، و ماركيزا زي ما توقعت آن هاثوي لبست من فالنتينو أحمر فنتاج بالأرايفلز (ما أعجبني مرة)، و هايلي لبست من ماركيزا و بعد هالي بيري. 

آن هاثوي من بين المليون فستان اللي لبسته بوسط الحفل لبست من أرماني برافي، مو اللي أقترحته، واحد ثاني أعجبني بعد، بس أظن أنه اللون الأحمر حق العرض كان أحلى، بس يمكن ما تبغى تلبس أحمرين.

 المهم نجي لأحسن لبس، أظن أحسن لبس راح للكتو، و كلهم يستاهلون جيفنشي و فالنتينو و كلها المجموعة الأخيرة من الآوت كتو 

1. Cate Blanchett in Givenchy

كايت، كايت كايت ما أعرف ليه هذي المره تعرف شلون تلبس صح من دون ما تتعب، على إنه الكوليكشين حق جيفنتشي أوت كتو للربيع أعجبني، بس ما حسيت فيه فرق كبير عن حق الخريف اللي فات، بس الألوان تغيرت، بس كيت ورتني إني كنت على غلط و أنه لا الفستان مرة حلو و بذات من ورا. إنبسطت بجد كثير على كايت، و أظن إن أمنيتي إني أشوف فستان يستاهل يدخل قائمة أفضل فساتين الأوسكار للعقد الجاي تحققت :). 

2. Florence Welch in Valentino HC

منيب مستحية أقولكم أنه أول ما شفت عرض فالنتينو أوت كتو لربيع 2011 هذا الفستان أكثر واحد حبيته، و إن كنتوا تابعوني بتعرفون أنه هذا ذوقي يعني لا تقولون عني كذابة :) أحب الأكمام الطويلة، أحب التنانير الطويلة، و الشيفونات، طيب ليه ما لبسته أحد سبب وحيد أنه ما جاء ببالي أحد ممكن يطلع فيه حلو، حتى فورانس ويلش، اللي ما كنت أدري أساسا إنها بتجي  :) للي ما قد سمع عن فورانس فلورانس هي مغنية بريطانية، لبسها مرة حلو، لو تتذكرون قائمة أفضل ملابس 2010 فورانس كانت موجودة بفستان من ديور. 

غير أنه الفستان حلو فلورانس عندها كاريزما تخلي كثير من الملابس مرة حلوة. 

Weekend Wedding

الويك إيند هذا زواج نيكول رتشي ... أحس إنها راح تسوي شي حلو مره، أو شي بايخ مره، الي عرفته أنها راح تلبس من ماركيزا، أحسه شي خاص فيها مو موجود من الكوليكشين الأخير ... بس لو كنت باختار أنا منه كنت راح أختار هذا الفستان:

الفستان من أول ما شفته عجبني، و على طول فكرت فيه أنه يصلح لزواج، يمكن أكثر شي عجبني فيه أنه يشبه لبس أودري هذا الي ب My Fair Lady و تعرفون أنه أنا زي كل بنات العالم أحب أودري هابيرون.

هذا الموضوع خلاني أجيب طاري موضوع ثاني من زمان بخاطري بس مستحية منكم لأنه بتقولون الحمد لله على النعمة.

المهم الي بقوله ... قبل تقريبا أسبوعين حلمت حلم سخيف، حلمت أنه مجلة أزياء (ما أعرف أي وحده) طلبت مني إنهم يصورون زواجي، قلت لهم إني تزوجت و خلصت، بس إذا ما عندكم مشكلة أسوي زواج ثاني ... المهم قمت من النوم قبل ما أفكر كيف شكل الزواج الكذبي الي راح يصورونه لي المجلة ... و جلست أفكر، ما أبغى أعيد زواجي الأصلي صح مو شين يعني شين، بس مو واااو لدرجة أنه أبغى مجلة تصوره (دايم تصير لما نبغى شي يطلع حلو مستحيل يطلع زي اللي ببالنا) بس هذي المره ما راح أشيل هم لأني راح آخذ فلوس من المجلة ... جلست أفكر وشو ثيم الزواج أول شي فكرت فيه هذا الفستان ، الفستان من مجموعة أليكساندير ماكوين الأخيرة ... على طول حسيت إني أبغى أسوي زواج بالغابة (أعرف أنرحم) حتى تراني سويت بحث عن الكاسات الي بتنحط على الطولات ... أبغى أقدم حلويات ألمانية أحسها تمشي مره مو زي الفرنسية، يعني الألمانية حلو طعمها بس شكلها حوسة، و أكثرها ألوانها غانقة، مو زي الفرنسية ملونة، يعني بتلبق على الغابة، و أكيد أبغى بوكيه الورود فيه برية ...

الي يبي يجي زواجي الثاني الكذبي الله يحييه بس شرط يدفع قطه، و القطة تبدأ بألف ريال P:

Beautiful Doll

قبل فترة أعلنت حبي لإيل فينانق للعلن ... البنت ذوق، و حلوة و أحس إنها موهوبة مع إني ما شفت لسا فلمها الجديد ... فناس تجتمع فيهم هذي الأشياء، أكيد أتمنى أشوفهم كثير
أمس إيل جاية لحفلة لمجلة إيل بهوليوود ... العجيب بهذي البنت على إنها طويلة، بس تخلي الفساتين فساتين أطفال ... أمس لابسه فستان من ماركيزا مجموعة الربيع الأخيرة الي عرضت بنيورورك قبل شهر، الفستان من ماركيزا مو نوتي باي ماركيزا للي جالسين يدورون على نوتي و للي يسأل وش الفرق بين الإثنين هو نوتي أرخص من ماركيزا لحاله ...

المهم الفستان من الفساتين القليلة الي أعجبتني بالعرض الأخير (أنا مو من معجبين ماركيزا، أشوفه دلوع بزيادة علي) المهم بس كان بفصوص خضراء مزرقة (هنا الفستان من العرض).

الي يعجبني بإيل، و ما أعرف مين الي يزينها إنها عارفة وشو الشي البسيط الي ممكن يحول اللوك من لوك لايق على العمر لشي لما تشوفه تحس الواحد أكبر من عمره بعشر سنوات ... طبعا هنا إيل ما حطت مايك آب يعني روج جامد أو بلاشر أو كحل، الشي الثاني شعرها جدا لابق على عمرها، و هذا الشي أشوف كثير ناس يسونه خطأ بزواجاتهم ... يعني يظنون لأنه أختهم أو أخوهم هو المتزوج يجوون يسوون لأم 9 و 10 تسريحة أو لو حتى بيرم، و يحطون على شعورهم لماع ما أعرف وش سنعه، أو حتى يكبون القلاتر هذا على الوجه ... لما يكون عندك أحد صغير بعمر إيل 12 سنة لبسه فستان حلو زي كذا (يعني أبيض نفاش قصير) لا تحطوون لها مايك آب، و لا تسرحون شعرها ... يعني استشوار أو كرلز خفيفة ترا تكفي وزيادة.

شي أخير عجبتني الجزم السود يعني مخففة من جو العرايس، ما اختارت ذهبي أو فضي أو أي لون ميتلايك لأنه بالآخر هي حفلة لمجلة مو توزيع جوائز ... و عجبني أنه الجزم لها حزام ما أعرف وش يسمى بس هذا الشي الي يتسكر فيه، مع أنه علي الأقل من الصورة الي أناظرها واضح أنه كعب، بس الحزام عاطيها شكل طفولي، و هذي مو أول مره تلبس جزمة زي كذا ... لبست جزمة من هذي النوعية ببريمير فيلمها الأخبر somewhere بفانيسيا، لما لبست فستان من مارك جايكوبزمن مجموعة الريسورت الأخيرة.

فيه فساتين نافخ الله بصورته، تتذكرون فستان لوغان موغييه الي ما في أحد ما لبسه ، المره هذي جا الدور على فستان ماركيزا الخايس هذا، هذا الفستان لو شفته قبل 10 سنين يوم زواج خالتي كان صرعني، بس الحين ما أدري وش يبي...

أول مره شفته على مايلي السنة الي فاتت زي ما قلنا قبل ثم لبسته جورجينا (راعية الماركة) بكان مايو الي فات، و أنا أدور على مايلي المرة الأولى اكتشفت أنه هايدي كلوم لابسته بعد

قبل يومين لبسته الي لو تلبس وش ما تلبس ما يزهاها (هيلاري دوف) ما أدري بحفلة أو وهي تصور gossip girl (للي يتابعون المسلسل قولوا لي) ، بس مع الحلقات هذي الرهيبة ذكرتني بمنتزهات الله بالخير الي يسوون بالكفرات كل شي حتى مراجيح حلاقاتها كأنها كفرات

I wanna this .. 2

الحلقة الثانية من أبغى هذا .. طبعا شكله من كثر الناس الي تجي كان، ما يصير فيه فساتين جديدة، الفستان هذا من ماركيزا، لبسته مايلي بama's award ما أدري من كم، طبعا مايلي قاصته عشان تطلع "لحمه" زي ما تقول أمي، أمس البريطانية جورجينا شامبمان بكان.