Best Dressed: June '13 Winner

جينا لشهر جديد، هذي المرة لشهر يونيو (أعتقد أنه شهر رقم 6) يعني تقريبا صار لنا نصف سنة نختار أحسن لبس للشهر. مبسوطة إنكم جالسين تصوتون معالي، و مبسوطة من نفسي إني إلى الآن جالسة أحاول ما أوقف موضوع أحسن لبس مع إن التصويت حالتي معاه حالة. و إلى الآن ما لقيت خدمة تصويت أحس كويسة و أقدر أعتمد عليها للأبد P:.

ما علينا خلونا نتكلم عن أحسن لبس لشهر يونيو اللي فات. 

زي ما قلت لكم قبل شهر يونيو ما كان مميز من ناحية الملابس، لكن من الإختيارات اللي عرضتها عليكم، اخترتوا أوليفيا باليرمو بفستان من دينيس باسو. بالنسبة لي فستان زي كذا أولا ما راح يطلع حلو على أي أحد و لا أعتقد إني لو شفته ممكن أختاره لي. الشيء الثاني اللي أبغى أقوله، إني كثر مرات ما تعجبني أو ما أفهم صراحة اختيارات أوليفيا للإكسسوار، لكن بهذي الحالة أعتقد إن الإكسسوار (بذات هذي الجزم الذهبية/الصفراء) أعطت اللبس شكل مرة حلو. نفس الشيء ما أعتقد اختياره للجزم ممكن أسوي مثلها، لكن أظن إنها عرفت كيف تخلي اللبس "لبسها".

Best Dressed: June 2013

أقدر أقول إن شهر يونيو ما كان أحسن شهر من ناحية الملابس، على أنه كان فيه بريميرات أفلام مثل ذا بلينق رينق و سوبرمان إلا إنه الملابس ما كانت مرة مميزة، مو سيئة لكن مو مميزة. أقدر أختصر الموضوع أقول أنه أربعة إنجليزيات دخلوا القائمة هذي المرة (أظنه أكبر عدد من بديت أسوي التصويت). و الثلاثة أشياء اللي مو جديدة على "أحسن لبس" هم: سيينا ميلر، لوي فيتون و فالنتينو. 

أظن إن القائمة هذي المرة متنوعة مرة (من ناحية خيارات اللبس). من اللبس الناعم مرة زي الفالنتينو اللي لابسته جايسا شيمينازو (الصف الثاني يسار) للبس كارا دوليفان ببنطلون بوربري و كعب أحمر (مو قايلة لكم أحس إن الجزم الحمراء/الكورال كاثرة على الريدكاربيت). بالنسبة لي أكثر لبس ما يمثلني هو صوفيا فيرقارا من إيرفي ليرو، يمكن اللي متابعني من زمان يعرف أنه هذي النوعية من اللبس ما تعجبني (كليفيج و كرفز و أشياء زي كذا)، لكن حبيت المجوهرات اللي اختارتها مع الملابس حسيتها أعطت اللبس "رقي" و أظن بهذا الشكل حتى لو ما كان ذوقي فهو (على الأقل على حسب علمي ذوق كثيرين).

حبيت لبس أوليفيا باليرمو، و بذات اختيارها للجزم، حبيت لون فستان أشلي ميداكوي (الصف الثاني، الأول من اليمين) مرة حلو مع لون بشرته، آخر شيء حبيت مرة شكل هايلي بينيت بلوي فيتون خريف 2013، هايلي مو أول وحدة تلبس من المجموعة (أتذكر إن كايت موس و فلورانس ويلش و كارلي كلوس كلهم لبسوا منها) لكن بالنسبة لي هايلي أحسن من لبس. لون الفستان مع لون شعرها و بشرتها و تسريحتها و مكياجها و أهم شيء كيف الفستان ماسك عليها كله خلاني أظن أنها تستاهل مكان بالقائمة.

* أعرف إن حالتي حالة مع التصويتات، بس صلحت التصويت، و حطيته على موقع ثاني، إن شاء الله ما يخرب. 

Create your free online surveys with SurveyMonkey , the world's leading questionnaire tool.

Animal Prints: Two Different Ways

قبل يمكن ثلاثة سنوات (أقل أكثر) طلعت أوليفيا باليرمو على العالم، ببرنامج كان المفترض أنه يبرز وتني بورت بعد ما خلص The Hills. المهم ذاك الوقت و لسبب ما أعرفه كنت ما أحب أوليفيا باليرمو، لا تفهموني غلط إلى الآن ما تعجبني P: بس ما أكرهها زي ما كنت أكرهها بذاك الوقت.

الصورة اللي على اليسار لأوليفيا أمس بكان بمزاد خيري للإيدز، أوليفيا بالحفل كانت لابسة لروبيرتو كافالي تقريبا فستان كلاسيكي لكافالي مع طبعات الفهد هذي و فتحات الفستان اللي من كل جهة. الصورة اللي على اليسار من أول الصور اللي شفتها لأوليفيا بمناسبة، و آتذكر إني كرهت شكلها هنا بطريقة عنيفة P:. اليوم لما شفت هذا الشكل لأليفيا (يسار) اللي ما قد شفتها فيه (كأنها وحدة من عارضات فيكتوريا سيكريتز). مع إني بالعادة أكره الشكل هذا يمكن لأن أوليفيا ما حاولت تطلع فيه "مثيرة" (المكياج و التسريحة) تاركتهم "راقيات"، المهم لما شفت هذا الشكل و لا كرهته تذكرت الصورة اللي على اليسار و تذكرت إنها كانت لابسة طبعات فهد بعد و إني كرهته مرة فقررت أروح أشوفها مرة ثانية. الصورة اللي من 2010 كانت أوليفيا فيها لابسة فستان تقريبا بنفسجي بطبعات فهد من بنسوني، أتذكر إني كنت كارهة كل شيء باللوك هذا، و خصوصا الحزام (إلى الآن مو عاجبني، بس فكرة طبعات فهد بألوان مختلفة تلبس مع بعض عجبتني الحين). باللوك اللي على اليمين "كلاسيك" أوليفيا، بإكسسوارات "ملفته" و فستان مايكرو، و الصورة اللي على اليسار أوليفيا (ما أعرف الجديدة أو بس ليوم واحد) بفستان بفتحة طويلة، و إكسسوارت تقريبا نفس ألوان الفستان. بس كلهم طبعات فهد. 

أي أوليفيا أعجبتكم أكثر؟ و بأي شكل تحبون تلبسون طبعات الفهد (ملونة و غريبة) أو على طريقة كافالي و عارضات فيكتوريا سيكريتز؟  

Best Dressed: March '12

زي ما وعدتكم، هذي أحسن الملابس لشهر مارس. على عكس شهر فبراير شهر مارس كان صعب أختار مو لأنه مليان أشياء حلوة، لأني ما اقتنعت بكثير من الملابس فيه، مع أنه فيه أحداث، بس بالنسبة لي ما كانت الملابس مرة حلوة، مع أنه كان فيه بريمير The Hunger Games بأكثر من مكان بالعالم.

أوليفيا باليرمو بروشا:

تعرفون يمكن إني ما أحب أوليفيا باليرمو، مو لشيء، لكن لأنها بالنسبة لي مالها فايدة بالحياة (بجد مالها وظيفة)، و كثير مرات أحس إنها جالسة تتغصب "الكشاخة"، ما أحب اللي يسوي شي بالقوة. ما علينا، أحب روشا أحب ملابسهم، و بهذا اللوك حبيت إنها شايلة مع لبس أسود شنطة بنية (بعد من روشا).

أليسكا شونق ببيلا فرويد تي شيرت و تنورة سيلين: 

علاقتي بأليكسا جدا متأرجحه مره تعجبني، و مره ممكن لو شفتها بغرفة يمكن أحبسها فيها و أخليها تصارخ لما يبح صوتها D:. لكن الآن أنا بفترة تقارب و صايرة تعجبني، أعجبتني مرة بهذا اللوك، و لا عندي مانع إني آخذه منها، و ألبسه الحين. حابة مره بساطته، و بنفس الوقت أناقته.

إليزابيث أولسين بـ ذا رو:

إليزابيث أولسين لابسه لبس كامل من ماركة خواتها ذا رو، أعجبني اللون عليها، كذا حسيت فيه دفا ... فيه شيء من السبعينات، (يمكن اللون من جديد)، أعجبني أنه البنطلون و الجاكيت كلها طقم، أعجبتني النظارة، و أعجبني شعرها.

جورجينا شابمان بماركيزا: 

جورجينا وحده من مصممات ماركيزا، لابسة من ماركيزا، بصراحة بالنسبة جورجينا أحسن من يلبس لماركيزا، أصلا هي حلوة، لكن غير إنها حلوة، تعرف كيف تلبس فساتينها، أحس لو أحد ثاني لبس هذا الفستان اللي من مجموعة ربيع 2012، ما طلع عليه حلو، بس عليها طالع مره راقي.

فانيسا باردي بشانيل: 

بصراحة من زمان ما حبيت فستان من شانيل، ما أقول إنها قبيحة، لكنها ما تخليني أقول واااو، هذا الفستان من مجموعة أوت كتو خريف 2011 على فانيسا ما أعرف هو الحلو، أو فانيسا هي اللي محليته، كل شيء بمكانه، مكياجها، شعرها، الجزم اللي هي مخترتها، و حتي الكيلون، بالنسبة لي على أنه الشيد الوحيد الملون هو روجها، أبدا ما حسيت إن اللوك سايح على بعضه.

أولقا كويالينكو بتود لين: 

بالنسبة لي هذا اللوك أعتقد أنه من الملابس اللي الأشخاص هم اللي يحلونها، و إلا لو أحد ثاني لبسها أبدا ما تطلع حلوة، صحيح إن الجزمة الحمراء ما أعجبتني لكن بشكل عام أعجبني شكلها، خصوصا شعرها، و الحلقات اللي لابستها.

ميشيل وليمز بفالنتينو:

هذا اللوك مو أحسن لوك شفت ميشيل وليمز فيه، و لا أحسن فستان فالنتينو قد شفته، لكن أعجبني كيف أعطى ميشيل إحساس كأنها بإعلان مستحضرات تجميل (هذا اللي أنا حسيته) حلو لون الفستان مع لون شعرها و بشرتها، طوله حلو، لون جزمتها حلوه، و المكياج مره مناسب.

إليزابيث بانكس ببيل بلاس: 

لو سألتوني وش أكثر لون أكرهه على فساتين السهرات، راح أقولكم الأصفر، ما أعرف ليه بالنسبة لي فيه درجة من التنفير غير طبيعية، هذا ما يعني إن شكل إليزابيث كان قبيح، و لا يعني إني بديت أحب، أو أقتنع باللون كفستان سهرة. بس حبيت إن إليزابيث تجرأت و لبست هذا اللون القوي، خصوصا أنه واحد من أكثر الألوان اللي كانت منتشره بعروض ربيع 2012. 

.

Everybody likes Sienna's Elegance

قبل فتره طلعت سيينا بلوك مره، حلو و ما يحتاج سيينا صايره وااااو لابسه تنوره عاجي قصيره عاجي من ماركتها مع تانك مقلم، قبل يومين طلعت أوليفيا حقت سيتي ينفس اللوك تقريبا مع شوية فروق

هذي مقارنه بين الثنتين و أنتم قولوا لي وش رايكم؟