Best of MFWSS15

ميلانو خلص، و ما بقى لنا إلا باريس، أعتقد راح يبدأ بكرا، غير قوتشي، و اللي كان أول عرض، و تكلمت عنه أنه مرة أعجبني، ما شفت شيء مثير بميلانو، يمكن أكثر مجموعتين أعجبتني، هم أكثر مصممين مجموعاتهم دايم متشابهة أو متوقعة، بس هذا ما يعني إن تصاميمهم مو حلوة، بس لأنها متوقعة. ما علينا، خلوني أحط الفساتين و أتكلم عن الأشياء اللي أعجبتني من ميلانو. 

خلوني أبدأ من الجمب سوت اللي فوق يسار من فرانشيسكو سوكونميليو، صراحة ما ودي أشوفها على الريدكاربيت، بس ودي أشوف أحد لابسها لزواج، ما أعرف إلا أوليفيا وايلد بتتزوج، لكن أشك إنها ممكن تلبس جمب سوت. الفستان الأسود اللي بعده من فيندي (بالمناسبة مجموعة فيندي كانت حلوة بعد)، ودي أشوفه على جوليان مور أو كايت بلانشيت. الفستان الأسود الثاني تحت من اليمين، من روبيرتو كافالي، أحسه بيطلع مرة حلو على نايومي كامبل، اللوك اللي بجمبه من دولتشي آن قابانا، مرة عاجبني (دولتشي آن قابانا كان واحد من العرضين اللي أعجبوني مع إن المجموعات دايم متشابهة) أعجبني التوب المقلم أحمر مع تنورة كذا فخمة، ودي أشوفه على بينالوبي كروز بمهرجان كان (ما أعرف هي بتجي كان أولا) بس أحسه مكانه كان. الفستان الرمادي اللي فوق من جورجيو أرماني (هذا العرض الثاني اللي أعجبني، مع أنه نفس دولتشي آن قابانا، دايم مجموعاته متشابهة)، أحس هذا الفستان بيطلع حلو على إيما ستون. (باقي الملابس، فوق الثاني من اليمين من ستيلا جين، تحت الأول من اليمين ميسوني، و الأخير يسار فاوستو بولقيزي). 

أنتم لو متابعين ميلانو وش أكثر شيء أعجبكم؟ أو رأيكم بالأشياء اللي هنا. 

Matte Lips

أزعجتكم بقصة مكياجي  إني تركت كل مكياجي، و بديت أشتري مكياج جديد، كل فكرتي بالبداية إني أدور مكياج جديد (رخيص بشكل أساسي) و بالخصوص لو كان مو سهل أحصله بالسعودية. من الماركات اللي كنت متحمسة أجربها NYX ما كان فيه شيء معين ببالي، بس بالصدفة و أنا أدور على روج بس يعطي لون للشفايف و لا يوضح إني حاطة روج (يعني شيء حق كل يوم) المهم طحت على هذا الشيء من نيكس أسمه Soft Matte Lip Cream. 

على أنه سعره مو غالي 6 دولارات تقريبا كنت كل مرة ألقى مبرر إني أأجل الشراء. لكن بعد ما شفت الصورة هذي من عرض ميسوني لصيف 2013 (بالمناسبة كان عاجبني مرة خصوصا الملابس اللي فيها أحمر ودرجاته). عجبني شكل الشفايف (الطافي) و تحمست إني أروح و أجرب واحد من هذولي matte lip cream اللي من نيكس. 

الكريم هذا شكله يشبه القولس (بس مو قلوس و لا فيه لمعة أبدا). يجي ب 11 لون كل لون له اسم مدينة. اللون اللي أنا حاطته فوق هو أمستردام. صراحة ما جربت هذا اللون، بس من الصور اللي شفتها على الإنترنت أعتقد أنه يشبه مرة اللون اللي على شفايف العارضة. 

بعد حيرة قصيرة جدا اخترت ساو باولو بعد ما كنت متردده بينه و بين أنتورب. لكن حسيت أنتورب بيكون شوي فاتح على بشرتي و بيطلع شكلي مرة بايخ (طبعا كنت أدور على ألوان "طبيعية"). تقريبا كل الألوان "طبيعية" ما عادى: أمستردام (اللي بالصورة) و أديس أبابا (فوشيا) و آخر لون أحمر غامق مونتي كارلو (عجبني مرة). لما جربته (أقصد ساوباولو) غير إن لونه أعجبني مرة أعجبني شكله بعد ما ينحط و ملمسه، و أعتقد إن شكله النهائي يشبه كثير شكل الشفايف بعرض ميسوني. 

للي يبغى يجربها موجودة على أمازون ب 5.99 دولار بس لازم تكون شاري شيء ثاني من أمازون علشان يشحنونه لك.

Crazy Earring

عندي عادة ما أعرف إيش قصتها، حتى لو ما كنت أبغى أشتري شيء، ما أوقف عن تصفح مواقع البيع. و أكيد نيت أي بورتيه على رأس القائمة.ما أعرف متى هذا الشيء طلع عندي، بس من فترة و أنا حابة المجوهرات اللي أشكالها غريبة، ما أعرف ليه بس أحسها تعطي سعادة مضاعفة.

بعروض صيف و ربيع 2012 كانت الإكسسوارات بعرضين مرة مميزة، دولتشي آن قابانا بمجموعة من "المواد الغذائية" (باستا، ثوم، بصل، باذنجان) و واحد من الأشياء كان فلفل. شفت الفلفل عند نيت أي بورتيه، صحيح ظريف لكن حبيت "قرد" ميسوني أكثر. ميسوني طلعوا بحلقات تلبس على إذن وحدة بس عليها حيوانات منها عقرب و طير. عاجبني القرد مرة، و هذي وحدة من الأشياء اللي ما أعيي أنه أحد يعطيني إياها هدية D:.

 شرايكم بالمجوهرات الغريبة؟ و ممكن تلبسونها؟ وش عجبكم أكثر؟

Things to Invest in

كل يوم تقريبا من أسبوع يجيني إيميل من net-a-porter.com يذكروني بتخفيضات نهاية الموسم. بالسنوات اللي فاتت لاحظت أنه بالإنترنت تخفيضات نيت أي بورتيه زي العيد عند الناس الي يحبون الفاشن و الماركات الغالية. 

الصيف اللي فات خربت سيرفرات الموقع تقريبا و أنا أدور على فستان أقدر ألبسه لزواج ولد خالتي، و لا حصلت شيء يناسبني. السنه هذي للحق ما دورت على شيء و لا فكرت، لأني ما أحس أني أبغى أشتري أي شيء منهم. بس فيه أشياء عاجبتني لو قالوا لي خوذي أربع قطع من دون ما تدفعين و لا ريال، باختار هذولي. 

هو صراحة مو هذي الأشياء اللي أختارها، لأن عنوان التدوينة للأشياء اللي ممكن تشترينها بسعر غالي، و لا تطيح موضتها بكرا، و تقريبا تصير "قديمة" و لا تستاهل إنها تنلبس. فيعني من الآخر شيء تقريبا نقدر نقول أنك تستثمرين سعرها. (الأسعار اللي خاطتها فوق كلها بعد التخفيض).

البالطو، ما أعرف الكارديقان الملون هذا من ميسوني عاجبني مرة من العرض، ألوانه مرة حلوة، و أكثر شيء يعجبني بميسوني أن كثير من القطع، مو سهل تعرفين من أي موسم، فهي تقريبا أكثر قطعهم ما تصير "قديمة" أبدا. بصراحة النسخة اللي عاجبتني هي النسخة القصيرة (شوفوها هنا) بس هذي بعد حلوة.

الشيء الثاني اللي أكيد بانصح أي وحدة لو بغت تشتري شيء غالي تشتريه، هو كعب أسود، الكعب الأسود أظن أنه أقدم شيء بالتاريخ، و لا يطلع أبدا من الموضة، و يصلح من ملابس كثيرة (سهرة، و صباح)، الكعب هذا اللي من فونيه، عجبني مرة، خصوصا على عارضة الموقع (شيكوا عليه من الرابط). شكل الجزمة حلو، خصوصا أنه تقليدي تقريبا من قدام، بعدين من ورا جاي بكعب أبيض. 

يقولون الجزم هي الشنط الجديدة، مو يعني أنه يحط فيها شيء، بس تتذكرون قبل 3 سنوات و أكثر كل العالم كانت هابة بالشنط، الوقت هذا جا دور الجزم، علشان كذا أقترحت عليكم أكثر من جزمة. الشبشب هذا من ميو ميو عاجبني مرة، أحسه يجيب الانتعاش، الأهم و اللي أنا أحسه، أنه يتحمل كثير (خصوصا قاعدته خشب)، و يصلح ينلبس مع أشياء كثيرة، من طلعة عادية، لحفلة نهارية بسيطة، و بجو زي جونا تقريبا كل السنة صيف، ما راح أتحسف أجيبه.

آخر شيء الشنطة هذي من مارك جايكوبز، أعتقد أنه هذا الشكل من الشناط (سلسلة، و جلد أسود، و صغيرة) ماراح ينقرض أبدا، و الدليل شنطة شانيل مودموزيل، فإذا كانت شانيل بخاطرك، بس ما تقدرين على سعرها، بالنسبة لي هذي خيار مرة حلو، و عن ذوقي، أشوف إنها أحلى.

آخر شيء، على أنه نيت آي بورتيه ما يبيع أشياء رخيصة، بس الموقع هذا من أسهل المواقع الي تعاملت معها، يغلفون لك الشيء اللي شريتيه مجانا، يوصلون بسرعة، و أهم شيء أنه جدا متعاونين، مرة وصلني منهم عقد مكسور، بدلوه لي بسهولة، و من دون ازعاج. 

Perfect Look for Summer

فيه شيئين أنا طايحة فيهم الفترة هذي: ريتشيل زو (خلصت السيزون الأول و الثاني من ريتشل زو بروجيكت)، و الثانية هي بلايك لايفلي، بس تراي لسا ما انحدرت لمستوى GG لا تزعلون ياللي تشوفونه، بس عجزت أتحمل اتحمل تفاهته.
بلايك بالنسبة لي علي الأقل من الأشياء اللي شفتها إنها ما تعرف تمثل، بس صراحة البنت حلوة، و جسمها قاتل.

أنا مو من الناس اللي طايرين بستايل بلايك، و لا أنا بعد من اللي كل ما لبست شيء قاموا يعطونها دروس باللبس، و بعد ما تفرق بالنسبة لي كان عندها ستايليست أو لا (زي ما هي تقول)، لأني ما أشوف إن الموضوع يستاهل إني أفكر فيه أصلا.
ما يهم نرجع للموضوع الأصلي (زي دايم)، و ابغى أتكلم عن لبسها لجاي لينو ..
اللبس بالنسة لي بهذي الفترة يمثل كل شيء خاطري فيه، خاطري بقطعة من ميسوني، بس ما أعرف إيش، وش يستاهل قيمة مرتفعة؟ و أفكر إني أنتظر وش راح يسوون لتارقيت، يمكن يطلع معاهم أشياء حلوة، ينقدر عليها.
خاطري إني آصل لمجوهرات غالية و فخمة متى ما أبغى (تأثير ريتشيل زو)، البرنامج خلاني أقدر المجوهرات بشكل كبير، رغم إني ما أشتريها كثير، لأني ما أشوف إني "أحللها"، بس ودي كذا لما أشتهي أروح لمحل و أختار، و لا عندي مانع بكرا أرجعها لهم.
و أكثر شيء خاطري فيه، إني ألبس قطعة غالية بشكل كاجوال. مو رسمي.

أرجع للبسها بشكل عام، أعجبني مرة الفستان الميسوني الذهبي هذا، أعجبني إنها لبست تحته تانك أبيض، خلاه كاجوال، و أكيد غطى جزء من صدرها، خصوصا و إن الناس دايم ناقدين عليها قضية الصدر. أعجبني الصاندل الكعب اللي من كريستيان لوبيتن (يمكن أول مرة يعجبني شيء من لوبيتن بقوة) لونه مع هذا الفستان الذهبي الفاتح طالع حلو مرة، و الصندل مخلي اللبس كاجول، بنفس الوقت مو حق بحر أو شارع، الكعب يخليه لبس حفلات. أعجبني كثير إنها لبست مجوهرات (واضح) إنها غالية مرة، الفيروز طالع حلو، مع مجموعة الأساور الثانية.

مع المايك آب، و الشعر، أكيد أختار هذا اللوك أنه يكون أحسن خيار لحفلة بالصيف، تذكروا دايم أنه مو لازم تسوون نفس الشيء، يعني فستان بلون فاتح (ألوان طبيعية)، و من دون موديل معقد (من دون أكمام و قصير)، تانك أبيض، مجوهرات أو إكسسوارت كثيرة على يدك و ملونة، مايك آب خفيف، وايفز بسيطة، و صندل كعب بلون نيون، من أي ماركة، أي محل بيخليك حلوة زي بلايك.

Missoni for Target

اليوم قريت هذا الخبر عن أنه تارقيت بتسوي تعاون مع ميسوني، يطلعون مجموعة بأسعار مقبولة ... الخبر فرحني مو لأنه ميسوني بس، لأنه تارقيت بالنسبة لي من أحسن الناس اللي يسوون تعاون مع ماركات كبيرة، و الأهم أنه أسعارهم صدق مقبولة، مو تجي بـ 200 دولار أو شيء زي كذا.

المهم هذا التعاون خلاني أتكلم عن شيئين ... الأول الصورة اللي فوق و هي من الحملة الدعائية لميسوني، و اللي اختاروا وجه لها ليتين ميستر. عجبني الكمباين مرة، النوعية هذي من التصوير تعجبني، علشان كذا أخذت الصورة و لصقت عليها شعار تارقيت.
متحمسة أشوف وش راح تارقيت يسوون، أو وش ميسوني راح يسوون لتارقيت، لأنه قلت لكم زيليون مرة إنه من أكثر الأشياء اللي شريتها و أحبها هي تنورة من رودارتي فور تارقيت، و الشيء الثاني، يمكن أي أحد مهتم بالفاشن، يفكر لو مرة يقتني شيء من ميسوني مو بس لأنه عندهم ملابس منسوجة كل العالم يعرفونها بشكل الزقزاق، بس لأنه قطعهم بالنسبة لي timeless يعني ما تحس إن موضتها راحت.

المهم هذي فرصة إني اتكلم عن مجموعة خريف 2011 لميسوني. المجموعة أعجبتني مرة، خصوصا ألوانها و نقشاتها ... صحيح أنه نقشاتها و ألوانها ما كأنها خريف و شتاء، بس أنا ما تشكل عندي هذي الأشياء، بس يمكنها فكرة من ميسوني أنهم يطلعون الشخص اللي يلبسها من جو كآبة الشتاء :) و اللي يخليني ما أهتم، أحس أنه أحسن الملابس اللي تقدر تلبسها أي وقت، يعني ألبس فوقها كم قطعة تصير للشتاء، ألبسها لحالها تصير للصيف.

Layering

من زمان (يعني مو مره) بس كنت أحب هذا الشي، إني ألبس قطع كثير على بعض، أما الحين فأسلوبي باللبس ما قل و دل :) ... المهم الي بأقوله أنه هذا كا يعني إني ما أحب اللبس الطبقات لا أحبه خصوصا للبس الشتاء (أعرف إني غثيتكم بالشتاء و هو و لا حتى شمينا ريحته، بس وش أسوي كل المواقع و كل شي صار عن الخريف و الشتاء) طيب خلونا نرجع على اللبس نفسه ... اللبس الطبقات زي ما قلت لكم حلو للشتاء ما أعرف ليه، بس يعطيني شعور دفا، غير كذا، تغطي بشي علي شي ...

باللبس الي فوق لو كبرتوا الصورة بتلاحظون أنه أنا الي مركبة كل شي على بعض ... أساسا هم العارضات من عرض دولتشي آن قابانا للخريف بس جيت و لبستهم هذي الملابس عشانهم متفسخات قليلات الأدب P: لا بجد لأنه المايك آب من زمان عاجبني، و لأنهم لابسين بس بودي سوت فسهل إني أحط عليهم شي ثاني :)

كل اللكوين (يصلح كذا؟) يعني أزعم أنه ما فيه أحد يقرأ لي يقدر عليهم بس يعني هي الواحد هذي فرصته، أنه يتخيل من بعيد لبعيد .. :) هم كلهم أخذت قطعة من هذا اللوك لمارك جايكوب لمجموعة الخريف، طبعا قلت لكم قبل إني حابة هذا اللوك مرة، و لا عندي مانع آخذه بالضبط زي ما هو من فوق لتحت :) يعني لو مارك يقرأ ودي يتطمن ....

نبدأ من اليمين ... اليمن أخذت من اللوك حق مارك السويتير هذي، قلت لكم عجبتني مره كلاس، ألوانها حلوة، فتحة الرقبة جميلة ... و أهم شي إنها متمططة من تحت (لو كان عندي سويتير قديم كان خربتها بالموية و خليتها كذا، شكلي بافتش عند أمي)

بحياتي ما قد لبست تنورتين فوق بعض ... بس شكلي مستقبلا راح أفكر ... التنورة التحتية الدانتيل من بوربري برورزم ... التنورة حلوة، حلو يلبس معاها هوت بانت (لو أمك ما تهاوش) أو حتى ليقنق ... بس أنا فكرت إني أحطها تحت هذي التنورة الإرديم الي ما أقول إلا حسبي الله و نعم الوكيل ... طبعا الجزم و الشربات و الشنطة من دولتشي آن قابانا.

اليسار أخترت له من مارك التنورة ، لأنه ببساطة تجنن، مع التنورة فكرت له هذي البلوز من إيف سان لوغان ... نفس الشي شكلها و لونها و فتحتة الرقبة عاجبتني فوقها حطيت هذا الكارديقان الي من ميزوني (يالله الجنة بس) و كملت اللوك بالجزم الليبورد من كغيستيان لوبتين ...

إن شاء الله عجبتكم الطبقات ... و إن كان ممكن تلبسون زي كذا (طبعا مو زي الماركات بس فكرة الطبقات أو لا) :)