New Classic

قبل فترة شفت فيلم بلو جازمين (معلومة جانبية: عجبني) المهم بعد ما شفته قررت إني أروح أشوف فيلم I Am Love، الفيلم للي ما يعرفه هو فيلم إيطالي لتيلدا سوينتين. الفيلم من زمان نازل (مو بلو جازمين)، و أتذكر إني لما شفت الستيل حقات الفيلم تحمست له (تحمست حتى للملابس)، المهم بعد فترة شفت التريلير و خف حماسي و بعدها كل مرة أأجل المشاهدة . ما أعرف ليه كان ببالي أنه الستايل تيلدا سونتين و كايت بلانشيت بالفيلم متشابهين. بس طلعوا ما يتشابهون. الشبه الوحيد كلهم ثريات. 

Chic by dejavuar featuring a print pencil skirt

Carven print pencil skirt / Semi Couture sweater / Burberry ankle strap heel sandals / Yves Saint Laurent shoulder bag, $1,700 / Tom Binns pearl chain necklace, $785 / Tom Ford fragrance

بس الفيلمين أعطوني فكرة هذا السيت و هو لبس "الكلاس" أولا لازم أحط توضيح أنه لبسي مستحيل يكون كذا (مو أسعاره) صحيح ما أقدر على الأسعار، لكن قصدي حتى الشكل. و لأني ما أقدر أسوي شيء "ممل" قررت أحافظ على الفكرة نفسه، يعني مثلا أحس عقد لولو و تنورة بنسيل و كنزة كشمير، شيء أساسي بهذا اللوك. أول شيء جا ببالي هذي التنورة من كارفين اللي على شكل جلد غزال، من زمان عاجبتني و لقيتها فرصة إني أحطها بهذا السيت. الشيء الثاني قررت أختار هذا العقد اللولو اللي محيوس، أحس تعطي لمسة غير على هذا اللوك اللي مرة سلييك. قررت إني أختار ألوان خريفية و كلاسيكية و أهم شيء لقيتها فرصة إني أختار هذا العطر من توم فورد اللي اسمه "جازمين مسك" (ترا ما قصدت إني أربطها ببلو جازمين :P) بس لو ما حصل لكم أي شيء من هذا السيت روحوا و شموا العطر هذا عند باريس قاليري ريحته مره حلوة و يصلح هدية. 

Samples #4

أحس أنكم بتقولون بعد هذي المرحلة، طيب وش اللي مستعدة تشترينه P:؟ قلت لكم قبل إنه أغلب الأشياء اللي جالسة أجربها سعرها غالي، ما عندي استعداد أدفع ريال زيادة بشيء ما راح يفرق معاي. لأني زي أغلب الناس (أظن) أحتاج شيء يقنعني ليه أصرف فلوسي على شيء ما أضمن نتايجة بالمقابل أقدر أشتري بهذي الفلوس لبس أو مكياج أحبه :).

Korres Wild-Rose+Vitamin C

Advanced brightening sleeping facial 

زي كل الأشياء الثانية اللي تكلمت عنها كلها عينات و لا جربتها بالحجم الأصلي، بالنسبة لي أقدر أقول إنها كانت كمية كافية علشان أقرر إذا المنتج عجبني أو لا. 

بصراحة قبل لا أجرب هذا المنتج ما كان لي بالكريمات الليلية، أساسا ما أفهم هدفها (إلى الآن ما أعرف هدفها)، أعرف إنها بالعادة تكون أثقل من كريمات الصباح (اللي تطلعين للناس فيها) لكن هل فيه هدف معين أنه تحط بس بالليل، ما عندي فكرة. 

جربت هذا المنتج من كوريس، لأني سمعت كلام كثير عن جودة منتجات كوريس. صراحة بالبداية كنت أحسب أنه مرطب شفايف لما أخترته، لكن لما جيت أجربه قريت على العلبة قريت أنه كريم "ليلي" فكرته أنه يفتح البشرة و يعطيها لون واحد (زي كثير من الأشياء اللي أنا مهتمة بتجربتها) انبسطت و قلت خلني أشوف. أولا خليني أقولكم أنه أي شيء ورد أو زهر مبدئيا فايز بالنسبة لي على الأقل من ناحية الريحة :). من اسمه ورد بري ريحة الكريم مرة حلوة، ثقيل و كمية قليلة منه تكفي للوجه كامل. خليني أقولكم إني بعد ما غسلت وجهي وحطيته علشان أنام أول مرة أحس إني أنام كشخص راقي (من الريحة). لما قمت الصباح لقيت كثير من الحبوب اللي على جبهتي (تطلع لي حبوب صغيرة على جبهتي بعض المرات مع الحر) تقريبا اختفت. قلت يمكن من الكلنزير 

(كنت استخدم بيورتي ذاك الوقت) فقررت الليلة اللي بعدها ما استخدمه، ما شفت فرق، الليلية اللي بعدها قررت ما استخدم الكلنزير و أرجع للكريم، لما صحيت لقيت تقريبا كل الحبوب اختفت. 

بصراحة صرت أتحمس لروتين النوام علشانه، رحت أقرأ عن كوريس و عن فيتامين سي لأنه مكتوب على العلبة أنه معاه فيتامين سي. كوريس يقولون إن منتجاتهم طبيعية (بالنسبة لي هذا شيء مهم). و لما قريت عن فائدة فيتامين سي للبشرة، قريت أنه يرجع الكولاجين للبشرة (يعني مفيد علشان يخلي البشرة شابة) و يساعد على تجدد خلاياه.  

المنتج حجمه 40 مل و سعره 48 دولار يعني تقريبا 180 ريال. 

أعتقد مشكلتي الوحيدة معاه أنه الواحد يدخل أصبعه فيه، يعني مو عصار مشكلتي مع هذي الطريقة من التعليب أنه الواحد ممكن يآخذ كمية كثيرة من المنتج من دون فايدة، ممكن ينكب بسهولة، و ممكن يتوسخ أو يتجرثم. مع هذا مستعدة أشتريه، و أعتقد أني راح أحطه على قائمة الأشياء اللي ممكن أشتريها. 

آخر شيء أعتقد أنه هدية مرة حلوة لأمك مثلا أو أي أحد تعرفين أنه بينبسط على هذي الأشياء.

Wishlist

لو تلاحظون أني زدت بانر على اليمين مكتوب عليها قائمة الأمنيات. من أكثر من شهر و أنا مسوية هذا التمبلر، الفكرة الأساسية من الموضوع إني أحفظ روابط الأشياء اللي تعجبني بمكان واحد و مو على جهازي. ما أعرف ليه مع الوقت حسيت بالفخر منها (مبسوطة على الأشياء الموجودة). المهم صرت أضيف أشياء (و بعض المرات أحذف) من دون ما أفكر إن كانت راح تجيني أو لا، يكفي إنها موجودة قدامي بهذا التمبلر. 

ليه قررت إني أحطه هنا، غير إني أتمنى يجيني شيء من هذي الأشياء بعد فترة فكرت إنها قائمة حلوة للهدايا. (قلت لكم أكثر من مرة إني أحب أختار هدايا للناس). القائمة مو بس فيها أشياء لها علاقة بالفاشن، يعني ممكن كتب و ممكن أثاث. و أشياء غالية و أشياء مو غالية، باختصار القائمة فيها كل شيء يعجبني. 

زي ما قلت لكم القائمة تزيد و تنقص (لو بغيتوا تشيكون عليها) علشان تجبون لي هدية :P أو ممكن تعطيكم فكرة عن هدايا لأحد، أو حتى هدايا لأنفسكم تلقون الرابط هنا، ولو ضغطتوا على البانر الموجود على اليمين بيحولكم على تمبلر. كل شيء موجود بالقائمة بالسورس فيه المكان اللي ممكن تلقون فيه هذي الأشياء. (ترى مو لازم تفكرون تشترون شيء علشان تشيكون) شيكوا و قولوا لي رآيكم إذا فيه شيء عجبكم.  

لو عندكم قائمة أو تفكرون تسوون تمبلر فيها قائمة بالأشياء اللي تحبونها، لا تنسون تحطون رابط التمبلر هنا، لأني أحب أتفرج على الأشياء اللي الناس يحبونها، و اقتراحات الهدايا حقتهم. 

Celebrating Girlhood

أحب الهدايا، أكيد أحب تجيني، و أحب أعطيها (لو كان عندي فلوس:). أصعب شيء ممكن أسويه إني أعطي بنت "مراهقة" هدية، ما عمري عرفت وش ممكن يملأ عينهم ... (أختي وحده منهم). لكن الشيء اللي يسهل هذي المرة إني أعطي هدية لمراهقة، أنه الموضة هذا الصيف كلها تقريبا عن كل شيء بناتي. 

(كبروا الصورة، علشان تشوفون أسعار الأشياء)

أول شيء حاولت إني أخلي كل الأشياء ما تتجاوز 500 ريال، الشيء الثاني أخترت أشياء (زي جوسي كتور)، يمكن من قرن ما دخلتها أو فكرت أشتري شيء منها، لأني فيه شيء بالنسبة لي يحسسني إنه شوي تجاري (ما عليكم هذا شعوري الخاص)، لكن اليوم دخلته، و شفت عنده مجموعة تعليقات عجبني بعضها مرة، هي اللي خلتني أتحمس عن كتابة موضوع عن هدايا للمراهقات، خصوصا أنه جوسي تقريبا حلم كل بنت سعودية (هذي اللي أعرفه من اللي حولي :). 

الشيء الثاني اللي كان شاغلني من فترة هي بيلت فيها مكياج يصلح لبنات ما بين (16- 20)، شيء ممكن يكون فيه كل شيء، لو كنت أنا راح أصمم بليت، ممكن أحط فيها عينات من أرواج من رافيلون، ماسكارا من ماكس فاكتور و كحل من كليرز (طبعا كل اللي أخترتها ماركات رخيصة علشان يصير سعرها مقبول، و ممكن كثير يشرون منه كهدية، أو لهم)، المشكلة إني ما لقيت شيء زي كذا، كل الأشياء اللي لقيتها ما تناسب، و أكثر الباليتات اللي شفتها كانت للظل، قليل شيء فيه أرواج، و زين. لكن آخر شيء حصلت هذي الباليت من بوبي بروان فيها روج بدرجتين وردية مختلفات، قلوس، و ألوان محايدة و مافيها لمعة للظل. 

أخترت مناكير من رافيلون غير لأنه رخيص عاجبتني كثير ألوان مانكيرهم و شكلها النهائي، و خصوصا ألوان الباستيل (تلقونها بالستاند حقهم) منها هذا الأخضر الفستقي. 

باقي الأشياء أخترت التي من توب شوب تصميم ميديم كيرشوف بمناسبة 10 سنوات من تعاون توب شوب مع مصممين بريطانيين، لأنه عاجبني مرة، و أتمنى لو كان موجود علشان أشتريه. الطوق لأنه عجبني حسيته يصلح حفلات، و لأنه كان بكثير من العروض، و أكثر من سلبرتي لبسته على الريد كاربيت، و آخر شيء هذا الغطاء لأنه الحين أظن تقريبا ما فيه بيت إلا عندهم شيء من مجموعة أبل (أيبود/آيفون/آيباد)، قد طلبت من الموقع و صلني غطاء بلاستيكي، طبعاته مرة حلوة، و لا راحت، مع إني شاريته أكثر من 3 شهور. 

مو شرط تشترون نفس الأشياء، بس إن شاء الله أكون أعطيتكم فكرة، عن وش ممكن تشترون لبنت عندكم تبغون تعطونها هدية، أو حتى لو تبغين تعطين نفسك. 

French Manicure Kit

نرجع مرة ثانية لهوسي بمنتجات التجميل، و محلات المكياج، قلت لكم إني أكثر من مرة إني أحب أدخل محلات المكياج و أحوس فيها و أكتشف الأشياء اللي "أظن" إنها جديدة. 

لما وقفت عند ستاند ريفيلون شفت هذا الكيت لثلاثة مناكير، يسوى منها مناكير فرنسي ... زي ما تشوفون الكيت فيه أبيض، و شفاف و هذا اللون اللحمي ... عجبني فكرته (بعد تراني ما قد سويت مناكير فرنسي إلا مرة وحدة بحياتي)، لكن أعجبتني فكرته كهدية، ما أدري إذا قد قلت لكم هذا الشيء من قبل أو لا، بس أحب الهدايا (أكيد لما أحد يعطني إياها)، و بعد أحب أفكر بأشياء ممكن تصير هدايا، غير الأشياء اللي كل العالم تعطيها. 

الكيت هذا غير المناكير الثلاثة هذي، يجي معاها شيء زي اللصق علشان تقدرين تسوين خط أبيض أعلى الظفر، هذا كله بـ 64 ريال، يعني تقدرون تحطونها تحت قائمة هدايا بأقل من 100 ريال، و بعد تقدرون تشترونها "تدلعون" فيها أنفسكم. ما أعرف ليه بس الفترة الأخيرة هذي أحس إني ودي أكون طول الوقت عايشة كأني بسبا، أقنعة ... مناكير، زيوت، مساج، أي شيء يحسسني إني بإجازة طويلة، حتى لو ما كنت بإجازة :). 

Soap & Glory Is Here

بالصدفة يمكن على بداية هذا الصيف تعرفت على هذي الماركة البريطانية (تعرفت عليها نظريا)، يعني ما جربتها، و لا شفتها قدامي، كل اللي عرفته عنها بالنت. اللي خلاني أتمنى إني أجربها، هي طريقة تعليبها، أعترف إن عندي نقطة ضعف تجاه التعليب، ممكن أشتري شيء، بس لأن علبته حلوة :) آخرتها مرطب شفايف (اللي ما أعترف فيها، و أظن إن السعابيل أحسن مرطب شفايف بالعالم)، لكن علبته أغرتني بشراءه :).

قلت لكم أول مرة تعرفت على الماركة كان بالنت من موقع سيفورا، رحت لسيفورا اللي عندنا ما لقيتها، و لا لقيتها بسيفورات ثانية مثل البحرين و الإمارات، و لأنه ممنوع شحن السوائل للسعودية، قررت إني أبلع العافية، و أشوف لي مكان ثاني غير النت و سيفورا. 

دخلت على موقعهم، و لقيت أنهم ببريطانيا يبيعونها بصيدليات بوتز. قررت إني أروح لبوتز عندنا، درت ما لقيت سألت الصيدلي اللي موجود فيها، و قال لي: راح تيجي إن شاء الله. هذا الكلام يمكن قبل ثلاثة شهور أو أكثر. 

قبل أسبوع رحت لفرع ثاني لبوتز، و رغم إني ما شفت أي شيء للماركة معروض، أختي قالت لي أسأل الصيدلي، هذي المرة قال لي: المفروض إنها جاية، قريب، بس عندنا حاجة وحدة وصلت. الشيء اللي كان عنده هو جيل شاور، شميت ريحته و أعجبتني، حتى إنها تطول ما تروح عن الجسم. 

ما أعرف متى راح تجي باقي الأغراض، بس تقدرون تشيكون عليها هنا بموقعهم. قلت لكم شميت ريحة واحد منهم و كان حلو، فازوا بجوائز كثيرة على مستوى العالم لمنتجات العناية بالبشرة، أسعارهم معقولة، و أهم شيء لأن تعليبهم حلو، يصلح تقدمينها هدية لشخص مثل أختك، خالتك صديقتك، حتي ممكن تقدمينها لي P:. 

Things to Invest in

كل يوم تقريبا من أسبوع يجيني إيميل من net-a-porter.com يذكروني بتخفيضات نهاية الموسم. بالسنوات اللي فاتت لاحظت أنه بالإنترنت تخفيضات نيت أي بورتيه زي العيد عند الناس الي يحبون الفاشن و الماركات الغالية. 

الصيف اللي فات خربت سيرفرات الموقع تقريبا و أنا أدور على فستان أقدر ألبسه لزواج ولد خالتي، و لا حصلت شيء يناسبني. السنه هذي للحق ما دورت على شيء و لا فكرت، لأني ما أحس أني أبغى أشتري أي شيء منهم. بس فيه أشياء عاجبتني لو قالوا لي خوذي أربع قطع من دون ما تدفعين و لا ريال، باختار هذولي. 

هو صراحة مو هذي الأشياء اللي أختارها، لأن عنوان التدوينة للأشياء اللي ممكن تشترينها بسعر غالي، و لا تطيح موضتها بكرا، و تقريبا تصير "قديمة" و لا تستاهل إنها تنلبس. فيعني من الآخر شيء تقريبا نقدر نقول أنك تستثمرين سعرها. (الأسعار اللي خاطتها فوق كلها بعد التخفيض).

البالطو، ما أعرف الكارديقان الملون هذا من ميسوني عاجبني مرة من العرض، ألوانه مرة حلوة، و أكثر شيء يعجبني بميسوني أن كثير من القطع، مو سهل تعرفين من أي موسم، فهي تقريبا أكثر قطعهم ما تصير "قديمة" أبدا. بصراحة النسخة اللي عاجبتني هي النسخة القصيرة (شوفوها هنا) بس هذي بعد حلوة.

الشيء الثاني اللي أكيد بانصح أي وحدة لو بغت تشتري شيء غالي تشتريه، هو كعب أسود، الكعب الأسود أظن أنه أقدم شيء بالتاريخ، و لا يطلع أبدا من الموضة، و يصلح من ملابس كثيرة (سهرة، و صباح)، الكعب هذا اللي من فونيه، عجبني مرة، خصوصا على عارضة الموقع (شيكوا عليه من الرابط). شكل الجزمة حلو، خصوصا أنه تقليدي تقريبا من قدام، بعدين من ورا جاي بكعب أبيض. 

يقولون الجزم هي الشنط الجديدة، مو يعني أنه يحط فيها شيء، بس تتذكرون قبل 3 سنوات و أكثر كل العالم كانت هابة بالشنط، الوقت هذا جا دور الجزم، علشان كذا أقترحت عليكم أكثر من جزمة. الشبشب هذا من ميو ميو عاجبني مرة، أحسه يجيب الانتعاش، الأهم و اللي أنا أحسه، أنه يتحمل كثير (خصوصا قاعدته خشب)، و يصلح ينلبس مع أشياء كثيرة، من طلعة عادية، لحفلة نهارية بسيطة، و بجو زي جونا تقريبا كل السنة صيف، ما راح أتحسف أجيبه.

آخر شيء الشنطة هذي من مارك جايكوبز، أعتقد أنه هذا الشكل من الشناط (سلسلة، و جلد أسود، و صغيرة) ماراح ينقرض أبدا، و الدليل شنطة شانيل مودموزيل، فإذا كانت شانيل بخاطرك، بس ما تقدرين على سعرها، بالنسبة لي هذي خيار مرة حلو، و عن ذوقي، أشوف إنها أحلى.

آخر شيء، على أنه نيت آي بورتيه ما يبيع أشياء رخيصة، بس الموقع هذا من أسهل المواقع الي تعاملت معها، يغلفون لك الشيء اللي شريتيه مجانا، يوصلون بسرعة، و أهم شيء أنه جدا متعاونين، مرة وصلني منهم عقد مكسور، بدلوه لي بسهولة، و من دون ازعاج. 

Lace as a Gift

مو شيء جديد إني أحب الدانتيل مرة، و صعب إني أقاوم الدانتيل لما أشوفه، مو لدرجة إني أشتري أي شيء دانتيل، بس لما أشوف صور عليها دانتيل غصب علي أتمقل فيها إلا غصب أشوفها حلوة.

لما شفت الصورة هذي من باكستايج عرض جايسون وو، جتني رغبة شديدة إني أكتب عن أي شيء كان فيه دانتيل و أعجبني.

بعرض جايسون كان فيه أكثر من قطعة من الدانتيل، أو عليها دانتيل، بس أكثر شيء أعجبني كان هذا الماسك، اللي ودي يعرض للبيع، لو ما شريته.

الفكرة اللي جت ببالي هي أنه هدايا فيها دانتيل أو تشبه الدانتيل. خصوصا أنه قربت نهاية السنة، فاللي بيجيب هدية لأحد بيتخرج، أو بيتزوج.

أنا بالنسبة لي الهدية عذاب، تجيني مية فكرة، شيء يعجبني و يعجب اللي بأعطيه الهدية، و بيستفيد منها أولا، سعرها أكيد و على قولتهم: عد و اغلط من الأفكار اللي تجي براسي لما أفكر أجيب هدية.

الفكرة جتني هو لما شفت التاتو المؤقت اللي على شكل دانتيل (ما أعرف يطبع أو قماش يتلصق)، أولا أنا ما أحب التاتو و لا أفهم كيف أحد يرسم على جسمه للأبد و أكثر المرات رسمات مالها داعي، بس أشتهي بعض المرات نقش حنا حلو، المشكلة ما عندنا أحد ينقش زين، و أي فكرة نقش مرتبطة بأقرب شيء بتذكرة لدبي (حتى دبي نقاشاتها مو رخاص، و نماذجهم ثابته) يعني ما أقدر أجيب لهم صورة دانتيل و أقول سوو لي زيه.
طبعا تذكرت الخاتم اللي عاجبني مرة، و هو بعد على شكل دانتيل، و قد تكلمت عنه قبل بالخواتم و الأبراج.
و أنا أفتش شفت هذا الفستان التي شيرت من مارك باي مارك و عليه طبعات دانتيل أعجبني بعد، مع جاكيت أسود بيطلع مرة حلو.
آخر شيء هذا العقد ، أعرف أنه مو رخيص، بس شكله ظريف، و إن كانت البنت اللي تفكرون تهدونها تستاهل (سعرها مو رخيص)، و تقبل الأشياء الغريبة.