101 Skin Care

قلت لكم أكثر من مرة ما أدعي إني خبيرة مكياج أو عناية بالبشرة، بس إني أحبهم و مهتمه فيهم لنفسي. لكن الفترة الأخيرة جتني أسأله من الناس اللي حولي عن كيف أعتني ببشرتي، و صراحة إلى قبل ما تجيني الأسئلة هذي و أنا كنت أعتقد إن اللي أسويه، كل الناس تسويه. بس هذي بعض الأساسيات اللي (أن أعتقد إنها من أساسيات العناية بالبشرة).

• أولا: أي بشرة من أي نوع، جافة أو دهنية، تحتاج مرطب بشرة.
• ثانيا: قبل استخدام أي منتج عناية بالبشرة (كريم ترطيب، سيريم، أو زيت) لازم البشرة تكون نظيفة. اشتري لك كلنزير أو غسول وجه مناسب لبشرتك، المفترض الغسول ما يخلي بشرتك تتحسس، أي منتج عناية بالبشرة، يخلي بشرتك تطلع حبوب، أو بقع حمراء، أو أي نتيجة تحسين إنها سلبية، وقفي تستخدمينه، إذا شيء زين لبشرتك المفروض ما يأثر عليها بشكل سلبي حتى لو قال لك أحد إنه دليل إن المنتج قاعد يتفاعل مع بشرتك، صحيح يتفاعل بس بشكل سلبي.
• ثالثا: التونر مو كلنزر و لا هو منتج لتنظيف البشرة، التونر من اسمه "معالج أو مناغم". إذا كنت بتستخدمين تونر (هو فقرة جيدة) استخدميه بعد الكلنزر أو الغسول، لأنه يساعد بمعالجة البشرة بعد ما غسلت عنه كل هذي الأشياء اللي كانت عليها.
• رابعا: ما يحتاج يكون عليك مكياج علشان تغسلين وجهك بكلنزر أو غسول، (أكيد لما يكون عليك مكياج لازم تشيلينه). بس الغبار و الدهون الطبيعية اللي يطلعها الوجه و العرق، و كل الأشياء الموجودة بالجو لازم تنظفين وجهك منها.
• خمسة: واضحة من الفقرة اللي فاتت، بس أبدا، أبدا لا تنامين بمكياج، وجهك يحتاج يتنفس، و المكياج مليان مركبات كيمائية ما أظن تبغين تتركينها على وجهك أكثر مما تركتيها قبل.
• ستة: تنظيف الوجه بالكلنز مو بس بالليل، حتى الصباح بعد ما تقومين، و نفس الشيء لا تنسين مرطب للبشرة (لما تآخذين كل هذي الزيوت من بشرتك، بشرتك تحتاج رطوبة أو بيصير غيه ردة فعل عكسية و بتنتج دهون مضاعفة و ممكن تطلع حبوب أكثر).
• سبعة: أشتري قناع وجه (طيني) على الأغلب علشان تنقين وجهك من هذي الحبوب لو طلعت، لا تحرشينها و بنفس الوقت لا تتجاهلينها.
• ثمانية: شوفي لك كريم تفتيح بقع ينفع لبشرتك، لا تفقدين الأمل إنك بتلقين واحد، و لو لقيتي شيء يصلح، لا تستخسرين فيه فلوسك، لأنه بيساعد بإزالة آثار الحبة.
• تسعة: حطي على وجهك واقي شمس، غير إن الشمس تهلك البشرة، و فيها أشعة ضارة ممكن تسبب سرطان الجلد (و فيها ڤايتمين دي بعد يعني مو سيئة)، بس مع الشمس البقع اللي بوجهك (آثار حبوب، أو أي تبقيع) تغمق زيادة مع الشمس).
• عشرة: حتى واقي الشمس يحتاج يغسل بآخر اليوم بعد. و أهم شيء أعرفي بشرتك، أعرفي وش ينفع لها ووش ما ينفع لها، لا توقفين تجربين، و دايم اسمعي للناس اللي حولك و تعتقدين إن بشراتهم تشبه بشرتك.

 بالمناسبة، الصورة الي فوق غلاف مجلة فوق البريطانية، للعارضة الأمريكية كريستي تالينقتون. صراحة الغلاف من فترة عاجبني و أدور سبب إني أحطه. عاجبني إنها حلوة و وجهها و بشرتها حلوات من دون ما تحاول تصير أصغر. علشان كذا أعتقد إنها صورة مناسبة للموضوع. 

لكن أهم شيء إني أكون قلت لكم شيء مفيد، و يمكن جديد، و إذا مو جديد على الأقل مو ممل. 

Skincare

طلبت مني خولة إني أقول عن كريمات طبيعية، بصراحة أعتقد إن روتين العناية بالبشرة حقي جدا متواضع بالنسبة لبعض الناس. بشرتي مو أحسن بشرة بالعالم الحمدلله مافيها حبوب، لكن لونها مو واحد. فكرتي الوحيدة بالعناية بالبشرة، لا تخلينها تنشف و لا تتركينها من دون تنظيف. 

طبعا لازم تعرفون إن بشرتي تميل للدهنية، يعني ممكن الأشياء اللي أقولها ما تنفع لك أبدا. الأشياء اللي موجودة بالصورة هي اللي الحين أستخدمها بشكل أساسي. يمكن الشيء اللي أعتقد إنه المفروض كل وحدة تسوية هو رقم (1) هي تستخدم شيء ما أعرف وش يسمونه، لكن اللي عندي اسمه softining lotion أو كريم تنعيم. اللي عندي الآن من إيستي لودير، صراحة ما أتذكر سعره لأني شريته من قبل سنة لكن لما بحثت عنه علشان أكتب لكم عنه لقيت أنه ب 50 دولار (أعرف مو رخيص) لكن مو هو الوحيد بالسوق. كنت قبله استخدم كلنيك (ما تركت كلينيك علشانه سيء، لكن ما لقيته لما بغيت أشتري من جديد، و كنت مستعجلة شوي) المهم فيه بعد عند كلارينز، كلها تتراوح بين 12 و 20 دولار (لسا مو رخيص) لكني للأسف ما أعرف ماركات أرخص تسوي هذا الشيء (اللي هو اللوشين السايل) مرات يسمونه toning lotion. ما أبغى أطول عليكم بموضوع اللوشن هذا، لكن أقولكم ما أعرف مين أحسن، ما فرقت معاي كثير بين أستي (اللي فيه ذهب) و بين كلنيك، بس ريحة أستي لودير عجتني أكثر. طبعا كل اللي تسوينه تحطينه على قطنة (موجودة بكل صيدلية) و تمسحين وجهك فيه قبل لا تنامين أو قبل المكياج، بعد المكياج و بتتفاجأين من حجم القذارة اللي بتطلع من وجك (كل مرة بتتفاجأين) :) الشيء اللي بتحسينه غير النظافة إن بشرتك نشفت. 

رقم (2) بعد من إستي لودير قد تكلمت لكم عنه، ما أظن كل وحدة تحتاجة لكن أنا أحتاج شيء زي كذا، هو كريم المفروض أنه يوحد لون البشرة (بشرتي زي ما قلت لكم فيها مناطق أغمق من مناطق). ما أشوف أنه أبدا فادني، لكن ما رميته لأنه غالي، بس أكيد بأشوف شيء غيره لما أخلص منه. 

بعد كذا رقم (3) استخدم mousrizer لأن زي ما قلت لكم البشرة تنشف بعد اللوشين السايل. و على تعليمات حق توحيد لون البشرة لازم أستخدمه قبل الموسترايز، لأنه يبدو إن الموسترايز يسوي طبقة فما تستفيد البشرة من الأشياء اللي تنحط عليه. الموسترايزر اللي عندي (بعد ما عجبني مرة) يمكن ريحته هي السبب من جيرجينز اسمه natural glow ما أعرف وصل السعودية أو لا، كنت أسمع عنه قبل ما أجي هنا لأمريكا، و اعتقدت أنه بيكون أعظم اختراع بالعالم، لكن لما جربته أشوف أنه جدا عادي، كنت أدور على موسترايز، بنفس الوقت فيه SPF (واقي شمس) علشان ما أكثر حوسة و هذا الشيء الجيد فيه، لكن أنه يعطيك لون زي ما يقولون، أبدا ما أعطاني أي لون. 

قبل كنت أستخدم بعد من استي لودير (سامبل) اسمه DayWear مرة خفيف، ريحته حلوة، و فيه SPF بس غالي (السامبل كان هدية) فقررت أجرب غيره. 

آخر شيء رقم (4) (مو دايم أحطه) لو كان الجو حر، أو كنت أحس المكياج ثقيل على وجهي أبخ على وجهي (عند بعد شوي) من هذا البخاخ اللي فيه موية ورد مخففة بموية. 

باختصار هذا اللي أسويه، من فترة لفترة ممكن أسوي لوجهي قناع كنت أستخدم قناع من soap & glory لما باعوه عندنا لفترة مرة قصيرة أسمه scrub your nose أعرف إن أسمه ما يشجع، بس أنه ينظف من الحبوب السوداء، ما أعرف رجع أو ما رجع بس فيه عند نزيه ماسكات كثيرة، لو بغيتوا تجربون. 

آي شيء أجربه و أعتقد أنه مميز راح أقول لكم إن شاء الله عنه. أتمنى إن اللي كتبته مفيد، ولو تعرفون شيء ممكن يفيدني بدل الأشياء أو مع الأشياء اللي عندي قولوا لي. 

Soap & Glory Is Here

بالصدفة يمكن على بداية هذا الصيف تعرفت على هذي الماركة البريطانية (تعرفت عليها نظريا)، يعني ما جربتها، و لا شفتها قدامي، كل اللي عرفته عنها بالنت. اللي خلاني أتمنى إني أجربها، هي طريقة تعليبها، أعترف إن عندي نقطة ضعف تجاه التعليب، ممكن أشتري شيء، بس لأن علبته حلوة :) آخرتها مرطب شفايف (اللي ما أعترف فيها، و أظن إن السعابيل أحسن مرطب شفايف بالعالم)، لكن علبته أغرتني بشراءه :).

قلت لكم أول مرة تعرفت على الماركة كان بالنت من موقع سيفورا، رحت لسيفورا اللي عندنا ما لقيتها، و لا لقيتها بسيفورات ثانية مثل البحرين و الإمارات، و لأنه ممنوع شحن السوائل للسعودية، قررت إني أبلع العافية، و أشوف لي مكان ثاني غير النت و سيفورا. 

دخلت على موقعهم، و لقيت أنهم ببريطانيا يبيعونها بصيدليات بوتز. قررت إني أروح لبوتز عندنا، درت ما لقيت سألت الصيدلي اللي موجود فيها، و قال لي: راح تيجي إن شاء الله. هذا الكلام يمكن قبل ثلاثة شهور أو أكثر. 

قبل أسبوع رحت لفرع ثاني لبوتز، و رغم إني ما شفت أي شيء للماركة معروض، أختي قالت لي أسأل الصيدلي، هذي المرة قال لي: المفروض إنها جاية، قريب، بس عندنا حاجة وحدة وصلت. الشيء اللي كان عنده هو جيل شاور، شميت ريحته و أعجبتني، حتى إنها تطول ما تروح عن الجسم. 

ما أعرف متى راح تجي باقي الأغراض، بس تقدرون تشيكون عليها هنا بموقعهم. قلت لكم شميت ريحة واحد منهم و كان حلو، فازوا بجوائز كثيرة على مستوى العالم لمنتجات العناية بالبشرة، أسعارهم معقولة، و أهم شيء لأن تعليبهم حلو، يصلح تقدمينها هدية لشخص مثل أختك، خالتك صديقتك، حتي ممكن تقدمينها لي P:.