Samples #9

هذي المرة باتكلم عن شيئين يجون مع بعض، أو المفروض أنهم يكونون مع بعض، الأول مستحضر للشعر، و الثاني للبشرة. زي كل العالم ممكن النتايج تكون عليكم مختلفة، بس أنا أحب قبل ما أشتري شيء (بذات لما ما يكون رخيص) أعرف رأي الناس فيه، و كثير مرات أقتنع بكلامهم.

BUMBLE AND BUMBLE Surf Shampoo & Conditioner

للي مهتمين بأشياء التجميل، و متابعين يمكن سمعوا كثير عن بمبل آن بمبل، بذات خط "سيرف"، تجربتي الأولى مع بمبل آن بمبل، ما كانت مميزة مرة، و لا تحمست أشوف أشياء ثانية منهم، لكن من كلام الناس عن سيرف، قررت أجرب عينة منه. بس علشان يكون عندكم فكرة عن المنتج قبل لا أكمل للي ما يعرف، هو المفترض يعطيك التأثير اللي يصير لشعرك مع السباحة بالبحر. صراحة أنا ما أعرف وش يتكلمون عنه، اللي أعرف إن شعري مع البحر و الرطوبة ينتفش، و يصير أفرو، بس مو أفرو ظريف أبدا. لما جربت هذولا الإثنين شعري كورلي/ويفي أحس أنه حافظ على شكل شعري بشكل حلو و لا خلاه كأنه شعر محتاس. اللي أظنه مو متأكدة إن المنتج فيه ملح بحر، فخلى شعري شوي يابس (كأنه عليه سبري) بس من دون ما يكون ناشف من دون حركة، بس شيء يخليه يمسك الشكل. 

الشامبو ب 24 دولار، و البلسم ب 26 دولار، ل 250 مل، أعتقد لو كنت بأداوم و أقابل ناس يوميا بشعر مفكوك (مفلول) أظن أنه يستاهل سعره، أو للي عندها شعر كورلي، و تحب لفاته و تبغى تحافظ على شكلها كل يوم. 

PHILOSOPHY Hope in a Jar Day & Night 

ما راح أطول بهذا، قلت لكم كل شخص مختلف، هذي ثاني تجربة لي مع منتجات فيلوسفي، و لا أعجبتني، فيها شيء صناعي مرة، لما أحط شيء على وجهي، أبغى أحس أنه طبيعي، ما أتذكر أي واحد فيهم كريم الليل أو النهار، بس ريحته كانت مرة سيئة، و لا شفت شيء مختلف و لا ترطيب، كريم النهار ب 42 دولار و كريم لليل ب 50 دولار لحوالي 60 مل للسعر نفسه أو أرخص بعد أدفع لكوريس، أولا لأن منتجاتهم إلى نسبة كبيرة طبيعية، و ثانيا ريحتها حلوة، و الأهم إني شفت نتايج. 

كل المنتجين موجودين عند سيفورا.كم، مو متأكدة كل محلات سيفورا بالعالم (السعودية خصوصا) تبيعها أو لا. 

Sample #8

هذي المرة بعد باكتب رأيي بشيئين، الأول مسكارا ذير رييل من بينيفيت. و الثاني كلنزر من فريش، للي ما يعرف فريش، قد مدحت مرطب الشفايف حقهم قبل، و صراحة أعتقد أنه هدية مرة حلوة لأي أحد بأي سن. خلونا نبدأ بالمراجعات:

BENEFIT COSMETICS They're Real! Mascara

أقدر أقول إني محظوظة إني من فترة مرة طويلة ما شريت أي ماسكارا، أنا بصراحة ناوية لو تخلص أو تنشف المسكارات اللي عندي راح أشتري شيء رخيص، و خصوصا حاطة ببالي شيء من فيزشين فورميلا، لكن من سنة و أكثر شوي و أنا بس أحصل عينات دليوكس لمسكارات هاي إيند، آخر وحدة شريتها كانت من أيكيو، و لا عجبتني، و قبلها كنت أشتري ديور شو، و لا أشوف إنها مميزة بأي شكل. 

المرة هذي حصل و جربت عينة من ذير رييل من بينفيت، ما راح أتكلم لكم كأني فاهمة بالمسكارات و الأشياء هذي، لكن باتكلم عن الشيء اللي حسيته. أهم شيء مختلف حسيته، هو الفرشة حقت الماسكارا، ما أعرف من إيش مصنوعة، بس إنها مرة حادة أو قاسية ما أعرف كيف أصفها، بس ما قد شفتها بأي ماسكارا قبل، أعتقد إنها ميزة، لأنه تخلي الرموش مرة متفرقة، و لا يتكتل عليها الماسكارا (ما أحب التكتل، سمعت أنه فيه ناس يحبون) لو بغيتوا شيء يطول الرموش من دون ما يكتلها أكيد أنصحكم تجربون هذي. سعرها تقريبا 86 ريال، بس أتوقع بتكون بالمحلات بالسعودية أغلى (علموني لو عرفتوا كم سعرها).

FRESH Soy Face Cleanser

الشيء الثاني على عكس المرطب اللي منهم و عكس الماسكارا ما عجبتني أبدا، مو أبدا أبدا، بس أنه مكتوب على العلبة إنها للوجه و العين، و بعد مكتوب على العينة و بموقع سيفورا أنه يشيل حتى الماسكارا. استخدمته و أوجع عيني مرة، ريحته غريبة شوي، بس عادي ما تعلق يعني مو قوية، بعد كاتبين أنه مرطب، ما شفت أنه رطب، لكنه ما نشف. بالنسبة لي بشكل عام، مو مستعدة أدفع لكلنزر غالي، ما أعرف إيش المكونات اللي فيه، و أنا أقدر أشيل المكياج بزيت طبيعي أفود لي و أرخص. سعر العلبة اللي مقاسها 150 مل ب 142 ريال. 

Samples #4

أحس أنكم بتقولون بعد هذي المرحلة، طيب وش اللي مستعدة تشترينه P:؟ قلت لكم قبل إنه أغلب الأشياء اللي جالسة أجربها سعرها غالي، ما عندي استعداد أدفع ريال زيادة بشيء ما راح يفرق معاي. لأني زي أغلب الناس (أظن) أحتاج شيء يقنعني ليه أصرف فلوسي على شيء ما أضمن نتايجة بالمقابل أقدر أشتري بهذي الفلوس لبس أو مكياج أحبه :).

Korres Wild-Rose+Vitamin C

Advanced brightening sleeping facial 

زي كل الأشياء الثانية اللي تكلمت عنها كلها عينات و لا جربتها بالحجم الأصلي، بالنسبة لي أقدر أقول إنها كانت كمية كافية علشان أقرر إذا المنتج عجبني أو لا. 

بصراحة قبل لا أجرب هذا المنتج ما كان لي بالكريمات الليلية، أساسا ما أفهم هدفها (إلى الآن ما أعرف هدفها)، أعرف إنها بالعادة تكون أثقل من كريمات الصباح (اللي تطلعين للناس فيها) لكن هل فيه هدف معين أنه تحط بس بالليل، ما عندي فكرة. 

جربت هذا المنتج من كوريس، لأني سمعت كلام كثير عن جودة منتجات كوريس. صراحة بالبداية كنت أحسب أنه مرطب شفايف لما أخترته، لكن لما جيت أجربه قريت على العلبة قريت أنه كريم "ليلي" فكرته أنه يفتح البشرة و يعطيها لون واحد (زي كثير من الأشياء اللي أنا مهتمة بتجربتها) انبسطت و قلت خلني أشوف. أولا خليني أقولكم أنه أي شيء ورد أو زهر مبدئيا فايز بالنسبة لي على الأقل من ناحية الريحة :). من اسمه ورد بري ريحة الكريم مرة حلوة، ثقيل و كمية قليلة منه تكفي للوجه كامل. خليني أقولكم إني بعد ما غسلت وجهي وحطيته علشان أنام أول مرة أحس إني أنام كشخص راقي (من الريحة). لما قمت الصباح لقيت كثير من الحبوب اللي على جبهتي (تطلع لي حبوب صغيرة على جبهتي بعض المرات مع الحر) تقريبا اختفت. قلت يمكن من الكلنزير 

(كنت استخدم بيورتي ذاك الوقت) فقررت الليلة اللي بعدها ما استخدمه، ما شفت فرق، الليلية اللي بعدها قررت ما استخدم الكلنزير و أرجع للكريم، لما صحيت لقيت تقريبا كل الحبوب اختفت. 

بصراحة صرت أتحمس لروتين النوام علشانه، رحت أقرأ عن كوريس و عن فيتامين سي لأنه مكتوب على العلبة أنه معاه فيتامين سي. كوريس يقولون إن منتجاتهم طبيعية (بالنسبة لي هذا شيء مهم). و لما قريت عن فائدة فيتامين سي للبشرة، قريت أنه يرجع الكولاجين للبشرة (يعني مفيد علشان يخلي البشرة شابة) و يساعد على تجدد خلاياه.  

المنتج حجمه 40 مل و سعره 48 دولار يعني تقريبا 180 ريال. 

أعتقد مشكلتي الوحيدة معاه أنه الواحد يدخل أصبعه فيه، يعني مو عصار مشكلتي مع هذي الطريقة من التعليب أنه الواحد ممكن يآخذ كمية كثيرة من المنتج من دون فايدة، ممكن ينكب بسهولة، و ممكن يتوسخ أو يتجرثم. مع هذا مستعدة أشتريه، و أعتقد أني راح أحطه على قائمة الأشياء اللي ممكن أشتريها. 

آخر شيء أعتقد أنه هدية مرة حلوة لأمك مثلا أو أي أحد تعرفين أنه بينبسط على هذي الأشياء.

Samples #3

هذي المرة قررت إني أحط أكثر من منتج بريفيو واحد. السبب إنه ما فيه كلام كثير أتكلم فيها عن المنتجات هذي. ممكن أقدر أختصر كلامي عنها إني ما حسيت فرق أو فرق كبير. ما أقدر أقول إن الكلام هذا ينطبق على كل الناس، لكن زي كل ريفيو لمنتج، هذا رأيي فيه.
كل الثلاثة منتجات، منتجات عناية بالبشرة (الإثنين اللي على اليمين كلينزرز) و اللي على اليسار سيروم لتفيتح البشرة. و معالجة التبقيع اللي يطلع عند بعض الناس. 

Philosophy Purity Made Simple 

Facial Cleanser
&
Jack Black
Pure Clean Daily Facial Cleanser

على اليمين هي علبة لكلنزر من فيلوسوفي أسمه بيورتي، قبل لا أعرف عنه أي شيء قررت أنه ما فرق معاي، طبعا أقصد أني ما شفت فرق لما استخدمته. بعدين عرفت أو سمعت إن مكوناته مو طبيعية، ما يهم. هو يهمني و تفرق معاي لو كان الشيء طبيعي (أرتاح له أكثر). لكن ما أعتقد هذا الشيء أثر على فعاليته، لأني أرجع و أقول ما أشوف أنه فادني. حتى ريحته مو سيئة، بس ما تحفز إنك تستخدمه علشان تنعشك الريحة مثلا.
* و أعتقد أنه طلع فيني حبوب، مو متأكدة، بس أظن أنه هو.

أصغر حجم منه ب 10 دولارات يعني تقريبا 37 ريال و نص يعني تقريبا 90 مل (أصغر من علبة الكولا). و أكبر حجم ب 41 دولار تقريبا 150 ريال و فيه تقريبا 700 مل. باختصار المنتج مو رخيص و لا أشوفه فعال، فأكيد ما راح أشتريه.

إذا كنتوا تبغون بديل أفضل أعتقد كلينزر الوجه من جاك بلاك أحسن، ماله ريحة (على الأقل من وجهة نظري)، حسيته لطيف على البشرة، و أحس بعد ما استخدمته خلا ملمس بشرتي ناعم (بعد الاستخدام مباشرة)، و فيه حبات صغيرة مرة (و ناعمة مرة)، أعتقد إنها تساعد على تقشير الجلد الميت. و مكتوب على العلبة إنه طبيعي و إنه تونر بنفس الوقت. و 90 مل منه أغلى من بيورتي بس بدولارين (حطوا ببالكم إنه 2 في 1) يعني كأنك بس تدفعين دولارين على التونر.

* يوصف (جاك بلاك) أنه كلينزر للرجال، شخصيا، ما أشوف تفرق كثير، أعتقد مشاكل البشرة وحدة (ما عادا آثار الحلاقة). 

Murad

 Rapid Age Spot and Pigment Lightening Serum

ما أعرف كيف آلية عمل هذي الأشياء، لكني أنتظر منها تصفي لي بشرتي من الآخر. هذا سيروم من ميراد (يسار) المفترض من عنوانه أنه يعالج مشاكل التبقيع بالبشرة. أكثر من مرة قلت لكم عندي آثار بعض الحبوب من سنين أغمق من باقي البشرة، كل اللي أطلبه لما أستخدم منتج 30  مل منه ب 60 دولار يعني تقريبا 225 ريال، أنه تتخلص لي من هذي الآثار. خليني أقول أولا، إني ارتحت له أكثر من السيروم اللي معاي (شريته مو عينة) من إيستي لودير، السيروم هذا حارق لي قلبي لأنه مو رخيص و لا سوا لي شيء من أكثر من سنة و أنا استخدمه، ما وقفت عنه إلا علشان أجرب اللي من ميراد.  ما أعرف إذا أنا أتوهم أو لا، بس أعتقد ميراد "خفف" لي آثار مرة خفيفة على خدي، لكن فيه كم نقطة قريبة من عيوني ما تغير فيها شيء. 

يعني لو تبغون تجربونه أعتقد أنه أفضل و أرخص من إيستي لودير. 

هل ممكن أشتريه، ما أظن، بأجرب أشياء ثانية، من هذي السيروم اللي توعدني إنها بتخفي البقع هذي، و أشوف لأي حد ممكن تكون فعالة. 

True Love

الشيء اللي ممكن ما أتكلم عنه كثير إني تقريبا ما عندي أي مستحضرات عناية شخصية أو مكياج، أحبه لدرجة إني ممكن أخلصه و أشتريه من جديد. لحد الآن ما أظن إني حصلت المنتج اللي يستحق إني أرجع أشتريه، بدل ما أجرب شيء جديد. لحد الآن أقصد لحد ما كتبت هذا الكلام.

أول شيء باتكلم عن مرطب البشرة هذا من سيمبل. ما أتذكر أنه أعجبني مرطب قبل، حبيت فترة إيستي لودير داي وير، بعدين على آخر فترة من استخدامي له ما عاد صرت أطيق ريحته (ريحته خيار). شريت بعدها جيرجينز ناتشورال قلو، و نفس الشيء ريحته ما عجبتني أبدا، تحملته فترة على أمل أنه يعطيني لون حلو، لكن ما فرق معاي، و لا عجبني قوامه. قررت أشتري سيمبل من دون ما أبحث (مو من عادتي) شفته قدامي و أخذته، لكن أعتقد أنه من أحسن الأشياء اللي سويته من دون ما أفكر فيها قبل. المرطب مرة خفيف، على طول يمتصه الجلد و أهم شيء إن ماله ريحة.

الشيء الثاني اللي بتكلم عنه هو هذا البام ستاين من ريفلون بذات هذا اللون اللي اسمه رانديفو (لونه برتقالي) أعرف لون برتقالي ممكن لما تقرونه تطلعون عيونكم (أنا نفسي ما توقعت أنه ممكن أحط على شفايفي شيء برتقالي). لكن لونه البرتقالي مره رايق أو ستيل أحس أنه يحول وجهي لوجه صيفي كأنه يقول أنا بإجازة، منه حبيت اللون البرتقالي، أعرف ممكن تقولون خييير ثاني، بس علشانه شريت بلش برتقالي، و بعد أعجبني (صدقوني حلو). ما أعرف ليه، أحس الحين صورتي مرة مشوهة بعيونكم بس إذا كانت خياراتي أول تعجبكم، أتمنى أنكم إلى الآن تثقون فيني :). 

وشي المستحضرات اللي ترجعون لها كل مرة تخلص، لأنكم تعرفون أنكم ما راح تلقون أحسن منها؟

Samples #2

مرة ثانية مع واحد من العينات اللي جربتها الفترة اللي فاتت، هذي المرة شيء له دخل بالعناية بالبشرة، بعد السعر هذي المرة عالي (أعتقد أعلى من سعر الشامبو). 

أولا خلوني أقولكم إني بعد كل هذي السنوات إلى الآن مالقيت المرطب اللي أعتقد أنه هو المرطب المناسب اللي يستاهل أرجع له من جديد. 

First Aid Beauty Dual Repair 

Face Cream deluxe sample

من الخيارات اللي طلعت لي بوحدة من المرات اللي جيت أشتري من سيفورا و خيروني وش أبغى من العينات، شفت هذا الكريم من فيرست أيد، و قررت إني أجربه، خصوصا إني شفت و قريت كثير من المدونين (بالتجميل) يمدحون بهذي الماركة و كريماتها. 

أولا خلونا نتكلم عن عن العلبة، العينة اللي أخذتها عبارة عن علبة بغطى صغيرة، أعتقد حجمها مناسب مرة للسفر، أو أنك تحطينها بالشنطة و تنقلينها أو تنقلها معك وين ما كنت. لكن للحجم الأصلي أعتقد إن العلبة مو مناسبة (نفس الطريقة تفتح الغطاء على علبة) بالعادة ما أحب المنتجات اللي تفتح بهذي الطريقة، أولا ما تعرفين كم كمية أخذتي، معرضة أكثر إنها تنكب و غير كذا أقل تعقيم، فممكن لو كان باليد شيء ممكن يسبب حساسية للبشرة و استخدمت الكريم كل الكريم بيتلوث. 

نجي الحين للإستخدام، استخدمت الكريم تقريبا لشهر، أقدر أقول أنه كان مرطب جيد، مرة خفيف، يعني ما يترك أثر زيت على وجهك، لكني ما أعتقد أنه يفرق كثير عن المرطب اللي استخدمه الحين (استخدم سيمبل) الشيء اللوحيد اللي يختلف فيه (بالنسبة لي) هي السعر سيمبل تقريبا ب 10 دولارات، و فريست أيد ب 44 دولار. 

من الآخر ما أعتقد إني ممكن أشتري الحجم الأصلي، لأني ما شفت شيء مختلف عن مرطب يباع بالصيدلية ب ربع السعر. 

Trustworthy

قبل فترة تكلمت لكم عن تمبلر اللي سويته علشان أحط فيه الأشياء اللي أتمناها. بعدها لقيت هذا الموقع أسمه Wantworthy فكرة الموقع أنك تجمعين فيه الويش ليست للأشياء اللي تبغينها، و لأن شكلة مرتب قررت أستخدمه لكن مو للأشياء اللي أبغاها، لكن للأشياء اللي جربتها، و حبيتها، و مستعدة أشتريها مرة ثانية، لو خلصت أو ضاعت أو خربت (لا قدر الله). 

أعرف إن القائمة مرة صغيرة، أولا لأني ما أعتقد راح أحط فيها ملابس أو أي شيء له علاقة بالفاشن (إكسسوار، جزم شنط) لسببن أولا لأن الموضة تتغير، ثانيا الأشياء هذي هي ذوقي الخاص، يعني ما يفيد أحد أنها عندي أو لا، و لأني أعتقد نسخ أذواق الناس شيء مو صحي أبدا (ممكن أحط فيها أشياء أساسية زي بناطيل جينز مثلا أو تي شيرتات. 

زي ما قلت لكم هذي الأشياء اللي عجبتني لدرجة إني راح أشتريها مرة ثانية و طبعا ما راح أحط شيء هنا، إلا إذا كنت جربته أكثر من مرة و اقتنعت فيه بقوة، علشان كذا ممكن أشياء تكلمت عنها في المدونة عجبتني ما حطيتها، لأن عندي قناعة إني راح ألقى شيء أحسن منها، أو إني ما جربتها وقت كافي لدرجة أقدر أقول إني ما راح أستغني عنها. 

هنا بتلقون رابط للقائمة، القائمة ممكن تزيد، ممكن تنقص (زي كل شيء)، لأني دايم أدور على أشياء أحسن و أرخص (مين ما يدور على أرخص و هذا الشيء معناه أنه يقدر يشتري أشياء أكثر). للمنتجات اللي فيها درجات، و الرابط ما يوصل على طول للدرجة اللي استخدمها، كتبت فوق الأشياء وش الدرجة اللي استخدمها. 

لو سويتوا قائمة مشابهة للأشياء اللي ما تقدرون تستغنون عنها، و مستعدين تشترونها لو ما كانت عندكم، لا تنسون تحطون الرابط بالتعليق، لأني أحب أعرف وش عجبكم، وأجرب أشياء جديدة. 

آخر شيء راح أحط رابط ثابت للقائمة على اليمين، و لو حبيتوا أتكلم عن أي شيء بهذي القائمة و أنا ما قد تكلمت عنه بعد علموني بالتعليقات.

بالمناسبة كسرت فرشة التقشير من سيفورا آحتاج آشتريها من جديد.

Bath Time

بأعرف كثير عملية الاستحمام لهم مو أكثر من مسألة نظافة، لكن بالنسبة لي هي أكثر من كذا، هي لغير النظافة، فرصة للإسترخاء و الابتعاد عن أي شيء ثاني بالحياة. خصوصا بعد التعب اللي تعب اللي تعبته و أنا أغطي أسابيع الموضة (هذا و أنا ما تحركت من مكاني). علشان كذا الاستحمام أو الباث فرصة لي علشان أتصرف كأنه الدنيا موقفة و لا شيء جالس يصير برا حدود الحمام، هذا اللي يخليني أقدر البانيو، و أقدر أي شيء بيساعدني إني أريح رآسي و جسمي الوقت هذا. 

صراحة ما عندي روتين معين للحمام أو للباث، أهم شيء عندي بالأشياء اللي استخدمه طبعا غير إنه ما تإذين، إن ريحته حلوة (وش أحسن شعور من إنك بعد ما تطلع من الحمام تحس بكل الروايح الحلوة تفوح منك). 

من الأشياء القليلة اللي رجعت و شريته نفسه هو هذا الجيل شاور من لوش بريحة العشب (أعرف إن الاسم ما يشجع، لكن صدقوني بعد ما تحطونه ريحته مره حلوة). شيء ثاني ثابت هو قفاز الصنفرة أو التقشير، إلي بالنسبة لي شيء أساسي بالحمام. 

بصراحة من أكثر الأشياء اللي حمستني إني أكتب هذا الموضوع هي الشمعة، قلت لكم قبل إني ما أعرف كثير عن الشموع، لكن لأنه تجيني إيميلات من بودي آند باث ووركز و كان فيه عروض على شموع الربيع (من الأشياء اللي عرفتها إن الشموع عندهم موسمية). و لأني زي ما قلت لكم أعجبتني شمعتهم فقررت الجايات كلها منهم (إلا إذا عرفت شيء أحسن) و رغم أنه ما خلصت الشمعة إلى الآن مع أنه حجمها صغير (ما أشغلها كل يوم) بس بقى فيها قليل. قلت لكم إني لما قريت أسماء الشموع حقات الربيع خفت تروح و لا تعجبني الروايح اللي بعدها (ما عجبتني روايح الخريف و الشتاء)، فقررت إني أشتري هذي الشمعة اللي اسمها بيتش كابانا. 

السكرب اللي من بودي شوب ريحته مرة حلوة "بزبدة الشيا" من زمان كنت استخدم الكاكاو، لكن هذي بالنسبة لي أحلى. بصراحة ما أشرب إيريل قراي، لكن أشرب شاهي أخضر مع النعناع من توايننقز (بس ما لقيت له صورة) بس إيريل قراي لذيذ بعد. 

الزيت هذا استخدمه بعد ما أخلص من الشاور أو الباث. الماركة هذي عندهم منتجات مرة كويسة، و أسعارهم رخيصة، أول شيء جربته منهم هو هذا الكريم بس جربت زي الكريم شيء زي الأصبع لكن ما عجبني، لكن هذا الزيت عجبني، مرة خفيف و ريحته حلوة، و أهم شيء أنه يرطب. 

آخر شيء هذا الشيء الأسود (اللي بعد شكله يخوف) هو زبدة مع حبوب من لوش، يرطب و يسوي صنفرة (خفيفة) بنفس الوقت و أهم شيء ريحته مرة حلوة (ما أظن راح أشتريه مرة ثانية مع أنه عجبني بس يحتاج أفرك البانيو بعد كل استخدام و أنا عجازة). 

إذا كنتم تحبون تسترخون بالحمام، وشو الأشياء اللي تحبون تستخدمونها؟

Burt's Bee: I think I'm in love

أعرف إني من زمان ما كتبت، وش أسوي؟ أحس عقلي ناشف، و لا أنا قادرة أكتب عن أي شيء أو أكمل أي فكرة. اللي يطمن أنه لسا عندي أفكار، المشكلة ما أعرف وش أكتب. ما علينا باتكلم عن شيء إلى وقت قريب أعرف أنه مو موجود بالسعودية، بس باكتب عنه لأني لازم أكتب شيء.

من قبل ما أسافر و أنا أقرأ عن ماركة بورتز بي، ما أعرف ليه كنت متحمسة إني أجربها، شيء يحسسني إنها طبيعية. للي ما يعرف الماركة و لا قد سمع فيها، هي ماركة تطلع مواد عناية زي الصاوبين و الشامبوات و الكريمات (هنا تلقون كلام أكثر عنها). 

المهم الفترة اللي فاتت شريت صابون يدين التغليف حقه حلو، بس ما عجبتني ريحته، هو أنا عندي مشكلتين صايرة ما تعجبني ريحة أي شيء، و من أصلي و أنا أغسل يدني أكثر من أرمش، لا تحسبون عندي هوس نظافة، لا بس قل دبرة، يعني مثلا ممكن أكل شيء شبس، بعدين أقوم أغسل و أرجع أكل بسكوت مالح !! (ما أعرف ليه ما أجمعهم بغسلة وحدة). المهم ما علينا تصبرت على ذاك الصابون و قررت المرة الجاية راح أشتري من بورتز بي. 

لما وقفت عند الستاند حق بورتز بي ما كان فيه إلا نوعين صابون الأول زنجبيل و حمضيات، و الثاني هذا اللي أنا حاطة صورته فوق بالشاهي الأخضر و ورق الليمون. ما أعرف صراحة هذا كل اللي تنتجه الشركة، أو فيها غيرها أنا ما شفتها، لكن لما شميت الإثنين، قررت آخذ الثاني، اللي هو الشاهي الأخضر ورق الليمون. 

بعد ما استعملته اليوم، أحس إن مرضي بيزيد، و بصير أغسل يدي كل شوي، ريحته علي اليد بذات مخيفة، من دون مزح، حتى و أنا جالسة أكتب هذا الكلام، كل شوي أرفع يدي عن الكيبورد و أشمه. أعتقد إني خلاص بادمن منتجات هذي الشركة. الشيء الوحيد اللي ما عجبني بالموضوع ما عجبني حجم العلبة أحسها شوي صغيرة خصوصا مقارنة بسعره (تقريبا 26 ريال). 

لو حصلتوا مكان يبيع منتجات هذي الشركة، لا تفوتون فرصة تجربونها لأني أعتقد إنها تستاهل تجريب، حتى لو ما عجبتكم (مع إني أشك). 

New Love

أعرف إن أغلبكم رجع من السفر، بس هذا ما يمنع إني أكتب عن شيء للأسف إني توي أكتشفه، مو توي توي، كنت أعرفه من قبل بس كل مرة أشوف هذا المحل (لوش) ألقى لنفسي عذر إني ما أجرب وش فيه. أتذكر أول مرة شفته كنت مسافرة و دخلت محله كان حاط صحون كبيرة فيها خلطات، صراحة ما كنت أعرف وش سالفة أي شيء كان حدي بمستلزمات العناية بالبشرة شامبو و شاور جيل، فخوفني المكان و طلعت :). 

المرة الثانية كانت بالمملكة اللي يبيع عرض علي شيء أحطه بالبانيو و يطلع ريحة، بس لأني ما كان عندي بانيو بعد بطلت، و لما شفت أسعاره حسيت أنه بودي شوب غالي. المرة هذي جتني هدية كذا علبة كبيرة فيها عدة مستحضرات من نفس المحل، بصراحة ما يحتاج تجربون شيء يكفي بس تشمون ريحة الأشياء، علشان تحبونها. 

ما راح أتكلم عن كل شيء كان بالعلبة، لأني إلى الآن ما جربت كل شيء ... لكن راح أتكلم عن بعض شاور جيل اللي يسوونها، و اللي كانت جاية مع باقي الأغراض. كان بالعلبة أكثر من شاور جيل، لها نفس الوظيفة بس ريحتها تختلف، فأعطيت أختي واحد، و تركت لي واحد اللي أنا حاطة صورته أسمه Happy Hippy و ريحته المفروض إنها قرايب فروت :) طبعا أقول إنه المفروض مو لأني مشككة بريحته، ريحته حلوة مرة، بس ما أتذكر إني شميت قريب فروت علشان أقول إن الريحة زيه بالضبط :). زي كل شيء عندهم فيه أكثر من حجم للأشياء، الشيء اللي وصلني حجم عبوته 100 مل و أهم ميزة حبيتها فيه أنه شامبو و شاور جيل بنفس الوقت، طبعا الفكرة اللي ببالي، مع هذا الحجم (اللي مسموح فيه بالطيارات، ولا يآخد مكان كبير)، و أهم شيء يوفر عليك أخذ كومة أشياء للسفر بما أنه 2 في 1 :). جربته كشامبو (لأن هذا المهم بالنسبة لي) أكثر الشاور جيل تكون شوي قوية على الشعر أو ما ترغي، لكن هذا طلع رغوة حتى بموية بالعادة ما تطلع رغوة كثير. قلت لكم إني حبيته و حبيت الفكرة. 

زي ما قلت لكم قبل المحل مو رخيص (خصوصا اللي هنا بالسعودية، يمكن يزيد من 15 ل 40 ريال عن أماكن ثانية) فلو كنتوا لسا ما رجعتوا من سفراتكم، و تعرفون أنه قريب منكم، لا تفوتون زيارته. 

قد جربتوا أي شيء من لوش؟ وش أكثر شيء عجبكم منهم لو كنتوا جربتوا.