Samples #9

هذي المرة باتكلم عن شيئين يجون مع بعض، أو المفروض أنهم يكونون مع بعض، الأول مستحضر للشعر، و الثاني للبشرة. زي كل العالم ممكن النتايج تكون عليكم مختلفة، بس أنا أحب قبل ما أشتري شيء (بذات لما ما يكون رخيص) أعرف رأي الناس فيه، و كثير مرات أقتنع بكلامهم.

BUMBLE AND BUMBLE Surf Shampoo & Conditioner

للي مهتمين بأشياء التجميل، و متابعين يمكن سمعوا كثير عن بمبل آن بمبل، بذات خط "سيرف"، تجربتي الأولى مع بمبل آن بمبل، ما كانت مميزة مرة، و لا تحمست أشوف أشياء ثانية منهم، لكن من كلام الناس عن سيرف، قررت أجرب عينة منه. بس علشان يكون عندكم فكرة عن المنتج قبل لا أكمل للي ما يعرف، هو المفترض يعطيك التأثير اللي يصير لشعرك مع السباحة بالبحر. صراحة أنا ما أعرف وش يتكلمون عنه، اللي أعرف إن شعري مع البحر و الرطوبة ينتفش، و يصير أفرو، بس مو أفرو ظريف أبدا. لما جربت هذولا الإثنين شعري كورلي/ويفي أحس أنه حافظ على شكل شعري بشكل حلو و لا خلاه كأنه شعر محتاس. اللي أظنه مو متأكدة إن المنتج فيه ملح بحر، فخلى شعري شوي يابس (كأنه عليه سبري) بس من دون ما يكون ناشف من دون حركة، بس شيء يخليه يمسك الشكل. 

الشامبو ب 24 دولار، و البلسم ب 26 دولار، ل 250 مل، أعتقد لو كنت بأداوم و أقابل ناس يوميا بشعر مفكوك (مفلول) أظن أنه يستاهل سعره، أو للي عندها شعر كورلي، و تحب لفاته و تبغى تحافظ على شكلها كل يوم. 

PHILOSOPHY Hope in a Jar Day & Night 

ما راح أطول بهذا، قلت لكم كل شخص مختلف، هذي ثاني تجربة لي مع منتجات فيلوسفي، و لا أعجبتني، فيها شيء صناعي مرة، لما أحط شيء على وجهي، أبغى أحس أنه طبيعي، ما أتذكر أي واحد فيهم كريم الليل أو النهار، بس ريحته كانت مرة سيئة، و لا شفت شيء مختلف و لا ترطيب، كريم النهار ب 42 دولار و كريم لليل ب 50 دولار لحوالي 60 مل للسعر نفسه أو أرخص بعد أدفع لكوريس، أولا لأن منتجاتهم إلى نسبة كبيرة طبيعية، و ثانيا ريحتها حلوة، و الأهم إني شفت نتايج. 

كل المنتجين موجودين عند سيفورا.كم، مو متأكدة كل محلات سيفورا بالعالم (السعودية خصوصا) تبيعها أو لا. 

Sample #8

هذي المرة بعد باكتب رأيي بشيئين، الأول مسكارا ذير رييل من بينيفيت. و الثاني كلنزر من فريش، للي ما يعرف فريش، قد مدحت مرطب الشفايف حقهم قبل، و صراحة أعتقد أنه هدية مرة حلوة لأي أحد بأي سن. خلونا نبدأ بالمراجعات:

BENEFIT COSMETICS They're Real! Mascara

أقدر أقول إني محظوظة إني من فترة مرة طويلة ما شريت أي ماسكارا، أنا بصراحة ناوية لو تخلص أو تنشف المسكارات اللي عندي راح أشتري شيء رخيص، و خصوصا حاطة ببالي شيء من فيزشين فورميلا، لكن من سنة و أكثر شوي و أنا بس أحصل عينات دليوكس لمسكارات هاي إيند، آخر وحدة شريتها كانت من أيكيو، و لا عجبتني، و قبلها كنت أشتري ديور شو، و لا أشوف إنها مميزة بأي شكل. 

المرة هذي حصل و جربت عينة من ذير رييل من بينفيت، ما راح أتكلم لكم كأني فاهمة بالمسكارات و الأشياء هذي، لكن باتكلم عن الشيء اللي حسيته. أهم شيء مختلف حسيته، هو الفرشة حقت الماسكارا، ما أعرف من إيش مصنوعة، بس إنها مرة حادة أو قاسية ما أعرف كيف أصفها، بس ما قد شفتها بأي ماسكارا قبل، أعتقد إنها ميزة، لأنه تخلي الرموش مرة متفرقة، و لا يتكتل عليها الماسكارا (ما أحب التكتل، سمعت أنه فيه ناس يحبون) لو بغيتوا شيء يطول الرموش من دون ما يكتلها أكيد أنصحكم تجربون هذي. سعرها تقريبا 86 ريال، بس أتوقع بتكون بالمحلات بالسعودية أغلى (علموني لو عرفتوا كم سعرها).

FRESH Soy Face Cleanser

الشيء الثاني على عكس المرطب اللي منهم و عكس الماسكارا ما عجبتني أبدا، مو أبدا أبدا، بس أنه مكتوب على العلبة إنها للوجه و العين، و بعد مكتوب على العينة و بموقع سيفورا أنه يشيل حتى الماسكارا. استخدمته و أوجع عيني مرة، ريحته غريبة شوي، بس عادي ما تعلق يعني مو قوية، بعد كاتبين أنه مرطب، ما شفت أنه رطب، لكنه ما نشف. بالنسبة لي بشكل عام، مو مستعدة أدفع لكلنزر غالي، ما أعرف إيش المكونات اللي فيه، و أنا أقدر أشيل المكياج بزيت طبيعي أفود لي و أرخص. سعر العلبة اللي مقاسها 150 مل ب 142 ريال. 

Sample #7

الشيء اللي باتكلم عنه، يمكنه من أكثر الأشياء اللي انبسطت، كنت متحمسة إني أجربها. الشيء هذا هو BECCA shimmering skin perfector opal أو باختصار هو هايلايتر من بيكا. إلى وقت قريب أعرف أنه بيكا ما تنباع بالسعودية، ما أعرف إذا كانت تنباع الحين أو لا، أو بأي دولة قريبة بالخليج.

المهم من زمان و أنا خاطري باهايلايتر هذا، أو علشان أكون أكثر دقة، كان خاطري أجربه. 

مشكلتي معاه دايم كانت أنه زي ما قلت قبل ما لقيت بيكا بالسعودية. لما شفت أونلاين، لقيت أنه بيكون الشحن تقريبا بسعر المنتج نفسه. المنتج سعره 41 دولار يعني تقريبا 150 ريال، و منطقيا ما أظن فيه هايلايتر يستاهل 300 ريال (على الأقل هذي وجهة نظري) خصوصا إني ما قدر جربته، مع إني أحب الهايلايتر، و أحب البشرة اللي تلمع. مو تلمع كأنه قناه قليتر، قصدي تلمع من النظارة. 

قبل فترة حصل لي أجرب عينة من سيفورا، بدرجة أوبل opal. أقدر أقولكم، إذا فيه هايلايتر، فهو هذا الهايلايتر. اللمعة اللي يعطيها الوجه لمعة كأنك طول عمرك ما تكلين غير فواكة و تشربين موية. مو لمعة قليتر لا نظارة و صحة، باختصار أقدر أقول إنها صحة (كذبية) بقارورة. 

بعد ما جربتها أقدر أقول أنه يستاهل سعره (جربت أكثر من هايلايتر قبل هاي إيند و درقستور) جربت مايك آب فوريفر، و بينفيت، ما فيه شيء زي هذا. أتمنى بجد لو يبيعونه بحجم أقل (الحجم اللي الحين موجود و الوحيد هو 50 مل)  يعني تقريبا بحجم أساس. لو عرضوا حجم أصغر للنص بعد بنص السعر، أعتقد أنه منطقي، لأنه مين بيخلص هايلايتر بهذا الحجم؟!! بالنهاية أنت ما تحطينه على كل وجهك، و لو كنت مثلي، ما راح تحطينه كل يوم. 

آخر شيء بأقوله، إذا حصل لك فرصه تجيبنه، أعتقد أنه من الأشياء اللي تستاهل الواحد "يدلع" نفسه فيها. جربوه متأكدة بيعجبكم، بالنسبة لي، لو بغيت أشتري هايلايتر هاي إيند ما راح أفكر بشيء غيره. بالمناسبة إذا كنتوا تعتقدون أنه غالي، هايلايتر بينفيت هاي بيم و سن بيم كميتها أقل من بيكا بأكثر من النص، و سعرها أكثر من نص سعر بيكا بدولار. 

Sample #6

أظن من بديت سلسلة العينات هذي، ما كتبت شيء عن له شغل بالمكياج. تعرفون إني أحب المكياج، خصوصا المكياج الزين، و أعتقد أكثر شيء خسارة إن الواحد يدفع فلوس على مكياج بالنهاية ما يطلع زين، خصوصا لما يكون غالي، علشان كذا أظن إن العينات للمكياج شيء مهم جدا. 

الفترة اللي فاتت كنت أدور لي على أساس خفيف، بس يعني يعطي درجة معينة من التغطية (ما أنتظر يغطي آثار الحبوب، لأني تأكدت ما فيه شيء راح يغطيها إلا كونسيلر) لكن أبغى يعطيني لون حلو، و متواسي، يعني مو كل جزء من وجهي درجة. 

المهم أخذت لي عينة من بوشكا بي بي كريم، أولا خلوني أقولكم إني ما أصدق بالبي بي كريم، جربت لوريال و لا أعجبني، جربت ديور (أعرف كثير يمدحون بي بي ديور و بعد ما أعجبني) على الأقل درجاته ما عجبتني و لا شفته أعطى وجهي أي إضافة. بعد جربت د. براندت مات بي بي كريم و لا شفت أي شيء مميز. 

لما شفت عينة بوشكا، قررت إني أجربها (بس عن قولة) خصوصا أنه مكتوب عليه أنه ما فيه زيت (أنا بشرتي دهنية) و أنه يآخذ لون البشرة. 

بكل أساس جربته بعد فترة، خصوصا لما يكون الجو حار يطلع وجهي يلمع بشكل مثير، و لما يكون الأساس "مات" أو مطفي، ألاحظ أنه يختفي بسرعة من وجهي، ما أعرف كيف. جربت أحط بودرة بس ما تفرق كثير، و لا عندي استعداد أحط بودرة طول اليوم، أنا الشيء الوحيد من المكياج اللي ممكن أشيله معاي، و بس إذا كنت رايحة لمناسبة هي الروج. المهم جربت بوشكا، أعتقد أنه يعطي لون حلو، و متساوي على كل البشرة جلست فيه تقريبا أربع ساعات (ما أجلس بالمكياج أكثر من كذا) و لا أعتقد أنه شكله طلع بايخ، و لا صار وجهي يلمع (صحيح كنت حاطة بودرة) بس مرة قبل جربته لفترة أقصر و لا لمع وجهي. 

الكريم زي ما قلت لكم من دون زيت، و يآخذ لون البشرة (أعتقد أنه ميزة مهمة خصوصا لما يتغير لون بشرتك، فما تضطرين لآساسين) و فيه إس بي إف 27. 

سعر العلبة اللي فيها تقريبا 50 مل 38 دولار يعني 142 ريال، بالنسبة لي مقارنة ب بي بي ديور اللي فيها تقريبا 30 مل و سعرها 44 دولار يعني 165 ريال، أظن إني أفضل بوشكا، حتى لو ما جربت ديور بي بي لفترة أطول. 

Samples #5

أعرف من زمان عن العينات، هذي استراحة عن الملابس و الفاشن بعد شهر كامل من الملابس، قلت خلنا نكتب شيء مختلف. هذي المرة جينا لشامبو. أعرف تكلمت قبل عن شامبو، و أحس أنكم بتقولون ليه أجرب شامبوات. الصراحة إني إلى الآن ما حصلت شامبو أعتقد إني أحبه، بنفس الوقت ما أقدر أستوعب فكرة الشامبوات الغالية. 

الفترة اللي فاتت كنت أستخدم شامبو من ترازمي اسمه بلاتينيوم سترينقث سعره 5 دولار تقريبا ل 740 مل. كثير يمدوحون منتجات ترازمي (واقي الحرارة حقهم جيد). و خصوصا قريت مدح لهذا الشامبو، فقررت أجربه. 

Phyto

Phytokératine Repairing Shampoo

مشكلتي كانت مع ترازمي أني أعتقد أنه طيح شعري بكثافة ما قد شفتها. صحيح كان شكل شعري معاه حلو، لكن أحس أنه معدل الشعر المتساقط زاد بقوة، فقررت أجرب عينة عندي من فيتو. 

صراحة ما كنت أعرف العينة اللي عندي لأي نوع من الشعر، بس كان كل همي أوقف ترزامي، و لأني اقترحت قبل فترة لأختي شامبو من فيتو بس لأنه تدور شامبو جيد، و ما كان يهمها السعر، فقلت له أنهم يمدحون هذي الماركة، و جربتها و أعتقد إنها راضية عن النتايج. 

العينة اللي عندي اسمها فيتوكيراتين (ما أعرف وش علاقة الكيراتين هنا، و هل له شغل بالكيراتين اللي يسوونه بعض الناس أو لا)، لكن لما قريت وصفه قالوا أنه يصلح "أكثر الشعور ضعفا". قالوا كلام كثير منه أنه يخلي الشعر لامع و صحي. أول مرة جربته قررت أجربه من دون بلسم (استخدم أورقانكس أرغان). الشيء اللي حسيته إن الشعر اللي يتساقط بالعادة قل. لكن شكل شعري مو مرة حلو (يمكن الجو كان رطب ولا ساعد)، لكن كان فيه شعرات كثيرة طايرة. المرات اللي بعده استخدمته مع البلسم و أحس النتيجة كانت أحسن (من ناحية الشكل). 

ريحة الشامبو حلوة (مو قوية)، لكن أختي تقول اللي عندها مو حلوة ريحته، و أعتقد أنه قلل تساقط شعري، و حسيت بإحساس مريح و أنا أفركه على فروتي. علبه تجي بعلبة معدنية (ما أعرف إذا كان هذا يفيد المنتج أو لا) لكن 200 مل تقريبا تباع العلبة ب 19 دولار يعني تقريبا ب 70 ريال. 

الآن أنا تخلصت من ترازمي، و جالسة أجرب شامبو جديد (أغلى من ترازمي). إذا شفت أنه حل مشاكل شعري أكيد باستمر عليه. أما لو أعتقدت أنه ما فيه فايدة، أظن إني بافكر بمنتج من فيتو، حتى لو ما أعجبني شكل شعري، لأني أعتقد الشكل نلقى له حل مع أدوات التسريح، بس الصلع ماله حل P:. 

Samples #4

أحس أنكم بتقولون بعد هذي المرحلة، طيب وش اللي مستعدة تشترينه P:؟ قلت لكم قبل إنه أغلب الأشياء اللي جالسة أجربها سعرها غالي، ما عندي استعداد أدفع ريال زيادة بشيء ما راح يفرق معاي. لأني زي أغلب الناس (أظن) أحتاج شيء يقنعني ليه أصرف فلوسي على شيء ما أضمن نتايجة بالمقابل أقدر أشتري بهذي الفلوس لبس أو مكياج أحبه :).

Korres Wild-Rose+Vitamin C

Advanced brightening sleeping facial 

زي كل الأشياء الثانية اللي تكلمت عنها كلها عينات و لا جربتها بالحجم الأصلي، بالنسبة لي أقدر أقول إنها كانت كمية كافية علشان أقرر إذا المنتج عجبني أو لا. 

بصراحة قبل لا أجرب هذا المنتج ما كان لي بالكريمات الليلية، أساسا ما أفهم هدفها (إلى الآن ما أعرف هدفها)، أعرف إنها بالعادة تكون أثقل من كريمات الصباح (اللي تطلعين للناس فيها) لكن هل فيه هدف معين أنه تحط بس بالليل، ما عندي فكرة. 

جربت هذا المنتج من كوريس، لأني سمعت كلام كثير عن جودة منتجات كوريس. صراحة بالبداية كنت أحسب أنه مرطب شفايف لما أخترته، لكن لما جيت أجربه قريت على العلبة قريت أنه كريم "ليلي" فكرته أنه يفتح البشرة و يعطيها لون واحد (زي كثير من الأشياء اللي أنا مهتمة بتجربتها) انبسطت و قلت خلني أشوف. أولا خليني أقولكم أنه أي شيء ورد أو زهر مبدئيا فايز بالنسبة لي على الأقل من ناحية الريحة :). من اسمه ورد بري ريحة الكريم مرة حلوة، ثقيل و كمية قليلة منه تكفي للوجه كامل. خليني أقولكم إني بعد ما غسلت وجهي وحطيته علشان أنام أول مرة أحس إني أنام كشخص راقي (من الريحة). لما قمت الصباح لقيت كثير من الحبوب اللي على جبهتي (تطلع لي حبوب صغيرة على جبهتي بعض المرات مع الحر) تقريبا اختفت. قلت يمكن من الكلنزير 

(كنت استخدم بيورتي ذاك الوقت) فقررت الليلة اللي بعدها ما استخدمه، ما شفت فرق، الليلية اللي بعدها قررت ما استخدم الكلنزير و أرجع للكريم، لما صحيت لقيت تقريبا كل الحبوب اختفت. 

بصراحة صرت أتحمس لروتين النوام علشانه، رحت أقرأ عن كوريس و عن فيتامين سي لأنه مكتوب على العلبة أنه معاه فيتامين سي. كوريس يقولون إن منتجاتهم طبيعية (بالنسبة لي هذا شيء مهم). و لما قريت عن فائدة فيتامين سي للبشرة، قريت أنه يرجع الكولاجين للبشرة (يعني مفيد علشان يخلي البشرة شابة) و يساعد على تجدد خلاياه.  

المنتج حجمه 40 مل و سعره 48 دولار يعني تقريبا 180 ريال. 

أعتقد مشكلتي الوحيدة معاه أنه الواحد يدخل أصبعه فيه، يعني مو عصار مشكلتي مع هذي الطريقة من التعليب أنه الواحد ممكن يآخذ كمية كثيرة من المنتج من دون فايدة، ممكن ينكب بسهولة، و ممكن يتوسخ أو يتجرثم. مع هذا مستعدة أشتريه، و أعتقد أني راح أحطه على قائمة الأشياء اللي ممكن أشتريها. 

آخر شيء أعتقد أنه هدية مرة حلوة لأمك مثلا أو أي أحد تعرفين أنه بينبسط على هذي الأشياء.

Samples #3

هذي المرة قررت إني أحط أكثر من منتج بريفيو واحد. السبب إنه ما فيه كلام كثير أتكلم فيها عن المنتجات هذي. ممكن أقدر أختصر كلامي عنها إني ما حسيت فرق أو فرق كبير. ما أقدر أقول إن الكلام هذا ينطبق على كل الناس، لكن زي كل ريفيو لمنتج، هذا رأيي فيه.
كل الثلاثة منتجات، منتجات عناية بالبشرة (الإثنين اللي على اليمين كلينزرز) و اللي على اليسار سيروم لتفيتح البشرة. و معالجة التبقيع اللي يطلع عند بعض الناس. 

Philosophy Purity Made Simple 

Facial Cleanser
&
Jack Black
Pure Clean Daily Facial Cleanser

على اليمين هي علبة لكلنزر من فيلوسوفي أسمه بيورتي، قبل لا أعرف عنه أي شيء قررت أنه ما فرق معاي، طبعا أقصد أني ما شفت فرق لما استخدمته. بعدين عرفت أو سمعت إن مكوناته مو طبيعية، ما يهم. هو يهمني و تفرق معاي لو كان الشيء طبيعي (أرتاح له أكثر). لكن ما أعتقد هذا الشيء أثر على فعاليته، لأني أرجع و أقول ما أشوف أنه فادني. حتى ريحته مو سيئة، بس ما تحفز إنك تستخدمه علشان تنعشك الريحة مثلا.
* و أعتقد أنه طلع فيني حبوب، مو متأكدة، بس أظن أنه هو.

أصغر حجم منه ب 10 دولارات يعني تقريبا 37 ريال و نص يعني تقريبا 90 مل (أصغر من علبة الكولا). و أكبر حجم ب 41 دولار تقريبا 150 ريال و فيه تقريبا 700 مل. باختصار المنتج مو رخيص و لا أشوفه فعال، فأكيد ما راح أشتريه.

إذا كنتوا تبغون بديل أفضل أعتقد كلينزر الوجه من جاك بلاك أحسن، ماله ريحة (على الأقل من وجهة نظري)، حسيته لطيف على البشرة، و أحس بعد ما استخدمته خلا ملمس بشرتي ناعم (بعد الاستخدام مباشرة)، و فيه حبات صغيرة مرة (و ناعمة مرة)، أعتقد إنها تساعد على تقشير الجلد الميت. و مكتوب على العلبة إنه طبيعي و إنه تونر بنفس الوقت. و 90 مل منه أغلى من بيورتي بس بدولارين (حطوا ببالكم إنه 2 في 1) يعني كأنك بس تدفعين دولارين على التونر.

* يوصف (جاك بلاك) أنه كلينزر للرجال، شخصيا، ما أشوف تفرق كثير، أعتقد مشاكل البشرة وحدة (ما عادا آثار الحلاقة). 

Murad

 Rapid Age Spot and Pigment Lightening Serum

ما أعرف كيف آلية عمل هذي الأشياء، لكني أنتظر منها تصفي لي بشرتي من الآخر. هذا سيروم من ميراد (يسار) المفترض من عنوانه أنه يعالج مشاكل التبقيع بالبشرة. أكثر من مرة قلت لكم عندي آثار بعض الحبوب من سنين أغمق من باقي البشرة، كل اللي أطلبه لما أستخدم منتج 30  مل منه ب 60 دولار يعني تقريبا 225 ريال، أنه تتخلص لي من هذي الآثار. خليني أقول أولا، إني ارتحت له أكثر من السيروم اللي معاي (شريته مو عينة) من إيستي لودير، السيروم هذا حارق لي قلبي لأنه مو رخيص و لا سوا لي شيء من أكثر من سنة و أنا استخدمه، ما وقفت عنه إلا علشان أجرب اللي من ميراد.  ما أعرف إذا أنا أتوهم أو لا، بس أعتقد ميراد "خفف" لي آثار مرة خفيفة على خدي، لكن فيه كم نقطة قريبة من عيوني ما تغير فيها شيء. 

يعني لو تبغون تجربونه أعتقد أنه أفضل و أرخص من إيستي لودير. 

هل ممكن أشتريه، ما أظن، بأجرب أشياء ثانية، من هذي السيروم اللي توعدني إنها بتخفي البقع هذي، و أشوف لأي حد ممكن تكون فعالة. 

Samples #2

مرة ثانية مع واحد من العينات اللي جربتها الفترة اللي فاتت، هذي المرة شيء له دخل بالعناية بالبشرة، بعد السعر هذي المرة عالي (أعتقد أعلى من سعر الشامبو). 

أولا خلوني أقولكم إني بعد كل هذي السنوات إلى الآن مالقيت المرطب اللي أعتقد أنه هو المرطب المناسب اللي يستاهل أرجع له من جديد. 

First Aid Beauty Dual Repair 

Face Cream deluxe sample

من الخيارات اللي طلعت لي بوحدة من المرات اللي جيت أشتري من سيفورا و خيروني وش أبغى من العينات، شفت هذا الكريم من فيرست أيد، و قررت إني أجربه، خصوصا إني شفت و قريت كثير من المدونين (بالتجميل) يمدحون بهذي الماركة و كريماتها. 

أولا خلونا نتكلم عن عن العلبة، العينة اللي أخذتها عبارة عن علبة بغطى صغيرة، أعتقد حجمها مناسب مرة للسفر، أو أنك تحطينها بالشنطة و تنقلينها أو تنقلها معك وين ما كنت. لكن للحجم الأصلي أعتقد إن العلبة مو مناسبة (نفس الطريقة تفتح الغطاء على علبة) بالعادة ما أحب المنتجات اللي تفتح بهذي الطريقة، أولا ما تعرفين كم كمية أخذتي، معرضة أكثر إنها تنكب و غير كذا أقل تعقيم، فممكن لو كان باليد شيء ممكن يسبب حساسية للبشرة و استخدمت الكريم كل الكريم بيتلوث. 

نجي الحين للإستخدام، استخدمت الكريم تقريبا لشهر، أقدر أقول أنه كان مرطب جيد، مرة خفيف، يعني ما يترك أثر زيت على وجهك، لكني ما أعتقد أنه يفرق كثير عن المرطب اللي استخدمه الحين (استخدم سيمبل) الشيء اللوحيد اللي يختلف فيه (بالنسبة لي) هي السعر سيمبل تقريبا ب 10 دولارات، و فريست أيد ب 44 دولار. 

من الآخر ما أعتقد إني ممكن أشتري الحجم الأصلي، لأني ما شفت شيء مختلف عن مرطب يباع بالصيدلية ب ربع السعر. 

Samples #1

هذي مو أول مرة أتكلم عن عينات، لكن هذي أول مرة راح أتكلم عنها، بعد ما قررت إني أكتب عن العينات اللي جربتها و رأيي فيها. أولا لازم أبين لكم أني دايم أميل لطلب عينات من أشياء النظافة و الرعاية الشخصية، زي الشامبوهات و كريمات الجسم، ثم المكياج ثم آخر شيء العطور. السبب هو لأنه الأشياء هذي صعب تجريبها بالمحل أو حتى مستحيل، أما المكياج، مو دايم التجريب بالمحل يكفي، أو حتى ممكن فيه منتجات ما تجي على بالك. أما العطورات فهي بسيطة بخي العطر، و إذا كنتم تبغون تتأكدون الريحة تعجبكم أو لا، خذوا الكرت اللي بخيتوا معاكم و أنتظروا حتى ما يبرد و خلاص انتهت التجربة. 

هنا راح أحط لكم الأشياء اللي جربتها، على حسب وش خلصت أول. 

Bumble and Bumble 

Thickening Shampoo and Conditioner

دايم كنت أسمع عن بمبل آند بمبل لما يجي الموضوع لمستحضرات الشعر. صراحة ما قد فكرت أشتري منهم لأن أسعاره مو رخيصة، و لا فيه شيء بشعري أشكي منه لدرجة أظن أني بحاجة لشامبو ب 24 دولار، 90 ريال تقريبا. 

لما شفت أنهم عارضين عينة، صراحة ما انتبهت وش نوعية الشامبو المعروض (يعني لأي شعر) بس أضفته للسلة، لأني خطر ببالي أشوف وش اللي يخلي كل هذي العالم تتكلم عن منتجاتهم. 

الفترة اللي فاتت كنت مسافرة للشرقية، و شعري عنده مشاكل مع الجو الرطب، ينتفش و تصير كل شعرة لحال. بالبداية استخدمت الشامبو اللي الحين أستخدمه (استخدم شامبو ترازمي بلاتينيوم). لكن شعري انتفش بزيادة لأن ترازمي تقريبا يخلي الشعر ما فيه زيت. طلعت العينة اللي معاي و لقيت إنها للشعر الخفيف و إنها تثقلة، شعرتي مو أخف شعرة بالعالم، لكنها مو ثقيلة أبدا، ففكرت قلت يمكن يثقل شعري و لا ينتفش. جربت الشامبو مع البلسم، و أقدر أقول أن شعري معاه (مع جو الشرقية) بالثلاثة مرات اللي استخدمته (لأنه العينة تقريبا تكفي ثلاث استخدامات لشعر قصير) كان جدا (عاقل) و تقريبا التمت أكثر الشعرات الطايرة. 

هل ممكن أشتريه؟ ما أظن لأني مو ساكنة بالشرقية و لا أطلع بمناسبات فيها، لو كنت أطلع كان ممكن فكرت فيه و استخدمته للمناسبات الخاصة (أشتري أصغر حجم اللي ب 8 دولارات). لكن زي ما قلت لكم ما أعتقد فيه أي سبب ممكن يخليني الآن أشتري شامبو و بلسم بتقريبا ب 180 ريال. 

بالمناسبة وش رأيكم بالشكل الجديد للمدونة؟